ᤛᤣ᤺ᤰᤕᤢᤰᤔᤡᤒᤠᤜᤠ᤹ 18 - LIFOTNTᤐᤠᤘᤗᤧᤴ ᤁᤥᤖᤴᤌᤡ ᤕᤧᤰᤕᤰᤁᤥ 1 ᤂᤧᤴ ᤀᤣᤃᤠᤱ ᤐᤠᤘᤗᤧᤴ ᤀᤧᤌᤧᤴᤛᤗᤠᤶ ᤁᤥᤖᤴᤌᤡ ᤕᤧᤰᤕᤰᤁᤥ ᤐᤣ॥ 2 ᤂᤧᤵᤔᤥ ᤂᤢᤏᤧ᤹ ᤀᤁᤫᤡᤗᤠ ᤔᤧᤵᤔᤏᤠᤒᤠ ᤕᤜᤢᤍᤡᤎᤡᤰ ᤋᤢᤔᤢ॥ ᤂᤧᤴ ᤐᤥᤴᤋᤛ ᤗᤠᤈᤣ᤹ᤒᤠ ᤘᤕᤧ॥ ᤂᤧᤴ ᤂᤠᤖᤰ ᤀᤡᤋᤠᤗᤡᤗᤠᤶ ᤔᤧᤸᤗᤡᤱᤃᤧᤴ ᤁᤢᤔᤣᤳ ᤐᤪᤡᤛ᤻ᤁᤡᤗᤠ᤺ᤴᤏᤢ ᤋᤩᤧᤛᤡᤀᤠᤱ ᤘᤕᤧᤳᤇᤡ. ᤌᤣᤀᤠᤱᤓᤧᤸᤗᤧ ᤐᤕᤶ ᤜᤠᤱ ᤰᤗᤠᤀᤢᤍᤡᤕᤛᤖᤧ ᤁᤠᤰ ᤕᤜᤢᤍᤡᤜᤠ᤹ ᤖᤥᤔ ᤕᤧᤰᤕᤰᤁᤡᤴ ᤐᤰᤌᤩᤧᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤶᤛᤧ ᤐᤠᤘᤗᤧᤴ ᤐᤣ. 3 ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤧᤰᤁᤣᤀᤣ ᤂᤢᤏᤧ᤹ᤀᤠᤱ ᤛᤠ᤺ᤱᤃᤠᤜᤡᤶ ᤂᤠᤵᤔᤠ ᤋᤣᤳ ᤁᤧᤎᤠᤰᤐᤠ ᤘᤕᤧᤒᤠᤸᤗᤧ ᤂᤧᤱᤜᤠ᤹ᤏᤢᤀᤣ ᤛᤥᤖᤡᤰ ᤘᤕᤧᤖ ᤕᤠ᤺ᤶᤒᤰ ᤆᤥᤃᤧᤖᤥ॥ 4 ᤜᤧᤰᤁᤩᤠᤱ ᤁᤠᤰ ᤏᤠ᤺ᤶᤛᤡᤱ ᤕᤧᤴ ᤌᤵᤔᤣ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤕᤜᤢᤍᤡᤜᤠ᤹ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ ᤐᤠ᤺ᤴᤌᤰᤋᤧᤖ ᤂᤧᤱᤜᤠ᤹ᤖᤧᤀᤠᤱ ᤕᤧᤛᤢᤴ ᤏᤛᤠᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤐᤥᤎᤰ ᤆᤥᤃᤢᤛᤡᤖᤥ॥ 5 ᤛᤡᤗᤠᤛ ᤏᤢ ᤋᤡᤔᤥᤌᤡᤴ ᤔᤧᤛᤣᤍᤥᤏᤡᤕᤠᤗᤠᤶ ᤂᤧᤵᤔᤥ ᤁᤧᤖᤧᤳᤇᤡᤀᤠᤱ ᤐᤠᤘᤗᤧᤴ ᤁᤠᤰ ᤕᤧᤶᤔᤥ ᤛᤢᤏᤠᤀᤡᤱ ᤛᤧᤔᤠ ᤏᤢ ᤕᤜᤢᤍᤡᤜᤠ᤹ ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤕᤧᤛᤢᤴ ᤏᤣᤖᤥ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠ ᤕᤠ᤺ᤶᤒᤰᤁᤥ ᤀᤠᤸᤗᤛᤠᤱ ᤛᤠ᤹ᤖᤡᤰ ᤑᤴᤇᤡᤱᤗᤥ॥ 6 ᤁᤖ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤔᤧᤀᤳᤋᤢᤖ ᤁᤢᤏᤠ ᤔᤧᤎᤠᤛᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤱᤜᤠ᤹ᤏᤢ ᤛᤡᤳᤇᤡᤱᤅᤠᤱ ᤘᤠ᤹ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤐᤠᤘᤗᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤢᤍᤣ᤺ᤳᤋᤡᤴ ᤛᤠᤰᤂᤢᤖ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤠᤶᤍᤡᤱ ᤐᤡᤔᤠ ᤀᤠᤕᤠ᤺ᤶᤒᤰᤁᤡᤴ ᤆᤢᤖᤧᤖᤥ॥ ᤂᤡᤏᤡ᤹ ᤁᤧᤛᤩᤧ᤹ᤀᤡ ᤁᤧᤔᤧᤃᤡᤛᤠᤱ ᤀᤡᤱᤃᤠ᤹ ᤌᤣᤀᤠᤱ ᤀᤠᤵᤋᤡᤰ ᤔᤧᤄᤥᤀᤠᤴᤗᤥ॥ ᤀᤠᤸᤗᤀᤠᤱᤎᤥᤃ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤛᤢᤏᤠᤀᤡᤱ ᤀᤡᤱᤓᤥᤛᤧ ᤐᤣᤃᤠᤱᤗᤥ॥” 7 ᤜᤧᤰᤁᤣᤗ᤹ᤖᤡᤰ ᤐᤠᤘᤗᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤗᤠᤶ ᤗ᤺ᤴᤍᤧᤀᤠᤱ ᤂᤧᤸᤗᤧ ᤁᤢᤒᤣᤛᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤁᤧᤈᤥ᤺ᤰᤐᤠ ᤋᤡᤋᤛ ᤔᤧᤵᤔᤏᤠᤒᤠ ᤕᤢᤛ᤻ᤋᤛᤖᤧ ᤁᤢᤜᤡᤶᤔᤥ ᤘᤠ᤹ᤛᤧ ᤐᤣ (ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱ ᤘᤕᤧ)॥ 8 ᤁᤪᤡᤛ᤻ᤐᤛ ᤔᤧᤵᤔᤏᤠᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥᤒᤧᤴ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧᤀᤠᤱ ᤏᤛᤠᤴ ᤔᤧᤈᤥᤃᤢ॥ ᤜᤧᤰᤁᤣᤗ᤹ᤖᤡᤰ ᤁᤥᤖᤴᤌᤡᤒᤠ ᤕᤖᤡᤰ ᤘᤣ᤹ ᤔᤏᤠᤜᤠ᤹ᤖᤧ ᤛᤢᤏᤠᤀᤡᤱ ᤔᤧᤄᤧᤵᤛᤢᤀᤠᤱ ᤏᤛᤠᤴ ᤔᤧᤈᤥᤃᤢᤖ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥ 9 ᤌᤡᤰ ᤛᤧᤴᤍᤡᤰ ᤋᤠᤍᤡᤃᤧᤴ ᤛᤧᤵᤔᤠᤱᤔᤥ ᤍᤠᤱᤒᤠᤸᤗᤧ ᤐᤠᤘᤗᤧᤴ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤁᤖ ᤛᤫᤠ᤺ᤳ ᤔᤧᤘᤕᤧᤴᤏᤧ᤹. ᤆᤰᤔᤧᤸᤗ᤹ᤀᤣ ᤛᤢᤏᤠᤀᤡᤱ ᤛᤧ᤺ᤛ᤻ᤛᤧ᤹ᤖ ᤘᤕᤧ᤹ᤀᤥ᥄ 10 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤧᤏᤧ᤹ᤏᤢᤀᤣ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤌᤣᤀᤠᤱ ᤁᤧᤶᤔᤧᤳᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤁᤴ ᤕᤧᤰᤕᤰᤁᤥ ᤆᤰᤔᤧᤸᤗ᤹ᤀᤣ ᤛᤢᤏᤠᤀᤡᤱ ᤀᤡᤱᤃᤧᤓᤥᤛᤢᤏᤧᤓᤃᤪ ᤏᤛᤠ᤺ᤴᤏᤥ ᤋᤠᤔᤠ ᤕᤖᤡᤰ ᤀᤠᤔᤏᤠᤜᤠ᤹ ᤔᤧᤘᤠ᤹ᤖᤥ॥” 11 ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥ ᤐᤠᤘᤗᤖᤧ ᤋᤱᤒᤣ ᤌᤡᤰᤁᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤜᤢ᤹ᤖᤢᤛᤡᤖ ᤘᤕᤧᤖᤥ॥ 12 ᤜᤧᤰᤁᤩᤠᤱ ᤃᤠᤗᤡᤕᤥ ᤔᤧᤵᤔᤏᤠᤒᤠ ᤔᤏᤠᤴ ᤀᤰᤂᤤᤕᤠ ᤗᤠᤈᤣ᤹ᤒᤠ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤘᤕᤧᤸᤗᤧ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤐᤠᤘᤗᤧᤴ ᤔᤧᤍᤧᤶᤛᤢ ᤜᤧᤰᤁᤩᤠᤱ ᤖᤥᤔᤡ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤍᤃᤡ ᤂᤠᤛᤧᤴ ᤗᤥ᤺ᤴᤇᤧ ᤔᤧᤍᤠᤖᤢ॥ 13 ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢ. “ᤁᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤛᤠᤶᤕᤥᤌᤡᤶᤏᤢ ᤔᤧᤴᤍᤱᤔᤏᤠ ᤛᤧᤘᤠ ᤆᤥ᤺ᤰᤔᤠ ᤔᤏᤠᤜᤠ᤹ ᤜᤢᤛᤢᤛᤡᤀᤠᤱ ᤘᤠ᤹ᤖᤥ॥” 14 ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤐᤠ᤺ᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤃᤠᤗᤡᤕᤥᤖᤧ ᤂᤧᤴ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤕᤜᤢᤍᤡᤛᤣ. ᤁᤴ ᤔᤏᤠ᤺ᤸᤗᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤏᤢ ᤁᤴ ᤔᤏᤠ᤺ᤸᤗᤧ ᤖᤥᤔᤡ ᤌᤡᤶ ᤑᤣ᤺ᤴᤍᤢᤒᤠ ᤐᤠᤴ ᤘᤠ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤡᤏᤡ᤹ ᤐᤠᤴ ᤂᤧᤶᤔᤠᤀᤠᤱ ᤂᤠᤛᤧᤴ ᤗᤥ᤺ᤶᤔᤠ ᤏᤢᤒᤠᤀᤣ ᤐᤥᤱ॥ 15 ᤁᤖ ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤛᤠᤶᤕᤥᤌᤡᤶᤔᤥᤒᤠ ᤔᤡᤱᤜᤠ᤹. ᤛᤢᤳᤗᤠᤜᤠ᤹ ᤏᤢ ᤌᤡᤶᤔᤡᤸᤗᤧᤴᤗᤰ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤁᤱᤃ ᤂᤡᤏᤡ᤹ ᤀᤠᤒᤠᤅᤣ ᤋᤱᤄᤧᤶᤔᤧ᤹ᤀᤥ॥ ᤀᤡᤱᤃᤠ᤹ᤃ ᤁᤴ ᤐᤠ᤺ᤴᤜᤠ᤹ ᤂᤠᤛᤧᤴ ᤔᤧᤗᤥ᤺ᤴᤏᤠᤴᤗᤥ॥” 16 ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤂᤠᤛᤧᤴᤜᤡᤶᤗᤠᤶ ᤗᤠ᤺ᤰᤁᤠᤳ ᤐᤠᤱᤄᤢᤍᤣᤛᤢᤛᤡᤖᤥ॥ 17 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰᤗᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥᤒᤠ ᤛᤥᤛ᤻ᤌᤣᤏᤛᤧᤴ ᤔᤧᤍᤧᤶᤛᤢᤀᤠᤱ ᤂᤠᤛᤧᤴᤜᤡᤶ ᤋᤃᤡᤀᤣ ᤔᤧᤗ᤺ᤵᤛᤢᤖᤥ॥ ᤁᤖ ᤃᤠᤗᤡᤕᤥᤖᤧ ᤂᤧᤱᤜᤠ᤹ ᤂᤧᤶᤂᤧᤶᤔᤠᤱ ᤔᤧᤗᤠᤵᤋᤢᤛᤡᤴ॥ 18 ᤐᤠᤘᤗᤧᤴ ᤁᤥᤖᤴᤌᤡᤀᤥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤕᤖᤡᤰ ᤕᤧᤴ ᤘᤕᤧ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤐᤪᤡᤛ᤻ᤁᤡᤗᤠ ᤜᤧᤰᤁᤩᤠᤱ ᤁᤢᤕᤧᤶᤒᤠ᤹ ᤀᤁᤫᤡᤗᤠ᤺ᤴᤏᤢ ᤛᤡᤖᤡᤕᤠ ᤗᤧᤵᤔᤠᤱ ᤘᤠᤗᤠᤶᤍᤡᤰ ᤆᤥᤃᤧ॥ ᤁᤖ ᤂᤢᤏᤧ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ. ᤔᤠᤱᤜᤧᤰ ᤆᤥᤃᤢᤒᤠ ᤁᤢᤀᤡᤛᤡᤰ ᤐᤠᤘᤗᤖᤧ ᤁᤡᤱᤁᤪᤡᤕᤠ ᤕᤧᤰᤕᤰᤁᤥ ᤁᤢᤎᤧᤃᤣᤰ ᤏ᤺ᤰᤂᤢᤖᤥ॥ 19 ᤂᤧᤱᤜᤠ᤹ ᤀᤣᤑᤡᤛᤛᤀᤥ ᤔᤧᤃᤧᤖᤧᤀᤠᤱ ᤐᤠᤘᤗᤖᤧ ᤐᤪᤡᤛ᤻ᤁᤡᤗᤠ ᤏᤢ ᤀᤁᤫᤡᤗᤠᤴ ᤂᤧᤵᤔᤥ ᤐᤰᤌᤛᤡ॥ ᤁᤖ ᤂᤧᤵᤔᤥ ᤘᤕᤧᤸᤗᤧ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤕᤜᤢᤍᤡᤜᤠ᤹ᤏᤢ ᤐᤠ᤺ᤴᤌᤰᤋᤧᤖᤥ॥ 20 ᤂᤧᤱᤜᤠ᤹ᤖᤧ ᤁᤢᤓᤠ ᤕᤧᤴ ᤀᤠᤏᤡᤃᤧᤏᤢᤀᤣ ᤘᤕᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤛᤠᤱ ᤂᤢᤏᤧ᤹ ᤘᤠ᤹ᤔᤠ ᤔᤧᤍᤧᤴᤍᤧᤴᤗᤥ॥ 21 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤐᤥᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤕᤠᤶᤔᤥ ᤋᤠᤀᤠᤖᤥ॥” ᤜᤧᤰᤁᤣ ᤔᤧᤳᤋᤢᤎᤛᤡᤀᤠᤱ ᤂᤢᤏᤧ᤹ ᤀᤣᤑᤡᤛᤛᤗᤠᤶ ᤛᤡᤈᤖᤡᤕᤠ ᤗᤧᤵᤔᤠᤱ ᤘᤠᤗᤠᤶᤍᤡ᤺ᤰᤁᤥ ᤌᤠᤛᤡᤱᤗᤥ॥ 22 ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤁᤧᤖᤧᤀᤠᤱ ᤂᤧᤵᤔᤥᤏᤢ ᤌᤠ᤺ᤱ ᤕᤖᤢᤛᤗᤧᤶᤔᤥ ᤐᤣᤀᤠᤱ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤀᤥ ᤆᤢᤱᤈᤡᤃᤧᤴ ᤛᤧᤘᤠ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤀᤣᤴᤋᤡᤀᤥᤰᤁᤥ ᤌᤩᤧᤖᤥ॥ 23 ᤂᤧᤵᤔᤥ ᤁᤢᤓᤠ ᤕᤧᤶ ᤕᤠ᤺ᤰᤋᤧᤀᤠᤱ ᤂᤧᤵᤔᤥᤗᤠᤶ ᤐᤠᤘᤗᤧᤴ ᤃᤗᤠᤋᤡᤕᤠ ᤏᤢ ᤑᤪᤡᤃᤡᤕᤠᤛᤔᤠ ᤋᤧᤱᤃᤵᤐᤥ ᤕᤠᤶᤔᤥ ᤗᤠᤶᤍᤡᤰ ᤆᤥᤃᤧᤖ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥᤃᤢᤛᤡᤖᤥ॥ ᤀᤵᤐᤥᤗᤥᤛᤖᤧ ᤀᤣᤑᤡᤛᤛ ᤏᤢ ᤁᤥᤖᤴᤌᤡᤀᤥ ᤀᤡᤱᤓᤥᤛᤢ᤹ 24 ᤂᤧᤴ ᤕᤧᤶᤔᤥ ᤀᤗᤧᤰᤈᤧᤴᤍᤪᤡᤕᤠ ᤕᤧᤰᤕᤰᤁᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤵᤐᤥᤸᤗᤥᤛ ᤔᤧᤵᤔᤏᤠᤒᤠ ᤕᤜᤢᤍᤡᤎᤡᤰ ᤀᤣᤑᤡᤛᤛᤀᤥ ᤋᤩᤧ॥ ᤂᤢᤏᤧ᤹ᤃ ᤛᤠ᤹ᤖᤡᤰ ᤏᤢᤖᤡᤰ ᤐᤠ᤺ᤵᤔᤠ ᤁᤧᤛᤢᤰᤐᤠ ᤆᤥᤃᤧ. ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠᤀᤠᤱ ᤏᤢᤖᤡᤰ ᤗᤧᤛ᤻ᤛᤢᤀᤠᤱ ᤘᤕᤧᤖᤥ॥ 25 ᤂᤢᤏᤧ᤹ᤃ ᤍᤠᤱᤒᤠᤸᤗᤧ ᤁᤢᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤜᤡᤱᤔᤠ ᤐᤥᤱ ᤁᤧᤗ᤹ᤒᤠᤴ ᤜᤢ᤹ᤖᤢᤛᤡᤀᤠᤱ ᤘᤕᤧ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤏᤢ᤺ᤖᤡᤰᤁᤠᤱ ᤁᤢᤛᤡᤰᤛᤔᤧᤖ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤒᤠ ᤛᤧᤰᤂᤠ ᤐᤠ᤺ᤴᤜᤠ᤹ ᤜᤢ᤹ᤖᤢᤛᤡᤖᤥ॥ ᤜᤧᤰᤁᤣᤛᤠᤱ ᤂᤢᤏᤧ᤹ᤃ ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤸᤗᤧ ᤜᤢ᤹ᤖᤢᤛᤡᤒᤠᤴᤗᤰ ᤗᤧᤛ᤻ᤛᤢᤀᤠᤱ ᤘᤕᤧᤖᤥ॥ 26 ᤂᤢᤏᤧ᤹ ᤐᤕᤶ ᤀᤠ᤺ᤴᤇᤡᤱᤔᤠᤏᤢ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤠᤖᤧᤸᤗᤧ ᤐᤪᤡᤛ᤻ᤁᤡᤗᤠ ᤏᤢ ᤀᤁᤫᤡᤗᤠᤖᤧ ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤧᤳᤇᤢᤀᤠᤱ ᤂᤢᤴᤇᤡ᤹ ᤜᤡᤶᤔᤥ ᤀᤢ᤺ᤳᤋᤧᤳᤇᤢ. ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤏᤢᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤇᤢᤖ ᤑᤠ᤹ᤀᤠᤱ ᤐᤥᤎᤰ ᤆᤥᤃᤢ ᤐᤡᤖᤢᤛᤡᤖᤥ॥ 27 ᤀᤵᤐᤥᤗᤥᤛ ᤀᤰᤂᤤᤕᤠ ᤌᤢᤶᤔᤥ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤸᤗᤧ ᤀᤣᤑᤡᤛᤛ᤻ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤧ᤹ ᤂᤧᤵᤔᤥ ᤐᤣ᤺ᤰᤔᤠ ᤀᤠ᤺ᤴᤇᤡᤱᤔᤠ ᤔᤧᤒᤡᤖᤢᤖ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ ᤂᤡᤏᤡ᤹ᤀᤥ ᤀᤵᤐᤥᤗᤥᤛᤧᤴ ᤋᤠᤖ ᤐᤳ. ᤏᤢ᤺ᤖᤡᤰᤁᤠᤱ ᤗᤠᤶᤍᤠ᤺ᤰᤔᤠ ᤐᤡᤖᤧᤶᤔᤧ᤹ᤀᤥ ᤗ᤹ᤖᤡᤰ ᤛᤰᤀᤡᤱᤄᤱ ᤔᤧᤜᤠᤰᤋᤢᤛᤡ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥ ᤁᤧᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤏᤛᤠᤴ ᤁᤧᤈᤥ᤺ᤰᤐᤠ ᤏᤛᤠᤏᤡᤒᤠᤜᤠ᤹ ᤕᤖᤡᤰ ᤁᤢᤓᤠ᤹ ᤐᤡᤖᤢᤛᤡᤖᤥ॥ 28 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤔᤏᤠᤗᤢᤶᤔᤥᤀᤣ ᤂᤧᤵᤔᤥᤒᤠ ᤕᤜᤢᤍᤡᤜᤠ᤹ᤏᤢ ᤛᤠ᤹ᤖᤡᤰ ᤐᤠ᤺ᤴᤌᤰᤋᤧᤀᤠᤱ ᤂᤢᤏᤡ᤹ ᤐᤠ᤺ᤴᤏᤡᤴ ᤀᤳᤋᤢᤖ ᤛᤠᤶᤕᤥᤛᤠᤵᤗᤠᤗᤠᤶ ᤕᤧᤛᤢᤴ ᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤢᤛᤡᤖ ᤕᤠ᤺ᤴᤍᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.