ᤛᤣ᤺ᤰᤕᤢᤰᤔᤡᤒᤠᤜᤠ᤹ 15 - LIFOTNT

ᤕᤖᤢᤛᤗᤧᤶᤔᤥᤒᤠ ᤕᤧᤈᤢᤶᤓᤥ

¹ ᤁᤢᤓᤠ ᤕᤧᤶ ᤀᤣᤃᤠᤱ ᤕᤜᤢᤍᤡᤕᤠᤗᤠᤶ ᤀᤣᤴᤋᤡᤀᤥᤰᤁᤥ ᤁᤢᤓᤠ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ ᤔᤧᤍᤩᤧᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤖ ᤏᤡᤛᤠᤶ ᤔᤧᤜᤢ᤹ᤖᤢᤛᤡ. “ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥᤒᤠ ᤛᤠᤰᤌᤡᤶ ᤁᤢᤀᤡᤛᤡᤰ ᤜᤷᤍᤥ ᤁᤧᤴᤜᤧᤃᤢᤶᤔᤡᤴᤏᤧ ᤑᤠ᤹ᤃᤪ ᤛᤧᤴᤗᤵ ᤂᤥᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥”

² ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤂᤧᤱᤜᤠ᤹ᤏᤢ ᤛᤠ᤹ᤖᤡᤰ ᤐᤠᤴ ᤌᤰᤋᤧᤳᤇᤡ॥ ᤜᤧᤰᤁᤣ᤺ᤸᤗᤧ ᤐᤠᤘᤗ. ᤒᤖᤏᤠᤒᤠᤛ ᤏᤢ ᤀᤣᤴᤋᤡᤀᤥᤁᤛᤔᤠ ᤁᤢᤓᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤕᤖᤢᤛᤗᤧᤶᤔᤥ ᤐᤣ᤺ᤰᤔᤠᤀᤠᤱ ᤂᤧᤵᤔᤥᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤜᤧᤰᤁᤩᤠᤱ ᤋᤢᤶ ᤗᤠᤶᤗᤥᤒᤠᤜᤠ᤹ᤏᤢ ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤠ᤹ᤈᤧᤱᤔᤠ ᤑᤠ᤹ᤀᤠᤱ ᤔᤧᤛᤣᤃᤢᤛᤡᤖᤥ॥

³ ᤀᤣᤴᤋᤡᤀᤥᤁ ᤛᤣᤛᤣᤜᤢᤵᤗᤰᤐᤠ ᤏᤛᤠᤏᤡᤒᤠᤜᤠ᤹ᤖᤧ ᤂᤧᤱᤜᤠ᤹ ᤂᤧᤵᤔᤥᤗᤠᤶ ᤛᤧᤶᤔᤢ᤹ᤀᤡ ᤔᤧᤈᤥᤃᤢᤛᤡ॥ ᤂᤧᤱᤜᤠ᤹ ᤑᤥᤏᤡᤛᤡᤕᤠ ᤏᤢ ᤛᤠᤔᤖᤡᤕᤠ ᤌᤢᤶᤔᤥ ᤐᤥ᤺ᤰᤂᤧᤳᤇᤡᤖ ᤗᤠᤶᤍᤡᤰ ᤆᤥᤃᤧᤳᤇᤡᤸᤗᤧ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤔᤧᤈᤥᤃᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤆᤧᤰᤂᤧᤇᤢᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤵᤔᤥᤒᤠ ᤏᤛᤠᤴ ᤁᤧᤈᤥ᤺ᤰᤐᤠ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖᤥ॥

⁴ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤢᤛᤗᤧᤶᤔᤥ ᤁᤧᤖᤧᤳᤇᤡᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹. ᤋᤢᤶ ᤗᤠᤶᤗᤥᤒᤠᤜᤠ᤹ᤏᤢ ᤛᤣᤛᤣᤜᤢᤵᤗᤰᤐᤠ ᤘᤣ᤹ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤗᤠᤶᤍᤠ᤺ᤰᤔᤠ ᤔᤧᤒᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤵᤔᤥ ᤁᤧᤘᤠ᤹ᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ᤗᤠᤶ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤆᤧᤰᤂᤧᤇᤢᤖᤥ॥

⁵ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤑᤖᤡᤛᤡ ᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤒᤥᤃᤧᤀᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤏᤛᤠᤏᤡᤒᤠᤜᤠ᤹ᤖᤧ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥᤒᤠ ᤛᤠᤰᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠᤖ ᤜᤷᤍᤥᤀᤠᤱ ᤜᤧᤰᤔᤠᤀᤣ ᤐᤥᤱᤗᤥ॥”

⁶ ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤋᤢᤶᤗᤠᤶᤗᤥᤒᤠᤜᤠ᤹ ᤛᤥᤖᤡᤰ ᤔᤧᤈᤢᤵᤛᤧᤀᤠᤱ ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤎᤱ ᤔᤧᤈᤥᤃᤢᤖᤥ॥

⁷ ᤂᤧᤵᤔᤥ ᤐᤕᤶ ᤐᤠ᤺ᤴᤎᤱ ᤐᤥ᤺ᤰᤂᤧᤀᤠᤱ ᤁᤢᤏᤢᤵᤔᤥ ᤐᤋᤪᤢᤛᤧᤴ ᤐᤥᤃᤧᤀᤠᤱ ᤔᤧᤳᤋᤢᤛᤡ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤕᤖᤡᤰ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤢᤏᤠᤀᤡᤱ ᤂᤧᤶᤔᤠ ᤏᤢ ᤏᤛᤠᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤀᤡᤱᤓᤴ ᤆᤥ᤺ᤰᤛᤧ ᤂᤡᤏᤡ᤹ᤀᤥᤗᤠᤶ ᤀᤡᤱᤃᤠ᤹ ᤛᤣᤃᤠᤱᤒᤠᤴ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹ᤖᤥ॥

⁸ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤛᤡᤰᤗᤢᤱᤔᤠᤴ ᤏᤡᤛᤢᤖᤥ॥ ᤂᤢᤏᤧ᤹ᤃ ᤀᤠᤏᤡ᤹ ᤜᤧᤰᤁᤣᤀᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤛᤣᤛᤣᤔᤠᤱ ᤐᤡᤖᤢᤛᤡᤖ ᤋᤠ᤺ᤰᤋᤢᤛᤡᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤏᤡ᤹ ᤀᤥᤛᤣ᤺ᤴᤀᤠᤎᤠᤰᤋᤧᤖᤥ॥

⁹ ᤀᤠᤸᤗ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤢ ᤀᤠᤏᤡ᤹ ᤀᤠᤴᤇᤧᤴᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤜᤧᤰᤁᤣ ᤍᤠᤱᤒᤠᤀᤥᤒᤠ ᤏᤛᤠ᤺ᤴᤗᤠᤶ ᤂᤢᤏᤡ᤹ ᤛᤡᤰᤗᤢᤱᤔᤠᤴ ᤛᤣᤛᤣ ᤆᤥᤃᤢ ᤐᤡᤖᤢᤛᤡᤖᤥ॥

¹⁰ ᤜᤧᤰᤁᤣ᤺ᤸᤗᤧ ᤌᤣᤀᤠᤱᤏᤧ ᤁᤧᤛᤠᤰᤐᤠ ᤕᤜᤢᤍᤡ ᤛᤠᤰᤌᤡᤶᤔᤡᤴ ᤌᤡᤶᤔᤧᤴᤍᤱ ᤏᤛᤠᤏᤡᤒᤠᤜᤠ᤹ ᤁᤧᤃᤢ᤺ᤳᤋᤢᤶᤛᤡᤶᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤑᤥᤱᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅ ᤂᤧᤱᤃ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧᤀᤠᤱ ᤁᤢᤔᤠ ᤔᤧᤴᤇᤢᤰᤋᤢᤴ. ᤜᤧᤰᤁᤩᤠᤱ ᤀᤠᤏᤡ᤹ᤀᤠᤱ ᤁᤢᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ॥

¹¹ ᤛᤧᤰᤂᤠ᤺ᤸᤗᤧᤃ. ᤂᤧᤱᤜᤠ᤹ ᤜᤧᤰᤁᤣᤀᤣ ᤀᤠᤏᤡ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧᤖᤰ ᤋᤠᤱᤀᤠᤛᤣ᤺ᤵᤋᤧ ᤁᤧᤗ᤹ᤒᤠᤴ ᤏᤛᤠᤴ ᤀᤠᤈᤥᤃᤢᤶᤗᤥ॥”

¹² ᤒᤖᤏᤠᤒᤠᤛ ᤏᤢ ᤐᤠᤘᤗᤖᤧ ᤂᤢᤴᤇᤡ᤹ᤗᤠᤶ ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤧᤰᤂᤧᤇᤢᤸᤗᤧ ᤕᤧᤈᤢᤶᤓᤥᤒᤠ ᤁᤠᤰ ᤔᤏᤠᤜᤠ᤹ ᤛᤫᤠ᤺ᤳᤋᤠᤱ ᤔᤧᤄᤧᤵᤛᤢᤖ ᤔᤧᤕᤢᤅᤧᤖᤥ॥

¹³ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤠ᤺ᤵᤔᤠ ᤛᤢᤖᤧᤳᤇᤢᤀᤠᤱ ᤕᤠᤁᤢᤒᤧᤴ ᤕᤧᤶᤛᤡᤱᤅᤠᤱ ᤐᤠ᤺ᤳᤋᤢ. “ᤑᤢ᤹ᤏᤢᤛᤠ᤹ᤛᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥

¹⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰᤏᤢ ᤋᤃᤡ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤰᤂᤣᤗ᤹ᤖᤡᤰ ᤀᤠᤒᤠᤅᤣ ᤁᤢᤔᤏᤠ ᤔᤧᤒᤥᤱᤗ ᤑᤠ᤹ᤀᤠᤱ ᤀᤢ᤺ᤳᤋᤢᤛᤡ ᤁᤧᤗ᤹ᤒᤠᤴ ᤛᤡᤔᤥᤏ ᤐᤋᤪᤢᤛᤖᤧ ᤆᤧᤰᤂᤢᤖᤥ॥

¹⁵ ᤁᤱᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤂᤢᤏᤡ᤹ ᤐᤠ᤺ᤴᤏᤡᤴ ᤛᤠ᤹ᤖᤡᤰᤁᤣ ᤋᤱᤗᤥ॥ ᤛᤠᤶᤕᤥᤛᤠᤵᤗᤠᤖᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ.

¹⁶ “‘ᤁᤴ ᤀᤣᤃᤠᤱ ᤀᤡᤱᤃᤠ᤹ ᤏᤢ᤺ᤱᤅᤠᤖᤥ. ᤜᤧᤰᤁᤩᤠᤱ ᤏᤢᤒᤧᤒᤠ ᤍᤠᤀᤢᤍᤖᤧ ᤁᤢᤜᤠᤱᤈᤢᤶᤔᤡᤴ ᤀᤡᤱᤃᤠ᤹ ᤕᤠᤶᤔᤥ ᤆᤥᤃᤢᤱᤗᤥ॥ ᤀᤡᤱᤃᤠ᤹ ᤁᤧᤕᤒᤠ ᤗᤢᤱᤎᤠᤰᤜᤠ᤹ ᤛᤧᤳᤋᤢᤱᤗᤥ॥ ᤕᤠᤶᤔᤥ ᤆᤥᤃᤢᤱᤅᤠᤱ ᤕᤧᤵᤛᤢᤱᤗᤥ॥

^17-18 ᤜᤧᤰᤁᤣᤗ᤹ᤖᤡᤰ ᤘᤣ᤹ ᤔᤏᤠᤜᤠ᤹ᤖᤧᤀᤠᤱ ᤀᤡᤱᤃᤠ᤹ ᤍᤠᤱᤒᤠᤴ ᤁᤥ᤺ᤵᤔᤠ ᤔᤧᤛᤢᤰᤁᤠᤖ॥ ᤀᤠᤔᤡᤱ ᤁᤧᤍᤠ᤺ᤰᤐᤠ ᤁᤠᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤛᤢᤘᤠᤱ ᤑᤠ᤹ᤀᤠᤱ ᤀᤢ᤺ᤳᤋᤢᤱᤛᤡᤱᤗᤥ॥ ᤁᤴ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠ ᤀᤡᤱᤃᤠ᤹ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤕᤖᤡᤰ ᤋᤱᤒᤣ ᤋᤃᤡᤀᤣ ᤐᤠ᤺ᤳᤋᤧ ᤆᤢᤖᤧᤀᤠᤱ ᤘᤠ᤹ᤖᤥ॥’”

¹⁹ ᤕᤠᤁᤢᤒᤖᤧ ᤕᤠᤶᤔᤥ ᤀᤰᤂᤣ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤏᤢ᤺ᤱᤒᤠᤀᤠᤱ ᤁᤧᤍᤠᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤔᤣ᤺ᤴᤗᤥ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥

²⁰ ᤁᤖ ᤂᤧᤱᤜᤠ᤹ ᤀᤰᤋᤱᤒᤠ ᤛᤰᤀᤡᤱᤄᤱ ᤜᤠᤰᤋᤢᤶᤛᤡᤶᤗᤥ. ‘ᤏᤠᤘᤠᤀᤡᤳᤗᤠᤀᤥ ᤋᤥ᤺ᤶᤏᤠᤒᤠ ᤆᤠᤜᤠ᤹ ᤔᤧᤴᤈᤏᤧᤴᤗ॥ ᤜᤧᤰᤁᤩᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤴᤈᤥᤃᤢᤴᤗ॥ ᤁᤢᤛᤡᤳᤗᤠ ᤕ᤹ᤔᤏᤠ ᤛᤧᤵᤔᤏᤠᤒᤠ ᤛᤠ ᤏᤢ ᤛᤠᤔᤠᤰᤂᤡ᤹ᤀᤠᤱ ᤔᤧᤴᤈᤏᤧᤴᤗ॥’

²¹ ᤌᤣᤀᤠᤱᤓᤧᤸᤗᤧ ᤒᤠ ᤁᤴ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤁᤠᤰ ᤐᤠᤱᤈᤢᤶᤔᤥ ᤀᤢᤴᤇᤥᤴ ᤀᤢᤴᤇᤥ᤺ᤴᤏᤠᤱᤎᤥᤀᤣ ᤀᤡᤱᤓᤥᤛᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤌᤡᤰᤕᤠ᤺ᤴᤎᤰ ᤏᤠ᤺ᤶᤛᤡᤱ ᤕᤧᤴ ᤌᤵᤔᤣ ᤏᤡ᤺ᤳᤗ ᤘᤠ᤹ᤖᤥ॥”

ᤕᤧᤈᤢᤶᤓᤥᤗᤠᤶᤒᤠ ᤛᤰᤀᤡᤱᤄᤱ

²² ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤋᤢᤶᤗᤠᤶᤗᤥᤒᤠᤜᤠ᤹ ᤜᤧᤰᤁᤩᤠᤱ ᤁᤠᤰ ᤛᤣᤛᤣᤜᤢᤵᤗᤰᤁᤥᤒᤠᤜᤠ᤹ ᤔᤧᤍᤅᤧᤀᤠᤱ ᤏᤧᤵᤑᤢ ᤔᤏᤠᤜᤠ᤹ ᤕᤜᤢᤍᤠ ᤔᤧᤵᤔᤏᤠᤒᤠ ᤒᤖᤛᤠᤒᤠᤛ ᤏᤢ ᤛᤡᤗᤠᤛᤧᤴ ᤛᤣ᤺ᤰᤔᤠᤛᤡᤀᤠᤱ ᤐᤠᤘᤗ ᤜᤧᤰᤁᤩᤠᤱ ᤒᤖᤏᤠᤒᤠᤛᤧᤴᤏᤢ ᤀᤣᤴᤋᤡᤀᤥᤰᤁᤥ ᤐᤠᤱᤔᤠᤛᤡ ᤏᤡ᤺ᤴᤎᤥ ᤐᤥ᤺ᤰᤂᤧᤖᤥ॥ ᤂᤧᤱᤜᤠ᤹ᤃ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤗᤢᤶᤔᤥ ᤗᤠᤶᤗᤥᤒᤠ ᤔᤧᤘᤕᤧᤖᤥ॥

²³ ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤛᤰᤀᤡᤱᤄᤱᤅᤡᤴ ᤂᤧᤴ ᤗᤡᤛᤡ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤏᤢ ᤔᤧᤜᤠᤰᤋᤢᤛᤡ. “ᤀᤠᤏᤡᤃᤣ ᤕᤖᤢᤛᤗᤧᤔᤒᤠ ᤂᤡᤏᤡ᤹ ᤑᤢ᤹ᤏᤢᤛᤠ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤋᤢᤶᤗᤠᤶᤗᤥᤒᤠᤜᤠ᤹ᤗᤠᤶ. ᤀᤣᤴᤋᤡᤀᤥᤁ. ᤛᤡᤖᤡᤕᤠ. ᤏᤢ ᤛᤡᤗᤡᤛᤡᤕᤠᤀᤥ ᤁᤧᤘᤠ᤹ᤒᤠ ᤌᤡᤶᤔᤧᤴᤍᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ. ᤁᤴ ᤛᤰᤀᤡᤱᤄᤱᤗᤠᤶ ᤛᤧᤘᤠ ᤜᤠᤅᤢᤶᤒᤧ᤹ᤖᤥ॥

²⁴ ᤀᤠᤏᤡᤃᤣ ᤔᤧᤶᤒᤠᤱᤅᤣ ᤁᤢᤓᤠ ᤔᤏᤠᤜᤠ᤹ ᤂᤡᤏᤡ᤹ᤀᤥ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤁᤠᤰ ᤕᤜᤢᤍᤡ ᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ ᤁᤧᤶᤔᤧᤳᤋᤡᤀᤠᤱ ᤗᤠᤶ ᤁᤧᤶᤓᤥ᤺ᤳᤋᤡᤖ ᤂᤡᤏᤡ᤹ ᤗᤢᤱᤔᤠ᤹ ᤁᤧᤶᤛᤥ᤺ᤴᤍᤡ ᤁᤧᤶᤒᤡᤖᤡᤒᤠ ᤐᤠ᤺ᤴᤏᤡᤴ ᤀᤠᤏᤡᤃᤣ ᤂᤧᤵᤛᤢᤶᤒᤧᤖᤥ॥

²⁵ ᤜᤧᤰᤁᤩᤠᤱ ᤀᤠᤏᤡᤃᤣ ᤔᤡ᤺ᤶ ᤆᤢᤶ ᤒᤖᤏᤠᤒᤠᤛ ᤜᤧᤰᤁᤩᤠᤱ ᤐᤠᤘᤗᤧᤴᤏᤢ ᤂᤡᤏᤡ᤹ᤀᤥ ᤐᤠᤱᤔᤠᤛᤡ ᤑᤠ᤹ᤀᤠᤱ ᤁᤢᤓᤠ ᤔᤏᤠᤜᤠ᤹ ᤛᤣ᤺ᤰᤔᤠᤛᤡ ᤁᤧᤗ᤹ᤒᤠ ᤀᤡᤱᤋᤱᤔᤏᤠᤖᤥ॥

²⁶ ᤂᤧᤱᤜᤠ᤹ᤖᤧᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤧᤘᤠ ᤆᤥ᤺ᤰᤔᤥ ᤂᤢᤏᤡ᤹ ᤜᤡᤱᤔᤴᤏᤡᤴ ᤔᤧᤴᤍᤠᤱᤄᤢᤴᤗᤥ॥

²⁷ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤛᤠᤵᤋᤢᤶᤒᤧᤒᤠ ᤛᤰᤀᤡᤱᤄᤱᤅᤥ ᤁᤴ ᤐᤠ᤺ᤴᤜᤠ᤹ᤀᤣ ᤆᤧᤱᤔᤠ ᤑᤠ᤹ᤀᤠᤱ ᤕᤜᤢᤍᤠ ᤏᤢ ᤛᤡᤗᤠᤛᤧᤴ ᤂᤡᤏᤡ᤹ᤀᤥ ᤐᤠᤱᤄᤢᤶᤛᤡᤶᤒᤧᤖ ᤐᤳᤇᤡᤃᤧᤖᤥ॥

²⁸ ᤛᤣᤛᤣᤔᤠᤱ ᤏᤢ ᤀᤠᤏᤡᤃᤧᤃ ᤂᤡᤏᤡ᤹ ᤛᤶᤍᤠᤱ ᤁᤵᤔᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ᤏᤢ᤺ᤸᤗᤧ ᤘᤣ᤹ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ ᤌᤧᤔᤠᤀᤠᤱ ᤔᤧᤱᤃᤢ᤺ᤵᤔᤠᤏᤡᤱ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥

²⁹ ᤜᤧᤰᤁᤣ᤺ᤸᤗᤧ ᤏᤠᤘᤠᤀᤡᤳᤗᤠᤀᤥ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤆᤠᤜᤠ᤹ ᤔᤧᤈᤧᤶᤔᤡᤴᤏᤧ᤹. ᤛᤠᤔᤠᤰᤂᤡ᤹ᤀᤠᤱ ᤔᤧᤈᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤁᤢᤛᤡᤳᤗᤠ ᤕ᤹ᤔᤏᤠ ᤛᤧᤵᤔᤏᤠᤒᤠ ᤛᤠ ᤔᤧᤈᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤩᤠᤱ ᤆᤠᤗᤠᤶᤔᤠᤏᤢᤀᤠᤱ ᤀᤣ᤺ᤰ ᤘᤕᤧᤶᤔᤧ᤹ᤀᤥ॥ ᤀᤰᤂᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤏᤢᤒᤠᤀᤣ ᤁᤧᤈᤥᤃᤢᤶᤗᤥ॥ ᤛᤧᤶᤔᤢ᤹ᤀᤡᤖᤥ॥”

³⁰ ᤜᤧᤰᤁᤣᤗ᤹ᤖᤡᤰ ᤂᤧᤴ ᤗᤡᤛᤡ ᤀᤡᤱᤛᤠᤒᤠᤜᤠ᤹ ᤔᤧᤎᤠᤛᤡᤱᤅᤠᤱ ᤀᤣᤴᤋᤡᤀᤥᤰᤁᤥ ᤔᤧᤃᤧᤖᤧ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤁᤠᤰ ᤏᤛᤠᤏᤡᤒᤠᤜᤠ᤹ ᤌᤡᤰᤋᤧᤴᤏᤥ ᤔᤧᤛᤢᤵᤛᤢᤛᤡᤀᤠᤱ ᤂᤧᤴ ᤛᤰᤀᤡᤱᤄᤱᤅᤡᤴ ᤜᤢᤰᤔᤧᤛᤢᤵᤋᤢᤛᤡᤖᤥ॥

³¹ ᤜᤧᤰᤁᤩᤠᤱ ᤂᤧᤴ ᤛᤰᤀᤡᤱᤄᤱᤗᤠᤶ ᤀᤠ᤺ᤴᤇᤡᤱᤔᤠ ᤔᤧᤄᤥᤛᤢᤀᤠᤱ ᤏᤛᤠᤏᤡᤒᤠᤜᤠ᤹ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖᤥ॥

³² ᤕᤜᤢᤍᤠ ᤏᤢ ᤛᤡᤗᤠᤛᤧᤴᤏᤠᤱ ᤀᤠᤒᤠᤅᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤘᤕᤧᤳᤇᤡ॥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤜᤠᤱᤜᤠᤱ ᤏᤢ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤕᤖᤡᤰ ᤐᤠ᤺ᤴᤜᤠ᤹ ᤔᤧᤳᤋᤧᤳᤇᤢᤖᤥ॥

³³ ᤂᤧᤵᤔᤥ ᤁᤢᤓᤠ ᤕᤧᤴ ᤘᤕᤧᤳᤇᤡᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤡᤴᤇᤡ᤹ ᤏᤢ᤺ᤖᤡᤰᤁᤠᤱ ᤐᤣᤃᤧᤳᤇᤧ᤹ᤀᤥ ᤗ᤹ᤖᤡᤰ ᤕᤠᤱᤏᤠ ᤔᤧᤒᤠᤱᤄᤢ ᤔᤧᤍᤣᤛᤢᤛᤡᤖᤥ॥

³⁴ ((ᤁᤖ ᤛᤡᤗᤠᤛᤖᤧ ᤂᤧᤵᤔᤥᤀᤣ ᤘᤠ᤹ᤔᤠ ᤗᤠ᤺ᤵᤔᤠ ᤏᤡ᤺ᤴᤎᤥ ᤆᤥᤃᤢᤖᤥ॥))

³⁵ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴᤏᤠᤱ ᤀᤣᤴᤋᤡᤀᤥᤰᤁᤥᤀᤣ ᤘᤕᤧ ᤗᤠᤖᤧᤳᤇᤡᤖᤥ॥ ᤂᤧᤱᤜᤠ᤹ ᤏᤢ ᤘᤣ᤹ ᤕᤖᤡᤰᤗᤧ ᤛᤥᤛᤥᤖᤡᤰ ᤍᤠᤱᤒᤠᤸᤗᤧᤴ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤔᤧᤈᤥᤃᤢᤖ ᤔᤏᤠᤜᤠ᤹ ᤔᤧᤜᤢ᤹ᤖᤢᤛᤡᤖᤥ॥

ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤛᤧᤴᤇᤡ᤹

³⁶ ᤁᤢᤓᤠ ᤕᤧᤴ ᤀᤣᤃᤠᤱ ᤐᤠᤘᤗᤖᤧ ᤒᤖᤏᤠᤒᤠᤛᤧᤴ ᤔᤧᤳᤋᤢ. “ᤀᤠᤸᤗ ᤀᤠᤴᤇᤡ᤹ᤀᤠᤱ ᤏᤢ᤺ᤱᤛᤡ ᤐᤡᤳᤇᤡ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤀᤠᤈᤥᤃᤧᤳᤇᤢᤒᤠ ᤐᤠᤱᤈᤢᤶᤜᤠ᤹ᤀᤥ ᤗ᤺ᤴᤇᤡᤖ ᤑᤢ᤹ᤏᤢᤛᤠ᤹ᤜᤠ᤹ ᤀᤠᤰᤂᤣ ᤔᤧᤈᤥᤃᤢᤖ ᤔᤧᤕᤠᤰᤐᤣ ᤑᤠ᤹ᤀᤠᤱ ᤛᤠ᤹ᤛᤢᤛᤡᤖᤥ॥”

³⁷ ᤒᤷᤏᤠᤒᤠᤛᤖᤧ ᤕᤢᤜᤢᤴᤏᤠ ᤔᤧᤵᤔᤏᤠᤒᤠ ᤔᤷᤁᤢᤛᤧᤴ ᤛᤥᤖᤡᤰ ᤋᤣ᤹ᤔᤠ ᤏᤡᤱᤘᤠ᤹ ᤆᤥᤃᤢ.

³⁸ ᤁᤖ ᤐᤠᤘᤗᤖᤧ ᤀᤳᤋᤢ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤂᤧᤱᤜᤠ᤹ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤓᤠ᤹ᤖᤢᤴᤛᤡᤴᤏᤠᤱ ᤐᤠᤶᤑᤡᤗᤡᤕᤠᤀᤥᤗᤠᤶᤔᤣ ᤐᤰᤌᤛᤡᤀᤠᤱ ᤏᤢ᤺ᤰᤂᤧ ᤐᤣᤀᤠᤱ ᤘᤕᤧᤖᤥ॥

³⁹ ᤂᤢᤴᤇᤡ᤹ ᤛᤠ᤹ᤖᤡᤰ ᤐᤠᤴ ᤌᤰᤋᤧᤇᤡᤀᤠᤱ ᤀᤣ᤺ᤰᤀᤣ᤺ᤰ ᤛᤧᤴᤍᤧᤇᤡᤀᤠᤱ ᤐᤣᤛᤡᤖᤥ॥ ᤒᤷᤏᤠᤒᤠᤛᤖᤧ ᤕᤢᤜᤢᤴᤏᤠ ᤔᤧᤵᤔᤏᤠᤒᤠ ᤔᤷᤁᤢᤛᤧᤴ ᤋᤣ᤹ᤖᤢᤀᤠᤱ ᤛᤤᤐᤪᤛ ᤘᤠᤃᤵᤂᤠᤶ ᤗᤧᤵᤔᤠᤱ ᤘᤠᤗᤠᤎᤠᤗᤠᤶ ᤌᤠᤛᤡᤱ.

⁴⁰ ᤁᤖ ᤐᤠᤘᤗᤖᤧ ᤛᤡᤗᤠᤛᤧᤴ ᤛᤣᤃᤢ. ᤜᤧᤰᤁᤩᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤧᤱᤜᤠ᤹ ᤍᤠᤱᤒᤠᤸᤗᤧ ᤁᤢᤗᤢᤱᤃᤢᤶᤔᤥ ᤔᤧᤍᤥᤴᤍᤢᤛᤡᤀᤠᤱ ᤔᤧᤒᤠᤱᤄᤢᤛᤡᤖᤥ॥

⁴¹ ᤂᤢᤴᤇᤡ᤹ ᤛᤡᤖᤡᤕᤠ ᤏᤢ ᤛᤡᤗᤡᤛᤡᤕᤠ ᤌᤢᤶᤔᤥ ᤐᤥ᤺ᤰᤂᤧᤇᤡᤖ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤜᤠ᤹ ᤁᤧᤎᤢᤶᤒᤠ ᤆᤥᤃᤧᤳᤇᤢᤖᤥ॥