᥈ ᤋᤡᤔᤥᤌᤡ 4 - LIFOTNT

¹ ᤂᤪᤡᤛ᤻ᤋ ᤕᤧᤛᤢᤴ ᤜᤠᤱ ᤆᤥ᤺ᤰᤛᤧ ᤕᤢ᤺ᤸᤗᤧ ᤁᤠᤰ ᤁᤢᤜᤡᤱᤘᤧᤳ ᤏᤢ ᤁᤢᤛᤡᤘᤧᤳ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤂᤢᤴᤇᤡ᤹ ᤋᤃᤡ ᤀᤡᤱᤈᤠᤱ ᤐᤡᤏᤧᤖᤥ—

² ᤛᤢᤏᤠᤀᤡᤱ ᤀᤡᤱᤓᤥᤛᤧ᤹॥ ᤀᤠᤵᤑᤠᤸᤗᤧᤛᤠᤱ ᤛᤢᤏᤠᤀᤡᤱ ᤛᤧᤔᤠ ᤂᤧᤏᤧ᤹ᤃ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤕᤧ᤹ᤀᤥ॥ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤗ ᤏᤡᤛᤠᤶᤏᤢ ᤔᤏᤠᤜᤠ᤹ ᤏᤢᤖᤡᤰᤁᤠᤱ ᤂᤠᤜᤢᤴ ᤐᤡᤖᤧᤛᤧ᤹. ᤑᤧ᤺ᤰᤋᤧᤛᤧ᤹. ᤜᤧᤰᤁᤩᤠᤱ ᤜᤠᤱᤜᤠᤱ ᤔᤧᤳᤋᤧᤛᤧ᤹ᤀᤥ॥

³ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤛᤧᤰᤂᤠ ᤏᤡᤛᤠᤶ ᤂᤧᤶᤔᤠ ᤂᤢᤏᤡ᤹ ᤛᤡᤖᤠ᤹ ᤔᤧᤴᤎᤠᤱᤔᤏᤠ ᤕᤧᤶ ᤋᤠᤖ ᤐᤳ॥ ᤁᤖ ᤂᤧᤱᤜᤠ᤹ᤖᤧᤃ ᤀᤠᤒᤠᤅᤣ ᤕᤠᤶᤏᤡᤱᤘᤠ᤹ᤀᤥ ᤔᤧᤒᤣ᤺ᤰᤁᤠᤱ ᤂᤢᤏᤡ᤹ ᤂᤧᤶᤔᤠ ᤛᤡᤖᤠ᤹ ᤁᤧᤎᤠᤱᤒᤠ ᤐᤠ᤺ᤴᤗᤰ ᤂᤧᤶᤔᤠ ᤑᤠ᤹ᤀᤠᤱ ᤒᤠᤜᤧᤰᤋᤱᤒᤠ ᤐᤠᤴ ᤁᤧᤒᤠ᤺ᤵᤐᤠ ᤛᤡᤰᤛᤠᤶᤒᤠᤜᤠ᤹ ᤔᤧᤗᤢᤵᤛᤢᤛᤡᤖᤥ॥

⁴ ᤂᤧᤱᤜᤠ᤹ᤖᤧᤃ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤔᤧᤏᤠ᤹ᤖᤢᤀᤠᤱ ᤂᤢᤏᤡ᤹ ᤁᤢᤒᤢᤱᤏᤠ ᤁᤢᤛᤶᤒᤠ ᤂᤧᤍᤠ᤹ᤜᤠ᤹ ᤗᤧᤵᤔᤠᤱ ᤏᤡᤱᤘᤠ᤹ ᤔᤧᤒᤡᤖᤢ᤹ᤖᤥ॥

⁵ ᤁᤖ ᤂᤧᤏᤧ᤹ᤃ ᤁᤠᤰ ᤐᤖᤡᤰᤐᤠ ᤘᤠᤏᤠᤶᤔᤥ ᤜᤠᤱᤜᤠᤱ ᤘᤕᤧ᤹ᤀᤠᤱ ᤋᤢᤰᤂᤣᤴ ᤌᤖᤧ᤹. ᤛᤢᤏᤠᤀᤡᤱ ᤛᤧ᤺ᤛ᤻ᤛᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤔᤠᤱᤛᤧᤘᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤡᤴ ᤆᤥᤃᤧ ᤛᤢᤖᤧ᤹ᤀᤥ॥

⁶ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤡᤔᤠ ᤕᤧᤶᤔᤡᤱᤃ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤆᤥᤰ॥

⁷ ᤀᤡᤱᤃᤠ᤹ᤃ ᤀᤠᤛᤢᤰᤛᤢᤰ ᤏᤢ᤺ᤖᤡᤰᤁᤠᤱ ᤏᤛᤠ᤺ᤴᤗᤧᤴ ᤌᤱ ᤌᤰᤋᤠᤱᤅᤠᤱ. ᤀᤠᤗᤥ᤺ᤰᤔᤠᤴ ᤛᤢᤖᤢᤱᤅᤠᤱ ᤘᤠ᤹ᤀᤠ ᤜᤧᤰᤁᤩᤠᤱ ᤏᤛᤠ᤺ᤴᤏᤡᤴ ᤔᤧᤶᤔᤠᤀᤣ ᤁᤳᤋᤢᤱᤅᤠᤱ ᤘᤠ᤹ᤀᤠᤖᤥ॥

⁸ ᤀᤠᤏᤡ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤈᤥ᤺ᤰᤐᤠ ᤍᤠᤱᤒᤠᤸᤗᤧ ᤂᤧᤴ ᤕᤧᤴᤏᤥ ᤛᤠᤶᤕᤥᤒᤠ ᤋᤡᤆ᤺ᤴ ᤜᤠᤱᤛᤧᤶ ᤁᤢᤀᤡᤛᤡᤰ ᤐᤡᤀᤠᤖᤥ॥ ᤀᤡᤱᤃᤠ᤹ᤖᤰ ᤔᤣ᤺ᤴ. ᤁᤖ ᤂᤢᤏᤧ᤹ ᤁᤢᤎᤠ᤺ᤴᤇᤡᤱᤔᤠᤴ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤁᤧᤜᤠᤱᤒᤠ ᤁᤠᤰᤗᤧ ᤔᤧᤄᤥᤛᤢ᤹ᤖᤥ॥

ᤐᤠᤘᤗᤖᤧ ᤁᤢᤏᤢᤵᤔᤠ ᤁᤢᤒᤠ᤺ᤴᤏᤡᤴ

⁹ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤜᤠᤖᤠ ᤑᤧᤶᤔᤠ ᤁᤧᤛᤢᤰᤛᤢᤰ ᤋᤶᤛᤡᤱ ᤆᤥᤃᤧ᤹ᤀᤥ॥

¹⁰ ᤌᤣᤀᤠᤱᤓᤧᤸᤗᤧ ᤍᤣᤔᤠᤛᤖᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤔᤡ᤺ᤶᤈᤡ ᤔᤧᤳᤋᤢ ᤜᤧᤰᤁᤩᤠᤱ ᤀᤡᤱᤃᤠ᤹ ᤗᤧᤖᤠᤱᤅᤠᤱ ᤌᤡᤛ᤻ᤛᤗᤥᤏᤡᤁᤠ ᤐᤣᤀᤠᤱ ᤘᤠ᤹ᤖᤥ॥ ᤁᤪᤣᤛᤣᤴᤛᤧᤴ ᤃᤗᤠᤋᤡᤕᤠ ᤌᤢᤶᤔᤥ ᤐᤣᤀᤠᤱ ᤘᤠ᤹ ᤜᤧᤰᤁᤩᤠᤱ ᤋᤡᤋᤛᤧᤴ ᤍᤠᤸᤔᤠᤋᤡᤕᤠ ᤌᤢᤶᤔᤥ ᤐᤣᤖᤥ॥

¹¹ ᤀᤡᤱᤃᤠ᤹ᤏᤢᤃ ᤗᤢᤁᤠᤖᤰ ᤘᤠ᤹ᤖᤥ॥ ᤂᤧᤏᤧ᤹ ᤁᤧᤓᤧᤴᤏᤡᤸᤗᤧ ᤔᤷᤁᤢᤛᤧᤴᤏᤠᤱ ᤂᤧᤏᤧ᤹ᤏᤢ ᤛᤥᤖᤡᤰ ᤑᤧᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤰᤁᤥ ᤂᤧᤸᤗᤧ ᤕᤖᤡᤰ ᤁᤢᤓᤠ᤹ ᤐᤡᤀᤠᤖᤥ॥

¹² ᤀᤡᤱᤃᤠ᤹ ᤋᤢᤂᤡᤁᤛᤧᤴ ᤀᤣᤑᤡᤛᤛᤀᤥ ᤐᤠᤱᤄᤢᤱᤍᤣᤛᤢᤱᤅᤠᤱ ᤘᤠ᤹ᤀᤠᤖᤥ॥

¹³ ᤂᤧᤏᤧ᤹ ᤁᤧᤓᤧᤴᤏᤡᤸᤗᤧ ᤋᤪᤥᤀᤠᤛᤗᤠᤶ ᤁᤠᤷᤐᤛᤧᤸᤗᤥ ᤏᤧᤛ᤻ᤛᤢᤱᤎᤠᤱᤒᤠ ᤆᤢᤱᤃᤠ ᤏᤢ ᤛᤠᤵᤐᤴᤜᤠ᤹ ᤑᤧᤳᤋᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤛᤧᤜᤥᤒᤠ ᤛᤠᤵᤐᤴᤏᤡᤴ ᤏᤡᤱᤘᤠ᤹ ᤔᤧᤶᤓᤣ᤺ᤴᤏᤣ ᤑᤧᤳᤋᤧ᤹ᤀᤥ॥

¹⁴ ᤑᤧᤴ ᤁᤧᤎᤰᤐᤠ ᤀᤗᤣᤰᤈᤣᤴᤍᤖᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤠᤱᤗᤥ॥ ᤍᤠᤱᤒᤠᤸᤗᤧ ᤜᤠᤖᤠ᤹ ᤁᤢᤕᤠ᤺ᤶᤒᤰ ᤁᤢᤀᤡᤛᤡᤰ ᤐᤡᤖᤢᤏᤡᤖᤥ॥

¹⁵ ᤂᤧᤏᤧ᤹ᤀᤠᤱ ᤂᤧᤴᤏᤢ ᤛᤡᤱᤛᤡᤱ ᤕᤧᤰᤕᤧᤰ ᤘᤕᤧ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤏᤡᤃᤣ ᤏᤡᤛᤠᤶᤔᤡᤴ ᤛᤠ᤹ᤖᤡᤰ ᤀᤳᤋᤢᤖᤥ॥

¹⁶ ᤌᤡᤰᤛᤡᤃᤣ᤺ᤰᤐᤥ ᤀᤡᤱᤃᤠ᤹ ᤂᤠᤛᤧᤴᤗᤥᤒᤠᤸᤗᤥ ᤔᤧᤍᤠᤖᤠᤱᤅᤡᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤕᤠᤵᤔᤡ ᤁᤢᤓᤠ᤹ ᤔᤧᤶᤒᤡᤖᤠᤱᤅᤡᤴ. ᤁᤖ ᤁᤧᤖᤧᤰᤗᤧ ᤀᤡᤱᤃᤠ᤹ ᤔᤧᤗᤧᤖᤠᤱᤅᤠᤱ ᤔᤧᤒᤣᤖᤥ॥ ᤁᤴ ᤐᤠ᤺ᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤂᤠᤛᤧᤴ ᤔᤧᤈᤥᤃᤢᤴᤏᤡᤖᤥ॥

¹⁷ ᤁᤖ ᤍᤠᤱᤒᤠᤴ ᤀᤡᤱᤃᤠ᤹ᤏᤢ ᤘᤕᤧᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤢᤏᤠᤀᤡᤱ ᤂᤧᤶᤔᤠ ᤔᤧᤄᤥᤛᤢᤏᤡ ᤑᤠ᤹ᤀᤠᤱ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤁᤧᤛᤢᤰᤐᤠ ᤐᤥᤱᤔᤠ ᤌᤢᤶ ᤐᤡᤖᤠᤱᤗᤥ॥ ᤍᤠᤱᤒᤠᤸᤗᤧᤃ ᤀᤡᤱᤃᤠ᤹ ᤂᤡᤖᤡᤱᤒᤠᤸᤗᤧ ᤁᤢᤔᤢᤖᤠᤀᤥᤗᤠᤶᤔᤠᤱ ᤛᤧ᤺ᤵᤋᤠᤱᤗᤥ॥

¹⁸ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤁᤠᤰ ᤑᤧᤴ ᤐᤠ᤺ᤴᤏᤥᤗᤠᤶ ᤛᤧ᤺ᤵᤐᤠᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤁᤢᤜᤠᤱᤈᤢᤶᤔᤥ ᤁᤶᤒᤪᤠᤱ ᤔᤧᤳᤋᤠᤖ ᤋᤣ᤹ᤀᤠᤖᤥ॥ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤐᤥᤱᤏᤡᤖᤥ॥ ᤀᤠᤔᤧᤴ॥

ᤁᤢᤏᤢᤵᤔᤠ ᤛᤧᤶᤔᤢ᤹ᤀᤡ ᤛᤧᤘᤠ

¹⁹ ᤀᤡᤱᤃᤠ᤹ ᤐᤪᤡᤛ᤻ᤁᤡᤗᤠ ᤏᤢ ᤀᤁᤫᤡᤗᤠ ᤜᤧᤰᤁᤩᤠᤱ ᤀᤥᤏᤣᤛᤡᤑᤥᤖᤛᤖᤧ ᤁᤢᤜᤡᤶᤛᤕᤱᤜᤠ᤹ ᤀᤠᤛᤧᤘᤠᤔᤢ ᤔᤧᤳᤋᤧᤛᤧ᤹ᤀᤥ॥

²⁰ ᤀᤡᤖᤠᤛ᤻ᤋᤛᤧᤴ ᤁᤥᤖᤴᤌᤡᤀᤥ ᤘᤕᤧ ᤗᤠᤖᤧᤖᤥ॥ ᤜᤧᤰᤁᤩᤠᤱ ᤋᤪᤥᤑᤡᤔᤛᤧᤴ ᤋᤢᤃᤧᤖ ᤘᤕᤧᤒᤠᤸᤗᤧ ᤔᤡᤗᤣᤋᤛᤀᤥᤀᤣ ᤐᤰᤌᤠᤱᤗᤥ॥

²¹ ᤁᤧᤛᤢᤰᤋᤢᤏᤧ ᤑᤠ᤹ᤃᤪ ᤆᤢᤱᤘᤠ᤺ᤶᤔᤠ ᤋᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤋᤠᤔᤠ ᤋᤶᤛᤡᤱ ᤆᤥᤃᤧ᤹ᤀᤥ॥ ᤕᤢᤒᤗᤛ. ᤜᤧᤰᤁᤩᤠᤱ ᤐᤢᤍᤣᤏᤛ. ᤗᤡᤏᤛ. ᤰᤗᤦᤍᤡᤕᤠ ᤜᤧᤰᤁᤩᤠᤱ ᤁᤠᤰ ᤘᤣ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧᤀᤠᤱ ᤂᤧᤏᤧ᤹ ᤛᤧᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥

²² ᤍᤠᤱᤒᤠᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤁᤧᤖᤧᤰᤏᤢ ᤘᤠ᤹ᤖᤖᤥ॥