᥈ ᤛᤠᤔᤢᤀᤧᤗ 8 - LIFOTNT

ᤍᤠᤀᤢᤍᤖᤧ ᤌᤱ ᤏᤠ᤺ᤴᤍᤢ᤹

¹ ᤂᤧᤴ ᤀᤣᤃᤠᤱ ᤍᤠᤀᤢᤍᤖᤧ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤍᤠᤀᤢᤍᤧᤴᤏᤢ ᤔᤧᤏ᤺ᤶᤛᤡᤱ. ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤢᤰᤗᤠᤶᤒᤠ ᤔᤣᤌᤣᤃᤀᤠᤔᤠᤜ ᤋᤧᤴᤏᤡᤴ ᤜᤢᤰᤁᤠᤵ ᤆᤥᤃᤢ॥

² ᤍᤠᤀᤢᤍᤖᤧ ᤔᤥᤀᤠᤒᤡᤜᤠ᤹ᤀᤠᤱ ᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤂᤠᤶᤒᤠᤱᤅᤥ ᤏᤧᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤗᤳᤇᤠ ᤌᤠᤰᤐᤠ᤺ᤸᤗᤧ ᤛᤡ᤺ᤰᤋᤢᤛᤡ॥ ᤛᤡ᤺ᤰᤋᤢᤛᤡᤸᤗᤧ ᤁᤢᤛᤡ᤺ᤰᤔᤠ ᤏᤧᤳᤇᤡᤀᤥ ᤁᤧᤎᤠᤒᤠᤜᤠ᤹ ᤛᤧᤵᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤁᤢᤛᤡ᤺ᤰᤔᤠ ᤛᤢᤶᤛᤡᤀᤥ ᤁᤧᤎᤠᤒᤠᤜᤠ᤹ ᤗᤧᤵᤔᤠᤍᤣᤔᤠ ᤐᤠᤱᤄᤢᤛᤡ॥ ᤀᤰᤂᤣᤗ᤹ᤖᤡᤰ ᤔᤥᤀᤠᤒᤡᤜᤠ᤹ ᤂᤢᤏᤧ᤹ ᤁᤢᤕᤢᤰᤁᤥ ᤔᤧᤒᤥ᤺ᤰᤂᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤣ᤺ᤱᤕᤠᤱ ᤔᤧᤜᤢᤅᤢ॥

³ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤌᤠᤖᤡᤰ ᤕᤢᤰ ᤆᤥ᤺ᤰᤛᤧ ᤕᤠᤶᤔᤥ ᤐᤣᤖ ᤐᤳᤇᤧᤸᤗᤧ ᤛᤥᤒᤠᤒᤠ ᤜᤠᤱ. ᤖᤜᤥᤒᤖᤧ ᤁᤢᤛ᤻ᤛᤠ ᤜᤍᤍᤣᤈᤣᤖᤧᤴᤏᤠᤱ ᤌᤱᤅᤥ ᤍᤠᤀᤢᤍᤖᤧ ᤏᤠ᤺ᤴᤍᤢ॥

⁴ ᤍᤠᤀᤢᤍᤖᤧ ᤂᤢᤏᤧ᤹ᤗᤠᤶ ᤜᤧᤴᤇᤡᤱ ᤌᤡᤰ ᤀᤴᤗᤠᤎᤠᤜᤠ᤹. ᤜᤧᤴᤇᤡᤱ ᤏᤢᤛᤡ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤏᤢ ᤏᤡᤒᤥᤱ ᤜᤧᤴᤇᤡᤱ ᤂᤠᤶᤒᤠᤱᤅᤥ ᤌᤱ ᤁᤧᤈᤥ᤺ᤰᤐᤠ ᤌᤰᤛᤢᤒᤠᤜᤠ᤹ ᤋᤧᤶᤛᤢᤛᤡᤀᤠᤱ ᤛᤠᤰᤋᤢᤛᤡ॥ ᤂᤢᤏᤧ᤹ ᤁᤢᤗᤠᤃᤡ ᤆᤠᤜᤠ ᤁᤧᤈᤥ᤺ᤰᤐᤠ ᤀᤴᤗᤠᤎᤠ ᤁᤧᤀᤢ᤺ᤱᤒᤠ ᤁᤡᤵ ᤌᤡᤰ ᤀᤴᤜᤠ᤹ ᤕᤢᤰᤂᤢᤛᤡᤀᤠᤱ ᤁᤧᤏᤶᤒᤠ ᤁᤧᤖᤧᤰ ᤀᤴᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤛᤠ᤹ᤀᤡᤴ ᤂᤰᤋᤢ ᤐᤡᤖᤢᤛᤡ॥

⁵ ᤍᤔᤛ᤻ᤁᤛᤒᤠ ᤀᤖᤠᤔᤡᤜᤠ᤹ ᤛᤥᤒᤠᤒᤠ ᤜᤠᤱ ᤜᤍᤍᤣᤈᤣᤖᤧᤴ ᤁᤢᤓᤠ᤹ᤛᤧ ᤔᤧᤍᤩᤧ. ᤍᤠᤀᤢᤍᤖᤧ ᤂᤧᤱᤜᤠ᤹ ᤏᤡᤒᤥᤱᤅᤠᤱ ᤏᤧᤳᤇᤡ ᤜᤧᤴᤇᤡᤱ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤛᤧᤖᤢᤛᤡ॥

⁶ ᤜᤧᤰᤁᤩᤠᤱ ᤍᤔᤛ᤻ᤁᤛᤒᤠ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤧᤱᤃᤵᤐᤥ ᤌᤰᤛᤢᤒᤠ ᤛᤠ᤺ᤱᤃᤠᤜᤡᤶ ᤗᤣ᤺ᤳᤋᤢ॥ ᤂᤧᤱᤜᤠ᤹ ᤂᤢᤏᤧ᤹ ᤁᤢᤕᤢᤰᤁᤥ ᤔᤧᤍᤩᤧ. ᤜᤧᤰᤁᤩᤠᤱ ᤜᤠᤱᤅᤥ ᤜᤢᤱᤔᤠ ᤁᤧᤒᤥᤱᤒᤠ ᤀᤣ᤺ᤱᤕᤠᤱ ᤔᤧᤜᤢᤅᤢ॥ ᤀᤰᤂᤣᤗ᤹ᤖᤡᤰ ᤍᤠᤀᤢᤍᤧᤴ ᤀᤠᤳᤋᤠᤴ ᤀᤠᤳᤋᤠᤴ ᤐᤣ. ᤕᤜᤘᤣ ᤍᤠᤱᤒᤠᤸᤗᤧ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢ॥

⁷ ᤍᤠᤀᤢᤍᤖᤧ ᤜᤍᤍᤣᤈᤣᤖᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤔᤧᤃᤳᤋᤢᤒᤠ ᤛᤠᤶᤔᤩᤠᤱ ᤂᤥᤜᤠ᤹ ᤏᤠᤵᤋᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤕᤖᤢᤛᤗᤧᤔ ᤋᤣ᤹ᤖᤢ॥

⁸ ᤂᤢᤏᤧ᤹ ᤜᤍᤍᤣᤈᤣᤖᤖᤧ ᤁᤢᤕᤢᤰᤁᤥ ᤁᤧᤏᤧᤒᤠ ᤋᤣᤒᤜ ᤏᤢ ᤒᤣᤖᤥᤋ ᤕᤧᤰᤕᤰᤗᤠᤶᤒᤠ ᤕᤖᤡᤰ ᤁᤠᤛᤠᤜᤠ᤹ ᤋᤣ᤹ᤖᤢ॥

⁹ ᤍᤠᤀᤢᤍᤖᤧ ᤜᤍᤍᤣᤈᤣᤖᤖᤧ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤌᤱ ᤌᤰᤔᤠ ᤏᤠ᤺ᤴᤍᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤜᤔᤠᤋᤒᤠ ᤜᤠᤱ ᤋᤥᤀᤢ᤺ᤸᤗᤧ ᤂᤧᤵᤛᤢ.

¹⁰ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤕᤥᤖᤠᤶᤔᤧᤴ ᤍᤠᤀᤢᤍᤖᤧ᤹ᤀᤥ ᤛᤧᤘᤠ ᤋᤥ᤺ᤴᤇᤧ ᤏᤢ ᤌᤱ ᤏᤠ᤺ᤴᤍᤢᤒᤠᤀᤥ ᤏᤠᤈᤶ ᤀᤡᤱᤄᤱ ᤐᤡᤛᤧ ᤐᤠᤱᤄᤢ॥ ᤌᤣᤀᤠᤱᤓᤧᤸᤗᤧ ᤜᤍᤍᤣᤈᤣᤖ ᤏᤢ ᤋᤥᤀᤡᤗᤢᤶᤔᤥ ᤌᤱ ᤐᤥ᤺ᤰᤂᤧᤖ ᤘᤕᤧ॥ ᤜᤧᤰᤁᤩᤠᤱ ᤕᤥᤖᤠᤔᤖᤧ ᤕᤢᤵᤐᤠ ᤛᤠᤶᤔᤩᤠᤱ ᤏᤢ ᤁᤠᤛᤠ ᤆᤡᤃᤰᤘᤠᤜᤠ᤹ ᤋᤣ᤹ᤖᤢ ᤐᤡᤖᤢ॥

¹¹ ᤂᤧᤴ ᤆᤡᤃᤰᤘᤠᤜᤠ᤹ ᤍᤠᤀᤢᤍ ᤜᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤢ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤏᤠ᤺ᤴᤍᤢᤛᤡᤒᤠ ᤁᤧᤖᤧᤰ ᤛᤢᤘᤠᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤵᤐᤠ ᤏᤢ ᤛᤠᤶᤔᤩᤠᤱᤜᤠ᤹—

¹² ᤀᤧᤍᤥᤔ. ᤔᤥᤀᤠᤒ. ᤀᤶᤔᤥᤏᤡ. ᤐᤗᤡᤛ᤻ᤋᤡ ᤏᤢ ᤀᤔᤠᤗᤧᤁᤡ. ᤜᤧᤰᤁᤩᤠᤱ ᤛᤥᤒᤠᤒᤠ ᤜᤠᤱ ᤖᤜᤥᤒᤖᤧ ᤁᤢᤛ᤻ᤛᤠ ᤜᤍᤍᤣᤈᤣᤖᤗᤠᤶᤒᤠ ᤏᤠᤵᤋᤢᤛᤡᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥᤀᤣ ᤋᤥ᤺ᤴᤍᤢ॥

¹³ ᤜᤧᤰᤁᤩᤠᤱ ᤕᤢᤶ ᤔᤧᤵᤏᤠᤒᤠ ᤏᤧᤏᤧᤒᤠᤍᤧᤴᤗᤠᤶ ᤌᤡᤒᤥᤱᤅᤠᤱ ᤕᤧᤳᤇᤡ ᤜᤧᤴᤇᤡᤱ ᤀᤣᤍᤥᤔᤡᤜᤠ᤹ ᤛᤧᤖᤢᤛᤡᤀᤠᤱ ᤏᤢ᤺ᤰᤂᤧᤸᤗᤧ ᤍᤠᤀᤢᤍᤖᤧ ᤁᤢᤔᤡᤱᤛᤥ ᤐᤥᤖᤧ॥

¹⁴ ᤍᤠᤀᤢᤍᤖᤧ ᤀᤧᤍᤥᤔ ᤁᤧᤖᤧᤰ ᤐᤡᤛᤠᤱ ᤌᤰᤛᤢᤒᤠ ᤛᤠ᤺ᤱᤃᤠᤜᤡᤶ ᤗᤣ᤺ᤳᤋᤢ. ᤜᤧᤰᤁᤩᤠᤱ ᤁᤧᤖᤧᤰ ᤀᤣᤍᤥᤔᤡᤜᤠ᤹ ᤂᤢᤏᤧ᤹ ᤁᤢᤕᤢᤰᤁᤥ ᤔᤧᤒᤥ᤺ᤰᤂᤧ॥ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤀᤠᤳᤋᤠᤴ ᤀᤠᤳᤋᤠᤴ ᤐᤣ ᤂᤧᤵᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤂᤢᤏᤧ᤹ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢᤖᤥ॥

¹⁵ ᤜᤧᤰᤁᤣᤗ᤹ᤖᤡᤰ ᤍᤠᤀᤢᤍᤖᤧ ᤁᤧᤖᤧᤰ ᤀᤡᤛᤪᤠᤀᤡᤗ ᤛᤶᤎᤠᤱ ᤜᤠᤱᤕᤢᤰ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴ ᤆᤥᤃᤢ॥

¹⁶ ᤂᤧᤴ ᤕᤧᤶᤔᤥ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤘᤕᤧ॥ ᤜᤧᤰᤁᤩᤠᤱ ᤀᤜᤡᤗᤢᤍᤖᤧ ᤁᤢᤛ᤻ᤛᤠ ᤕᤜᤥᤛᤠᤐᤠᤋᤧᤴ ᤂᤠᤏᤡ᤺ᤳ ᤁᤧᤕᤢᤱᤒᤠ ᤘᤕᤧ॥

¹⁷ ᤜᤧᤰᤁᤩᤠᤱ ᤀᤜᤡᤋᤢᤒᤖᤧ ᤁᤢᤛ᤻ᤛᤠ ᤛᤍᤥᤁᤧᤴ ᤏᤢ ᤀᤒᤡᤕᤠᤌᤠᤖᤖᤧ ᤁᤢᤛ᤻ᤛᤠ ᤀᤜᤡᤔᤣᤗᤣᤁᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤛᤡ॥ ᤛᤖᤠᤕᤠᤜᤴ ᤛᤢᤜᤠᤱᤔᤡᤒᤠ ᤘᤕᤧ॥

¹⁸ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤁᤖᤣᤋᤡ ᤏᤢ ᤐᤣᤗᤣᤌᤡᤜᤠ᤹ ᤀᤥᤃᤧᤔᤧᤵᤐᤠ ᤛᤢᤜᤠᤱᤕᤢᤰᤐᤠ ᤘᤕᤧ॥ ᤍᤠᤀᤢᤍᤖᤧ ᤁᤢᤛ᤻ᤛᤠᤜᤠ᤹ ᤜᤠᤱ ᤀᤡᤱᤈᤠᤱᤛᤠᤒᤠ ᤔᤧᤘᤕᤧ॥