᥈ ᤛᤠᤔᤢᤀᤧᤗ 7 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤍᤠᤀᤢᤍᤧᤴᤏᤢ ᤔᤠᤱᤜᤢᤵ ᤆᤥᤃᤢ ( ᥇ ᤛᤠᤵᤔᤢ ᥇᥍:᥇-᥇᥋ ) 1 ᤀᤠᤸᤗ ᤍᤠᤀᤢᤍᤧᤴ ᤜᤠᤱᤜᤡᤶᤔᤥ ᤕᤢᤱᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤄᤡᤖᤡᤒᤠ ᤁᤢᤏᤡᤱᤔᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠ ᤔᤧᤒᤥ᤺ᤰᤂᤧᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤏᤠ᤺ᤶᤛᤡᤱᤔᤠ ᤐᤡᤖᤢ. 2 ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤧᤴ ᤔᤧᤳᤋᤢ. “ᤀᤠᤱᤃᤠ᤹ᤃ ᤛᤠᤶᤔᤠᤱᤛᤡᤱᤅᤡᤸᤗᤧ ᤆᤥ᤺ᤰᤔᤏᤠᤒᤠ ᤜᤡᤶᤔᤥ ᤕᤢᤱᤅᤠ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤗᤠ᤺ᤰᤁᤠᤳ ᤛᤠ᤺ᤱᤃᤠᤜᤡᤶᤔᤥ ᤕᤢᤱ॥” 3 ᤏᤠᤋᤠᤏᤖᤧ ᤜᤠᤱᤅᤡᤴ ᤔᤧᤳᤋᤢ. “ᤁᤧᤏᤡᤱᤘᤠ᤹ᤀᤥ ᤌᤣ ᤘᤠ᤹ ᤜᤠᤒᤠᤄᤧᤴ ᤆᤥᤃᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴᤏᤣ ᤂᤧᤏᤧ᤹ᤏᤢ ᤘᤠ᤹॥” 4 ᤁᤖ ᤜᤠᤒᤠ ᤂᤧᤴ ᤛᤧᤴᤍᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤄᤱᤅᤡᤴ ᤏᤠᤋᤠᤏᤖᤧ᤹ᤀᤥ ᤁᤧᤖᤧ— 5 “ᤐᤣᤃᤧ᤹ᤀᤠᤱ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤔᤧᤳᤋᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤀᤠᤗᤠᤃᤡ ᤗᤳᤇᤠ ᤕᤢᤱᤔᤠ ᤜᤡᤶ ᤂᤧᤏᤧ᤹ᤀᤣ ᤁᤧᤈᤥᤃᤢᤒᤠᤒᤡ᥅ 6 ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶᤒᤠ ᤌᤠᤰᤋᤢᤱᤛᤡᤱᤅᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤀᤠᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤜᤡᤶᤔᤥ ᤔᤧᤴᤕᤢᤱᤅᤣ ᤘᤠ᤹ᤀᤠ॥ ᤁᤖ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤖᤰ ᤆᤳᤇᤡᤱᤅᤠᤖ ᤕᤢᤱᤅᤠᤖ ᤘᤠ᤹ᤀᤠ॥ 7 ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤏᤢ ᤀᤠᤳᤋᤠᤴ ᤐᤣᤃᤠᤱᤛᤠᤱ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤒᤠ ᤐᤡᤳᤁᤧᤃᤶᤒᤠᤜᤠ᤹ᤀᤥ ᤀᤠᤳᤋᤡᤴ ᤕᤢᤰᤛᤠᤒᤧᤴᤏᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤛᤠᤶᤔᤠᤱ ᤛᤡᤱᤅᤡᤸᤗᤧᤴ ᤜᤡᤶ ᤌᤣᤀᤠᤱ ᤁᤧᤴᤈᤥᤃᤢᤴ᥅ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤱᤒᤠ ᤜᤥᤵ॥’ 8 “ᤀᤠᤸᤗ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤔᤧᤳᤋᤧᤶᤔᤧ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ‘ᤔᤧᤸᤗᤢᤰ ᤁᤧᤃᤔᤢᤛᤡᤖ ᤁᤧᤕᤠᤃᤧᤸᤗᤧ ᤔᤧᤸᤗᤢᤰ ᤆᤠᤖᤠᤶᤔᤠᤍᤧᤴᤏᤥᤗᤠᤶ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡ ᤀᤠᤔᤏᤠᤜᤠ᤹ ᤗᤠᤶᤗᤥᤛᤧᤛᤧ᤹ ᤑᤠ᤹ᤀᤠᤱ ᤛᤣ᤺ᤴᤏᤧ॥ 9 ᤂᤧᤏᤧ᤹ ᤀᤠᤳᤋᤠᤋᤠᤴ ᤁᤧᤒᤣ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤕᤠᤱ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤖᤧᤰ ᤁᤧᤏᤡᤱᤔᤡᤜᤠ᤹ ᤂᤧᤏᤧ᤹ ᤁᤧᤍᤃᤡᤀᤣ ᤔᤧᤰᤂᤢᤱᤛᤡᤱ॥ ᤀᤠᤸᤗ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤐᤠ ᤔᤡᤱ ᤁᤧᤛᤧᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤂᤧᤏᤧ᤹ ᤁᤢᤔᤡᤱ ᤁᤧᤀᤡᤱᤒᤠ ᤆᤥ᤺ᤰᤏᤧ॥ 10 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤗᤠᤃᤡ ᤗᤳᤇᤠ ᤋᤧᤴ ᤆᤥᤃᤢᤱ᤹. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤒᤠᤅᤣ ᤕᤢᤱᤔᤠᤍᤧᤴ ᤐᤥᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤳᤋᤡᤸᤗᤧᤀᤠᤱ ᤕᤠᤶᤔᤥ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤴ᤹ ᤁᤢ᤹ᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤋᤃᤡᤒᤠ ᤜᤧᤰᤁᤣ ᤋᤢᤰᤂᤣᤀᤠᤱ ᤔᤧᤴᤈᤠ᤺ᤳᤋᤢᤴᤇᤡᤴ॥ 11 ᤀᤡᤛᤪᤠᤀᤡᤗᤒᤠ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤛᤶᤎᤠᤱ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤱᤛᤡᤱᤒᤠ ᤕᤧᤴᤏᤠᤱᤎᤥ. ᤂᤧᤱᤜᤠ᤹ ᤁᤢ᤹ᤀᤡᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ॥ ᤁᤖ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤁᤧᤖᤧᤰ ᤁᤧᤏᤡᤱᤔᤡᤜᤠ᤹ᤖᤧ ᤀᤠᤑᤠᤸᤗᤧᤀᤠᤱ ᤁᤧᤔᤧᤶᤓᤳᤏᤧᤴ॥ ᤂᤡᤏᤡ᤹ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱ ᤛᤢᤘᤠᤱᤎᤡᤰ ᤆᤥᤃᤢᤱ ᤑᤠ᤹ᤀᤠᤱ ᤂᤢᤏᤧ᤹ ᤀᤢᤘᤠ ᤆᤥᤃᤢᤀᤠᤱ ᤘᤠ᤹॥ 12 ᤂᤧᤏᤧ᤹ ᤁᤠᤵᤐᤥᤒᤠ ᤁᤧᤍᤢᤶ. ᤁᤧᤛᤡᤀᤠᤱ ᤂᤧᤏᤧ᤹ ᤁᤧᤴᤎᤧᤒᤠᤜᤠ᤹ᤏᤢ ᤁᤧᤒᤣ᤺ᤰ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ᤀᤥᤗᤠᤶᤒᤠ. ᤂᤧᤏᤧ᤹ᤀᤣ ᤁᤧᤎᤰᤗᤠᤶᤒᤠ ᤗᤳᤇᤠ ᤗᤰᤂᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤑᤥ᤺ᤰᤂᤢᤱ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤠᤱᤈᤢᤶᤔᤡᤴ ᤛᤍᤠᤍᤡᤱᤒᤠ ᤆᤥᤃᤢᤱ᤹॥ 13 ᤂᤧᤸᤗᤧᤀᤣ ᤀᤠᤱᤃᤠ᤹ ᤀᤠᤗᤠᤃᤡ ᤗᤳᤇᤠ ᤜᤡᤶ ᤆᤥᤃᤢ ᤐᤡᤀᤠ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤠᤱᤕᤢᤰᤏᤠᤴ ᤛᤍᤠᤍᤡᤱᤗᤧ ᤗᤠᤃᤡ ᤆᤥᤃᤢᤱ ᤐᤡᤖᤢᤱ᤹॥ 14 ᤀᤠᤱᤃᤠ᤹ ᤂᤧᤸᤗᤧ ᤁᤢᤶᤒᤠ ᤐᤥᤱᤅᤠ᤹. ᤜᤧᤰᤁᤩᤠᤱ ᤂᤧᤴ ᤀᤠᤱᤃᤠ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ ᤐᤥᤱ᤹॥ ᤂᤧᤸᤗᤧ ᤗᤠᤕᤥ ᤆᤥᤃᤢᤏᤧᤓᤃᤪ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤋᤰᤁᤠ᤺ᤳᤋᤡᤸᤗᤧ ᤔᤧᤄᤢᤶᤛᤢᤛᤡᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤴ ᤂᤢᤶᤛᤢᤱ᤹॥ 15 ᤀᤠᤱᤃᤠ᤹ ᤛᤠᤘᤗᤧᤴ ᤂᤧᤏᤧ᤹ ᤁᤧᤗᤠᤶᤔᤥᤏᤢ ᤂᤧᤳᤋᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤗᤢᤱᤔᤠ᤹ ᤋᤢᤰᤔᤠ ᤏᤠ᤹ᤖᤢᤱ ᤁᤖ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛ᤻ᤛᤠᤴ ᤀᤠᤓᤧᤸᤗᤧᤀᤠᤱ ᤗᤢᤱᤔᤠ᤹ ᤋᤢᤰᤔᤠ ᤔᤧᤗᤧᤳᤋᤠᤴ॥ 16 ᤂᤧᤏᤧ᤹ ᤁᤧᤜᤡᤶᤛᤕᤱ ᤏᤢ ᤂᤧᤏᤧ᤹ ᤁᤧᤜᤠᤱᤈᤢᤶᤔᤡᤴ ᤀᤠᤱᤃᤠ᤹ ᤀᤠᤍᤃᤡ ᤛᤍᤠᤍᤡᤱ ᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤠᤱᤕᤢᤰᤏᤠᤴ ᤛᤍᤠᤍᤡᤱᤖᤧ ᤗᤠᤃᤡ ᤌᤎᤵ ᤔᤧᤸᤗ᤹ᤔᤏᤠᤒᤠ ᤐᤥᤱ᤹॥’” 17 ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤛᤣ᤺ᤴᤎᤠᤱ ᤆᤥᤃᤢᤒᤠ ᤐᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤧᤸᤗᤧ ᤁᤧᤖᤧᤰ ᤍᤠᤀᤢᤍᤧᤴ ᤔᤧᤳᤋᤢᤖᤥ॥ ᤍᤠᤀᤢᤍᤖᤧ ᤁᤢᤒᤣ᤺ᤸᤗᤡ ( ᥇ ᤛᤠᤵᤔᤢ ᥇᥍:᥇᥌-᥈᥍ ) 18 ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤴ ᤕᤜᤘᤣ ᤍᤠᤱᤒᤠ ᤘᤕᤧᤒᤠᤍᤧᤴᤏᤥ ᤐᤣ. ᤜᤧᤰᤁᤩᤠᤱ ᤕᤢᤱᤛᤡᤱᤅᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤜᤠ᤺ᤳᤋᤠᤒᤣ᥅ ᤀᤠᤱᤃᤠ᤹ ᤀᤠᤜᤡᤶᤛᤕᤱᤜᤠ᤹ ᤌᤣᤛᤡᤒᤣ᥅ ᤜᤧᤰᤁᤩᤠᤱ ᤀᤠᤱᤃᤠ᤹ ᤌᤣᤀᤠᤱ ᤁᤵᤔᤥ ᤌᤠᤖᤡᤰ ᤁᤧᤍᤠᤖᤠᤱᤒᤠᤒᤣ᥅” 19 ᤕᤜᤘᤣ ᤍᤠᤱᤒᤣ. ᤜᤧᤰᤁᤣᤛᤠᤱ ᤁᤴ ᤁᤧᤖᤧᤰᤜᤠ᤹ᤃ ᤂᤧᤏᤧ᤹ ᤁᤧᤏᤡᤔᤠᤀᤥ ᤗᤳᤇᤠ ᤆᤢᤰᤐᤠᤛᤠ ᤐᤠ᤺ᤴᤗᤥ॥ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤸᤗᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤁᤧᤒᤥᤱᤒᤠ ᤋᤠ᤺ᤴᤍᤡᤒᤠ ᤐᤠ᤺ᤴᤏᤡᤴᤏᤣ ᤁᤧᤒᤠ᤺ᤳᤋᤢᤖᤥ॥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤔᤏᤠᤜᤠ᤹ᤖᤧ ᤗᤠᤃᤡ ᤛᤍᤠᤍᤡᤱ ᤜᤠᤒᤠ ᤀᤰᤂᤣᤀᤣ ᤁᤧᤈᤥᤃᤢᤒᤡ᥅ 20 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤴᤏᤠᤱᤎᤥ ᤘᤣ᤹ ᤌᤣ ᤐᤠ᤺ᤵᤔᤠ ᤛᤢᤰᤋᤢᤀᤠᤱᤒᤣ᥅ ᤕᤜᤘᤣ ᤍᤠᤱᤒᤠᤀᤣ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤴ ᤏᤢᤖᤡᤰᤁᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤘᤠ᤹ᤖᤥ᥄ 21 ᤂᤧᤏᤧ᤹ ᤔᤠᤱᤁᤧᤜᤧᤰᤛᤡᤱᤒᤠᤸᤗᤧ ᤆᤥᤃᤢᤸᤗᤧ. ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤩᤠᤱ ᤁᤧᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤁᤴ ᤐᤕᤶᤒᤠ ᤕᤠ᤺ᤶᤒᤰᤁᤡᤴ ᤁᤧᤈᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤧᤛᤧᤘᤠᤖᤥᤒᤠᤴ ᤁᤧᤔᤧᤳᤋᤢᤀᤠᤱ ᤘᤠ᤹॥ 22 “ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤐᤕᤶ ᤕᤶᤒᤠ ᤁᤧᤈᤥᤰ॥ ᤂᤧᤏᤧ᤹ ᤜᤧᤰᤋᤱᤒᤠ ᤜᤠ᤺ᤳᤋᤠᤱ ᤜᤥᤵ ᤁᤧᤗ᤹ᤒᤠ ᤀᤠᤏᤡᤃᤣ ᤁᤧᤖᤧᤰᤗᤧ ᤂᤧᤵᤛᤢᤶᤒᤧ. ᤜᤧᤰᤁᤩᤠᤱ ᤂᤧᤏᤧ᤹ᤀᤠᤱᤎᤥ ᤘᤣ᤹ ᤏᤡᤱᤘᤠ᤹ᤑᤢᤔᤠᤱ ᤜᤠ᤺ᤳᤋᤠᤱ ᤜᤥᤵ॥ 23 ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤧᤏᤧ᤹ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤧ ᤁᤧᤒᤣᤒᤠ ᤂᤧᤏᤧ᤹ ᤁᤧᤛᤣᤃᤢᤒᤠ ᤀᤡᤛᤪᤠᤀᤡᤗ ᤛᤢᤘᤠᤱ ᤜᤧᤰᤋᤱᤒᤠ ᤘᤣ᤹ ᤛᤢᤘᤠᤱ ᤜᤠᤳ ᤘᤠ᤹ᤒᤣ᥅ ᤂᤧᤴ ᤛᤢᤘᤠᤱᤅᤡᤸᤗᤧ ᤗᤠᤃᤡ ᤂᤧᤏᤧ᤹ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤧ ᤁᤧᤒᤣ॥ ᤂᤧᤴᤗᤠᤶᤒᤠᤀᤣ ᤂᤧᤏᤧ᤹ ᤀᤠᤒᤠᤅᤣ ᤁᤧᤔᤡᤱᤅᤡᤴ ᤁᤧᤛᤧᤛᤢ ᤜᤧᤰᤁᤩᤠᤱ ᤔᤡᤛᤪᤗᤠᤶᤒᤠ ᤁᤧᤗ᤺ᤳᤋᤢ ᤁᤧᤎᤠᤰᤋᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤥ ᤁᤧᤕᤢᤱᤒᤠ ᤘᤣ᤹ ᤛᤢᤘᤠᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤁᤧᤏᤠ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤁᤡᤵᤔᤠ ᤁᤧᤄᤢᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢ॥ 24 ᤂᤧᤏᤧ᤹ ᤀᤠᤒᤠᤅᤣ ᤁᤧᤔᤏᤠ ᤀᤡᤛᤪᤠᤀᤡᤗᤧᤴ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤒᤠᤅᤣ ᤁᤧᤔᤏᤠ ᤁᤧᤈᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤣ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤖᤥ॥ 25 “ᤀᤠᤸᤗ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤜᤧᤰᤁᤩᤠᤱ ᤁᤢᤜᤡᤶᤛᤕᤱᤜᤠ᤹ᤏᤢ ᤁᤧᤈᤥᤃᤢᤒᤠ ᤔᤠᤱᤜᤢᤵ ᤁᤢᤀᤡᤛᤡᤰ ᤛᤍᤠᤍᤡᤱ ᤆᤥᤃᤧ᤹ᤀᤥ. 26 ᤂᤧᤏᤧ᤹ ᤁᤧᤔᤡᤱᤅᤡᤴ ᤛᤍᤠᤍᤡᤱ ᤐᤕᤶ ᤕᤶᤒᤠ ᤐᤥᤱᤗ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤀᤡᤛᤪᤠᤀᤡᤗ ᤛᤶᤎᤠᤱ ᤏᤡᤱᤘᤠ᤹ᤑᤢᤔᤠᤱᤗᤥ॥’ ᤜᤧᤰᤁᤩᤠᤱ ᤁᤧᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤁᤢᤜᤡᤶᤛᤕ᤺ᤱᤅᤡᤴ ᤂᤧᤏᤧ᤹ ᤁᤧᤏᤡᤔᤠᤀᤥ ᤛᤍᤠᤍᤡᤱ ᤕᤢᤰᤛᤡᤱ ᤐᤥᤱᤗᤥ॥ 27 ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤜᤡᤶᤎᤡᤰ ᤁᤧᤈᤥᤃᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤧᤛᤧᤘᤠᤖᤥᤒᤠᤴ ᤀᤥᤛᤣ᤺ᤴᤃᤧᤎᤠᤰᤋᤠᤱ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤁᤴ ᤋᤢᤘᤠᤴ ᤋᤥ᤺ᤶᤔᤠᤖᤧ ᤗᤠᤃᤡ ᤀᤠ᤺ᤴᤇᤡᤱᤔᤠ ᤂᤥᤛᤢᤱ॥’ 28 “ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ॥ ᤂᤧᤏᤧ᤹ ᤁᤧᤒᤠ᤺ᤴᤈᤠ᤺ᤰᤁᤡᤴ ᤏᤛᤠ᤺ᤴᤛᤠᤒᤠ ᤆᤥᤰ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤴᤏᤢ ᤁᤴ ᤏᤢᤒᤠ ᤐᤠ᤺ᤴᤜᤠ᤹ ᤔᤠᤱᤜᤢᤵ ᤁᤧᤈᤥᤃᤢᤀᤠᤱ ᤘᤠ᤹ᤖᤥ॥ 29 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤁᤧᤛᤧᤘᤠᤖᤥᤒᤠᤸᤗᤧ ᤁᤢᤜᤡᤶᤛᤕᤱᤜᤠ᤹ ᤜᤠᤱᤘᤠᤔᤢ᤹ᤀᤡ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤴ ᤂᤧᤏᤧ᤹ ᤁᤧᤍᤃᤡ ᤛᤍᤠᤍᤡᤱ ᤘᤠ᤹ᤖ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤒᤠ᤺ᤳᤋᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤠᤱᤘᤠ ᤔᤢ᤹ᤀᤡᤗᤠᤶᤒᤠᤀᤣ ᤁᤧᤛᤧᤘᤠᤖᤥᤒᤠᤸᤗᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤛᤍᤠᤍᤡᤱ ᤜᤠᤱᤘᤠᤔᤢ᤹ᤀᤡ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.