᥈ ᤛᤠᤔᤢᤀᤧᤗ 6 - LIFOTNT

ᤔᤠᤱᤜᤢᤵ ᤛᤴᤍᤥᤰᤁᤡᤴ ᤕᤖᤢᤛᤗᤧᤔ ᤔᤧᤍᤠᤖᤢ

¹ ᤍᤠᤀᤢᤍᤖᤧ ᤕᤠᤶᤔᤥ ᤀᤡᤛᤪᤠᤀᤡᤗᤒᤠ ᤛᤢᤶᤒᤥᤱ ᤜᤧᤴᤇᤡᤱ ᤛᤣ᤺ᤰᤔᤏᤠᤒᤠ ᤌᤰᤛᤢᤒᤠᤜᤠ᤹ ᤀᤢ᤺ᤳᤋᤢᤛᤡ.

² ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤋᤠ᤺ᤵᤔᤠ ᤑᤠ᤹ᤀᤠᤱ ᤕᤜᤢᤍᤠᤒᤠ ᤒᤠᤗᤠᤗᤠᤶᤒᤠ ᤍᤠᤀᤢᤍᤧᤴ ᤗ᤺ᤴᤍᤧᤀᤠᤱ ᤐᤣ. ᤁᤖᤢᤒ ᤔᤧᤵᤏᤠᤒᤠ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱ ᤂᤧᤴ ᤛᤴᤍᤥᤰᤁᤥ ᤐᤳᤇᤧ॥

³ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤗᤳᤇᤠ ᤁᤢᤛᤱ ᤐᤡᤳᤗᤠᤎᤠᤀᤥ ᤔᤧᤕᤠᤰᤋᤢ. ᤜᤧᤰᤁᤩᤠᤱ ᤁᤥ᤺ᤰᤔᤠᤀᤥ ᤁᤧᤕᤢᤱᤒᤠ ᤀᤒᤡᤏᤠᤍᤠᤒᤖᤧ ᤁᤢᤜᤡᤶᤔᤥᤗᤠᤶ ᤔᤧᤍᤠᤖᤢ. ᤜᤧᤰᤁᤩᤠᤱ ᤀᤒᤡᤏᤠᤍᤠᤒᤖᤧ ᤁᤢᤛ᤻ᤛᤠ ᤀᤢᤈ᤻ᤈᤠᤜ ᤏᤢ ᤀᤜᤡᤕᤥ᤺ᤸᤗᤧ ᤐᤡᤳᤗᤠᤎᤠ᤺ᤴ ᤗᤠᤶᤗᤥᤛᤧᤇᤢᤖ ᤋᤣ᤹ᤖᤧᤇᤢ॥

⁴ ᤜᤧᤰᤁᤩᤠᤱ ᤀᤜᤡᤕᤥᤴ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤁᤢᤍᤃᤡ ᤌᤠᤛᤡᤱ॥

⁵ ᤍᤠᤀᤢᤍᤧᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤂᤢᤴᤇᤡ᤹ ᤛᤡᤰᤛᤔᤧᤖ ᤛᤠᤶᤗᤥᤏᤢ. ᤛᤠᤖᤠᤱᤃᤡ. ᤋᤢ᤺ᤱᤃᤣ. ᤁᤣ. ᤂᤡᤳᤆᤡᤱ ᤂᤡᤳᤆᤡᤱ ᤁᤧᤗ᤹ᤒᤠ ᤔᤢᤰᤗᤠ ᤏᤢ ᤛᤠᤵᤑᤱᤃᤠ ᤜᤡᤵᤏᤢ ᤔᤧᤛ᤺ᤳᤋᤧᤖ ᤔᤧᤕᤠᤃᤧ॥

⁶ ᤂᤧᤱᤜᤠ᤹ ᤏᤠᤁᤥᤏᤒᤠ ᤁᤢᤈᤠ ᤑᤢᤱᤔᤠᤍᤧᤴᤏᤥ ᤔᤧᤃᤧᤖᤧ. ᤜᤧᤰᤁᤣ᤺ᤸᤗᤧ ᤐᤡᤳᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤋᤥ᤺ᤰᤋᤧ. ᤜᤧᤰᤁᤩᤠᤱ ᤀᤢᤈ᤻ᤈᤠᤜ᤺ᤸᤗᤧ ᤁᤢᤜᤢᤰᤁᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤋᤰᤋᤢ॥

⁷ ᤁᤖ ᤕᤜᤘᤣ ᤍᤠᤱᤒᤧᤴ ᤀᤢᤈ᤻ᤈᤠᤜ᤺ᤴᤏᤢ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ. ᤂᤧᤸᤗᤧ ᤁᤢᤜᤢᤰᤁᤡᤸᤗᤧ ᤛᤢᤔᤠ ᤔᤧᤴᤏᤢ᤹ᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤛᤢᤛᤢᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤀᤠᤶᤓᤠ ᤂᤧᤵᤔᤥᤀᤣ ᤜᤍ᤹ ᤛᤩᤧᤖᤢ॥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤒᤣᤛᤠᤱ ᤂᤧᤴ ᤛᤩᤧ॥

⁸ ᤕᤜᤘᤣ ᤍᤠᤱᤒᤧᤴ ᤀᤰᤂᤣᤗ᤹ᤖᤡᤰ ᤌᤡᤰᤗᤧᤱᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤔᤡ ᤐᤥ᤺ᤰᤂᤧᤀᤠᤱ ᤀᤢᤈ᤻ᤈᤠᤜ᤺ᤴ ᤂᤢᤶᤍᤡᤱ ᤐᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤍᤠᤀᤢᤍᤧᤴ ᤁᤢᤕᤠ᤺ᤰᤗᤧ᤹ᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤑᤠᤖᤣᤛ ᤀᤢᤈ᤻ᤈᤠᤜ ᤕᤢᤰᤂᤢ॥ ᤀᤠᤸᤗ ᤌᤠᤖᤡᤰᤛᤠᤱ ᤂᤧᤸᤗᤧ ᤁᤢᤔᤡᤱ ᤒᤠᤄᤧᤴ ᤘᤠ᤹ᤖᤥ॥

⁹ ᤂᤧᤴ ᤕᤧᤴᤏᤥ ᤍᤠᤀᤢᤍᤧᤴ ᤕᤜᤘᤣ ᤍᤠᤱᤒᤧᤴᤏᤢ ᤛᤠ᤹ᤖᤡᤰ ᤁᤡᤛᤧ. ᤜᤧᤰᤁᤩᤠᤱ ᤐᤠ᤺ᤳᤋᤢ. “ᤀᤠᤸᤗ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤀᤠᤱᤃᤠ᤹ᤏᤢ ᤕᤢᤰᤂᤢᤱᤒᤠᤒᤣ᥅”

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤂᤢᤏᤧ᤹ᤏᤢ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤋᤣ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴ॥ ᤁᤖ ᤌᤡᤰᤏᤠᤜᤠᤱ ᤗᤧᤵᤔᤠᤱ ᤐᤣᤀᤠᤱ ᤃᤠᤋ ᤁᤧᤕᤢᤱᤒᤠ ᤀᤥᤒᤣᤍ-ᤀᤣᤍᤥᤔᤖᤧ ᤁᤢᤜᤡᤶᤔᤥ ᤋᤣ᤹ᤖᤢ॥

¹¹ ᤀᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤀᤥᤒᤣᤍ-ᤀᤣᤍᤥᤔᤖᤧ ᤁᤢᤜᤡᤶᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤕᤢᤅᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤥᤒᤣᤍ ᤀᤧᤍᤥᤔ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ ᤜᤠᤱᤘᤠᤔᤢ᤹ᤀᤡ ᤐᤡᤖᤢ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤥᤒᤣᤍ-ᤀᤣᤍᤥᤔᤗᤧ ᤁᤢᤜᤡᤶᤛᤕᤱ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤆᤡᤃᤰᤘᤠᤜᤠ᤹ᤀᤥ ᤜᤠᤱᤘᤠᤔᤢ᤹ᤀᤡ ᤐᤡᤖᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤍᤠᤀᤢᤍᤧᤴ ᤔᤧᤈᤧᤰᤋᤢ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤐᤣᤀᤠᤱ ᤀᤥᤒᤣᤍ-ᤀᤣᤍᤥᤔᤖᤧ ᤁᤢᤜᤡᤶᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤐᤛ᤺ᤳ ᤛ᤺ᤳᤋᤧᤖ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤋᤠᤖᤢ॥

¹³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤃᤢᤒᤠᤜᤠ᤹ᤖᤧ ᤗᤠᤱᤃᤠᤱ ᤋᤢᤰᤛᤡ ᤔᤧᤎᤠᤛᤢᤎᤵᤔᤠ ᤂᤢᤏᤧ᤹ ᤗᤳᤇᤠ ᤁᤢᤶᤒᤠᤒᤠ ᤐᤡᤳ ᤏᤢ ᤁᤢᤛᤥᤳ ᤁᤧᤕᤠᤰᤐᤠ ᤌᤰᤛᤠ ᤛᤡᤍᤢᤱᤈᤓᤠ ᤆᤥᤃᤢ॥

¹⁴ ᤍᤠᤀᤢᤍᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤢᤛᤢᤰᤛᤢᤰ ᤁᤧᤖᤧᤰ ᤁᤢᤔᤢᤰᤛᤠᤶᤏᤢ ᤗᤠ᤺ᤰᤂᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤏᤠᤀᤡᤏᤠᤛᤢ᤺ᤳᤗᤠᤶ ᤋ᤺ᤶᤏᤠᤒᤠ ᤀᤣᤐᤥᤍ ᤋᤣ᤺ᤳᤋᤡᤴ ᤆᤠᤰᤂᤢᤀᤠᤱ ᤘᤕᤧ॥

¹⁵ ᤜᤧᤰᤁᤣᤗ᤹ᤖᤡᤰ ᤍᤠᤀᤢᤍᤧᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ᤖᤧ ᤔᤧᤛ᤺ᤳᤋᤧᤖ ᤛᤠᤍᤠᤱᤅᤡᤴ ᤔᤧᤔᤢ᤺ᤳᤋᤢᤀᤠᤱ ᤔᤧᤔᤢᤰᤂᤢᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤕᤖᤢᤛᤗᤧᤶᤔᤥ ᤔᤧᤍᤠᤖᤢ॥

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤃᤧᤳᤋᤢᤖ ᤔᤧᤒᤳᤇᤧ. ᤛᤠᤘᤗᤖᤧ ᤁᤢᤛ᤻ᤛᤠ ᤔᤧᤴᤇᤡᤴ ᤔᤡᤁᤗᤧᤴ ᤐᤣᤎᤠ᤺ᤵᤐᤥᤗᤠᤶ ᤀᤥᤔᤕᤧ. ᤜᤧᤰᤁᤣ᤺ᤸᤗᤧ ᤍᤠᤀᤢᤍ ᤜᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤐᤡᤴᤍᤧᤖ ᤗᤠ᤺ᤰᤂᤧᤒᤠ ᤏᤡᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤍᤠᤀᤢᤍᤧᤴ ᤁᤢᤏᤡᤱᤘᤠ᤹ ᤛᤡᤃᤠᤱᤗᤠᤶ ᤆᤡ᤺ᤳᤋᤢ॥

¹⁷ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤍᤥᤰᤁᤧᤴ ᤍᤠᤀᤢᤍᤖᤧ ᤆᤥᤃᤢᤒᤠ ᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤁᤢᤕᤢᤱᤔᤠᤍᤧᤴᤏᤥ ᤔᤧᤕᤢᤰᤂᤢ॥ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥

¹⁸ ᤀᤠᤸᤗ ᤍᤠᤀᤢᤍᤖᤧ ᤁᤴ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ ᤛᤢᤖᤢᤀᤠᤱ ᤂᤢᤏᤧ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤔᤏᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡ.

¹⁹ ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤜᤠ᤹. ᤕᤠ ᤂᤧᤵᤔᤥ ᤁᤧᤈᤢᤶᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤁᤢᤗᤧᤵ ᤌᤡᤰᤌᤡᤰ ᤂᤖᤧ᤺ᤱ. ᤂᤧᤒᤰᤛᤡᤱᤅᤡᤸᤗᤧ ᤁᤢᤈᤠ᤹ ᤌᤡᤰᤌᤡᤰ ᤏᤢ ᤁᤢᤜᤣᤍᤩᤠ᤹ ᤆᤧᤸᤗᤧᤰᤛᤣ᤹ ᤁᤢᤒᤈᤠ ᤌᤡᤰᤌᤡᤰ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤜᤡᤶᤜᤡᤶ ᤔᤧᤒᤣ॥

²⁰ ᤍᤠᤀᤢᤍᤧᤴ ᤁᤢᤜᤡᤶᤛᤕᤱᤜᤠ᤹ ᤜᤠᤱᤘᤠᤔᤢ᤹ᤀᤡ ᤐᤡᤛᤧ ᤋᤩᤧ᤺ᤸᤗᤧ ᤛᤠᤘᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤡᤁᤗᤧᤴ ᤂᤢᤏᤧ᤹ ᤁᤢᤍᤢᤶᤛᤧ ᤗ᤺ᤴᤍᤧ. ᤜᤧᤰᤁᤩᤠᤱ ᤔᤧᤳᤋᤢ. “ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤀᤠᤀᤡᤴ ᤀᤠᤰᤂᤧᤴ ᤔᤡᤱᤛᤥ ᤀᤡᤱᤎᤠᤱᤒᤠ ᤕᤧᤴᤏᤡᤒᤣ᥄ ᤂᤢᤏᤧ᤹ ᤁᤢᤛᤧᤘᤠᤖᤥᤔᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱ ᤗᤧᤰᤆᤠ᤹ᤒᤢᤎᤢᤰ ᤐᤥ᤺ᤰᤂᤧᤀᤠᤱ ᤂᤠᤷᤈᤥ᤺ᤶᤒᤠ ᤗᤧᤱᤛᤡᤱ॥”

²¹ ᤜᤧᤰᤁᤣ᤺ᤸᤗᤧ ᤍᤠᤀᤢᤍᤖᤧ ᤔᤡᤁᤗᤧᤴ ᤔᤧᤳᤋᤢ. “ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤘᤕᤧ. ᤂᤢᤏᤧ᤹ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤂᤧᤏᤧ᤹ ᤁᤧᤶᤒᤠ ᤏᤢ ᤂᤢᤏᤧ᤹ ᤁᤢᤛᤢᤘᤠᤱᤜᤠ᤹ᤏᤢ᤺ᤸᤗᤧᤀᤠᤱ ᤌᤥᤎᤥᤰᤐᤠ ᤜᤠᤱ ᤐᤥᤱᤛᤧ ᤛᤣᤃᤠᤱ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤠᤱ ᤛ᤺ᤳᤋᤠ᤹ᤖ ᤗᤠ᤺ᤱᤅᤠ॥

²² ᤂᤧᤏᤧ᤹ ᤁᤧᤏᤡᤔᤥ ᤁᤢᤏᤠᤔᤧᤴᤇᤠ᤹ ᤐᤥᤱᤔᤠ ᤛᤢᤰᤁᤠᤒᤡᤗᤠ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠᤅᤣ ᤁᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤢᤏᤠᤔᤧᤴᤇᤠ᤹ ᤐᤥᤱᤅᤠ॥ ᤁᤖ ᤂᤧᤴ ᤛᤧᤘᤠᤖᤥᤔᤠᤜᤠ᤹ᤖᤧ ᤁᤸᤗᤧ ᤗᤠᤃᤡ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠ॥”

²³ ᤜᤧᤰᤁᤩᤠᤱ ᤛᤠᤘᤗᤖᤧ ᤁᤢᤛ᤻ᤛᤠ ᤔᤧᤴᤇ᤻ᤕᤠ ᤔᤡᤁᤗᤖᤧ ᤁᤢᤛᤡᤔᤠ ᤕᤧᤴ ᤌᤠᤖᤡᤰᤛᤠᤱ ᤁᤢᤛ᤻ᤛᤠ ᤔᤧᤴᤘᤕᤧᤴ॥