᥈ ᤛᤠᤔᤢᤀᤧᤗ 5 - LIFOTNT

ᤍᤠᤀᤢᤍᤧᤴ ᤜᤠᤱ ᤐᤥ᤺ᤰᤂᤧ

¹ ᤀᤠᤸᤗ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ ᤍᤠᤀᤢᤍ ᤘᤕᤧᤒᤠᤍᤧᤴ ᤜᤧᤒᤪᤥᤴᤏᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤀᤠᤍᤠᤱᤒᤠᤖᤧᤀᤣ ᤁᤧᤃᤠ᤹ᤀᤡᤍᤡᤃᤧᤖᤥ॥

² ᤀᤠᤸᤗ ᤐᤣᤕᤧᤶᤔᤥ ᤛᤠᤀᤢᤗᤧᤴ ᤜᤠᤱ ᤘᤕᤧᤸᤗᤧᤛᤠ ᤀᤠᤍᤠᤱᤒᤠᤖᤧ ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ ᤌᤱᤅᤥ ᤋᤃᤡ ᤗᤠᤶᤃᤧᤗᤥᤛᤢᤛᤡ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠ ᤀᤰᤂᤣ ᤁᤧᤔᤧᤳᤋᤧ. ‘ᤂᤧᤏᤧ᤹ᤀᤣ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤸᤗᤢᤰᤁᤶᤒᤠ ᤁᤧᤒᤥᤱ᤹. ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠ ᤁᤧᤒᤥᤱ᤹॥’”

³ ᤜᤧᤰᤁᤣ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤁᤠᤵᤐᤥ ᤋᤢᤶᤛᤠᤜᤠ᤹ ᤍᤠᤀᤢᤍ ᤜᤠᤱᤅᤡᤴ ᤘᤕᤧᤒᤠᤍᤧᤴ ᤜᤧᤒᤪᤥᤴᤏᤥ ᤔᤧᤍᤩᤧ॥ ᤍᤠᤀᤢᤍᤖᤧ ᤂᤧᤱᤜᤠ᤹ᤏᤢ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤔᤠᤱᤜᤢᤵ ᤆᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤍᤠᤀᤢᤍᤧᤴ ᤀᤡᤛᤪᤠᤀᤡᤗᤀᤥ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢ॥

⁴ ᤍᤠᤀᤢᤍᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤛᤢᤶᤒᤥᤱ ᤋᤱᤒᤣ᤹ ᤕᤥᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤗᤡᤒᤥᤱ ᤋᤱᤒᤣ᤹ ᤌᤠᤖᤡᤰ ᤜᤠᤱᤕᤢᤰ ᤆᤥᤃᤢ॥

⁵ ᤂᤢᤏᤧ᤹ ᤜᤣᤒᤪᤥᤏ ᤕᤢᤅᤧᤀᤠᤱ ᤕᤜᤢᤍᤠᤀᤥ ᤏᤢᤛᤡ ᤋᤱᤒᤣᤀᤠᤱ ᤁᤢᤓᤪᤧ᤺ᤱ ᤜᤠᤱᤕᤢᤰ ᤆᤥᤃᤢ. ᤜᤧᤰᤁᤩᤠᤱ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗ ᤏᤧᤵᤔᤠᤱᤅᤥ ᤕᤖᤢᤛᤗᤧᤔ ᤕᤢᤅᤧᤀᤠᤱ ᤛᤢᤶᤒᤥᤱᤅᤠᤱ ᤛᤢᤶᤛᤡ ᤋᤱᤒᤣ᤹ ᤌᤠᤖᤡᤰ ᤜᤠᤱᤕᤢᤰ ᤆᤥᤃᤢ॥

⁶ ᤂᤧᤴ ᤀᤣᤃᤠᤱ ᤍᤠᤀᤢᤍ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤕᤒᤢᤛᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤔᤧᤒᤣ॥ ᤕᤒᤢᤛᤡᤜᤠ᤹ᤖᤧ ᤍᤠᤀᤢᤍᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤵᤔᤥ ᤋᤠᤔᤠ ᤁᤧᤴᤇᤢᤰᤏᤧᤴ. ᤔᤡᤰᤑ᤺ᤶᤒᤠ ᤏᤢ ᤗᤠᤱᤛᤰᤐᤠᤜᤠ᤹ᤖᤧᤀᤠᤱ ᤏᤠ᤺ᤵᤔᤠ ᤁᤧᤶᤛᤢᤰ॥” ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤍᤠᤀᤢᤍᤧᤴ ᤀᤠᤵᤑᤠᤸᤗᤧᤀᤠᤱ ᤕᤖᤢᤛᤗᤧᤔ ᤗᤠ᤺ᤵᤔᤠ ᤔᤧᤛᤢᤰᤏᤧᤴ ᤁᤧᤗ᤹ᤒᤠ ᤘᤕᤧ॥

⁷ ᤜᤧᤰᤁᤣᤛᤠᤱ ᤍᤠᤀᤢᤍᤖᤧ ᤛᤡᤕᤥᤏᤒᤠ ᤕᤰᤁᤡᤴ ᤜᤢᤰᤁᤠᤵ ᤆᤥᤃᤢ. ᤂᤧᤴ ᤀᤠᤸᤗᤥ ᤍᤠᤀᤢᤍᤖᤧ ᤁᤢᤕᤧᤰᤕᤰ ᤔᤧᤔᤧᤳᤋᤢ॥

⁸ ᤂᤧᤴ ᤕᤧᤴᤏᤥ ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤜᤠ᤺ᤳᤗᤧ ᤕᤒᤢᤛᤡᤜᤠ᤹ ᤛᤧᤖᤢᤛᤡ᤹. ᤂᤧᤸᤗᤧ ᤍᤠᤀᤢᤍᤖᤧ ᤁᤢᤏᤡᤱᤔᤡ ᤔᤡᤰᤑ᤺ᤶᤒᤠ ᤏᤢ ᤗᤱᤗᤧ᤺ᤱᤘᤠᤜᤠ᤹ ᤆᤫᤠ᤺ᤳ ᤗᤠᤱᤃᤧᤄᤣ᤺ᤰᤐᤠ ᤜᤱᤃᤠᤖᤡᤒᤥ ᤗᤠ᤺ᤳᤋᤠᤱ ᤂᤧᤱᤜᤠ᤹ ᤋᤧᤶᤛᤢᤛᤡᤖ ᤐᤥᤱ᤹॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤡᤰᤑ᤺ᤶᤒᤠ ᤏᤢ ᤗᤠᤱᤛᤰᤐᤠᤜᤠ᤹ ᤔᤠᤱᤜᤡᤶᤔᤥ ᤗᤠ᤺ᤵᤔᤠ ᤔᤧᤱᤄᤥᤏᤧᤴ॥”

⁹ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤜᤠᤒᤠ ᤂᤧᤴ ᤕᤰᤁᤥ ᤕᤢᤱᤔᤠ ᤜᤣ᤺ᤰᤋᤧ. ᤂᤧᤴ ᤕᤰᤁᤡᤸᤗᤧ ᤁᤢᤔᤡᤱ ᤍᤠᤀᤢᤍᤖᤧ ᤁᤢᤕᤧᤰᤕᤰ ᤕᤢᤰᤂᤢ॥ ᤍᤠᤀᤢᤍᤖᤧ ᤁᤢᤗᤢᤱᤎᤠᤰᤜᤠ᤹ᤖᤧ ᤁᤢᤍᤰᤔᤠ ᤌᤢᤵᤌᤠ᤹ᤀᤥ ᤗᤧᤵᤔᤠᤱᤏᤢ ᤕᤰ ᤁᤧᤖᤧᤰ ᤐᤡᤛᤠᤱ ᤕᤧᤰᤕᤰ ᤆᤥᤃᤢ॥

¹⁰ ᤜᤧᤰᤁᤩᤠᤱ ᤂᤢᤏᤧ᤹ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤖ ᤐᤣ. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤘᤕᤧ॥

¹¹ ᤋᤢᤖᤥᤛᤒᤠ ᤜᤣᤖᤠᤔ ᤜᤠᤱᤅᤡᤸᤗᤧ ᤍᤠᤀᤢᤍᤖᤧᤀᤥ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢ ᤕᤢᤛᤢᤛᤡ॥ ᤂᤢᤏᤧ᤹ ᤛᤠᤶᤔᤠᤱᤛᤡᤱ ᤛᤡᤱᤜᤠ᤹ ᤜᤧᤰᤁᤩᤠᤱ ᤗᤢᤱᤃᤠᤶᤒᤠᤜᤠ᤹ ᤏᤢ ᤛᤡᤱᤃᤠᤶᤒᤠᤜᤠ᤹ᤀᤠᤱ ᤍᤠᤀᤢᤍᤖᤧ ᤁᤢᤜᤠᤱᤜᤡᤶ ᤆᤥ᤺ᤰᤛᤧ ᤐᤠᤱᤄᤢ ᤕᤢᤛᤢᤛᤡ॥

¹² ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤀᤥ ᤍᤠᤀᤢᤍᤧᤴ ᤜᤠᤱ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤢᤜᤠᤱᤕᤢᤰ ᤔᤢᤰᤛᤠᤶᤔᤡᤴ ᤌᤠ᤺ᤱᤎᤠᤰ ᤆᤥᤃᤢ ᤑᤠ᤹ᤀᤠᤱ ᤍᤠᤀᤢᤍᤖᤧ ᤏᤡᤱᤘᤠ᤹ ᤂᤥᤛᤢ॥

¹³ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤜᤧᤒᤪᤥᤏᤗᤠᤶᤒᤠ ᤕᤖᤢᤛᤗᤧᤔ ᤋᤩᤧᤀᤠᤱ ᤕᤖᤡᤰ ᤔᤣ᤺ᤳ ᤏᤢ ᤔᤣ᤺ᤳ ᤐᤠ᤺ᤰᤔᤠᤜᤠ᤹ ᤋᤠᤖᤢᤛᤡ॥ ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤛᤠᤔᤧᤘᤠ᤺ᤴᤇᤡᤱ॥

¹⁴ ᤕᤖᤢᤛᤗᤧᤔᤀᤥ ᤛᤠᤃᤧᤘᤠ᤺ᤴᤇᤡᤱᤔᤠ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤜᤠᤒᤠ ᤁᤴᤜᤠ᤹ᤖᤥ—ᤛᤶᤔᤢᤀ. ᤛᤥᤒᤠᤒ. ᤏᤠᤋᤠᤏ. ᤛᤥᤗᤥᤔᤏ.

¹⁵ ᤕᤡᤓᤠᤖ. ᤀᤣᤗᤡᤛᤢᤀ. ᤏᤣᤐᤣᤃ. ᤕᤠᤐᤡ.

¹⁶ ᤀᤣᤗᤡᤛᤠᤔᤠ. ᤀᤣᤗᤩᤠᤍᤠ ᤏᤢ ᤀᤣᤗᤡᤐᤣᤗᤣᤋ॥

ᤐᤗᤡᤛ᤻ᤋᤡᤜᤠ᤹ ᤜᤠᤖᤡᤔᤧᤍᤩᤧ

¹⁷ ᤍᤠᤀᤢᤍᤧᤴ ᤀᤡᤛᤪᤠᤀᤡᤗᤀᤥ ᤜᤠᤱ ᤔᤧᤛᤣ᤺ᤴᤍᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤐᤗᤡᤛ᤻ᤋᤡᤜᤠ᤹ᤖᤧ ᤔᤧᤄᤧᤵᤛᤢ. ᤂᤧᤱᤜᤠ᤹ᤖᤧ ᤌᤰᤛᤢᤒᤠᤜᤠ᤹ ᤔᤧᤍᤣ᤹ᤖᤢᤛᤡᤀᤠᤱ ᤍᤠᤀᤢᤍᤖᤧ ᤁᤢᤃᤥ᤺ᤳᤇᤧ ᤔᤧᤗ᤺ᤴᤍᤧ. ᤁᤖ ᤁᤴ ᤐᤠ᤺ᤴᤏᤡᤴ ᤍᤠᤀᤢᤍᤖᤧ ᤂᤧᤵᤛᤢᤀᤠᤱ ᤕᤥ ᤕᤰᤁᤥ ᤌᤠᤛᤡᤱ॥

¹⁸ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ ᤖᤐᤠᤀᤡᤜᤠ᤹ᤖᤧ ᤂᤢᤴᤇᤡ᤹ ᤏᤧᤏᤧᤒᤠ ᤋᤧᤶᤒᤣ᤹ᤀᤥ ᤔᤧᤛᤧᤖᤧᤀᤠᤱ ᤔᤧᤕᤢᤱᤛᤡᤱ॥

¹⁹ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤍᤥᤛᤢ. “ᤀᤠᤱᤃᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤣ᤺ᤰᤁᤠᤒᤡ᥅ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤜᤢᤰᤁᤧᤛᤢᤵᤐᤠᤒᤡ᥅” ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤐᤣᤃᤧ᤹. ᤀᤠᤱᤃᤠ᤹ ᤐᤗᤡᤛ᤻ᤋᤡᤜᤠ᤹ ᤛᤧᤰᤂᤠᤀᤣ ᤂᤧᤏᤧ᤹ ᤁᤧᤜᤢᤰᤁᤥ ᤜᤢᤰᤛᤢᤵᤏᤧ॥”

²⁰ ᤂᤧᤒᤩᤠᤱ ᤍᤠᤀᤢᤍᤧᤴ ᤒᤠᤗ-ᤐᤖᤠᤈᤡᤔ ᤔᤧᤵᤏᤠᤒᤠ ᤋᤧᤴᤏᤥ ᤐᤣᤀᤠᤱ ᤌᤱ ᤆᤥᤃᤢ. ᤐᤗᤡᤛ᤻ᤋᤡᤜᤠ᤹ ᤌᤱᤅᤥ ᤏᤠ᤺ᤴᤍᤢᤛᤡ॥ ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤘᤜ᤺ᤱᤅᤡᤸᤗᤧ ᤁᤢᤕᤠᤴ ᤌᤢᤵᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ᤗᤠᤶ ᤌᤧ᤺ᤰᤐᤧᤳ ᤁᤧᤕᤧᤵᤐᤠ ᤀᤠᤏᤡᤱᤔᤡᤜᤠ᤹ ᤔᤧᤰᤂᤢᤛᤡ॥” ᤁᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤒᤠᤗ-ᤐᤖᤠᤈᤡᤔ ᤕᤢᤰᤂᤢ॥

²¹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤜᤠᤒᤠ ᤂᤧᤵᤔᤥ ᤔᤧᤗᤧᤖᤢ ᤔᤧᤎᤛᤡ. ᤜᤧᤰᤁᤩᤠᤱ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤒᤣ॥

²² ᤕᤠᤶᤔᤥ ᤐᤗᤡᤛ᤻ᤋᤡᤜᤠ᤹ ᤖᤐᤠᤀᤡᤜᤠ᤹ᤖᤧ ᤂᤢᤴᤇᤡ᤹ ᤋᤧᤶᤒᤣ᤹ᤀᤥ ᤔᤧᤎᤠᤅᤧ ᤜᤧᤰᤁᤩᤠᤱ ᤔᤧᤛᤧᤛᤡᤱᤅᤠᤱ ᤔᤧᤕᤢᤱᤛᤡᤱ॥

²³ ᤍᤠᤀᤢᤍᤖᤧ ᤕᤠᤶᤔᤥ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤍᤥᤛᤢ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤁᤴ ᤕᤧᤶᤔᤥ ᤌᤡᤰᤗᤧᤱᤗᤧ ᤔᤧᤓᤳᤋᤧᤛᤧᤴᤏᤧ᤹. ᤁᤖ ᤂᤧᤱᤜᤠ᤹ ᤁᤡᤷᤃᤵ ᤁᤒᤧᤛᤧ᤹ᤀᤠᤱ ᤐᤡᤐᤥᤖ ᤛᤡᤱᤒᤢᤱᤅᤡᤸᤗᤧ ᤁᤢᤍᤃᤠᤱᤗᤠᤶ ᤂᤢᤴᤇᤡ᤹ ᤀᤣᤃᤠᤱᤗᤠᤶᤒᤠ ᤑᤳᤋᤧᤛᤧ᤹॥

²⁴ ᤂᤧᤴ ᤀᤣᤃᤠᤱ ᤐᤡᤐᤥᤖ ᤛᤡᤱᤒᤢᤱᤜᤠ᤹ᤖᤧ ᤁᤢᤛᤶ ᤁᤢᤛᤶᤔᤥ ᤜᤢᤖᤢᤜᤢᤖᤢ ᤗ᤹ᤖᤡᤰ ᤛ᤺ᤰᤏᤢᤔᤧ᤺ᤴᤏᤣ ᤂᤧᤱᤜᤠ᤹ᤏᤢ ᤌᤱ ᤌᤰᤋᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤴ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤏᤠ᤺ᤴᤇᤧ ᤂᤧᤏᤧ᤹ ᤁᤧᤍᤃᤡ ᤐᤣ᤺ᤰᤗᤥ॥”

²⁵ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤍᤠᤀᤢᤍᤖᤧ ᤆᤥᤃᤢ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ ᤃᤡᤒᤥᤏᤗᤠᤶᤒᤠ ᤃᤣᤈᤣᤖ ᤌᤠᤖᤡᤰ ᤏᤠ᤺ᤳᤋᤢ ᤋᤣ᤹ᤖᤢᤛᤡᤀᤠᤱ ᤛᤩᤧᤖᤢᤛᤡᤖᤥ॥