᥈ ᤛᤠᤔᤢᤀᤧᤗ 4 - LIFOTNT

ᤀᤡᤛ᤻ᤒᤥᤛᤣᤋᤧᤴ ᤛᤡ᤹᤺

¹ ᤛᤠᤘᤗᤖᤧ ᤁᤢᤛ᤻ᤛᤠ ᤀᤡᤛ᤻ᤒᤥᤛᤣᤋᤖᤧ ᤜᤧᤒᤪᤥᤴᤏᤥ ᤀᤒᤏᤣᤖᤧᤴ ᤔᤧᤛᤧᤖᤢ ᤁᤧᤗ᤹ᤒᤠ ᤂᤧᤵᤛᤢ. ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤁᤢᤗᤠᤱ ᤁᤢᤜᤢᤰ ᤛᤠ᤹ᤀᤡ ᤐᤢ᤹ᤖᤧ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤃᤡᤛᤧ॥

² ᤀᤡᤛ᤻ᤒᤥᤛᤣᤋᤖᤧ ᤏᤧᤵᤑᤢ ᤁᤢᤗᤠᤶᤗᤥᤒᤠ ᤘᤕᤧᤛᤡ. ᤂᤧᤱᤜᤠ᤹ ᤆᤡᤃᤰᤘᤠ ᤁᤧᤏᤠᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤘᤕᤧᤛᤡ. ᤂᤢᤴᤇᤡ᤹ ᤔᤡᤱ ᤒᤠᤏᤠᤜ ᤏᤢ ᤖᤣᤁᤠᤒ ᤘᤕᤧ॥ ᤂᤢᤴᤇᤡ᤹ ᤒᤣᤏᤩᤠᤔᤡᤏ ᤛᤢᤘᤠᤱᤒᤠ ᤘᤕᤧᤛᤡ ᤒᤣᤖᤥᤋ ᤕᤧᤰᤕᤰᤁᤥᤒᤠ ᤖᤡᤶᤔᤥᤏᤖᤧ ᤁᤢᤛ᤻ᤛᤠ ᤘᤕᤧᤛᤡ॥ ᤋᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ ᤒᤣᤖᤥᤋ ᤔᤧᤵᤔᤏᤠᤒᤠ ᤕᤧᤰᤕᤰᤁᤥ ᤔᤧᤕᤢᤅᤧ॥

³ ᤌᤣᤀᤠᤱᤓᤧᤸᤗᤧ ᤁᤢᤓᤠ ᤕᤧᤶ ᤋᤃᤡ ᤒᤣᤖᤥᤋᤡᤜᤠ᤹ ᤃᤡᤳᤋᤤ ᤔᤧᤵᤏᤠᤒᤠ ᤋᤧᤴᤏᤥ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤀᤠᤸᤗ ᤌᤠᤖᤡᤰᤛᤠᤱ ᤂᤧᤵᤔᤥᤀᤣ ᤘᤧᤵᤔᤡᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤕᤢᤱ॥

⁴ ᤛᤠᤘᤗᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏᤖᤧ ᤗᤳᤇᤠ ᤁᤢᤛ᤻ᤛᤠ ᤘᤕᤧ. ᤂᤧᤸᤗᤧ ᤁᤢᤗᤠᤱ ᤏᤧᤵᤔᤠᤱ ᤗᤠᤱᤛᤰᤐᤠ ᤆᤥᤃᤧ॥ ᤕᤡᤈᤖᤣᤗᤗᤠᤶᤒᤠ ᤛᤠᤘᤗ ᤏᤢ ᤈᤥᤏᤠᤌᤠᤏ ᤔᤧᤛᤧᤖᤢᤛᤡ ᤁᤧᤗ᤹ᤒᤠ ᤀᤡᤱᤄᤱ ᤋᤩᤧ᤺ᤸᤗᤧ ᤂᤧᤴ ᤋᤱᤒᤣ᤹ ᤅᤠᤛᤡ ᤁᤧᤖᤧᤀᤠᤱ ᤘᤕᤧ॥ ᤂᤧᤴ ᤀᤥᤃᤧᤔᤧᤵᤔᤠᤸᤗᤧ ᤂᤧᤴ ᤕᤠᤱᤛᤡᤱᤅᤠᤱ ᤂᤧᤳᤋᤢ ᤋᤣ᤹ᤖᤢᤀᤠᤱ ᤘᤕᤧ. ᤁᤖ ᤜᤠᤖᤠᤜᤠᤖᤠ ᤂᤧᤳᤇᤡᤱ ᤐᤣ᤺ᤸᤗᤧ ᤂᤧᤴ ᤁᤧᤅᤧ. ᤜᤧᤰᤁᤩᤠᤱᤅᤣ ᤂᤧᤴ ᤗᤠᤱᤛᤰᤐᤠ ᤐᤥ᤺ᤰᤂᤧᤀᤠᤱ ᤘᤕᤧ॥ ᤂᤧᤸᤗᤧ ᤁᤢᤔᤡᤱ ᤔᤐᤡᤒᤥᤛᤣᤋ ᤘᤕᤧ॥

⁵ ᤗᤧᤴᤍᤡᤰ ᤏᤠᤶᤛᤣ᤺ᤰᤋᤧᤀᤠᤱ ᤀᤡᤛ᤻ᤒᤥᤛᤣᤋᤧᤴ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤸᤗᤧ ᤂᤢᤏᤧ᤹ ᤁᤢᤜᤡᤶᤔᤥ ᤒᤣᤖᤥᤋᤡ ᤖᤡᤔᤥᤏᤖᤧ ᤁᤢᤛ᤻ᤛᤠ ᤖᤣᤁᤠᤒ ᤏᤢ ᤒᤠᤏᤠᤜ᤺ᤴ ᤋᤩᤧᤛᤡᤀᤠᤱ ᤜᤡᤶᤛᤡᤃᤠᤱ ᤗᤠᤛᤧᤇᤡ॥

⁶ ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤡᤶᤛᤡᤃᤠᤱ ᤔᤠᤛᤡ ᤗᤠᤛᤧ ᤐᤣᤛᤡᤒᤠ ᤁᤢᤀᤡᤛᤡᤰ ᤐᤣᤛᤡᤀᤠᤱ ᤂᤧᤱᤜᤠ᤹ᤖᤧ ᤁᤢᤛ᤻ᤛᤠᤵᤐᤥ᤺ᤰᤁᤥ ᤌᤢᤒᤧᤇᤢᤀᤠᤱ ᤛᤧᤖᤧᤇᤢ॥ ᤜᤧᤰᤁᤩᤠᤱ ᤖᤣᤁᤠᤒ ᤏᤢ ᤁᤢᤶᤓᤢ᤹ ᤒᤏᤠᤜ᤺ᤴ ᤛᤫᤠ᤺ᤳ ᤗ᤺ᤴᤍᤧᤇᤡ॥

⁷ ᤀᤡᤛ᤻ᤒᤥᤛᤣᤋᤧᤴ ᤁᤢᤜᤡᤶᤔᤥᤒᤠ ᤀᤠᤒᤠᤅᤣ ᤁᤢᤀᤡᤵᤏᤠᤀᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤸᤗᤧ ᤂᤧᤱᤜᤠ᤹ ᤜᤡᤶᤛᤡᤃᤠᤱ ᤗᤠᤛᤧᤇᤡ॥ ᤂᤢᤴᤇᤡ᤹ ᤗᤠ᤺ᤰᤁᤡᤸᤗᤧ ᤌᤢᤒᤢ ᤛᤧᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤧᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤑᤢ᤹ᤕᤠᤰ ᤂᤰᤋᤧᤳᤇᤢᤀᤠᤱ ᤋᤣ᤹ᤖᤧᤇᤢ. ᤜᤧᤰᤁᤩᤠᤱ ᤀᤖᤠᤒᤠᤗᤠᤶ ᤐᤥ᤺ᤰᤂᤧᤇᤡᤖ ᤛᤧᤴᤇᤧᤴ ᤗᤠᤱᤄᤣᤃᤧᤇᤡᤀᤠᤱ ᤐᤣᤛᤡ॥

⁸ ᤂᤧᤱᤜᤠ᤹ᤖᤧ ᤀᤡᤛ᤻ᤒᤥᤛᤣᤋᤖᤧ ᤁᤢᤎᤣᤃᤣ᤺ᤰᤐᤧᤴ ᤜᤧᤒᤪᤥᤴᤏᤥ ᤁᤧᤘᤠ᤹ᤒᤠ ᤍᤠᤀᤢᤍᤖᤧ᤹ᤀᤥ ᤋᤣ᤹ᤖᤧᤇᤢ. ᤜᤧᤰᤁᤩᤠᤱ ᤜᤠᤱᤅᤡᤴ ᤔᤧᤳᤋᤧᤇᤢ. “ᤀᤠᤍᤠᤱᤒᤠ ᤛᤧᤵᤔᤠ ᤁᤧᤃᤥ᤺ᤵᤐᤠ. ᤀᤠᤍᤠᤱᤒᤠᤖᤧ ᤁᤧᤏᤡᤱᤔᤡ ᤛᤠᤘᤗᤖᤧ ᤁᤢᤛ᤻ᤛᤠ ᤀᤡᤛ᤻ᤒᤥᤛᤣᤋᤖᤧ ᤁᤢᤎᤣᤃᤣ᤺ᤰᤐᤧᤴ ᤀᤥᤔᤧᤳᤋᤧ᤹ ᤁᤵᤔᤥ ᤘᤠ᤹॥ ᤀᤠᤍᤠᤱᤒᤠᤖᤧ ᤁᤧᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤛᤠᤘᤗ ᤏᤢ ᤂᤢᤏᤧ᤹ ᤁᤢᤛᤢᤘᤠᤱᤜᤠ᤹ᤀᤥ ᤀᤠᤀᤡᤴ ᤁᤢᤗᤧᤰᤘᤠ ᤜᤢᤅᤢᤀᤠᤱ ᤘᤠ᤹॥”

⁹ ᤍᤠᤀᤢᤍᤖᤧ ᤒᤣᤖᤥᤋᤡ ᤖᤡᤔᤥᤏᤖᤧ ᤁᤢᤛ᤻ᤛᤠ ᤖᤣᤁᤠᤒ ᤏᤢ ᤁᤢᤴᤛᤠ᤹ ᤒᤏᤠᤜ᤺ᤴ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠᤸᤗᤧᤀᤣ ᤁᤧᤖᤧᤰ ᤋᤢᤰᤂᤣᤀᤥᤗᤠᤶᤒᤠ ᤀᤠᤱᤃᤠ᤹ ᤛᤧ᤺ᤵᤋᤠᤱ. ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤐᤠ᤺ᤳᤋᤢᤱ᤹.

¹⁰ ᤛᤠᤘᤗ ᤛᤩᤧᤒᤠᤴ ᤏᤢᤒᤠ ᤀᤡᤱᤄᤱ ᤗ᤹ᤖᤡᤰ ᤁᤧᤀᤡ᤺ᤵᤐᤠᤀᤠᤱ ᤀᤠᤱᤃᤠ᤹ᤀᤥ ᤀᤡᤱᤄᤱ ᤁᤧᤍᤠ᤺ᤵᤐᤠ ᤔᤏᤠᤴ ᤋᤧᤶᤛᤢᤱ. ᤜᤧᤰᤁᤩᤠᤱ ᤛᤡᤰᤗᤃᤀᤥ ᤂᤧᤴ ᤛᤧᤖᤢᤱ॥ ᤀᤠᤱᤃᤠ᤹ ᤂᤧᤸᤗᤧ ᤁᤢᤀᤡᤱᤄᤱᤅᤡᤸᤗᤧ ᤆᤥᤃᤢᤸᤗᤧ ᤛᤡᤔᤠ ᤐᤠᤱᤄᤢᤱ॥

¹¹ ᤁᤖ ᤁᤢ᤹ᤀᤡᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤗᤳᤇᤠ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤏᤠᤴ ᤂᤧᤸᤗᤧ ᤁᤢᤕᤢᤰᤏᤠ ᤁᤢᤀᤡᤶᤍᤧᤴᤏᤥ ᤛᤧᤖᤧᤇᤢᤏᤧᤓᤃᤪ ᤂᤧᤸᤗᤧ ᤁᤢᤗᤧᤰᤘᤠ ᤀᤠᤰᤂᤧᤴ ᤕᤶᤒᤠ ᤐᤥᤱᤒᤣ᥅ ᤂᤧᤴᤇᤡ᤹ ᤁᤧᤈᤥᤃᤧᤇᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤧᤴᤇᤡ᤹ ᤁᤴ ᤂᤠᤶᤒᤣ᤺ᤰᤔᤥᤗᤠᤶ ᤁᤧᤶᤔᤧᤰᤛᤡᤶᤒᤡ᥅”

¹² ᤂᤧᤒᤩᤠᤱ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤏᤧᤵᤔᤠᤱ ᤔᤧᤛᤧᤖᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱ ᤜᤢᤰᤜᤠ᤹ ᤔᤧᤄᤰᤋᤢ. ᤜᤧᤰᤁᤩᤠᤱ ᤜᤧᤒᤪᤥᤴᤏᤥ ᤘᤠᤒᤠᤰᤁᤡᤸᤗᤧ ᤁᤢᤒᤣᤛᤠᤱ ᤔᤧᤓᤥ᤺ᤴᤍᤢᤛᤡ॥ ᤁᤖ ᤀᤡᤛ᤻ᤒᤥᤛᤣᤋᤖᤧ ᤁᤢᤎᤣᤃᤣ᤺ᤰᤐᤧᤴ ᤂᤧᤱᤜᤠ᤹ᤖᤧ ᤔᤧᤍᤣ᤹ᤖᤢᤀᤠᤱ ᤜᤧᤒᤪᤥᤴᤏᤥ ᤀᤒᤏᤣᤖᤖᤧ ᤁᤢ᤺ᤀᤡᤵᤐᤢᤱᤅᤥ ᤔᤧᤏᤧᤛ᤻ᤛᤢᤖᤥ॥