᥈ ᤛᤠᤔᤢᤀᤧᤗ 3 - LIFOTNT1 ᤍᤠᤀᤢᤍ ᤏᤢ ᤛᤠᤘᤗᤧᤴ ᤁᤧᤍᤡᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤖᤡᤰ ᤕᤧᤴ ᤌᤠᤖᤡᤰ ᤌᤱ ᤐᤥ᤺ᤰᤂᤧ॥ ᤍᤠᤀᤢᤍᤧᤴ ᤇᤧᤴᤏᤠ ᤁᤧᤎᤢᤶᤒᤠ ᤐᤥ᤺ᤰᤂᤧᤖ ᤐᤣ. ᤜᤧᤰᤁᤩᤠᤱ ᤛᤠᤘᤗᤖᤧ ᤁᤢᤜᤡᤶᤛᤕᤱᤜᤠ᤹ ᤇᤧᤴᤏᤠ ᤕᤥ᤺ᤴᤈᤥ᤹ᤈᤥ᤹ᤒᤠ ᤔᤧᤒᤥ᤺ᤰᤂᤧᤖ ᤔᤧᤒᤣᤖᤥ॥ ᤍᤠᤀᤢᤍᤖᤧ ᤁᤢᤛ᤻ᤛᤠᤜᤠ᤹ 2 ᤜᤧᤰᤁᤩᤠᤱ ᤜᤧᤒᤪᤥᤴᤏᤥ ᤍᤠᤀᤢᤍᤖᤧ ᤁᤢᤛ᤻ᤛᤠ ᤛᤠᤔᤧᤘᤠ᤺ᤴᤇᤡᤱ—ᤋᤢᤶᤒᤠ ᤁᤢᤛ᤻ᤛᤠᤴ ᤀᤔᤏᤥᤏ ᤘᤕᤧ. ᤂᤢᤏᤧ᤹ ᤁᤢᤶᤔᤠ ᤕᤡᤈᤖᤣᤗᤡ ᤀᤜᤡᤏᤥᤔ ᤘᤕᤧ. 3 ᤂᤢᤏᤧ᤹ ᤁᤢᤛ᤻ᤛᤠ ᤛᤖᤢᤶᤒᤧᤴ ᤁᤡᤗᤠᤒ ᤘᤕᤧ. ᤂᤧᤸᤗᤧ ᤁᤢᤶᤔᤠ ᤁᤠᤷᤔᤣᤗᤒᤠ ᤏᤠᤒᤠᤗᤖᤧ ᤁᤢᤔᤣᤔᤣᤍᤢᤔᤠ ᤀᤒᤡᤃᤣᤗ ᤘᤕᤧ. ᤂᤢᤏᤧ᤹ ᤁᤢᤛ᤻ᤛᤠ ᤕᤠᤱᤛᤖᤢᤶᤒᤧᤴ ᤀᤒ᤻ᤛᤠᤗᤥᤔ ᤘᤕᤧ. ᤂᤢᤏᤧ᤹ ᤁᤢᤶᤔᤠ ᤃᤛᤢᤖᤒᤠ ᤜᤠᤱ ᤋᤸᤔᤤᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤠᤁᤠ ᤘᤕᤧ. 4 ᤌᤠᤱᤛᤖᤢᤶᤒᤧᤴ ᤀᤍᤥᤏᤡᤕᤠ ᤘᤕᤧ. ᤂᤢᤏᤧ᤹ ᤁᤢᤶᤔᤠ ᤜᤃᤡᤋ ᤘᤕᤧ. ᤅᤠᤛᤡᤃᤣ᤺ᤰᤐᤧᤴ ᤛᤐᤋᤩᤠᤜ ᤘᤕᤧ. ᤂᤢᤏᤧ᤹ ᤁᤢᤶᤔᤠ ᤀᤒᤡᤋᤗ ᤘᤕᤧ. 5 ᤜᤧᤰᤁᤩᤠᤱ ᤑᤥ᤺ᤰᤘᤠᤒᤧᤴ ᤕᤡᤋᤪᤠᤔ ᤘᤕᤧ. ᤂᤢᤏᤧ᤹ ᤁᤢᤶᤔᤠ ᤍᤠᤀᤢᤍᤖᤧ ᤁᤢᤔᤣᤳ ᤀᤣᤃ᤻ᤗᤠ ᤘᤕᤧ॥ ᤁᤴᤜᤠ᤹ ᤁᤧᤖᤧᤰ ᤜᤧᤒᤪᤥᤴᤏᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤍᤠᤀᤢᤍᤖᤧ ᤁᤢᤛ᤻ᤛᤠᤜᤠ᤹ ᤔᤧᤘᤕᤧᤖᤥ॥ ᤍᤠᤀᤢᤍᤧᤴ ᤏᤢ ᤀᤒᤏᤣᤖᤧᤴ ᤋᤱᤛᤡ 6 ᤛᤠᤘᤗ ᤏᤢ ᤍᤠᤀᤢᤍᤧᤴ ᤁᤧᤍᤡᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤌᤱ ᤐᤥ᤺ᤰᤂᤧᤖ ᤐᤣ. ᤀᤒᤏᤣᤖᤧᤴ ᤏᤅᤣ᤺ᤰᤁᤠᤱ ᤛᤠᤘᤗᤖᤧ ᤁᤢᤛᤢᤘᤠᤱᤅᤥ ᤁᤧᤎᤢᤶᤒᤠ ᤆᤥ᤺ᤰᤛᤡᤱᤗ ᤐᤣ॥ 7 ᤀᤠᤸᤗ ᤀᤕᤩᤠᤖᤧ ᤁᤢᤛ᤻ᤛᤠ ᤔᤧᤴᤇᤡᤴ ᤖᤡᤛ᤻ᤐᤠᤴ ᤛᤠᤘᤗᤖᤧ ᤁᤢᤔᤣᤳ ᤐᤠ᤺ᤰᤔᤠ ᤘᤕᤧ॥ ᤀᤡᤛ᤻ᤒᤥᤛᤣᤋᤖᤧ ᤀᤒᤏᤣᤖᤧᤴ ᤔᤧᤳᤋᤢ. “ᤌᤣᤀᤠᤱ ᤂᤧᤏᤧ᤹ ᤀᤠᤶᤒᤠᤖᤧ ᤁᤢᤔᤣᤳ ᤐᤠ᤺ᤰᤔᤧᤴᤏᤢ ᤁᤧᤀᤡᤵᤛᤧ᥅” 8 ᤜᤧᤰᤁᤣ᤺ᤸᤗᤧ ᤀᤡᤛ᤻ᤒᤥᤛᤣᤋᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤀᤒᤏᤣᤖᤧᤴ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤐᤠ᤺ᤳᤋᤢ. “ᤀᤠᤱᤃᤠ᤹ ᤕᤜᤢᤍᤠᤖᤧ ᤁᤢᤛᤧᤘᤠ ᤁᤧᤈᤥ᤺ᤰᤐᤠ ᤂᤩᤠᤒᤠᤀᤠᤒᤡ᥅ ᤀᤠᤸᤗ ᤌᤠᤖᤡᤰ ᤂᤧᤏᤧ᤹ ᤁᤧᤶᤒᤠ ᤛᤠᤘᤗᤖᤧ ᤁᤢᤜᤡᤶᤛᤕᤱ. ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤏᤢ ᤁᤢᤴᤈᤢᤶᤜᤠ᤹ᤖᤧ ᤂᤢᤴᤇᤡ᤹ ᤔᤏᤠ ᤘᤕᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤍᤠᤀᤢᤍᤖᤧ ᤁᤢᤜᤢᤰᤁᤥ ᤜᤢᤰᤔᤧᤛᤢᤵᤏᤧᤴ॥ ᤜᤧᤰᤁᤣᤛᤠᤱ ᤁᤴ ᤔᤧᤴᤇᤢᤔᤠᤴᤏᤢ ᤀᤠᤵᤋᤡᤰ ᤁᤧᤃᤢ᤺ᤳᤋᤠ᥄ 9 ᤀᤠᤸᤗ ᤍᤠᤀᤢᤍᤖᤧ ᤁᤢᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ‘ᤆᤥᤃᤢᤱ’ ᤗ᤹ᤖᤡᤰ ᤔᤠᤱᤜᤧᤰᤛᤡᤱᤒᤠ ᤐᤠ᤺ᤴᤏᤡᤴ ᤁᤧᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤛᤢᤰᤛᤢᤰ ᤔᤧᤈᤥᤃᤢᤱᤅᤡᤴᤏᤧᤓᤃᤪ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤂᤢᤶᤍᤡᤱ ᤐᤡᤀᤠᤖ॥ 10 ᤀᤠᤱᤃᤠ᤹ ᤛᤠᤘᤗᤖᤧ ᤁᤢᤜᤡᤶᤛᤕᤱᤅᤡᤴ ᤜᤠᤱᤕᤢᤰᤏᤠᤗᤠᤶ ᤁᤧᤱᤔᤠ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤍᤠᤏᤗᤠᤶᤒᤠ ᤒᤣᤷᤛᤣᤒᤠ ᤌᤠᤖᤡᤰ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤜᤠᤱᤕᤢᤰᤏᤠᤀᤥ ᤕᤢᤱᤔᤠ ᤕᤠ᤺ᤶᤒᤰ ᤆᤥᤃᤢᤱ॥” 11 ᤜᤧᤰᤁᤩᤠᤱ ᤀᤡᤛ᤻ᤒᤥᤛᤣᤋᤧᤴ ᤀᤒᤏᤣᤖᤧᤴᤏᤢ ᤁᤡᤛᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤌᤣᤀᤠᤱ ᤔᤧᤵᤔᤠ ᤔᤧᤛᤢᤰᤋᤢᤴ॥ 12 ᤂᤧᤴ ᤀᤣᤃᤠᤱ ᤀᤒᤏᤣᤖᤧᤸᤗᤧ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤍᤠᤀᤢᤍᤖᤧ᤹ᤀᤥ ᤁᤢᤔᤏᤠᤜᤠ᤹ ᤐᤠᤱᤄᤢᤛᤡ. “ᤁᤴ ᤗᤠᤈᤣ᤹ᤀᤡᤴ ᤜᤠ᤺ᤳᤗᤧᤴᤒᤣ᥅ ᤀᤠᤏᤡ᤹ ᤋᤅᤡ. ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤡᤴ ᤂᤧᤏᤧ᤹ ᤗᤧᤵᤔᤠᤱ ᤋᤠ᤺ᤵᤔᤠ ᤀᤠᤛᤢᤰᤛᤢᤰ ᤑᤠ᤹ᤏᤧ॥” 13 ᤜᤧᤰᤁᤣ᤺ᤸᤗᤧ ᤍᤠᤀᤢᤍᤖᤧ ᤀᤰᤂᤣᤗ᤹ᤖᤡᤰ ᤔᤧᤳᤋᤢ. “ᤐᤥᤱ᤹. ᤁᤖ ᤛᤠᤘᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤡᤁᤗᤧᤴ ᤀᤠᤱᤃᤠ᤹ᤀᤥ ᤋᤠᤖᤧᤀᤠᤱ ᤋᤩᤧ᤹. ᤜᤧᤰᤁᤩᤠᤱᤗᤰ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤋᤱᤅᤠ॥” 14 ᤍᤠᤀᤢᤍᤖᤧ ᤛᤠᤘᤗᤖᤧ ᤁᤢᤛ᤻ᤛᤠ ᤀᤡᤛ᤻ᤒᤥᤛᤣᤋᤧᤴᤏᤠᤱ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢᤍᤣᤛᤢ. “ᤀᤠᤱᤃᤠ᤹ ᤁᤡᤵ ᤌᤡᤰ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤆᤢᤳᤆᤢ᤹ᤒᤠᤜᤠ᤹ ᤔᤧᤸᤗᤢᤱ ᤁᤢᤀᤡᤛᤡᤰ ᤜᤢᤅᤢᤱᤅᤠᤱ ᤏᤠ᤺ᤰᤋᤢᤱᤒᤠ ᤀᤠᤱᤃᤠ᤹ ᤀᤠᤔᤣᤳ ᤔᤡᤁᤗᤧᤴ ᤀᤠᤱᤃᤠ᤹ ᤐᤡᤖᤠᤱᤅᤧ᤹॥” 15 ᤂᤧᤸᤗᤧᤆᤥᤃᤢᤸᤗᤧ ᤀᤡᤛ᤻ᤒᤥᤛᤣᤋᤖᤧ ᤔᤏᤠᤜᤠ᤹ ᤐᤠᤱᤄᤢᤛᤡᤀᤠᤱ ᤔᤡᤁᤗᤧᤴ ᤂᤢᤏᤧ᤹ ᤁᤢᤕᤧᤶᤒᤠ ᤗᤣᤛᤖᤧ ᤁᤢᤛ᤻ᤛᤠ ᤐᤸᤋᤡᤀᤣᤗ ᤗᤠᤶᤒᤠ ᤑᤧᤳᤋᤢ॥ 16 ᤁᤖ ᤁᤢᤕᤧᤶᤒᤠ ᤐᤸᤋᤡᤀᤣᤗᤧᤴ ᤜᤠᤒᤧᤖ ᤒᤜᤢᤖᤡᤔ ᤌᤠᤖᤡᤰ ᤔᤡᤁᤗᤧᤴ ᤋᤡᤶᤍᤢᤖ ᤑᤧᤖᤧ॥ ᤜᤧᤰᤁᤣ᤺ᤸᤗᤧ ᤀᤒᤏᤣᤖᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤏᤢ᤺ᤰᤂᤧ ᤐᤣᤃᤧ᤹”. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧᤀᤠᤱ ᤐᤣ॥ 17 ᤜᤧᤰᤁᤩᤠᤱ ᤀᤒᤏᤣᤖᤧᤴ ᤀᤡᤛᤪᤠᤀᤡᤗᤒᤠ ᤁᤠᤵᤐᤥ ᤋᤢᤶᤛᤠᤜᤠ᤹ᤖᤥ ᤐᤣᤀᤠᤱ ᤔᤧᤳᤋᤢᤛᤡ. “ᤕᤖᤡᤰ ᤋᤃᤡᤀᤠᤱᤎᤥ ᤍᤠᤀᤢᤍᤧᤴ ᤜᤠᤱ ᤐᤥᤱᤗ ᤕᤠ᤺ᤴᤍᤢᤶᤒᤧ ᤁᤧᤗ᤹ᤒᤠ ᤂᤡᤏᤡ᤹ ᤏᤡᤱᤘᤠ᤹ ᤘᤕᤧ॥ 18 ᤀᤠᤸᤗ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤍᤠᤀᤢᤍᤖᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤧᤜᤢᤰᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡ ᤀᤠᤔᤏᤠᤜᤠ᤹ ᤐᤗᤡᤛ᤻ᤋᤡᤜᤠ᤹ ᤏᤢ ᤘᤣ᤹ ᤁᤧᤖᤧᤰ ᤏᤡᤱᤔᤡ ᤜᤢᤰᤗᤠᤶ ᤛᤧ᤺ᤵᤋᤢᤱᤛᤡᤱ᤹॥’” 19 ᤀᤒᤏᤣᤖᤧᤴ ᤘᤡᤏᤩᤠᤔᤡᤏᤡᤜᤠ᤹ᤏᤢᤀᤠᤱ ᤋᤠ᤹ᤈᤧᤰᤂᤧ॥ ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤘᤡᤏᤩᤠᤔᤡᤏᤡᤜᤠ᤹ ᤔᤧᤍᤧᤴᤍᤧᤒᤠ ᤁᤧᤖᤧᤰ ᤐᤠ᤺ᤴᤏᤡᤴ ᤔᤧᤳᤇᤧ ᤀᤒᤏᤣᤖᤧᤴ ᤍᤠᤀᤢᤍ ᤘᤕᤧᤒᤠᤍᤧᤴ ᤜᤧᤒᤪᤥᤴᤏᤥ ᤐᤣ॥ 20 ᤀᤒᤏᤣᤖᤧᤴ ᤏᤡᤒᤥᤱ ᤁᤢᤔᤏᤠᤜᤠ᤹ᤏᤢ ᤍᤠᤀᤢᤍ ᤘᤕᤧᤒᤠᤍᤧᤴ ᤜᤧᤒᤪᤥᤴᤏᤥ ᤐᤣ. ᤍᤠᤀᤢᤍᤖᤧ ᤀᤒᤏᤣᤖ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ॥ 21 ᤜᤧᤰᤁᤩᤠᤱ ᤀᤒᤏᤣᤖᤧᤸᤗᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤸᤗ ᤀᤠᤱᤃᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹ ᤜᤧᤰᤁᤩᤠᤱ ᤀᤠᤍᤠᤱᤒᤠ ᤜᤠᤱᤅᤡᤸᤗᤥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤛᤢᤵᤛᤢᤱ ᤋᤠᤖᤢᤱᤛᤡᤱ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤀᤠᤍᤠᤱᤒᤠᤏᤢ ᤗᤳᤇᤠ ᤔᤠᤱᤜᤢᤵ ᤔᤧᤈᤥᤃᤢᤖ॥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤳᤋᤥ ᤌᤠᤖᤡᤰ ᤜᤠᤱᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢ᤹ ᤂᤧᤵᤔᤥ ᤌᤠᤖᤡᤰ ᤜᤠᤱ ᤆᤥᤃᤧ᤹ᤀᤥ॥” ᤜᤴᤏᤠᤱ ᤍᤠᤀᤢᤍᤖᤧ ᤀᤒᤏᤣᤖᤧᤴ ᤐᤠᤱᤄᤢᤍᤣᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢᤖᤡᤰᤁᤠᤱ ᤐᤣᤖᤥ॥ ᤀᤒᤏᤣᤖᤧᤴ ᤔᤧᤛᤧᤖᤢ 22 ᤁᤖ ᤂᤧᤴ ᤀᤣᤃᤠᤱ ᤂᤡᤍᤥᤀᤣ ᤏᤠᤵᤛᤧ ᤁᤧᤒᤣ᤺ᤰᤐᤠᤀᤠᤱ ᤁᤧᤘᤠ᤹ᤒᤠ ᤍᤠᤀᤢᤍᤖᤧ ᤁᤢᤎᤰᤛᤢᤒᤠᤜᤠ᤹ ᤕᤥᤀᤠᤒᤧᤴᤏᤢ ᤔᤧᤏᤠᤵᤋᤢᤛᤡᤒᤠ ᤕᤖᤡᤰ ᤆᤡᤃᤰᤘᤠᤜᤠ᤹ ᤔᤧᤍᤠᤖᤢᤀᤠᤱ ᤔᤧᤏᤢ᤺ᤰᤂᤧ ᤔᤧᤃᤧᤖᤧ॥ ᤀᤒᤏᤣᤖᤧᤴ ᤍᤠᤀᤢᤍᤧᤴᤏᤢ ᤜᤧᤒᤪᤥᤴᤏᤥ ᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤍᤠᤀᤢᤍᤖᤧ ᤏᤢᤖᤡᤰᤁᤠᤱ ᤐᤠᤱᤄᤢᤍᤣᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤜᤥ᤺ᤵᤋᤧ॥ 23 ᤕᤥᤀᤠᤒ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤌᤰᤛᤢᤒᤠᤜᤠ᤹ ᤔᤧᤃᤧᤖᤧ. ᤜᤧᤰᤁᤩᤠᤱ ᤏᤣᤖᤧᤸᤗᤧ ᤁᤢᤛ᤻ᤛᤠ ᤀᤒᤏᤣᤖᤧᤴ ᤜᤠᤱᤅᤡᤸᤗᤧ᤹ᤀᤥ ᤋᤩᤧᤀᤠᤱ ᤏᤢᤖᤡᤰᤁᤠᤱ ᤏᤢ᤺ᤰᤂᤧ ᤐᤣᤒᤠ ᤂᤧᤸᤗᤧ ᤂᤧᤵᤛᤢ॥ 24 ᤜᤧᤰᤁᤣ᤺ᤸᤗᤧ ᤕᤥᤀᤠᤒᤧᤴ ᤐᤣᤀᤠᤱ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤴ ᤌᤣ ᤁᤧᤈᤥᤃᤢᤒᤠ᥅ ᤀᤒᤏᤣᤖᤧᤴ ᤀᤠᤍᤠᤱᤒᤠᤖᤥ ᤋᤩᤧᤀᤠᤱ ᤘᤕᤧ॥ ᤀᤠᤍᤠᤱᤒᤠᤖᤧ ᤀᤠᤰᤂᤣᤀᤠᤱ ᤁᤧᤒᤠᤱᤄᤢ ᤁᤧᤍᤣᤛᤢᤒᤠ᥅ ᤂᤢᤏᤧ᤹ᤃ ᤂᤧᤳᤇᤡᤱᤅᤠᤱ ᤐᤣ॥ 25 ᤀᤠᤍᤠᤱᤒᤠᤖᤧ ᤏᤣᤖᤧᤸᤗᤧ ᤁᤢᤛ᤻ᤛᤠ ᤀᤒᤏᤣᤖᤧᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤘᤠ᤹॥ ᤂᤢᤏᤧ᤹ᤃ ᤀᤠᤍᤠᤱᤒᤠᤖᤧ ᤌᤣ ᤁᤧᤈᤥᤃᤢᤖ ᤁᤧᤘᤠ᤹ ᤂᤧᤴ ᤁᤧᤖᤧᤰ ᤁᤢᤛᤡᤱᤏᤡ᤺ᤳᤇᤧ ᤏᤢ ᤁᤧᤀᤡᤱᤗᤧᤰᤛᤧ ᤋᤩᤧᤀᤠᤱ ᤘᤕᤧ॥” 26 ᤕᤥᤀᤠᤒᤧᤴ ᤍᤠᤀᤢᤍᤖᤧ ᤁᤢᤍᤃᤡᤗᤠᤶ ᤗ᤺ᤴᤍᤧ. ᤂᤧᤒᤩᤠᤱ ᤂᤢᤏᤧ᤹ ᤀᤒᤏᤣᤖᤧᤸᤗᤧ ᤁᤢᤀᤣᤃᤠᤱ ᤀᤡᤱᤄᤱᤛᤠᤒᤠᤜᤠ᤹ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤕᤠᤶᤔᤥ ᤛᤡᤖᤠᤒᤠ ᤘᤠᤒᤠᤰᤗᤠᤶ ᤔᤧᤏᤢ᤺ᤰᤋᤢᤀᤠᤱ ᤔᤧᤍᤠᤖᤢ॥ ᤁᤖ ᤍᤠᤀᤢᤍᤖᤧ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤧ॥ 27 ᤜᤧᤰᤁᤩᤠᤱ ᤀᤒᤏᤣᤖᤧᤴ ᤜᤣᤒᤪᤥᤏ ᤏᤢ᤺ᤰᤂᤧ. ᤜᤧᤰᤁᤣ᤺ᤸᤗᤧ ᤕᤥᤀᤠᤒᤖᤧ ᤛᤡᤒᤡ᤹ᤀᤠᤱ ᤋᤠ᤹ᤃᤧᤈᤧᤱᤒᤠ ᤗᤧᤱᤛᤡᤱᤅᤠᤱ ᤂᤢᤏᤧ᤹ᤏᤢ ᤗᤠᤶᤎᤣ᤺ᤵᤐᤠᤸᤗᤧ ᤏᤠᤜᤠᤱ ᤗᤧᤵᤔᤠᤱ ᤋᤣ᤹ᤖᤢᤀᤠᤱ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤴᤛᤠ᤹ ᤀᤛᤠᤜᤣᤗᤧᤸᤗᤧ ᤁᤢᤗᤧᤰᤘᤠ ᤜᤢᤱᤛᤧ ᤀᤒᤏᤣᤖᤧᤴ ᤁᤢᤛ᤻ᤛᤠᤵᤐᤥ᤺ᤰᤁᤥ ᤌᤢᤒᤢᤀᤠᤱ ᤛᤧᤖᤢ॥ 28 ᤍᤠᤀᤢᤍᤖᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤐᤠ᤺ᤳᤋᤢ. “ᤏᤣᤖᤖᤧ ᤁᤢᤛ᤻ᤛᤠ ᤀᤒᤏᤣᤖᤧᤸᤗᤧ ᤁᤢᤛᤡᤔᤠᤀᤥ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤗᤠᤈᤣᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤡᤔᤠᤀᤥ ᤌᤣᤀᤠᤱ ᤀᤠᤵᤋᤡᤰ ᤜᤥᤵ॥ 29 ᤕᤥᤀᤠᤒ ᤏᤢ ᤂᤢᤏᤧ᤹ ᤁᤢᤶᤒᤠᤖᤧ ᤁᤧᤖᤧᤰ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤐᤥ ᤂᤧᤴ ᤀᤠᤵᤋᤡ᤺ᤰᤁᤧᤴ ᤌᤠᤖᤖᤥ॥ ᤜᤧᤰᤁᤩᤠᤱ ᤕᤥᤀᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤀᤥ ᤔᤡᤰᤘᤠ ᤁᤧᤗ᤺ᤶᤒᤠ ᤕᤠᤱᤄᤣ᤺ᤰ ᤏᤢ ᤁᤧᤈᤳᤇᤡᤱᤒᤠ ᤜᤥᤖᤡᤰ ᤋᤢᤰᤔᤠᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤖᤢᤛᤡᤸᤗ. ᤋᤰᤁᤠᤋᤡᤸᤗᤧ ᤋᤰᤛᤡᤱᤔᤠᤀᤠᤱ ᤗᤠᤱᤄᤣ᤺ᤰᤔᤠ ᤀᤡᤃᤪ ᤋᤠᤓᤣᤗᤠᤶᤒᤠ ᤛᤡᤔᤠ ᤀᤡᤃᤪ ᤏᤠ᤺ᤰᤔᤠᤀᤠᤱ ᤆᤠᤔᤠᤖᤰ ᤐᤥᤱᤗ॥” 30 ᤀᤰᤂᤣᤗ᤹ᤖᤡᤰ ᤃᤡᤒᤥᤏᤒᤠ ᤌᤱᤅᤥ ᤀᤒᤏᤣᤖᤧᤸᤗᤧ ᤂᤢᤴᤇᤡ᤹ ᤏᤢᤛᤠ᤹ ᤀᤛᤜᤣᤗᤧᤴ ᤛᤧᤖᤢᤒᤠᤸᤗᤧ ᤆᤥᤃᤢᤸᤗᤧ ᤕᤥᤀᤠᤒ ᤏᤢ ᤂᤢᤏᤧ᤹ ᤁᤢᤴᤛᤠ᤹ ᤀᤒᤡᤛᤤ᤺ᤸᤗᤧ ᤀᤒᤏᤣᤖᤧᤴ ᤛᤧᤖᤧᤇᤢᤖᤥ॥ ᤀᤒᤏᤣᤖᤧᤴ ᤀᤡᤐᤢᤱᤅᤥ ᤔᤧᤏᤧᤛ᤻ᤛᤢ 31 ᤍᤠᤀᤢᤍᤖᤧ ᤕᤥᤀᤠᤒ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤋᤣᤳ ᤌᤧ᤺ᤱᤔᤠ. ᤛᤃᤡᤋᤣᤳ ᤆᤠᤱᤔᤠ ᤏᤢ ᤀᤒᤏᤣᤖᤖᤧ ᤁᤢᤈᤣ ᤋᤃᤡ ᤔᤧᤖᤡᤱ ᤌᤰᤔᤠᤖ ᤗᤠᤱᤄᤣ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤜᤠᤱᤅᤡᤴ ᤀᤠᤒᤠᤅᤣ ᤆᤣ ᤁᤧᤒᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤀᤣᤃᤠᤱ ᤗᤠᤱᤄᤣᤃᤧ॥ 32 ᤂᤧᤱᤜᤠ᤹ᤖᤧ ᤀᤒᤏᤣᤖᤧᤴ ᤜᤧᤒᤪᤥᤴᤏᤥ ᤔᤧᤗᤢᤵᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤐᤢᤱᤅᤥ ᤜᤠᤱᤅᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ ᤛᤠ᤹ᤖᤡᤰ ᤔᤧᤜᤠᤒᤧ॥ 33 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤀᤒᤏᤣᤖᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤜᤠ᤺ᤵᤔᤠ ᤛᤠᤶᤗᤥᤎᤡᤰ ᤆᤥᤃᤢᤖᤥ— “ᤀᤒᤏᤣᤖᤀᤣ. ᤌᤣᤀᤠᤱ ᤁᤢ᤹ᤀᤡᤁᤧᤓᤧ᤹ᤒᤠ ᤔᤏᤠ ᤁᤢᤀᤡᤛᤡᤰ ᤁᤧᤛᤩᤧᤒᤠᤒᤣ᥅ 34 ᤂᤧᤏᤧ᤹ ᤁᤧᤜᤢᤰ ᤀᤡᤔᤧᤱᤄᤣ᤺ᤱᤅᤣ ᤐᤳᤇᤧ. ᤂᤧᤏᤧ᤹ ᤁᤧᤗᤠᤱᤅᤥ ᤑᤧᤴᤈᤣ᤹ ᤛᤡᤁᤪᤡ ᤔᤧᤒᤳᤇᤧᤴ. ᤂᤧᤏᤧ᤹ᤃ ᤁᤢ᤹ᤀᤡᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤁᤧᤎᤩᤧᤒᤠ ᤁᤢᤀᤡᤛᤡᤰ ᤁᤧᤃᤧᤅᤧᤖᤥ॥” ᤜᤧᤰᤁᤣ᤺ᤸᤗᤧ ᤕᤠᤶᤔᤥ ᤁᤧᤖᤧᤰ ᤔᤏᤠᤜᤠ᤹ ᤔᤧᤜᤠᤒᤧ॥ 35 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤍᤠᤀᤢᤍᤧᤴ ᤏᤠᤶ ᤔᤧᤴᤎᤠᤀᤣᤛᤠ ᤁᤢᤓᤠ ᤆᤠ ᤆᤖ ᤑᤠ᤹ᤀᤠᤱ ᤔᤧᤒᤡᤖᤢ. ᤁᤖ ᤍᤠᤀᤢᤍᤖᤧ ᤔᤠᤱᤜᤧᤰᤛᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ. “ᤏᤠᤶ ᤌᤠᤔᤠᤏᤢ᤺ᤸᤗᤧ ᤋᤃᤡ ᤀᤠᤱᤃᤠ᤹ ᤁᤢᤈᤠ ᤛᤢᤛᤢᤱᤏᤧᤓᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤂᤢᤶᤍᤡᤱ ᤐᤡᤀᤠᤖ॥” 36 ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰᤗᤧ ᤐᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤔᤧᤍᤧᤴᤍᤧ॥ ᤜᤠᤱᤅᤡᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤏᤥ ᤂᤧᤱᤜᤠ᤹ ᤔᤧᤛ᤺ᤳᤋᤧ॥ 37 ᤂᤧᤴ ᤕᤧᤴᤏᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤣᤖᤖᤧ ᤁᤢᤛ᤻ᤛᤠ ᤀᤒᤏᤣᤖᤧᤸᤗᤧ ᤁᤢᤛᤡᤔᤠᤀᤥ ᤜᤠᤱᤅᤡᤸᤗᤧ ᤁᤢᤜᤢᤰ ᤜᤥᤵ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢ॥ 38 ᤍᤠᤀᤢᤍᤖᤧ ᤂᤢᤏᤧ᤹ ᤁᤢᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤀᤥ ᤀᤠᤀᤡᤴ ᤗᤳᤇᤠ ᤌᤱ ᤌᤰᤔᤠ ᤁᤧᤎᤢᤶᤒᤠ. ᤕᤶᤒᤠ ᤔᤏᤠᤎᤡᤰ ᤛᤩᤧ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤴᤏᤡᤛᤢᤶᤔᤡᤶᤒᤡ᥅ 39 ᤀᤠᤱᤃᤠ᤹ ᤔᤠᤱᤗᤧ ᤛᤣ᤺ᤴᤍᤠᤱᤒᤠ ᤜᤠᤱ ᤐᤥ᤺ᤰᤂᤠᤱᤛᤠᤱ ᤁᤧᤏᤢ᤹ᤒᤠ ᤏᤢ ᤏ᤺ᤶᤏ᤺ᤶᤒᤠ ᤆᤥᤃᤠᤱ ᤁᤖ ᤁᤴ ᤛᤖᤢᤕᤠᤜᤖᤧ ᤁᤢᤛ᤻ᤛᤠᤜᤠ᤹ᤖᤧ ᤔᤏᤠᤜᤠ᤹ ᤛᤩᤧᤖᤧᤳᤇᤢᤛᤡ॥ ᤂᤧᤱᤜᤠ᤹ ᤀᤠᤱᤃᤠ᤹ᤏᤢ᤺ᤸᤗᤧ ᤁᤧᤀᤠ᤺ᤵᤐᤠ ᤐᤥ᤺ᤰᤂᤧᤇᤡ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢ᤹ᤀᤡᤁᤧᤓᤧ᤹ᤒᤠ ᤕᤠ᤺ᤶᤒᤰ ᤁᤧᤈᤥᤰᤐᤧᤴ ᤂᤧᤸᤗᤧ ᤂᤥᤔᤠ ᤁᤧᤒᤥᤱᤒᤠ ᤂᤢᤶᤍᤡᤱ ᤐᤡᤖᤢᤖᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.