᥈ ᤛᤠᤔᤢᤀᤧᤗ 24 - LIFOTNTᤍᤠᤀᤢᤍᤖᤧ ᤌᤱ ᤁᤧᤎᤰᤐᤠ ᤌᤰᤛᤢᤒᤠᤜᤠ᤹ ᤏᤡᤖᤢᤛᤡ᤹ 1 ᤕᤠᤶᤔᤥᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥᤃᤧ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤍᤠᤀᤢᤍᤧᤴ ᤑᤥ᤺ᤰᤂᤢ. ᤜᤧᤰᤁᤩᤠᤱ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ ᤏᤡᤖᤧᤛᤧ᤹॥” 2 ᤂᤧᤸᤗᤧᤆᤥᤃᤢᤸᤗᤧ ᤕᤥᤀᤠᤒᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤌᤰᤛᤢᤒᤠ ᤗᤠᤶᤗᤥᤒᤠᤜᤠ᤹ ᤍᤠᤀᤢᤍᤖᤧ ᤔᤧᤳᤋᤢᤛᤡ. “ᤍᤠᤏᤗᤠᤶ ᤒᤣᤷᤛᤣᤒᤠ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤢᤘᤠᤱ ᤁᤧᤘᤠ᤹ᤒᤠᤍᤧᤴᤏᤥ ᤐᤣᤃᤧᤶᤔᤧ᤹ ᤜᤧᤰᤁᤩᤠᤱ ᤌᤱ ᤁᤧᤎᤰᤐᤠᤜᤠ᤹ ᤏᤡᤖᤠᤶᤛᤡᤶᤔᤧ᤹ᤀᤠᤱ ᤋᤩᤧᤶᤔᤧ᤹॥ ᤂᤧᤱᤜᤠ᤹ ᤀᤠᤰᤂᤩᤠᤖᤡᤰ ᤔᤧᤘᤠ᤹ ᤂᤧᤴ ᤏᤡᤱᤘᤠ᤹ ᤂᤥᤔᤠ ᤀᤠᤏᤡᤱᤘᤠ᤹ ᤘᤠ᤹॥” 3 ᤁᤖ ᤕᤥᤀᤠᤒᤧᤸᤗᤧ ᤜᤠᤱᤅᤡᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗᤥ ᤁᤧᤘᤠ᤹ᤒᤠ ᤁᤧᤔᤏᤠᤜᤠ᤹ ᤁᤡᤵᤌᤡᤰᤗᤧᤱ ᤕᤠᤖᤡᤰ ᤕᤖᤡᤰ ᤑᤥᤛᤢᤛᤡᤖ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤂᤧᤴ ᤁᤧᤖᤧᤰ ᤁᤧᤏᤡᤛᤢᤖ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤎᤠ᤺ᤰ ᤆᤠ᤹ᤖ ᤆᤥᤃᤢᤖ॥ ᤁᤖ ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰ ᤌᤣᤀᤠᤱ ᤆᤥ᤺ᤰᤔᤠ ᤁᤧᤃᤥ᤺ᤳᤋᤢᤒᤠᤒᤣ᥅” 4 ᤁᤖ ᤜᤠᤱᤅᤡᤸᤗᤧ ᤕᤥᤀᤠᤒᤧᤴ ᤏᤢ ᤌᤰᤛᤢᤒᤠ ᤗᤠᤶᤗᤥᤒᤠᤜᤠ᤹ ᤁᤢᤒᤠ᤺ᤴᤏᤡᤸᤗᤧ ᤏᤠ᤺ᤴᤍᤢᤛᤡᤒᤠᤸᤗᤧ ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳ ᤆᤥ᤺ᤰᤛᤧ ᤂᤧᤵᤔᤥᤗᤠᤶ ᤔᤧᤎᤠᤛᤡᤱ॥ 5 ᤂᤧᤱᤜᤠ᤹ᤖᤧ ᤕᤷᤍᤏ ᤘᤜ᤺ᤱᤅᤡᤴ ᤔᤧᤃᤠ᤺ᤰᤋᤢᤀᤠᤱ ᤔᤧᤒᤣ. ᤜᤧᤰᤁᤩᤠᤱ ᤃᤠᤍ ᤋᤧᤱᤃᤵᤐᤥᤒᤠ ᤏᤧᤏᤧᤒᤠᤍᤧᤴ ᤁᤢᤗᤢᤶᤔᤥ ᤁᤧᤏᤧᤒᤠ ᤀᤖᤥᤀᤣᤖ ᤕᤧᤰᤕᤰᤁᤡᤸᤗᤧ ᤗᤠᤱᤃᤧᤳ ᤐᤡᤛᤠᤱ ᤛᤠ᤺ᤱᤃᤠᤜᤡᤶ ᤔᤧᤗᤣ᤺ᤋᤢ. ᤃᤠᤍ ᤔᤧᤒᤥ᤺ᤰᤂᤧᤖ ᤕᤠᤈᤣᤖ ᤌᤠᤖᤡᤰ ᤔᤧᤒᤣ॥ 6 ᤜᤴᤏᤠᤱ ᤂᤧᤴᤜᤠ᤹ ᤃᤡᤗᤠᤍ ᤏᤢ ᤋᤠᤋᤡᤔᤜᤥᤍᤛᤡ ᤜᤧᤰᤁᤩᤠᤱ ᤍᤠᤏ-ᤕᤠᤏ ᤏᤢ ᤛᤡᤍᤥᤏᤒᤠ ᤁᤢᤃᤵᤐᤡᤴ ᤔᤧᤃᤒᤢ॥ 7 ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤢᤖᤥᤛᤒᤠ ᤕᤰ ᤌᤠᤖᤡᤰ ᤔᤧᤒᤣ. ᤜᤡᤒ᤻ᤒᤡ ᤏᤢ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ ᤌᤠᤖᤡᤰ ᤔᤧᤒᤣ॥ ᤂᤧᤴ ᤀᤣᤃᤠᤱ ᤕᤜᤢᤍᤠᤒᤠ ᤏᤣᤃᤣᤘ ᤔᤧᤵᤔᤏᤠᤒᤠᤸᤗᤧ ᤗᤠᤱᤃᤧᤳ ᤐᤡᤛᤠᤱ ᤗᤠᤈᤣ᤹ᤒᤠ ᤒᤣᤷᤛᤣᤒᤠ ᤔᤧᤵᤏᤠᤍᤧᤴᤏᤥ ᤔᤧᤒᤣ॥ 8 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤁᤧᤖᤧᤰ ᤗᤠᤈᤣ᤹ ᤔᤧᤃᤒᤢ. ᤜᤧᤰᤁᤩᤠᤱ ᤏᤢᤛᤡ ᤗᤠᤀᤠᤱ ᤏᤡᤒᤥᤱ ᤕᤧᤴᤏᤥ ᤕᤖᤢᤛᤗᤧᤔ ᤔᤧᤏᤢ᤺ᤰᤂᤧ ᤔᤧᤍᤩᤧ॥ 9 ᤂᤧᤒᤩᤠᤱ ᤕᤥᤀᤠᤒᤖᤧ ᤜᤠᤱᤅᤡᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳ ᤀᤰᤂᤣᤗ᤹ᤖᤡᤰ ᤐᤡᤖᤢ—ᤌᤱᤅᤥ ᤋᤠᤓᤣ ᤐᤱᤔᤠ ᤁᤧᤛᤢᤰᤐᤠ ᤀᤡᤛᤪᤠᤀᤡᤗᤡᤜᤠ᤹ᤗᤠᤶᤒᤠ ᥎.᥆᥆.᥆᥆᥆ (ᤗᤠᤅᤧᤴᤇᤡᤱ ᤕᤧᤳᤇᤡ) ᤏᤢ ᤕᤜᤢᤍᤠᤗᤠᤶᤒᤠ ᥋.᥆᥆.᥆᥆᥆ (ᤗᤠᤅᤧᤴᤇᤡᤱ ᤅᤠᤛᤡ) ᤔᤧᤘᤠ᤹॥ 10 ᤁᤖ ᤔᤏᤠᤜᤠ᤹ ᤂᤠᤏᤡ᤺ᤳ ᤆᤥ᤺ᤰᤔᤠ ᤆᤢᤖᤧᤀᤠᤱ ᤍᤠᤀᤢᤍᤧᤴ ᤁᤢᤏᤡᤱᤘᤠ᤺ᤸᤗᤧ ᤕᤧ᤺ᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤛᤠ᤹ᤖᤡᤰ ᤕᤶᤒᤠ ᤗᤠᤕᤥ ᤆᤥᤃᤢᤱ᥄ ᤕᤜᤘᤣ ᤍᤠᤱᤒᤠᤀᤣ. ᤁᤧᤛᤧᤘᤠᤖᤥᤒᤠᤸᤗᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤔᤠ᤺ᤱᤄᤠ ᤆᤥᤃᤧ ᤐᤡᤖᤠᤱᤅᤧ᤹॥ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤍᤱ ᤆᤥᤃᤠᤱ॥” 11 ᤜᤧᤰᤁᤩᤠᤱ ᤂᤢᤏᤧ᤹ ᤋᤠᤏᤠᤶ ᤐᤥᤃᤧ॥ ᤁᤖ ᤜᤠᤒᤠ ᤁᤴ ᤗᤢᤶᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤄᤱᤅᤡᤴ ᤍᤠᤀᤢᤍᤖᤧ ᤁᤢᤄᤠᤃᤧᤀᤡᤰᤐᤠ ᤃᤠᤍᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤥ ᤁᤧᤖᤧ ᤆᤢᤖᤧᤀᤠᤱ ᤘᤕᤧ— 12 “ᤐᤣᤃᤧ᤹ᤀᤠᤱ ᤍᤠᤀᤢᤍᤧᤴ ᤀᤰᤂᤣ ᤔᤧᤳᤋᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤃᤡ ᤛᤢᤶᤛᤡ ᤐᤠᤴ ᤋᤠᤖᤢᤱ ᤐᤡᤏᤧ॥ ᤂᤧᤱᤜᤠ᤹ᤀᤥ ᤗᤳᤇᤠ ᤛᤣᤃᤧ᤹. ᤜᤧᤰᤁᤩᤠᤱ ᤂᤧᤴᤏᤣ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤁᤣ᤺ᤳᤋᤢᤱ ᤐᤡᤏᤧ॥’” 13 ᤂᤧᤒᤩᤠᤱ ᤃᤠᤍᤧᤴ ᤋᤩᤧᤀᤠᤱ ᤀᤠᤶᤓᤠ ᤂᤧᤴ ᤐᤠ᤺ᤴᤏᤡᤴ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤗᤠᤈᤣ᤹ᤀᤥ ᤋᤱᤒᤣ᤹ ᤛᤢᤶᤛᤡ ᤌᤠᤖᤡᤰ ᤛᤠᤰ ᤐᤥ᤺ᤰᤗ. ᤀᤡᤃᤪ ᤗᤠ ᤛᤢᤶᤛᤡ ᤌᤠᤖᤡᤰ ᤀᤠᤍᤠᤱᤒᤠ ᤛᤧᤵᤔᤠ ᤁᤧᤃᤥ᤺ᤵᤐᤠ ᤁᤧᤏᤡᤱᤔᤡᤜᤠ᤹ᤗᤠᤶ ᤂᤧᤳᤇᤡᤱᤔᤠ ᤐᤥᤱᤗ. ᤀᤡᤃᤪ ᤀᤠᤍᤠᤱᤒᤠᤖᤧ ᤁᤧᤗᤠᤈᤣ᤹ᤀᤥ ᤛᤢᤶᤕᤧᤴ ᤌᤠᤖᤡᤰ ᤔᤡᤴᤍᤣ᤹ ᤐᤥ᤺ᤰᤗ᥅ ᤀᤠᤸᤗ ᤏᤡᤱᤘᤠ᤹ ᤀᤡ᤺ᤳᤋᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤒᤠᤱᤒᤧᤴ ᤌᤣ ᤀᤡᤱᤄᤱ ᤜᤢ᤹ᤖᤢᤱᤒᤠ ᤂᤧᤴ ᤐᤠ᤺ᤴᤏᤡᤴ ᤔᤧᤳᤋᤠᤱᤅᤧ᤹॥” 14 ᤂᤧᤒᤩᤠᤱ ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤀᤠᤱᤃᤠ᤹ᤃ ᤛᤠ᤹ᤖᤡᤰ ᤋᤢᤰᤂᤣᤀᤥ ᤌᤩᤠᤱᤅᤠᤱ ᤘᤠ᤹ᤀᤠ॥ ᤀᤠᤏᤡᤃᤧᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥ ᤌᤠᤔᤠᤀᤣ ᤏᤢᤒᤠ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤡ᤺ᤶᤈᤡᤴ ᤕᤶᤒᤠ ᤆᤥᤰ॥ ᤁᤖ ᤀᤠᤱᤃᤠ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤔᤠ ᤔᤧᤒᤥᤱᤏᤧᤸᤗ॥” 15 ᤂᤧᤸᤗᤧᤆᤥᤃᤢᤸᤗᤧ ᤋᤠᤏᤠᤶᤔᤠᤱᤎᤥ ᤕᤜᤘᤣ ᤍᤠᤱᤒᤠᤸᤗᤧ ᤐᤡᤖᤢᤛᤡᤒᤠ ᤕᤧᤶᤎᤠᤖᤡᤰ ᤀᤡᤛᤪᤠᤀᤡᤗ ᤂᤠᤖᤠᤰ ᤔᤠᤱᤍᤢᤰᤔᤠ ᤐᤠᤱᤄᤢᤍᤠᤛᤢ. ᤜᤧᤰᤁᤩᤠᤱ ᤍᤠᤏᤗᤠᤶ ᤒᤣᤷᤛᤣᤒᤠ ᤌᤠᤖᤡᤰ ᤏᤢᤒᤥᤱ ᤜᤧᤴᤇᤡᤱ ᤔᤏᤠᤜᤠ᤹ ᤔᤧᤛᤩᤧ॥ 16 ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤔᤧᤱᤔᤠᤖᤧ ᤗᤠᤃᤡ ᤁᤢᤜᤢᤰᤁᤡᤴ ᤑᤥ᤺ᤰᤂᤢ. ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤔᤏᤠᤜᤠ᤹ ᤂᤢᤶᤔᤠ ᤁᤢᤏᤡᤱᤘᤠ᤹ᤀᤡᤴ ᤏᤢ᤺ᤰᤋᤢᤀᤠᤱ ᤔᤏᤠ ᤁᤧᤛᤧᤵᤐᤠ ᤔᤠᤱᤗᤠᤀᤡᤱᤒᤠᤴ ᤔᤧᤳᤋᤢ. “ᤀᤠᤸᤗ ᤕᤠ᤺ᤰᤋᤢ. ᤁᤧᤜᤢᤰ ᤑᤥ᤺ᤰᤂᤧ॥” ᤂᤧᤶᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤕᤠᤒᤢᤛᤡ ᤀᤖᤦᤏᤠᤖᤧ ᤁᤢᤈᤠ ᤑᤢᤱᤔᤠᤍᤧᤴᤏᤥ ᤕᤧᤒᤧ॥ 17 ᤍᤠᤀᤢᤍᤖᤧ ᤔᤏᤠ ᤁᤧᤛᤧᤵᤐᤠᤖ ᤁᤧᤘᤠ᤹ᤒᤠ ᤔᤠᤱᤗᤠᤀᤡᤱᤒᤠᤴ ᤏᤡᤛᤢᤀᤠᤱ ᤕᤜᤘᤣ ᤍᤠᤱᤒᤠᤴ ᤔᤧᤳᤋᤢ. “ᤀᤥᤔᤧᤳᤋᤧ᤹᥄ ᤀᤠᤱᤃᤠ᤹ᤃ ᤗᤠᤕᤥ ᤆᤥᤃᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥᤃᤢᤱ॥ ᤁᤖ ᤁᤴ ᤔᤧᤸᤗᤢᤰᤜᤠ᤹ᤖᤧ ᤌᤣ ᤔᤧᤈᤥᤃᤢᤀᤠᤱ ᤘᤠ᤹ᤒᤣ᥅ ᤁᤧᤜᤢᤰᤁᤡᤴ ᤀᤠᤍᤰᤗᤧᤱᤘᤠᤀᤥ ᤏᤢ ᤀᤠᤜᤡᤶᤛᤕᤱᤜᤠ᤹ᤀᤥ ᤑᤥ᤺ᤰᤂᤧ᤹. ᤀᤠᤶᤒᤠᤖᤧ ᤁᤢᤛᤢᤘᤠᤱᤀᤥ ᤔᤧᤓᤥ᤺ᤰᤂᤧᤴᤏᤧ᤹॥” 18 ᤜᤠᤒᤠ ᤂᤧᤴ ᤕᤧᤴᤏᤥ ᤃᤠᤍᤧᤴ ᤋᤩᤧᤀᤠᤱ ᤍᤠᤀᤢᤍᤧᤴ ᤔᤧᤳᤋᤢ. “ᤐᤣᤃᤧ᤹. ᤕᤠᤒᤢᤛᤡ ᤀᤖᤦᤏᤠᤖᤧ ᤁᤢᤈᤠ ᤏᤢᤰᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤎᤡᤰ ᤆᤥᤃᤧ᤹॥” 19 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤃᤠᤍᤖᤧ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤆᤥᤃᤢ॥ 20 ᤜᤧᤰᤁᤩᤠᤱ ᤀᤖᤦᤏᤠᤖᤧ ᤕᤥ ᤀᤥᤔᤳᤋᤢᤸᤗᤧ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤎᤠᤅᤧᤖ ᤔᤧᤒᤳᤇᤧᤒᤠ ᤏᤡᤛᤢ॥ ᤜᤧᤰᤁᤩᤠᤱ ᤀᤖᤦᤏᤠᤴ ᤐᤣᤀᤠᤱ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤜᤠᤱᤅᤡᤴ ᤛᤧᤘᤠ ᤔᤧᤳᤋᤢ॥ 21 ᤜᤧᤰᤁᤩᤠᤱ ᤀᤖᤦᤏᤠᤖᤧ ᤔᤧᤳᤋᤢ. “ᤌᤣᤀᤠᤱ ᤀᤠᤍᤠᤱᤒᤠ ᤜᤠᤱᤅᤡᤴ ᤁᤧᤛᤧᤘᤠᤖᤥᤒᤠᤸᤗᤥ ᤁᤧᤍᤩᤧᤒᤠᤒᤣ᥅” ᤍᤠᤀᤢᤍᤖᤧ ᤔᤧᤳᤋᤢ. “ᤔᤏᤠᤜᤠ᤹ᤗᤠᤶ ᤔᤠᤱᤍᤢᤰᤔᤠᤴ ᤐᤣ᤺ᤰᤗ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥ᤺ᤰᤛᤧ ᤁᤴ ᤁᤧᤈᤠᤓᤢᤱᤔᤠᤍᤧᤴᤏᤡᤴ ᤀᤡᤱᤛᤧ ᤋᤩᤠᤱᤒᤠᤖᤥ॥” 22 ᤜᤧᤰᤁᤩᤠᤱ ᤀᤖᤦᤏᤠᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤍᤠᤱᤒᤠ ᤜᤠᤱᤅᤣ ᤋᤣ᤹ᤖᤧᤀᤥ. ᤀᤠᤍᤠᤱᤒᤠᤖᤧ ᤌᤣ ᤆᤥ᤺ᤰᤔᤠ ᤁᤧᤛᤡᤖᤠ᤹ᤎᤠᤱ ᤜᤠᤒᤠᤜᤧᤰᤁᤣ ᤆᤥᤃᤧ᤹ᤀᤥ. ᤗᤧᤳᤋᤡ ᤋᤥ᤺ᤶᤔᤠᤖᤧ ᤗᤠᤃᤡ ᤐᤡᤳ ᤀᤠᤱᤃᤠ᤹ᤏᤢ ᤔᤧᤘᤠ᤹. ᤛᤡᤱᤗᤧ ᤗᤠᤃᤡ ᤆᤠ ᤏᤢᤰᤔᤠ ᤋᤠ᤺ᤴᤍᤣ ᤏᤢ ᤂᤧ᤺ᤵᤛᤡᤱᤜᤠ᤹ ᤏᤧ᤹᤺॥ 23 ᤜᤠᤱᤅᤣ. ᤀᤠᤱᤃᤠ᤹ ᤀᤖᤦᤏᤠᤖᤧ ᤁᤧᤖᤧᤰ ᤀᤠᤈᤡᤃᤰᤘᤠᤜᤠ᤹ ᤜᤠᤱᤅᤡᤴ ᤐᤡᤏᤧ. ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤍᤠ᤺ᤰᤗ॥” 24 ᤁᤖ ᤜᤠᤱᤅᤡᤸᤗᤧ ᤔᤧᤳᤋᤢ. “ᤔᤣ᤺ᤴ. ᤁᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤁᤢᤔᤧᤸᤗᤢᤱ ᤜᤢᤅᤢᤱ᤹॥ ᤀᤠᤱᤃᤠ᤹ ᤕᤠᤱ ᤔᤧᤴᤜᤢᤱᤅᤣᤒᤠ ᤆᤡᤃᤰᤘᤠᤴ ᤕᤜᤘᤣ ᤍᤠᤱᤒᤠᤀᤥ ᤛᤡᤍᤢᤱᤈᤓᤠ ᤔᤧᤍᤥ᤺ᤴᤏᤠᤴ॥” ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤂᤧᤴ ᤁᤢᤈᤠ ᤑᤢᤱᤔᤠᤍᤧᤴᤏᤡᤴ ᤏᤢ ᤐᤡᤳᤜᤠ᤹ ᤅᤠᤒᤥᤱ ᤛᤣᤁᤣᤗ ᤕᤢᤵᤐᤠ ᤜᤢᤅᤢᤀᤠᤱ ᤀᤡᤅᤢ॥ 25 ᤂᤧᤒᤩᤠᤱ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤍᤧᤴ ᤆᤥᤃᤢᤀᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤗᤠᤈᤣ᤹ᤖᤧ ᤗᤠᤃᤡ ᤆᤥᤃᤢᤒᤠ ᤋᤢᤘᤠᤴ ᤕᤜᤘᤣ ᤍᤠᤱᤒᤠᤸᤗᤧ ᤋᤠ᤺ᤰᤋᤢ. ᤀᤡᤛᤪᤠᤀᤡᤗᤀᤥ ᤁᤧᤍᤠᤒᤠ ᤔᤠᤱᤍᤢᤰᤔᤠᤴ ᤐᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.