᥈ ᤛᤠᤔᤢᤀᤧᤗ 23 - LIFOTNTᤍᤠᤀᤢᤍᤖᤧ ᤁᤢᤏᤢᤵᤔᤠ ᤁᤢᤒᤠᤴ 1 ᤀᤠᤸᤗ ᤍᤠᤀᤢᤍᤖᤧ ᤁᤢᤏᤢᤵᤔᤥ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤜᤠᤒᤠ ᤁᤴᤗᤥ— ᤕᤡᤛᤤᤖᤧ ᤁᤢᤛ᤻ᤛᤠ ᤍᤠᤀᤢᤍᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤜᤠᤒᤠ ᤁᤴᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤥ ᤑᤥ᤺ᤰᤂᤢᤒᤠ ᤂᤧᤴ ᤔᤏᤠ᤺ᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴ. ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠ ᤜᤠᤱ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤛᤠᤶᤗᤥ ᤛᤠᤶᤃᤧᤔᤧᤵᤐᤠᤸᤗᤧ ᤁᤢᤒᤠ᤺ᤴᤗᤥ— 2 ᤕᤜᤘᤣ ᤍᤠᤱᤒᤠᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤠᤱᤃᤠ᤹ᤗᤠᤶ ᤐᤠᤖᤧᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤀᤠᤱᤃᤠ᤹ ᤀᤠᤶᤒᤪᤠᤀᤥ ᤐᤳᤇᤧᤖᤥ॥ 3 ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠᤖᤧᤖᤥ. ᤀᤡᤛᤪᤠᤀᤡᤗᤒᤠ ᤕᤠᤰᤐᤣ᤹ᤀᤡᤸᤗᤧ ᤔᤧᤳᤋᤠᤱᤗᤥ. “ᤜᤠ᤺ᤳᤗᤧ ᤔᤏᤠᤜᤠ᤹ᤀᤥ ᤏᤢᤖᤡᤰ ᤕᤢᤰ ᤆᤥᤃᤢ᤹. ᤜᤠ᤺ᤳᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤖ ᤕᤢᤰ ᤆᤥᤃᤢ᤹. 4 ᤂᤢᤏᤧ᤹ ᤂᤠ᤹ᤔᤡᤳ ᤔᤣ᤺ᤴᤏᤣᤒᤠ ᤋᤠᤏᤠᤶ ᤁᤧᤃᤧᤵᤐᤠ ᤏᤠᤶ ᤁᤢᤀᤡᤛᤡᤰ ᤗᤧᤰᤗᤥ. ᤘᤜᤡᤳ ᤌᤠᤀᤠᤱ ᤂᤠᤶᤒᤠᤱᤗᤠᤶ ᤕᤠᤴ ᤗᤡᤱ ᤁᤧᤒᤠᤱᤒᤠ ᤂᤠᤀᤥ᤺ᤳᤔᤧᤴ ᤁᤢᤀᤡᤛᤡᤰ ᤐᤥᤱᤗᤥ॥” 5 ᤜᤧᤰᤁᤩᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤀᤠᤎᤠ᤺ᤰᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤀᤠᤱᤃᤠ᤹ᤏᤢ ᤀᤠᤓᤠᤸᤗᤧᤀᤠᤱ ᤔᤧᤴᤏᤢᤵᤏᤠᤒᤠ ᤔᤠᤱᤜᤢᤵ ᤆᤥᤃᤢᤖᤥ. ᤀᤠᤓᤧᤸᤗᤧᤀᤠᤱ ᤑᤧᤳᤔᤧᤸᤗᤠ᤹ᤔᤏᤠᤒᤠ ᤔᤠᤱᤜᤢᤵ. ᤀᤠᤑᤠᤸᤗᤧᤀᤠᤱ ᤔᤧᤸᤗᤧᤱᤔᤏᤠ ᤔᤠᤱᤜᤢᤵ. ᤂᤧᤴᤏᤣ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤘᤠ᤹ᤖᤥ. ᤂᤧᤴᤏᤣ ᤀᤠᤱᤃᤠ᤹ ᤌᤱ ᤀᤠᤏᤠ᤺ᤶᤔᤠᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤳᤋᤢᤖᤥ॥ 6 ᤁᤖ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤃ ᤗᤠᤵᤑᤣ᤺ᤶᤏᤠᤒᤠ ᤋᤡᤱ ᤁᤢᤀᤡᤛᤡᤰ ᤔᤧᤈᤥᤰᤗᤥ. ᤂᤧᤴ ᤋᤡᤱᤜᤠ᤹ᤃ ᤜᤢᤰᤁᤡᤸᤗᤧ ᤛᤢᤶᤔᤠᤀᤠᤱ ᤛᤢᤰᤔᤧᤍᤧᤳᤏᤧᤴᤗᤥ॥ 7 ᤁᤖ ᤑᤧᤴᤈᤣ᤹ ᤏᤢ ᤛᤡᤱᤅᤡᤸᤗᤧᤖᤰ ᤛᤢᤶᤔᤠ ᤛᤢᤰᤋᤧᤳᤗᤥ॥ ᤛᤢᤶᤔᤏᤠᤒᤠ ᤋᤡᤱᤜᤠ᤹ ᤔᤡᤀᤥ ᤜᤠ᤺ᤶᤔᤠ ᤐᤥᤱᤗᤥ॥ ᤍᤠᤀᤢᤍᤖᤧ ᤁᤧᤎᤢᤶᤒᤠ ᤁᤢᤎᤰᤛᤢᤒᤠᤜᤠ᤹ ( ᥇ ᤛᤠᤵᤔᤢ ᥇᥇:᥇᥆-᥊᥇ ) 8 ᤍᤠᤀᤢᤍᤖᤧ ᤁᤧᤎᤢᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤒᤠᤃᤴᤗᤥ॥ ᤋᤜᤁᤔᤥᤏᤡᤗᤠᤶᤒᤠ ᤕᤥᤛᤒ-ᤒᤛ᤻ᤛᤣᤒᤣᤋ ᤘᤕᤧ—ᤁᤧᤎᤢᤶᤒᤠ ᤛᤢᤶᤛᤡᤀᤥ ᤁᤴ ᤌᤡᤰᤛᤡᤃᤣᤰᤐᤠ ᤗᤠᤶᤗᤥᤒᤠ ᤘᤕᤧ॥ ᤂᤧᤸᤗᤧ ᤗᤠ᤺ᤰᤁᤡᤸᤗᤧ ᤁᤡᤵᤛᤡᤱ ᤕᤧᤳ ᤔᤏᤠᤜᤠ᤹ ᤌᤡᤰᤗᤧᤱᤔᤠᤸᤗᤧ ᤛᤧᤖᤢᤛᤡ॥ 9 ᤂᤧᤴ ᤛᤢᤶᤛᤡᤜᤠ᤹ᤀᤥ ᤏᤡᤛᤡᤃᤣᤰᤐᤠᤴ ᤀᤜᤥᤜᤡ ᤍᤥᤍᤤᤖᤧ ᤁᤢᤛ᤻ᤛᤠ ᤀᤣᤗᤠᤈᤠᤖ ᤘᤕᤧ॥ ᤂᤢᤏᤧ᤹ ᤍᤠᤀᤢᤍᤏᤢ ᤐᤠᤛ-ᤍᤶᤔᤡᤔᤀᤥ ᤘᤕᤧ. ᤂᤧᤵᤔᤥᤀᤣ ᤐᤗᤡᤛ᤻ᤋᤡᤜᤠ᤹ ᤌᤱᤗᤧ ᤗᤠᤃᤡ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ॥ ᤀᤡᤛᤪᤠᤀᤡᤗᤡᤜᤠ᤹ ᤌᤱ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤏᤠᤱ ᤔᤧᤏᤢ᤺ᤰᤂᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤀᤣ ᤌᤱ ᤆᤥ᤺ᤰᤛᤧ ᤐᤣᤀᤠᤱ 10 ᤁᤢᤜᤢᤰ ᤔᤧᤱᤄᤡ᤹ᤀᤣ ᤌᤠᤖᤡᤰ ᤐᤗᤡᤛ᤻ᤋᤡᤜᤠ᤹ ᤆᤩᤧᤵᤋᤢᤛᤡᤖ ᤕᤠᤃᤧ. ᤂᤢᤏᤧ᤹ ᤁᤢᤜᤢᤰᤁᤥᤃ ᤋᤠᤓᤣᤴ ᤂᤡᤵᤋᤢᤀᤠᤱᤅᤣ ᤐᤳᤇᤧ॥ ᤀᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤕᤶᤒᤠ ᤌᤱ ᤏᤠ᤺ᤶᤔᤠ ᤁᤢᤓᤠ᤹ ᤐᤡᤖᤢ॥ ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤡᤃᤰᤘᤠᤜᤠ᤹ ᤏᤠᤵᤛᤧᤖᤰ ᤀᤣᤗᤠᤈᤠᤖ ᤘᤕᤧᤒᤠᤍᤧᤴᤏᤥ ᤔᤧᤏᤢ᤺ᤰᤂᤧ ᤔᤧᤍᤩᤧ॥ 11 ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤜᤖᤠᤖᤒᤠ ᤀᤠᤃᤡᤖᤧ ᤁᤢᤛ᤻ᤛᤠ ᤛᤶᤔᤠ ᤘᤕᤧ॥ ᤐᤗᤡᤛ᤻ᤋᤡᤜᤠ᤹ ᤗᤧᤜᤡ ᤔᤧᤵᤏᤠᤒᤠᤍᤧᤴᤏᤥ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ. ᤂᤧᤵᤔᤥ ᤁᤠᤖᤡ᤹ ᤜᤣ᤹ᤵᤏᤠᤒᤠ ᤐᤩᤠᤱᤛᤡᤎᤡᤰ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤓᤳᤋᤢᤛᤡᤀᤠᤱ ᤔᤧᤏᤠ᤺ᤳᤋᤢᤛᤡ. 12 ᤜᤧᤰᤁᤣ᤺ᤸᤗᤧ ᤛᤶᤔᤠᤴ ᤐᤩᤠᤱᤛᤡᤀᤥ ᤕᤧᤶᤛᤡᤱ. ᤜᤧᤰᤁᤩᤠᤱ ᤂᤧᤴ ᤐᤩᤠᤱᤛᤡᤴ ᤛᤧ᤺ᤵᤋᤢ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤴᤍᤢᤛᤡ॥ ᤀᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤐᤕᤶ ᤕᤶᤒᤠ ᤌᤱ ᤏᤠ᤺ᤶᤔᤠ ᤐᤠᤱᤄᤢᤛᤡ॥ 13 ᤜᤧᤰᤁᤩᤠᤱ ᤆᤠᤓᤢᤱᤔᤠ ᤕᤧᤶ ᤋᤩᤧᤖ ᤐᤳᤇᤧᤸᤗᤧ ᤂᤧᤴ ᤛᤢᤶᤒᤥᤱ ᤔᤏᤠᤜᤠ᤹ᤀᤥᤗᤠᤶᤒᤠ ᤛᤢᤶᤛᤡ ᤁᤧᤕᤧᤰᤐᤠ ᤔᤏᤠᤜᤠ᤹ ᤀᤍᤢᤸᤗᤠᤔ ᤑᤢᤰᤁᤢᤀᤥ ᤍᤠᤀᤢᤍᤧᤴ ᤁᤢᤍᤢᤶᤛᤧ ᤔᤧᤍᤩᤧ॥ ᤐᤗᤡᤛ᤻ᤋᤡᤜᤠ᤹ ᤖᤐᤠᤀᤡᤒᤠ ᤏᤧᤏᤧᤒᤠᤍᤧᤴᤏᤥ ᤕᤰ ᤔᤧᤗᤣ᤺ᤳᤋᤢᤀᤠᤱ ᤔᤧᤕᤢᤅᤧ॥ 14 ᤂᤧᤴ ᤕᤧᤶᤔᤥ ᤍᤠᤀᤢᤍᤧᤴ ᤕᤰᤁᤥ ᤘᤕᤧ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤒᤠ ᤌᤰᤛᤢᤒᤠᤜᤠ᤹ ᤒᤣᤌᤗᤧᤜᤧᤔᤀᤥ ᤔᤧᤘᤕᤧ॥ 15 ᤜᤧᤰᤁᤩᤠᤱ ᤌᤡᤰᤕᤧᤴ ᤍᤠᤀᤢᤍᤧᤴ ᤛᤠ᤹ᤖᤡᤰ ᤘᤠᤔᤡ᤺ᤰᤔᤠᤸᤗᤧ ᤋᤖᤢ. ᤜᤧᤰᤁᤩᤠᤱ ᤐᤠ᤺ᤳᤋᤢ. “ᤀᤣ᥄ ᤒᤣᤌᤗᤧᤜᤧᤔᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤘᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤌᤢᤱᤔᤠ ᤂᤥᤛᤢᤱᤅᤡᤸᤗᤧᤃ ᤏᤢᤖᤧᤒᤠᤔᤧᤴ᥄” 16 ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤛᤢᤶᤛᤡ ᤁᤧᤎᤢᤶᤒᤠ ᤌᤰᤛᤢᤒᤠᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤡ᤺ᤰᤗᤠᤀᤥᤗᤠᤶ ᤔᤧᤓᤡ᤺ᤴᤇᤡᤱ ᤔᤧᤒᤣᤀᤠᤱ ᤒᤣᤌᤗᤧᤜᤧᤔ ᤗᤠᤶᤎᤣᤳ ᤁᤢᤒᤣᤛᤠᤱᤒᤠ ᤘᤠᤒᤠᤰᤁᤥᤗᤠᤶ ᤆᤫᤠ᤺ᤳᤋᤡᤴ ᤔᤧᤕᤢᤖᤢᤀᤠᤱ ᤍᤠᤀᤢᤍᤧᤴ ᤔᤧᤒᤡᤖᤢ॥ ᤁᤖ ᤍᤠᤀᤢᤍᤧᤴ ᤂᤧᤴ ᤆᤫᤠ᤺ᤳᤋᤡᤴ ᤌᤢᤱᤔᤠ ᤔᤧᤍᤧᤴᤍᤧᤴ॥ ᤂᤢᤏᤧ᤹ ᤂᤧᤴ ᤆᤫᤠ᤺ᤳᤋᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤜᤢᤰᤂᤢᤍᤣᤛᤢ॥ 17 ᤜᤧᤰᤁᤩᤠᤱ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤁᤴ ᤆᤫᤠ᤺ᤳᤋᤡᤴ ᤌᤢᤱᤔᤠ ᤔᤧᤒᤥᤱᤏᤧᤸᤗ॥ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ᤀᤡᤸᤗᤧ ᤔᤧᤗᤧᤰᤋᤢᤒᤠ ᤜᤧᤰᤋᤱᤒᤠ ᤆᤫᤠ᤺ᤳᤋᤡᤴ ᤀᤠᤰᤂᤣᤗ᤹ᤖᤡᤰ ᤌᤢᤅᤢᤱᤒᤠᤒᤣ᥅ ᤁᤴ ᤆᤫᤠ᤺ᤳᤋᤡᤸᤗᤧ ᤁᤢᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤔᤴ ᤔᤧᤒᤡᤖᤢᤀᤠᤱ ᤔᤧᤘᤠ᤹॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤆᤫᤠ᤺ᤳᤋᤡᤴ ᤂᤢᤏᤧ᤹ ᤔᤧᤎᤢᤅᤢᤴ॥ ᤂᤧᤴ ᤛᤢᤶᤛᤡ ᤁᤧᤎᤢᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤜᤠ᤹ ᤒᤠᤀᤰᤋᤱᤒᤠ ᤘᤕᤧ॥ 18 ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤖᤧ ᤁᤢᤴᤛᤠ᤹ ᤀᤒᤡᤛᤤᤴ ᤁᤴ ᤛᤢᤶᤛᤡ ᤔᤏᤠᤜᤠ᤹ᤖᤧ ᤗᤠᤃᤡ ᤁᤢᤎᤧᤃᤣᤰ ᤗᤠᤶᤗᤥᤒᤠ ᤘᤕᤧ॥ ᤌᤡᤰᤗᤧᤱ ᤂᤢᤏᤧ᤹ ᤁᤡᤵ ᤛᤢᤶᤛᤡ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤠ᤺ᤰᤁᤡᤴ ᤕᤠᤅᤢᤀᤠᤱ ᤂᤧᤱᤜᤠ᤹ ᤌᤢᤒᤢ ᤛᤧᤖᤢᤛᤡ. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤂᤧᤴ ᤛᤢᤶᤛᤡ ᤔᤏᤠᤜᤠ᤹ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤔᤡᤱ ᤁᤧᤀᤡᤱᤒᤠ ᤐᤥ᤺ᤰᤂᤧ॥ 19 ᤂᤧᤴ ᤛᤢᤶᤛᤡ ᤔᤏᤠᤜᤠ᤹ᤏᤢ᤺ᤸᤗᤧ ᤕᤖᤡᤰ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤐᤣᤒᤠ ᤐᤥ᤺ᤰᤂᤧ. ᤁᤖᤛᤠᤱ ᤂᤢᤏᤧ᤹ ᤂᤧᤴ ᤛᤢᤶᤛᤡ ᤔᤏᤠᤜᤠ᤹ ᤕᤠᤖᤡᤰ ᤁᤢᤔᤡᤱ ᤔᤧᤀᤡᤅᤧᤴ॥ 20 ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤁᤒ᤻ᤛᤣᤗ ᤁᤧᤕᤢᤱᤒᤠ ᤒᤏᤠᤕᤠᤜᤴᤏᤠᤱ ᤗᤳᤇᤠ ᤁᤧᤎᤢᤶᤒᤠ ᤘᤕᤧ॥ ᤂᤢᤏᤧ᤹ᤀᤠᤱ ᤕᤶᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤕᤧ॥ ᤔᤥᤀᤠᤒᤒᤠ ᤏᤧᤳᤇᤡ ᤔᤢᤰᤛᤠᤶᤒᤠ ᤔᤏᤠ ᤁᤧᤛᤧᤵᤐᤠ ᤂᤢᤏᤧ᤹ᤀᤣ ᤘᤕᤧ॥ ᤏᤠ᤺ᤱ ᤌᤩᤧᤒᤠ ᤕᤧᤴᤏᤥ ᤂᤢᤏᤧ᤹ ᤗᤳᤇᤠ ᤗᤢᤶᤒᤠ᤺ᤳᤋᤥ ᤗᤠᤛᤧᤀᤠᤱ ᤂᤡᤖᤡᤱᤒᤠ ᤌᤡᤰ ᤛᤩᤧᤖᤢᤀᤠᤱ ᤘᤕᤧ॥ 21 ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤗᤳᤇᤠ ᤕᤶᤒᤠ ᤁᤣ᤺ᤶᤒᤠ ᤔᤡᤛᤪᤡᤎᤡᤰ ᤛᤧᤖᤢ. ᤔᤡᤛᤪᤡ᤺ᤸᤗᤧ ᤁᤢᤜᤢᤰᤁᤥ ᤗᤳᤇᤠ ᤗᤠ᤺ᤰ ᤁᤳᤋᤢ॥ ᤒᤏᤠᤕᤠᤜ᤺ᤸᤗᤧ ᤁᤢᤜᤢᤰᤁᤥ ᤋᤰᤁᤠᤳ ᤌᤡᤰ ᤕᤠᤱᤛᤡᤱᤅᤠᤱ ᤌᤰᤛᤧ ᤐᤣ. ᤜᤧᤰᤁᤩᤠᤱ ᤂᤧᤴ ᤔᤡᤛᤪᤡ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤗᤠ᤺ᤰᤁᤡᤴ ᤏᤠᤵᤋᤢᤀᤠᤱ ᤜᤠᤒᤠ ᤂᤧᤴ ᤗᤠ᤺ᤰᤁᤡᤸᤗᤧ ᤑᤏ᤹ ᤌᤢᤒᤢ ᤛᤩᤧᤖᤢᤀᤠᤱ ᤘᤕᤧ॥ 22 ᤕᤧᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤸᤗᤧ ᤁᤢᤎᤢᤶᤔᤠ ᤕᤠ᤺ᤶᤒᤰᤁᤡᤴ ᤜᤠᤒᤠ ᤀᤰᤋᤱᤒᤠ ᤘᤕᤧ॥ ᤂᤧᤴ ᤛᤢᤶᤛᤡ ᤔᤏᤠᤜᤠ᤹ ᤜᤧᤰᤁᤣᤀᤣ ᤂᤢᤏᤧ᤹ ᤁᤢᤔᤡᤱ ᤁᤧᤀᤡᤱᤒᤠ ᤐᤥ᤺ᤰᤂᤧ॥ 23 ᤂᤢᤏᤧ᤹ ᤂᤧᤴ ᤛᤢᤶᤒᤥᤱ ᤔᤏᤠᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤢᤔᤡᤱ ᤁᤧᤀᤡᤱᤒᤠ ᤘᤕᤧ. ᤁᤖᤛᤠᤱ ᤂᤢᤏᤧ᤹ ᤂᤧᤴ ᤛᤢᤶᤛᤡ ᤔᤏᤠᤜᤠ᤹ ᤕᤠᤖᤡᤰ ᤁᤢᤔᤡᤱ ᤔᤧᤀᤡᤅᤧᤴ॥ ᤍᤠᤀᤢᤍᤧᤸᤗᤧ ᤂᤧᤴ ᤂᤢᤏᤧ᤹ ᤁᤢᤎᤰ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤆᤥᤃᤢᤖᤥ॥ 24 ᤂᤧᤴ ᤛᤢᤶᤒᤥᤱᤜᤠ᤹ᤀᤥ ᤕᤥᤀᤠᤒᤖᤧ ᤁᤢᤴᤛᤠ᤹ ᤀᤛᤠᤜᤣᤸᤗᤠᤱ ᤘᤕᤧᤖᤥ. ᤒᤣᤌᤗᤧᤜᤧᤔᤒᤠ ᤍᤥᤍᤤᤖᤧ ᤁᤢᤛ᤻ᤛᤠ ᤀᤣᤸᤜᤠᤏᤠᤏ. 25 ᤜᤖᤥᤍᤒᤠ ᤛᤶᤔᤠ. ᤜᤖᤥᤍᤒᤠ ᤀᤣᤗᤡᤁᤠ. 26 ᤐᤸᤋᤡᤒᤠ ᤜᤣᤗᤣᤛ. ᤋᤰᤁᤥᤒᤠ ᤀᤡᤰᤁᤣᤛᤖᤧ ᤁᤢᤛ᤻ᤛᤠ ᤀᤡᤖᤠ. 27 ᤀᤏᤠᤋᤥᤋᤒᤠ ᤀᤒᤡᤀᤣᤈᤣᤖ. ᤜᤢᤛᤠᤋᤡ ᤔᤒᤢᤴᤏᤣ. 28 ᤀᤜᤥᤜᤡ ᤛᤸᤔᤥᤏ. ᤏᤋᤥᤐᤠᤋᤡ ᤔᤜᤖᤤ. 29 ᤏᤋᤥᤐᤠᤋᤡ ᤒᤠᤏᤠᤜᤖᤧ ᤁᤢᤛ᤻ᤛᤠ ᤜᤣᤗᤣᤍ. ᤜᤧᤰᤁᤩᤠᤱ ᤒᤣᤏᤩᤠᤔᤡᤏ ᤃᤡᤒᤠᤒᤠ ᤖᤡᤒᤤᤖᤧ ᤁᤢᤛ᤻ᤛᤠ ᤀᤡᤌᤤ. 30 ᤐᤡᤖᤠᤋᤥᤴᤒᤠ ᤒᤏᤠᤕᤠᤜ. ᤃᤠᤛᤒᤠ ᤏᤧᤏᤧᤒᤠᤍᤧᤴᤗᤠᤶᤒᤠ ᤜᤡᤍ᤻ᤍᤤ. 31 ᤀᤖᤠᤒᤠᤒᤠ ᤀᤒ᤻ᤒᤡ-ᤀᤸᤒᤥᤴ. ᤒᤜᤢᤖᤡᤔᤡ ᤀᤈ᤻ᤔᤠᤘᤣᤋ. 32 ᤛᤠᤸᤒᤥᤏᤡ ᤀᤣᤗᤩᤠᤜᤒᤠ. ᤕᤠᤛᤣᤏᤖᤧ ᤁᤢᤛ᤻ᤛᤠᤜᤠ᤹. 33 ᤜᤖᤠᤖᤒᤠ ᤛᤶᤔᤠᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏ. ᤜᤖᤠᤖᤒᤠ ᤛᤖᤠᤖᤖᤧ ᤁᤢᤛ᤻ᤛᤠ ᤀᤜᤡᤀᤠᤔ. 34 ᤔᤠᤁᤠᤋᤡ ᤀᤠᤜᤛᤒᤤᤖᤧ ᤁᤢᤛ᤻ᤛᤠ ᤀᤣᤗᤡᤐᤣᤗᤣᤋ. ᤃᤡᤗᤥᤏᤡ ᤀᤜᤡᤋᤥᤐᤣᤗᤖᤧ ᤁᤢᤛ᤻ᤛᤠ ᤀᤣᤗᤡᤀᤠᤔ. 35 ᤁᤷᤔᤣᤗᤡ ᤜᤣᤛᤪᤥ. ᤀᤷᤒᤠᤒᤠ ᤐᤠᤖᤤ. 36 ᤛᤥᤒᤠ ᤁᤧᤕᤢᤱᤒᤠ ᤏᤠᤋᤠᤏᤖᤧ ᤁᤢᤛ᤻ᤛᤠ ᤕᤡᤃᤠᤗ. ᤜᤃᤪᤡᤖᤧ ᤁᤢᤛ᤻ᤛᤠ. ᤃᤠᤍᤒᤠ ᤒᤠᤏᤡ. 37 ᤀᤶᤔᤥᤏᤒᤠ ᤛᤣᤗᤣᤁ. ᤒᤣᤖᤥᤋᤒᤠ ᤏᤜᤖᤤ. ᤁᤴ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤖᤧ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠ ᤘᤕᤧ. 38 ᤕᤡᤋᤪᤡ ᤀᤡᤖᤠ. ᤕᤡᤋᤪᤡ ᤃᤠᤖᤣᤒ. 39 ᤜᤧᤰᤁᤩᤠᤱ ᤜᤡᤳᤋᤡ ᤀᤢᤖᤡᤕᤠᤜ॥ ᤁᤱᤜᤠ᤹ ᤁᤧᤖᤧᤰᤁᤥ ᤛᤢᤶᤒᤥᤱᤅᤠᤱ ᤏᤢᤛᤡ ᤔᤧᤘᤕᤧ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.