᥈ ᤛᤠᤔᤢᤀᤧᤗ 22 - LIFOTNTᤍᤠᤀᤢᤍᤖᤧ ᤁᤢᤛᤠᤶᤗᤥ ( ᤏᤡᤱ ᤛᤢᤶ ᥇᥎ ) 1 ᤍᤠᤀᤢᤍᤖᤧ ᤁᤧᤖᤧᤰ ᤁᤢᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤗᤠᤶ ᤜᤧᤰᤁᤩᤠᤱ ᤛᤠᤘᤗᤖᤧ ᤁᤢᤜᤢᤰᤗᤠᤶ ᤕᤜᤘᤣ ᤍᤠᤱᤒᤠᤸᤗᤧ ᤋᤠᤱᤛᤧ᤺ᤵᤋᤢᤸᤗᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤖ ᤁᤴ ᤛᤠᤶᤗᤥᤴ ᤕᤜᤘᤣ ᤍᤠᤱᤒᤠᤀᤥ ᤛᤠᤶᤔᤧᤳᤋᤢᤖᤥ— 2 ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤀᤠᤕᤠᤰᤐᤣ᤹ᤖᤥ. ᤂᤢᤏᤧ᤹ᤃ ᤀᤠᤕᤰ ᤏᤢ ᤀᤠᤛᤧᤴᤗᤵᤍᤠᤱᤒᤠᤖᤥ॥ 3 ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ ᤀᤠᤕᤠᤰᤐᤣ᤹ᤖᤥ ᤂᤢᤏᤧ᤹ᤀᤥᤀᤣ ᤀᤠᤱᤃᤠ᤹ ᤀᤡ᤺ᤶᤛᤡᤱᤅᤠᤖᤥ॥ ᤂᤥ᤺ᤸᤗᤧ ᤀᤠᤱᤃᤠ᤹ ᤌᤣ᤺ᤰᤁᤠᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤛᤧ᤺ᤵᤐᤠᤀᤠᤱ ᤏᤢᤖᤡᤰ ᤁᤳᤋᤠᤖᤥ॥ ᤂᤢᤏᤧ᤹ᤃ ᤀᤠᤱᤃᤠ᤹ ᤁᤧᤎᤢᤶᤒᤠ ᤀᤠᤕᤰᤗᤥ. ᤜᤧᤰᤁᤩᤠᤱ ᤀᤠᤀᤡ᤺ᤶᤛᤡᤱᤔᤠᤍᤧᤴ ᤏᤢ ᤀᤠᤛᤧᤴᤗᤵᤍᤠᤱᤒᤠᤖᤥ— ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤗᤠᤶ ᤂᤧᤏᤧ᤹ ᤁᤧᤛᤧ᤺ᤵᤐᤠᤖᤥ॥ 4 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱᤗᤥ ᤂᤢᤏᤧ᤹ ᤁᤢᤏᤠᤖᤠ ᤑᤥᤔᤠ ᤗᤠ᤹ᤖᤢᤖᤥ ᤜᤧᤰᤁᤩᤠᤱ ᤀᤠᤏᤡᤱᤔᤡᤜᤠ᤹ᤗᤠᤶᤒᤠ ᤂᤢᤏᤧ᤹ ᤛᤧ᤺ᤵᤐᤠᤖᤥ॥ 5 ᤛᤡᤔᤧᤸᤗᤧ ᤘᤠᤓᤧᤸᤗᤧᤱᤅᤡᤸᤗᤧ ᤁᤡᤷᤃᤵ ᤁᤒᤠᤱᤗᤥ. ᤀᤠᤔᤧᤱᤔᤧᤱᤒᤠ ᤘᤠᤎᤢᤰᤁᤡᤸᤗᤧ ᤀᤠᤱᤃᤠ᤹ ᤛᤢᤖᤢᤳ ᤛᤢ᤺ᤴᤍᤠᤱᤅᤠᤱ ᤘᤕᤧᤖᤥ॥ 6 ᤂᤧᤔᤠᤍᤡᤱ ᤕᤱᤛᤱᤒᤠ ᤌᤠᤰᤐᤠ᤺ᤸᤗᤧ ᤀᤠᤱᤃᤠ᤹ ᤁᤡᤳᤋᤠᤱᤗᤥ. ᤛᤡᤔᤧᤴᤗᤧ ᤆᤧᤴᤏᤥ ᤀᤠᤱᤃᤠ᤹ ᤌᤠᤔᤠ ᤁᤥ᤺ᤳᤋᤠᤱᤗᤥ॥ 7 ᤀᤠᤍᤢᤰᤂᤣ ᤀᤠᤗᤠᤰᤂᤣᤀᤥ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱᤗᤥ. ᤁᤢᤓᤠ᤹ᤖᤧ ᤗᤠᤃᤡ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤶᤒᤠ ᤀᤡᤰᤗᤠ᤺ᤸᤗᤧ ᤐᤣᤗᤡ ᤑᤠᤰᤋᤢᤱᤗᤥ॥ ᤁᤢᤜᤡᤶᤔᤥ ᤀᤠᤱᤃᤠ᤹ ᤀᤠᤀᤡᤰᤗᤠᤴ ᤂᤧᤵᤛᤢᤖᤥ॥ ᤂᤢᤏᤧ᤹ ᤐᤣᤗᤡ ᤑᤠᤰᤋᤢᤱᤒᤠᤴ ᤁᤢᤏᤧᤰᤂᤥ᤹ᤀᤥᤀᤣ ᤁᤧᤖᤧᤖᤥ॥ 8 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤕᤰᤂᤧᤖᤥ. ᤜᤧᤰᤁᤩᤠᤱ ᤗᤢᤵᤗᤡ ᤌᤠᤅᤧᤖᤥ. ᤋᤠᤱᤛᤠᤰᤐᤠᤸᤗᤧ ᤁᤢᤕᤢᤰᤏᤠᤜᤠ᤹ ᤔᤧᤕᤰᤂᤧᤖᤥ॥ ᤂᤧᤱᤜᤠ᤹ ᤌᤧᤃᤰᤁᤰ ᤔᤧᤕᤰᤂᤧᤖᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤛᤡᤰ ᤐᤥᤃᤧᤀᤠᤱ ᤘᤕᤧᤖᤥ॥ 9 ᤁᤢᤴᤒᤥᤜᤱᤗᤠᤶᤒᤠ ᤔᤡ᤺ᤰᤂᤢ᤹ ᤗ᤺ᤴᤍᤧᤖᤥ. ᤜᤧᤰᤁᤩᤠᤱ ᤁᤢᤶᤒᤪᤠᤀᤥᤗᤠᤶᤒᤠ ᤀᤠᤔᤧᤱᤔᤧᤱᤒᤠ ᤔᤡᤴ ᤗ᤺ᤴᤍᤧᤖᤥ. ᤂᤧᤵᤔᤥᤗᤠᤶ ᤔᤡᤎᤢᤱ ᤔᤡᤖᤠ᤺ᤰ ᤋᤡᤖᤧᤖᤥ॥ 10 ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤜᤴᤍᤢᤀᤠᤱ ᤂᤢᤏᤧ᤹ ᤕᤥ ᤌᤩᤧᤖᤥ॥ ᤔᤠᤰᤛ᤻ᤍᤡ᤺ᤱᤃᤩᤠ᤺ᤵᤐᤠ ᤂᤠ᤹ᤔᤡ᤺ᤵᤐᤠᤴ ᤁᤢᤗᤠᤱᤓᤥᤛᤠᤱ ᤐᤳᤇᤧᤖᤥ॥ 11 ᤂᤢᤏᤧ᤹ ᤁᤖᤢᤒ ᤔᤧᤵᤔᤏᤠᤒᤠ ᤔᤠᤱᤗᤠᤀᤡᤱᤒᤠᤴ ᤕᤢᤰᤋᤢᤀᤠᤱ ᤐᤧᤖᤧᤖᤥ. ᤜᤧᤰᤁᤩᤠᤱ ᤛᤢᤖᤡ᤺ᤳᤋᤡᤸᤗᤧ ᤐᤰᤂᤢᤀᤠᤱ ᤁᤧᤒᤧᤒᤠ ᤐᤢ ᤁᤢᤀᤡᤛᤡᤰ ᤌᤠ᤺ᤱ ᤐᤧᤖᤧᤖᤥ॥ 12 ᤂᤠᤔᤠᤰᤔᤠᤴ ᤂᤢᤏᤧ᤹ ᤁᤢᤄᤢ᤺ᤱᤔᤠ ᤆᤥᤃᤢᤖᤥ. ᤆᤫᤠ᤺ᤳ ᤁᤧᤒᤱᤒᤠ ᤔᤠᤰᤁᤧᤗ᤹ᤒᤠ ᤂᤠᤵᤔᤡ᤺ᤵᤐᤠᤸᤗᤧ ᤐᤴᤇᤡᤱᤗᤥ॥ 13 ᤂᤢᤏᤧ᤹ ᤁᤢᤍᤃᤡᤗᤠᤶᤒᤠ ᤔᤡᤰ ᤁᤧᤈᤧᤶᤒᤠ ᤀᤥ᤺ᤳᤋᤡ᤺ᤴ ᤗ᤺ᤴᤍᤧᤖᤥ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤔᤡᤄᤠᤱᤃᤪᤥ᤺ᤰᤜᤠ᤹ ᤌᤩᤧᤖᤥ॥ 14 ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤕᤜᤘᤣ ᤍᤠᤱᤒᤠᤴ ᤀ᤺ᤰᤋᤧᤖᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤰᤗᤠᤴ ᤂᤧᤶᤍᤧᤳᤋᤧᤖᤥ॥ 15 ᤂᤢᤏᤧ᤹ ᤋᤥ᤺ᤱᤅᤡᤸᤗᤧ ᤀᤠᤒᤢᤛᤡᤀᤠᤱ ᤁᤢᤏᤡᤱᤔᤡᤜᤠ᤹ ᤑᤢᤳᤇᤡᤱᤈᤩᤠᤱ ᤛᤧᤛᤢᤍᤣᤛᤢᤛᤡᤖᤥ. ᤜᤧᤰᤁᤩᤠᤱ ᤔᤢᤴᤎᤠᤱ ᤛᤣᤖᤡ᤺ᤸᤗᤧ ᤜ᤺ᤴᤍᤠ ᤔᤧᤗᤧᤰᤋᤧᤖ ᤕᤠ᤺ᤴᤍᤢᤛᤡᤖᤥ॥ 16 ᤕᤜᤘᤣ ᤍᤠᤱᤒᤠᤸᤗᤧ ᤂᤢᤏᤧ᤹ ᤑᤧ᤺ᤰᤋᤢᤛᤡᤸᤗᤧ ᤁᤢᤴᤒᤥᤀᤥᤗᤠᤔ ᤁᤧᤗ᤺ᤶᤒᤠ ᤛᤰᤔᤠᤴ ᤑᤰᤋᤧᤸᤗᤧ ᤘᤖ᤺ᤱᤅᤥᤒᤠ ᤆᤫᤠ᤺ᤳᤜᤠ᤹ ᤆᤒᤧᤀᤠᤱ ᤏᤧᤘᤠᤗᤠ ᤗᤢᤶᤒᤠ᤺ᤳᤜᤠ᤹ ᤏᤡᤎᤠᤒᤧᤖᤥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤢᤰᤏᤠᤜᤠ᤹ ᤏᤡᤎᤠᤒᤧᤖᤥ॥ 17 ᤂᤢᤏᤧ᤹ ᤌᤠ᤺ᤱᤗᤠᤶᤒᤠ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤀᤠᤱᤃᤠ᤹ ᤋᤧᤶᤛᤠᤱᤗᤥ॥ ᤂᤢᤏᤧ᤹ ᤁᤢᤍᤡᤶᤒᤣ ᤁᤣ᤺ᤶᤒᤠ ᤘᤖ᤺ᤱᤗᤠᤶᤒᤠ ᤀᤢ᤺ᤰᤂᤠᤱ ᤗ᤺ᤳᤋᤠᤱᤗᤥ॥ 18 ᤂᤢᤏᤧ᤹ ᤀᤠᤱᤃᤠ᤹ ᤁᤧᤎᤢᤶᤒᤠ ᤀᤠᤏᤡᤱᤔᤡᤜᤠ᤹ᤗᤠᤶᤒᤠ ᤋᤠᤱᤛᤧ᤺ᤵᤋᤠᤱᤗᤥ. ᤀᤠᤱᤃᤠ᤹ᤏᤢ᤺ᤸᤗᤧᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤁᤧᤎᤢᤶᤒᤠ ᤔᤧᤈᤥᤃᤧᤖᤥ॥ 19 ᤀᤠᤱᤃᤠ᤹ ᤋᤢᤰᤂᤣ ᤋᤢᤔᤢᤱᤅᤠᤱ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤔᤧᤓᤳᤋᤠᤱᤗᤥ. ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤱᤃᤠ᤹ ᤑᤠ᤹ᤖᤠᤱᤗᤥ॥ 20 ᤂᤢᤏᤧ᤹ ᤋᤠᤶᤍᤠᤶᤒᤠ ᤋᤧᤴᤏᤥ ᤀᤠᤱᤃᤠ᤹ ᤋᤠᤖᤠᤱᤗᤥ. ᤂᤢᤏᤧ᤹ ᤀᤠᤱᤃᤠ᤹ ᤋᤠᤱᤛᤧ᤺ᤵᤋᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤱᤃᤠ᤹ᤏᤢ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤘᤕᤧᤖᤥ॥ 21 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤛᤠᤶᤕᤥᤒᤠ ᤀᤠᤕᤠ᤺ᤶᤒᤰ ᤁᤢᤀᤡᤛᤡᤰ ᤜᤠᤱᤛᤧᤶ ᤐᤡᤖᤠᤱᤗᤥ. ᤌᤣᤀᤠᤱᤓᤧᤸᤗᤧ ᤆᤥ᤺ᤰᤔᤠ ᤁᤧᤏᤢ᤹ᤒᤠ ᤐᤠ᤺ᤴᤗᤰ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤐᤠᤴ ᤔᤧᤶᤓᤣ᤺ᤴᤏᤣ ᤘᤕᤠᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢ᤹ᤀᤡᤛᤠᤶ ᤐᤡᤖᤠᤱᤗᤥ॥ 22 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤔᤡᤴ ᤏᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤑᤧᤴᤕᤠ᤺ᤶᤒᤰ ᤆᤥᤃᤢᤱᤒᤠ ᤜᤥᤵᤗᤥ ᤂᤧᤒᤩᤠᤱ ᤀᤠᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤔᤠ᤺ᤱᤄᤠ ᤔᤧᤶᤒᤣ᤺ᤰᤁᤣ ᤘᤠ᤹ᤀᤠᤖᤥ॥ 23 ᤁᤧᤖᤧᤰ ᤁᤢᤛᤠᤶᤕᤥᤌᤡᤶᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤴᤗᤧᤳᤋᤣ ᤘᤠ᤹ᤀᤠᤖᤥ॥ 24 ᤂᤢᤏᤧ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤏᤡᤛᤠᤱᤗᤥ. ᤌᤣᤀᤠᤱᤓᤧᤸᤗᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠᤗᤠᤶ ᤗᤠ᤺ᤳᤗᤠ᤺ᤳ ᤘᤕᤠᤱᤗᤥ॥ 25 ᤕᤜᤘᤣ ᤍᤠᤱᤒᤠᤸᤗᤧ ᤀᤠᤱᤃᤠ᤹ ᤛᤠᤶᤕᤥᤒᤠ ᤀᤠᤕᤠ᤺ᤶᤒᤰ ᤁᤢᤀᤡᤛᤡᤰ ᤜᤠᤱᤛᤧᤶ ᤐᤡᤖᤠᤱᤗᤥ. ᤌᤣᤀᤠᤱᤓᤧᤸᤗᤧ ᤆᤥ᤺ᤰᤔᤠ ᤁᤧᤏᤢ᤹ᤒᤠ ᤐᤠ᤺ᤴᤗᤰ ᤆᤥᤃᤢᤱᤗᤥ॥ 26 ᤂᤧᤏᤧ᤹ᤃ ᤏᤛᤠ᤺ᤴᤛᤠᤒᤠᤜᤠ᤹ᤏᤢ ᤏᤛᤠ᤺ᤴᤛᤠᤒᤠᤀᤣ ᤁᤧᤈᤥ᤺ᤰᤗᤥ. ᤁᤢᤗᤡᤱᤍᤥ ᤁᤧᤃᤧᤵᤐᤠᤜᤠ᤹ᤏᤢ ᤁᤢᤗᤡᤱᤍᤥ ᤁᤧᤃᤧᤵᤐᤠᤀᤣ ᤁᤧᤈᤥ᤺ᤰᤗᤥ॥ 27 ᤛᤢᤳᤌᤥᤒᤠᤜᤠ᤹ᤏᤢ ᤂᤧᤏᤧ᤹ ᤛᤢᤳᤌᤥᤒᤠᤀᤣ ᤁᤧᤎᤠ᤺ᤶᤛᤡᤱᤗᤥ. ᤁᤖ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤏᤢ ᤆᤠ᤺ᤳᤆᤠ᤺ᤵᤐᤠ ᤁᤧᤎᤠ᤺ᤶᤛᤡᤱᤗᤥ॥ 28 ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠᤜᤠ᤹ ᤁᤧᤛᤧ᤺ᤵᤋᤢᤛᤡᤖᤥ. ᤁᤖ ᤕᤶᤒᤠ ᤁᤧᤜᤧᤴᤇᤡᤱᤒᤠᤜᤠ᤹ ᤕᤥ ᤁᤧᤎᤠᤛᤢᤛᤡᤖᤥ॥ 29 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤛᤣᤔᤡ᤺ᤸᤗᤧ ᤌᤥ᤹ᤖᤠᤱᤅᤧ᤹ᤀᤥ. ᤀᤠᤏᤡᤱᤘᤠ᤹ᤑᤢᤔᤠᤱᤅᤣ ᤀᤠᤱᤃᤠ᤹ᤀᤥᤒᤠ ᤂᤠᤃᤧᤔᤠᤰᤐᤧᤴ ᤂᤠᤀᤥ᤺ᤳᤗ ᤆᤥᤃᤧ᤹ᤀᤥ॥ 30 ᤂᤧᤏᤧ᤹ ᤁᤧᤓᤠ᤹ᤀᤠᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤱᤔᤡᤜᤠ᤹ ᤏᤠ᤺ᤶᤔᤠ ᤛᤢᤰᤋᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠ᤹ᤀᤠᤒᤠᤸᤗᤧ ᤀᤠᤰᤋᤱᤒᤠ ᤗᤢᤱᤎᤠᤰᤛᤠᤱ ᤁᤠ᤺ᤰᤔᤠ ᤛᤢᤰᤋᤢᤱᤗᤥ॥ 31 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠᤴ ᤐᤠ᤺ᤵᤔᤠᤏᤧ ᤑᤠ᤹ᤃᤪ. ᤁᤢᤗᤠᤶᤔᤡᤴ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤆᤥᤰᤗᤥ. ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤛᤠᤱᤔᤏᤠᤒᤠ ᤛᤠᤶᤔᤩᤠᤱ ᤜᤧᤰᤁᤣ ᤗ᤹ᤖᤥ॥ ᤂᤢᤏᤧ᤹ᤀᤥ ᤀᤡ᤺ᤶᤛᤡᤱᤛᤧ ᤁᤧᤍᤠᤒᤠᤜᤠ᤹ ᤂᤥ᤺ᤸᤗᤧ ᤌᤣ᤺ᤰᤋᤢᤛᤡᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤌᤣ᤺ᤰᤋᤢᤛᤡᤖᤥ॥ 32 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤴᤗᤰ ᤏᤡᤱᤘᤠ᤹ᤑᤢᤔᤠᤱᤗᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤀᤠᤏᤡ᤹ ᤕᤠᤰᤐᤣ᤹ᤖᤥ 33 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ ᤁᤧᤎᤢᤶᤒᤠ ᤀᤠᤛᤧ᤺ᤵᤛᤡᤱᤔᤠᤍᤧᤴᤗᤥ. ᤜᤧᤰᤁᤩᤠᤱ ᤀᤠᤗᤠᤶᤔᤡᤴ ᤁᤢᤗᤡᤱᤍᤥ ᤁᤧᤳᤋᤢᤖᤥ॥ 34 ᤂᤢᤏᤧ᤹ᤀᤣ ᤀᤠᤗᤠᤱᤜᤠ᤹ ᤐᤧ᤺ᤱᤘᤠᤗᤠᤱ ᤁᤢᤀᤡᤛᤡᤰ ᤁᤧᤃᤠᤶᤒᤠ ᤆᤥᤃᤢᤖᤥ. ᤜᤧᤰᤁᤩᤠᤱ ᤌᤠ᤺ᤱ ᤆᤶᤈᤶᤒᤠ ᤋᤧᤴᤏᤥ ᤕᤧᤵᤔᤠ ᤁᤧᤛᤢᤰᤐᤠ ᤆᤥ᤺ᤰᤁᤠ᤹ᤖᤥ॥ 35 ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤁᤧᤗᤡ᤺ᤵᤐᤠ ᤗᤡᤴ ᤕᤠᤱᤔᤠ ᤛᤢᤰᤋᤢᤱᤗ ᤑᤠ᤹ᤀᤠᤱ ᤂᤢᤏᤧ᤹ ᤌᤱ ᤆᤥ᤺ᤰᤔᤠ ᤜᤢ᤹ᤀᤠᤖᤥ॥ 36 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤁᤧᤏᤠᤅᤠᤱᤗᤥ ᤜᤧᤰᤁᤩᤠᤱ ᤁᤧᤛᤧᤴᤗᤐᤪᤧ ᤂᤥ᤺ᤴ ᤁᤧᤒᤡᤖᤠᤱᤗᤥ. ᤂᤧᤏᤧ᤹ ᤁᤧᤓᤠ᤹ᤖᤠᤱ ᤁᤧᤈᤥᤃᤠᤱᤒᤠᤸᤗᤧ ᤆᤥᤃᤢᤸᤗᤧ ᤕᤶᤒᤠ ᤐᤥ᤺ᤰᤂᤠᤱᤗᤥ॥ 37 ᤀᤠᤗᤠᤶᤔᤡᤴ ᤋᤠᤶᤍᤠᤶᤒᤠ ᤁᤧᤈᤥᤃᤢᤖᤥ. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤔᤧᤈᤥ᤺ᤴᤍᤠᤱᤅᤡᤴᤗᤥ॥ 38 ᤀᤠᤏᤡᤱᤔᤡᤜᤠ᤹ ᤏᤠ᤺ᤳᤋᤢᤱᤛᤡᤱᤅᤠᤱ ᤋᤥ᤹ᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤰᤐᤧᤳ ᤔᤧᤶᤔᤧᤱᤛᤡᤱᤅᤣ ᤌᤠᤖᤡᤰ ᤔᤧᤏᤢ᤺ᤱᤅᤠᤴᤗᤥ॥ 39 ᤂᤧᤱᤜᤠ᤹ ᤐᤥ᤺ᤰᤔᤠ ᤔᤧᤴᤇᤢᤰᤔᤏᤠ ᤔᤧᤒᤥ᤺ᤰᤂᤧᤖ ᤌᤠᤖᤡᤰ ᤜᤡᤵᤋᤢᤛᤡᤱᤗᤥ. ᤂᤧᤱᤜᤠ᤹ ᤀᤠᤗᤠᤱ ᤛᤡᤃᤠᤱ ᤆᤡᤸᤗᤧᤰ ᤔᤧᤗᤧᤰᤂᤧᤖᤥ॥ 40 ᤌᤱ ᤆᤥ᤺ᤰᤔᤠᤀᤥ ᤔᤢᤰᤁᤧᤃᤢᤒᤠ ᤁᤧᤈᤥᤃᤠᤱᤗᤥ. ᤜᤧᤰᤁᤩᤠᤱ ᤀᤠᤏᤡᤱᤔᤡᤜᤠ᤹ ᤀᤠᤗᤠᤱᤅᤥ ᤂᤧᤏᤧ᤹ ᤌᤢᤱᤒᤥᤜᤈ᤹ ᤁᤧᤕᤢᤱᤛᤡᤱᤒᤠ ᤁᤧᤈᤥᤃᤢᤛᤡᤖᤥ॥ 41 ᤀᤠᤏᤡᤱᤔᤡᤜᤠ᤹ ᤕᤠᤱᤏᤠ ᤁᤧᤏᤢ᤺ᤱᤒᤠᤀᤠᤱ ᤁᤧᤄᤧᤳᤇᤡᤱᤒᤠ ᤁᤧᤈᤥᤃᤢᤛᤡᤖᤥ. ᤜᤧᤰᤁᤩᤠᤱ ᤀᤠᤏᤡᤱᤔᤡᤜᤠ᤹ ᤔᤧᤰᤂᤢᤱᤛᤡᤱᤗᤥ॥ 42 ᤂᤧᤱᤜᤠ᤹ ᤀᤠᤓᤠ᤹ᤖᤧ ᤑᤠ᤹ᤀᤠᤱ ᤔᤧᤀ᤺ᤰᤋᤧᤖᤥ. ᤁᤖ ᤂᤧᤱᤜᤠ᤹ ᤁᤧᤛᤧ᤺ᤵᤐᤠ ᤜᤠ᤺ᤳᤋᤠᤱ ᤜᤥ᤺ᤵᤋᤧᤖᤥ॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴᤏᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ ᤁᤖ ᤂᤢᤏᤧ᤹ ᤂᤧᤱᤜᤠ᤹ ᤏᤥᤃᤵ ᤔᤧᤒᤡᤖᤢᤴᤛᤡᤴᤗᤥ॥ 43 ᤂᤠᤶᤒᤠᤱᤅᤥᤒᤠ ᤂᤠᤶᤜᤡ᤺ᤰ ᤜᤧᤰᤁᤣ ᤆᤥᤃᤢᤱᤛᤡᤱᤗᤥ. ᤗᤠᤶᤔᤥᤒᤠ ᤗᤧᤰᤘᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤋᤥ᤹ᤖᤢᤱᤛᤡᤱᤗᤥ॥ 44 ᤀᤠᤔᤏᤠᤜᤠ᤹ᤖᤧ ᤔᤧᤓᤳᤋᤠᤱᤅᤡᤸᤗᤧ ᤂᤧᤏᤧ᤹ ᤁᤧᤛᤧ᤺ᤵᤋᤠᤱᤗᤥ. ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠ ᤁᤧᤈᤥᤃᤠᤱᤅᤠᤱ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤠᤛᤡᤱᤅᤡᤴᤒᤠ ᤔᤏᤠᤜᤠ᤹ ᤀᤠᤕᤢᤰᤁᤥ ᤔᤧᤘᤠ᤹ᤖᤥ॥ 45 ᤂᤧᤱᤜᤠ᤹ᤖᤧ ᤀᤠᤀᤡᤱᤈᤠᤱᤅᤡᤴ ᤔᤧᤄᤧᤵᤛᤢᤏᤢᤔᤧ᤺ᤴᤏᤣ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤀᤠᤍᤃᤡ ᤔᤧᤏ᤺ᤶᤛᤡᤱᤗᤥ॥ 46 ᤂᤧᤱᤜᤠ᤹ ᤂᤢᤏᤡ᤹ ᤕᤱᤔᤠ ᤁᤧᤳᤗ ᤆᤥᤃᤢᤛᤡᤱᤗᤥ ᤀᤠᤒᤠᤅᤣ ᤂᤢᤏᤡ᤹ ᤕᤰᤗᤠᤶᤒᤠ ᤁᤡᤔᤠᤸᤗᤧ ᤌᤧᤃᤰᤁᤰ ᤔᤧᤕᤱᤗ ᤔᤧᤗ᤺ᤴᤗᤥ॥ 47 ᤕᤜᤘᤣ ᤍᤠᤱᤒᤠᤴ ᤁᤢᤜᤡᤱᤘᤧᤳ ᤆᤥᤰᤗᤥ॥ ᤀᤠᤕᤠᤰᤐᤣ᤹ᤀᤡᤸᤗᤧ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤐᤥᤖᤖᤥ॥ ᤀᤠᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤠ᤺ᤱᤎᤠ᤺ᤱ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤐᤥᤱᤗᤖᤥ॥ 48 ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤥ. ᤂᤢᤏᤧ᤹ᤀᤣ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤁᤧᤏᤠ᤺ᤶᤒᤠ ᤆᤥ᤺ᤰᤁᤠᤖᤥ. ᤂᤢᤏᤧ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤠᤕᤢᤰᤁᤥ ᤋᤠᤖᤢᤛᤡ ᤐᤡᤀᤠᤖᤥ॥ 49 ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠᤔᤠ ᤔᤧᤓᤠ᤺ᤰᤁᤠᤀᤠᤴᤗᤥ॥ ᤂᤢᤏᤧ᤹ ᤀᤠᤏᤡᤱᤔᤡᤜᤠ᤹ ᤛᤶᤎᤠᤱ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤆᤥ᤺ᤰᤁᤠᤖᤥ. ᤋᤧᤴᤎᤱ ᤁᤣᤈᤥ᤺ᤰᤐᤠᤜᤠ᤹ᤗᤠᤶ ᤁᤧᤛᤧ᤺ᤵᤐᤠᤖᤥ॥ 50 ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤀᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥ ᤁᤧᤏᤠᤖᤠ ᤑᤥᤛᤢᤱᤗᤥ. ᤜᤧᤰᤁᤩᤠᤱ ᤛᤠᤶᤗᤥᤀᤠᤖ ᤁᤧᤏᤠᤖᤠ ᤑᤥᤛᤢᤱᤗᤥ॥ 51 ᤂᤢᤏᤧ᤹ ᤁᤢᤜᤠᤱᤅᤡᤴ ᤐᤕᤶ ᤕᤶᤒᤠ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤛᤣ᤺ᤴᤍᤢᤒᤠ ᤍᤠᤀᤢᤍ ᤜᤠᤱᤅᤡᤴ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤛᤍᤠᤍᤡᤱ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.