᥈ ᤛᤠᤔᤢᤀᤧᤗ 21 - LIFOTNT

ᤃᤡᤒᤥᤏᤡᤜᤠ᤹ ᤏᤢ ᤛᤠᤘᤗᤖᤧ ᤁᤢᤜᤡᤶᤛᤕᤱ

¹ ᤍᤠᤀᤢᤍᤖᤧ ᤋᤱᤒᤣ᤹ ᤛᤢᤶᤛᤡ ᤜᤠᤱ ᤆᤥᤃᤢᤒᤠ ᤕᤧᤶᤔᤥ ᤛᤠ᤹ᤖᤡᤰ ᤁᤧᤈᤠ᤹ᤒᤠ ᤛᤠᤰ ᤐᤥᤃᤧ॥ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤍᤥᤛᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴ ᤔᤧᤳᤋᤢ. “ᤛᤠᤘᤗ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ ᤔᤏᤠ ᤁᤧᤛᤧᤵᤐᤠ ᤔᤧᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤃᤡᤒᤥᤏᤡᤜᤠ᤹ ᤔᤧᤛᤧᤖᤢᤛᤡ॥ ᤂᤧᤸᤗᤧᤆᤥᤃᤢᤸᤗᤧ ᤛᤠᤰ ᤐᤥᤃᤧᤀᤠᤱ ᤘᤠ᤹॥”

² (ᤃᤡᤒᤥᤏᤡᤜᤠ᤹ ᤀᤡᤛᤪᤠᤀᤡᤗᤡ ᤛᤢᤘᤠᤱᤒᤠ ᤔᤧᤜᤥ᤺ᤵᤋᤧ॥ ᤂᤧᤱᤜᤠ᤹ ᤀᤣᤔᤥᤖᤡ ᤛᤢᤘᤠᤱᤗᤠᤶᤒᤠ ᤗᤳᤇᤠ ᤗᤰ ᤔᤧᤘᤕᤧ. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤛᤧᤳᤋᤠᤛᤡᤃᤧᤴ ᤔᤧᤔᤧᤳᤋᤢᤛᤡᤀᤠᤱ ᤔᤠᤱᤜᤧᤰ ᤔᤧᤈᤥᤃᤢᤀᤠᤱ ᤔᤧᤘᤕᤧ॥ ᤜᤧᤰᤁᤣᤛᤠᤱ ᤛᤠᤘᤗᤖᤧ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤖᤧ ᤗᤠᤃᤡ ᤁᤢᤛᤡᤰᤛᤔᤧᤒᤠᤸᤗᤧ ᤆᤥᤃᤢᤸᤗᤧ ᤃᤡᤒᤥᤏᤡᤜᤠ᤹ ᤛᤧᤵᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤕᤧ॥) ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍ ᤜᤠᤱᤅᤡᤸᤗᤧ ᤃᤡᤒᤥᤏᤡᤜᤠ᤹ ᤀᤢ᤺ᤳᤋᤢᤛᤡ.

³ ᤜᤧᤰᤁᤩᤠᤱ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤂᤡᤏᤡ᤹ ᤗᤠᤃᤡ ᤌᤣ ᤆᤥᤃᤢᤱᤒᤠᤒᤣ᥅ ᤂᤡᤏᤡ᤹ ᤔᤧᤴᤘᤠ᤹ᤔᤏᤠ ᤁᤧᤶᤔᤧᤳᤋᤡᤒᤠᤸᤗᤧ ᤁᤢᤗᤧᤰᤘᤠ ᤂᤡᤏᤡ᤹ ᤗᤠᤃᤡ ᤀᤠᤱᤃᤠ᤹ ᤌᤣ ᤏᤢᤒᤠ ᤆᤥ᤺ᤰᤔᤠ ᤛᤢᤰᤋᤢᤱᤒᤣ᥅ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤂᤡᤏᤡ᤹ ᤜᤠᤱᤘᤠᤔᤢ᤹ᤀᤡ ᤐᤡᤔᤠ ᤁᤧᤛᤢᤰᤋᤢᤶᤛᤡᤶᤗ॥”

⁴ ᤃᤡᤒᤥᤏᤡᤜᤠ᤹ᤖᤧ ᤔᤧᤔᤧᤳᤋᤢ. “ᤛᤠᤘᤗ ᤜᤧᤰᤁᤩᤠᤱ ᤁᤢᤜᤡᤶᤛᤕᤱᤜᤠ᤹ᤏᤢ ᤀᤠᤏᤡᤃᤣ ᤂᤧᤔᤠ᤹ᤀᤡᤴ ᤛᤠᤶᤔᤩᤠᤱ ᤕᤢᤵᤐᤠᤖᤧ ᤋᤱᤔᤠ ᤀᤠᤏᤡᤃᤣ ᤕᤢᤰ ᤔᤧᤃᤳᤋᤢᤶᤒᤧᤴ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤛᤧᤵᤔᤠᤛᤡ ᤕᤢᤰᤁᤠᤱ ᤔᤧᤃᤳᤋᤢᤶᤒᤧᤴ॥” ᤂᤧᤒᤩᤠᤱ ᤍᤠᤀᤢᤍᤖᤧ ᤛᤣ᤺ᤴᤍᤥᤛᤢ. “ᤜᤧᤰᤁᤣᤃᤪ ᤀᤠᤱᤃᤠ᤹ ᤂᤡᤏᤡ᤹ ᤗᤠᤃᤡ ᤌᤣ ᤆᤥᤃᤢᤱᤒᤠᤒᤣ᥅”

⁵ ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤔᤧᤔᤧᤳᤋᤢ. “ᤛᤠᤘᤗᤖᤧ ᤀᤠᤏᤡᤃᤣ ᤔᤧᤱᤔᤠ ᤁᤥ᤺ᤳᤋᤡᤃᤧ ᤜᤧᤰᤁᤣ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤗᤠᤈᤣ᤹ᤀᤥ ᤀᤠᤳᤋᤠᤴᤏᤠᤱ ᤀᤠᤏᤡᤃᤣ ᤕᤢᤱᤔᤠᤍᤧᤴ ᤔᤧᤏᤧᤏᤧᤴ.

⁶ ᤂᤧᤴ ᤔᤏᤠ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤀᤥᤒᤠ ᤏᤢᤛᤡ ᤕᤧᤶᤒᤡᤳᤇᤠᤜᤠ᤹ ᤀᤠᤏᤡᤃᤣ ᤜᤢᤰ ᤀᤠᤛᤢᤵᤋᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤛᤠᤘᤗ ᤜᤠᤱᤅᤡᤸᤗᤧ ᤁᤢᤕᤧᤰᤕᤰ ᤃᤡᤒᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤱᤜᤠ᤹ ᤛᤧᤖᤢᤶᤛᤡᤶᤒᤧᤀᤠᤱ ᤋᤡ᤺ᤰᤛᤢᤶ ᤑᤳᤇᤢᤶᤛᤡᤶᤒᤧ॥” ᤜᤠᤱᤅᤡᤸᤗᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤁᤥ ᤐᤡᤏᤡᤱ᤹॥”

⁷ ᤍᤠᤀᤢᤍ ᤏᤢ ᤈᤥᤏᤠᤌᤠᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤠᤱᤜᤧᤰ ᤆᤥᤃᤧᤛᤢᤀᤠᤱ ᤘᤕᤧᤛᤡᤒᤠᤸᤗᤧ ᤆᤥᤃᤢᤸᤗᤧ ᤍᤠᤀᤢᤍᤧᤸᤗᤧ ᤛᤠᤘᤗᤖᤧ ᤁᤢᤶᤔᤧᤴᤇᤠ᤹ ᤈᤥᤏᤠᤌᤠᤏᤖᤧ ᤁᤢᤛ᤻ᤛᤠ ᤔᤐᤡᤒᤥᤛᤣᤋᤧᤴ ᤋᤠᤱᤄᤢ ᤕᤢᤰᤂᤢ॥

⁸ ᤁᤖ ᤀᤠᤕᤩᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤖᤡᤛ᤻ᤐᤠ᤺ᤸᤗᤧ ᤛᤠᤘᤗᤗᤠᤶᤒᤠ ᤁᤳᤋᤢᤛᤡᤒᤠ ᤏᤧᤵᤑᤢ ᤁᤢᤛ᤻ᤛᤠ ᤀᤠᤖᤔᤥᤏᤡ ᤏᤢ ᤔᤐᤡᤒᤥᤛᤣᤋᤧᤴ ᤜᤠᤱᤅᤡᤸᤗᤧ ᤐᤡᤖᤢᤛᤡ॥ ᤖᤡᤛ᤻ᤐᤠᤴ ᤀᤠᤕᤩᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤛᤠᤘᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤣᤖᤠᤒᤖᤧ ᤔᤜᤥᤗᤠᤋᤡ ᤒᤷᤈᤡᤗᤤᤖᤧ ᤁᤢᤛ᤻ᤛᤠ ᤀᤍᤪᤡᤀᤣᤗᤗᤠᤶᤒᤠ ᤁᤳᤋᤢᤛᤡᤒᤠ ᤅᤠᤛᤡ ᤁᤢᤛ᤻ᤛᤠᤜᤠ᤹ ᤐᤡᤖᤢᤛᤡ॥

⁹ ᤍᤠᤀᤢᤍᤖᤧ ᤃᤡᤒᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤥ᤺ᤰᤔᤠᤀᤥ ᤔᤧᤍᤡ᤺ᤰᤂᤢᤛᤡᤀᤠᤱ ᤔᤧᤓᤥ᤺ᤴᤍᤢᤛᤡ॥ ᤂᤧᤴ ᤏᤢᤛᤡᤀᤣ ᤌᤡᤰᤗᤧᤱᤔᤠᤸᤗᤧ ᤛᤥᤖᤡᤰ ᤜ᤺ᤰᤛᤡ ᤋᤢᤵᤔᤠ ᤜᤣ᤺ᤰᤔᤠ ᤕᤧᤶᤔᤥ ᤔᤧᤛᤧᤖᤢᤛᤡ॥

¹⁰ ᤜᤧᤰᤁᤩᤠᤱ ᤀᤕᤩᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤖᤡᤛ᤻ᤐᤠ᤺ᤸᤗᤧ ᤛᤃᤡᤋᤣᤳᤋᤡᤴ ᤛᤡ ᤋᤢᤵᤔᤠ ᤕᤧᤶᤔᤠᤱᤎᤥ ᤋᤠᤱᤛᤠᤰᤐᤠᤗᤠᤶ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤥ ᤆᤫᤠ᤺ᤳ ᤔᤧᤴᤎᤠᤎᤠᤖᤡᤰ ᤗᤢᤱ ᤛᤶᤎᤠᤱ ᤂᤡᤱᤄᤢ ᤑᤳᤇᤢ॥ ᤜᤧᤰᤁᤩᤠᤱ ᤗᤧᤴᤍᤡᤰ ᤋᤠᤱᤛᤠᤰᤐᤥ ᤁᤧᤒᤧᤒᤠ ᤐᤢᤜᤠ᤹ ᤂᤧᤴ ᤁᤧᤛᤡᤒᤠ ᤌᤰᤁᤡᤴ ᤆᤠᤔᤠ ᤔᤧᤓᤠ᤺ᤰᤋᤢᤛᤡᤴ ᤜᤧᤰᤁᤩᤠᤱ ᤛᤧᤴᤍᤡᤰ ᤋᤠᤶᤓᤢᤱ ᤌᤰᤛᤠᤜᤠ᤹ ᤂᤧᤴ ᤁᤧᤛᤡᤒᤠ ᤌᤰᤁᤡᤴ ᤆᤠᤔᤠ ᤔᤧᤓᤠ᤺ᤰᤋᤢᤛᤡᤴ॥

¹¹ ᤛᤠᤘᤗᤖᤧ ᤁᤢᤔᤣᤳ ᤐᤠ᤺ᤰᤔᤠ ᤀᤕᤩᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤖᤡᤛ᤻ᤐᤠ᤺ᤸᤗᤧ ᤆᤥᤃᤢᤒᤠ ᤐᤠ᤺ᤴᤏᤡᤴ ᤍᤠᤀᤢᤍᤧᤴ ᤔᤧᤈᤧᤰᤋᤢ.

¹² ᤂᤧᤒᤩᤠᤱ ᤁᤴ ᤐᤠ᤺ᤴᤏᤡᤴ ᤍᤠᤀᤢᤍᤖᤧ ᤂᤧᤵᤛᤢᤀᤠᤱ ᤛᤠᤘᤗ ᤏᤢ ᤁᤢᤛ᤻ᤛᤠ ᤈᤥᤏᤠᤌᤠᤏᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤕᤠᤒᤣᤛ ᤃᤡᤗᤠᤍᤒᤠ ᤔᤏᤠᤜᤠ᤹ᤗᤠᤶ ᤋᤠᤖᤢ॥ (ᤃᤡᤸᤒᤥ ᤁᤥ᤺ᤰᤔᤠᤀᤥ ᤐᤗᤡᤛ᤻ᤋᤡᤜᤠ᤹ᤖᤧ ᤛᤠᤘᤗᤧᤴ ᤏᤢ ᤈᤥᤏᤠᤌᤠᤏᤧᤴ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤒᤣᤌ-ᤛᤠᤴᤒᤠ ᤔᤏᤠ ᤆᤢᤶᤔᤠᤍᤧᤴᤏᤥ ᤐᤗᤡᤛ᤻ᤋᤡᤜᤠ᤹ᤖᤧ ᤔᤧᤍᤡ᤺ᤰᤛᤢ ᤔᤧᤓᤳᤇᤢᤛᤡᤒᤠ ᤂᤧᤴ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤡᤴ ᤕᤠᤒᤣᤛ ᤃᤡᤗᤡᤕᤠᤍᤒᤠ ᤔᤏᤠᤜᤠ᤹ᤖᤧ ᤔᤧᤄᤢ᤺ᤳᤋᤢ ᤔᤧᤍᤣ᤹ᤖᤢ॥)

¹³ ᤜᤧᤰᤁᤩᤠᤱ ᤛᤠᤘᤗ ᤏᤢ ᤈᤥᤏᤠᤌᤠᤏᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤋᤠᤖᤢ. ᤂᤧᤒᤩᤠᤱ ᤔᤧᤓᤥ᤺ᤴᤍᤢᤛᤡᤀᤠᤱ ᤔᤧᤛᤧᤖᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤛᤢᤶᤔᤠ ᤐᤠᤱᤄᤢᤛᤡ॥

¹⁴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤠᤘᤗ ᤏᤢ ᤁᤢᤛ᤻ᤛᤠ ᤈᤥᤏᤠᤌᤠᤏᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤒᤡᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤒᤠ ᤕᤧᤰᤕᤰ ᤛᤗᤠ ᤔᤧᤵᤏᤠᤒᤠ ᤋᤧᤴᤏᤥ ᤛᤠᤘᤗᤖᤧ ᤁᤢᤶᤒᤠ ᤁᤡᤛᤖᤧ ᤁᤢᤀᤡᤐᤢᤱᤅᤥ ᤔᤧᤗᤢᤵᤋᤢ॥ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤌᤣ ᤆᤥᤃᤠᤶᤔᤧ᤹ ᤔᤧᤳᤋᤢᤛᤡᤀᤠᤱ ᤘᤕᤧ. ᤂᤧᤴ ᤁᤧᤖᤧᤰ ᤂᤧᤱᤜᤠ᤹ᤖᤧ ᤔᤧᤈᤥᤃᤢ॥ ᤂᤧᤴ ᤀᤣᤃᤠᤱ ᤗᤠᤈᤣ᤺ᤸᤗᤧ ᤁᤢᤗᤠᤃᤡ ᤔᤧᤓᤠᤰᤋᤢᤒᤠ ᤐᤣᤗᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤛᤢᤖᤥ॥

ᤐᤗᤡᤛ᤻ᤋᤡᤜᤠ᤹ᤏᤢ ᤋᤧᤴᤎᤱ

¹⁵ ᤕᤠᤶᤔᤥ ᤐᤗᤡᤛ᤻ᤋᤡ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤌᤱ ᤐᤥᤱᤔᤠ ᤜᤣ᤺ᤰᤋᤧ॥ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤌᤱ ᤆᤥ᤺ᤰᤛᤧ ᤕᤥ ᤔᤧᤎᤩᤧ. ᤁᤖ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥ᤺ᤰᤏᤢ ᤕᤠᤃᤧᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤏᤠᤛᤧ॥

¹⁶ ᤜᤧᤰᤁᤩᤠᤱ ᤖᤑᤠᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤀᤥ ᤗᤳᤇᤠ ᤀᤡᤛᤫᤡ ᤒᤏᤥᤒ ᤔᤧᤵᤔᤏᤠᤒᤠᤎᤡᤰ ᤘᤕᤧ. ᤂᤧᤸᤗᤧ ᤁᤡᤵ ᤛᤢᤶᤛᤡ ᤛᤣᤁᤣᤗ ᤕᤠᤖᤡᤰ ᤁᤧᤗᤡ᤺ᤵᤐᤠ ᤗᤠ᤺ᤰ ᤁᤳᤋᤢ. ᤂᤧᤸᤗᤧ ᤋᤠᤓᤣᤴ ᤜᤣᤛᤢᤀᤠᤱ ᤐᤳᤇᤧ. ᤂᤧᤸᤗᤧ ᤍᤠᤀᤢᤍᤧᤴ ᤛᤧᤖᤢᤱ ᤐᤠ᤺ᤳᤋᤢᤀᤠᤱ ᤘᤕᤧ॥

¹⁷ ᤁᤖ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤀᤒᤡᤛᤤᤴ ᤍᤠᤀᤢᤍᤧᤸᤗᤧ ᤁᤢᤓᤠ᤹ᤛᤧ ᤋᤩᤧ॥ ᤂᤧᤸᤗᤧ ᤐᤗᤡᤛ᤻ᤋᤡᤎᤡᤰ ᤜᤡᤵᤋᤢᤛᤧᤖᤢ॥ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ᤖᤧ ᤔᤠᤱᤔᤧᤜᤧᤰᤛᤡᤱᤗ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤠ ᤀᤠᤓᤠᤸᤗᤧᤀᤠᤱ ᤌᤱᤅᤥ ᤀᤠᤏᤡᤃᤧᤏᤢ ᤁᤧᤶᤒᤣ᤺ᤰᤏᤧᤴ. ᤁᤧᤒᤣ᤺ᤰᤏᤧᤓᤃᤪ ᤀᤡᤛᤪᤠᤀᤡᤗ ᤁᤧᤎᤥ᤹ᤒᤠ ᤜᤠᤱᤅᤡᤴ ᤛᤡ᤹᤺॥”

¹⁸ ᤂᤧᤴ ᤀᤣᤃᤠᤱ ᤕᤠᤶᤔᤥᤀᤠᤱ ᤃᤥᤒ ᤔᤧᤵᤏᤠᤍᤧᤴᤏᤥ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤐᤥ᤺ᤰᤂᤧ॥ ᤂᤧᤴ ᤕᤧᤶᤔᤥ ᤜᤢᤛᤠᤋᤡ ᤛᤡᤒ᤻ᤒᤁᤤ᤺ᤸᤗᤧ ᤖᤑᤠᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤛᤑ ᤔᤧᤵᤏᤠᤒᤧᤴ ᤛᤧᤖᤢ॥

¹⁹ ᤃᤥᤒ ᤔᤧᤵᤔᤏᤠᤒᤠᤍᤧᤴᤏᤥ ᤐᤗᤡᤛ᤻ᤋᤡᤜᤠ᤹ᤏᤢ ᤘᤣ᤹ ᤌᤱᤅᤥ ᤒᤣᤌᤗᤧᤜᤧᤔᤒᤠ ᤕᤠᤖᤧᤸᤗᤧ ᤁᤢᤛ᤻ᤛᤠ ᤀᤣᤸᤜᤠᤏᤠᤏᤖᤧ ᤃᤡᤳᤋᤡ ᤃᤥᤗᤩᤠᤋᤧᤴ ᤛᤧᤖᤢ. ᤂᤧᤸᤗᤧ ᤁᤢᤗᤠ᤺ᤰᤁᤡᤸᤗᤧ ᤁᤢᤗᤠ᤺ᤴ ᤌᤠᤰ ᤁᤡᤵᤔᤠ ᤛᤡᤱᤗ᤺ᤱᤛᤠ ᤕᤠ᤺ᤵᤐᤠ ᤆᤥᤃᤧ॥

²⁰ ᤜᤧᤰᤁᤩᤠᤱ ᤃᤠᤋ ᤔᤧᤵᤏᤠᤒᤠᤍᤧᤴᤏᤥ ᤘᤣ᤹ ᤗᤳᤇᤠ ᤌᤱᤅᤥ ᤋᤢᤰᤛᤡ ᤋᤢᤰᤛᤡ ᤁᤢᤜᤢᤰᤆᤥᤰ ᤏᤢ ᤋᤢᤰᤛᤡ ᤋᤢᤰᤛᤡ ᤁᤢᤗᤠᤱᤈᤥᤰ ᤁᤧᤒᤵᤐᤠ ᤁᤧᤖᤧᤰᤗᤧ ᤏᤡᤒᤥᤱᤅᤠᤱ ᤗᤡᤛᤡ ᤁᤢᤜᤢᤰᤆᤥ ᤁᤢᤗᤠᤱᤈᤥ ᤕᤶᤒᤠ ᤜᤥᤖᤢ ᤔᤏᤠᤎᤡᤰ ᤌᤠ᤺ᤶᤛᤡᤱ॥ ᤂᤧᤴᤏᤠᤱ ᤖᤑᤠᤖᤧ ᤁᤢᤎᤠ᤺ᤰᤐᤠ ᤘᤕᤧ॥

²¹ ᤂᤧᤸᤗᤧ ᤀᤡᤛᤪᤠᤀᤡᤗᤧᤴ ᤛᤠ᤺ᤳᤋᤢ ᤂᤧᤒᤩᤠᤱ ᤍᤠᤀᤢᤍᤖᤧ ᤁᤢᤶᤓᤢ᤹ ᤛᤡᤔᤣᤀᤖᤧ ᤁᤢᤛ᤻ᤛᤠ ᤈᤥᤏᤠᤌᤏᤧᤸᤗᤧ ᤂᤧᤴ ᤛᤩᤧᤖᤢ॥

²² ᤃᤠᤋ ᤁᤧᤕᤢᤱᤒᤠ ᤁᤴ ᤗᤡᤛᤡ ᤔᤏᤠᤜᤠ᤹ ᤖᤑᤠᤖᤧ ᤁᤢᤛᤢᤘᤠᤱᤒᤠ ᤔᤧᤘᤕᤧ. ᤜᤧᤰᤁᤩᤠᤱ ᤁᤴᤜᤠ᤹ ᤂᤰᤐᤧᤳ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤗᤠᤶ ᤔᤧᤛᤩᤧᤖᤢᤛᤡᤖᤥ॥