᥈ ᤛᤠᤔᤢᤀᤧᤗ 20 - LIFOTNTᤛᤣᤒᤠᤴ ᤍᤠᤀᤢᤍᤖᤧ ᤁᤢᤍᤰᤗᤧᤱᤘᤠᤀᤥ ᤐᤥᤰ 1 ᤂᤧᤵᤔᤥ ᤛᤣᤒᤠ ᤔᤧᤵᤏᤠᤒᤠ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤎᤡᤰ ᤘᤕᤧ. ᤂᤢᤏᤧ᤹ ᤒᤣᤏᤩᤠᤔᤡᤏ ᤒᤡᤁᤪᤡ ᤔᤧᤵᤏᤠᤒᤧᤸᤗᤧ ᤁᤢᤛ᤻ᤛᤠ ᤘᤕᤧ॥ ᤂᤧᤸᤗᤧ ᤛᤠᤍᤠᤱᤅᤡᤴ ᤔᤢᤰᤂᤢ. ᤜᤧᤰᤁᤩᤠᤱ ᤀ᤺ᤰᤋᤧᤖ ᤐᤠ᤺ᤳᤋᤢ. “ᤍᤠᤀᤢᤍᤀᤥ ᤀᤠᤏᤡ᤹ ᤌᤧᤔᤠ ᤗᤰ ᤘᤠ᤹ᤒᤣ᥅ ᤕᤡᤛᤤᤖᤧ ᤁᤢᤛ᤻ᤛᤠ᤺ᤸᤗᤥ ᤀᤠᤏᤡ᤹ ᤌᤣᤀᤠᤱ ᤕᤢᤰ ᤀᤠᤱᤃᤳᤋᤢᤶᤔᤡᤴ᥄ ᤀᤡᤛᤪᤠᤀᤡᤗᤡᤛᤣ ᤂᤡᤏᤡ᤹ ᤀᤠᤒᤠᤅᤣ ᤜᤡᤶᤜᤡᤶ ᤐᤣᤃᤧᤶᤔᤧ᤹᥄” 2 ᤂᤧᤸᤗᤧᤆᤥᤃᤢᤸᤗᤧ ᤒᤡᤁᤪᤡᤖᤧ ᤁᤢᤛ᤻ᤛᤠ ᤛᤣᤒᤠ᤺ᤸᤗᤧ ᤁᤢᤀᤣᤃᤠᤱ ᤐᤣ᤺ᤰᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤍᤠᤀᤢᤍᤧᤴ ᤔᤧᤗᤧᤖᤢ. ᤁᤖ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤍᤠᤀᤢᤍᤧᤴ ᤔᤧᤸᤗᤧᤖᤢᤴ. ᤜᤧᤰᤁᤩᤠᤱ ᤕᤷᤍᤏ ᤕᤱᤄᤱᤗᤠᤶ ᤕᤖᤢᤛᤗᤧᤔ ᤌᤠᤖᤡᤰ ᤍᤠᤀᤢᤍᤧᤴ ᤔᤧᤍᤡ᤺ᤰᤋᤢᤀᤠᤱ ᤔᤧᤒᤣ॥ 3 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤀᤠᤒᤠᤅᤣ ᤜᤠᤱᤜᤡᤶ ᤕᤖᤢᤛᤗᤧᤔ ᤋᤩᤧ. ᤂᤧᤒᤩᤠᤱ ᤜᤠᤱᤜᤡᤶ ᤁᤥᤛᤧ ᤕᤢᤰᤂᤢᤛᤡᤒᤠ ᤌᤡᤒᤥᤱ ᤁᤢᤔᤣᤳ ᤐᤠ᤺ᤰᤔᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤁᤧᤃᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤶᤒᤪᤠᤱᤅᤥ ᤕᤢᤰᤂᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ ᤁᤖ ᤂᤧᤱᤜᤠ᤹ᤏᤢ ᤀᤡᤶᤛᤧ ᤔᤧᤒᤣᤏᤧᤴ॥ ᤀᤰᤂᤣᤗ᤹ᤖᤡᤰ ᤂᤢᤴᤇᤡ᤹ ᤛᤡᤛᤡ ᤌᤠᤖᤡᤰᤛᤠᤱ ᤂᤧᤱᤜᤠ᤹ ᤛᤠᤰᤋᤢᤛᤡᤀᤠᤱ ᤕᤢᤰᤂᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤕᤧᤶᤒᤠ ᤁᤧᤛᤡᤒᤠ ᤔᤣᤔᤣᤍᤢᤔᤠ ᤁᤢᤀᤡᤛᤡᤰ ᤔᤧᤕᤢᤅᤧ॥ 4 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤀᤔᤠᤛᤠᤴ ᤔᤧᤳᤋᤢ. “ᤕᤜᤢᤍᤠᤒᤠ ᤔᤏᤠᤜᤠ᤹ ᤛᤢᤵᤛᤧᤛᤧ᤹. ᤜᤧᤰᤁᤩᤠᤱ ᤛᤢᤔᤩᤧᤴᤗᤧᤛᤠ ᤂᤧᤏᤧ᤹ᤏᤢ ᤛᤥᤖᤡᤰ ᤀᤠᤱᤃᤠ᤹ᤀᤥ ᤋᤠᤖᤧᤛᤧ᤹॥” 5 ᤀᤔᤠᤛᤠᤴ ᤕᤜᤢᤍᤠᤒᤠ ᤔᤏᤠᤜᤠ᤹ ᤛᤢᤶᤛᤧ ᤐᤣ. ᤁᤖ ᤜᤠᤱᤅᤡᤸᤗᤧ ᤐᤡᤖᤢᤒᤠ ᤕᤧᤶᤔᤡᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤕᤧᤶ ᤋᤣᤛᤢ॥ 6 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤀᤒᤡᤛᤤᤴ ᤔᤧᤳᤋᤢ. “ᤒᤡᤁᤪᤡᤖᤧ ᤁᤢᤛ᤻ᤛᤠ ᤛᤣᤒᤠ᤺ᤸᤗᤧᤃ ᤀᤠᤏᤡ᤹ ᤀᤒ᤻ᤛᤠᤗᤥᤔᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤢᤰᤂᤣ ᤀᤠᤈᤠᤳ॥ ᤂᤧᤏᤧ᤹ ᤁᤧᤴᤍᤠᤱᤒᤠᤸᤗᤧ ᤁᤢᤔᤏᤠᤜᤠ᤹ ᤋᤣ᤹ᤖᤧᤛᤧ᤹ᤀᤠᤱ ᤏᤧᤳᤋᤢ᤹. ᤔᤣ᤺ᤴᤏᤧᤓᤠᤃᤪ ᤂᤧᤴ ᤗᤢᤱᤎᤠᤰ ᤛᤧᤵᤔᤏᤠᤒᤠ ᤕᤧᤰᤕᤰ ᤛᤡᤃᤠᤱ ᤗᤠ᤺ᤳᤋᤠᤱ ᤀᤠᤏᤡ᤹ ᤜᤢᤰᤁᤥ ᤔᤧᤎᤠᤏᤧᤴ॥” 7 ᤂᤧᤸᤗᤧᤆᤥᤃᤢᤸᤗᤧ ᤕᤥᤀᤠᤒᤖᤧ ᤁᤢᤔᤏᤠᤜᤠ᤹. ᤜᤧᤰᤁᤩᤠᤱ ᤁᤖᤣᤋᤡ ᤏᤢ ᤐᤣᤗᤣᤌᤡ ᤜᤧᤰᤁᤩᤠᤱ ᤁᤧᤖᤧᤰ ᤌᤱ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤀᤒᤡᤛᤤᤴᤏᤢ ᤔᤧᤒᤣ॥ ᤂᤧᤱᤜᤠ᤹ ᤒᤡᤁᤪᤡᤖᤧ ᤁᤢᤛ᤻ᤛᤠ ᤛᤣᤒᤠᤴ ᤏᤠ᤺ᤳᤇᤧ ᤕᤖᤢᤛᤗᤧᤔᤗᤠᤶ ᤔᤧᤎᤠᤛᤡᤱ॥ 8 ᤂᤧᤱᤜᤠ᤹ ᤃᤡᤒᤥᤏ ᤁᤢᤒᤣᤛᤠᤱᤒᤠ ᤕᤶᤒᤠ ᤗᤢᤱᤅᤥ ᤔᤧᤃᤧᤖᤧᤸᤗᤧ ᤀᤔᤠᤛᤠᤴ ᤂᤧᤱᤜᤠ᤹ᤖᤧ ᤁᤢᤍᤢᤶᤛᤧ ᤋᤩᤧ॥ ᤂᤧᤴ ᤕᤧᤶᤔᤥ ᤕᤥᤀᤠᤒᤖᤧ ᤌᤱ ᤆᤥ᤺ᤰᤔᤧᤸᤗᤧ ᤆᤠᤱᤔᤏᤠᤒᤠ ᤋᤣᤳ ᤆᤠᤰᤂᤢᤀᤠᤱ ᤘᤕᤧ. ᤂᤧᤒᤩᤠᤱ ᤑ᤹ᤀᤡ ᤕᤢᤵᤛᤢᤀᤠᤱ ᤋᤠᤓᤣ ᤜᤣ᤹ᤛᤡᤱᤅᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤋᤃᤡ ᤐᤣᤖ ᤐᤳᤇᤧᤸᤗᤧ ᤁᤢᤍᤠᤓᤣᤴ ᤔᤰᤌᤩᤧ॥ 9 ᤜᤧᤰᤁᤩᤠᤱ ᤕᤥᤀᤠᤒᤖᤧ ᤀᤔᤠᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤢ᤹ᤖ ᤁᤧᤘᤠ᤹ᤒᤡ ᤀᤠᤴᤛᤠ᤹ᤀᤣ॥” ᤜᤧᤰᤁᤩᤠᤱ ᤂᤢᤏᤧ᤹ ᤀᤔᤠᤛᤠᤴ ᤆᤢᤵ ᤔᤧᤳᤇᤧ ᤂᤢᤏᤧ᤹ ᤁᤢᤈᤢᤰᤘᤠ ᤜᤢᤰᤁᤡᤸᤗᤧ ᤀᤔᤠᤛᤠ᤺ᤸᤗᤧ ᤁᤢᤶᤎᤥ᤹ᤀᤡᤴ ᤋᤧᤶᤛᤢ॥ 10 ᤀᤔᤠᤛᤠ᤺ᤸᤗᤧ ᤕᤥᤀᤠᤒᤖᤧ ᤁᤢᤜᤢᤰᤁᤥ ᤋᤠᤓᤣᤴ ᤐᤳᤇᤧᤒᤠ ᤔᤧᤏᤡᤛᤢᤴ॥ ᤜᤧᤰᤁᤩᤠᤱ ᤕᤥᤀᤠᤒᤖᤧ ᤂᤧᤸᤗᤧ ᤁᤢᤛᤠᤵᤐᤥ᤺ᤰᤁᤥ ᤌᤢᤒᤢ ᤐᤡᤖᤢ. ᤏᤡᤗᤧᤱ ᤔᤧᤎᤢᤒᤢᤴ. ᤌᤡᤰᤗᤧᤱ ᤌᤢᤒᤢᤸᤗᤧᤛᤠ ᤁᤢᤜᤡᤍᤢ᤺ᤳᤋᤧᤴ ᤂᤠᤶᤒᤠᤱᤅᤥ ᤔᤰᤌᤩᤧᤀᤠᤱ ᤂᤧᤴ ᤛᤩᤧ॥ ᤜᤧᤰᤁᤩᤠᤱ ᤕᤥᤀᤠᤒᤧᤴ ᤏᤢ ᤁᤢᤴᤛᤠ᤹ ᤀᤒᤡᤛᤤ᤺ᤸᤗᤧ ᤒᤡᤁᤪᤡᤖᤧ ᤁᤢᤛ᤻ᤛᤠ ᤛᤣᤒᤠᤴ ᤏᤠ᤺ᤳᤋᤢᤛᤡᤖ ᤐᤣᤛᤡ॥ 11 ᤕᤥᤀᤠᤒᤖᤧ ᤁᤢᤔᤏᤠᤜᤠ᤹ᤀᤥ ᤌᤡᤰᤁᤡᤸᤗᤧ ᤁᤧᤛᤡᤒᤠ ᤀᤔᤠᤛᤠ᤺ᤸᤗᤧ ᤁᤢᤒᤣᤛᤠᤱ ᤕᤧᤶᤛᤡᤱᤅᤠᤱ ᤐᤠ᤺ᤳᤋᤢ. “ᤕᤥᤀᤠᤒ ᤏᤢ ᤍᤠᤀᤢᤍ ᤗᤧᤵᤔᤠᤱ ᤁᤧᤘᤠ᤹ᤒᤠ ᤁᤧᤖᤧᤰᤗᤧ ᤕᤥᤀᤠᤒᤧᤴ ᤋᤡᤶᤍᤧᤶᤔᤧ᤹॥” 12 ᤀᤔᤠᤛᤠ᤺ᤸᤗᤧ ᤁᤧᤛᤡᤒᤠ ᤁᤢᤎᤰᤁᤡᤴ ᤔᤠᤰᤂᤡ᤹ ᤘᤈᤧ᤺ᤰ ᤏᤡᤒᤧᤀᤠᤱ ᤗᤠᤶᤔᤡᤸᤗᤧ ᤁᤢᤗᤢᤶᤔᤥ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤴ ᤗᤠᤶ ᤁᤧᤒᤥᤱᤒᤠᤀᤠᤱ ᤗᤠᤱᤃᤧᤄᤣ᤺ᤰᤐᤠ ᤁᤧᤖᤧᤰ ᤂᤧᤵᤔᤥ ᤔᤧᤃᤧᤖᤧᤀᤠᤱ ᤔᤧᤕᤧᤶᤛᤡᤱᤒᤠ ᤕᤥᤀᤠᤒᤖᤧ ᤁᤢᤔᤏᤠᤎᤡᤰᤗᤧ ᤏᤡᤛᤢ॥ ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤀᤔᤠᤛᤠ᤺ᤸᤗᤧ ᤁᤢᤎᤰᤁᤡᤴ ᤗᤠᤶᤔᤡᤸᤗᤧ ᤏᤠᤏᤠᤰ ᤀᤡᤰᤋᤠᤵᤐᤥ ᤋᤣ᤹ᤖᤢᤀᤠᤱ ᤗᤠᤵᤑᤢᤛᤢ. ᤜᤧᤰᤁᤩᤠᤱ ᤋᤣ᤺ᤳᤋᤡᤸᤗᤧ ᤂᤧᤴ ᤋᤧᤵᤋᤢ॥ 13 ᤁᤧᤛᤡᤒᤠ ᤌᤰᤁᤡᤴ ᤂᤧᤸᤗᤧ ᤗᤠᤶᤔᤡᤸᤗᤧ ᤏᤠᤏᤠᤰ ᤋᤣ᤹ᤖᤢᤀᤠᤱ ᤁᤧᤖᤧᤰ ᤔᤏᤠᤜᤠ᤹ ᤒᤡᤁᤪᤡᤖᤧ ᤁᤢᤛ᤻ᤛᤠ ᤛᤣᤒᤠᤴ ᤏᤠ᤺ᤵᤔᤠᤖᤧ ᤗᤠᤃᤡ ᤕᤥᤀᤠᤒᤧᤴ ᤔᤧᤍᤡᤶᤍᤢ॥ 14 ᤛᤣᤒᤠ᤺ᤸᤗᤧ ᤜᤠᤒᤡᤗ ᤒᤣᤌ ᤔᤠᤁᤠᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤋᤢᤔᤢᤛᤡᤖ ᤐᤣ. ᤜᤧᤰᤁᤩᤠᤱ ᤁᤴ ᤋᤧᤱᤃᤵᤐᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤔᤧᤍᤱᤛᤡᤱ॥ ᤂᤧᤱᤜᤠ᤹ ᤔᤧᤈᤢᤵᤛᤧᤀᤠᤱ ᤕᤧᤰᤕᤰᤁᤥ ᤕᤥᤀᤠᤒᤧᤴ ᤔᤧᤍᤡᤶᤍᤢ॥ 15 ᤕᤥᤀᤠᤒᤖᤧ ᤁᤢᤎᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤜᤠᤒᤡᤗ ᤒᤣᤌ ᤔᤠᤁᤠᤀᤥ ᤛᤣᤒᤠᤴ ᤔᤧᤃᤒᤢ. ᤗᤢᤱᤎᤠᤰᤁᤡᤸᤗᤧ ᤏᤠᤜᤠᤱ ᤗᤧᤵᤔᤠᤱ ᤂᤠᤶᤗᤢᤱᤜᤠ᤹ ᤔᤧᤗᤢᤵᤛᤢ ᤔᤧᤎᤠᤰᤋᤢ. ᤜᤧᤰᤁᤩᤠᤱ ᤂᤧᤴ ᤂᤠᤶᤗᤢᤱᤜᤠ᤹ᤀᤥ ᤔᤧᤈᤴᤇᤡᤱᤅᤠᤱ ᤗᤢᤱᤎᤠᤰᤁᤡᤴ ᤗᤢ᤺ᤶᤔᤠ ᤔᤧᤜᤣ᤺ᤰᤋᤢ॥ 16 ᤜᤧᤰᤁᤣ᤺ᤸᤗᤧ ᤗᤳᤇᤠ ᤛᤠ᤹ᤖᤡᤰ ᤆᤠ᤺ᤵᤔᤠ ᤔᤧᤴᤇᤢᤔᤠᤎᤡᤰ ᤗᤢᤱᤎᤠᤰᤁᤥ ᤌᤠ᤺ᤶᤛᤡᤱ. ᤜᤴᤏᤠᤱ ᤐᤠ᤺ᤳᤋᤢ. “ᤂᤧᤵᤛᤧᤶᤔᤧ᤹ᤀᤥ᥄ ᤂᤧᤵᤛᤧᤶᤔᤧ᤹ᤀᤥ᥄ ᤕᤥᤀᤠᤒᤧᤴ ᤁᤵᤔᤥ ᤋᤠᤖ. ᤀᤠᤱᤃᤠ᤹ ᤂᤢᤏᤧ᤹ᤏᤢ ᤋᤠ᤹ᤈᤧᤱᤅᤠ॥” 17 ᤜᤧᤰᤁᤩᤠᤱ ᤕᤥᤀᤠᤒᤧᤴ ᤋᤃᤡ ᤐᤣ. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤕᤥᤀᤠᤒᤏᤧᤒᤡ᥅” ᤂᤢᤏᤧ᤹ ᤔᤧᤳᤋᤢ. “ᤀᤥᤖᤥ. ᤀᤠᤱᤃᤠ᤹ᤀᤣ ᤕᤥᤀᤠᤒᤀᤠᤖᤥ॥” ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤁᤧᤛᤧᤘᤠᤖᤥᤔᤠᤸᤗᤧ ᤌᤣ ᤐᤠ᤺ᤳᤋᤢᤱᤗ ᤐᤳᤋᤠ ᤏᤢᤖᤡᤰ ᤂᤧᤵᤛᤧ᤹ᤀᤥ॥” ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤵᤛᤢᤱᤗ ᤐᤳᤋᤠ॥” 18 ᤂᤧᤸᤗᤧ ᤔᤧᤳᤋᤢ. “ᤀᤢᤴᤇᤥᤴ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢ. ‘ᤏᤥᤃᤵ ᤂᤥᤔᤠᤖᤧ ᤗᤠᤃᤡ ᤜᤠᤒᤡᤗ ᤐᤣ᤺ᤰᤔᤠ॥’ ᤜᤧᤰᤁᤩᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤁᤧᤖᤧᤰ ᤐᤠᤴ ᤐᤢ᤹ᤖᤥ॥ 19 ᤀᤠᤏᤡᤃᤣ ᤕᤧᤰᤕᤰ ᤀᤡᤛᤪᤠᤀᤡᤗ ᤕᤧᤰᤕᤰᤁᤡᤴ ᤛᤠ᤹ᤖᤡᤰ ᤆᤡᤈᤡᤒᤠ ᤆᤥᤰ. ᤜᤧᤰᤁᤩᤠᤱ ᤜᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠ ᤆᤥᤰ॥ ᤁᤱᤃ ᤀᤡᤛᤪᤠᤀᤡᤗᤀᤥ ᤗᤳᤇᤠ ᤔᤠ ᤜᤧᤰᤋᤱᤔᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤧᤏᤧ᤹ᤃ ᤂᤧᤴ ᤕᤶᤔᤠ ᤁᤧᤃᤥ᤺ᤳᤋᤢ᤹॥ ᤂᤧᤏᤧ᤹ ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤰᤁᤡᤴ ᤔᤧᤱᤔᤠ ᤁᤧᤃᤥ᤺ᤳᤋᤢᤒᤠᤒᤣ᥅” 20 ᤕᤥᤀᤠᤒᤧᤸᤗᤧ ᤔᤧᤳᤋᤢ. “ᤔᤧᤱᤔᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ᤏᤢ ᤔᤠ᤺ᤱᤄᤠ ᤐᤥᤱᤗ. 21 ᤀᤠᤏᤡᤃᤣ ᤏᤡᤱᤘᤠᤴ ᤜᤧᤰᤋᤱᤒᤠ ᤜᤥᤵ ᤁᤖ ᤀᤣᤑᤪᤠᤀᤡᤔ ᤗᤠᤈᤣ᤹ᤒᤠ ᤁᤥ᤺ᤰᤔᤠᤜᤠ᤹ᤀᤥ ᤁᤧᤕᤢᤱᤒᤠ ᤒᤡᤁᤪᤡ ᤔᤧᤵᤏᤠᤒᤧᤸᤗᤧ ᤁᤢᤛ᤻ᤛᤠ ᤛᤣᤒᤠᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤘᤠ᤹॥ ᤜᤠᤒᤠ ᤂᤧᤴ ᤔᤏᤠᤴ ᤀᤠᤏᤡᤃᤣ ᤜᤢᤰᤁᤥ ᤕᤠᤵᤔᤡ ᤀᤠᤒᤡᤖᤧ᤹. ᤜᤧᤰᤁᤩᤠᤱ ᤀᤠᤏᤡᤃᤣ ᤁᤴ ᤕᤧᤰᤕᤰᤗᤠᤶ ᤐᤣᤃᤡᤃᤧ॥” ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤕᤥᤀᤠᤒᤧᤴ ᤔᤧᤳᤋᤢ. “ᤂᤧᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤔᤧᤓᤢᤴᤍᤢᤀᤠᤱ ᤗᤢᤱᤎᤠᤰᤁᤥᤗᤠᤶ ᤗᤠᤵᤔᤧᤓᤢᤛᤢ ᤁᤧᤶᤒᤡ᤹॥” 22 ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠᤴ ᤐᤣ. ᤁᤧᤈᤢᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ ᤁᤢᤛᤢᤈᤠᤴ ᤆᤧᤰᤋᤢᤛᤡ॥ ᤂᤧᤱᤜᤠ᤹ᤖᤧ ᤒᤡᤁᤪᤡᤖᤧ ᤁᤢᤛ᤻ᤛᤠ ᤛᤣᤒᤠ᤺ᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤔᤧᤄᤰᤋᤢᤀᤠᤱ ᤕᤥᤀᤠᤒᤖᤧ᤹ᤀᤥ ᤗᤠᤵᤔᤧᤓᤢᤛᤢ ᤔᤧᤒᤡᤖᤢ॥ ᤜᤧᤰᤁᤩᤠᤱ ᤕᤥᤀᤠᤒᤖᤧ ᤛᤠᤍᤠᤱᤅᤡᤴ ᤔᤢ᤺ᤳᤋᤢ. ᤜᤧᤰᤁᤩᤠᤱ ᤁᤧᤖᤧᤰ ᤌᤰᤛᤢᤒᤠᤜᤠ᤹ᤖᤧ ᤂᤧᤴ ᤕᤧᤰᤕᤰᤁᤡᤴ ᤔᤧᤗᤧᤖᤢᤀᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤜᤡᤶᤜᤡᤶ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤕᤥᤀᤠᤒᤧᤴ ᤜᤠᤱᤅᤡᤴ ᤘᤕᤧᤒᤠᤍᤧᤴ ᤕᤖᤢᤛᤗᤧᤔ ᤏᤢ᤺ᤰᤂᤧᤖᤥ॥ ᤍᤠᤀᤢᤍᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ 23 ᤀᤠᤸᤗ ᤕᤥᤀᤠᤒᤧᤴ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤘᤕᤧ. ᤜᤧᤰᤁᤩᤠᤱ ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤒᤏᤠᤕᤠᤜᤴ ᤁᤖᤣᤋᤡ ᤏᤢ ᤐᤣᤗᤣᤌᤡᤜᤠ᤹ᤖᤧ ᤂᤢᤴᤇᤡ᤹ ᤛᤢᤜᤠᤱᤕᤢᤰᤐᤠ ᤘᤕᤧ॥ 24 ᤜᤧᤰᤁᤩᤠᤱ ᤀᤣᤍᤥᤏᤡᤖᤠᤔᤧᤴ ᤔᤏᤠᤜᤠ᤹ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰᤁᤥ ᤁᤧᤓᤶᤒᤠ ᤗᤠᤶᤗᤥᤒᤠ ᤘᤕᤧ॥ ᤀᤜᤡᤗᤢᤍᤖᤧ ᤁᤢᤛ᤻ᤛᤠ ᤕᤜᤥᤛᤠᤐᤠᤋᤧᤴ ᤂᤠᤏᤡ᤺ᤳ ᤁᤧᤕᤢᤱᤒᤠ ᤘᤕᤧ॥ 25 ᤛᤣᤓᤠᤴ ᤛᤢᤜᤠᤱᤔᤡᤒᤠ ᤘᤕᤧ. ᤜᤧᤰᤁᤩᤠᤱ ᤛᤍᤥᤁ ᤏᤢ ᤀᤒᤡᤕᤠᤌᤠᤖᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤛᤡ॥ 26 ᤜᤧᤰᤁᤩᤠᤱ ᤕᤠᤀᤡᤖ ᤕᤧᤰᤕᤰᤁᤥᤗᤠᤶ ᤁᤧᤍᤠᤒᤠ ᤀᤡᤖᤠᤴ ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.