᥈ ᤛᤠᤔᤢᤀᤧᤗ 19 - LIFOTNTᤍᤠᤀᤢᤍᤧᤴ ᤕᤖᤢᤛᤗᤧᤔ ᤏᤢ᤺ᤱ 1 ᤀᤒ᤻ᤛᤠᤗᤥᤔᤖᤧ ᤁᤢᤗᤠᤃᤡ ᤜᤠᤱᤅᤡᤴ ᤜᤠ᤺ᤵᤗ. ᤔᤧᤖᤡᤱ ᤆᤥ᤺ᤰᤗ ᤕᤠᤰ ᤁᤧᤗ᤹ᤒᤠᤴ ᤕᤥᤀᤠᤒᤖᤧ ᤂᤧᤵᤛᤢ॥ 2 ᤜᤧᤰᤁᤩᤠᤱ ᤂᤧᤴ ᤕᤧᤴᤏᤥᤒᤠ ᤌᤱ ᤏᤠ᤺ᤶᤔᤧᤴ ᤌᤰᤛᤢᤒᤠᤜᤠ᤹ᤖᤧ ᤗᤠᤃᤡ ᤕᤥᤶ ᤐᤢ᤹ᤔᤠ ᤐᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤁᤢᤛ᤻ᤛᤠ ᤀᤒ᤻ᤛᤠᤗᤥᤔᤖᤧ ᤁᤢᤗᤠᤃᤡ ᤔᤧᤖᤡᤱ ᤆᤥ᤺ᤰᤏᤢ ᤕᤠᤰ ᤁᤧᤗ᤹ᤒᤠᤴ ᤔᤧᤄᤧᤵᤛᤢ॥ 3 ᤌᤱᤗᤠᤶ ᤔᤧᤄᤧᤳᤇᤡᤱᤅᤠᤱ ᤂᤢᤴᤇᤡ᤹ ᤏᤠᤖᤠ ᤁᤧᤍᤧᤵᤐᤠ ᤔᤏᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤕᤧᤰᤕᤰ ᤛᤡᤃᤠᤱ ᤛᤫᤠ᤺ᤳ ᤔᤧᤗᤠᤛᤧ॥ 4 ᤜᤠᤱᤅᤡᤸᤗᤧ ᤁᤢᤏᤠᤴ ᤋᤧᤵᤋᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤜᤠᤒᤧᤖ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤛ᤻ᤛᤠ ᤀᤒ᤻ᤛᤠᤗᤥᤔ᥄ ᤀᤒ᤻ᤛᤠᤗᤥᤔ ᤀᤣ᥄ ᤀᤠᤱᤃᤠ᤹ ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤛ᤻ᤛᤠᤀᤣ᥄” 5 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤜᤡᤶᤛᤡᤃᤠᤱ ᤋᤩᤧᤀᤠᤱ ᤕᤥᤀᤠᤒᤖᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤛ᤻ᤛᤠᤜᤠ᤹ ᤁᤧᤛ᤻ᤛᤠ ᤔᤧᤴᤇᤡᤴᤜᤠ᤹. ᤁᤧᤔᤣ᤺ᤳᤜᤠ᤹ ᤏᤢ ᤁᤧᤔᤣ᤺ᤳ ᤐᤠ᤺ᤰᤔᤠᤜᤠ᤹ ᤁᤧᤛᤧ᤺ᤵᤐᤠ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤀᤠᤀᤡᤴ ᤛᤡᤖᤡᤱᤔᤔᤠᤀᤥ ᤕᤠᤵᤔᤡ ᤁᤧᤎᤠᤛᤧ॥ 6 ᤀᤠᤍᤠᤱᤒᤠ ᤁᤧᤈᤡ᤺ᤵᤐᤠ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡ᤹. ᤜᤧᤰᤁᤩᤠᤱ ᤀᤠᤍᤠᤱᤒᤠ ᤗᤢᤱᤔᤠ᤹ ᤁᤧᤍᤢᤰᤐᤠᤜᤠ᤹ ᤁᤧᤈᤡ᤺ᤳᤋᤢᤛᤡ᤹॥ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤌᤰᤛᤢᤒᤠᤖᤧ ᤗᤠᤶᤗᤥᤒᤠᤜᤠ᤹ ᤏᤢ ᤀᤠᤏᤡᤃᤣ ᤔᤏᤠᤜᤠ᤹ ᤀᤠᤍᤠᤱᤒᤠᤖᤧ ᤁᤧᤏᤡᤔᤥ ᤌᤣᤀᤠᤱ ᤔᤣ᤺ᤶᤒᤠ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤢ॥ ᤁᤴᤏᤠᤱ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤢ-ᤀᤠᤀᤡᤴ ᤀᤒ᤻ᤛᤠᤗᤥᤔ ᤜᤡᤅᤧᤀᤠᤱ ᤀᤠᤏᤡᤃᤣ ᤁᤧᤖᤧᤰ ᤛᤩᤧᤀᤡᤃᤧᤸᤗᤧ ᤀᤠᤍᤠᤱᤒᤠ ᤁᤧᤛ᤺ᤳᤋᤧᤒᤠᤖᤥ॥ 7 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤜᤠᤖᤠ ᤐᤣᤃᤧ᤹ᤀᤠᤱ ᤁᤧᤔᤏᤠᤜᤠ᤹ ᤜᤠᤱᤜᤠᤱ ᤔᤧᤳᤋᤧᤛᤧ᤹॥ ᤂᤧᤏᤧ᤹ ᤁᤧᤶᤒᤣ᤺ᤰᤏᤧᤴᤏᤧᤓᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤐᤠ᤺ᤳᤋᤢᤱ. ᤀᤠᤀᤡᤴ ᤛᤧᤴᤍᤡᤰ ᤗᤳᤇᤠᤀᤠᤱ ᤔᤏᤠ ᤂᤧᤏᤧ᤹ᤏᤢ ᤔᤧᤴᤘᤠ᤹ᤏᤧᤴ॥ ᤀᤠᤍᤠᤱᤒᤠ ᤁᤧᤈᤢᤰᤋᤧᤀᤠᤱᤎᤥ ᤁᤧᤍᤢᤔᤢᤒᤠ ᤁᤧᤖᤧᤰ ᤋᤢᤰᤂᤣᤴᤏᤢ᤺ᤸᤗᤧᤀᤠᤱ ᤁᤴ ᤋᤢᤰᤂᤣᤴ ᤁᤧᤖᤧᤰᤏᤢ᤺ᤸᤗᤧ ᤋᤠᤵᤑᤧ᤺ᤶᤒᤠ ᤐᤥᤱ॥” 8 ᤜᤧᤰᤁᤩᤠᤱ ᤜᤠᤱᤅᤡᤴ ᤐᤥᤃᤧᤀᤠᤱ ᤗᤠᤶᤎᤣᤳ ᤐᤢᤱᤅᤥ ᤕᤢᤱᤛᤡᤱ॥ ᤜᤧᤰᤁᤩᤠᤱ ᤜᤠᤱᤅᤡᤴ ᤐᤥᤃᤧᤀᤠᤱ ᤗᤠᤶᤎᤣᤳ ᤐᤢᤱᤅᤥ ᤕᤢᤱ ᤁᤧᤗ᤹ᤒᤠ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤜᤠᤱᤅᤡᤸᤗᤧ ᤁᤢᤒᤣᤛᤠᤱ ᤔᤧᤎᤠ᤺ᤶᤛᤡᤱ॥ ᤂᤧᤴ ᤕᤧᤶ ᤌᤠᤖᤡᤰᤗᤧ ᤀᤡᤛᤪᤠᤀᤡᤗᤡᤜᤠ᤹ ᤁᤧᤖᤧᤰ ᤀᤠᤒᤠᤅᤣ ᤂᤢᤴᤇᤡ᤹ ᤜᤡᤶᤜᤡᤶ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ ᤔᤧᤜᤥ᤺ᤵᤋᤧ॥ ᤕᤥᤀᤠᤒᤖᤧ ᤍᤠᤀᤢᤍᤧᤴ ᤑᤧ᤺ᤰᤋᤢ 9 ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ᤖᤧ ᤔᤧᤄᤧᤵᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤜᤠᤱᤅᤡᤸᤗᤧ ᤀᤠᤏᤡ᤹ ᤏᤡᤱᤔᤡᤜᤠ᤹ᤗᤠᤶ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤠᤛᤧ᤺ᤵᤋᤧ. ᤜᤧᤰᤁᤩᤠᤱ ᤀᤠᤸᤗ ᤀᤒ᤻ᤛᤠᤗᤣᤔᤖᤧ ᤆᤥᤃᤢᤸᤗᤧ ᤜᤠᤱᤅᤡᤴ ᤗᤠᤈᤣ᤹ᤗᤠᤶ ᤂᤧᤳᤇᤡᤱ ᤐᤣᤀᤠᤱ ᤘᤠ᤹॥ 10 ᤁᤖ ᤀᤠᤏᤡ᤹ ᤜᤠᤱ ᤀᤠᤈᤥᤃᤢᤶᤒᤠ ᤀᤒ᤻ᤛᤠᤗᤥᤶᤔᤡᤴ ᤌᤱᤅᤥ ᤛᤩᤧᤀᤠᤱ ᤘᤠ᤹॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤍᤠᤀᤢᤍ ᤜᤠᤱᤅᤡᤴ ᤏᤢ᤺ᤰᤔᤠᤀᤠᤱ ᤋᤠ᤺ᤵᤔᤠ ᤐᤥᤱ᤹॥” 11 ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤛᤍᤥᤁ ᤏᤢ ᤀᤒᤡᤕᤠᤌᤠᤖ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢᤛᤡ. “ᤕᤜᤢᤍᤠᤒᤠ ᤁᤠᤵᤐᤥ ᤋᤢᤶᤛᤠᤜᤠ᤹ ᤛᤣ᤺ᤴᤍᤥᤛᤧᤛᤧ᤹. ᤜᤠᤱᤅᤡᤴ ᤁᤢᤜᤡᤶᤔᤥ ᤋᤠ᤺ᤵᤔᤠ ᤂᤡᤏᤡ᤹ ᤌᤣᤀᤠᤱ ᤀᤣᤃᤠᤱ ᤁᤧᤒᤥ᤺ᤰᤂᤡᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤏᤡᤴ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤁᤧᤖᤧᤰ ᤐᤠᤴ ᤐᤥᤱᤗ ᤐᤳ. ᤂᤧᤴ ᤐᤠ᤺ᤴᤏᤡᤴ ᤜᤠᤱᤅᤡᤸᤗᤧ ᤁᤢᤜᤡᤶᤔᤥ ᤁᤧᤖᤧ ᤆᤢᤖᤧᤀᤠᤱ ᤘᤠ᤹॥ 12 ᤂᤡᤏᤡ᤹ᤃ ᤀᤠᤶᤓᤢ᤹ ᤀᤠᤴᤛᤠ᤹ᤏᤡᤱᤗᤥ. ᤀᤠᤱᤃᤠ᤹ ᤀᤠᤕᤧᤵᤐᤠ ᤏᤢ ᤀᤠᤏᤧᤰᤛᤠᤏᤡᤱᤗᤥ॥ ᤜᤠᤱᤅᤡᤴ ᤁᤢᤜᤡᤶᤔᤥ ᤋᤠ᤺ᤵᤔᤠ ᤌᤣᤀᤠᤱ ᤂᤡᤏᤡ᤹ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤁᤧᤒᤥ᤺ᤰᤂᤡᤒᤠᤒᤣ᥅ 13 ᤜᤧᤰᤁᤩᤠᤱ ᤀᤔᤠᤛᤠᤴ ᤔᤧᤳᤋᤧᤶᤔᤧ᤹. ‘ᤂᤧᤏᤧ᤹ᤃ ᤀᤠᤱᤃᤠ᤹ᤀᤣ ᤀᤠᤕᤧᤵᤐᤠ ᤏᤢ ᤀᤠᤏᤧᤰᤛᤠᤏᤧ ᤔᤣ᤺ᤶᤒᤡ᥅ ᤂᤧᤏᤧ᤹ ᤕᤥᤀᤠᤒᤖᤧ ᤁᤢᤗᤧᤰᤘᤠ ᤁᤧᤜᤡᤱᤜᤡᤱ ᤌᤠᤖᤡᤰ ᤌᤰᤛᤢᤒᤠᤜᤠ᤹ᤖᤧ ᤗᤠᤶᤗᤥᤒᤠ ᤁᤧᤶᤒᤥ᤺ᤰᤂᤧᤱᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤂᤢᤶᤍᤡᤱ ᤐᤡᤀᤠᤖ॥’” 14 ᤍᤠᤀᤢᤍᤖᤧ ᤁᤴ ᤁᤢᤀᤡᤱᤄᤱᤅᤡᤸᤗᤧ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤗᤳᤇᤠ ᤔᤏᤠ ᤏᤡᤱᤘᤠ᤹ ᤁᤢᤀᤡᤛᤡᤰ ᤆᤥᤃᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤁᤧᤖᤧᤰ ᤁᤧᤔᤏᤠᤜᤠ᤹ᤏᤢ ᤏᤢ᤺ᤰᤂᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ॥ 15 ᤂᤧᤸᤗᤧᤆᤥᤃᤢᤸᤗᤧ ᤜᤠᤱᤅᤡᤴ ᤏᤢ᤺ᤰᤂᤧᤀᤠᤱ ᤕᤷᤍᤏ ᤕᤱᤄᤱ ᤋᤩᤧ॥ ᤔᤏᤠᤜᤠ᤹ ᤀᤠᤸᤗ ᤜᤠᤱᤅᤡᤴ ᤁᤢᤍᤢᤶᤛᤧ ᤏᤢ ᤕᤷᤍᤏ ᤘᤜ᤺ᤱ ᤏᤠᤜᤠᤱ ᤗᤧᤵᤔᤠᤱ ᤋᤣ᤹ᤛᤧ ᤕᤜᤢᤍᤠᤒᤠ ᤔᤏᤠᤜᤠ᤹ ᤃᤡᤗᤃᤠᤗᤀᤥ ᤔᤧᤍᤩᤧᤀᤠᤱ ᤔᤧᤘᤕᤧ॥ 16 ᤒᤜᤢᤖᤡᤔᤒᤠ ᤒᤡᤏᤩᤠᤔᤡᤏᤖᤧ ᤁᤢᤛ᤻ᤛᤠ ᤛᤡᤔᤡᤴ ᤍᤠᤀᤢᤍ ᤜᤠᤱᤅᤡᤴ ᤁᤢᤍᤢᤶᤛᤧ ᤜᤠᤖᤠᤜᤠᤖᤠ ᤕᤜᤢᤍᤠᤒᤠ ᤔᤏᤠᤜᤠ᤹ᤏᤢ ᤐᤣ॥ 17 ᤂᤢᤏᤧ᤹ᤏᤢ ᤛᤠᤘᤗᤖᤧ ᤁᤢᤛᤢᤘᤠᤱᤒᤠ ᤁᤢᤜᤡᤶ ᤁᤢᤎᤠ᤺ᤱ ᤀᤥᤃᤧᤔᤧᤵᤐᤠ ᤛᤡᤘᤠ᤺ᤴᤏᤠᤱ ᤌᤡᤒᤥᤱᤅᤠᤱ ᤅᤠᤛᤡ ᤁᤢᤛ᤻ᤛᤠ ᤏᤢ ᤏᤡᤒᤥᤱ ᤁᤢᤛᤧᤘᤠᤖᤥᤒᤠ. ᤜᤧᤰᤁᤩᤠᤱ ᤜᤧᤴᤇᤡᤱᤎᤡᤰ ᤒᤡᤏᤩᤠᤔᤡᤏᤡᤜᤠ᤹ ᤋᤣ᤹ᤖᤢᤛᤡᤀᤠᤱ ᤐᤣ॥ ᤂᤧᤱᤜᤠ᤹ ᤕᤷᤍᤏ ᤘᤜ᤺ᤱᤅᤥ ᤜᤠᤱᤅᤡᤴ ᤘᤕᤧᤒᤠᤍᤧᤴᤏᤥ ᤔᤧᤗᤥ᤺ᤰᤋᤧᤀᤠᤱ ᤔᤧᤒᤣ॥ 18 ᤜᤠᤱᤅᤡᤸᤗᤧ ᤁᤢᤜᤡᤶᤛᤕᤱᤜᤠ᤹ ᤋᤠ᤺ᤳᤇᤧ ᤂᤧᤱᤜᤠ᤹ᤖᤧ ᤘᤜ᤺ᤱᤅᤡᤴ ᤔᤧᤃᤠ᤺ᤰᤋᤢ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤔᤧᤈᤥᤃᤢ॥ ᤜᤠᤱᤅᤡᤸᤗᤧ ᤕᤷᤍᤏ ᤘᤜ᤺ᤱᤅᤡᤴ ᤁᤠ᤺ᤰᤋᤢᤖ ᤐᤳᤇᤧᤸᤗᤧ ᤃᤣᤖᤠᤖᤖᤧ ᤁᤢᤛ᤻ᤛᤠ ᤛᤡᤔᤡᤴ ᤜᤥ᤺ᤳᤇᤡᤱᤗ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢ. ᤍᤠᤀᤢᤍᤖᤧ ᤛᤡᤔᤡᤴ ᤗᤢᤱᤔᤠ᤹ ᤋᤢᤰᤋᤢ 19 ᤜᤧᤰᤁᤩᤠᤱ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤕᤖᤢᤛᤗᤧᤔ ᤁᤧᤗᤧᤖᤢᤀᤠᤱ ᤁᤧᤒᤣ᤺ᤸᤗᤧ ᤁᤧᤛᤧᤘᤠᤖᤥᤒᤠᤸᤗᤧ ᤕᤠ᤺ᤶᤒᤰ ᤑᤣ᤺ᤴᤍᤢᤱ॥ ᤂᤧᤴ ᤁᤧᤖᤧᤰ ᤀᤠᤍᤠᤱᤒᤠᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧᤖᤥ॥ ᤂᤧᤴ ᤐᤠ᤺ᤴᤏᤡᤴ ᤜᤠᤱᤅᤡᤸᤗᤧ ᤁᤧᤏᤡᤱᤘᤠ᤹ᤀᤥ ᤔᤧᤕᤢᤰᤂᤧᤴᤏᤧ᤹ᤀᤥ॥ 20 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥᤃᤢᤱ ᤁᤧᤗ᤹ᤒᤠᤴ ᤏᤡᤛᤢᤱ. ᤁᤖ ᤀᤠᤀᤡᤴ ᤀᤠᤍᤠᤱᤒᤠ ᤁᤧᤍᤢᤶᤛᤧ ᤋᤃᤡ ᤁᤧᤍᤠᤒᤠ ᤕᤥᤛᤣᤑᤖᤧ ᤁᤢᤛᤢᤘᤠᤱᤅᤥ ᤀᤠᤱᤃᤠ᤹ᤀᤣᤖᤥ॥” 21 ᤁᤖ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤀᤒᤡᤛᤤ᤺ᤸᤗᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤛᤣᤃᤢᤒᤠ ᤜᤠᤱᤅᤡᤴ ᤛᤠᤰᤔᤢᤖᤠ ᤔᤧᤳᤋᤢᤒᤠᤸᤗᤧ ᤛᤡᤔᤡ᤺ᤱᤃ ᤛᤡᤔᤠ ᤔᤧᤒᤥᤱᤏᤧᤶᤒᤡ᥅” 22 ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤛᤖᤢᤕᤠᤜᤖᤧ ᤁᤢᤛ᤻ᤛᤠᤛᤣ. ᤂᤡᤏᤡ᤹ ᤐᤠ᤺ᤵᤔᤠ ᤐᤠᤴ ᤌᤣᤀᤠᤱ ᤜᤥᤵ. ᤂᤧᤏᤡ᤹ ᤀᤠᤍᤰᤗᤧᤱᤘᤠᤀᤥ ᤁᤧᤒᤥᤃᤡᤖ ᤁᤧᤒᤳᤇᤡ᤹॥ ᤀᤠᤀᤡᤴ ᤀᤡᤛᤪᤠᤀᤡᤗᤀᤥ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤛᤡᤔᤠ ᤔᤧᤏᤢ᤹ᤏᤧᤴ. ᤀᤠᤀᤡᤴ ᤀᤠᤱᤃᤠ᤹ ᤕᤠᤶᤔᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤠᤱ ᤁᤧᤗ᤹ᤒᤠᤴ ᤔᤧᤏᤡᤀᤠᤴᤒᤡ᥅” 23 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤛᤡᤔᤡᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤛᤧᤳᤋᤠᤛᤡᤃᤧᤴ॥” ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤔᤠᤱᤜᤧᤰᤛᤡᤱᤅᤠᤱ ᤁᤴ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤖᤥ॥ ᤍᤠᤀᤢᤍᤖᤧ ᤔᤐᤡᤒᤥᤛᤣᤋᤧᤴ ᤗᤢᤱᤔᤠ᤹ ᤋᤢᤰᤋᤢ 24 ᤛᤠᤘᤗᤖᤧ ᤁᤢᤶᤔᤧᤴᤇᤠ᤹ ᤔᤐᤡᤒᤥᤛᤣᤋᤧᤴᤏᤠᤱ ᤜᤠᤱᤅᤡᤴ ᤁᤢᤍᤢᤶᤛᤧ ᤕᤥ ᤌᤩᤧ॥ ᤜᤠᤱᤅᤡᤴ ᤗ᤺ᤴᤍᤧ ᤐᤣᤀᤠᤱ ᤕᤠᤶᤔᤥ ᤏᤢᤖᤡᤰᤁᤠᤱ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤌᤠᤖᤡᤰ ᤂᤧᤸᤗᤧ ᤁᤢᤗᤠᤱ ᤛᤣ᤺ᤴᤍᤡᤴᤏᤠᤱ ᤔᤧᤄᤰᤋᤢᤴ. ᤁᤢᤶᤎᤥ᤹ᤀᤡᤴᤏᤠᤱ ᤔᤧᤄᤰᤋᤢᤴ. ᤁᤢᤍᤣ᤺ᤳᤋᤠᤱ ᤘᤠᤔᤧᤜᤵᤋᤢᤴ॥ 25 ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧᤔᤗᤠᤶ ᤜᤠᤱᤅᤡᤴ ᤁᤢᤍᤢᤶᤛᤧ ᤋᤩᤧ. ᤜᤧᤰᤁᤣ᤺ᤸᤗᤧ ᤍᤠᤀᤢᤍᤖᤧ ᤔᤧᤳᤋᤢ. “ᤔᤐᤡᤒᤥᤛᤣᤋᤣ. ᤂᤧᤏᤧ᤹ ᤌᤣᤀᤠᤱ ᤀᤠᤱᤃᤠ᤹ᤏᤢ ᤁᤧᤶᤒᤣᤏᤧᤶᤒᤠ᥅” 26 ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤛᤡᤘᤠ᤺ᤸᤗᤧ ᤀᤡᤱᤗᤧᤰᤋᤠᤱ॥ ᤀᤠᤱᤃᤠ᤹ᤃ ᤜᤠᤱᤅᤡᤴᤏᤢ ᤐᤣ᤺ᤰᤔᤠᤖᤧ ᤗᤠᤃᤡ ᤀᤍᤱᤅᤡᤸᤗᤧ ᤁᤢᤶᤒᤪᤠᤀᤥ ᤁᤖᤣᤗᤡ ᤑᤶᤔᤠ ᤐᤠᤱᤄᤢᤱᤛᤡᤱ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤗᤠᤱᤛᤰᤐᤠ ᤘᤠ᤹ᤀᤠ॥ 27 ᤂᤧᤸᤗᤧ ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤁᤧᤍᤃᤡ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤠᤴ ᤐᤠ᤺ᤳᤋᤢᤀᤠᤱ ᤘᤠ᤹॥ ᤀᤠᤍᤠᤱᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡᤰ ᤁᤧᤈᤥᤰ॥ ᤀᤠᤍᤠᤱᤒᤠᤖᤧ ᤌᤣ ᤆᤥ᤺ᤰᤔᤠ ᤁᤧᤛᤡᤖᤠ᤹ᤎᤠᤱ ᤜᤠᤒᤠᤄᤧᤴ ᤆᤥᤃᤧ᤹ᤀᤥ॥ 28 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤴᤎᤧᤒᤠᤖᤧ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ ᤀᤠᤍᤠᤱᤒᤠᤖᤧ ᤁᤧᤜᤢᤰᤗᤠᤶᤒᤠ ᤛᤡᤔᤠ ᤗᤠ᤹ᤖᤢᤛᤡᤀᤠᤱ ᤘᤕᤧ. ᤁᤖ ᤁᤧᤛᤧᤘᤠᤖᤥᤒᤧᤱᤃ ᤀᤠᤍᤠᤱᤒᤠᤏᤢ ᤛᤥᤖᤡᤰ ᤁᤧᤕᤢᤰᤂᤠᤱᤅᤠᤱ ᤆᤠᤔᤠ ᤁᤧᤒᤡᤖᤠᤱ॥ ᤁᤴᤏᤢ᤺ᤸᤗᤧ ᤕᤶᤒᤠ ᤀᤠᤱᤃᤠ᤹ ᤌᤣ᤺ᤴ ᤁᤥ᤺ᤳᤋᤢᤱᤒᤠᤒᤣ᥅” 29 ᤜᤠᤱᤅᤡᤸᤗᤧ ᤔᤧᤳᤋᤢ. “ᤕᤠ᤺ᤰᤋᤢ. ᤐᤥ᤺ᤰᤂᤧ॥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤱ ᤛᤢᤖᤢᤱᤅᤠᤱ ᤘᤠ᤹—ᤂᤧᤏᤧ᤹ ᤏᤢ ᤛᤡᤘᤠᤸᤗᤧ ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤜᤠᤛ᤻ᤛᤧᤛᤧᤀᤠᤱ ᤋᤣ᤹ᤖᤧᤛᤧ᤹॥” 30 ᤔᤐᤡᤒᤥᤛᤣᤋᤖᤧ ᤐᤠ᤺ᤳᤋᤢ. “ᤂᤧᤸᤗᤧᤀᤣ ᤁᤧᤖᤧᤰ ᤋᤣ᤹ᤖᤢᤖ. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠ ᤏᤢᤖᤡᤰᤁᤠᤱ ᤜᤡᤶᤔᤥ ᤁᤧᤏᤢ᤺ᤰᤂᤧ ᤁᤧᤍᤩᤧ॥” ᤍᤠᤀᤢᤍᤖᤧ ᤒᤷᤈᤡᤸᤗᤤ᤺ᤴ ᤗᤢᤱᤔᤠ᤹ ᤋᤢᤰᤋᤢ 31 ᤃᤡᤗᤠᤍᤡ ᤒᤷᤈᤡᤗᤤᤴᤏᤠᤱ ᤖᤠᤃᤗᤡᤔᤗᤠᤶ ᤕᤥ ᤌᤩᤧ. ᤜᤧᤰᤁᤩᤠᤱ ᤜᤠᤱᤅᤡᤴ ᤕᤷᤍᤏ ᤏᤠᤜᤠᤱ ᤛᤠᤛᤧ ᤜᤠᤱᤅᤡᤴᤏᤢ ᤐᤣ॥ 32 ᤒᤷᤈᤡᤗᤤᤴ ᤕᤧᤳᤒᤥᤱ ᤋᤱᤒᤣ ᤁᤧᤃᤧᤵᤐᤠ ᤂᤍᤠᤰᤔᤡ ᤔᤏᤠ ᤘᤕᤧ॥ ᤜᤠᤱᤅᤡᤴ ᤔᤜᤏᤥᤔ ᤕᤢᤅᤧᤸᤗᤧ ᤂᤢᤏᤧ᤹ᤀᤣ ᤜᤠᤱᤅᤡᤴ ᤆᤠᤔᤠ ᤁᤢᤈᤠ ᤋᤱᤃᤠᤶ ᤆᤥᤃᤢ ᤐᤡᤖᤢᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤘᤕᤧ॥ 33 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤒᤷᤈᤡᤗᤤᤴ ᤔᤧᤳᤋᤢ. “ᤀᤠᤱᤃᤠ᤹ᤏᤢ ᤏᤠᤜᤠᤱ ᤏᤠ᤺ᤰᤂᤢᤶᤔᤠᤱ ᤐᤣᤃᤡ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤕᤖᤢᤛᤗᤧᤶᤔᤥ ᤋᤱᤃᤠᤶ ᤆᤥᤃᤢᤱ ᤐᤡᤏᤧ॥” 34 ᤒᤷᤈᤡᤗᤤᤸᤗᤧ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤴ ᤕᤖᤢᤛᤗᤧᤔ ᤂᤧᤏᤧ᤹ᤏᤢ ᤐᤣ᤺ᤰᤔᤠᤖᤧ ᤗᤠᤃᤡ ᤛᤠ᤹ᤖᤡᤰ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᤘᤠ᤹॥ 35 ᤀᤠᤱᤃᤠ᤹ ᤕᤧᤳᤐᤥᤱ ᤋᤱᤒᤣ ᤁᤧᤖᤠᤱᤈᤢᤖᤠᤱ॥ ᤀᤠᤸᤗ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ ᤁᤵᤔᤠ ᤗᤧᤖᤢᤱ॥ ᤀᤠᤱᤃᤠ᤹ ᤆᤠᤱᤒᤠ ᤌᤢᤅᤢᤱᤒᤠ ᤁᤢᤈᤠ᤺ᤸᤗᤧ ᤁᤢᤗᤡᤶᤔᤠ ᤁᤢᤗᤠ᤺ᤰᤔᤠ ᤏᤡᤱᤘᤠ᤹ ᤔᤧᤄᤥᤀᤠᤴ॥ ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ᤖᤧ ᤛᤠᤶᤔᤧᤗᤥᤒᤠ ᤛᤠᤶᤗᤥᤴ ᤛᤧᤶᤔᤠ ᤔᤧᤛᤢᤰᤁᤠᤴ॥ ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤌᤣᤀᤠᤱ ᤀᤠᤍᤠᤱᤒᤠᤖᤧ ᤁᤧᤗᤠᤃᤡ ᤕᤶᤒᤠ ᤁᤰ ᤐᤥᤱᤅᤠ᤹ᤒᤠᤒᤣ᥅ 36 ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤴ ᤕᤷᤍᤏ ᤏᤠᤜᤠᤱ ᤌᤠᤖᤡᤰᤗᤰ ᤐᤣ᤺ᤰᤗᤥ॥ ᤁᤖ ᤜᤠᤱᤅᤡᤸᤗᤧ ᤀᤠᤱᤃᤠ᤹ ᤌᤣᤀᤠᤱ ᤀᤰᤋᤱᤒᤠ ᤌᤢᤶᤄᤥ ᤁᤧᤒᤡᤀᤠᤒᤠᤒᤣ᥅ 37 ᤀᤠᤱᤃᤠ᤹ ᤏᤢ᤺ᤱᤔᤠ ᤀᤠᤓᤠ᤺ᤰᤋᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤶᤒᤠ ᤀᤠᤶᤔᤠᤖᤧ ᤂᤢᤴᤇᤡ᤹ ᤀᤡ᤺ᤵᤐᤢᤱᤒᤣᤛᤠᤱ. ᤀᤠᤱᤃᤠ᤹ ᤀᤠᤑᤣᤰ ᤀᤠᤕᤧᤰᤕᤰᤁᤥ ᤛᤡᤀᤠᤖ॥ ᤁᤵᤔᤥᤃ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤁᤡᤔᤜᤠᤔ ᤘᤠ᤹॥ ᤂᤧᤴ ᤀᤠᤍᤠᤱᤒᤠᤖᤧ ᤏᤠᤜᤠᤱ ᤗᤧᤵᤔᤠᤱ ᤋᤣ᤹ᤖᤧ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤂᤢᤏᤧ᤹ ᤁᤢᤗᤠᤃᤡ ᤌᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤃᤳᤋᤢ᤹ ᤒᤠᤄᤧᤴ ᤆᤥᤃᤧ᤹॥” 38 ᤜᤠᤱᤅᤡᤸᤗᤧ ᤔᤧᤳᤋᤢ. “ᤜᤧᤰᤁᤣᤃᤪ ᤁᤡᤔᤜᤠᤔ ᤀᤠᤱᤃᤠ᤹ᤏᤢ ᤏᤠᤜᤠᤱᤍᤠᤱ ᤐᤣ᤺ᤰᤗ. ᤜᤧᤰᤁᤩᤠᤱ ᤂᤧᤏᤧ᤹ ᤂᤢᤏᤧ᤹ ᤁᤢᤗᤠᤃᤡ ᤌᤣ ᤆᤥᤃᤧ᤹ ᤁᤧᤔᤧᤳᤋᤠ᤹ ᤜᤠᤒᤠᤄᤧᤴ ᤂᤢᤏᤧ᤹ ᤁᤢᤗᤠᤃᤡ ᤆᤥᤃᤢᤱ ᤐᤡᤖᤢᤱ᤹॥ ᤜᤧᤰᤁᤩᤠᤱ ᤂᤧᤏᤧ᤹ ᤌᤣ ᤁᤧᤏᤠ᤺ᤰᤋᤢ᤹ ᤀᤠᤱᤃᤠ᤹ ᤁᤧᤗᤠᤃᤡ ᤒᤠᤄᤧᤴ ᤆᤥᤃᤢᤱ ᤐᤡᤏᤧ᤹॥” 39 ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤕᤷᤍᤏ ᤏᤠᤜᤠᤱ ᤗᤧᤵᤔᤠᤱ ᤔᤧᤒᤣ. ᤂᤧᤴ ᤀᤣᤃᤠᤱ ᤜᤠᤱᤅᤡᤴ ᤐᤣ॥ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤒᤷᤈᤡᤗᤤᤴ ᤆᤢᤵ ᤔᤧᤳᤋᤢ. ᤜᤧᤰᤁᤩᤠᤱ ᤜᤠᤱᤘᤠᤔᤢ᤹ᤀᤡ ᤐᤡᤖᤢ. ᤜᤴᤏᤠᤱ ᤒᤷᤈᤡᤗᤤᤴ ᤀᤠᤒᤠᤅᤣ ᤁᤢᤜᤡᤶᤔᤥ ᤏᤢ᤺ᤰᤂᤧ॥ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗ ᤗᤢᤶᤔᤥ ᤐᤠ᤺ᤴᤎᤱ 40 ᤜᤠᤱᤅᤡᤴ ᤏᤠᤜᤠᤱ ᤗᤧᤵᤔᤠᤱ ᤃᤡᤗᤃᤠᤗᤀᤥ ᤐᤣ. ᤜᤧᤰᤁᤩᤠᤱ ᤁᤡᤔᤜᤠᤔ ᤂᤢᤏᤧ᤹ᤏᤢ ᤘᤕᤧ॥ ᤕᤜᤢᤍᤠᤒᤠ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤁᤢᤓᤪᤧ᤺ᤱ ᤔᤏᤠᤜᤠ᤹ᤖᤧ ᤜᤠᤱᤅᤡᤴ ᤕᤷᤍᤏ ᤘᤜ᤺ᤱ ᤏᤠᤎᤠ᤺ᤶᤒᤡ ᤔᤧᤛᤔᤧᤎ॥ 41 ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤥᤖᤡᤰ ᤔᤧᤒᤥ᤺ᤰᤂᤧᤀᤠᤱ ᤜᤠᤱᤅᤡᤸᤗᤧᤀᤥ ᤔᤧᤍᤩᤧ. ᤜᤧᤰᤁᤩᤠᤱ ᤀᤰᤂᤣ ᤔᤧᤔᤧᤳᤋᤢ. “ᤀᤠᤏᤡᤃᤣ ᤑᤢ᤹ᤏᤢᤛᤠ᤹ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤀᤠᤍᤠᤱᤒᤠ ᤌᤣᤀᤠᤱ ᤁᤧᤶᤍᤣ᤹ᤖᤧᤒᤠ. ᤜᤧᤰᤁᤩᤠᤱ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ ᤕᤷᤍᤏ ᤏᤠᤜᤠᤱᤍᤠᤱ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤍᤠᤖᤢᤛᤡᤒᤠ᥅” 42 ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢ. “ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤱᤃ ᤀᤠᤒᤠᤅᤣ ᤀᤠᤏᤡᤃᤣ ᤔᤏᤠᤖᤥ॥ ᤁᤴ ᤐᤠ᤺ᤴᤏᤥ ᤀᤠᤍᤠᤱᤒᤠ ᤌᤣᤀᤠᤱ ᤀᤠᤏᤡᤃᤧᤏᤢ ᤁᤧᤛᤡᤰ ᤐᤥ᤺ᤰᤐᤠᤒᤣ᥅ ᤀᤠᤏᤡᤃᤣ ᤜᤠᤱᤅᤡᤸᤗᤧ ᤁᤢᤕᤠᤱ ᤆᤠᤶᤒᤧᤀᤠᤱ ᤘᤠ᤹ᤒᤡ᥅ ᤀᤠᤏᤡᤃᤣ ᤌᤧᤔᤠ ᤛᤢᤱᤜᤠ᤹ ᤋᤠ᤺ᤰᤋᤢᤶᤒᤧᤀᤠᤱ ᤘᤠ᤹ᤒᤣ᥅” 43 ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡ. “ᤜᤠᤱᤅᤡᤴ ᤀᤠᤏᤡᤃᤧᤴ ᤁᤧᤗ᤹ᤒᤠ ᤌᤡᤒᤥᤱᤗᤰ ᤁᤳᤋᤢᤶᤒᤧ. ᤜᤧᤰᤁᤩᤠᤱ ᤍᤠᤀᤢᤍᤖᤧᤀᤥ ᤂᤧᤏᤡ᤹ᤀᤡᤴᤏᤢ᤺ᤸᤗᤧ ᤕᤖᤡᤰ ᤜᤠᤱᤅᤡᤴ ᤀᤠᤏᤡᤃᤧᤴ ᤁᤧᤗ᤹ᤒᤠ ᤕᤢᤰ ᤁᤳᤋᤢᤶᤒᤧ॥ ᤀᤠᤏᤡᤃᤣ ᤌᤣᤀᤠᤱ ᤕᤥᤕᤥᤰᤐᤠ ᤕᤠᤵᤔᤡ ᤁᤧᤀᤡ᤺ᤳᤋᤡᤒᤠ᥅ ᤜᤠᤱᤅᤡᤴ ᤏᤢ᤺ᤰᤔᤠᤀᤠᤱ ᤋᤠ᤺ᤵᤐᤠ ᤐᤠ᤺ᤴᤏᤡᤴ ᤀᤠᤏᤡᤃᤣ ᤋᤃᤡ ᤆᤥᤃᤢᤶᤒᤧᤒᤠ ᤔᤣ᤺ᤶᤒᤡ᥅” ᤁᤖ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤏᤢ᤺ᤸᤗᤧ ᤕᤶᤒᤠ ᤕᤶᤒᤠ ᤐᤠᤴ ᤔᤧᤒᤠ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.