᥈ ᤛᤠᤔᤢᤀᤧᤗ 18 - LIFOTNTᤀᤒ᤻ᤛᤠᤗᤥᤔᤧᤴ ᤜᤠᤖᤡ ᤋᤩᤧᤀᤠᤱ ᤔᤧᤛᤧᤖᤢ 1 ᤍᤠᤀᤢᤍᤖᤧ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤌᤰᤛᤢᤒᤠᤜᤠ᤹ ᤌᤱᤗᤧ ᤗᤠᤃᤡ ᤑᤢᤰᤂᤢᤛᤡ. ᤜᤧᤰᤁᤩᤠᤱ ᤜᤧᤴᤇᤡᤱ ᤜᤧᤴᤇᤡᤱ ᤏᤢ ᤁᤡᤵᤌᤡᤰ ᤁᤡᤵᤌᤡᤰ ᤌᤰᤛᤢᤒᤠᤜᤠ᤹ ᤗᤠᤶᤃᤧᤗᤥᤒᤠ ᤗᤠᤶᤗᤥᤒᤠᤜᤠ᤹ ᤛᤣᤃᤢᤛᤡ॥ 2 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤂᤧᤱᤜᤠ᤹ ᤛᤢᤶᤛᤡ ᤗᤰᤁᤥ ᤛᤧᤴᤍᤢᤛᤡᤀᤠᤱ ᤐᤠᤱᤄᤢᤛᤡ—ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒ ᤏᤢ ᤂᤧᤸᤗᤧ ᤁᤢᤴᤛᤠ᤹ ᤀᤒᤡᤛᤤᤴ ᤜᤧᤰᤁᤩᤠᤱ ᤃᤡᤳᤋᤡ ᤀᤡᤳᤋᤤᤴ ᤗᤠᤶᤗᤥᤒᤠ ᤘᤕᤧ॥ ᤜᤠᤱᤅᤡᤸᤗᤧ ᤗᤠᤶᤗᤥᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ᤀᤠᤱ ᤂᤡᤏᤡ᤹ᤏᤢᤀᤣ ᤌᤱᤅᤥ ᤐᤣ᤺ᤰᤁᤠ॥” 3 ᤁᤖ ᤌᤰᤛᤢᤒᤠᤜᤠ᤹ᤖᤧ ᤔᤧᤔᤧᤳᤋᤢ. “ᤔᤣ᤺ᤴ. ᤀᤠᤍᤠᤱᤒᤠ ᤔᤧᤒᤣᤃᤧᤴᤏᤧ᤹॥ ᤌᤱᤅᤥ ᤀᤠᤏᤡᤃᤣ ᤂᤧᤳᤇᤡᤱᤔᤠ ᤐᤥᤱᤅᤡᤸᤗᤧ ᤁᤢᤓᤪᤧ᤺ᤱ ᤕᤠᤖᤡᤰ ᤛᤩᤧ᤹ᤀᤡᤃᤧᤛᤠᤱ ᤀᤠᤳᤋᤡᤸᤗᤧᤀᤠᤱ ᤕᤠᤖᤔᤧᤴᤈᤥᤃᤡᤃᤧᤴ॥ ᤁᤖ ᤀᤠᤍᤠᤱᤒᤠᤃ ᤀᤠᤏᤡᤃᤣ ᤌᤡᤒᤥᤱ ᤜᤧᤴᤇᤡᤱ ᤁᤢᤀᤡᤛᤡ᤺ᤰᤐᤠ ᤁᤧᤈᤥᤰ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠ ᤕᤧᤰᤕᤰᤁᤥ ᤁᤧᤕᤢᤱᤅᤠᤱ ᤀᤠᤏᤡᤃᤣ ᤕᤠᤵᤔᤡ ᤁᤧᤓᤠ᤹ᤀᤡᤸᤗᤧ ᤏᤢᤒᤠ ᤐᤥᤱ॥” 4 ᤜᤠᤱᤅᤡᤸᤗᤧ ᤔᤧᤳᤋᤢᤛᤡ. “ᤜᤧᤰᤁᤣᤃᤪ ᤂᤡᤏᤡ᤹ ᤌᤣ ᤆᤥ᤺ᤰᤔᤠ ᤛᤡᤖᤠ᤹ᤎᤠᤱ ᤀᤠᤱᤃᤠ᤹ ᤜᤠᤒᤠᤄᤧᤴ ᤆᤥᤃᤢᤱ᤹॥” ᤂᤧᤸᤗᤧᤆᤥᤃᤢᤸᤗᤧ ᤜᤠᤱᤅᤡᤴ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤒᤣᤛᤠᤱ ᤕᤧᤒᤧ. ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ᤖᤧ ᤌᤱ ᤁᤧᤈᤥ᤺ᤰᤐᤠ ᤌᤰᤛᤢᤒᤠᤜᤠ᤹ ᤜᤧᤴᤇᤡᤱ ᤜᤧᤴᤇᤡᤱ ᤏᤢ ᤁᤡᤵ ᤌᤡᤰ ᤌᤡᤰᤁᤥ ᤁᤢᤒᤣᤛᤠᤱᤗᤠᤶ ᤗᤠᤶᤔᤧᤗᤥᤛᤢᤛᤡ॥ 5 ᤜᤠᤱᤅᤡᤸᤗᤧ ᤕᤥᤀᤠᤒ. ᤀᤒᤡᤛᤤ ᤏᤢ ᤀᤡᤳᤋᤤᤴ ᤁᤴ ᤀᤡᤱᤈᤠᤱ ᤐᤡᤖᤢᤛᤡ. “ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤴ ᤌᤠᤱᤒᤧᤴ ᤀᤠᤛ᤻ᤛᤠ ᤀᤒ᤻ᤛᤠᤗᤥᤶᤔᤡᤴ ᤔᤧᤛᤧᤖᤧᤶᤔᤡᤴᤏᤧ᤹॥” ᤀᤒ᤻ᤛᤠᤗᤥᤶᤔᤡᤴ ᤛᤧ᤺ᤵᤋᤠᤶᤔᤧ᤹ ᤑᤠ᤹ᤀᤠᤱ ᤜᤠᤱᤅᤡᤸᤗᤧ ᤗᤠᤶᤗᤥᤒᤠᤜᤠ᤹ ᤀᤒ᤻ᤛᤠᤗᤥᤔᤖᤧ ᤁᤢᤕᤠ᤺ᤶᤒᤣᤀᤥ ᤐᤡᤖᤢᤛᤡᤒᤠ ᤀᤡᤱᤈᤠᤱᤅᤡᤴ ᤁᤧᤖᤧᤰ ᤌᤰᤛᤢᤒᤠᤜᤠ᤹ᤖᤧ ᤔᤧᤄᤧᤵᤛᤢ॥ 6 ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤔᤧᤗ᤺ᤴᤍᤧ. ᤜᤧᤰᤁᤩᤠᤱ ᤌᤱᤅᤡᤴ ᤀᤣᤑᤪᤠᤀᤡᤔᤒᤠ ᤋᤠᤶᤓᤢᤱᤔᤥ ᤐᤥ᤺ᤰᤂᤧ॥ 7 ᤂᤧᤵᤔᤥ ᤍᤠᤀᤢᤍᤖᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤠ᤺ᤴᤍᤢᤛᤡ॥ ᤜᤧᤰᤁᤩᤠᤱ ᤂᤧᤵᤔᤥ ᤛᤠ᤹ᤖᤡᤰ ᤕᤖᤡᤰ ᤔᤧᤛᤧᤳᤇᤡᤱ. ᤂᤧᤴ ᤕᤧᤴᤏᤥ ᤜᤧᤴᤇᤡᤱ ᤏᤡᤒᤥᤱ ᤔᤏᤠᤜᤠ᤹ ᤌᤱᤅᤥ ᤔᤧᤛᤩᤧ॥ 8 ᤌᤱᤅᤡᤴ ᤁᤧᤖᤧᤰ ᤐᤡᤛᤠᤱ ᤛᤧᤖᤧ. ᤜᤧᤰᤁᤩᤠᤱ ᤋᤠᤓᤣᤸᤗᤧᤏᤢ᤺ᤸᤗᤧ ᤕᤖᤡᤰ ᤋᤠᤶᤓᤢᤱᤔᤥ ᤔᤏᤠᤜᤠ᤹ ᤔᤧᤛᤩᤧ॥ 9 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ᤖᤧ ᤀᤒ᤻ᤛᤠᤗᤥᤶᤔᤡᤴ ᤔᤧᤏᤡᤛᤢ॥ ᤂᤢᤏᤧ᤹ ᤁᤢᤀᤍᤱᤅᤡᤴ ᤕᤢᤰᤋᤢᤀᤠᤱ ᤘᤕᤧ. ᤁᤖ ᤂᤧᤴ ᤀᤍᤱᤅᤡᤴ ᤕᤜᤡᤒᤠ ᤛᤡᤱᤒᤢᤱᤅᤡᤸᤗᤧ ᤁᤢᤛᤡᤃᤠᤱᤗᤠᤶ ᤗᤠᤱᤄᤣᤃᤧᤀᤠᤱ ᤐᤣ. ᤜᤧᤰᤁᤣ᤺ᤸᤗᤧ ᤀᤒ᤻ᤛᤠᤗᤥᤔᤖᤧ ᤁᤢᤎᤧᤃᤣᤰ ᤀᤡ᤺ᤴ ᤁᤢᤒᤥᤖᤠᤰᤁᤥ ᤜᤠᤵᤋᤢᤀᤠᤱ ᤋᤧᤸᤗᤧᤶ ᤑᤥ᤺ᤴᤇᤡᤱ. ᤀᤍᤱᤅᤡᤴ ᤁᤢᤛᤡ᤺ᤰᤋᤥᤗᤠᤶ ᤐᤣ॥ 10 ᤍᤠᤀᤢᤍᤖᤧ ᤁᤢᤔᤏᤠᤎᤡᤰᤗᤧ ᤂᤧᤴ ᤏᤡᤛᤢᤀᤠᤱ ᤕᤥᤀᤠᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤒ᤻ᤛᤠᤗᤥᤶᤔᤡᤴ ᤕᤜᤡᤒᤠ ᤛᤡᤱᤒᤢᤱᤔᤥ ᤑᤥ᤺ᤴᤇᤡᤱᤅᤠᤱ ᤐᤳᤇᤧᤒᤠ ᤏᤡᤛᤢᤱ॥” 11 ᤁᤴ ᤐᤠ᤺ᤴᤏᤡᤴ ᤁᤧᤔᤧᤵᤐᤠ ᤔᤏᤠᤴ ᤕᤥᤀᤠᤒᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤂᤧᤴ ᤁᤧᤏᤡᤛᤢᤒᤡ᥅ ᤌᤣᤀᤠᤱ ᤂᤧᤏᤧ᤹ ᤜᤠᤒᤠ ᤂᤧᤴ ᤕᤧᤶᤔᤥ ᤁᤧᤴᤇᤧᤖᤢᤴ᥅ ᤀᤠᤱᤃᤠ᤹ ᤌᤡᤒᤥᤱ ᤛᤣᤁᤣᤗ ᤏᤢ ᤌᤱ ᤏᤠ᤺ᤶᤔᤠ ᤑ᤹ᤀᤡ᤺ᤴ ᤐᤡᤏᤧᤔᤧᤴ॥” 12 ᤁᤖ ᤂᤧᤴ ᤔᤏᤠ᤺ᤸᤗᤧ ᤕᤥᤀᤠᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤜᤧᤴᤇᤡᤱᤎᤡᤰ ᤛᤣᤁᤣᤗ ᤁᤧᤒᤡᤖᤠᤱᤛᤠᤱ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤴ ᤔᤧᤴᤇᤧᤵᤐᤠᤱᤅᤡᤶᤒᤠᤖᤥ॥ ᤌᤣᤀᤠᤱᤓᤧᤸᤗᤧ ‘ᤜᤠ᤺ᤳᤗᤧ ᤂᤧᤴ ᤌᤠᤱᤒᤧᤴ ᤛᤠ ᤀᤒ᤻ᤛᤠᤗᤥᤶᤔᤡᤴ ᤏᤡᤛᤢ᤹ ᤂᤧᤴ ᤂᤧᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤛᤧ᤺ᤵᤋᤠᤶᤔᤧ᤹’ ᤑᤠ᤹ᤀᤠᤱ ᤜᤠᤱᤅᤡᤸᤗᤧ ᤂᤧᤏᤧ᤹. ᤀᤒᤡᤛᤤ ᤏᤢ ᤀᤡᤳᤋᤤᤴ ᤀᤡᤱᤈᤠᤱ ᤁᤧᤒᤡᤖᤡᤒᤠᤴ ᤀᤠᤏᤡᤃᤣ ᤂᤧᤵᤛᤢᤶᤒᤧᤀᤠᤱ ᤘᤠ᤹॥ 13 ᤁᤖ ᤀᤠᤱᤃᤠ᤹ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤧᤶᤔᤠ ᤔᤧᤴᤍᤧᤴᤏᤣ ᤀᤒ᤻ᤛᤠᤗᤥᤶᤔᤡᤴ ᤛᤧᤖᤢᤱᤏᤧᤓᤃᤪ ᤜᤠᤱᤅᤡᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢ᤹. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤠᤱᤃᤠ᤹ ᤕᤠᤵᤔᤡ ᤐᤰᤁᤧᤎᤠᤒᤠᤀᤠᤱ ᤁᤧᤒᤣ᤺ᤰᤐᤠ ᤂᤧᤏᤧ᤹ᤀᤣ ᤁᤧᤒᤥ᤺ᤰᤂᤧᤔᤧᤴ॥” 14 ᤕᤥᤀᤠᤒᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ᤏᤢ ᤀᤠᤱᤃᤠ᤹ ᤏᤠᤶᤍᤣᤛᤡᤱᤔᤠ ᤆᤠᤜᤠ ᤔᤧᤈᤥᤰᤁᤠᤴ॥” ᤜᤧᤰᤁᤩᤠᤱ ᤕᤥᤀᤠᤒᤧᤸᤗᤧ ᤛᤢᤶᤛᤡ ᤗᤠ᤺ᤰ ᤕᤠᤱᤛᤡᤱ. ᤜᤧᤰᤁᤩᤠᤱ ᤛᤡᤱᤒᤢᤱᤔᤥ ᤁᤢᤜᤡᤱᤘᤧᤳ ᤁᤧᤓᤥ᤺ᤴᤇᤡᤱᤒᤠ ᤀᤒ᤻ᤛᤠᤗᤥᤔᤖᤧ ᤁᤢᤛᤱᤒᤣ᤹ᤔᤥ ᤌᤢᤒᤢ॥ 15 ᤜᤧᤰᤁᤩᤠᤱ ᤕᤥᤀᤠᤒᤖᤧ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠ ᤌᤡᤒᤥᤱ ᤔᤏᤠᤜᤠ᤹ᤖᤧ ᤀᤒ᤻ᤛᤠᤗᤥᤔᤧᤴ ᤔᤧᤃᤒᤢ. ᤜᤧᤰᤁᤩᤠᤱ ᤂᤧᤴ ᤔᤧᤜᤡᤵᤋᤢᤀᤠᤱ ᤔᤧᤛᤧᤖᤢ॥ 16 ᤜᤧᤰᤁᤩᤠᤱ ᤕᤥᤀᤠᤒᤖᤧ ᤛᤠᤍᤠᤱᤅᤡᤴ ᤔᤢ᤺ᤳᤋᤢ. ᤜᤴᤏᤠᤱ ᤌᤰᤛᤢᤒᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤺ᤵᤔᤠ ᤔᤧᤗᤧᤖᤢᤛᤡᤀᤠᤱ ᤔᤧᤏᤢ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤕᤥᤀᤠᤒᤖᤧ ᤌᤰᤛᤢᤒᤠᤜᤠ᤹ ᤀᤠᤸᤗ ᤕᤠ᤺ᤰᤋᤢ ᤔᤧᤳᤋᤢᤛᤡ॥ 17 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤒ᤻ᤛᤠᤗᤥᤔᤖᤧ ᤁᤢᤈᤣᤴ ᤔᤧᤍᤣ᤹ᤖᤢᤀᤠᤱ ᤋᤠᤶᤓᤢᤱᤅᤥᤒᤠ ᤕᤶᤒᤠ ᤐᤠ᤺ᤰᤂᤢᤶᤒᤡᤀᤥ ᤗᤠᤵᤔᤧᤓᤢᤛᤢ. ᤜᤴᤏᤠᤱ ᤂᤧᤴ ᤛᤶᤎᤠᤱ ᤗᤢᤱ ᤔᤧᤗᤢᤵᤛᤢ॥ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤄᤧᤳᤇᤡᤱᤅᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤜᤡᤶᤔᤥ ᤔᤧᤒᤣ॥ 18 ᤀᤒ᤻ᤛᤠᤗᤥᤔ ᤁᤢᤜᤡᤱᤘᤧᤳ ᤘᤕᤧᤸᤗᤧ ᤜᤠᤱᤅᤡᤸᤗᤧ ᤁᤢᤏᤧᤏᤧᤒᤠᤍᤧᤴ ᤂᤢᤏᤧ᤹ ᤛᤡᤳᤗᤠᤱᤎᤡᤰ ᤕᤧᤵᤛᤢᤀᤠᤱ ᤕᤧᤒᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢᤀᤠᤱ ᤘᤕᤧ. “ᤀᤠᤱᤃᤠ᤹ ᤀᤠᤔᤡᤱ ᤕᤢᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤛ᤻ᤛᤠ ᤔᤧᤜᤥᤵ॥” ᤂᤧᤴ ᤛᤡᤳᤗᤠᤱᤅᤡᤴᤏᤣ ᤂᤢᤏᤧ᤹ ᤁᤢᤔᤡᤱ ᤘᤠ᤺ᤳᤋᤢ. ᤜᤧᤰᤁᤩᤠᤱ ᤀᤠᤀᤡᤴ ᤌᤠᤖᤡᤰ ᤂᤧᤴ ᤛᤡᤳᤗᤠᤱᤅᤡᤴ ᤀᤒ᤻ᤛᤠᤗᤥᤔᤖᤧ ᤁᤢᤀᤡ᤺ᤳᤗᤠ ᤔᤧᤔᤧᤳᤋᤢᤖᤥ॥ ᤍᤠᤀᤢᤍᤖᤧ ᤀᤒ᤻ᤛᤠᤗᤥᤔᤧᤴ ᤛᤩᤧᤒᤠ ᤂᤧᤵᤛᤢ 19 ᤛᤍᤥᤁᤖᤧ ᤁᤢᤛ᤻ᤛᤠ ᤀᤜᤡᤔᤠᤛᤖᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤅᤡᤴ ᤁᤢᤏᤡᤱᤔᤡᤜᤠ᤹ᤗᤠᤶ ᤛᤧ᤺ᤵᤋᤢ ᤁᤧᤗ᤹ᤒᤠ ᤀᤡᤱᤄᤱ ᤜᤠᤱᤅᤡᤴ ᤐᤡᤔᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ᤹॥” 20 ᤜᤧᤰᤁᤩᤠᤱ ᤕᤥᤀᤠᤒᤖᤧ ᤔᤧᤳᤋᤢ. “ᤀᤠᤀᤡᤱᤃ ᤂᤧᤏᤧ᤹ ᤀᤡᤱᤄᤱ ᤋᤣ᤹ᤔᤠ ᤔᤧᤏᤢ᤹ᤏᤧᤴ॥ ᤘᤣ᤹ ᤕᤧᤴᤏᤥ ᤂᤧᤏᤧ᤹ ᤀᤡᤱᤄᤱ ᤁᤧᤍᤣ᤹ᤖᤢᤛᤠᤱ ᤐᤥᤱ. ᤁᤖ ᤀᤠᤀᤡᤴᤃ ᤔᤣ᤺ᤴ॥ ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤴ ᤀᤠᤀᤡᤴ ᤛᤩᤧᤀᤠᤱ ᤘᤠ᤹॥” 21 ᤜᤧᤰᤁᤩᤠᤱ ᤕᤥᤀᤠᤒᤧᤸᤗᤧ ᤗᤳᤇᤠ ᤁᤢᤛ ᤛᤢᤘᤠᤱᤒᤠ ᤔᤏᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤡᤛᤢᤒᤠ ᤐᤠ᤺ᤴᤏᤡᤴ ᤐᤣᤃᤧ᤹ᤀᤠᤱ ᤜᤠᤱᤅᤡᤴ ᤆᤧᤰᤋᤧ᤹॥” ᤜᤴᤏᤠᤱ ᤂᤧᤴ ᤁᤢᤛᤡ ᤛᤢᤘᤠᤱᤒᤠᤴ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤕᤥᤀᤠᤒᤧᤴ ᤛᤧᤘᤠ ᤔᤧᤳᤋᤢ. ᤂᤧᤒᤩᤠᤱ ᤗᤥ᤺ᤰᤋᤧᤖ ᤐᤣ॥ 22 ᤛᤍᤥᤁᤖᤧ ᤁᤢᤛ᤻ᤛᤠ ᤀᤜᤡᤔᤠᤛᤖᤧ ᤕᤠᤶᤔᤥ ᤕᤥᤀᤠᤒᤧᤴ ᤐᤣᤗᤡ ᤑᤠᤰᤋᤢ॥ ᤂᤧᤸᤗᤧ ᤔᤧᤳᤋᤢ. “ᤀᤠᤰᤂᤣᤗ᤹ᤖᤡᤰᤛᤠᤱ ᤀᤠᤱᤃᤠ᤹ ᤁᤢᤛᤡ᤺ᤸᤗᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤗᤥ᤺ᤰᤔᤠᤀᤠᤱ ᤐᤣ᤺ᤰᤔᤠ ᤀᤠᤒᤠᤱᤄᤧ᤹॥” ᤕᤥᤀᤠᤒᤧᤸᤗᤧ ᤛᤣ᤺ᤴᤍᤥᤛᤢ. “ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤌᤣᤀᤠᤱ ᤁᤧᤒᤣ᤺ᤰᤐᤠ᥅ ᤂᤧᤏᤧ᤹ ᤁᤧᤀᤡᤱᤄᤱᤅᤡᤸᤗᤧ ᤗᤠᤃᤡ ᤂᤧᤏᤧ᤹ ᤌᤣᤀᤠᤱ ᤌᤢᤶᤄᤥ ᤁᤧᤱᤄᤥᤛᤢᤴ॥” 23 ᤀᤜᤡᤔᤠᤛᤧᤸᤗᤧ ᤔᤧᤳᤋᤢ. “ᤈᤩᤠ ᤐᤥᤱᤃᤪ ᤐᤥᤱ॥ ᤀᤠᤱᤃᤠ᤹ ᤗᤥ᤺ᤰᤁᤠᤖ ᤐᤣ᤺ᤰᤁᤠ॥” ᤕᤥᤀᤠᤒᤧᤸᤗᤧ ᤔᤧᤳᤋᤢ. “ᤜᤧᤰᤁᤣᤃᤪ ᤐᤣᤃᤧ᤹॥” ᤜᤧᤰᤁᤣ᤺ᤸᤗᤧ ᤀᤜᤡᤔᤠᤛᤧᤴ ᤕᤷᤍᤏᤒᤠ ᤋᤧᤶᤒᤣ᤹ᤗᤠᤶ ᤐᤥ᤺ᤰᤂᤧᤀᤠᤱ ᤗᤥ᤺ᤰᤋᤧ. ᤜᤧᤰᤁᤩᤠᤱ ᤂᤧᤴ ᤁᤢᤛ ᤛᤢᤘᤠᤱᤒᤠ ᤔᤏᤠᤴ ᤗᤠᤶᤒᤠᤰᤋᤢ॥ 24 ᤂᤧᤴ ᤕᤧᤶᤔᤥ ᤍᤠᤀᤢᤍᤧᤴ ᤗᤠᤶᤎᤣᤳ ᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤗ᤺ᤶᤔᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤗᤢᤶᤔᤥᤒᤠ ᤕᤠᤰᤑᤠᤱᤅᤥ ᤕᤢᤅᤧ॥ ᤜᤧᤰᤁᤩᤠᤱ ᤀᤡᤰᤁᤧᤃᤥᤒᤧᤴ ᤌᤥ ᤂᤠᤶᤒᤢᤀᤥ ᤐᤣᤀᤠᤱ ᤏᤠᤏᤠ ᤁᤳᤏᤠ ᤗᤠᤱᤄᤣᤃᤧᤖ ᤀᤥᤔᤔᤠ ᤜᤣ᤺ᤰᤋᤧ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤀᤥᤔᤕᤧᤸᤗᤧ ᤗᤳᤇᤠ ᤔᤏᤠᤎᤡᤰ ᤀᤣ᤺ᤰ ᤗᤥ᤺ᤰᤋᤧ ᤑᤧᤖᤧᤖ ᤐᤳᤇᤧᤒᤠ ᤏᤡᤛᤢ॥ 25 ᤂᤧᤴ ᤗᤠᤶᤎᤣᤳ ᤁᤧᤃᤥᤒᤠᤸᤗᤧ ᤜᤠᤱᤅᤡᤴ ᤁᤴ ᤐᤠ᤺ᤴᤏᤡᤴ ᤔᤧᤳᤋᤢ॥ ᤜᤠᤱᤅᤡᤸᤗᤧ. “ᤂᤧᤴ ᤀᤧᤰᤗᤣ᤺ᤰ ᤘᤠ᤹ᤏᤧᤓᤠᤃᤪ ᤛᤧᤰᤂᤠᤛᤠᤱ ᤏᤢᤒᤠ ᤀᤡᤱᤄᤱ ᤑᤧᤳᤋᤢᤀᤡᤖᤠ॥” ᤂᤧᤴ ᤔᤏᤠᤴ ᤏᤡ᤺ᤳᤋᤠᤱ ᤑᤧᤖᤧᤖ ᤑᤧᤖᤧ॥ 26 ᤗᤠᤶᤎᤣᤳ ᤀᤡᤰᤁᤧᤃᤥᤒᤠᤸᤗᤧ ᤘᤣ᤹ ᤗᤳᤇᤠ ᤔᤏᤠᤎᤡᤰ ᤗᤥ᤺ᤰᤋᤧ ᤑᤧᤖᤧᤖ ᤐᤳᤇᤧᤒᤠ ᤏᤡᤛᤢ॥ ᤂᤧᤸᤗᤧ ᤕᤥᤛᤔᤠ ᤗᤠᤶᤎᤣ᤺ᤳᤋᤥ ᤁᤧᤕᤧᤵᤐᤠ ᤔᤏᤠᤴ ᤔᤧᤳᤋᤢ. “ᤀᤥᤔᤧᤳᤋᤧ᥄ ᤘᤣ᤹ ᤔᤏᤠᤎᤡᤰᤁᤠᤱ ᤗᤥ᤺ᤰᤗ ᤑᤧᤴᤗ ᤐᤳ॥” ᤜᤠᤱᤅᤡᤸᤗᤧ ᤐᤠ᤺ᤳᤋᤢ. “ᤂᤧᤸᤗᤧᤀᤠᤱ ᤏᤢᤒᤠ ᤀᤡᤱᤄᤱᤅᤣ ᤋᤠᤖᤢᤖ ᤐᤳᤋᤡᤖᤠ॥” 27 ᤂᤧᤴ ᤀᤡᤰᤁᤧᤃᤥᤒᤧᤸᤗᤧ ᤔᤧᤳᤋᤢ. “ᤂᤧᤴ ᤋᤃᤡ ᤁᤧᤗᤥ᤺ᤰᤐᤧᤱᤃ ᤛᤍᤥᤁᤖᤧ ᤁᤢᤛ᤻ᤛᤠ ᤀᤜᤡᤔᤠᤛᤧᤴ ᤜᤧᤰᤁᤣ ᤗ᤹॥” ᤜᤠᤱᤅᤡᤸᤗᤧ ᤔᤧᤳᤋᤢ. “ᤂᤧᤱᤃ ᤛᤠ᤹ᤖᤡᤰ ᤏᤢᤒᤠ ᤔᤏᤠᤖᤥ. ᤏᤢᤒᤠᤀᤣ ᤀᤡᤱᤄᤱ ᤋᤠᤖᤢᤀᤠᤱ ᤋᤠᤖ ᤐᤳᤋᤡᤖᤠ॥” 28 ᤜᤧᤰᤁᤩᤠᤱ ᤀᤜᤡᤔᤠᤛᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤜᤠᤱᤅᤡᤴ ᤔᤧᤳᤋᤢ. “ᤏᤢᤒᤠᤀᤣ ᤘᤠ᤹॥” ᤜᤠᤱᤅᤡᤸᤗᤧ ᤁᤢᤍᤃᤡ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢᤖ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖ. ᤂᤢᤏᤧ᤹ᤀᤣ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠ ᤔᤏᤠᤜᤠ᤹ ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥ ᤁᤧᤒᤡᤖᤧᤀᤠᤱ ᤘᤠ᤹॥” 29 ᤜᤠᤱᤅᤡᤸᤗᤧ ᤔᤧᤳᤋᤢ. “ᤌᤠᤱᤒᤧᤴ ᤀᤒ᤻ᤛᤠᤗᤥᤔᤧᤴ ᤏᤢ᤹ᤖ ᤘᤠ᤹ᤒᤡ᥅” ᤀᤜᤡᤔᤠᤛᤖᤧ ᤔᤧᤳᤋᤢ. “ᤕᤥᤀᤠᤒᤖᤧ ᤜᤠᤱᤅᤡᤸᤗᤧ ᤁᤧᤛᤧᤘᤠᤖᤥᤒᤠᤴ ᤏᤢ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤐᤠᤱᤄᤧᤛᤡᤃᤧᤸᤗᤧ ᤀᤠᤱᤃᤠ᤹ ᤕᤶᤒᤠ ᤜᤕᤱ ᤁᤡᤸᤗᤡᤱ ᤐᤥ᤺ᤰᤂᤧᤒᤠ ᤏᤡᤛᤢᤱ. ᤁᤖ ᤂᤧᤵᤔᤥ ᤌᤣ ᤐᤥ᤺ᤰᤂᤧ ᤂᤧᤴ ᤔᤧᤴᤏᤡᤒᤠᤱᤗᤥ॥” 30 ᤜᤠᤱᤅᤡᤸᤗᤧ ᤂᤧᤴ ᤌᤡᤰᤗᤧᤵᤔᤠᤱ ᤕᤧᤵᤔᤠ ᤐᤠᤱᤄᤢ॥ ᤂᤢᤏᤧ᤹ ᤌᤡᤰᤗᤧᤵᤔᤠᤱ ᤐᤣᤀᤠᤱ ᤕᤧᤒᤧ॥ 31 ᤜᤧᤰᤁᤩᤠᤱ ᤂᤧᤴ ᤁᤢᤛᤡ ᤛᤢᤘᤠᤱᤒᤠ ᤔᤏᤠᤴ ᤋᤩᤧᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤄᤱ ᤏᤢᤒᤠ ᤘᤠ᤹᥄ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠ ᤁᤧᤖᤧᤰᤗᤠᤶ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤀᤡᤴ ᤂᤧᤏᤧ᤹ ᤁᤧᤛᤧ᤺ᤵᤋᤧᤀᤠᤱ ᤘᤠ᤹॥” 32 ᤜᤠᤱᤅᤡᤸᤗᤧ ᤂᤧᤴ ᤁᤢᤛ ᤛᤢᤘᤠᤱᤒᤠᤴ ᤛᤣ᤺ᤴᤍᤥᤛᤢ. “ᤀᤒ᤻ᤛᤠᤗᤥᤔᤧᤴ ᤏᤢ᤹ᤖ ᤘᤠ᤹ᤒᤡ᥅” ᤁᤢᤛᤡ ᤛᤢᤘᤠᤱᤒᤠ ᤔᤏᤠ᤺ᤸᤗᤧ ᤔᤧᤳᤋᤢ. “ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤏᤡᤱᤔᤡᤜᤠ᤹ ᤏᤢ ᤁᤢᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧ ᤜᤠᤒᤠ ᤂᤧᤴ ᤌᤠᤱᤒᤧᤴ ᤔᤏᤠ᤺ᤸᤗᤧ ᤋᤢᤔᤢᤒᤠ ᤕᤠᤰᤏᤠᤶ ᤜᤧᤰᤋᤱᤒᤠ ᤔᤧᤍᤢᤔᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱ॥” 33 ᤜᤧᤰᤁᤩᤠᤱ ᤜᤠᤱᤅᤡᤴ ᤁᤢᤕᤥᤶ ᤐᤢ᤹ᤖᤧᤀᤠᤱ ᤗᤠᤶᤎᤣᤳ ᤛᤶᤎᤠᤱᤒᤠ ᤕᤠᤰᤑᤠᤱᤅᤥ ᤗᤠᤛᤧᤀᤠᤱ ᤜᤠᤒᤧ. ᤜᤧᤰᤁᤩᤠᤱ ᤌᤥ ᤐᤣᤖ ᤐᤳᤇᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤜᤠᤒᤧ. “ᤀᤠᤛ᤻ᤛᤠᤀᤣ. ᤀᤠᤛ᤻ᤛᤠ ᤀᤒ᤻ᤛᤠᤗᤥ᤺ᤶᤔᤣ᥄ ᤀᤠᤱᤃᤠ᤹ ᤀᤠᤛ᤻ᤛᤠ ᤀᤒ᤻ᤛᤠᤗᤥ᤺ᤶᤔᤣ᥄ ᤂᤧᤏᤧ᤹ ᤁᤧᤗᤧᤰᤘᤠᤀᤥ ᤀᤠᤱᤃᤠ᤹ ᤛᤩᤠᤱᤛᤠᤱ ᤐᤥ᤺ᤰᤂᤧᤒᤠᤖᤥ᥄ ᤀᤒ᤻ᤛᤠᤗᤥ᤺ᤶᤔᤣ. ᤀᤠᤱᤃᤠ᤹ ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤛ᤻ᤛᤠᤀᤣ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.