᥈ ᤛᤠᤔᤢᤀᤧᤗ 17 - LIFOTNTᤜᤢᤛᤤ᤺ᤸᤗᤧ ᤀᤒ᤻ᤛᤠᤗᤥᤔᤧᤴ ᤗᤠᤶᤓᤥ᤺ᤳᤋᤢ 1 ᤀᤜᤡᤋᤥᤐᤣᤗᤖᤧ ᤀᤒ᤻ᤛᤠᤗᤥ᤺ᤶᤔᤧᤴ ᤔᤧᤳᤋᤢ. “ᤜᤧᤴᤇᤡᤱ ᤌᤡᤒᤥᤱᤅᤠᤱ ᤏᤧᤳᤇᤡ ᤔᤏᤠᤜᤠ᤹ ᤀᤠᤱᤃᤠ᤹ ᤛᤣᤃᤢᤱᤛᤡᤱᤔᤧᤴ. ᤜᤧᤰᤁᤩᤠᤱ ᤀᤠᤀᤡᤴ ᤛᤧᤴᤍᤡᤰᤛᤠ ᤀᤠᤱᤃᤠ᤹ ᤍᤠᤀᤢᤍᤧᤴ ᤏᤠ᤺ᤳᤋᤢᤱᤔᤧᤴ॥ 2 ᤂᤧᤴ ᤏᤠᤀᤠᤱ ᤁᤢᤛ᤻ᤛᤠ᤹ᤀᤡ ᤕᤱᤅᤡᤸᤗᤧ ᤐᤣ᤺ᤰᤁᤠᤀᤠᤱ ᤑᤳᤋᤢᤱᤔᤧᤴ॥ ᤂᤢᤏᤧ᤹ ᤕᤱᤔᤠ ᤛᤧᤖᤢᤱᤅᤠᤱ ᤂᤧᤴᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤑᤢᤳᤆᤡᤱᤈᤩᤠ᤺ᤱ ᤔᤧᤒᤥᤱᤔᤧᤴ॥ ᤜᤠᤱᤅᤡᤴᤗᤰ ᤛᤧᤖᤢᤱ ᤘᤣ᤹ ᤀᤠᤳᤋᤡᤴᤏᤠᤱ ᤔᤧᤛᤧᤳᤋᤠᤛᤡᤱᤅᤠᤴ॥ 3 ᤜᤧᤰᤁᤩᤠᤱ ᤛᤡᤛᤠᤃᤧᤴ ᤔᤣ᤺ᤳᤋᤡᤴ ᤁᤢᤕᤧᤶᤒᤠ᤹ᤀᤡᤸᤗᤧ ᤁᤢᤜᤡᤶᤔᤥ ᤋᤠᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ॥ ᤂᤧᤏᤧ᤹ᤃ ᤗᤳᤇᤠ ᤔᤏᤠ᤺ᤸᤗᤰ ᤛᤧᤵᤔᤠ ᤁᤧᤃᤥ᤺ᤳᤋᤢᤒᤠ. ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤃ ᤔᤣ᤺ᤴ॥” 4 ᤜᤧᤰᤁᤩᤠᤱ ᤀᤒ᤻ᤛᤠᤗᤥᤔ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤁᤠᤵᤐᤥ ᤋᤢᤶᤛᤠᤜᤠ᤹ ᤀᤜᤡᤋᤥᤐᤣᤗᤖᤧ ᤁᤢᤛᤢᤈᤠᤀᤥ ᤔᤧᤍᤧᤴᤍᤧ॥ 5 ᤜᤧᤰᤁᤣ᤺ᤸᤗᤧ ᤀᤒ᤻ᤛᤠᤗᤥᤔᤖᤧ ᤐᤠ᤺ᤳᤋᤢ. “ᤀᤖᤁᤡ ᤜᤢᤛᤤᤴ ᤀᤢ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤌᤣ ᤐᤠ᤺ᤳᤋᤢᤀᤡ ᤂᤧᤴ ᤀᤠᤏᤡ᤹ ᤂᤧᤵᤛᤢᤶ॥” 6 ᤜᤧᤰᤁᤩᤠᤱ ᤜᤢᤛᤤᤴ ᤀᤒ᤻ᤛᤠᤗᤥᤔᤖᤧ᤹ᤀᤥ ᤋᤩᤧ. ᤀᤒ᤻ᤛᤠᤗᤥᤔᤖᤧ ᤂᤧᤴ ᤔᤧᤳᤋᤢ. “ᤀᤜᤡᤋᤥᤐᤣᤗᤖᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤀᤠᤏᤡᤃᤣ ᤆᤥᤃᤢᤶᤒᤧᤒᤠᤒᤡ᥅ ᤔᤣ᤺ᤴᤏᤧᤑᤃᤪ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤌᤣ ᤘᤠ᤹ ᤐᤠ᤺ᤳᤋᤧ᤹॥” 7 ᤜᤢᤛᤤ᤺ᤸᤗᤧ ᤀᤒ᤻ᤛᤠᤗᤥᤶᤔᤡᤴ ᤔᤧᤳᤋᤢ. “ᤀᤜᤡᤋᤥᤐᤣᤗᤖᤧ ᤁᤢᤛᤢᤈᤠᤴ ᤏᤢᤒᤠ ᤜᤥᤵ॥” 8 ᤜᤢᤛᤤ᤺ᤸᤗᤧ ᤀᤠᤸᤗᤛᤠᤱ ᤔᤧᤳᤋᤢ. “ᤂᤧᤏᤧ᤹ ᤁᤧᤶᤒᤠ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ ᤌᤱ ᤆᤥ᤺ᤰᤔᤠ ᤁᤧᤎᤢᤶᤒᤠ ᤔᤧᤘᤠ᤹. ᤜᤧᤰᤁᤩᤠᤱ ᤁᤢᤛ᤻ᤛᤠ ᤏᤠᤵᤏᤠᤒᤠ ᤋᤠᤶᤓᤢᤱᤔᤥᤒᤠ ᤔᤠ᤺ᤰᤕᤢᤒᤠ ᤁᤢᤀᤡᤛᤡᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥ ᤁᤧᤶᤒᤠᤖᤧ ᤌᤱ ᤆᤥ᤺ᤰᤔᤠ ᤛᤠ᤹ᤖᤡᤰ ᤗᤧᤛ᤻ᤛᤢ᤹. ᤂᤢᤏᤧ᤹ ᤌᤰᤛᤢᤒᤠᤜᤠ᤹ᤏᤢ ᤛᤧᤴᤍᤡᤰ ᤔᤧᤘᤠ᤹ᤏᤧᤴ॥ 9 ᤀᤠᤸᤗᤛᤠᤱ ᤂᤢᤏᤧ᤹ ᤑᤢᤰᤁᤢᤀᤥ ᤀᤡᤃᤪ ᤀᤠᤳᤋᤠᤀᤡ ᤆᤡᤱᤛᤡᤱᤅᤠᤱ ᤕᤢᤱᤅᤡᤖᤠ॥ ᤂᤢᤏᤧ᤹ ᤋᤃᤡᤛᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤑᤳᤋᤢᤛᤡ᤹ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤁᤧᤄᤥᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤀᤒ᤻ᤛᤠᤗᤥᤔᤖᤧ ᤁᤢᤎᤰᤛᤢᤒᤠᤜᤠ᤹ ᤔᤧᤔᤧᤃᤧ॥’ 10 ᤜᤧᤰᤁᤣ᤺ᤸᤗᤧ ᤕᤶᤒᤠ ᤔᤏᤠ ᤏᤢ ᤁᤣᤒᤠ ᤁᤢᤀᤡᤛᤡᤰ ᤁᤢᤃᤡᤔᤠ ᤁᤧᤜᤥᤵᤐᤠ ᤔᤏᤠ᤺ᤸᤗᤧ ᤁᤢᤛᤡᤖᤣ ᤐᤥ᤺ᤰᤔᤠᤴ ᤔᤠᤖᤥ॥ ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤏᤧ᤹ ᤁᤧᤶᤒᤠ ᤁᤧᤎᤢᤶᤒᤠ ᤆᤥᤰ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ᤀᤠᤱ ᤁᤧᤎᤢᤶᤒᤠ ᤔᤧᤈᤥᤰ ᤁᤧᤗ᤹ᤒᤠᤴ ᤔᤧᤏᤡᤛᤢᤀᤠᤱ ᤘᤠ᤹॥ 11 ᤀᤠᤱᤃᤠ᤹ ᤀᤠᤛᤢᤈᤠᤴ ᤀᤰᤋᤱᤒᤠ ᤘᤠ᤹—ᤍᤠᤏᤗᤠᤶᤒᤠ ᤒᤣᤷᤛᤣᤒᤠ ᤌᤠᤖᤡᤰᤐᤠ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤘᤜ᤺ᤱᤅᤥᤒᤠ ᤕᤧ᤺ᤱᤄᤠ ᤁᤢᤀᤡᤛᤡᤰ ᤂᤧᤏᤧ᤹ᤀᤥ ᤑᤢᤰᤂᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤏᤧ᤹ ᤀᤠᤒᤠᤅᤣ ᤌᤱᤅᤥ ᤔᤏᤠᤜᤠ᤹ ᤋᤣ᤹ᤖᤧᤛᤧ᤹ᤀᤠᤱ ᤌᤠᤛᤡᤱᤅᤧ᤹॥ 12 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤀᤠᤳᤋᤠ ᤘᤠ᤹ᤛᤠᤱ ᤀᤠᤏᤡ᤹ ᤀᤠᤕᤠᤱᤄᤢᤶ. ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤜᤡ᤺ᤰᤘᤠ ᤌᤠᤒᤠ ᤁᤢᤀᤡᤛᤡᤰ ᤀᤠᤏᤡ᤹ ᤂᤢᤏᤧ᤹ᤀᤥ ᤀᤠᤗᤢᤶᤛᤡᤱ॥ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ ᤗᤳᤇᤠᤀᤠᤱ ᤔᤧᤴᤜᤡᤱᤏᤧᤴ॥ 13 ᤂᤢᤏᤧ᤹ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤕᤧᤰᤕᤰᤁᤥ ᤗᤠ᤺ᤳᤏᤧᤓᤃᤪ ᤀᤠᤏᤡᤃᤣ ᤔᤏᤠᤜᤠ᤹ᤖᤧ ᤀᤡᤍᤠ᤺ᤰᤁᤡᤴ ᤔᤧᤍᤠᤖᤢ᤹ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴᤏᤣ ᤔᤧᤄᤣ᤺ᤰᤂᤢᤀᤠᤱ ᤕᤥ ᤏᤧᤏᤧᤒᤠᤍᤧᤴᤏᤥ ᤔᤧᤀᤢ᤺ᤰᤂᤢ ᤔᤧᤎᤠᤛᤢ᤹॥ ᤌᤧᤃᤢ᤺ᤸᤗᤧ ᤁᤢᤛᤶᤎᤠᤱ ᤗᤳᤇᤠ ᤗᤢᤱᤈᤣ᤺ᤰᤁᤠᤱ ᤔᤧᤏᤧᤏᤧᤴ ᤔᤧᤕᤠ᤺ᤰᤏᤧᤴ॥” 14 ᤜᤧᤰᤁᤩᤠᤱ ᤀᤒ᤻ᤛᤠᤗᤥᤔ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤖᤁᤡ ᤜᤢᤛᤤ᤺ᤸᤗᤧ ᤀᤜᤡᤋᤥᤐᤣᤗᤏᤢ᤺ᤸᤗᤧᤀᤠᤱ ᤏᤢᤒᤠ ᤛᤢᤈᤠ ᤀᤠᤒᤡᤖᤧᤀᤠᤱ ᤘᤠ᤹॥” ᤁᤱᤃ ᤀᤜᤡᤋᤥᤐᤣᤗᤖᤧ ᤁᤢᤛᤢᤈᤠᤴ ᤑᤧᤳᤗᤠ᤺ᤶᤔᤠ ᤏᤢ ᤀᤒ᤻ᤛᤠᤗᤥᤔᤖᤧ ᤁᤢᤔᤧᤰᤔᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤘᤕᤧᤖᤥ॥ ᤀᤡᤱᤄᤱ ᤂᤧᤵᤛᤢᤀᤠᤱ ᤍᤠᤀᤢᤍᤧᤴ ᤂᤧᤳᤇᤡᤱ 15 ᤜᤢᤛᤤᤖᤧ ᤛᤍᤥᤁ ᤏᤢ ᤀᤒᤡᤕᤠᤌᤠᤖ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤜᤡᤋᤥᤐᤣᤗᤖᤧ ᤀᤒ᤻ᤛᤠᤗᤥᤔ ᤏᤢ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤐᤡᤖᤢᤛᤡᤒᤠ ᤛᤢᤈᤠᤴ ᤏᤢ ᤂᤢᤏᤧ᤹ ᤐᤡᤖᤢᤛᤡᤒᤠ ᤛᤢᤈᤠᤴ ᤆᤧᤰᤋᤢᤛᤡ॥ 16 ᤂᤧᤸᤗᤧᤆᤥᤃᤢᤸᤗᤧ ᤜᤢᤛᤤ᤺ᤸᤗᤧ ᤍᤠᤀᤢᤍᤧᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢ. “ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤆᤫᤠ᤺ᤳ ᤁᤠ᤺ᤰᤔᤠᤍᤧᤴᤏᤥ ᤕᤠᤱᤔᤧᤴᤎᤥ᤺ᤰᤏᤧᤸᤗ. ᤁᤖ ᤀᤠᤸᤗᤥᤛᤠ ᤜᤠᤖᤠ ᤘᤜ᤺ᤱᤅᤡᤴ ᤔᤧᤃᤠ᤺ᤰᤋᤢᤖ. ᤔᤣ᤺ᤴᤏᤧᤓᤃᤪ ᤜᤠᤱᤅᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤔᤧᤰ॥” 17 ᤀᤠᤸᤗ ᤈᤥᤏᤠᤌᤠᤏ ᤏᤢ ᤀᤜᤡᤔᤠᤛ ᤀᤣᤏ-ᤖᤥᤃᤣᤗ ᤔᤧᤵᤔᤏᤠᤒᤠ ᤋᤧᤴᤏᤥ ᤜᤠᤱᤄᤢᤛᤡᤀᤠᤱ ᤕᤢᤅᤧᤛᤡ. ᤜᤧᤰᤁᤩᤠᤱ ᤗᤳᤇᤠ ᤛᤧᤘᤠᤖᤥᤔᤠᤎᤡᤰ ᤐᤣ᤺ᤰᤁᤠᤱ ᤂᤧᤱᤜᤠ᤹ ᤀᤡᤱᤄᤱ ᤔᤧᤳᤋᤢᤛᤡ. ᤜᤴᤏᤠᤱ ᤂᤧᤱᤜᤠ᤹ᤖᤧ ᤍᤠᤀᤢᤍᤧᤴ ᤔᤧᤔᤧᤳᤋᤢ᤹॥ ᤌᤣᤀᤠᤱᤓᤧᤸᤗᤧ ᤕᤧᤰᤕᤰ ᤛᤡᤃᤠᤱ ᤂᤧᤱᤜᤠ᤹ ᤕᤧᤰᤕᤰᤁᤥ ᤔᤏᤠᤜᤠ᤹ᤖᤧ ᤔᤧᤴᤏᤡᤛᤢᤛᤡᤸᤗ ᤁᤧᤗ᤹ᤒᤠ ᤐᤠᤴ ᤘᤕᤧ॥ 18 ᤁᤖ ᤁᤴ ᤕᤧᤶᤔᤥᤃ ᤗᤳᤇᤠ ᤌᤠᤱᤒᤧᤴᤎᤡᤰᤗᤧ ᤂᤧᤱᤜᤠ᤹ ᤏᤡᤛᤢᤛᤡ. ᤜᤧᤰᤁᤩᤠᤱ ᤂᤧᤸᤗᤧ ᤀᤒ᤻ᤛᤠᤗᤥᤶᤔᤡᤴ ᤔᤧᤳᤋᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤏᤧᤵᤔᤠᤱ ᤜᤠᤖᤠᤜᤠᤖᤠ ᤒᤜᤢᤖᤡᤔᤒᤠ ᤗᤳᤇᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤗᤠᤛᤧᤛᤡ॥ ᤂᤧᤸᤗᤧ ᤁᤢᤗᤰᤂᤢᤶᤔᤥ ᤗᤳᤇᤠ ᤘᤒᤠᤰ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤗᤠᤛᤧᤛᤡᤀᤠᤱ ᤆᤡᤱᤏᤧᤛᤡ॥ 19 ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤘᤒᤠᤰᤁᤡᤸᤗᤧ ᤁᤢᤛᤶᤎᤠᤱ ᤁᤢᤓᤧᤔᤠᤎᤡᤰ ᤑᤧᤛᤢᤀᤠᤱ ᤂᤧᤴ ᤛᤶᤎᤠᤱ ᤕᤠ᤹ᤖᤥᤴ ᤏᤠᤶᤓᤧᤳᤋᤢ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥᤛᤢᤴ॥ 20 ᤀᤒ᤻ᤛᤠᤗᤥᤔᤖᤧ ᤁᤢᤔᤏᤠᤜᤠ᤹ ᤔᤧᤍᤩᤧᤀᤠᤱ ᤂᤧᤴ ᤔᤧᤴᤇᤢᤔᤠᤴ ᤛᤣ᤺ᤴᤔᤧᤍᤥᤛᤢ. “ᤀᤜᤡᤔᤠᤛ ᤏᤢ ᤈᤥᤏᤠᤌᤠᤏ ᤀᤠᤳᤋᤠ ᤘᤠ᤹ᤛᤡ᥅” ᤂᤧᤸᤗᤧ ᤔᤧᤳᤋᤢᤛᤡ. “ᤂᤧᤱᤜᤠ᤹ᤃ ᤘᤜ᤺ᤱ ᤏᤠᤜᤠᤱ ᤐᤡᤛᤠᤱ ᤐᤣᤛᤡ॥” ᤂᤧᤱᤜᤠ᤹ᤖᤧ ᤏᤠ ᤁᤳᤏᤠ ᤔᤧᤃᤥ᤺ᤳᤋᤢᤛᤡ. ᤁᤖ ᤀᤠᤳᤋᤡᤴᤏᤠᤱ ᤔᤧᤄᤥᤛᤢᤛᤡᤴ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤕᤖᤢᤛᤗᤧᤔ ᤔᤧᤏᤢ᤺ᤰᤂᤧ॥ 21 ᤂᤧᤴ ᤀᤒ᤻ᤛᤠᤗᤥᤔᤖᤧ ᤁᤢᤔᤏᤠᤜᤠ᤹ ᤔᤧᤒᤣᤀᤠᤱ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᤘᤒᤠᤰᤁᤥᤗᤠᤶ ᤗ᤺ᤴᤍᤧᤛᤡ. ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧᤀᤥ ᤐᤣᤛᤡᤀᤠᤱ ᤁᤧᤖᤧᤰ ᤐᤠᤴ ᤆᤧᤰᤋᤧᤛᤢ॥ ᤂᤧᤱᤜᤠ᤹ᤖᤧ ᤔᤧᤳᤋᤧᤛᤢ. “ᤐᤥᤃᤧ᤹. ᤜᤠᤖᤠ ᤕᤱᤄᤱᤅᤡᤴ ᤁᤠ᤺ᤰᤋᤧ᤹॥” ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤜᤡᤋᤥᤐᤣᤗᤖᤧ ᤀᤰᤋᤱᤒᤠ ᤛᤢᤈᤠ ᤐᤡᤖᤢᤛᤡ ᤁᤧᤗ᤹ᤒᤠᤴ ᤆᤧᤰᤋᤢ॥ 22 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤔᤏᤠᤜᤠ᤹ ᤜᤠᤖᤠᤜᤠᤖᤠ ᤕᤷᤍᤏ ᤕᤱᤄᤱ ᤏᤠᤎᤠ᤺ᤶᤒᤡ᤹ ᤔᤧᤒᤣ॥ ᤂᤠᤀᤥ᤺ᤵᤔᤠᤛᤥᤖᤡ ᤕᤱᤄᤱ ᤔᤧᤱᤃᤠ᤺ᤰᤔᤏᤠ ᤔᤏᤠ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧ॥ 23 ᤀᤜᤡᤋᤥᤐᤣᤗᤖᤧ ᤐᤡᤖᤢᤛᤡᤒᤠ ᤁᤢᤛᤢᤈᤠᤴ ᤕᤖᤡᤰ ᤁᤢᤛᤡᤰᤗᤧ ᤔᤧᤱᤄᤧᤵᤛᤢᤶᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤢᤏᤧ᤹ ᤁᤢᤀᤍᤱᤅᤥ ᤗᤠᤛᤧᤀᤠᤱ ᤀᤠᤒᤠᤅᤣ ᤁᤢᤕᤧᤰᤕᤰᤁᤥᤒᤠ ᤁᤢᤜᤡᤶᤔᤥ ᤐᤣ॥ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤐᤠ᤺ᤴᤜᤠ᤹ ᤜᤡᤛᤢ ᤋᤱᤛᤢᤎᤀᤠᤱ ᤀᤠᤒᤠᤅᤣ ᤂᤧᤵᤔᤥ ᤑᤥ᤺ᤴᤇᤡᤱ ᤛᤩᤧ॥ ᤂᤧᤴ ᤀᤰᤂᤣᤗ᤹ᤖᤡᤰ ᤛᤩᤧ ᤜᤧᤰᤁᤩᤠᤱ ᤁᤢᤶᤒᤠᤖᤧ ᤁᤢᤀᤡᤐᤢᤱᤒᤣᤛᤠᤱ ᤔᤧᤗᤢᤵᤋᤢ॥ 24 ᤀᤒ᤻ᤛᤠᤗᤥᤔ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤕᤷᤍᤏ ᤔᤧᤃᤠ᤺ᤰᤋᤢ. ᤁᤖ ᤍᤠᤀᤢᤍ ᤋᤃᤡᤛᤠ ᤔᤜᤏᤥᤔ ᤁᤧᤖᤧ ᤆᤢᤖᤧᤀᤠᤱ ᤘᤕᤧ॥ 25 ᤀᤒ᤻ᤛᤥᤔᤖᤧ ᤕᤥᤀᤠᤒᤖᤧ ᤁᤢᤗᤧᤰᤘᤠ ᤀᤔᤠᤛᤠᤴ ᤌᤰᤛᤢᤒᤠᤜᤠ᤹ ᤗᤠᤶᤃᤧᤗᤥᤒᤠ ᤌᤰᤔᤥᤒᤠ ᤆᤥᤃᤢᤀᤠᤱ ᤘᤕᤧ॥ ᤀᤔᤠᤛᤠᤴ ᤀᤡᤛᤪᤠᤀᤡᤗᤡ ᤕᤣᤋᤣᤖᤖᤧ ᤁᤢᤛ᤻ᤛᤠ ᤘᤕᤧ. ᤀᤒᤡᤃᤣᤗᤧᤴ ᤂᤧᤸᤗᤧ ᤁᤢᤶᤔᤠ ᤘᤕᤧ॥ ᤀᤒᤡᤃᤣᤗᤧᤴ ᤏᤠᤜᤠᤛᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ ᤜᤧᤰᤁᤩᤠᤱ ᤛᤖᤢᤕᤠᤜ᤺ᤴ ᤕᤥᤀᤠᤒᤖᤧ ᤁᤢᤶᤔᤠ ᤘᤕᤧ॥ ᤛᤖᤢᤕᤠᤜ᤺ᤴ ᤀᤒᤡᤃᤣᤗᤖᤧ ᤁᤢᤴᤛᤠ᤹ ᤘᤕᤧ॥ 26 ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤀᤒ᤻ᤛᤠᤗᤥᤔᤖᤧ ᤃᤡᤗᤠᤍ ᤗᤠᤈᤣ᤹ᤀᤥ ᤌᤰᤛᤢᤒᤠ ᤛᤠ᤺ᤱᤃᤠᤜᤡᤶ ᤔᤧᤗᤣ᤺ᤳᤋᤢ॥ 27 ᤍᤠᤀᤢᤍ ᤔᤜᤏᤥᤔ ᤁᤧᤖᤧ. ᤜᤧᤰᤁᤣ᤺ᤸᤗᤧ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤖᤒ᤻ᤒᤠ ᤁᤧᤕᤢᤱᤒᤠ ᤏᤠᤜᤠᤛᤖᤧ ᤁᤢᤛ᤻ᤛᤠ ᤛᤥᤒᤡ. ᤗᤥᤍᤣᤒᤠᤖ ᤁᤧᤕᤢᤱᤒᤠ ᤀᤶᤔᤡᤀᤣᤗᤖᤧ ᤁᤢᤛ᤻ᤛᤠ ᤔᤠᤁᤡᤖ ᤏᤢ ᤖᤠᤃᤗᤡ ᤁᤧᤕᤢᤱᤒᤠ ᤃᤡᤗᤠᤍᤡ ᤒᤷᤈᤡᤸᤗᤤᤸᤗᤧ 28 ᤁᤢᤄᤠᤶᤔᤠ ᤁᤢᤗᤥᤔᤠ. ᤂᤵᤐᤩᤠ ᤏᤢ ᤂᤥᤷᤕᤠᤜᤠ᤹ ᤋᤠᤖᤢᤀᤠᤱ ᤐᤡᤖᤢ॥ ᤂᤧᤱᤜᤠ᤹ᤖᤧ ᤔᤠᤛᤡ. ᤜ᤺ᤰᤛᤡ. ᤔᤠᤛᤡ ᤑᤣ᤹ᤖᤢᤶ. ᤏᤔᤏᤠᤒᤠ ᤜ᤺ᤰᤛᤡ. ᤛᤡ᤺ᤶᤒᤡ. ᤁᤠᤖᤡ᤹. 29 ᤛᤰᤘᤠ ᤂᤢ. ᤏᤢᤍᤠᤰ. ᤔᤧᤸᤗᤢᤰᤜᤠ᤹ ᤏᤢ ᤐᤡᤳᤏᤢᤗᤠᤶᤒᤠ ᤔᤧᤈᤥᤃᤢᤒᤠ ᤐᤏᤡᤖᤧᤴ ᤍᤠᤀᤢᤍ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤆᤠᤔᤠ ᤋᤠᤖᤢ ᤐᤡᤖᤢ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤛᤠᤰᤁᤡᤸᤗᤧ ᤋᤖᤢᤛᤡᤀᤠᤱ ᤔᤧᤘᤕᤧ. ᤘᤠᤔᤡᤔᤠᤸᤗᤧ ᤋᤖᤢᤛᤡᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤛᤠ᤹ᤖᤡᤰ ᤔᤧᤏᤠᤛᤧᤀᤠᤱ ᤔᤧᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.