᥈ ᤛᤠᤔᤢᤀᤧᤗ 16 - LIFOTNTᤍᤠᤀᤢᤍ ᤏᤢ ᤛᤡᤘᤠ 1 ᤍᤠᤀᤢᤍᤧᤴ ᤁᤥ᤺ᤰᤔᤠᤀᤥ ᤆᤡᤏᤠᤏᤠᤰ ᤁᤧᤖᤧᤸᤗᤧ ᤆᤄᤵ ᤔᤐᤡᤒᤥᤛᤣᤋᤖᤧ ᤁᤢᤛᤧᤘᤠᤖᤥᤒᤠ ᤛᤡᤒᤠ᤺ᤴ ᤋᤢᤔᤢ॥ ᤂᤧᤸᤗᤧ ᤂᤢᤏᤧ᤹ᤏᤢ ᤁᤡᤵ ᤏᤧᤳᤇᤡ ᤗᤥ᤺ᤳᤋᤥ. ᤁᤢᤒᤈᤠ ᤁᤡᤵ ᤌᤡᤰ ᤂᤧᤱᤔᤏᤠᤒᤠ ᤆᤧᤸᤗᤧᤰᤛᤣ᤹. ᤁᤡᤵ ᤌᤡᤰ ᤁᤢᤒᤈᤠ ᤐ᤺ᤳᤇᤣ᤹ᤛᤣ᤹ ᤏᤢ ᤛᤣᤜᤥ᤹ ᤛᤢᤰᤘᤠᤎᤡᤰ ᤁᤢᤗᤧ᤺ᤶ ᤛᤣᤈ᤺ᤱᤘᤠ ᤀᤍᤱ ᤗᤢᤵᤜᤠ᤹ ᤁᤢ᤺ᤳᤋᤢᤛᤡᤀᤠᤱ ᤑᤧᤖᤧᤖ ᤐᤳᤇᤧ॥ 2 ᤜᤠᤱᤅᤡᤸᤗᤧ ᤛᤡᤒᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤴ ᤁᤧᤖᤧᤰ ᤌᤣᤀᤠᤱ ᤁᤧᤍᤠᤖᤢᤒᤠᤒᤣ᥅” ᤛᤡᤒᤠ᤺ᤸᤗᤧ ᤔᤧᤳᤋᤢ. “ᤁᤴ ᤀᤍᤱᤜᤠ᤹ ᤜᤠᤱᤅᤡᤸᤗᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤔᤠᤖᤧ ᤗᤠᤃᤡ. ᤗᤥ᤺ᤳᤋᤥ ᤏᤢ ᤐ᤺ᤳᤇᤣ᤹ᤛᤣ᤹ᤜᤠ᤹ ᤌᤠᤱᤒᤧᤴ ᤔᤏᤠᤜᤠ᤹ᤖᤧ ᤗᤠᤃᤡ ᤜᤧᤰᤁᤩᤠᤱ ᤛᤣᤈᤱᤘᤠᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤠᤒᤠᤜᤠ᤹ᤖᤧ ᤗᤠᤃᤡᤖᤥ॥” 3 ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤴᤍᤠᤱᤒᤠᤸᤗᤧ ᤁᤢᤶᤔᤧᤴᤇᤠ᤹ᤀᤡᤴ ᤀᤠᤳᤋᤠᤴ ᤘᤠ᤹᥅” ᤛᤡᤒᤠ᤺ᤸᤗᤧ ᤔᤧᤳᤋᤢ. “ᤂᤢᤏᤧ᤹ᤃ ᤕᤖᤢᤛᤗᤧᤔ ᤘᤠ᤹. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤏᤧ᤹ ᤁᤢᤴᤎᤧᤒᤠᤖᤧ ᤁᤢᤜᤠᤱᤕᤢᤰᤏᤠᤴ ᤔᤧᤏᤢ᤺ᤰᤋᤢ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹॥” 4 ᤜᤠᤱᤅᤡᤸᤗᤧ ᤛᤡᤒᤠ᤺ᤴ ᤔᤧᤳᤋᤢ. “ᤔᤐᤡᤒᤥᤛᤣᤋᤖᤧ ᤁᤳᤋᤢᤒᤠ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣᤴ ᤂᤧᤏᤧ᤹ᤀᤣ ᤐᤡᤏᤧ॥” ᤛᤡᤒᤠ᤺ᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤀᤠᤜᤠᤱᤅᤣ. ᤀᤠᤱᤃᤠ᤹ᤃ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤀᤠᤖᤥ॥ ᤀᤠᤍᤠᤱᤒᤠᤖᤧ ᤁᤧᤗᤢᤱᤔᤠ ᤋᤢᤰᤔᤧᤴ ᤂᤥᤛᤢᤱᤗᤖᤥ॥” ᤍᤠᤀᤢᤍ ᤏᤢ ᤛᤡᤔᤡ 5 ᤍᤠᤀᤢᤍ ᤜᤠᤱᤅᤡᤴ ᤒᤜᤢᤖᤡᤔ ᤁᤧᤖᤧ. ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤛᤠᤘᤗᤖᤧ ᤁᤢᤜᤡᤶᤛᤕᤱᤒᤠ ᤗᤳᤇᤠ ᤔᤏᤠ. ᤃᤣᤖᤠᤖᤧ ᤁᤢᤛ᤻ᤛᤠ ᤛᤡᤔᤡᤴ ᤗᤡᤃᤰ ᤗ᤺ᤴᤍᤧᤀᤠᤱ ᤍᤠᤀᤢᤍᤧᤴ ᤛᤠᤰᤔᤢᤖᤠ ᤔᤧᤳᤋᤢᤖ ᤋᤩᤧ॥ 6 ᤂᤧᤸᤗᤧ ᤍᤠᤀᤢᤍᤧᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤗᤢᤱᤅᤡᤸᤗᤧ ᤗᤧᤵᤔᤠ ᤜᤣ᤺ᤰᤋᤢᤛᤡ॥ ᤍᤠᤀᤢᤍᤖᤧ ᤁᤢᤈᤢᤰᤘᤠ ᤏᤢ ᤁᤢᤓᤧᤱᤘᤠ ᤗᤧᤵᤔᤠᤱ ᤂᤢᤏᤧ᤹ ᤁᤢᤎᤰᤛᤢᤒᤠ ᤏᤢ ᤋᤠᤱᤃᤧᤛᤧ᤺ᤵᤐᤠᤜᤠ᤹ ᤔᤧᤘᤕᤧ॥ 7 ᤜᤧᤰᤁᤩᤠᤱ ᤛᤡᤔᤡ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤍᤠᤀᤢᤍᤧᤴ ᤛᤠᤰᤔᤢᤖᤠ ᤔᤧᤳᤋᤢ. “ᤐᤣᤃᤧ᤹. ᤔᤏᤠ ᤁᤧᤛᤧᤵᤐᤠ ᤔᤏᤠᤴ ᤐᤣᤃᤧ᤹. ᤐᤣᤃᤧ᤹᥄ ᤐᤣᤃᤧ᤹᥄ 8 ᤛᤠᤘᤗᤖᤧ ᤁᤢᤜᤡᤶᤛᤕᤱᤅᤥᤒᤠ ᤕᤖᤡᤰ ᤔᤏᤠᤜᤠ᤹ ᤁᤧᤛᤧᤖᤢᤛᤡᤀᤠᤱ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤁᤧᤏᤠᤵᤋᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤧᤰᤘᤠ ᤜᤢᤅᤢᤒᤠᤖᤥ. ᤜᤧᤰᤁᤩᤠᤱ ᤂᤧᤴ ᤜᤠᤱᤈᤢᤶᤔᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤛ᤻ᤛᤠ ᤀᤒ᤻ᤛᤠᤗᤥᤶᤔᤡᤴ ᤐᤡᤖᤢᤀᤠᤱ ᤘᤠ᤹॥ ᤀᤠᤸᤗ ᤂᤧᤏᤧ᤹ ᤁᤧᤔᤧᤃᤧ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤔᤏᤠ ᤁᤧᤛᤧᤵᤐᤠᤏᤧᤖᤥ॥” 9 ᤜᤧᤰᤁᤩᤠᤱ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤀᤒᤡᤛᤤᤖᤧ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤴ ᤁᤢᤛᤡᤘᤧᤳ ᤂᤩᤠᤒᤠᤸᤗᤧ ᤀᤠᤍᤠᤱᤒᤠ ᤌᤣᤀᤠᤱ ᤛᤠᤰᤔᤢᤖᤠ ᤁᤧᤔᤧᤵᤐᤠᤒᤣ᥅ ᤀᤠᤱᤃᤠ᤹ ᤐᤣ᤺ᤰᤁᤠ᤹ᤀᤠᤱ ᤂᤧᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤑᤢᤴᤍᤢᤱ ᤐᤡᤖᤢᤱᤒᤡ᥅” 10 ᤁᤖ ᤜᤠᤱᤅᤡᤸᤗᤧ ᤔᤧᤳᤋᤢ. “ᤛᤖᤢᤕᤠᤜᤖᤧ ᤁᤢᤛ᤻ᤛᤠᤛᤣ. ᤂᤡᤏᤡ᤹ ᤐᤠ᤺ᤵᤔᤠ ᤐᤠᤴ ᤌᤣᤀᤠᤱ ᤜᤥᤵ. ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴ ᤛᤠᤰᤔᤢᤖᤠ ᤔᤧᤳᤋᤧ᤹ ᤔᤧᤳᤋᤢᤀᤠᤱ ᤘᤠ᤹ᤏᤧᤓᤃᤪ ᤜᤠ᤺ᤳᤗᤧ ᤛᤠᤰᤔᤠ ᤛᤢᤰᤋᤢᤒᤣ᥅” 11 ᤍᤠᤀᤢᤍᤖᤧ ᤀᤒᤡᤛᤤᤴ ᤏᤢ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤛ᤻ᤛᤠ᤺ᤸᤗᤧᤀᤣ ᤛᤧᤵᤔᤠ ᤁᤥ᤺ᤋᤠᤸᤗᤧ ᤁᤴ ᤒᤡᤏᤩᤠᤔᤡᤏᤡᤴᤏᤢᤃ ᤌᤣ ᤐᤠ᤺ᤵᤔᤠᤒᤣ᥅ ᤂᤧᤴ ᤗᤧᤖᤠᤶᤍᤣᤛᤠᤶᤔᤧ᤹॥ ᤂᤧᤸᤗᤧ ᤛᤠᤰᤔᤢᤖᤠ ᤔᤧᤳᤋᤠ᤹ᤖ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤧᤴ ᤜᤠᤒᤠᤜᤧᤰᤁᤣ ᤆᤥᤃᤧ᤹ ᤔᤧᤳᤋᤢᤀᤠᤱ ᤘᤠ᤹ᤀᤡᤖᤠ॥ 12 ᤀᤠᤀᤡᤴ ᤀᤠᤱᤃᤠ᤹ ᤂᤥᤛᤢᤱᤒᤠ ᤛᤠᤰᤔᤢᤖᤠ᤺ᤸᤗᤧ ᤁᤢᤗᤧᤰᤘᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤍᤢᤰᤂᤣᤴ ᤀᤥᤔᤧᤳᤋᤢᤀᤡᤖᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤜᤠᤱᤘᤠᤔᤢ᤹ᤀᤡ ᤐᤡ᤹ᤀᤠᤀᤡᤖᤠ॥” 13 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤂᤢᤴᤇᤡ᤹ ᤗᤠᤶ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤛᤡᤔᤡᤴ ᤍᤠᤀᤢᤍ ᤗᤠᤱᤄᤣᤃᤧᤒᤠ ᤗᤠᤶᤔᤡᤸᤗᤧ ᤌᤥᤜᤠᤱ ᤗᤧᤵᤔᤠᤱᤒᤠ ᤁᤥ᤺ᤰᤔᤠᤀᤣ ᤁᤥ᤺ᤰᤔᤠ ᤐᤣ. ᤜᤧᤰᤁᤩᤠᤱ ᤐᤣ᤺ᤸᤗᤧ ᤍᤠᤀᤢᤍᤧᤴ ᤛᤠᤰᤔᤢᤖᤠ ᤔᤧᤳᤋᤢᤖ ᤗᤢᤱᤅᤡᤸᤗᤧ ᤗᤧᤵᤋᤢ ᤜᤧᤰᤁᤩᤠᤱ ᤂᤠᤶᤜᤡ᤺ᤰᤁᤡᤸᤗᤧ ᤆᤢ᤺ᤳᤋᤢᤖ ᤐᤣ॥ 14 ᤜᤠᤱᤅᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤏᤠᤛᤧᤀᤠᤱ ᤕᤷᤍᤏ ᤔᤧᤃᤧᤖᤧ॥ ᤜᤧᤰᤁᤩᤠᤱ ᤂᤧᤵᤔᤥ ᤂᤢᤏᤧ᤹ ᤀᤠᤒᤠᤅᤣ ᤏᤠ᤺ᤶᤛᤡᤱ. ᤆᤠᤱᤈᤠᤱ ᤔᤧᤳᤇᤡᤱ॥ ᤀᤒ᤻ᤛᤠᤗᤥᤔᤧᤴ ᤕᤖᤢᤛᤗᤧᤔ ᤐᤣᤰ 15 ᤀᤠᤸᤗ ᤀᤒ᤻ᤛᤠᤗᤥᤔ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤕᤖᤢᤛᤗᤧᤔ ᤔᤧᤃᤧᤖᤧ. ᤀᤜᤡᤋᤥᤐᤣᤗᤀᤠᤱ ᤂᤢᤏᤧ᤹ᤏᤢ ᤘᤕᤧ॥ 16 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤴᤍᤣᤱ ᤀᤖᤁᤡ ᤜᤢᤛᤤᤸᤗᤧ ᤀᤒ᤻ᤛᤠᤗᤥᤔᤧᤴ ᤋᤢᤔᤢ. ᤜᤧᤰᤁᤩᤠᤱ ᤔᤧᤳᤋᤢ. “ᤜᤠᤱᤅᤡᤴ ᤛᤍᤠᤍᤡᤱ ᤜᤡᤱᤗ᥄ ᤜᤠᤱᤅᤡᤴ ᤛᤍᤠᤍᤡᤱ ᤜᤡᤱᤗ᥄” 17 ᤁᤖ ᤀᤒ᤻ᤛᤠᤗᤥᤔᤖᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤴᤍᤣ᤺ᤱᤒᤧᤴᤏᤢ ᤏᤛᤠ᤺ᤴᤛᤠᤒᤠ ᤁᤧᤒᤥᤰᤂᤧᤒᤠᤴ ᤜᤠᤒᤠ ᤁᤴᤒᤡ᥅ ᤂᤧᤏᤧ᤹ ᤂᤢᤏᤧ᤹ᤏᤢ ᤌᤣᤀᤠᤱ ᤁᤧᤶᤒᤣᤏᤧᤴ᥅” 18 ᤜᤢᤛᤤᤸᤗᤧ ᤀᤒ᤻ᤛᤠᤗᤥᤶᤔᤡᤴ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠ ᤔᤏᤠᤴ. ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤖᤧ ᤔᤧᤛᤣᤃᤢᤒᤠ ᤔᤏᤠ᤺ᤴᤏᤢ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴᤏᤢᤀᤣ ᤕᤢᤱᤅᤠ॥ 19 ᤕᤠᤶᤔᤥ ᤀᤠᤱᤃᤠ᤹ ᤜᤠ᤺ᤳᤗᤧ ᤁᤢᤛᤧᤘᤠ ᤆᤥᤃᤢᤱᤒᤠᤒᤣ᥅ ᤁᤢᤛ᤻ᤛᤠ᤺ᤸᤗᤧ ᤁᤢᤛᤧᤘᤠ ᤆᤥ᤺ᤰᤔᤠ ᤔᤧᤒᤥᤱᤏᤧᤶᤒᤡ᥅ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤁᤧᤶᤒᤠᤖᤧ ᤁᤢᤛᤧᤘᤠ ᤆᤥᤃᤢᤱ. ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤧᤘᤠ ᤆᤥᤃᤢᤱ᤹॥” 20 ᤀᤒ᤻ᤛᤠᤗᤥᤔᤖᤧ ᤀᤜᤡᤋᤥᤐᤣᤗᤧᤴ ᤔᤧᤳᤋᤢ. “ᤀᤠᤏᤡᤃᤣ ᤌᤣ ᤆᤥᤃᤢᤶᤒᤧᤒᤠ᥅ ᤛᤢᤈᤠ ᤀᤠᤒᤡᤖᤧ᤹॥ ᤀᤠᤏᤡᤃᤣ ᤀᤠᤰᤂᤣᤗ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢᤶᤒᤧᤒᤠᤒᤣ᥅” 21 ᤀᤜᤡᤋᤥᤐᤣᤗᤖᤧ ᤔᤧᤳᤋᤢ. “ᤜᤠᤱᤜᤡᤶ ᤁᤧᤃᤥᤔᤠ ᤁᤧᤶᤒᤠᤖᤧ ᤁᤢᤔᤣᤳ ᤐᤠ᤺ᤰᤔᤠᤜᤠ᤹ᤏᤢ ᤀᤡᤵᤛᤧ᤹॥ ᤜᤧᤰᤁᤩᤠᤱ ᤁᤧᤶᤒᤠ ᤍᤠᤀᤢᤍᤖᤧ ᤁᤢᤴᤒᤥ ᤁᤧᤍᤣᤛᤢᤒᤠ ᤛᤠ᤹ᤖᤡᤰ ᤕᤠᤶᤃᤧᤛᤡᤱᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢ᤹. ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰ ᤀᤠᤸᤗᤛᤠᤱ ᤁᤧᤎᤢᤶᤒᤠ ᤐᤥᤱ॥” 22 ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤁᤦᤛᤡᤀᤥ ᤀᤒ᤻ᤛᤠᤗᤥᤔᤖᤧ ᤁᤢᤗᤠᤃᤡ ᤗᤳᤇᤠ ᤋᤧᤴ ᤔᤧᤈᤥᤃᤢ. ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤡᤛᤢᤖ ᤂᤧᤴ ᤁᤢᤶᤒᤠᤖᤧ ᤁᤢᤔᤣᤳ ᤐᤠ᤺ᤰᤔᤠᤜᤠ᤹ᤏᤢ ᤀᤡᤵᤛᤧ॥ 23 ᤂᤧᤴ ᤕᤧᤶᤔᤥ ᤀᤜᤡᤋᤥᤐᤣᤗᤖᤧ ᤁᤢᤛᤢᤈᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣ᤺ᤴᤍᤥ᤺ᤶᤔᤏᤠᤒᤠ ᤁᤢᤀᤡᤛᤡᤰ ᤆᤥᤃᤧ॥ ᤍᤠᤀᤢᤍ ᤏᤢ ᤀᤒ᤻ᤛᤠᤗᤥᤔᤖᤧ ᤂᤧᤶᤓᤩᤠᤰ ᤛᤠ᤹ᤖᤡᤰ ᤀᤜᤡᤋᤥᤐᤣᤗᤖᤧ ᤁᤢᤛᤢᤈᤠᤴ ᤂᤧᤵᤛᤧᤇᤢᤀᤠᤱ ᤘᤕᤧᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.