᥈ ᤛᤠᤔᤢᤀᤧᤗ 15 - LIFOTNTᤀᤒ᤻ᤛᤠᤗᤥᤔᤖᤧ ᤁᤢᤈᤧᤶᤓᤴ 1 ᤂᤧᤴ ᤀᤣᤃᤠᤱ ᤀᤒ᤻ᤛᤠᤗᤥᤔᤖᤧ ᤀᤠᤒᤠᤅᤣ ᤁᤢᤗᤠᤃᤡ ᤗᤳᤇᤠ ᤀᤴᤗᤠᤎᤠ. ᤀᤴᤜᤠ᤹ ᤏᤢ ᤁᤢᤍᤃᤡ ᤗᤠᤱᤃᤧᤄᤣ᤺ᤰᤐᤠ ᤅᤠᤒᤥᤱ ᤔᤏᤠᤜᤠ᤹ ᤕᤠᤖᤡᤵ ᤆᤥᤃᤢᤛᤡ॥ 2 ᤂᤢᤏᤧ᤹ ᤌᤡᤰᤕᤠ᤺ᤴᤎᤰ ᤋᤠᤏᤠᤶ ᤀᤠᤴᤍᤣᤴ ᤐᤥᤃᤧᤀᤠᤱ ᤕᤧᤰᤕᤰ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤎᤣ᤺ᤵᤐᤥ ᤕᤧᤒᤧ॥ ᤜᤠᤱᤅᤡᤸᤗᤧ᤹ᤀᤥ ᤂᤠᤛᤧᤴ ᤏᤠ᤺ᤰᤛᤧ ᤔᤏᤠ ᤔᤧᤍᤠ᤺ᤸᤗᤧ ᤀᤒ᤻ᤛᤠᤗᤥᤔᤖᤧ ᤂᤧᤴ ᤔᤏᤠᤴ ᤀᤢ᤺ᤳᤋᤢᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤀᤠᤳᤋᤡᤴ ᤕᤧᤰᤕᤰᤗᤠᤶ ᤁᤧᤍᤩᤧᤒᤠ᥅” ᤜᤧᤰᤁᤣ᤺ᤸᤗᤧ ᤀᤰᤋᤱᤒᤠ ᤏᤥᤃᤵ ᤂᤥᤛᤢ. “ᤀᤠᤍᤠᤱᤒᤣ ᤀᤠᤱᤃᤠ᤹ ᤀᤰᤋᤱᤒᤠ ᤀᤡᤛᤪᤠᤀᤡᤗ ᤛᤢᤘᤠᤱᤗᤠᤶ ᤋᤩᤠᤱᤒᤠ॥” 3 ᤜᤧᤰᤁᤣ᤺ᤸᤗᤧ ᤀᤒ᤻ᤛᤠᤗᤥᤔᤖᤧ ᤔᤧᤳᤋᤢᤛᤡ. “ᤂᤧᤏᤧ᤹ ᤁᤧᤍᤢ᤺ᤴᤍᤣ᤹ᤱᤃ ᤏᤢᤒᤠᤀᤣ ᤆᤥᤰ. ᤁᤖ ᤂᤧᤏᤧ᤹ ᤁᤧᤒᤠᤴ ᤁᤧᤄᤧᤶᤒᤠ ᤜᤠᤱᤅᤡᤸᤗᤧ ᤁᤢᤔᤏᤠ ᤜᤠ᤺ᤳᤋᤠᤱ ᤔᤧᤜᤥᤵ॥” 4 ᤜᤧᤰᤁᤩᤠᤱ ᤀᤒ᤻ᤛᤠᤗᤥᤔᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤁᤴ ᤗᤠᤈᤣ᤹ᤀᤥᤒᤠ ᤂᤠᤛᤧᤴᤍᤠᤱᤒᤠ ᤐᤥ᤺ᤰᤂᤠᤱᤒᤠ ᤘᤕᤧ᤺ᤸᤗᤧᤃ ᤀᤰᤋᤱᤒᤠ ᤋᤢ᤺ᤴᤍᤣ᤹ ᤁᤧᤍᤠ᤺ᤵᤐᤠ ᤁᤧᤖᤧᤰ ᤔᤏᤠᤜᤠ᤹ ᤏᤢᤖᤡᤰ ᤂᤠᤛᤧᤴ ᤗᤥ᤺ᤴᤍᤢᤱ ᤐᤡᤖᤢᤱᤛᤡᤱᤔᤧᤴ॥” 5 ᤜᤧᤰᤁᤩᤠᤱ ᤔᤏᤠᤜᤠ᤹ ᤂᤢᤏᤧ᤹ ᤁᤢᤒᤣᤛᤠᤱ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤔᤧᤳᤇᤧ ᤔᤧᤍᤩᤧ᤺ᤸᤗᤧ ᤀᤒ᤻ᤛᤠᤗᤥᤔᤖᤧ ᤁᤢᤜᤢᤰᤁᤡᤸᤗᤧ ᤜᤧᤵᤋᤢᤛᤡᤀᤠᤱ ᤆᤢᤵ ᤔᤧᤳᤋᤢᤛᤡ॥ 6 ᤜᤠᤱᤅᤡᤴᤏᤢ ᤂᤠᤛᤧᤴ ᤗᤥ᤺ᤴᤇᤧ ᤁᤧᤍᤠᤒᤠ ᤁᤧᤖᤧᤰᤏᤢ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤀᤒ᤻ᤛᤠᤗᤥᤔᤖᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤱᤔᤠᤍᤢᤰᤔᤧᤴ ᤂᤢᤏᤧ᤹ ᤗᤧᤵᤔᤠᤱ ᤀᤢ᤺ᤰᤂᤢ॥ 7 ᤋᤱᤒᤣ᤹ ᤗᤡᤛᤡ ᤀᤣᤃᤠᤱ ᤀᤒ᤻ᤛᤠᤗᤥᤔᤖᤧ ᤜᤠᤱᤅᤡᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤠᤱᤜᤢᤵ ᤆᤥᤃᤢᤱᤒᤠᤴ ᤁᤧᤳᤇᤧ ᤀᤠᤱᤃᤠ᤹ ᤜᤣᤒᤪᤥᤏ ᤐᤣ᤺ᤰᤔᤠ ᤀᤠᤒᤠᤱᤄᤧ᤹॥ 8 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤖᤠᤔᤒᤠ ᤃᤛᤢᤖ ᤗᤠᤈᤣ᤹ᤀᤥ ᤘᤕᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧᤔ ᤋᤠᤓᤠ᤺ᤰᤁᤠᤏᤧᤓᤃᤪ ᤀᤠᤱᤃᤠ᤹ ᤜᤧᤒᤪᤥᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠ ᤆᤥᤃᤢᤱ ᤗᤖᤡᤰ ᤁᤴ ᤔᤠᤱᤜᤢᤵᤐᤡᤴ ᤆᤥᤃᤢᤱᤅᤠᤱ ᤘᤕᤧ॥” 9 ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤏᤢᤖᤧᤋᤠᤛᤧ᤹ᤖ ᤐᤣᤃᤧ᤹॥” ᤜᤴᤏᤠᤱ ᤂᤧᤴ ᤜᤣᤒᤪᤥᤏ ᤐᤣ॥ 10 ᤜᤧᤰᤁᤩᤠᤱ ᤀᤒ᤻ᤛᤠᤗᤥᤔᤖᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ᤀᤥ. “ᤛᤠᤍᤠᤱᤅᤡᤴ ᤔᤧᤔᤢ᤺ᤳᤋᤢᤒᤠ ᤀᤡᤰᤗᤠ ᤁᤧᤄᤧᤵᤛᤢᤶᤏᤢᤔᤧ᤺ᤴᤏᤣ. ‘ᤀᤒ᤻ᤛᤠᤗᤥᤔᤧᤴ ᤜᤣᤒᤪᤥᤏᤒᤠ ᤜᤠᤱ ᤐᤥ᤺ᤰᤂᤧ᥄’” ᤁᤧᤗ᤹ᤒᤠ ᤐᤠᤴ ᤔᤧᤳᤇᤧ ᤛᤡᤒᤡ᤹ᤒᤠ ᤀᤡᤱᤄᤱᤛᤠᤒᤠᤜᤠ᤹ ᤐᤠᤱᤄᤢᤛᤡ॥ 11 ᤀᤒ᤻ᤛᤠᤗᤥᤔᤧᤴᤏᤢ ᤁᤡᤵ ᤏᤧᤳᤇᤡ ᤔᤏᤠᤜᤠ᤹ ᤕᤖᤢᤛᤗᤧᤔᤗᤠᤶ ᤔᤧᤒᤣᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤀᤢ᤺ᤳᤇᤡᤱ ᤔᤧᤄᤥᤛᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤸᤗᤧ ᤁᤢᤒᤣᤀᤥ ᤌᤣᤀᤠᤱ ᤔᤧᤱᤄᤧᤶᤔᤣ ᤔᤧᤒᤣᤀᤠᤱ ᤔᤧᤘᤕᤧ॥ 12 ᤀᤒ᤻ᤛᤠᤗᤥᤔᤖᤧ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢᤖ ᤕᤠᤃᤧᤸᤗᤧ ᤃᤡᤗᤥᤜ ᤕᤧᤰᤕᤰᤗᤠᤶ ᤍᤠᤀᤢᤍᤖᤧ ᤁᤢᤛᤢᤈᤠᤍᤠᤱᤒᤠ ᤀᤜᤡᤋᤥᤐᤣᤗᤧᤴᤏᤠᤱ ᤁᤢᤒᤠᤱᤓᤣ᤹ᤗᤠᤶ ᤀᤢ᤺ᤳᤋᤢ॥ ᤁᤴ ᤆᤧᤶᤓ᤺ᤴᤏᤡᤴ ᤐᤕᤶ ᤕᤶᤒᤠ ᤐᤥ᤺ᤰᤂᤧᤖ ᤐᤣ. ᤜᤧᤰᤁᤩᤠᤱ ᤀᤒ᤻ᤛᤠᤗᤥᤔ ᤗᤧᤵᤔᤠᤱ ᤁᤧᤗᤠ᤺ᤵᤐᤠ ᤔᤏᤠᤜᤠ᤹ᤀᤠᤱ ᤔᤧᤒᤥᤖᤧᤖ ᤔᤧᤒᤣᤖᤥ॥ ᤍᤠᤀᤢᤍᤧᤴ ᤕᤖᤢᤛᤗᤧᤔᤗᤠᤶ ᤂᤧᤳᤇᤡᤱ 13 ᤗᤳᤇᤠ ᤀᤡᤱᤄᤱ ᤁᤧᤍᤠ᤺ᤵᤐᤠᤴ ᤍᤠᤀᤢᤍᤖᤧ᤹ᤀᤥ ᤋᤩᤧᤀᤠᤱ ᤔᤧᤳᤋᤢ. “ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤡᤱᤃ ᤀᤒ᤻ᤛᤠᤗᤥᤔ ᤗᤧᤵᤔᤠᤱ ᤘᤠ᤹॥” 14 ᤂᤧᤒᤩᤠᤱ ᤕᤖᤢᤛᤗᤧᤔᤀᤥ ᤍᤠᤀᤢᤍᤧᤴᤏᤢ ᤁᤧᤘᤠ᤹ᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ ᤜᤠᤖᤠ ᤂᤧᤳᤇᤡᤱᤔᤠ ᤐᤥᤱ᤹. ᤔᤣ᤺ᤴᤏᤧᤓᤠᤃᤪ ᤀᤠᤏᤡ᤹ ᤜᤠ᤺ᤳᤋᤠᤱ ᤀᤒ᤻ᤛᤠᤗᤥᤔᤖᤧ ᤁᤢᤜᤢᤰᤗᤠᤶ ᤀᤠᤴᤜᤡᤱᤏᤧᤴ॥ ᤜᤠᤖᤠ ᤐᤣᤃᤡ. ᤔᤣ᤺ᤴᤏᤧᤑᤃᤪ ᤂᤧᤴ ᤜᤠᤖᤠᤀᤣ ᤁᤵᤔᤥ ᤋᤠᤀᤠᤱ ᤌᤱ ᤀᤠᤏᤠ᤺ᤴ ᤜᤧᤰᤁᤩᤠᤱ ᤕᤧᤰᤕᤰᤁᤡᤴ ᤋᤠᤓᤣ᤺ᤸᤗᤧ ᤌᤩ᤺ᤱ ᤆᤥᤃᤢ᤹॥” 15 ᤜᤠᤱᤅᤡᤸᤗᤧ ᤁᤢᤕᤢᤰᤛᤠᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤍᤠᤱᤒᤠᤖᤧ ᤌᤣ ᤁᤧᤒᤠ᤺ᤳᤋᤢ᤹ ᤒᤠᤜᤧᤰᤁᤣ ᤆᤥ᤺ᤰᤔᤠ ᤀᤠᤏᤡᤃᤣ ᤕᤠᤖᤡᤵ ᤘᤕᤡᤃᤧ॥” 16 ᤜᤧᤰᤁᤩᤠᤱ ᤜᤠᤱᤅᤡᤴ ᤗ᤺ᤴᤍᤧᤀᤠᤱ ᤐᤣ. ᤘᤣ᤹ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ ᤂᤢᤏᤧ᤹ ᤁᤢᤀᤣᤃᤠᤱ ᤔᤧᤎᤠᤛᤡᤱ॥ ᤌᤡᤒᤥᤱ ᤁᤢᤔᤣᤳ ᤐᤠ᤺ᤰᤔᤠᤜᤠ᤹ ᤜᤡᤶ ᤁᤥᤛᤧ ᤜᤠᤱᤜᤡᤶᤔᤥᤀᤣ ᤔᤧᤕᤢᤅᤧ ᤔᤧᤗᤠᤖᤧ॥ 17 ᤜᤧᤰᤁᤩᤠᤱ ᤜᤠᤱᤅᤡᤴ ᤗ᤺ᤴᤍᤧ ᤐᤣ. ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤀᤠᤱ ᤂᤢᤏᤧ᤹ᤏᤢ ᤔᤧᤒᤣ॥ ᤁᤢᤓᤠ ᤔᤠ᤺ᤱᤄᤠ ᤔᤧᤒᤣᤀᤠᤱ ᤔᤧᤏᤠ᤺ᤶᤛᤡᤱ॥ 18 ᤜᤧᤰᤁᤩᤠᤱ ᤜᤠᤱᤅᤡᤴᤏᤢ ᤃᤠᤋᤗᤠᤶᤒᤠ ᤁᤧᤍᤠᤒᤠ ᤁᤡᤵ ᤋᤢᤰᤛᤡ ᤃᤡᤳᤋᤡ. ᤜᤧᤰᤁᤩᤠᤱ ᤁᤧᤖᤧᤰ ᤁᤖᤣᤋᤡ ᤏᤢ ᤐᤣᤗᤣᤌᤡᤜᤠ᤹ ᤜᤠᤱᤅᤡᤸᤗᤧ ᤁᤢᤍᤃᤡ ᤗᤠᤱᤔᤧᤄᤣᤃᤧᤀᤠᤱ ᤔᤧᤒᤣ॥ 19 ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤃᤡᤳᤋᤡ ᤀᤡᤳᤋᤤᤴ ᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤀᤠᤏᤡᤃᤧᤏᤢ ᤁᤧᤎᤠᤛᤡᤱᤒᤠ᥅ ᤏᤢ᤺ᤰᤂᤧ ᤐᤣᤃᤧ᤹ᤀᤠᤱ ᤜᤠᤱ ᤀᤒ᤻ᤛᤠᤗᤥᤔᤧᤴᤏᤢ ᤕᤢᤅᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤗᤳᤇᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠ. ᤂᤧᤏᤧ᤹ᤃ ᤁᤧᤗᤠᤈᤣ᤹ᤗᤠᤶ ᤁᤧᤶᤗ᤺ᤋᤧᤒᤠᤀᤠᤱᤗᤥ॥ 20 ᤂᤧᤏᤧ᤹ᤃ ᤔᤡ᤺ᤵᤔᤠ ᤛᤡᤱᤕᤧᤴᤗᤰ ᤁᤧᤍᤩᤧᤒᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤳᤋᤠᤴ ᤐᤣ᤺ᤰᤁᤠ᤹ᤖ ᤐᤳᤋᤠ᤹ ᤀᤠᤱᤃᤠ᤹ᤀᤣ ᤔᤧᤏᤡᤀᤠᤴ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤠᤱᤃᤠ᤹ᤏᤢ ᤐᤡᤳᤇᤡ ᤔᤧᤵᤔᤠ ᤛᤢᤰᤋᤢᤱᤒᤣ᥅ ᤕᤖᤢᤛᤗᤧ᤺ᤶᤔᤥ ᤏᤢ᤺ᤰᤂᤧ ᤐᤣᤃᤧ᤹. ᤂᤧᤏᤧ᤹ ᤁᤧᤗᤠᤈᤣ᤹ᤒᤠ ᤔᤏᤠᤜᤠ᤹ᤀᤠᤱ ᤂᤧᤏᤧ᤹ᤏᤢᤀᤣ ᤋᤣ᤹ᤖᤧᤛᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤓᤧᤸᤗᤧᤛᤠᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡ ᤁᤧᤔᤧᤳᤗ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤏᤛᤠ᤺ᤴᤛᤠᤒᤠ ᤐᤥᤱᤗ॥” 21 ᤁᤖ ᤀᤡ᤺ᤳᤋᤤᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤜᤠᤱᤅᤡᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤔᤠᤱᤜᤧᤰᤛᤡᤅᤠᤀᤠᤱ ᤐᤠ᤺ᤳᤋᤢᤱ᤹. ᤂᤧᤏᤧ᤹ ᤀᤠᤱᤃᤠ᤹ ᤀᤠᤍᤠᤱᤒᤠ ᤏᤢ ᤀᤠᤜᤠᤱᤅᤡᤴ ᤀᤠᤳᤋᤠ ᤁᤧᤘᤠ᤹. ᤀᤠᤱᤃᤠ᤹ ᤛᤡᤀᤠᤛᤠᤱ ᤜᤡᤅᤠᤛᤠᤱ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤴ ᤂᤧᤵᤔᤥᤀᤣ ᤘᤠᤖᤥ॥” 22 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤀᤡᤳᤋᤤᤴ ᤔᤧᤳᤋᤢ. “ᤜᤧᤰᤁᤣᤃᤪ ᤌᤠᤛᤡᤅᤧ᤹॥” ᤂᤧᤸᤗᤧᤆᤥᤃᤢᤸᤗᤧ. ᤃᤡᤳᤋᤡ ᤀᤡᤳᤋᤤᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤔᤏᤠᤜᤠ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤏᤢ ᤌᤠᤛᤡᤱ॥ 23 ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤁᤧᤖᤧᤰ ᤔᤧᤗ᤺ᤴᤍᤧᤀᤠᤱ ᤔᤧᤒᤣ᤺ᤸᤗᤧ ᤂᤧᤴ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤜᤠᤒᤧ॥ ᤜᤠᤱᤅᤡᤸᤗᤧ ᤁᤡᤍᤪᤥᤏ ᤏᤧᤏᤧᤒᤠᤍᤧᤴᤏᤡᤴ ᤁᤠ᤺ᤰᤋᤢᤖ ᤐᤣ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤔᤧᤎᤠᤛᤡᤱ॥ 24 ᤛᤠᤍᤥᤁᤧᤴᤏᤠᤱ ᤁᤧᤖᤧᤰ ᤗᤧᤒᤡᤜᤠ᤹ᤏᤢ ᤂᤧᤵᤔᤥᤀᤣ ᤘᤕᤧ॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤒᤰᤂᤢᤀᤠᤱ ᤔᤧᤒᤣᤖ ᤔᤧᤒᤳᤇᤧ॥ ᤂᤧᤴ ᤂᤧᤱᤜᤠ᤹ᤖᤧ ᤔᤧᤏᤠ᤺ᤵᤛᤢ ᤔᤧᤕᤢᤰᤂᤢ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤧᤰᤕᤰᤁᤡᤴ ᤔᤧᤸᤗᤧᤳᤋᤣ ᤌᤠᤖᤡᤰ ᤀᤒᤡᤕᤠᤌᤠᤖᤖᤧ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ॥ 25 ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤛᤍᤥᤰᤁᤧᤴ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤁᤢᤛᤴᤍᤥ᤺ᤰᤁᤡᤴ ᤕᤧᤰᤕᤰᤁᤥ ᤏᤢ᤺ᤰᤋᤧ ᤋᤣ᤹ᤖᤧᤀᤠᤱ ᤐᤣᤃᤧ᤹॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤌᤠᤱᤅᤠᤏᤧᤓᤃᤪ ᤂᤢᤏᤧ᤹ ᤕᤠᤶᤔᤥ ᤏᤢ᤺ᤰᤀᤧ ᤋᤠ᤺ᤳᤗᤧᤖ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤛᤴᤍᤥ᤺ᤰᤁᤡᤴ ᤏᤢ ᤂᤢᤏᤧ᤹ ᤁᤢᤕᤢᤱᤔᤠᤍᤧᤴᤏᤡᤴ ᤕᤠᤶᤔᤥ ᤏᤡᤔᤠ ᤛᤢᤰᤋᤢᤱᤗ ᤕᤠ᤺ᤴᤏᤠᤖ॥ 26 ᤂᤢᤏᤧ᤹ ᤀᤠᤱᤃᤠ᤹ᤏᤢ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴᤏᤧᤓᤃᤪ ᤀᤠᤱᤃᤠ᤹ ᤜᤠᤒᤠ ᤁᤵᤔᤥ ᤘᤠ᤹ᤀᤠ. ᤂᤢᤏᤧ᤹ ᤌᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴᤏᤣ ᤀᤠᤱᤃᤠ᤹ᤏᤢ ᤆᤥᤃᤢᤖ॥” 27 ᤜᤠᤱᤅᤡᤸᤗᤧ ᤛᤍᤥᤁ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤰᤂᤣᤀᤠᤱ ᤔᤧᤳᤋᤢ. “ᤂᤧᤏᤧ᤹ᤃ ᤛᤢᤑᤥ ᤁᤧᤏᤡᤒᤠᤏᤧ ᤔᤣ᤺ᤶᤒᤡ᥅ ᤂᤧᤏᤧ᤹ ᤏᤢ ᤀᤒᤡᤕᤠᤌᤠᤖ. ᤜᤧᤰᤁᤩᤠᤱ ᤁᤧᤛ᤻ᤛᤠ ᤀᤜᤡᤔᤛ ᤏᤢ ᤀᤒᤡᤕᤠᤌᤠᤖᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴ ᤋᤣ᤹ᤖᤧᤛᤧ᤹ᤀᤠᤱ ᤕᤧᤰᤕᤰᤁᤥ ᤏᤢ᤺ᤰᤂᤧ ᤐᤣᤃᤧ᤹॥ 28 ᤂᤧᤏᤧ᤹ᤗᤠᤶᤒᤠ ᤀᤡᤱᤄᤱ ᤔᤧᤱᤄᤧᤶᤔᤣ ᤌᤠᤖᤡᤰ ᤀᤠᤱᤃᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤆᤫᤠ᤺ᤳ ᤁᤠ᤺ᤰᤔᤠᤍᤧᤴᤏᤥ ᤜᤠᤱᤄᤢᤱᤗ ᤕᤢᤱᤅᤠ॥” 29 ᤜᤧᤰᤁᤣ᤺ᤸᤗᤧ ᤛᤍᤥᤰᤁᤧᤴ ᤏᤢ ᤀᤒᤡᤕᤠᤌᤠᤖᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤕᤖᤢᤛᤗᤧᤔ ᤏᤢ᤺ᤰᤋᤢ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤒᤠ ᤂᤧᤵᤔᤥ ᤕᤢᤅᤧ ᤗᤠᤖᤧᤛᤡ॥ 30 ᤐᤧ᤺ᤱᤘᤠᤗᤡ᤺ᤳᤇᤣ᤹ ᤁᤥ᤺ᤰᤔᤠᤌᤥ ᤐᤣ᤺ᤸᤗᤧ ᤍᤠᤀᤢᤍᤧᤴ ᤜᤠᤒᤧᤖ ᤐᤣ॥ ᤂᤢᤏᤧ᤹ ᤁᤢᤎᤣᤃᤣ᤺ᤰᤐᤧᤴ ᤛᤢ᤺ᤵᤋᤢᤀᤠᤱ ᤗᤠᤱᤛᤢ᤺ᤵ ᤔᤣ᤺ᤴᤏᤣ ᤗᤠᤱᤄᤣᤃᤧᤀᤠᤱ ᤐᤣ॥ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤀᤠᤱ ᤂᤢᤴᤇᤡ᤹ ᤌᤧᤃᤣ᤺ᤰᤐᤧᤴ ᤔᤧᤛᤢ᤺ᤵᤋᤢᤀᤠᤱ ᤔᤧᤜᤠᤒᤧᤖ ᤗᤠᤱᤔᤧᤄᤣᤃᤧᤀᤠᤱ ᤔᤧᤒᤣ॥ 31 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤁᤢᤓᤠᤖᤧ ᤔᤧᤔᤧᤳᤋᤢ. “ᤀᤜᤡᤋᤥᤐᤣᤗᤧᤴ ᤆᤧᤶᤓᤴ ᤁᤧᤈᤥ᤺ᤰᤐᤠᤜᤠ᤹ᤏᤢ ᤀᤒ᤻ᤛᤠᤗᤥᤔ ᤗᤧᤵᤔᤠᤱ ᤗᤠᤛᤧᤀᤠᤱ ᤘᤠ᤹॥” ᤜᤧᤰᤁᤣ᤺ᤸᤗᤧ ᤍᤠᤀᤢᤍᤖᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤧ. “ᤕᤜᤘᤣ ᤍᤠᤱᤒᤠᤀᤣ. ᤀᤜᤡᤋᤥᤐᤣᤗᤖᤧ ᤁᤢᤛᤢᤈᤠᤴ ᤜᤏᤧᤒᤠ ᤆᤥᤃᤧ᤹ᤀᤥ॥” 32 ᤍᤠᤀᤢᤍᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠᤔᤧᤵᤔᤠᤍᤧᤴ ᤁᤥ᤺ᤰᤔᤠᤀᤥ ᤌᤥ ᤁᤧᤖᤧᤸᤗᤧ ᤜᤢᤛᤤ ᤀᤖᤁᤡ᤺ᤸᤗᤧ ᤁᤧᤍᤧ᤺ᤱᤒᤠ ᤆᤠᤱ ᤆᤠᤰᤂᤢ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤐᤥ ᤂᤠᤶᤓᤢᤋᤪᤠᤴ ᤕᤠᤰᤋᤢᤀᤠᤱ ᤍᤠᤀᤢᤍᤖᤧ ᤁᤢᤍᤢᤶᤛᤧ ᤌᤠᤅᤧᤀᤠᤱ ᤘᤕᤧ॥ 33 ᤍᤠᤀᤢᤍᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ᤏᤢ ᤁᤧᤎᤠᤱᤃᤪ ᤀᤠᤱᤃᤠ᤹ ᤀᤠᤃᤰᤗᤰ ᤁᤧᤒᤥᤱ. 34 ᤁᤖ ᤂᤧᤏᤧ᤹ ᤕᤧᤰᤕᤰᤁᤥ ᤁᤧᤏᤢ᤺ᤱ ᤁᤧᤒᤣ᤺ᤰᤁᤠᤱ ᤀᤒ᤻ᤛᤠᤗᤥᤶᤔᤡᤴ ‘ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤐᤥᤱᤅᤠ᤹. ᤀᤠᤸᤗ ᤌᤠᤖᤡᤰ ᤁᤧᤶᤒᤠᤖᤧ ᤁᤢᤛᤧᤘᤠᤖᤥᤒᤠ ᤘᤕᤠᤱ. ᤁᤖ ᤀᤠᤸᤗ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤐᤥᤱᤅᤠ’ ᤁᤧᤔᤧᤳᤋᤢᤏᤧᤓᤃᤪ. ᤀᤜᤡᤋᤥᤐᤣᤗᤖᤧ ᤁᤢᤛᤢᤈᤠᤴ ᤑᤧᤳᤗᤠ᤺ᤶᤔᤠᤖᤧ ᤗᤠᤃᤡ ᤂᤧᤏᤧ᤹ ᤑᤠ᤹ᤔᤠ ᤁᤧᤛᤢᤰᤁᤠ॥ 35 ᤂᤧᤏᤧ᤹ ᤁᤧᤏᤡᤛᤢ᤹. ᤛᤍᤥᤁ ᤏᤢ ᤀᤒᤡᤕᤠᤌᤠᤖ ᤏᤡᤱᤘᤠᤑᤢᤛᤠᤶᤒᤠᤜᤠ᤹ ᤂᤧᤏᤧ᤹ᤏᤢ ᤘᤠ᤹ᤛᤡ॥ ᤜᤠᤱᤅᤡᤸᤗᤧ ᤁᤢᤜᤡᤶᤔᤥ ᤂᤧᤏᤧ᤹ ᤌᤣᤎᤣ ᤁᤧᤄᤧᤵᤛᤢ᤹ ᤂᤧᤴ ᤁᤧᤖᤧᤰ ᤂᤧᤏᤧ᤹ ᤂᤧᤱᤜᤠ᤹ ᤆᤧᤰᤋᤧᤛᤧ᤹॥ 36 ᤂᤧᤱᤜᤠ᤹ᤏᤢ ᤛᤍᤥᤁᤖᤧ ᤁᤢᤛ᤻ᤛᤠ ᤀᤜᤡᤔᤛ ᤏᤢ ᤀᤒᤡᤕᤠᤌᤠᤖᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏ ᤘᤠ᤹ᤛᤡ॥ ᤂᤧᤏᤧ᤹ ᤌᤣ ᤁᤧᤄᤧᤵᤛᤢ᤹ ᤂᤧᤴ ᤂᤧᤱᤜᤠ᤹ᤗᤠᤶᤒᤠ ᤀᤠᤱᤃᤠ᤹ᤀᤥ ᤀᤡᤱᤄᤱ ᤜᤠᤅᤠᤱ ᤐᤡᤖᤠᤱᤅᤧ᤹॥” 37 ᤂᤧᤸᤗᤧᤆᤥᤃᤢᤸᤗᤧ ᤀᤒ᤻ᤛᤠᤗᤥᤔᤧᤴ ᤕᤖᤢᤛᤗᤧᤔ ᤗᤠᤛᤧᤖ ᤐᤳᤇᤧᤸᤗᤧᤛᤠ ᤍᤠᤀᤢᤍᤖᤧ ᤁᤢᤴᤍᤣᤱ ᤜᤢᤛᤤᤴ ᤕᤧᤰᤕᤰᤁᤥ ᤋᤩᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.