᥈ ᤛᤠᤔᤢᤀᤧᤗ 14 - LIFOTNTᤕᤥᤀᤠᤒᤧᤸᤗᤧ ᤀᤒ᤻ᤛᤠᤗᤥᤔᤧᤴ ᤕᤖᤢᤛᤗᤧᤔ ᤏᤢ᤺ᤰᤔᤠ ᤁᤥ᤺ᤳᤋᤢ 1 ᤜᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤀᤒ᤻ᤛᤠᤗᤥᤔ ᤗᤧᤵᤔᤠᤱ ᤏᤢ᤺ᤰᤂᤧ ᤁᤧᤗ᤹ᤒᤠ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤖᤧ ᤏᤡᤱᤘᤠ᤹ ᤂᤥᤛᤢ. 2 ᤜᤧᤰᤁᤩᤠᤱ ᤕᤥᤀᤠᤒᤖᤧ ᤋᤁᤥ ᤔᤧᤵᤏᤠᤒᤠᤍᤧᤴᤏᤥ ᤔᤏᤠᤜᤠ᤹ ᤐᤠᤱᤄᤢᤛᤡᤀᤠᤱ ᤗᤳᤇᤠ ᤆᤠ᤺ᤵᤔᤠ ᤔᤧᤴᤇᤢᤔᤠᤎᤡᤰ ᤀᤢ᤺ᤵᤔᤠ ᤐᤠᤱᤄᤢᤛᤡ॥ ᤂᤧᤴ ᤔᤧᤳᤋᤢ. “ᤁᤧᤜᤠ᤺ᤶᤛᤡᤱᤔᤠ ᤗᤧᤱᤛᤡᤱᤅᤧ᤹. ᤁᤧᤜᤠ᤺ᤶᤛᤡᤱᤔᤠᤜᤠ᤹ᤖᤧ ᤔᤧᤈᤠᤰᤂᤢᤒᤠ ᤆᤠᤱ ᤜᤧᤰᤋᤱᤒᤠ ᤆᤠᤱ ᤆᤠᤰᤂᤧ᤹. ᤁᤧᤎᤧᤃᤣ᤺ᤰᤐᤥ ᤏᤡ᤺ᤱᤃᤣ᤹ ᤔᤧᤕᤠᤰᤋᤧᤴᤏᤧ᤹. ᤜᤧᤰᤁᤩᤠᤱ ᤕᤖᤡᤰ ᤕᤧᤴᤏᤠᤱᤎᤥ ᤏᤧᤳᤋᤥ ᤁᤧᤕᤢᤱᤔᤠ ᤔᤧᤴᤇᤢᤔᤠ ᤜᤧᤰᤋᤱᤔᤠ ᤗᤧᤱᤛᤡᤱᤅᤧ᤹॥ 3 ᤜᤠᤱᤅᤡᤸᤗᤧ᤹ᤀᤥ ᤐᤣᤃᤧ᤹ᤀᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤧ᤹॥” ᤕᤥᤀᤠᤒᤖᤧᤀᤣ ᤂᤢᤏᤧ᤹ ᤁᤴ ᤐᤠ᤺ᤴᤜᤠ᤹ ᤜᤢ᤹ᤖᤢ. ᤂᤢᤏᤧ᤹ᤀᤣ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤶᤒᤪᤠᤀᤥ ᤁᤣ᤺ᤳᤋᤢ ᤐᤡᤖᤢᤒᤠᤖᤥ॥ 4 ᤋᤁᤥᤒᤠ ᤔᤧᤴᤇᤢᤔᤠᤴ ᤜᤠᤱᤅᤡᤸᤗᤧ᤹ᤀᤥ ᤐᤣ. ᤜᤧᤰᤁᤩᤠᤱ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤜᤠᤱᤅᤡᤴ ᤛᤧᤘᤠ ᤔᤧᤳᤋᤢᤖ ᤀᤰᤂᤣ ᤔᤧᤳᤋᤢ. “ᤜᤠᤱᤅᤣ. ᤛᤧ᤺ᤵᤋᤠᤱᤅᤧ᤹ᤀᤥ॥” 5 ᤜᤠᤱᤅᤡᤸᤗᤧ ᤂᤧᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤌᤧᤔᤠ ᤋᤢᤰᤂᤣ ᤁᤧᤍᤢᤔᤢᤀᤠᤱ ᤘᤠ᥅” ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ᤃ ᤔᤡᤔᤣᤍᤢᤔᤠᤀᤠᤖᤥ॥ ᤀᤠᤱᤃᤠ᤹ ᤀᤠᤕᤧᤶᤒᤠ ᤛᤩᤧᤀᤠᤱ ᤘᤠ᤹ᤖᤥ॥ 6 ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤧᤵᤑᤢ ᤀᤠᤛ᤻ᤛᤠ ᤘᤕᤧᤛᤡ. ᤂᤧᤱᤜᤠ᤹ ᤋᤧᤶᤒᤣ᤹ᤀᤥ ᤆᤢᤅᤧᤇᤡ॥ ᤂᤧᤵᤔᤥ ᤂᤧᤱᤜᤠ᤹ ᤁᤧᤛᤧᤶᤒᤠ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧ॥ ᤌᤡᤰᤁᤡᤸᤗᤧ ᤘᤣ᤹ᤀᤡᤴ ᤜᤡᤵᤋᤢᤀᤠᤱ ᤛᤧᤖᤢ॥ 7 ᤀᤠᤸᤗ ᤀᤔᤧᤳᤋᤧᤏᤠ. ᤁᤧᤖᤧᤰ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤔᤧᤒᤥᤃᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤀᤠᤒᤠᤅᤣ ᤁᤢᤴᤛᤠ᤹ ᤁᤧᤛᤧᤵᤐᤧᤴ ᤀᤠᤏᤡᤃᤣ ᤜᤢᤰ ᤀᤠᤛᤢᤵᤋᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤀᤠᤒᤠᤅᤣ ᤁᤢᤴᤛᤠ᤹ ᤛᤧᤖᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤂᤧᤴ ᤛᤧᤖᤢᤶᤒᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤰ ᤁᤧᤄᤥᤒᤧᤴᤏᤠᤱ ᤛᤧᤖᤢᤶᤒᤧ॥’ ᤂᤧᤱᤜᤠ᤹ᤖᤧ ᤜᤧᤰᤁᤣ ᤔᤧᤈᤥᤃᤢᤸᤗᤧᤃ ᤗᤳᤇᤠᤎᤡᤰ ᤁᤧᤏᤶᤒᤠ ᤔᤡᤜᤥ᤺ᤶᤒᤧᤴᤏᤠᤱ ᤔᤧᤛᤧᤖᤢ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤕᤧᤶᤒᤠ᤺ᤸᤗᤧ ᤁᤢᤔᤡᤱᤅᤡᤴ ᤔᤧᤔᤠᤛᤢᤸᤗᤧ ᤁᤴ ᤀᤡᤰᤛᤠ ᤂᤠᤶᤒᤣ᤺ᤰᤔᤥ ᤜᤠ᤺ᤳᤋᤠᤱ ᤁᤢᤛᤠᤁᤢᤀᤣ ᤔᤧᤴᤕᤠ᤺ᤰᤏᤧᤸᤗᤥ॥” 8 ᤜᤠᤱᤅᤡᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤔᤧᤳᤋᤢ. “ᤐᤣᤃᤧ᤹. ᤀᤠᤱᤃᤠ᤹ᤀᤣ ᤂᤧᤏᤧ᤹ ᤗᤧᤵᤔᤠᤱ ᤂᤠᤛᤧᤴ ᤆᤥᤃᤢᤱ ᤐᤡᤏᤧ॥” 9 ᤁᤖ ᤋᤁᤥᤒᤠ ᤔᤧᤴᤇᤢᤔᤠ᤺ᤸᤗᤧ ᤀᤠᤸᤗᤛᤠᤱ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤁᤸᤗᤧ ᤁᤢᤀᤠᤵᤋᤡᤰᤁᤡᤴ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤛᤢᤘᤠᤱᤅᤥ ᤆᤢᤰᤗ॥ ᤜᤠᤱ ᤏᤢ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤌᤡᤰᤔᤠ ᤔᤧᤒᤥᤱᤏᤧᤸᤗᤖᤥ॥” 10 ᤜᤠᤱᤅᤡᤸᤗᤧ ᤔᤧᤳᤋᤢ. “ᤀᤠᤸᤗᤛᤠᤱ ᤔᤏᤠᤖᤧ ᤂᤧᤏᤧ᤹ ᤌᤣᤀᤡ ᤁᤧᤶᤔᤧᤳᤏᤧᤑᤃᤪ. ᤂᤧᤴ ᤀᤠᤱᤃᤠ᤹ᤀᤥ ᤋᤠᤖᤠᤶᤔᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤕᤠᤶᤔᤥ ᤂᤧᤏᤧ᤹ ᤀᤠᤵᤑᤠᤸᤗᤧᤀᤠᤱ ᤋᤢᤰᤂᤣ ᤁᤧᤴᤈᤠ᤺ᤳᤏᤧᤴ॥” 11 ᤜᤧᤰᤁᤩᤠᤱ ᤕᤠᤶᤔᤥ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤐᤠ᤺ᤳᤋᤢ. “ᤁᤢᤗᤧᤰᤘᤠ ᤁᤧᤜᤢᤱᤒᤠᤜᤠ᤹ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤔᤧᤶᤒᤠᤱᤔᤠ ᤏᤢ ᤀᤠᤱᤃᤠ᤹ ᤀᤠᤛ᤻ᤛᤠᤴ ᤛᤡᤔᤠ ᤔᤧᤶᤒᤠᤱᤔᤠᤖᤧ ᤗᤠᤃᤡ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤘᤠ ᤆᤥᤃᤧ᤹॥” ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤔᤠᤱᤜᤧᤰᤛᤡᤱ. “ᤂᤧᤏᤧ᤹ ᤁᤧᤛ᤻ᤛᤠ᤺ᤸᤗᤧ ᤁᤢᤎᤧᤃᤣᤰ ᤀᤡ ᤗᤳᤇᤠᤀᤠᤱ ᤂᤠᤶᤒᤠᤱᤅᤥ ᤔᤰᤔᤧᤎᤠᤏᤧᤴ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤐᤠ᤺ᤳᤋᤢᤱ॥” 12 ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤀᤠᤸᤗᤛᤠᤱ ᤗᤳᤇᤠ ᤐᤠᤴ ᤐᤠ᤺ᤵᤔᤠ ᤛᤢᤰᤋᤢᤱᤒᤡ᥅” ᤜᤠᤱᤅᤡᤸᤗᤧ ᤐᤠ᤺ᤳᤋᤢ. “ᤐᤠ᤺ᤳᤋᤧ᤹॥” 13 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤥ ᤀᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤀᤥ ᤀᤠᤰᤂᤣᤗ᤹ᤖᤡᤰ ᤀᤰᤋᤱᤒᤠ ᤐᤠᤴ ᤗᤠᤛᤧ᥅ ᤜᤠᤱᤅᤡᤸᤗᤧᤀᤣ ᤀᤰᤂᤣ ᤐᤠ᤺ᤳᤋᤢ᤹. ᤂᤢᤏᤧ᤹ ᤀᤠᤒᤠᤅᤣ ᤕᤠ᤺ᤶᤒᤰ ᤑᤧᤳᤗᤠ᤺ᤴᤍᤢᤸᤗᤧ ᤀᤠᤵᤋᤡᤰᤛᤠᤒᤠ ᤔᤧᤒᤥᤱᤏᤧᤶᤒᤡ᥅ ᤌᤣᤀᤠᤱᤓᤧᤸᤗᤧ ᤗᤠᤈᤣ᤹ᤗᤠᤶ ᤁᤧᤗ᤺ᤳᤋᤢ ᤁᤧᤍᤣᤛᤢᤒᤠ ᤔᤏᤠᤴ ᤀᤠᤍᤠᤱᤒᤠᤖᤧ ᤕᤠᤶᤔᤥ ᤏᤢ᤺ᤰᤔᤠ ᤋᤠ᤺ᤵᤔᤠ ᤁᤧᤏᤠ᤹ᤖᤢᤀᤠᤱ ᤘᤠ᤹॥ 14 ᤂᤠᤶᤒᤠᤱᤅᤥ ᤁᤧᤘᤧᤵᤐᤠ ᤆᤫᤠ᤺ᤳᤋᤡᤴ ᤕᤠᤶᤔᤥ ᤛᤢᤶᤔᤠ ᤛᤢᤰᤔᤧᤍᤧᤳᤏᤧᤶᤒᤠ ᤁᤢᤀᤡᤛᤡᤰ ᤀᤠᤏᤡᤃᤣ ᤁᤧᤖᤧᤰ ᤛᤡᤔᤠᤀᤣ ᤁᤧᤒᤥᤱᤒᤠ ᤐᤥ᤺ᤰᤂᤧ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤃ ᤀᤠᤴᤇᤧᤳᤏᤧᤴ. ᤂᤢᤏᤧ᤹ᤃ ᤂᤢᤏᤧ᤹ᤗᤠᤶᤒᤠ ᤔᤠ᤺ᤱᤄᤠ ᤁᤧᤒᤥᤱᤒᤠᤴ ᤏᤢ᤺ᤰᤔᤠ ᤋᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢ᤹॥ 15 “ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤀᤠᤍᤠᤱᤒᤠ ᤔᤧᤳᤇᤧ ᤋᤩᤠᤱᤒᤠ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤕᤱᤔᤠ ᤔᤧᤛᤧᤖᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤛᤧᤘᤠᤖᤥᤔᤠᤸᤗᤧ ᤏᤡᤱᤘᤠ᤹ ᤀᤡ᤺ᤳᤋᤢᤱ. ᤜᤠᤱᤅᤡᤴᤏᤢ ᤐᤠᤴ ᤐᤠ᤺ᤵᤔᤠ ᤂᤥᤛᤢᤱᤏᤧᤑᤃᤪ ᤂᤢᤏᤧ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤢ᤹. 16 ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤛ᤻ᤛᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤵᤔᤡ ᤐᤡᤖᤧᤒᤠ ᤗᤰᤁᤧᤄᤥᤒᤠ ᤐᤥᤱᤔᤠᤗᤠᤶ ᤔᤠ᤺ᤱᤄᤠ ᤆᤥ᤺ᤰᤔᤠ ᤁᤧᤃᤥ᤺ᤵᤐᤠ ᤔᤏᤠ᤺ᤴᤗᤠᤶ ᤛᤧ᤺ᤵᤐᤠ॥ 17 “ᤀᤠᤸᤗ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤔᤠᤸᤗᤧ ᤏᤡᤱᤘᤠ᤹ ᤀᤡ᤺ᤳᤋᤢᤱ᤹. ‘ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤁᤧᤒᤠ᤺ᤴᤏᤡᤸᤗᤧ ᤀᤠᤱᤃᤠ᤹ ᤀᤠᤛᤡᤰ ᤏᤧᤏᤧ ᤔᤧᤳᤋᤠ᤹ᤖ. ᤌᤣᤀᤠᤱᤓᤧᤸᤗᤧ ᤋᤠᤵᤑᤧ᤺ᤶᤒᤠ ᤏᤢ ᤏᤢᤒᤠ ᤛᤧᤴᤇᤧ ᤀᤠᤍᤠᤱᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡᤰ ᤁᤧᤈᤥᤰ॥ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤍᤠᤱᤒᤠᤏᤢ ᤘᤠ᤹ᤖ॥’” 18 ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤀᤠᤱᤃᤠ᤹ᤏᤢ ᤐᤠᤴ ᤔᤧᤈᤡᤰᤂᤧᤴᤏᤧ᤹॥ ᤀᤠᤱᤃᤠ᤹ ᤗᤳᤇᤠ ᤐᤠᤴ ᤛᤣ᤺ᤴᤍᤥᤏᤧ॥” ᤂᤧᤸᤗᤧ ᤔᤧᤳᤋᤢ. “ᤐᤠ᤺ᤳᤋᤧᤏᤠ ᤀᤠᤍᤠᤱᤒᤣ॥” 19 ᤜᤠᤱᤅᤡᤸᤗᤧ ᤐᤠ᤺ᤳᤋᤢ. “ᤁᤴ ᤁᤧᤖᤧᤰ ᤐᤠ᤺ᤴᤏᤥ ᤕᤥᤀᤠᤒᤖᤧ ᤁᤢᤜᤢᤰ ᤘᤠ᤹ᤒᤡ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤔᤡᤱᤅᤥ ᤔᤠᤱᤜᤧᤰᤛᤡᤅᤠ᤹ᤀᤠᤱ ᤐᤠ᤺ᤳᤋᤢᤱ. ᤀᤠᤍᤠᤱᤒᤠᤖᤧ ᤛᤣ᤺ᤴᤍᤥᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤸᤗᤧ ᤁᤧᤒᤠ᤺ᤵᤐᤧᤴ ᤆᤢᤰᤘᤠ ᤑᤧᤱᤘᤠ ᤗ᤹ᤔᤠᤀᤣ ᤔᤧᤄᤥᤛᤢᤴ॥ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤕᤥᤀᤠᤒᤖᤧᤀᤣ ᤁᤴ ᤐᤠ᤺ᤴᤏᤡᤴ ᤜᤢ᤹ᤖᤠᤱᤒᤠᤖᤥ. ᤂᤢᤏᤧ᤹ᤀᤣ ᤀᤠᤱᤃᤠ᤹ ᤀᤠᤔᤢᤖᤠᤀᤥ ᤁᤴ ᤁᤧᤖᤧᤰ ᤐᤠᤴ ᤁᤣ᤺ᤳᤋᤢ ᤐᤡᤖᤠᤱᤒᤠᤖᤥ॥ 20 ᤀᤠᤸᤗᤥᤒᤠ ᤕᤠᤰᤏᤠᤶᤔᤡᤴ ᤘᤣ᤹ ᤗᤧᤵᤔᤠᤱ ᤗᤧᤱᤛᤧ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤕᤥᤀᤠᤒᤖᤧ ᤁᤴ ᤆᤥᤃᤢᤒᤠᤖᤥ॥ ᤁᤖ ᤀᤠᤍᤠᤱᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡᤰ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤃᤵᤐᤠ ᤁᤧᤈᤥᤰ. ᤗᤠᤈᤣ᤹ᤀᤥ ᤌᤣ ᤐᤥᤱᤗ ᤐᤳ ᤂᤧᤴ ᤁᤧᤖᤧᤰ ᤁᤧᤏᤡᤛᤢ᤹॥” 21 ᤜᤠᤱᤅᤡᤸᤗᤧ ᤕᤥᤀᤠᤒᤧᤴ ᤔᤧᤳᤋᤢ. “ᤁᤴ ᤐᤠ᤺ᤴᤏᤥ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤋᤧᤴᤍᤠᤱ॥ ᤐᤣᤃᤧ᤹ᤀᤠᤱ ᤀᤒ᤻ᤛᤠᤗᤥᤶᤔᤡᤴ ᤏᤢ᤺ᤰᤋᤧ ᤋᤠᤖᤧ᤹॥” 22 ᤜᤧᤰᤁᤣ᤺ᤸᤗᤧ ᤕᤥᤀᤠᤒᤧᤴ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤜᤠᤱᤅᤡᤴ ᤛᤧᤘᤠ ᤔᤧᤳᤋᤢᤀᤠᤱ ᤜᤠᤱᤘᤠᤔᤢ᤹ᤀᤡ ᤐᤡᤖᤢᤖ ᤕᤥᤀᤠᤒᤖᤧ ᤔᤧᤳᤋᤢ. “ᤀᤠᤀᤡᤴ ᤀᤠᤱᤃᤠ᤹ ᤀᤠᤒᤣᤗᤡᤴ ᤁᤧᤄᤧᤵᤛᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤍᤠᤱᤒᤠ ᤜᤠᤱᤅᤡᤸᤗᤧ ᤀᤠᤱᤃᤠ᤹ ᤁᤧᤛᤡᤖᤠ᤹ ᤌᤠᤅᤠᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤢᤱ॥” 23 ᤂᤧᤸᤗᤧᤆᤥᤃᤢᤸᤗᤧ ᤕᤥᤀᤠᤒ ᤃᤛᤢᤖ ᤐᤣᤀᤠᤱ ᤀᤒ᤻ᤛᤠᤗᤥᤶᤔᤡᤴ ᤕᤖᤢᤛᤗᤧᤔ ᤋᤠᤖᤢ॥ 24 ᤁᤖ ᤜᤠᤱᤅᤡᤸᤗᤧ ᤔᤧᤳᤋᤢ. “ᤂᤧᤴ ᤀᤠᤵᤑᤣᤰ ᤁᤢᤜᤡᤶᤔᤥ ᤕᤢᤱᤗ॥ ᤂᤧᤴ ᤀᤠᤱᤃᤠ᤹ ᤀᤠᤍᤢᤶᤛᤧ ᤀᤠᤓᤧᤸᤗᤧᤀᤠᤱ ᤔᤧᤍᤠᤏᤧᤴᤗ॥” ᤂᤧᤸᤗᤧᤆᤥᤃᤢᤸᤗᤧ ᤀᤒ᤻ᤛᤠᤗᤥᤔᤧᤴ ᤀᤠᤵᤑᤣᤰ ᤁᤢᤜᤡᤶᤔᤥ ᤐᤣ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤍᤃᤡ ᤀᤥᤛᤣ᤺ᤴ ᤔᤧᤎᤠᤰᤛᤡᤱᤅᤧᤴᤗᤥ॥ ᤍᤠᤀᤢᤍᤖᤧ ᤀᤒ᤻ᤛᤠᤗᤥᤔᤧᤴ ᤜᤠ᤺ᤵᤋᤢ 25 ᤀᤠᤸᤗ ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤀᤒ᤻ᤛᤠᤗᤥᤔ ᤜᤧᤰᤁᤣ ᤏᤢᤒᤠ ᤏᤡᤃᤧᤎᤠ᤺ᤵᤐᤠ ᤛᤠ᤹ᤖᤡᤰ ᤔᤧᤈᤔᤢᤒᤠ ᤘᤣ᤹ ᤜᤠ᤺ᤳᤋᤠᤱ ᤜᤥ᤺ᤵᤋᤧ॥ ᤁᤢᤎᤧᤃᤣ᤺ᤰᤁᤠᤱ ᤕᤥ ᤁᤢᤗᤠᤱ ᤌᤠᤖᤡᤰ ᤁᤢᤕᤥᤰ ᤌᤣᤀᤠᤱ ᤔᤧᤒᤳᤇᤧᤴ॥ 26 ᤂᤢᤏᤧ᤹ ᤁᤢᤎᤧᤃᤣᤰ ᤔᤢᤖᤡᤰᤁᤡᤴ ᤂᤰᤋᤢᤀᤠᤱ (ᤌᤧᤃᤣ᤺ᤰᤐᤧᤴ ᤐᤥᤖᤧᤀᤠᤱ ᤗᤡ᤺ᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤰᤋᤢᤖ ᤘᤕᤧ) ᤔᤧᤎᤠᤱᤛᤢᤸᤗᤧ ᤁᤡᤵ ᤏᤧᤳᤇᤡ ᤛᤣᤁᤣᤗ ᤕᤥᤖᤧ॥ 27 ᤀᤒ᤻ᤛᤠᤗᤥᤔᤖᤧ ᤛᤢᤶᤛᤡ ᤁᤢᤛ᤻ᤛᤠ ᤏᤢ ᤋᤠᤔᤠᤖ ᤔᤡᤱ ᤁᤧᤘᤠ᤺ᤵᤔᤠ ᤔᤧᤴᤇᤡᤔᤠᤎᤡᤰ ᤛᤠᤘᤠ᤺ᤴᤇᤡᤱᤅᤠᤱ ᤘᤕᤧ॥ ᤋᤠᤔᤠᤖᤧᤴ ᤛᤠ᤹ᤖᤡᤰ ᤏᤢᤔᤠ ᤔᤧᤴᤇᤢᤔᤠ ᤘᤕᤧ॥ 28 ᤀᤒ᤻ᤛᤠᤗᤥᤔᤧᤴ ᤋᤱᤒᤣ᤹ ᤏᤧᤳᤇᤡᤎᤠᤖᤡᤰ ᤕᤖᤢᤛᤗᤧᤔ ᤜᤠᤱᤅᤡᤸᤗᤧ ᤁᤢᤒᤣᤛᤠᤱ ᤀᤥᤛᤣ᤺ᤴ ᤔᤧᤴᤎᤠᤰᤛᤡᤱᤅᤣ ᤕᤢᤅᤧ॥ 29 ᤜᤧᤰᤁᤣ᤺ᤸᤗᤧ ᤀᤒ᤻ᤛᤠᤗᤥᤔᤖᤧ ᤕᤥᤀᤠᤒᤧᤴ ᤜᤠᤱᤅᤡᤸᤗᤧ᤹ᤀᤥ ᤐᤣ᤺ᤰᤗ ᤑᤠ᤹ᤀᤠᤱ ᤀᤡᤱᤄᤱ ᤜᤠᤰᤋᤢ. ᤁᤖ ᤕᤥᤀᤠᤒᤧᤴ ᤔᤧᤍᤩᤧᤏᤧᤴ॥ ᤀᤒ᤻ᤛᤠᤗᤥᤔᤖᤧ ᤂᤧᤴ ᤏᤡᤗᤧᤱ ᤀᤢ᤺ᤳᤋᤢ. ᤜᤧᤰᤁᤣᤛᤠᤱ ᤕᤥᤀᤠᤒᤧᤴ ᤔᤧᤍᤩᤧᤏᤧᤴ॥ 30 ᤜᤧᤰᤁᤣ᤺ᤸᤗᤧ ᤀᤒ᤻ᤛᤠᤗᤥᤔᤖᤧ ᤁᤢᤛᤧᤘᤠᤖᤥᤒᤧᤴ ᤔᤧᤳᤋᤢ. “ᤕᤥᤀᤠᤒᤖᤧ ᤗᤳᤇᤠ ᤁᤢᤒᤠᤖᤡ ᤀᤠᤱᤃᤠ᤹ ᤀᤠᤒᤠᤖᤡ᤺ᤸᤗᤧ ᤁᤢᤒᤣᤛᤠᤱ ᤏᤧ᤹᤺. ᤜᤧᤰᤁᤩᤠᤱ ᤂᤧᤵᤔᤥ ᤜ᤺ᤰᤛᤡ ᤗᤡᤱᤗᤐᤳ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡᤛᤢᤶ॥ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ᤂᤧᤵᤔᤥ ᤔᤡ ᤌᤧᤃᤧᤶᤔᤧ᤹॥” ᤂᤧᤸᤗᤧᤆᤥᤃᤢᤸᤗᤧ ᤀᤒ᤻ᤛᤠᤗᤥᤔᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤧᤵᤔᤥ ᤔᤡ ᤔᤧᤕᤠᤰᤋᤢ॥ 31 ᤂᤧᤴ ᤀᤣᤃᤠᤱ ᤕᤥᤀᤠᤒᤧᤴ ᤀᤒ᤻ᤛᤠᤗᤥᤔᤖᤧ ᤁᤢᤜᤡᤶᤔᤥ ᤋᤩᤧᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ᤖᤧ ᤌᤣᤀᤠᤱ ᤀᤠᤱᤃᤠ᤹ ᤀᤠᤒᤠᤖᤡᤀᤥ ᤔᤡ ᤔᤧᤕᤠᤰᤋᤢᤒᤠᤒᤣ᥅” 32 ᤀᤒ᤻ᤛᤠᤗᤥᤔᤖᤧ ᤔᤧᤳᤋᤢ. “ᤀᤠᤱᤃᤠ᤹ᤀᤥ ᤁᤧᤍᤠᤀᤠᤱ ᤂᤧᤏᤧ᤹ᤗᤠᤶᤒᤠ ᤜᤠᤱᤅᤡᤴ ‘ᤌᤣᤀᤠᤱ ᤀᤠᤱᤃᤠ᤹ ᤃᤛᤢᤖᤗᤠᤶ ᤁᤧᤍᤠᤖᤠᤱᤒᤠ᥅ ᤀᤠᤱᤃᤠ᤹ᤃ ᤂᤧᤵᤔᤥ ᤕᤢᤅᤠᤱᤅᤡᤸᤗᤧᤀᤣ ᤏᤢᤒᤠ ᤐᤥ᤺ᤰᤂᤧᤒᤠᤔᤧᤴ’ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤜᤠᤰᤔᤠ ᤑᤠ᤹ᤀᤠᤱ ᤀᤢ᤺ᤳᤏᤧᤀᤠᤱ ᤘᤕᤧ ᤁᤖ ᤁᤧᤴᤍᤩᤧᤏᤧᤴ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤜᤠᤱᤅᤡᤸᤗᤧ᤹ᤀᤥ ᤐᤣ᤺ᤰᤔᤠ ᤂᤥᤀᤠᤖ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤡᤔᤠᤖᤧ ᤗᤠᤃᤡ ᤐᤠ᤺ᤴᤎᤡᤰᤔᤠ ᤐᤠᤴ ᤁᤢᤕᤢᤱᤅᤠᤱ ᤘᤠ᤹ᤀᤠᤏᤧᤓᤃᤪ ᤂᤢᤏᤧ᤹ ᤛᤧᤳᤋᤠ᤹ᤖ॥” 33 ᤜᤧᤰᤁᤩᤠᤱ ᤕᤥᤀᤠᤒᤧᤴ ᤜᤠᤱᤅᤡᤸᤗᤧ᤹ᤀᤥ ᤐᤣᤀᤠᤱ ᤁᤴ ᤐᤠ᤺ᤴᤏᤡᤴ ᤆᤧᤰᤋᤢ॥ ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤀᤒ᤻ᤛᤠᤗᤥᤔᤧᤴ ᤀᤢ᤺ᤳᤐᤠᤱᤄᤢᤛᤡ॥ ᤂᤧᤴ ᤋᤩᤧ. ᤜᤧᤰᤁᤩᤠᤱ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤜᤠᤱᤅᤡᤴ ᤛᤧᤘᤠ ᤔᤧᤳᤋᤢ॥ ᤜᤠᤱᤅᤡᤸᤗᤧ ᤀᤒ᤻ᤛᤠᤗᤥᤶᤔᤡᤴ ᤆᤢᤵ ᤔᤧᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.