᥈ ᤛᤠᤔᤢᤀᤧᤗ 13 - LIFOTNTᤀᤔᤏᤥᤏ ᤏᤢ ᤋᤠᤔᤠᤖ 1 ᤍᤠᤀᤢᤍᤖᤧ ᤁᤢᤛ᤻ᤛᤠ ᤀᤒ᤻ᤛᤠᤗᤥᤔᤖᤧ ᤋᤠᤔᤠᤖ ᤔᤡᤱ ᤁᤧᤘᤠ᤺ᤵᤔᤠ ᤗᤳᤇᤠ ᤏᤢᤔᤠ ᤁᤢᤴᤛᤠ᤹ ᤔᤧᤴᤇᤢᤔᤠᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤘᤣ᤹ ᤁᤢᤛ᤻ᤛᤠ ᤀᤔᤏᤥᤏ ᤔᤧᤵᤏᤠᤒᤧᤸᤗᤧ ᤂᤧᤴ ᤛᤠ᤹ᤖᤡᤰ ᤏᤠᤏᤢ᤹ᤖᤢ॥ 2 ᤀᤔᤏᤥᤏᤖᤧ ᤁᤢᤶᤔᤠ ᤐᤠ᤺ᤰᤔᤧᤸᤗᤧ ᤁᤳᤋᤢᤔᤠ ᤂᤢᤏᤧ᤹ ᤁᤢᤴᤛᤠ᤹ ᤔᤧᤴᤇᤢᤔᤠᤴ ᤁᤢᤛᤡᤖᤠ᤹ ᤌᤠᤅᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤕ᤹ᤒᤠ ᤌᤧᤳᤋᤧᤖ ᤐᤣ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤘᤕᤧᤒᤠᤸᤗᤧ ᤂᤧᤴᤏᤢ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴ॥ 3 ᤁᤖ ᤍᤠᤀᤢᤍᤖᤧ ᤁᤢᤶᤓᤢ᤹ ᤛᤡᤔᤠᤜᤖᤧ ᤁᤢᤛ᤻ᤛᤠ ᤕᤥᤏᤠᤍᤠᤒ ᤔᤧᤵᤏᤠᤒᤧᤴ ᤀᤔᤏᤥᤏᤖᤧ ᤁᤢᤴᤍᤣ᤺ᤱᤒᤠ ᤘᤕᤧ. ᤂᤧᤴ ᤛᤠ᤹ᤖᤡᤰ ᤆᤠ᤺ᤵᤐᤠ ᤘᤕᤧ॥ 4 ᤂᤧᤸᤗᤧ ᤀᤔᤏᤥᤏᤧᤴ ᤔᤧᤳᤋᤢ. “ᤜᤠᤱᤛᤠᤀᤣ. ᤂᤧᤏᤧ᤹ ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤕ᤹ᤒᤠ ᤁᤧᤎᤧᤳᤋᤧᤖ ᤁᤧᤒᤣᤒᤠᤒᤣ᥅ ᤂᤧᤏᤧ᤹ ᤁᤧᤶᤔᤧᤳᤋᤠᤴᤒᤠᤒᤡ᥅” ᤀᤔᤏᤥᤏᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤶᤓᤢ᤹ ᤀᤒ᤻ᤛᤠᤗᤥᤔᤖᤧ ᤁᤢᤴᤛᤠ᤹ ᤔᤧᤴᤇᤢᤔᤠ ᤋᤠᤔᤠᤖᤧᤴ ᤀᤠᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹॥” 5 ᤕᤥᤏᤠᤍᤠᤒᤖᤧ ᤔᤧᤳᤋᤢ. “ᤁᤧᤍᤢᤰᤐᤠ ᤗᤧᤱᤛᤡᤱᤅᤧ᤹ᤀᤠᤱ ᤕᤢᤰᤏᤠᤀᤥ ᤏᤧᤛ᤻ᤛᤧ᤹॥ ᤜᤧᤰᤁᤩᤠᤱ ᤁᤧᤶᤒᤠ ᤁᤧᤛᤠ᤹ᤛᤧ ᤋᤠ᤺ᤸᤗᤧ ᤀᤰᤂᤣ ᤔᤧᤳᤋᤧ᤹. ‘ᤋᤠᤔᤠᤖᤧᤴ ᤋᤠᤀᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤈᤠ ᤆᤥᤃᤢ ᤐᤡᤀᤠᤖ. ᤀᤠᤱᤃᤠ᤹ ᤀᤠᤍᤃᤡ ᤌᤥ᤺ᤰᤋᤢᤖ. ᤀᤠᤱᤃᤠ᤹ ᤀᤠᤍᤃᤡ ᤆᤥᤃᤢᤒᤠᤴ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤥᤗᤠᤶ ᤆᤠᤱ᤹॥’” 6 ᤂᤧᤸᤗᤧᤆᤥᤃᤢᤸᤗᤧ ᤕᤥᤏᤠᤍᤠᤒᤖᤧ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤀᤔᤏᤥᤏᤧᤴ ᤁᤧᤍᤢᤰᤐᤠ ᤗᤧᤱᤛᤡᤱᤅᤠᤱ ᤕᤢᤰᤏᤠᤀᤥ ᤏᤧᤛᤡᤱᤅᤠᤱ ᤏᤧᤛ᤻ᤛᤧ॥ ᤜᤠᤱᤅᤡᤴ ᤁᤢᤛᤠ᤹ᤛᤧ ᤋᤩᤧ ᤜᤧᤰᤁᤣ᤺ᤸᤗᤧ ᤀᤔᤏᤥᤏᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤴᤛᤠ᤹ ᤋᤠᤔᤠᤖᤧᤴ ᤋᤠᤀᤠᤱ ᤀᤠᤱᤃᤠ᤹ ᤀᤠᤍᤃᤡᤀᤣ ᤁᤢᤈᤠ ᤆᤥᤃᤢ ᤐᤡᤀᤠᤖ. ᤜᤧᤰᤁᤩᤠᤱ ᤁᤢᤜᤢᤰᤁᤥᤗᤠᤶ ᤆᤠᤔᤠ ᤂᤥᤛᤢᤱᤗ॥” 7 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤋᤠᤔᤠᤖᤧᤴ ᤀᤡᤱᤄᤱ ᤜᤠᤰᤋᤢ. “ᤂᤧᤏᤧ᤹ ᤁᤧᤶᤓᤢ᤹ ᤀᤔᤏᤥᤏᤖᤧ ᤁᤢᤜᤡᤶᤔᤥ ᤐᤣᤃᤧ᤹ᤀᤠᤱ ᤂᤢᤏᤧ᤹ ᤁᤢᤗᤠᤃᤡ ᤁᤢᤈᤠ ᤆᤥᤃᤧ ᤐᤡᤖᤧ᤹॥” 8 ᤂᤧᤸᤗᤧᤆᤥᤃᤢᤸᤗᤧ ᤋᤠᤔᤠᤖᤧᤴ ᤁᤢᤶᤓᤢ᤹ᤖᤧ᤹ᤀᤥ ᤋᤩᤧ. ᤜᤧᤰᤁᤩᤠᤱ ᤂᤧᤴ ᤏᤧᤛ᤻ᤛᤧᤒᤠ ᤏᤡᤛᤢ॥ ᤂᤢᤏᤧ᤹ ᤑᤣ᤹ᤖᤢᤶᤈᤡ ᤛ᤹ᤖᤢᤀᤠᤱ ᤂᤧᤸᤗᤧ ᤁᤢᤍᤃᤡ ᤗᤥ᤺ᤳᤋᤥ ᤀᤣ᤺ᤵᤛᤢ ᤐᤡᤖᤢ॥ 9 ᤜᤧᤰᤁᤩᤠᤱ ᤂᤧᤸᤗᤧ ᤗᤥ᤺ᤳᤋᤥ ᤀᤣ᤺ᤶᤔᤧᤴ ᤋᤣ᤹ᤖᤢᤀᤠᤱ ᤀᤔᤏᤥᤏᤖᤧ ᤁᤢᤍᤃᤡ ᤁᤢᤈᤠᤔᤠ ᤆᤧᤳᤌᤩᤠᤀᤥ ᤗᤥ᤺ᤳᤋᤥᤴ ᤕᤠᤰᤋᤢ ᤐᤡᤖᤢ. ᤁᤖ ᤀᤔᤏᤥᤏᤧᤴ ᤆᤠᤔᤠ ᤔᤧᤍᤧᤴᤍᤧᤴ॥ ᤜᤧᤰᤁᤩᤠᤱ ᤀᤔᤏᤥᤏᤖᤧ ᤁᤧᤖᤧᤰ ᤔᤏᤠᤜᤠ᤹ ᤁᤢᤕᤠᤰᤑᤠᤱᤗᤠᤶ ᤐᤠᤱᤄᤢᤍᤣᤛᤢᤛᤡ॥ 10 ᤂᤧᤱᤜᤠ᤹ ᤁᤧᤖᤧᤰ ᤔᤧᤒᤣᤀᤠᤱ ᤂᤢᤏᤧ᤹ ᤋᤠᤔᤠᤖᤧᤴ ᤔᤧᤳᤋᤢ. “ᤀᤠᤈᤠᤔᤠ ᤆᤠ᤺ᤴ ᤀᤠᤕᤠᤰᤑᤠᤱᤀᤥ ᤑᤧᤳᤋᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤜᤢᤰᤁᤥᤗᤠᤶ ᤆᤠᤱ᤹॥” ᤂᤢᤏᤧ᤹ ᤀᤣ᤺ᤵᤛᤢᤒᤠ ᤗᤥ᤺ᤳᤋᤥᤴ ᤀᤔᤏᤥᤏᤖᤧ ᤁᤢᤕᤠᤰᤑᤠᤱᤀᤥ ᤋᤣ᤹ᤖᤢ ᤐᤡᤖᤢ॥ 11 ᤁᤖ ᤂᤧᤸᤗᤧ ᤀᤔᤏᤥᤏᤧᤴ ᤗᤥ᤺ᤳᤋᤥᤴ ᤐᤡᤖᤢᤖ ᤐᤳᤇᤧᤸᤗᤧ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ ᤔᤧᤳᤋᤢ. “ᤑᤧᤖᤧ᤹. ᤀᤠᤱᤃᤠ᤹ᤏᤢ ᤀᤡᤵᤛᤧ᤹॥” 12 ᤁᤖ ᤂᤧᤸᤗᤧ ᤔᤧᤳᤋᤢ. “ᤔᤣ᤺ᤴ ᤀᤠᤶᤓᤢ᤹ᤀᤣ. ᤀᤠᤱᤃᤠ᤹ ᤀᤠᤈᤠ᤺ᤳᤌᤡ ᤔᤧᤍᤣᤛᤧᤴᤏᤧ᤹॥ ᤀᤰᤋᤱᤒᤠ ᤕᤠ᤺ᤶᤒᤰ ᤀᤡᤛᤪᤠᤀᤡᤗᤀᤥ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ॥ ᤀᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ 13 ᤀᤠᤱᤃᤠ᤹ ᤀᤠᤏᤠᤖᤠᤴ ᤀᤠᤳᤋᤠᤴ ᤋᤣ᤹ᤖᤢᤱᤅᤠᤱ ᤆᤡᤰᤂᤢᤱᤒᤠᤒᤣ᥅ ᤜᤧᤰᤁᤩᤠᤱ ᤂᤧᤏᤧ᤹ᤀᤠᤱ ᤀᤡᤛᤪᤠᤀᤡᤗᤀᤥ ᤗᤳᤇᤠ ᤋᤠᤵᤑᤧ᤺ᤶᤒᤠ ᤔᤏᤠ. ᤀᤍᤱ ᤁᤧᤒᤥᤱ॥ ᤀᤠᤱᤃᤠ᤹ ᤀᤠᤗᤠᤃᤡ ᤜᤠᤱᤅᤡᤴᤏᤢ ᤋᤠ᤹ᤈᤧᤰᤂᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤁᤧᤓᤠᤰ॥” 14 ᤁᤖ ᤂᤢᤏᤧ᤹ ᤋᤠᤔᤠᤖᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤴ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤎᤢᤶᤒᤠ ᤆᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤔᤧᤍᤧᤴᤍᤧᤴᤇᤠᤱ ᤋᤧᤶᤛᤢᤀᤠᤱ ᤂᤧᤴᤏᤢ ᤀᤡᤵᤛᤧ॥ 15 ᤂᤧᤴ ᤀᤣᤃᤠᤱ ᤀᤔᤏᤥᤏᤖᤧ ᤂᤧᤴ ᤛᤠ᤹ᤖᤡᤰ ᤆᤡ᤺ᤵᤔᤠ ᤜᤣ᤺ᤰᤋᤢ॥ ᤀᤔᤏᤥᤏᤖᤧ ᤋᤃᤡ ᤀᤠᤰᤂᤩᤠᤖᤡᤰ ᤏᤠᤏᤢ᤹ᤖᤢ ᤀᤠᤸᤗᤥ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤆᤡ᤺ᤳᤜᤣ᤺ᤰᤋᤢ॥ ᤜᤧᤰᤁᤩᤠᤱ ᤀᤔᤏᤥᤏᤖᤧ ᤂᤧᤴ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤐᤣᤃᤧ᤹॥” 16 ᤁᤖ ᤂᤢᤏᤧ᤹ ᤀᤔᤏᤥᤏᤧᤴ ᤔᤧᤳᤋᤢ. “ᤀᤠᤶᤓᤢ᤹ᤀᤣ. ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤁᤧᤗ᤺ᤳᤋᤠᤒᤠᤱᤃ ᤏᤢᤒᤠ ᤔᤣ᤺ᤴ॥ ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴᤏᤢ᤺ᤸᤗᤧᤀᤠᤱ ᤁᤱᤃ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤥ᤺ᤰᤂᤧ॥” ᤂᤧᤸᤗᤧ ᤋᤠᤔᤠᤖᤖᤧ ᤁᤢᤒᤠ᤺ᤴᤏᤡᤴ ᤂᤧᤶᤔᤠᤀᤣ ᤔᤧᤄᤧᤵᤛᤢᤴ. 17 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤰ ᤁᤧᤈᤥᤰᤐᤧᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤁᤴ ᤔᤧᤴᤇᤢᤔᤠᤴ ᤗ᤺ᤳᤋᤧᤍᤣᤛᤧ᤹॥ ᤁᤴ ᤗᤠ᤺ᤰᤁᤠᤳ ᤗ᤺ᤳᤋᤧ᤹ᤀᤠᤱ ᤗᤠᤶᤎᤣ᤺ᤵᤐᤧᤴ ᤀᤧᤳᤋᤧ᤹॥” 18 ᤜᤧᤰᤁᤩᤠᤱ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤸᤗᤧ ᤂᤧᤴ ᤐᤠ᤺ᤰᤂᤠ ᤗ᤺ᤳᤋᤢᤍᤣᤛᤢᤀᤠᤱ ᤗᤠᤶᤎᤣ᤺ᤵᤐᤧᤴ ᤀᤧᤳᤋᤢ॥ ᤋᤠᤔᤠᤖᤧᤸᤗᤧ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠ ᤜᤠᤱᤛᤠᤔᤠᤖᤧ ᤔᤧᤈᤠᤰᤂᤢᤒᤠ ᤁᤢᤓᤢᤱ ᤀᤡᤛᤣ᤺ᤱᤒᤠ ᤛᤠ᤹ᤖᤡᤰ ᤏᤢᤒᤠ ᤆᤠᤱ ᤆᤠᤰᤂᤢᤀᤠᤱ ᤘᤕᤧ॥ 19 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥ ᤂᤠᤵᤐᤢ ᤜᤢ᤺ᤳᤇᤡᤱ. ᤂᤢᤏᤧ᤹ ᤆᤠᤰᤂᤢᤀᤠᤱ ᤘᤕᤧᤒᤠ ᤁᤣ᤺ᤶᤒᤠ ᤁᤢᤈᤠᤱᤅᤡᤴ ᤌᤧ᤺ᤰᤂᤢ. ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤐᤥ ᤁᤢᤜᤢᤰᤁᤡᤴ ᤑᤳᤇᤢᤀᤠᤱ ᤜᤠᤒᤧᤖ ᤐᤣ॥ 20 ᤜᤧᤰᤁᤣ᤺ᤸᤗᤧ ᤁᤢᤶᤓᤢ᤹ ᤀᤒ᤻ᤛᤠᤗᤥᤔᤖᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤶᤓᤢ᤹ ᤀᤔᤏᤥᤏᤧᤴ ᤂᤧᤏᤧ᤹ᤏᤢ ᤘᤕᤧᤒᤡ᥅ ᤀᤠᤸᤗ ᤛᤫᤠ᤺ᤳ ᤕᤢᤅᤧ᤹॥ ᤂᤢᤏᤧ᤹ᤃ ᤂᤧᤏᤧ᤹ ᤁᤧᤶᤓᤢ᤹ᤖᤥ. ᤁᤴ ᤐᤠ᤺ᤴᤏᤡᤴ ᤁᤧᤏᤡᤱᤘᤠ᤹ᤀᤥ ᤔᤧᤕᤢᤰᤂᤧᤴᤏᤧ᤹॥” ᤜᤧᤰᤁᤣ᤺ᤸᤗᤧ ᤋᤠᤔᤠᤖᤧᤴ ᤁᤢᤶᤓᤢ᤹ ᤀᤒ᤻ᤛᤠᤗᤥᤔᤖᤧ ᤁᤢᤜᤡᤶᤔᤥ ᤗᤠᤵᤔᤧᤓᤢᤛᤢᤔᤠ ᤔᤧᤴᤇᤢᤔᤠ ᤁᤢᤀᤡᤛᤡᤰ ᤕᤢᤅᤧ॥ 21 ᤍᤠᤀᤢᤍ ᤜᤠᤱᤅᤡᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤛᤢᤀᤠᤱ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥ 22 ᤁᤖ ᤀᤒ᤻ᤛᤠᤗᤥᤔᤖᤧ ᤀᤔᤏᤥᤏᤧᤴ ᤌᤣᤀᤠᤱ ᤐᤠᤴ ᤔᤧᤔᤧᤳᤋᤢᤴ॥ ᤂᤢᤏᤧ᤹ ᤁᤢᤴᤛᤠ᤹ ᤔᤧᤴᤇᤢᤔᤠᤴ ᤁᤢᤈᤠ᤺ᤳᤌᤡ ᤋᤣᤛᤢ ᤐᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤀᤔᤏᤥᤏᤧᤴ ᤆᤡ᤺ᤵᤔᤠ ᤜᤣ᤺ᤰᤋᤢᤖᤥ॥ ᤀᤒ᤻ᤛᤠᤗᤥᤔᤖᤧ ᤁᤢᤗᤧᤰᤘᤠ ᤏᤢ᤺ᤰᤋᤢ 23 ᤋᤱᤒᤣ᤹ ᤏᤧᤳᤇᤡ ᤀᤣᤃᤠᤱ ᤀᤒ᤻ᤛᤠᤗᤥᤔᤖᤧ ᤁᤧᤖᤧᤰ ᤜᤠᤱᤛᤠᤜᤠ᤹ ᤀᤣᤑᤪᤠᤀᤡᤔ ᤁᤢᤒᤣᤛᤠᤱ ᤒᤠᤗ ᤜᤠᤛᤥᤖ ᤔᤧᤵᤏᤠᤒᤠ ᤋᤧᤴᤏᤥ ᤔᤧᤸᤗᤢᤰ ᤔᤢᤖᤡᤰ ᤏ᤺ᤱᤔᤠ ᤋᤱᤏᤠᤶᤔᤥ ᤀᤢ᤺ᤳᤋᤢᤛᤡ॥ 24 ᤀᤒ᤻ᤛᤠᤗᤥᤔᤧᤴ ᤜᤠᤱᤅᤡᤸᤗᤧ ᤁᤢᤍᤢᤶᤛᤧ ᤐᤣᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤔᤧᤸᤗᤢᤰ ᤏ᤺ᤱᤔᤠ ᤋᤱᤏᤠᤶ ᤋᤥᤛᤢᤱ॥ ᤀᤠᤍᤠᤱᤒᤠ ᤜᤠᤱᤅᤡᤴ ᤏᤢ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ ᤁᤧᤍᤩᤧᤀᤡᤒᤡ᥅” 25 ᤜᤠᤱᤅᤡᤸᤗᤧ ᤔᤧᤳᤋᤢ. “ᤔᤣ᤺ᤸᤗᤥ. ᤀᤠᤱᤃᤠ᤹ ᤀᤠᤛ᤻ᤛᤠ. ᤀᤠᤏᤡᤃᤣ ᤁᤧᤖᤧᤰ ᤋᤩᤧᤀᤡᤃᤧᤀᤠᤱ ᤂᤧᤏᤧ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤛᤡᤃᤧᤴ॥” ᤀᤒ᤻ᤛᤠᤗᤥᤔᤖᤧ ᤕᤠᤶᤔᤥ ᤔᤧᤳᤋᤢ. ᤁᤖ ᤍᤠᤀᤢᤍᤧᤴ ᤐᤣ᤺ᤰᤔᤠ ᤔᤧᤍᤧᤴᤍᤧᤴ. ᤜᤧᤰᤁᤩᤠᤱ ᤔᤢ᤹ᤀᤡᤛᤠᤶ ᤐᤡᤖᤢ॥ 26 ᤜᤧᤰᤁᤣ᤺ᤸᤗᤧ ᤀᤒ᤻ᤛᤠᤗᤥᤔᤖᤧ ᤔᤧᤳᤋᤢ. “ᤀᤠᤍᤠᤱᤒᤠ ᤋᤠᤔᤠ ᤁᤧᤴᤇᤢᤰᤏᤧᤴᤏᤧᤓᤃᤪ ᤀᤠᤶᤓᤢ᤹ ᤀᤔᤏᤥᤏᤧᤴ ᤁᤧᤒᤠᤱᤄᤢᤒᤡ᥅” ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤢ. “ᤂᤧᤴ ᤌᤣᤀᤠᤱ ᤂᤧᤏᤧ᤹ᤏᤢ ᤐᤣ᤺ᤰᤐᤠᤒᤣ᥅” 27 ᤁᤖ ᤀᤒ᤻ᤛᤠᤗᤥᤔᤖᤧ ᤀᤔᤏᤥᤏ ᤏᤢ ᤜᤠᤱᤅᤡᤸᤗᤧ ᤘᤣ᤹ ᤁᤢᤛ᤻ᤛᤠᤜᤠ᤹ ᤂᤢᤏᤧ᤹ᤏᤢ ᤔᤧᤶᤒᤠᤱᤛᤡᤱᤅᤣ ᤌᤠᤖᤡᤰ ᤜᤠᤱᤅᤡᤴ ᤕᤧ᤺ᤰᤁᤠᤱ ᤕᤧ᤺ᤰ ᤔᤧᤳᤋᤢᤖ ᤐᤣᤗᤡ ᤑᤠᤰᤋᤢ॥ 28 ᤀᤒ᤻ᤛᤠᤗᤥᤔᤖᤧ ᤁᤢᤔᤏᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤂᤧᤵᤛᤧᤶᤔᤧ᤹. ᤀᤔᤏᤥᤏᤧᤴ ᤛᤣᤈᤱᤘᤠ᤺ᤸᤗᤧ ᤔᤕᤢ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ‘ᤀᤔᤏᤥᤏᤧᤴ ᤌᤃᤧᤶᤔᤧ᤹’ ᤔᤧᤳᤏᤡᤱᤅᤡᤸᤗᤧ ᤂᤧᤴ ᤛᤧᤖᤧᤶᤔᤧ᤹॥ ᤔᤧᤃᤡᤛᤧᤶᤔᤡᤴᤏᤧ᤹॥ ᤁᤱᤃ ᤀᤠᤱᤃᤠ᤹ ᤀᤠᤀᤡᤱᤈᤠᤱᤗᤥ॥ ᤌᤎᤵ ᤔᤧᤸᤗ᤹ᤀᤣ ᤜᤠᤱᤜᤠᤱ ᤗ᤹ᤖᤧᤶᤔᤧ᤹॥” 29 ᤜᤧᤰᤁᤩᤠᤱ ᤀᤒ᤻ᤛᤠᤗᤥᤔᤖᤧ ᤁᤢᤔᤏᤠᤜᤠ᤹ ᤔᤢᤖᤠ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤀᤔᤏᤥᤏᤧᤴ ᤔᤧᤔᤧᤳᤋᤢ॥ ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤜᤠᤱᤛᤠᤜᤠ᤹ ᤜᤠᤖᤠᤜᤠᤖᤠ ᤂᤢᤴᤇᤡ᤹ ᤀᤍᤱᤜᤠ᤹ᤀᤥ ᤔᤧᤗᤠᤛᤧᤀᤠᤱ ᤜᤡᤶᤔᤥ ᤔᤧᤒᤣ॥ 30 ᤂᤧᤱᤜᤠ᤹ ᤗᤠᤶᤔᤥ ᤔᤧᤒᤣᤖ ᤔᤧᤒᤳᤇᤧᤸᤗᤧᤛᤠ ᤜᤠᤱᤅᤡᤸᤗᤥ ᤀᤰᤋᤱᤒᤠ ᤀᤡᤱᤄᤱ ᤁᤧᤖᤧ. “ᤀᤒ᤻ᤛᤠᤗᤥᤔᤖᤧ ᤁᤧᤖᤧᤰ ᤜᤠᤱᤛᤠᤜᤠ᤹ ᤛᤧᤖᤢᤛᤡ. ᤜᤧᤰᤁᤩᤠᤱ ᤀᤠᤳᤋᤡᤴᤏᤠᤱ ᤔᤧᤴᤜᤡᤅᤧᤴ॥” 31 ᤜᤧᤰᤁᤣ᤺ᤸᤗᤧ ᤜᤠᤱᤅᤡᤴ ᤐᤥᤃᤧᤀᤠᤱ ᤁᤢᤍᤣ᤺ᤳᤋᤧᤴ ᤌᤧ᤺ᤰᤂᤢ. ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤛᤸᤗᤡᤰ ᤛᤴᤇᤡᤱ॥ ᤂᤢᤏᤧ᤹ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤁᤢᤛᤧᤘᤠᤖᤥᤒᤠᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤋᤣᤳᤜᤠ᤹ ᤔᤧᤎᤧ᤺ᤰᤂᤢ॥ 32 ᤁᤖ ᤍᤠᤀᤢᤍᤖᤧ ᤁᤢᤶᤓᤢ᤹ ᤛᤡᤔᤠᤜᤖᤧ ᤁᤢᤛ᤻ᤛᤠ ᤕᤥᤏᤠᤍᤠᤒᤖᤧ ᤔᤧᤳᤋᤢ. “ᤂᤧᤸᤗᤧ ᤁᤧᤖᤧᤰ ᤜᤠᤱᤛᤠᤜᤠ᤹ ᤛᤧᤖᤢᤛᤡ ᤑᤠ᤹ᤀᤠᤱ ᤀᤠᤍᤠᤱᤒᤠᤖᤧ ᤔᤧᤀᤡ᤺ᤳᤋᤧᤴᤏᤧ᤹॥ ᤀᤔᤏᤥᤏᤧᤸᤗᤰ ᤛᤩᤧ॥ ᤂᤧᤸᤗᤧ ᤁᤢᤴᤛᤠ᤹ ᤋᤠᤔᤠᤖᤧᤴ ᤀᤔᤏᤥᤏᤖᤧ ᤁᤢᤈᤠ᤺ᤳᤌᤡ ᤋᤣᤛᤢᤖ ᤀᤡᤵᤋᤢᤀᤠᤱᤎᤥ ᤀᤒ᤻ᤛᤠᤗᤥᤔᤖᤧ ᤜᤧᤰᤁᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤳᤋᤢᤀᤠᤱ ᤘᤕᤧ॥ 33 ᤁᤧᤖᤧᤰ ᤜᤠᤱᤛᤠᤜᤠ᤹ ᤔᤧᤛᤩᤧ ᤁᤧᤗ᤹ᤒᤠ ᤀᤡᤱᤗᤧᤰᤐᤠ ᤀᤡᤱᤄᤱᤅᤥ ᤀᤠᤍᤠᤱᤒᤠᤖᤧ ᤏᤡᤱᤘᤠ᤹ ᤔᤧᤒᤡᤖᤧᤴᤏᤧ᤹॥ ᤀᤔᤏᤥᤏᤧᤸᤗᤰ ᤛᤩᤧ॥” 34 ᤜᤧᤰᤁᤣ ᤐᤥ᤺ᤰᤂᤧᤸᤗᤧ ᤀᤒ᤻ᤛᤠᤗᤥᤔᤧᤴ ᤂᤧᤳᤇᤡᤱᤅᤠᤱ ᤐᤣ॥ ᤂᤧᤒᤩᤠᤱ ᤗᤠᤶᤎᤣᤳ ᤁᤧᤃᤥᤒᤠᤸᤗᤧ ᤁᤢᤏᤠᤖᤠᤴ ᤑᤥ᤺ᤰᤂᤢᤀᤠᤱ ᤀᤥᤔᤕᤧᤸᤗᤧ ᤔᤏᤠᤗᤢᤵᤜᤠ᤹ ᤜᤥᤖᤥᤏᤠᤀᤡᤔ ᤗᤠᤶᤒᤠ ᤁᤥ᤺ᤰᤔᤠᤀᤣ ᤁᤥ᤺ᤰᤔᤠ ᤔᤧᤕᤧᤖ ᤔᤧᤒᤳᤇᤧᤒᤠ ᤏᤡᤛᤢᤛᤡ॥ ᤂᤧᤴ ᤋᤩᤧᤀᤠᤱ ᤜᤠᤱᤅᤡᤴ ᤀᤰᤋᤱᤒᤠ ᤀᤡᤱᤄᤱ ᤐᤡᤖᤢ. “ᤜᤥᤖᤥᤏᤠᤀᤡᤔᤗᤠᤶ ᤁᤥ᤺ᤰᤔᤠᤀᤣ ᤁᤥ᤺ᤰᤔᤠ ᤔᤏᤠᤜᤠ᤹ ᤔᤧᤕᤧᤖ ᤔᤧᤒᤳᤇᤧᤒᤠ ᤀᤠᤱᤃᤠ᤹ ᤏᤡᤛᤢᤱᤛᤡᤱ॥” 35 ᤕᤥᤏᤠᤍᤠᤒᤖᤧ ᤜᤠᤱᤅᤡᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤂᤧᤱᤜᤠ᤹ ᤔᤧᤍᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤳᤏᤧᤒᤠ ᤁᤢᤀᤡᤛᤡᤰ ᤜᤠᤱᤛᤠᤜᤠ᤹ ᤔᤧᤍᤠᤖ ᤔᤧᤒᤳ॥” 36 ᤂᤧᤸᤗᤧ ᤐᤠ᤺ᤳᤋᤢᤛᤢᤖᤢᤏᤠᤔᤧ᤺ᤴᤏᤣ ᤜᤠᤱᤛᤠᤜᤠ᤹ ᤜᤡᤶᤔᤥ ᤔᤧᤗᤠᤛᤧ. ᤜᤧᤰᤁᤩᤠᤱ ᤑᤡᤖᤡᤰ ᤑᤡᤖᤡᤰ ᤔᤧᤓᤡ᤺ᤰᤋᤧᤖ ᤔᤧᤜᤠᤒᤧ॥ ᤜᤠᤱᤅᤡᤴ ᤏᤢ ᤁᤧᤖᤧᤰ ᤁᤢᤔᤏᤠᤜᤠ᤹ᤀᤠᤱ ᤛᤠ᤹ᤖᤡᤰ ᤔᤧᤜᤠᤒᤧ॥ 37 ᤀᤒ᤻ᤛᤠᤗᤥᤔᤧᤴ ᤃᤛᤢᤖᤒᤠ ᤜᤠᤱ ᤀᤶᤔᤡᤀᤢᤍᤖᤧ ᤁᤢᤛ᤻ᤛᤠ ᤋᤸᤔᤤᤖᤥ ᤐᤣᤀᤠᤱ ᤕᤢᤱᤔᤠ ᤜᤣ᤺ᤰᤋᤧ॥ ᤁᤖ ᤜᤠᤱᤅᤡᤸᤗᤧ ᤌᤡᤰᤕᤠ᤺ᤴᤎᤰ ᤁᤢᤛ᤻ᤛᤠ ᤀᤔᤏᤥᤏᤧᤴ ᤜᤠ᤺ᤵᤋᤢᤖ ᤕᤢᤅᤧ॥ 38 ᤃᤛᤢᤖ ᤗᤠᤈᤣ᤹ᤀᤥ ᤂᤧᤳᤇᤡᤱ ᤐᤣᤀᤠᤱ ᤀᤒ᤻ᤛᤠᤗᤥᤔᤧᤴ ᤋᤱᤒᤣ ᤛᤢᤶᤛᤡ ᤂᤧᤵᤔᤥ ᤕᤢᤅᤧ॥ 39 ᤜᤧᤰᤁᤩᤠᤱ ᤀᤔᤏᤥᤏᤧᤴ ᤛᤩᤧᤒᤠᤀᤥ ᤁᤢᤗᤢᤱᤔᤠ᤹ ᤜᤡ᤺ᤶᤔᤠ ᤏᤠ᤹ᤖᤧ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤀᤠ᤺ᤴᤇᤡᤱᤅᤠᤱ ᤕᤠᤶᤔᤥ ᤀᤒ᤻ᤛᤠᤗᤥᤔᤖᤧ᤹ᤀᤥ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.