᥈ ᤛᤠᤔᤢᤀᤧᤗ 12 - LIFOTNTᤏᤠᤋᤠᤏᤖᤧ ᤍᤠᤀᤢᤍᤧᤴ ᤑᤧ᤺ᤰᤋᤢ 1 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤧᤴ ᤍᤠᤀᤢᤍᤖᤧ᤹ᤀᤥ ᤐᤠᤱᤄᤢ. ᤜᤧᤰᤁᤩᤠᤱ ᤍᤠᤀᤢᤍᤖᤧ᤹ᤀᤥ ᤋᤩᤧᤀᤠᤱ ᤔᤧᤳᤋᤢ. “ᤗᤳᤇᤠ ᤕᤧᤰᤕᤰᤁᤥ ᤏᤧᤳᤇᤡ ᤔᤏᤠ ᤘᤕᤧᤛᤡ. ᤌᤡᤰᤁᤡᤴ ᤕᤠᤱᤛᤠᤁᤢᤴᤎᤣᤛᤠᤒᤠ ᤘᤕᤧ. ᤘᤣ᤹ᤛᤔᤠ ᤕᤠᤱᤃᤧᤛᤠ᤹ᤒᤠ ᤘᤕᤧ॥ 2 ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠ᤺ᤸᤗᤧᤴ ᤕᤖᤡᤰ ᤔᤧᤸᤗᤢᤰ ᤔᤧ᤺ᤴᤍᤠᤗᤢᤵ ᤏᤢ ᤐᤡᤳᤗᤢᤵ ᤔᤧᤘᤕᤧ. 3 ᤁᤖ ᤂᤧᤴ ᤕᤠᤱᤃᤧᤛᤠ᤹ᤒᤠ ᤔᤏᤠ᤺ᤴᤏᤢ ᤌᤣᤀᤠᤱ ᤜᤥ᤺ᤵᤋᤧ. ᤂᤢᤏᤧ᤹ ᤀᤡᤅᤢᤒᤠ ᤗᤳᤇᤠ ᤁᤢᤶᤔᤠᤔᤠ ᤔᤧᤸᤗᤢᤰᤛᤠ᤺ᤳᤌᤡᤰ ᤁᤳᤋᤢ॥ ᤂᤢᤏᤧ᤹ ᤂᤧᤴ ᤀᤠᤒᤠᤅᤣ ᤜᤡᤱᤄᤢᤀᤠᤱ ᤘᤕᤧ. ᤀᤠᤒᤠᤅᤣ ᤁᤢᤜᤡᤶᤔᤥ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤏᤢ ᤂᤧᤴ ᤕᤶᤔᤠ ᤐᤥ᤺ᤰᤂᤧᤀᤠᤱ ᤘᤕᤧ॥ ᤂᤧᤸᤗᤧ ᤁᤢᤈᤧᤳᤌᤩᤠᤀᤥᤀᤣ ᤆ. ᤁᤢᤄᤥᤷᤕᤠᤀᤥᤀᤣ ᤌᤢᤅᤢ. ᤜᤧᤰᤁᤩᤠᤱ ᤁᤢᤓᤰᤋᤢᤱᤔᤥᤀᤣ ᤀᤡᤵᤛᤧ॥ ᤂᤧᤴ ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤇᤡᤴ ᤁᤢᤀᤡᤛᤡᤰ ᤔᤧᤳᤋᤢ॥ 4 ᤌᤡᤰᤕᤧᤴ ᤗᤳᤇᤠ ᤗᤠᤶᤍᤡ᤺ᤰᤐᤠ ᤌᤡᤰ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤋᤩᤧ. ᤜᤧᤰᤁᤩᤠᤱ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠ᤺ᤸᤗᤧ ᤀᤠᤒᤠᤅᤣ ᤁᤢᤔᤧᤸᤗᤢᤰ ᤗᤢᤵᤗᤠᤶ ᤗᤠᤶᤍᤡ᤺ᤰᤐᤠ ᤔᤏᤠᤴ ᤛᤠ ᤐᤡᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴ. ᤁᤖ ᤂᤧᤴ ᤕᤠᤱᤃᤧᤛᤠ᤹ᤒᤠᤸᤗᤧ ᤁᤢᤔᤧᤸᤗᤢᤰᤛᤠ᤺ᤳᤋᤧᤴ ᤋᤠᤖᤢᤀᤠᤱ ᤂᤧᤴ ᤗᤠᤶᤍᤡ᤺ᤰᤐᤠᤴ ᤛᤠᤓᤠᤱᤈᤠ ᤐᤡᤔᤠ ᤕᤠᤖᤡᤵ ᤆᤥᤃᤢ॥” 5 ᤍᤠᤀᤢᤍᤧᤴ ᤂᤧᤴ ᤐᤠ᤺ᤴᤏᤡᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ. ᤜᤧᤰᤁᤩᤠᤱ ᤀ᤺ᤰᤋᤧᤀᤠᤱ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤐᤠ᤺ᤳᤋᤢᤱ᤹. ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤴ ᤛᤡᤔᤠ ᤗᤠ᤹ᤖᤢ᥄ 6 ᤂᤧᤸᤗᤧ ᤗᤢᤱᤔᤠ᤹ ᤔᤧᤴᤍᤢᤰᤁᤣ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤧᤸᤗᤢᤰᤛᤠ᤺ᤳᤋᤡᤸᤗᤧ ᤁᤢᤗᤧᤰᤘᤠ ᤗᤡᤛᤡᤗᤧᤱ ᤌᤠᤖᤡᤰ ᤕᤖᤡᤰ ᤁᤢᤔᤧᤴ ᤜᤢᤱᤔᤠ ᤐᤥᤱ᤹॥” 7 ᤜᤧᤰᤁᤣ᤺ᤸᤗᤧ ᤏᤠᤋᤠᤏᤖᤧ ᤍᤠᤀᤢᤍᤧᤴ ᤀᤰᤂᤣ ᤔᤧᤳᤋᤢ. “ᤂᤧᤴ ᤔᤏᤠᤴ ᤂᤧᤏᤧ᤹ᤀᤣᤖᤥ᥄ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤖᤧ ᤂᤢᤏᤡ᤹ ᤜᤠᤱ ᤆᤥ᤺ᤰᤏᤧ॥ ᤀᤠᤱᤃᤠ᤹ ᤛᤠᤘᤗᤖᤧ ᤁᤢᤜᤢᤰᤗᤠᤶᤒᤠ ᤛᤧ᤺ᤵᤏᤧ॥ 8 ᤂᤧᤏᤧ᤹ ᤁᤧᤴᤍᤠᤱᤒᤠᤸᤗᤧ ᤁᤢᤜᤡᤶ ᤏᤢ ᤂᤢᤏᤧ᤹ ᤁᤢᤔᤣ᤺ᤳᤜᤠ᤹ ᤁᤧᤔᤣ᤺ᤳ ᤐᤥᤱᤛᤧ ᤐᤡᤏᤧ॥ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠ ᤛᤢᤘᤠᤱᤜᤠ᤹ ᤐᤡᤏᤧ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤴᤕᤥᤖᤧᤴᤇᤠᤱ ᤀᤠᤱᤃᤠ᤹ ᤘᤣ᤹ ᤕᤖᤡᤰ ᤐᤡᤏᤧᤒᤠᤖᤥ॥ 9 ᤁᤖ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤌᤧᤔᤠ᤺ᤴ ᤋᤠᤵᤑᤧ᤺ᤶᤒᤠ ᤘᤕᤧ ᤜᤠᤒᤠ ᤂᤧᤴ ᤁᤧᤈᤥᤃᤢᤀᤠᤱ ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤕᤥᤕᤥᤰᤐᤠ ᤁᤧᤈᤥᤃᤢᤒᤠᤒᤣ᥅ ᤂᤧᤏᤧ᤹ ᤜᤡᤳᤋᤡ ᤀᤢᤖᤡᤕᤠᤴ ᤋᤠᤓᤣ᤺ᤸᤗᤧ ᤁᤧᤛᤧᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤣ᤺ᤳᤋᤡᤴ ᤁᤧᤔᤣ᤺ᤳ ᤐᤥᤱᤛᤧ ᤁᤧᤍᤣ᤹ᤖᤢ॥ ᤂᤧᤏᤧ᤹ ᤂᤧᤴ ᤔᤏᤠᤴ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣ᤺ᤸᤗᤧ ᤛᤡᤔᤠ ᤁᤧᤒᤠᤱᤄᤢ॥ 10 ᤂᤧᤏᤧ᤹ ᤕᤥᤕᤥᤰᤐᤠ ᤁᤧᤈᤥᤃᤠᤱᤒᤠᤸᤗᤧ ᤏᤢ ᤜᤡᤳᤋᤡ ᤀᤢᤖᤡᤕᤠ᤺ᤸᤗᤧ ᤁᤢᤔᤣ᤺ᤳᤋᤡᤴ ᤂᤧᤏᤧ᤹ ᤁᤧᤔᤣ᤺ᤳ ᤆᤥ᤺ᤰᤛᤧ ᤁᤧᤍᤣ᤹ᤖᤢᤒᤠᤸᤗᤧ. ᤂᤧᤏᤧ᤹ ᤁᤧᤜᤡᤶᤛᤕᤱᤗᤧ ᤌᤱᤗᤰ ᤆᤥ᤺ᤰᤔᤠ ᤐᤥᤱᤗᤥ॥’ 11 “ᤕᤜᤘᤣ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ—‘ᤀᤠᤱᤃᤠ᤹ ᤂᤧᤏᤧ᤹ ᤀᤠᤒᤠᤅᤣ ᤁᤧᤜᤡᤶᤛᤕᤱᤗᤠᤶᤒᤠ ᤂᤧᤏᤧ᤹ᤀᤥ ᤔᤧᤰᤔᤧᤴ ᤋᤠᤖᤢᤱ᤹॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤣ᤺ᤳᤜᤠ᤹ ᤂᤧᤏᤧ᤹ ᤁᤧᤍᤃᤡ ᤂᤧᤏᤧ᤹ ᤁᤧᤒᤣᤛᤠᤱᤒᤠ ᤔᤏᤠᤴ ᤐᤡᤖᤢᤱ. ᤜᤧᤰᤁᤩᤠᤱ ᤂᤧᤴ ᤗᤧᤴᤍᤡᤰᤛᤠ ᤂᤧᤴ ᤁᤧᤔᤣ᤺ᤳᤜᤠ᤹ᤏᤢ ᤀᤡᤶ॥ 12 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤌᤣ ᤁᤧᤈᤥᤃᤢ ᤂᤧᤱᤃ ᤛᤡᤒᤡ᤹ᤀᤠᤱ ᤁᤧᤈᤥᤃᤢ. ᤁᤖ ᤀᤠᤱᤃᤠ᤹ ᤁᤱᤃ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤡᤛᤢᤖ ᤗᤧᤴᤍᤡᤰ ᤂᤠᤀᤥ᤺ᤳᤋᤡᤸᤗᤧ ᤆᤥᤃᤢᤱ᤹॥’” 13 ᤜᤧᤰᤁᤣ᤺ᤸᤗᤧ ᤍᤠᤀᤢᤍᤧᤸᤗᤧ ᤏᤠᤋᤠᤏᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤱ॥” ᤏᤠᤋᤠᤏᤧᤸᤗᤧ ᤍᤠᤀᤢᤍᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤧᤗᤠᤕᤥᤴ ᤂᤧᤳᤋᤢᤀᤠᤱ ᤘᤠ᤹. ᤂᤧᤏᤧ᤹ ᤁᤧᤴᤇᤡᤏᤧᤴ॥ 14 ᤁᤖ ᤁᤴ ᤜᤧᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤀᤠᤱ ᤕᤜᤘᤣ ᤍᤠᤱᤒᤧᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢᤒᤠᤸᤗᤧ ᤆᤥᤃᤢᤸᤗᤧ. ᤂᤧᤏᤧ᤹ᤗᤠᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠ ᤁᤧᤛ᤻ᤛᤠᤴ ᤛᤡ᤹᤺॥” 15 ᤜᤧᤰᤁᤩᤠᤱ ᤏᤠᤋᤠᤏᤧᤴ ᤁᤢᤜᤡᤶᤔᤥ ᤐᤣᤖᤥ॥ ᤜᤧᤰᤁᤩᤠᤱ ᤀᤢᤖᤡᤕᤠ᤺ᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤍᤠᤀᤢᤍᤗᤠᤶᤒᤠ ᤛᤠᤘᤠ᤺ᤴᤍᤢᤒᤠ ᤁᤢᤛ᤻ᤛᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤋᤢᤃᤧᤖ ᤕᤠ᤺ᤴᤍᤢ. ᤜᤧᤰᤁᤩᤠᤱ ᤂᤧᤴ ᤛᤠ᤹ᤖᤡᤰ ᤋᤢᤃᤧ॥ ᤍᤠᤀᤢᤍᤖᤧ ᤁᤢᤛ᤻ᤛᤠᤴ ᤔᤠᤛᤡᤱ 16 ᤍᤠᤀᤢᤍᤖᤧ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤴᤏᤢ ᤋᤢᤘᤠ ᤆᤥᤃᤢ॥ ᤂᤢᤏᤧ᤹ ᤋ᤺ᤰᤏᤧᤳ ᤕᤢᤅᤧ. ᤜᤧᤰᤁᤩᤠᤱ ᤜᤡᤶᤛᤡᤃᤠᤱ ᤐᤣᤀᤠᤱ ᤂᤠᤶᤒᤠᤱᤅᤥ ᤛᤧᤴᤍᤡᤰ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥ 17 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤁᤧᤘᤠ᤹ᤒᤠ ᤛᤠ᤹ᤖᤡᤰ ᤏᤠᤛᤠ᤹ᤖᤢᤛᤡᤒᤠ ᤁᤠᤵᤐᤥᤍᤢᤶᤛᤠᤜᤠ᤹ ᤁᤢᤒᤣᤛᤠᤱ ᤔᤧᤕᤧᤶᤛᤡᤱᤅᤠᤱ ᤂᤠᤶᤒᤠᤱᤅᤥᤗᤠᤶ ᤑᤥᤱᤔᤠ ᤔᤧᤃᤥ᤺ᤳᤋᤢ. ᤁᤖ ᤂᤢᤏᤧ᤹ ᤐᤥ᤺ᤰᤔᤠ ᤔᤧᤍᤧᤴᤍᤧᤴ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤆᤠᤔᤠᤀᤠᤱ ᤔᤧᤍᤧᤴᤍᤧᤴ॥ 18 ᤂᤧᤴ ᤀᤅᤧ᤺ᤰᤘᤠᤴ ᤋᤢᤰᤔᤠ ᤜᤣ᤺ᤰᤋᤧᤒᤠ ᤕᤧᤳᤏᤠᤶ ᤁᤧᤖᤧᤸᤗᤧ ᤛᤩᤧ॥ ᤍᤠᤀᤢᤍᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤀᤅᤧ᤺ᤰᤘᤠᤴ ᤛᤩᤧ ᤔᤧᤵᤔᤠ ᤔᤧᤃᤡᤛᤧ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤅᤧ᤺ᤰᤘᤠᤴ ᤁᤢᤜᤡᤱᤘᤧᤳ ᤘᤕᤧᤸᤗᤧ ᤀᤠᤏᤡᤃᤣ ᤂᤢᤏᤧ᤹ ᤔᤧᤳᤋᤢᤶᤒᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤔᤧᤄᤧᤵᤛᤢᤴ॥ ᤀᤠᤸᤗ ᤀᤠᤰᤂᤣᤗ᤹ᤖᤡᤰ ᤀᤅᤧ᤺ᤰᤘᤠᤴ ᤛᤩᤧ ᤔᤧᤵᤔᤠ ᤛᤢᤰᤋᤢᤶᤒᤧᤒᤣ᥅ ᤜᤧᤰᤁᤣ ᤔᤧᤵᤔᤧᤸᤗᤧ ᤂᤢᤏᤧ᤹ ᤂᤠ᤺ᤴᤇᤡᤱᤒᤡ᥄” 19 ᤁᤖ ᤍᤠᤀᤢᤍᤖᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤛᤥᤖᤡᤰ ᤂᤢᤛ᤻ᤂᤢᤛ᤻ ᤔᤧᤗ᤹ᤖᤧᤒᤠ ᤏᤡᤛᤢ. ᤜᤧᤰᤁᤣ᤺ᤸᤗᤧ ᤀᤅᤧ᤺ᤰᤘᤠᤴ ᤛᤩᤧᤖᤧᤇ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤔᤧᤳᤋᤢᤛᤡ. “ᤀᤅᤧ᤺ᤰᤘᤠᤴ ᤛᤩᤧᤒᤡ᥅” ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤀᤥᤖᤥ. ᤀᤅᤧ᤺ᤰᤘᤠ᤺ᤱᤃ ᤛᤩᤧ॥” 20 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤂᤠᤶᤒᤠᤱᤅᤥᤗᤠᤶ ᤐᤥᤃᤧ. ᤜᤧᤰᤁᤩᤠᤱ ᤁᤢᤏᤠ ᤘᤠᤜᤵᤋᤢᤀᤠᤱ ᤏᤡ᤺ᤱᤃᤣ᤹ ᤜᤢ᤺ᤳᤇᤡᤱ. ᤋᤣᤳ ᤗᤧᤰᤛᤡᤱ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠ᤺ᤱᤃᤠᤜᤡᤶᤔᤥ ᤐᤣᤀᤠᤱ ᤛᤠᤶᤒᤥᤴ ᤜᤒᤳ ᤑᤴᤇᤡᤱ ᤜᤧᤰᤁᤩᤠᤱ ᤛᤧᤘᤠ ᤆᤥᤃᤧ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤜᤡᤶᤔᤥ ᤐᤣ. ᤁᤢᤈᤠ ᤑᤧᤵᤔᤠ ᤀᤡᤱᤈᤠᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤁᤢᤈᤠ ᤔᤧᤓᤧᤳᤋᤢᤀᤠᤱ ᤂᤢᤏᤧ᤹ ᤆ॥ 21 ᤂᤧᤒᤩᤠᤱ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤴ ᤌᤣᤒᤣ᥅ ᤀᤅᤧ᤺ᤰᤘᤠᤴ ᤁᤢᤜᤡᤱᤘᤧᤳ ᤘᤕᤧᤖ ᤌᤠᤖᤡᤰ ᤂᤧᤸᤗᤧ ᤁᤢᤗᤠᤃᤡ ᤀᤠᤍᤠᤱᤒᤠ ᤋ᤺ᤰᤏᤧᤳ ᤁᤧᤕᤢᤅᤧ. ᤜᤧᤰᤁᤩᤠᤱ ᤁᤧᤜᤠᤒᤧ ᤁᤧᤓᤡ᤺ᤰᤋᤧ॥ ᤁᤖ ᤀᤠᤸᤗ ᤂᤧᤴ ᤛᤩᤧ. ᤜᤧᤰᤁᤩᤠᤱ ᤀᤠᤍᤠᤱᤒᤠᤃ ᤁᤧᤒᤥᤃᤧᤀᤠᤱ ᤁᤢᤈᤠ ᤁᤧᤈ॥” 22 ᤂᤢᤏᤧ᤹ ᤔᤧᤳᤋᤢᤛᤡ. “ᤀᤅᤧ᤺ᤰᤘᤠᤴ ᤁᤢᤜᤡᤱᤘᤧᤳ ᤘᤕᤧᤖ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤁᤠ ᤜᤧᤰᤁᤩᤠᤱ ᤀᤅᤧ᤺ᤰᤘᤠᤴ ᤜᤡᤱᤅᤡᤀᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤋ᤺ᤰᤏᤧᤳ ᤕᤢᤅᤠᤱ. ᤜᤧᤰᤁᤩᤠᤱ ᤜᤠᤒᤠᤱ॥ 23 ᤁᤖ ᤀᤠᤸᤗ ᤂᤧᤴ ᤛᤩᤧ. ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤋ᤺ᤰᤏᤧᤳ ᤕᤢᤱᤅᤠᤒᤣ᥅ ᤕᤠᤶᤔᤥ ᤂᤧᤴ ᤏᤢ᤺ᤰᤔᤠ ᤋᤠ᤺ᤵᤔᤠ ᤛᤢᤰᤋᤢᤱᤒᤡ᥅ ᤀᤠᤱᤃᤠ᤹ ᤂᤢᤏᤧ᤹ᤀᤥ ᤐᤣ᤺ᤰᤔᤠ ᤛᤢᤰᤁᤠ. ᤁᤖ ᤂᤧᤴ ᤀᤠᤱᤃᤠ᤹ᤀᤥ ᤏᤢ᤺ᤱᤔᤠ ᤋᤠᤔᤠ ᤔᤧᤛᤢᤰᤏᤧᤴᤗᤥ॥” ᤛᤥᤗᤥᤔᤏᤧᤴ ᤛᤠᤘᤠ᤺ᤴᤇᤡᤱ 24 ᤂᤧᤒᤩᤠᤱ ᤍᤠᤀᤢᤍᤖᤧ ᤁᤢᤔᤣᤳ ᤒᤣᤌᤛᤣᤒᤠᤴ ᤜᤠᤱᤜᤠᤱᤘᤠ ᤐᤡᤖᤢ॥ ᤂᤢᤏᤧ᤹ ᤂᤧᤸᤗᤧ᤹ᤀᤥ ᤐᤣ. ᤜᤧᤰᤁᤩᤠᤱ ᤂᤧᤴᤏᤢ ᤀᤡᤵᤛᤧ. ᤜᤧᤰᤁᤩᤠᤱ ᤂᤧᤸᤗᤧ ᤗᤳᤇᤠ ᤛᤠ ᤁᤳᤋᤢ. ᤜᤴᤏᤠᤱ ᤂᤧᤸᤗᤧ ᤁᤢᤔᤡᤱ ᤛᤥᤗᤥᤔᤏ ᤕᤢᤰᤂᤢ॥ ᤕᤜᤘᤣ ᤍᤠᤱᤒᤠᤗᤧ ᤂᤧᤴ ᤗᤢᤱᤔᤠ᤹ ᤋᤢᤰᤋᤢ. 25 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤴ ᤗᤢᤱᤔᤠ ᤋᤢᤰᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤁᤢᤔᤡᤱ ᤕᤍᤍᤡᤕᤠ ᤕᤢᤰᤂᤢᤖ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤗᤠᤶ ᤂᤢᤏᤧ᤹ ᤍᤠᤀᤢᤍᤧᤴ ᤀᤡᤱᤄᤱ ᤜᤠᤰᤋᤢᤖᤥ॥ ᤍᤠᤀᤢᤍᤖᤧ ᤖᤒ᤻ᤒᤠ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥᤃᤢ ( ᥇ ᤛᤠᤵᤔᤢ ᥈᥆:᥇-᥉ ) 26 ᤂᤧᤴ ᤀᤣᤃᤠᤱ ᤕᤥᤀᤠᤒᤖᤧ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰ ᤖᤒ᤻ᤒᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥᤃᤢᤀᤠᤱ ᤜᤠᤱᤕᤰᤁᤡᤴ ᤜᤢᤰᤁᤠᤵ ᤆᤥᤃᤢ॥ 27 ᤜᤧᤰᤁᤩᤠᤱ ᤕᤥᤀᤠᤒᤖᤧ ᤍᤠᤀᤢᤍᤧᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢ. “ᤀᤠᤱᤃᤠ᤹ ᤖᤒ᤻ᤒᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥᤃᤢᤱᤅᤠᤱ ᤕᤧᤰᤕᤰᤁᤥᤒᤠ ᤆᤫᤠ᤺ᤳ ᤁᤧᤒᤢᤶᤒᤠᤍᤧᤴᤜᤠ᤹ ᤜᤢᤰᤁᤠᤵ ᤆᤥᤃᤢᤱ॥ 28 ᤀᤠᤸᤗ ᤀᤠᤍᤠᤱᤒᤠᤖᤧ ᤌᤰᤛᤢᤒᤠ ᤛᤢᤵᤛᤧᤛᤧ ᤜᤧᤰᤁᤩᤠᤱ ᤕᤧᤰᤕᤰᤁᤡᤴ ᤁᤒᤧ᤹ᤀᤠᤱ ᤂᤧᤴ ᤜᤢᤰᤁᤠᤵ ᤆᤥᤃᤧ᤹. ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ ᤂᤧᤴ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥᤃᤢᤱ᤹. ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤀᤠᤱᤃᤠ᤹ ᤀᤠᤔᤡᤱᤅᤥ ᤐᤥᤱ᤹॥” 29 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤛᤢᤵᤛᤢᤛᤡ. ᤜᤧᤰᤁᤩᤠᤱ ᤖᤒ᤻ᤒᤠ ᤕᤧᤰᤕᤰᤁᤥ ᤐᤣ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥᤃᤢᤀᤠᤱ ᤜᤢᤰᤁᤠᤵ ᤔᤧᤳᤇᤡᤱ॥ 30 ᤜᤧᤰᤁᤩᤠᤱ ᤂᤢᤏᤧ᤹ ᤀᤶᤔᤥᤏᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤡᤸᤗᤧ ᤁᤢᤍᤡᤆ᤺ᤴ ᤑᤢᤴᤍᤢ. ᤂᤧᤴ ᤀᤡᤔᤧᤸᤗᤢᤱᤒᤠ ᤗᤢᤱ ᤁᤧᤒᤵᤐᤠ ᤆᤥᤃᤧ. ᤜᤧᤰᤁᤩᤠᤱ ᤂᤧᤴ ᤛᤢᤶᤒᤥᤱᤅᤠᤱ ᤅᤠᤛᤡ ᤁᤡᤗᤥ ᤕᤠᤖᤡᤰ ᤗᤡ᤺ᤵᤋᤧ. ᤜᤧᤰᤁᤩᤠᤱ ᤂᤧᤴ ᤍᤠᤀᤢᤍᤖᤧ ᤁᤢᤎᤧᤃᤣ᤺ᤰᤐᤥ ᤔᤧᤄᤢ᤺ᤰᤋᤢ॥ ᤂᤢᤏᤧ᤹ ᤕᤧᤰᤕᤰᤗᤠᤶᤒᤠ ᤔᤧᤏᤠᤵᤋᤢᤛᤡᤒᤠ ᤛᤠ᤹ᤖᤡᤰ ᤕᤖᤡᤰ ᤆᤡᤃᤰᤘᤠᤜᤠ᤹ ᤋᤣ᤹ᤖᤢ॥ 31 ᤂᤢᤏᤧ᤹ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤀᤠᤖᤠ ᤏᤢ ᤑᤧᤴᤈᤣ᤹ᤖᤧ ᤘᤣ᤹ ᤘᤣ᤹ ᤐᤖᤡᤰᤐᤠ ᤛᤠᤔᤠ ᤏᤢ ᤋ᤺ᤴᤍᤡ᤹ᤜᤠ᤹ ᤆᤥ᤺ᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤠᤶᤗᤧᤰᤀᤠᤱ ᤆᤥ᤺ᤰᤐᤠᤱᤄᤢᤛᤡ॥ ᤍᤠᤀᤢᤍᤖᤧ ᤀᤠᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤜᤠᤒᤠ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤄᤢᤛᤡ॥ ᤂᤧᤴ ᤀᤣᤃᤠᤱ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤳᤋᤢᤛᤡᤒᤠ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤕᤖᤢᤛᤗᤧᤔ ᤔᤧᤏᤢ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.