᥈ ᤛᤠᤔᤢᤀᤧᤗ 11 - LIFOTNTᤍᤠᤀᤢᤍ ᤏᤢ ᤒᤣᤌᤛᤣᤒᤠ 1 ᤑᤢᤱᤘᤠ᤺ᤶᤔᤠ ᤕᤧᤶᤔᤥ ᤜᤠᤱᤜᤠ᤹ ᤌᤱ ᤆᤥ᤺ᤰᤛᤧ ᤔᤧᤗ᤺ᤴᤍᤧᤸᤗᤧ ᤍᤠᤀᤢᤍᤖᤧ ᤕᤥᤀᤠᤒ ᤏᤢ ᤂᤢᤏᤧ᤹ ᤘᤣ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤶᤔᤥᤏᤡᤜᤠ᤹ ᤔᤧᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤖᤒ᤻ᤒᤠ ᤕᤧᤰᤕᤰᤁᤡᤴ ᤔᤧᤃᤒᤢ॥ ᤁᤖ ᤍᤠᤀᤢᤍᤧᤱᤃ ᤕᤖᤢᤛᤗᤧ᤺ᤶᤔᤥᤀᤣ ᤕᤠ᤺ᤰᤋᤧ॥ 2 ᤌᤡᤰᤕᤠᤴ ᤕᤢ᤺ᤴᤇᤡᤰ ᤍᤠᤀᤢᤍᤧᤴ ᤁᤢᤕᤢᤱᤔᤠᤍᤧᤴᤏᤥᤗᤠᤶ ᤐᤥᤃᤧᤀᤠᤱ ᤜᤠᤱᤜᤡᤶᤔᤥᤒᤠ ᤑᤧᤒᤧ ᤁᤧᤗ᤹ᤒᤠ ᤂᤠᤶᤒᤢᤀᤥ ᤗᤠᤛᤧᤀᤠᤱ ᤗᤠᤱᤄᤣᤃᤧᤖ ᤘᤕᤧᤸᤗᤧ ᤂᤢᤏᤧ᤹ ᤗᤳᤇᤠ ᤔᤧᤴᤇᤢᤔᤠᤎᤡᤰ ᤘᤠᤖᤢ᤺ᤶᤛᤡᤱᤗ ᤕᤠᤃᤧᤒᤠ ᤏᤡᤛᤢ. ᤂᤧᤴ ᤔᤧᤴᤇᤢᤔᤠᤴ ᤛᤠ᤹ᤖᤡᤰ ᤏᤢᤔᤠ ᤆᤥᤃᤧ॥ 3 ᤂᤧᤴ ᤔᤧᤴᤇᤢᤔᤠᤴ ᤜᤠ᤺ᤳᤋᤡ ᤑᤠ᤹ᤀᤠᤱ ᤛᤣ᤺ᤴᤍᤥᤛᤧ ᤔᤏᤠ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤌᤡᤰᤗᤧ ᤐᤠ᤺ᤳᤋᤢ. “ᤂᤧᤱᤃ ᤀᤣᤗᤡᤀᤣᤔᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ. ᤜᤡᤳᤋᤡ ᤀᤢᤖᤡᤕᤠᤖᤧ ᤁᤢᤔᤣᤳ ᤒᤣᤌᤛᤣᤒᤠᤴ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢ॥” 4 ᤍᤠᤀᤢᤍᤖᤧ ᤂᤧᤴ ᤔᤧᤴᤇᤢᤔᤠᤴ ᤁᤢᤗᤠᤛᤧ ᤁᤢᤛᤧᤘᤠᤖᤥᤒᤠᤜᤠ᤹ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤴ ᤋᤩᤧ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤂᤧᤴᤏᤢ ᤀᤡᤵᤛᤧ (ᤂᤧᤴ ᤁᤢᤛᤡᤶ ᤘᤠᤜᤵᤔᤠᤗᤠᤶ ᤛᤢᤳᤌᤥ ᤐᤥ᤺ᤰᤂᤧᤀᤠᤱ ᤘᤕᤧ॥) ᤜᤧᤰᤁᤩᤠᤱ ᤂᤧᤴ ᤁᤢᤜᤡᤶᤔᤥ ᤐᤣ॥ 5 ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤧᤸᤗᤧ “ᤔᤧᤴᤇᤢᤰᤔᤠ ᤐᤥ᤺ᤰᤂᤠᤱ” ᤑᤠ᤹ᤀᤠᤱ ᤍᤠᤀᤢᤍᤧᤴ ᤀᤡᤱᤄᤱ ᤜᤠᤰᤋᤢ॥ 6 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤕᤥᤀᤠᤒᤧᤴ ᤔᤧᤳᤋᤢ. “ᤜᤡᤳᤋᤡ ᤀᤢᤖᤡᤕᤠᤴ ᤀᤠᤱᤃᤠ᤹ᤀᤥ ᤐᤠᤱᤄᤧ᤹॥” ᤜᤧᤰᤁᤣ᤺ᤸᤗᤧ ᤕᤥᤀᤠᤒᤖᤧ ᤂᤧᤴ ᤍᤠᤀᤢᤍᤖᤧ᤹ᤀᤥ ᤐᤠᤱᤄᤢ॥ 7 ᤜᤧᤰᤁᤩᤠᤱ ᤀᤢᤖᤡᤕᤠᤴ ᤂᤢᤏᤧ᤹ᤀᤥ ᤁᤧᤖᤧ॥ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤕᤥᤀᤠᤒᤧᤴ ᤏᤢ ᤌᤰᤛᤢᤒᤠᤜᤠ᤹ ᤀᤠᤰᤂᤣ ᤔᤧᤗ᤹ᤖ ᤔᤧᤕᤠᤰ ᤑᤠ᤹ᤀᤠᤱ ᤂᤢᤏᤧ᤹ ᤛᤣ᤺ᤴᤍᤥᤛᤢ॥ ᤜᤧᤰᤁᤩᤠᤱ ᤀᤠᤰᤂᤣᤗ᤹ᤖᤡᤰ ᤌᤱ ᤐᤥᤱᤗ ᤐᤳ ᤑᤠ᤹ᤀᤠᤱᤅᤠᤱ ᤛᤣ᤺ᤴᤍᤥᤛᤢ॥ 8 ᤂᤧᤴ ᤀᤣᤃᤠᤱ ᤍᤠᤀᤢᤍᤖᤧ ᤀᤢᤖᤡᤕᤠᤴ ᤔᤧᤳᤋᤢ. “ᤂᤧᤏᤧ᤹ ᤕᤥ ᤁᤧᤜᤡᤶᤔᤥ ᤐᤣᤃᤧ᤹ᤀᤠᤱ ᤛᤵᤔᤠ ᤏᤧᤛ᤻ᤛᤧ᤹॥” ᤂᤧᤴ ᤜᤠᤱᤜᤡᤶᤗᤠᤶᤒᤠ ᤗ᤺ᤴᤍᤧᤀᤠᤱ ᤜᤠᤱᤅᤡᤸᤗᤧ ᤂᤧᤸᤗᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤆᤧᤛᤢᤱ ᤜᤠᤅᤢᤍᤣᤛᤢ॥ 9 ᤁᤖ ᤜᤡᤳᤋᤡ ᤀᤢᤖᤡᤕᤠᤴ ᤁᤢᤜᤡᤶᤔᤥ ᤔᤧᤒᤣᤏᤧᤴ. ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤏᤢ ᤜᤠᤱᤜᤡᤶ ᤗᤠᤶᤎᤣ᤺ᤵᤐᤥᤀᤣ ᤀᤡᤵᤛᤧ॥ 10 “ᤀᤢᤖᤡᤕᤠ᤺ᤱᤃ ᤂᤢᤏᤧ᤹ ᤁᤢᤜᤡᤶᤔᤥ ᤔᤧᤒᤣᤏᤧᤴ” ᤑᤠ᤹ᤀᤠᤱ ᤍᤠᤀᤢᤍᤖᤧ ᤂᤧᤵᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ᤃ ᤔᤠ᤺ᤱᤄᤠᤗᤠᤶ ᤗᤠᤱᤁᤧᤄᤣᤃᤧᤀᤠᤱ ᤁᤧᤍᤩᤧᤒᤠ ᤔᤣ᤺ᤶᤒᤡ᥅ ᤂᤧᤏᤧ᤹ ᤌᤣᤀᤠᤱ ᤁᤧᤜᤡᤶᤔᤥ ᤁᤧᤶᤒᤣᤏᤧᤴ᥅” 11 ᤀᤢᤖᤡᤕᤠ᤺ᤸᤗᤧ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ. ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤌᤰᤛᤢᤒᤠᤜᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤴᤍᤠᤱᤒᤠ ᤕᤥᤀᤠᤒ ᤏᤢ ᤀᤠᤍᤠᤱᤒᤠᤖᤧ ᤁᤧᤛᤢᤜᤠᤱᤕᤢᤰᤐᤠᤜᤠ᤹ ᤋᤧᤶᤒᤣ᤹ᤀᤥ ᤛᤠ᤺ᤱᤃᤠᤜᤡᤶ ᤔᤧᤗᤣ᤺ᤳᤋᤢᤀᤠᤱ ᤔᤧᤕᤢᤱ॥ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤆᤠᤱ ᤌᤢᤅᤢᤱᤅᤠᤱ ᤀᤠᤔᤣ᤺ᤳᤋᤧᤴᤏᤢ ᤀᤡᤶᤛᤧ ᤜᤡᤶᤔᤥ ᤐᤣ᤺ᤰᤁᤠᤒᤣ᥅ ᤀᤠᤍᤠᤱᤒᤠ ᤁᤧᤜᤡᤱᤗ ᤌᤠᤖᤡᤰ ᤀᤠᤱᤃᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤢᤰᤁᤠᤴ॥” 12 ᤜᤧᤰᤁᤣ᤺ᤸᤗᤧ ᤍᤠᤀᤢᤍᤖᤧ ᤀᤢᤖᤡᤕᤠᤴ ᤔᤧᤳᤋᤢ. “ᤜᤧᤰᤁᤣᤃᤪ ᤀᤠᤀᤡᤴ ᤁᤵᤔᤥᤀᤣ ᤕᤢᤅᤧ᤹ ᤜᤧᤰᤁᤩᤠᤱ ᤋᤠ᤺ᤴᤍᤡᤰ ᤂᤧᤏᤧ᤹ ᤐᤠᤱᤏᤧ॥” ᤂᤧᤸᤗᤧᤆᤥᤃᤢᤸᤗᤧ ᤀᤢᤖᤡᤕᤠᤴ ᤂᤧᤴ ᤕᤧᤴᤏᤥ ᤏᤢ ᤁᤢᤍᤠ᤺ᤴᤍᤡᤰᤔᤠ ᤌᤠᤖᤡᤰ ᤕᤖᤢᤛᤗᤧ᤺ᤶᤔᤥᤀᤣ ᤕᤢᤅᤧ॥ 13 ᤍᤠᤀᤢᤍᤖᤧ ᤂᤧᤴ ᤆᤠᤈᤠᤛᤧ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤔᤛᤢ॥ ᤁᤖ ᤕᤢ᤺ᤴᤇᤡᤰ ᤂᤧᤴ ᤐᤠ᤺ᤰᤂᤠ ᤗ᤺ᤴᤍᤧᤀᤠᤱ ᤁᤢᤜᤡᤶᤔᤥ ᤔᤧᤒᤣᤏᤧᤴ ᤁᤖ ᤜᤠᤱᤜᤡᤶᤔᤥᤀᤣ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤏᤢ ᤛᤧᤴᤍᤡᤰ ᤀᤡᤵᤛᤧ॥ 14 ᤁᤢᤍᤠ᤺ᤴᤍᤡᤰᤔᤠ ᤍᤠᤀᤢᤍᤖᤧ ᤗᤳᤇᤠ ᤛᤰᤀᤡᤱᤄᤱ ᤛᤠᤵᤋᤢᤀᤠᤱ ᤀᤢᤖᤡᤕᤠ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤕᤥᤀᤠᤒᤧᤴ ᤜᤠᤰᤋᤢ॥ 15 ᤛᤰᤀᤡᤱᤄᤱᤅᤥ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤛᤠᤵᤋᤢ. “ᤕᤖᤡᤰ ᤌᤱ ᤁᤧᤒᤥᤱᤒᤠ ᤋᤧᤴᤏᤥ. ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤢᤖᤡᤕᤠᤴ ᤐᤠᤱᤄᤧᤀᤠᤱ ᤂᤡᤏᤡ᤹ ᤀᤣᤃᤠᤱ ᤘᤕᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤌᤱᤅᤥ ᤛᤡᤖ॥” 16 ᤕᤥᤀᤠᤒᤖᤧ ᤕᤧᤰᤕᤰᤁᤡᤴ ᤁᤒᤢᤀᤠᤱ ᤏᤧᤛ᤻ᤛᤧᤸᤗᤧ ᤂᤢᤏᤧ᤹ ᤀᤢᤖᤡᤕᤠᤴ ᤌᤱ ᤆᤥ᤺ᤰᤔᤠ ᤁᤧᤎᤢᤶᤒᤠ ᤏᤡᤱᤔᤡ ᤁᤧᤘᤠ᤹ᤒᤠ ᤋᤧᤴᤏᤥ ᤐᤠᤱᤄᤢ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤌᤱ ᤆᤥ᤺ᤰᤔᤠ ᤁᤧᤎᤢᤶᤒᤠ ᤏᤡᤱᤔᤡᤜᤠ᤹ ᤂᤧᤵᤔᤥ ᤔᤧᤘᤠ᤹ ᤁᤧᤗ᤹ᤒᤠᤴ ᤏᤡᤛᤢᤀᤠᤱ ᤘᤕᤧ॥ 17 ᤜᤧᤰᤁᤩᤠᤱ ᤕᤧᤰᤕᤰᤐᤠ ᤔᤏᤠᤜᤠ᤹ ᤆᤄᤵ ᤔᤧᤗ᤺ᤴᤍᤧᤀᤠᤱ ᤕᤥᤀᤠᤒᤧᤴᤏᤢ ᤌᤱ ᤆᤥ᤺ᤰᤔᤠ ᤔᤧᤜᤣ᤺ᤰᤋᤧ. ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤓᤠ ᤁᤢᤎᤰᤛᤢᤒᤠᤜᤠ᤹ ᤔᤧᤛᤩᤧ॥ ᤜᤡᤳᤋᤡ ᤀᤢᤖᤡᤕᤠ᤺ᤴᤏᤠᤱ ᤛᤩᤧ॥ 18 ᤜᤧᤰᤁᤩᤠᤱ ᤕᤥᤀᤠᤒᤧᤸᤗᤧ ᤍᤠᤀᤢᤍᤧᤴ ᤌᤱᤅᤥ ᤁᤧᤒᤥᤱᤒᤠ ᤁᤧᤖᤧᤰ ᤀᤡᤱᤄᤱᤅᤡᤴ ᤋᤣ᤹ᤛᤧ ᤔᤏᤠᤎᤡᤰ ᤐᤠᤱᤄᤢ॥ 19 ᤜᤧᤰᤁᤩᤠᤱ ᤂᤧᤴ ᤀᤡᤱᤄᤱ ᤁᤧᤍᤣ᤹ᤒᤠ ᤔᤏᤠᤴ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢ. “ᤂᤧᤏᤧ᤹ ᤌᤱᤅᤥ ᤁᤧᤒᤥᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤠᤱᤅᤡᤴ ᤆᤧᤰᤋᤧᤛᤢᤖᤧ᤹. 20 ᤜᤧᤰᤁᤩᤠᤱ ᤜᤠᤱᤅᤡᤴ ᤁᤢᤛᤡᤰ ᤐᤥ᤺ᤰᤁᤠᤱ ᤀᤰᤂᤣ ᤐᤠ᤺ᤳᤋᤢᤏᤧᤓᤃᤪ. ‘ᤌᤱ ᤐᤥ᤺ᤰᤂᤧᤸᤗᤧ ᤂᤡᤏᤡ᤹ ᤌᤣᤀᤠᤱ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤒᤣᤃᤡᤒᤠ᥅ ᤗᤢᤱᤎᤠᤰᤗᤠᤶᤒᤠ ᤋᤥᤱ ᤔᤧᤀᤠᤒᤢ ᤑᤠ᤹ᤀᤠᤱ ᤂᤡᤏᤡ᤹ ᤗᤧᤔᤠ ᤁᤧᤒᤥᤱᤒᤠ ᤘᤕᤧᤔᤧᤴ॥ 21 ᤕᤖᤢᤒᤒᤣᤛᤣᤋᤖᤧ ᤁᤢᤛ᤻ᤛᤠ ᤀᤒᤡᤔᤣᤗᤣᤰᤁᤧᤴ ᤜᤠ᤺ᤳᤗᤧ ᤛᤧᤖᤢ᥅ ᤂᤧᤴ ᤗᤳᤇᤠ ᤔᤧᤴᤇᤢᤔᤠ᤺ᤸᤗᤧ ᤗᤢᤱᤛᤢᤶᤔᤧᤴ ᤗᤢᤱᤎᤠᤰᤗᤠᤶ ᤔᤰᤌᤠᤛᤢᤀᤠᤱ ᤛᤧᤖᤢᤀᤠᤱ ᤘᤕᤧ ᤔᤣ᤺ᤶᤒᤡ᥅ ᤜᤧᤰᤁᤩᤠᤱ ᤂᤢᤏᤧ᤹ ᤋᤣᤒᤣᤛᤀᤥ ᤛᤩᤧᤀᤠᤱ ᤘᤕᤧ ᤔᤣ᤺ᤶᤒᤡ᥅ ᤂᤡᤏᤡ᤹ ᤌᤣᤀᤠᤱ ᤗᤢᤱᤎᤠᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤒᤣᤃᤡᤒᤠ᥅’ ᤐᤠ᤺ᤳᤋᤢᤏᤧᤓᤃᤪ ᤂᤧᤏᤧ᤹ ᤀᤰᤂᤣ ᤔᤧᤳᤋᤧ᤹. ‘ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤜᤡᤳᤋᤡ ᤀᤢᤖᤡᤕᤠ᤺ᤴᤏᤠᤱ ᤛᤩᤧ॥’” 22 ᤂᤧᤴ ᤀᤡᤱᤄᤱ ᤁᤧᤍᤣ᤹ᤒᤠ ᤔᤏᤠᤴ ᤌᤠᤛᤡᤱ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤘᤕᤧᤒᤠ ᤋᤧᤴᤏᤥ ᤋᤩᤧ. ᤜᤧᤰᤁᤩᤠᤱ ᤕᤥᤀᤠᤒᤖᤧ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤀᤡᤱᤄᤱ ᤆᤧᤰᤋᤢ॥ 23 ᤂᤧᤸᤗᤧ ᤍᤠᤀᤢᤍᤧᤴ ᤔᤧᤳᤋᤢ. “ᤏᤡᤱᤔᤡᤜᤠ᤹ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤋᤧᤶᤒᤣ᤹ᤀᤥ ᤔᤧᤈᤢᤵᤛᤧ. ᤜᤧᤰᤁᤩᤠᤱ ᤀᤠᤏᤡᤃᤣ ᤌᤱᤅᤥ ᤏᤠ᤺ᤶᤔᤠ ᤔᤧᤜᤧ᤺ᤰᤋᤡᤃᤧ. ᤁᤖ ᤀᤠᤏᤡᤃᤣ ᤂᤧᤱᤜᤠ᤹ ᤕᤧᤰᤕᤰᤁᤡᤸᤗᤧ ᤗᤠᤶᤎᤣ᤺ᤵᤐᤥ ᤌᤠᤖᤡᤰ ᤑᤳᤋᤢᤶᤛᤡᤶᤒᤧᤖ ᤁᤧᤳᤋᤢᤶᤛᤡᤶᤒᤣ॥ 24 ᤜᤧᤰᤁᤩᤠᤱ ᤗᤢᤱᤎᤠᤰᤗᤠᤶᤒᤠ ᤋᤥᤱ ᤁᤧᤀᤠᤵᤐᤠᤜᤠ᤹ᤖᤧ ᤁᤧᤛᤧᤘᤠᤖᤥᤒᤠᤜᤠ᤹ ᤋᤥ᤺ᤱᤅᤡᤸᤗᤧ ᤔᤧᤀᤠᤒᤢᤛᤡ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤧᤔᤏᤠᤜᤠ᤹ ᤔᤧᤛᤩᤧ॥ ᤜᤧᤰᤁᤩᤠᤱ ᤁᤧᤛᤧᤘᤠᤖᤥᤒᤠ ᤜᤡᤳᤋᤡ ᤀᤢᤖᤡᤕᤠ᤺ᤴᤏᤠᤱ ᤛᤩᤧ॥” 25 ᤍᤠᤀᤢᤍᤖᤧ ᤂᤧᤴ ᤔᤏᤠᤴ ᤔᤧᤳᤋᤢ. “ᤕᤥᤀᤠᤒᤧᤴ ᤀᤰᤂᤣ ᤔᤧᤳᤋᤧ᤹. ‘ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹. ᤋᤠᤓᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤗᤳᤇᤠ ᤔᤏᤠᤴ ᤛᤧᤖᤢ᤹. ᤜᤠᤒᤠᤜᤧᤰᤁᤣ ᤗ᤹ᤖᤡᤰ ᤘᤣ᤹ᤀᤡᤴᤏᤠᤱ ᤛᤧᤖᤢ᤹॥ ᤕᤧᤰᤕᤰᤁᤡᤴ ᤑᤳᤋᤠᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤂᤠᤵᤐᤢᤎᤩ᤺ᤱ ᤆᤥᤃᤠᤶᤔᤧ᤹॥’ ᤕᤥᤀᤠᤒᤧᤴ ᤜᤠᤱᤜᤠᤱ ᤗ᤹ᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤆᤧᤰᤋᤧ᤹॥” 26 ᤀᤢᤖᤡᤕᤠ᤺ᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤁᤢᤕᤧᤶᤒᤠ᤺ᤴ ᤛᤩᤧ ᤁᤧᤗ᤹ᤒᤠ ᤂᤧᤵᤛᤢ. ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤏᤧᤳ ᤕᤢᤅᤧ॥ 27 ᤜᤧᤰᤁᤩᤠᤱ ᤏᤧᤳ ᤕᤢᤱᤔᤠ ᤛᤢᤖᤢᤀᤠᤱ ᤍᤠᤀᤢᤍᤖᤧ ᤔᤏᤠᤜᤠ᤹ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤜᤡᤶᤔᤥ ᤔᤧᤍᤠᤖᤢ॥ ᤂᤧᤴ ᤍᤠᤀᤢᤍᤖᤧ ᤁᤢᤔᤣᤳ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤗᤳᤇᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥ ᤁᤖ ᤍᤠᤀᤢᤍᤖᤧ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤕᤜᤘᤣ ᤍᤠᤱᤒᤠᤴ ᤛᤡᤳᤇᤡᤱᤗ ᤕᤠ᤺ᤴᤍᤢᤀᤠᤱ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.