᥈ ᤛᤠᤔᤢᤀᤧᤗ 10 - LIFOTNT

ᤍᤠᤀᤢᤍᤖᤧ ᤀᤶᤔᤥᤏᤡᤜᤠ᤹ ᤏᤠ᤺ᤴᤍᤢᤛᤡ

¹ ᤁᤴ ᤀᤣᤃᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤅᤡᤴ ᤛᤩᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠ ᤜᤠᤏᤢᤏᤧᤸᤗᤧ ᤜᤠᤱᤆᤥ᤺ᤰᤔᤠ ᤜᤣ᤺ᤰᤋᤢ॥

² ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤏᤠᤜᤠᤛᤖᤧ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤢᤏᤧ᤹ ᤁᤢᤛ᤻ᤛᤠ ᤜᤠᤏᤢᤏᤧᤴ ᤗᤢᤱᤔᤠ᤹ ᤋᤢᤰᤔᤠᤀᤣ ᤐᤥᤱ᤹॥” ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤜᤠᤏᤢᤏᤖᤧ ᤁᤢᤶᤒᤠ ᤛᤩᤧ᤺ᤸᤗᤧ ᤁᤢᤔᤏᤠᤜᤠ᤹ ᤜᤠᤱᤜᤠᤱ ᤔᤧᤳᤇᤧ ᤐᤠᤱᤄᤢᤛᤡ॥ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤗᤠᤛᤧ.

³ ᤜᤧᤰᤁᤣ᤺ᤸᤗᤧ ᤀᤶᤔᤥᤏᤡ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤍᤠᤱᤒᤠ ᤜᤠᤏᤢᤏᤧᤴ ᤔᤧᤔᤧᤳᤋᤢ. “ᤍᤠᤀᤢᤍᤖᤧ ᤜᤠᤱᤜᤠᤱ ᤔᤧᤳᤇᤧ ᤁᤢᤔᤏᤠᤜᤠ᤹ ᤐᤠᤱᤄᤢᤛᤡᤀᤠᤱ ᤂᤧᤏᤧ᤹ ᤁᤧᤶᤒᤠ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤒᤠᤒᤡ᥅ ᤁᤴ ᤔᤏᤠᤜᤠ᤹ᤃ ᤂᤧᤏᤧ᤹ ᤁᤧᤏᤡᤱᤘᤠ᤹ ᤁᤧᤛᤠ᤹ᤒᤠᤛᤡᤖᤥ. ᤁᤴᤜᤠ᤹ᤃ ᤂᤧᤏᤧ᤹ ᤁᤧᤕᤧᤰᤕᤰᤁᤡᤴ ᤏᤠ᤺ᤶᤔᤠ ᤑᤠ᤹ᤀᤠᤱ ᤁᤢᤛᤠ᤹ᤛᤧ ᤂᤧᤸᤗᤧ ᤐᤠᤱᤄᤢᤛᤡᤀᤠᤱ ᤘᤠ᤹॥”

⁴ ᤂᤧᤸᤗᤧᤆᤥᤃᤢᤸᤗᤧ ᤜᤠᤏᤢᤏᤧᤸᤗᤧ ᤍᤠᤀᤢᤍᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤋᤧᤶᤛᤢᤛᤡᤀᤠᤱ ᤂᤢᤴᤇᤡ᤹ ᤌᤡᤰ ᤗᤧᤵᤔᤠᤱᤒᤠ ᤔᤢᤎᤥ᤹ᤀᤡᤴ ᤂᤰᤋᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤔᤡᤃᤰᤔᤠ ᤌᤠᤖᤡᤰ ᤁᤢᤓᤪᤧ᤺ᤱ ᤁᤢᤓᤪᤧ᤺ᤱ ᤂᤢᤴᤇᤡ᤹ ᤋᤣᤳᤜᤠ᤹ ᤂᤰᤋᤢ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤐᤠᤱᤄᤢᤍᤣᤛᤢᤛᤡ॥

⁵ ᤁᤴ ᤐᤠ᤺ᤴᤏᤡᤴ ᤍᤠᤀᤢᤍᤧᤴ ᤔᤧᤔᤧᤳᤋᤢ. ᤜᤧᤰᤁᤩᤠᤱ ᤔᤏᤠᤜᤠ᤹ ᤂᤢᤴᤇᤡ᤹ ᤋᤢᤶᤛᤧ ᤐᤠᤱᤄᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤏᤢ᤺ᤴᤍᤧᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤎᤥ᤹ᤀᤡᤴ ᤕᤠᤶᤔᤥ ᤔᤧᤸᤗᤡᤱᤅᤣ ᤌᤠᤖᤡᤰ ᤕᤖᤡᤜᤥᤀᤥᤀᤣ ᤔᤧᤕᤢᤱᤗ ᤁᤧᤗ᤹ᤒᤠ ᤍᤠᤀᤢᤍᤖᤧ ᤀᤡᤱᤈᤠᤱ ᤆᤥᤃᤢ॥

⁶ ᤍᤠᤀᤢᤍᤧᤴᤏᤢ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤧᤴ ᤛᤠ᤹ᤖᤡᤰ ᤕᤠᤶᤃᤧᤛᤡᤱᤒᤠ ᤋᤠᤵᤑᤧ᤺ᤶᤒᤠ ᤐᤥ᤺ᤰᤂᤧ ᤁᤧᤗ᤹ᤒᤠ ᤀᤶᤔᤥᤏᤡᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤒᤣᤌᤖᤜᤥᤒ ᤏᤢ ᤛᤥᤒᤠᤒᤠ ᤏᤡᤒᤥᤱ ᤜᤧᤴᤇᤡᤱ ᤌᤰᤛᤢᤒᤠᤜᤠ᤹ ᤂᤢᤴᤇᤡ᤹ ᤑᤠ᤹ᤛᤧ ᤕᤠ᤺ᤸᤗᤡᤰ ᤔᤧᤍᤠᤖᤢᤛᤡ॥ ᤂᤧᤱᤜᤠ᤹ᤖᤧ ᤔᤠᤁᤠᤒᤠ ᤜᤠᤱᤗᤠᤶ ᤜᤧᤴᤇᤡᤱᤎᤡᤰ ᤜᤧᤰᤁᤩᤠᤱ ᤋᤥᤒᤗᤠᤶᤒᤠ ᤜᤧᤴᤇᤡᤱ ᤌᤡᤒᤥᤱᤅᤠᤱ ᤏᤧᤳᤇᤡ ᤔᤏᤠᤜᤠ᤹ ᤌᤱ ᤆᤥ᤺ᤰᤔᤠ ᤁᤧᤓᤠ᤹ᤒᤠ ᤕᤠ᤺ᤸᤗᤣᤰ ᤔᤧᤍᤠᤖᤢᤛᤡ॥

⁷ ᤍᤠᤀᤢᤍᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤕᤥᤀᤠᤒᤧᤴ ᤏᤢ ᤁᤧᤖᤧᤰ ᤌᤰᤗᤡᤜᤠᤱ ᤔᤏᤠᤜᤠ᤹ ᤐᤠᤱᤄᤢᤍᤣᤛᤢᤛᤡ॥

⁸ ᤜᤧᤰᤁᤩᤠᤱ ᤀᤶᤔᤥᤏᤡᤜᤠ᤹ ᤔᤧᤍᤩᤧᤀᤠᤱ ᤕᤧᤰᤕᤰ ᤗᤠᤶᤎᤣ᤺ᤳᤋᤥ ᤌᤱᤗᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧ. ᤜᤧᤰᤁᤩᤠᤱ ᤛᤥᤒᤠ ᤏᤢ ᤖᤜᤥᤒᤒᤠ ᤀᤖᤠᤔᤡ ᤜᤧᤰᤁᤩᤠᤱ ᤋᤥᤒ ᤏᤢ ᤔᤠᤁᤠᤒᤠ ᤔᤏᤠᤜᤠ᤹ ᤋᤧᤶᤒᤣ᤹ᤀᤥ ᤌᤱᤗᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧ॥

⁹ ᤕᤥᤀᤠᤒᤖᤧ ᤁᤢᤍᤃᤡ ᤏᤢ ᤁᤢᤀᤣᤃᤠᤱ ᤌᤱᤗᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧᤒᤠ ᤏᤡᤛᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤌᤱ ᤆᤥ᤺ᤰᤔᤠ ᤁᤧᤎᤢᤶᤒᤠ ᤌᤰᤛᤢᤒᤠᤜᤠ᤹ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤢᤰᤂᤢᤛᤡ॥

¹⁰ ᤁᤧᤏᤶᤒᤠ ᤌᤰᤛᤢᤒᤠᤜᤠ᤹ ᤂᤢᤏᤧ᤹ ᤀᤠᤒᤠᤅᤣ ᤁᤢᤴᤛᤠ᤹ ᤀᤒᤡᤛᤤᤖᤧ ᤁᤢᤕᤢᤰᤁᤥ ᤋᤠᤖᤢᤛᤡ. ᤂᤢᤏᤧ᤹ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤌᤱᤗᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤛᤡ॥

¹¹ ᤕᤥᤀᤠᤒᤖᤧ ᤂᤧᤴ ᤔᤧᤳᤋᤢ. “ᤀᤖᤠᤔᤡᤜᤠ᤹ᤖᤧ ᤀᤠᤱᤃᤠ᤹ ᤔᤧᤏᤠ᤺ᤴᤏᤠ ᤔᤧᤓᤧᤳᤋᤠᤒᤠ ᤜᤧᤰᤁᤣ ᤗ᤹ᤏᤧᤓᤃᤪ ᤂᤧᤏᤧ᤹ ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹॥ ᤁᤖ ᤀᤶᤔᤥᤏᤡᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤠ᤺ᤴ ᤁᤧᤶᤓᤧᤳᤏᤧᤓᤃᤪ ᤀᤠᤱᤃᤠ᤹ ᤂᤧᤏᤧ᤹ ᤑᤠ᤹ᤛᤧ ᤑᤧᤴᤏᤠ॥

¹² ᤜᤠᤱᤜᤠᤱ ᤗ᤹ᤖᤧ. ᤀᤠᤏᤡ᤹ ᤔᤏᤠᤜᤠ᤹ ᤏᤢ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰᤜᤠ᤹ᤖᤧ ᤗᤠᤃᤡ ᤜᤠᤱᤜᤠᤱᤅᤠᤱ ᤌᤱ ᤆᤥ᤺ᤰᤛᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤥ ᤌᤣ᤺ᤴ ᤏᤢᤒᤠ ᤆᤥᤰ ᤜᤠᤒᤠ ᤂᤧᤴ ᤂᤢᤏᤧ᤹ ᤆᤥᤃᤢ᤹॥”

¹³ ᤕᤥᤀᤠᤒᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤀᤖᤠᤔᤡᤜᤠ᤹ᤏᤢ ᤌᤱ ᤌᤰᤛᤧ ᤋᤃᤡ ᤔᤧᤒᤥᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤀᤖᤠᤔᤡᤜᤠ᤹ ᤂᤧᤳᤇᤡᤱᤔᤠ ᤔᤧᤜᤣ᤺ᤰᤋᤧ॥

¹⁴ ᤀᤶᤔᤥᤏᤡᤜᤠ᤹ᤖᤧ ᤀᤖᤠᤔᤡᤜᤠ᤹ ᤔᤧᤄᤧᤳᤇᤡᤱᤒᤠ ᤔᤧᤏᤡᤛᤢᤛᤡᤀᤠᤱ ᤂᤧᤱᤜᤠ᤹ᤀᤠᤱ ᤀᤒᤡᤛᤤᤖᤧ ᤁᤢᤍᤃᤡ ᤔᤧᤄᤧᤳᤇᤡᤱᤅᤠᤱ ᤕᤧᤰᤕᤰ ᤛᤡᤃᤠᤱ ᤔᤧᤗᤠᤛᤧ॥ ᤂᤧᤒᤩᤠᤱ ᤕᤥᤀᤠᤒᤖᤧ ᤀᤶᤔᤥᤏᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠ ᤗᤧᤖᤢᤀᤠᤱ ᤕᤖᤢᤛᤗᤧᤔ ᤋᤩᤧ॥

¹⁵ ᤀᤖᤠᤔᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱᤅᤥ ᤜᤠᤖᤡᤔᤧᤍᤩᤧᤒᤠ ᤔᤧᤏᤡᤛᤢᤀᤠᤱ ᤕᤠᤶᤔᤥ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤛᤢᤶᤔᤠ ᤔᤧᤜᤣ᤺ᤰᤋᤢᤛᤡ॥

¹⁶ ᤜᤍᤍᤣᤈᤣᤖᤧᤸᤗᤧ ᤕᤢᤑᤪᤣᤋᤡᤛ ᤕᤱᤄᤱᤅᤡᤸᤗᤧ ᤏᤠᤜᤠᤱ ᤗᤧᤵᤔᤠᤱᤏᤢ ᤘᤣ᤹ ᤀᤖᤠᤔᤡᤜᤠ᤹ ᤀᤢ᤺ᤳᤇᤧ ᤔᤏᤠᤜᤠ᤹ ᤐᤠᤱᤄᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤍᤍᤣᤈᤣᤖᤖᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ ᤌᤰᤔᤥᤒᤠ ᤛᤥᤒᤠᤁᤖᤧ ᤁᤢᤗᤠᤶᤗᤥᤀᤥ ᤜᤣᤗᤠᤔ ᤗᤧᤵᤔᤠᤱ ᤋᤃᤡ ᤔᤧᤒᤥᤖᤧ॥

¹⁷ ᤁᤴ ᤐᤠ᤺ᤴᤏᤡᤴᤏᤠᤱ ᤍᤠᤀᤢᤍᤖᤧ ᤂᤧᤵᤛᤢ. ᤜᤧᤰᤁᤩᤠᤱ ᤂᤡᤔᤥ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤛᤢᤵᤛᤢᤛᤡᤀᤠᤱ ᤕᤷᤍᤏ ᤏᤠᤜᤠᤱᤍᤠᤱ ᤔᤧᤒᤣ. ᤜᤧᤰᤁᤩᤠᤱ ᤜᤣᤗᤠᤔ ᤗᤧᤵᤔᤠᤱ ᤔᤧᤎᤠᤛᤡᤱ॥ ᤐᤠ ᤂᤧᤵᤔᤥᤀᤣ ᤀᤖᤠᤔᤡᤜᤠ᤹ ᤍᤠᤀᤢᤍᤖᤧ ᤁᤢᤍᤃᤡ ᤌᤱ ᤆᤥ᤺ᤰᤔᤠ ᤕᤠᤖᤡᤵ ᤔᤧᤒᤥ᤺ᤰᤂᤧ. ᤜᤧᤰᤁᤩᤠᤱ ᤌᤱ ᤔᤧᤈᤥᤃᤧ॥

¹⁸ ᤁᤖ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤔᤧᤄᤧᤳᤇᤡᤱ॥ ᤂᤧᤵᤔᤥ ᤍᤠᤀᤢᤍ ᤏᤢ ᤁᤢᤎᤰᤛᤢᤒᤠᤜᤠ᤹ᤖᤧ ᤁᤡᤵ ᤏᤢᤛᤡ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤏᤢ ᤗᤡᤒᤥᤱ ᤜᤧᤴᤇᤡᤱ ᤌᤰᤛᤢᤒᤠᤜᤠ᤹ ᤔᤧᤛᤧᤖᤢᤛᤡ॥ ᤂᤢᤏᤧ᤹ ᤛᤥᤒᤠᤰᤁᤧᤴᤏᤠᤱ ᤌᤱᤅᤥ ᤂᤠ᤺ᤴᤍᤢᤀᤠᤱ ᤛᤩᤧ॥

¹⁹ ᤜᤍᤍᤣᤈᤣᤖᤖᤧ ᤁᤢᤕᤢᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤜᤠᤱᤜᤠ᤹ᤖᤧ ᤀᤠᤏᤡ᤹ ᤀᤡᤛᤪᤠᤀᤡᤗᤗᤠᤶᤒᤠ ᤜᤠᤖᤡᤀᤠᤍᤩᤧ ᤁᤧᤗ᤹ᤒᤠ ᤔᤧᤏᤡᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤱ ᤆᤥᤃᤢᤶ ᤔᤣ᤺ᤴ ᤑᤠ᤹ᤀᤠᤱ ᤗᤧᤵᤔᤡ ᤔᤧᤏᤠ᤺ᤰᤋᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤛᤪᤠᤀᤡᤗᤖᤧ ᤁᤢᤕᤢᤰᤁᤥ ᤔᤧᤍᤩᤧ॥ ᤂᤧᤴ ᤀᤣᤃᤠᤱ ᤀᤖᤠᤔᤡᤜᤠ᤹ᤖᤧ ᤀᤶᤔᤥᤏᤡᤜᤠ᤹ ᤀᤠᤵᤑᤠᤸᤗᤧᤀᤠᤱ ᤑᤠ᤹ᤔᤠᤛᤡ ᤏᤡᤱᤘᤠ᤹ ᤔᤧᤴᤈᤥᤃᤢᤴᤗᤥ॥