᥈ ᤛᤠᤔᤢᤀᤧᤗ 1 - LIFOTNT

ᤍᤠᤀᤢᤍᤖᤧ ᤛᤠᤘᤗᤧᤴ ᤔᤠᤛᤡᤱᤒᤠ ᤏᤡᤱᤘᤠ᤹ ᤂᤥᤛᤢ

¹ ᤛᤠᤘᤗᤧᤴ ᤛᤩᤧᤀᤠᤱ ᤀᤣᤃᤠᤱ ᤍᤠᤀᤢᤍᤖᤧ ᤀᤔᤠᤗᤧᤁᤡᤜᤠ᤹ ᤌᤱᤅᤥ ᤏᤠ᤺ᤴᤍᤢᤛᤡᤀᤠᤱ ᤏᤢ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤕᤧᤴ ᤌᤠᤖᤡᤰ ᤛᤡᤰᤗᤃᤀᤥᤀᤣ ᤕᤢᤅᤧ ᤕᤠ᤺ᤰᤋᤧ॥

² ᤜᤧᤰᤁᤩᤠᤱ ᤛᤢᤶᤕᤧᤴ ᤁᤧᤖᤧᤸᤗᤧ ᤕᤠ᤺ᤴᤍᤡᤰ ᤁᤢᤍᤣ᤺ᤳ ᤁᤧᤍᤧ᤺ᤱᤒᤠ. ᤁᤢᤎᤧᤃᤣ᤺ᤰᤐᤥ ᤂᤠᤶᤓᤢᤋᤪᤠ ᤁᤧᤒᤵᤐᤠ ᤔᤏᤠᤎᤡᤰ ᤛᤠᤘᤗᤖᤧ ᤁᤢᤍᤢᤖᤠᤕᤰᤗᤠᤶ ᤗᤡᤃᤰ ᤗ᤺ᤴᤍᤧᤍᤩᤧ॥ ᤂᤧᤴ ᤍᤠᤀᤢᤍᤖᤧ ᤁᤢᤒᤣᤛᤠᤱ ᤁᤧᤖᤧ ᤜᤧᤰᤁᤩᤠᤱ ᤁᤢᤍᤃᤡ ᤛᤠᤶᤒᤥᤴ ᤜᤒᤳ ᤑᤴᤇᤡᤱ॥

³ ᤍᤠᤀᤢᤍᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤀᤠᤳᤋᤠᤴᤗᤠᤶᤒᤠ ᤁᤧᤍᤩᤧᤒᤠ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤋᤢᤖᤠᤕᤰᤗᤠᤶᤒᤠ ᤋᤠᤅᤠᤱᤅᤠᤱ ᤂᤧᤳᤇᤡᤅᤠᤀᤠᤱ ᤋᤩᤠᤱᤒᤠ॥”

⁴ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤂᤧᤴ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤀᤡᤱᤄᤱ ᤌᤧᤔᤠ ᤘᤠ᤹ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹॥” ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤏᤡ᤹ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤔᤠᤍᤧᤴᤗᤠᤶ ᤔᤧᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤌᤱᤅᤥ ᤕᤖᤡᤰ ᤔᤧᤛᤩᤧ॥ ᤛᤠᤘᤗᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴᤏᤠᤱ ᤛᤩᤧᤛᤡ॥”

⁵ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤂᤧᤴ ᤀᤡᤱᤄᤱ ᤁᤧᤍᤠ᤺ᤵᤐᤠ ᤌᤠᤱᤒᤧᤴᤏᤡᤴ ᤛᤣ᤺ᤴᤍᤥᤛᤢ. “ᤛᤠᤘᤗᤧᤴ ᤏᤢ ᤈᤥᤏᤠᤌᤠᤏᤧᤴ ᤔᤧᤛᤧᤖᤢᤛᤡ ᤑᤠ᤹ᤀᤠᤱ ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤁᤧᤏᤡᤛᤢ᥅”

⁶ ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤃᤡᤸᤒᤥ ᤁᤥ᤺ᤰᤔᤠᤀᤥ ᤘᤕᤠᤱ. ᤜᤧᤰᤁᤩᤠᤱ ᤛᤠᤘᤗᤧᤴ ᤀᤠᤒᤠᤅᤣ ᤁᤢᤗᤠ᤺ᤰᤁᤡᤸᤗᤧ ᤋᤰᤛᤡᤱᤅᤠᤱ ᤀ᤺ᤰᤂᤢᤶ ᤐᤳᤇᤧᤒᤠ ᤏᤡᤛᤢᤱ॥ ᤂᤶᤒᤩᤠᤱ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤀᤴᤗᤠᤎᤠᤜᤠ᤹ ᤏᤢ ᤀᤴᤃᤧᤗᤥᤱᤒᤠᤜᤠ᤹ ᤂᤢᤏᤧ᤹ ᤁᤢᤀᤣᤃᤠᤱ ᤔᤧᤘᤕᤧ॥”

⁷ ᤜᤧᤰᤁᤩᤠᤱ ᤂᤢᤏᤧ᤹ ᤀᤣᤃᤠᤱ ᤜᤡᤛᤡᤱᤅᤡᤸᤗᤧ ᤀᤠᤱᤃᤠ᤹ ᤏᤡᤛᤠᤱᤅᤠᤱ ᤀᤢ᤺ᤳᤋᤠᤱ॥ ᤀᤠᤱᤃᤠ᤹ ᤔᤧᤳᤋᤢᤱ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤁᤵᤔᤥ ᤘᤠ᤹ᤀᤠᤖᤥ॥”

⁸ “ᤂᤢᤏᤧ᤹ ᤔᤧᤳᤋᤠᤱ. ‘ᤂᤧᤏᤧ᤹ ᤜᤠ᤺ᤳᤏᤧᤒᤣ᥅’ ᤀᤠᤱᤃᤠ᤹ ‘ᤀᤔᤠᤗᤧᤁᤡᤀᤠ’ ᤔᤧᤳᤋᤢᤱ॥

⁹ “ᤂᤧᤒᤩᤠᤱ ᤂᤢᤏᤧ᤹ ᤔᤧᤳᤋᤠᤱ. ‘ᤀᤠᤱᤃᤠ᤹ ᤀᤠᤒᤣᤛᤠᤱ ᤑᤧᤖᤧ᤹ᤀᤠᤱ ᤛᤧᤖᤠᤱᤅᤧ᤹ᤏᤠ॥ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠ. ᤜᤧᤰᤁᤣᤛᤠᤱ ᤛᤡᤔᤠᤗᤡᤱᤎᤥᤀᤥ ᤁᤧᤖᤠᤱ ᤆᤢᤖᤠᤱᤅᤠᤱ ᤘᤠ᤹ᤀᤠ॥’

¹⁰ “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤢᤒᤣᤛᤠᤱ ᤐᤣᤃᤠᤱ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤠ᤺ᤴᤍᤧᤒᤠᤸᤗᤧ ᤆᤥᤃᤢᤸᤗᤧ ᤛᤧᤖᤢᤱ॥ ᤂᤢᤏᤧ᤹ ᤔᤧᤜᤡᤱᤏᤧᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ॥ ᤀᤠᤱᤃᤠ᤹ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥᤗᤠᤶ ᤋᤡᤆ᤺ᤴ ᤏᤢ ᤁᤢᤜᤢᤰᤁᤥᤗᤠᤶ ᤜᤢᤰᤐᤠ᤺ᤱᤃᤡ᤺ᤴ ᤗ᤺ᤳᤋᤢᤱ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ᤹ᤀᤥ ᤂᤠ ᤁ᤹ᤕᤥ ᤋᤠᤖᤢᤱᤅᤠᤱ ᤘᤠ᤹॥”

¹¹ ᤁᤴ ᤂᤧᤵᤛᤢᤀᤠᤱ ᤍᤠᤀᤢᤍᤖᤧ ᤁᤢᤍᤣ᤺ᤳᤋᤧᤴ ᤋᤧᤖᤧᤰ ᤌᤧ᤺ᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧᤀᤠᤱ ᤜᤠᤒᤠᤜᤧᤰᤁᤣ ᤔᤧᤈᤥᤃᤢ॥

¹² ᤜᤧᤰᤁᤩᤠᤱ ᤛᤠᤘᤗᤧᤴ. ᤂᤢᤏᤧ᤹ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴ. ᤂᤧᤶᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤛᤢᤘᤠᤱᤜᤠ᤹ ᤋᤠᤓᤣᤗᤠᤶ ᤔᤧᤛᤩᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤛᤱᤒᤣ᤹ᤔᤧᤴ ᤔᤧᤜᤡᤵᤋᤢᤖ ᤔᤧᤜᤠᤒᤧ. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤋ᤺ᤰᤏᤧᤳ ᤔᤧᤕᤢᤅᤧ॥

¹³ ᤜᤧᤰᤁᤩᤠᤱ ᤀᤡᤱᤄᤱ ᤁᤧᤍᤠ᤺ᤵᤐᤠ ᤂᤧᤴ ᤌᤠᤱᤒᤧᤴᤏᤡᤴ ᤍᤠᤀᤢᤍᤖᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤳᤋᤠᤗᤠᤶ ᤁᤧᤍᤩᤧᤒᤠ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤔᤠᤗᤧᤁᤡ. ᤂᤧᤏᤧ᤹ ᤁᤧᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤀᤠ॥”

¹⁴ ᤍᤠᤀᤢᤍᤖᤧ ᤂᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤴᤍᤢᤒᤠ ᤁᤢᤔᤏᤠᤴ ᤛᤧᤵᤔᤠᤖᤧ ᤗᤠᤃᤡ ᤜᤢᤰᤁᤣ᤺ᤵᤔᤠ ᤂᤧᤏᤧ᤹ ᤁᤧᤱᤃᤡᤛᤧᤶᤒᤡ᥅”

¹⁵ ᤜᤧᤰᤁᤣ᤺ᤸᤗᤧ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ᤀᤥ ᤗᤳᤇᤠ ᤌᤠᤱᤒᤧᤴ ᤔᤏᤠᤎᤡᤰ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤁᤴ ᤔᤏᤠᤴ ᤛᤧᤖᤧ᤹॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤜᤡᤵᤋᤢᤀᤠᤱ ᤛᤧᤖᤢ॥

¹⁶ ᤍᤠᤀᤢᤍᤖᤧ ᤂᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ. “ᤂᤧᤏᤧ᤹ ᤁᤧᤔᤠᤰᤂᤡᤴ ᤀᤠᤒᤠᤅᤣ ᤁᤧᤎᤣᤃᤣᤰ ᤛᤶᤎᤠᤱ ᤆᤢᤰᤗ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤛᤣᤃᤢᤒᤠ ᤁᤢᤔᤏᤠᤴ ᤛᤧᤖᤢᤱ’ ᤗ᤹ᤖᤡᤰ ᤀᤠᤒᤠᤅᤣ ᤁᤧᤶᤒᤪᤠ᤺ᤸᤗᤧ ᤁᤧᤒᤠ᤺ᤳᤋᤢᤀᤠᤱ ᤀᤠᤵᤋᤡᤰ ᤁᤧᤄᤥᤛᤢᤖᤥ॥”

ᤍᤠᤀᤢᤍᤖᤧ ᤛᤠᤘᤗᤧᤴ ᤏᤢ ᤈᤥᤏᤠᤌᤠᤏᤧᤴ ᤜᤠ᤺ᤵᤋᤢᤛᤡᤒᤠ

¹⁷ ᤂᤧᤴ ᤀᤣᤃᤠᤱ ᤛᤠᤘᤗᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤈᤥᤏᤠᤌᤠᤏᤖᤧ ᤂᤢᤴᤇᤡ᤹ ᤗᤠᤃᤡ ᤍᤠᤀᤢᤍᤧᤴ ᤀᤰᤂᤣᤗ᤹ᤖᤡᤰ ᤔᤧᤖᤡᤱ ᤌᤰᤋᤧ.

¹⁸ ᤜᤧᤰᤁᤩᤠᤱ ᤂᤢᤏᤧ᤹ ᤕᤜᤢᤍᤠᤒᤠ ᤔᤏᤠᤜᤠ᤹ ᤁᤴ “ᤗᤡ” ᤔᤧᤵᤔᤏᤠᤒᤠ ᤛᤠᤶᤗᤥᤴ ᤜᤢ᤹ᤖᤠᤶᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥ ᤁᤴ ᤛᤠᤶᤗᤥᤴ ᤕᤠᤛᤠᤖ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳᤗᤥ—

¹⁹ “ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠᤛᤣ. ᤀᤠᤏᤡ᤹ ᤂᤧᤶᤛᤡᤱᤔᤠ ᤀᤠᤏᤡ᤹ ᤗᤠᤶᤗᤥᤒᤠᤜᤠ᤹ ᤔᤧᤛᤧᤖᤢᤛᤡᤀᤠᤱ ᤔᤧᤏᤧᤖᤥ॥ ᤂᤧᤴ ᤐᤎᤢᤶ ᤁᤧᤎᤢᤶᤒᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤔᤧᤈᤥ᤺ᤴᤍᤧᤒᤣ᥄

²⁰ “ᤁᤴ ᤐᤠ᤺ᤴᤏᤡᤴ ᤃᤠᤋᤀᤥ ᤔᤧᤈᤧᤰᤋᤧᤶᤛᤡᤶᤔᤡᤴᤏᤧ᤹ᤀᤥ. ᤀᤛ᤻ᤁᤗᤥᤏᤒᤠ ᤔᤠᤖᤠᤶᤜᤠ᤹ᤀᤥ ᤁᤴ ᤐᤠ᤺ᤴᤏᤡᤴ ᤔᤧᤀᤡᤱᤛᤠᤶᤔᤡᤴᤏᤧ᤹ᤀᤥ. ᤁᤧᤀᤡᤱᤛᤢᤶᤏᤧᤓᤃᤪ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇ᤻ᤕᤠ ᤛᤠᤜᤠ᤹ ᤔᤧᤛ᤺ᤳᤗᤥ. ᤔᤣ᤺ᤴᤏᤧᤓᤃᤪ ᤜᤷᤍᤥ ᤔᤧᤴᤜᤧᤰᤁᤣᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇ᤻ᤕᤠ ᤛᤠᤜᤠ᤹ ᤔᤧᤀᤣ᤺ᤳᤗᤥ॥

²¹ “ᤃᤡᤸᤒᤥᤒᤠ ᤁᤥ᤺ᤰᤔᤠᤛᤣ. ᤂᤡᤏᤡ᤹ ᤛᤶᤎᤠᤱ ᤜᤡ᤺ᤰᤘᤠ ᤀᤡᤃᤪ ᤘᤜᤡᤳ ᤔᤧᤎᤠᤏᤧᤴᤗᤖᤥ. ᤂᤡᤏᤡ᤹ᤀᤥ ᤁᤢᤈᤠᤀᤣ ᤔᤧᤎᤥ᤺ᤰᤏᤧᤸᤗᤖᤥ॥ ᤌᤣᤀᤠᤱᤓᤧᤸᤗᤧ ᤐᤎᤢᤶ ᤁᤧᤎᤢᤶᤒᤠᤸᤗᤧ ᤁᤢᤎᤣ᤺ᤰᤛᤡᤱᤔᤠ ᤁᤢᤄᤥᤴ ᤁᤢᤏᤠᤔᤧᤴᤇᤠ᤹ ᤐᤥ᤺ᤰᤂᤧᤀᤠᤱ ᤂᤠᤶᤒᤠᤱᤅᤥ ᤏᤧᤃᤴᤗᤥ. ᤛᤠᤘᤗᤖᤧ ᤁᤢᤎᤣ᤺ᤰᤛᤡᤱᤔᤠ ᤁᤢᤄᤥᤴ ᤏᤡ᤺ᤱᤃᤣ᤹ ᤔᤣ᤺ᤴᤏᤣ ᤔᤧᤸᤗᤧᤰᤔᤏᤠᤒᤠ ᤐᤥ᤺ᤰᤂᤧᤖᤥ॥

²² ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤛᤱᤒᤣ᤹ᤔᤧᤴ ᤔᤧᤴᤍᤡ᤺ᤱᤅᤣ. ᤁᤧᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ ᤔᤧᤴᤏᤧ᤺ᤰᤁᤣ ᤈᤥᤏᤠᤌᤠᤏᤖᤧ ᤁᤢᤍᤥ᤺ᤱ ᤏᤢ ᤁᤢᤗᤡᤴ ᤀᤠᤓᤧᤸᤗᤧᤀᤠᤱ ᤀᤣᤃᤠᤱ ᤔᤧᤏᤢ᤺ᤰᤂᤧᤴᤗᤥ ᤛᤠᤘᤗᤖᤧ ᤁᤢᤍᤠᤓᤣᤴ ᤔᤠᤰᤂᤡ᤹ ᤔᤧᤴᤇᤧᤀᤣ ᤁᤢᤛᤢ᤺ᤵᤐᤥ ᤔᤧᤗᤠᤛᤧᤴᤗᤥ॥

²³ “ᤛᤠᤘᤗ ᤏᤢ ᤈᤥᤏᤠᤌᤠᤏᤧᤴ ᤁᤢᤜᤡᤱᤘᤧᤳ ᤘᤕᤧᤛᤡᤸᤗᤧ ᤏᤢᤒᤠ ᤏᤢ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤘᤕᤧᤛᤡᤖᤥ॥ ᤂᤧᤱᤜᤠ᤹ ᤜᤡᤱᤔᤠ ᤏᤢ ᤛᤡᤔᤠᤀᤥᤀᤠᤱ ᤔᤧᤛᤧᤴᤍᤧᤛᤡᤴᤗᤥ॥ ᤂᤧᤱᤜᤠ᤹ ᤁᤰᤁᤑᤡ᤺ᤰᤔᤠᤏᤢ᤺ᤸᤗᤧᤀᤠᤱ ᤁᤧᤈᤠᤵᤐᤠ ᤘᤕᤧᤛᤡ. ᤂᤡᤖᤡᤱᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤁᤧᤎᤢᤶᤒᤠ ᤘᤕᤧᤛᤡᤖᤥ॥

²⁴ “ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠ ᤔᤧᤴᤇ᤻ᤕᤠᤛᤣ. ᤛᤠᤘᤗᤖᤧ ᤁᤢᤗᤠᤃᤡ ᤜᤠᤒᤠᤶᤔᤧ᤹ᤀᤥ॥ ᤂᤢᤏᤧ᤹ᤀᤣ ᤁᤢᤜᤧ᤺ᤳᤗᤠ ᤏᤢ ᤐᤏᤢᤏᤢᤒᤠ ᤆᤠᤱ ᤁᤧᤈᤠᤰᤋᤡᤖᤥ. ᤂᤡᤏᤡ᤹ ᤆᤠᤱᤜᤠ᤹ᤃ ᤛᤠᤶᤔᤩᤠᤱ ᤑᤢᤱᤜᤠ᤹ᤖᤧ ᤌᤥ᤹ᤖᤢᤖᤥ॥

²⁵ “ᤁᤧᤎᤢᤶᤒᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤌᤱᤅᤥ ᤔᤧᤛᤩᤧᤒᤣ᥄ ᤂᤧᤱᤜᤠ᤹ᤃ ᤋᤧᤴᤎᤱᤅᤥ ᤔᤧᤛᤧᤖᤢᤛᤡᤖᤥ. ᤈᤥᤏᤠᤌᤠᤏᤧᤱᤃ ᤂᤡᤏᤡ᤹ ᤁᤥ᤺ᤰᤔᤠᤀᤥ ᤛᤩᤧᤀᤠᤱ ᤏᤧᤖᤥ॥

²⁶ “ᤈᤥᤏᤠᤌᤠᤏᤣ. ᤀᤠᤱᤃᤠ᤹ ᤀᤠᤴᤛᤠ᤹ᤀᤣ. ᤂᤧᤏᤧ᤹ ᤁᤧᤗᤠᤃᤡ ᤀᤠᤱᤃᤠ᤹ ᤜᤠ᤺ᤵᤐᤠᤖᤥ॥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤁᤧᤏᤢ᤹ᤒᤠ ᤏᤢ ᤐᤏᤢᤏᤢᤒᤠ ᤁᤧᤘᤕᤧᤖᤥ॥ ᤀᤠᤱᤃᤠ᤹ ᤀᤠᤗᤠᤃᤡ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤧᤴ ᤔᤧᤴᤇᤢᤔᤠᤖᤧ ᤗᤢᤱᤔᤠ᤹ ᤀᤠᤶᤜᤡ᤺ᤵᤐᤧᤴ ᤁᤧᤏᤠ᤺ᤶᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤘᤕᤧᤖᤥ॥

²⁷ “ᤐᤎᤢᤶ ᤁᤧᤎᤢᤶᤒᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤔᤧᤛᤩᤧᤒᤣ᥄ ᤌᤱ ᤆᤥ᤺ᤰᤔᤠ ᤑᤧᤈᤢᤶ ᤑᤧᤕᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤔᤧᤔᤧᤃᤧᤒᤣ॥”