᥈ ᤜᤠᤱ 9 - LIFOTNTᤕᤣᤜᤢᤴ ᤀᤡᤛᤪᤠᤀᤡᤗᤀᤥ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤔᤠ ᤔᤧᤒᤡᤖᤢ 1 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤛᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤛᤢᤶᤜᤠ᤹ᤀᤥᤒᤠ ᤌᤡᤰᤐᤠ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤁᤧᤓ᤹ᤀᤡᤴ ᤕᤢᤵᤛᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤴ ᤏᤡ᤺ᤱᤃᤣ᤹ ᤁᤧᤕᤠᤰᤐᤠ ᤐᤷᤕᤠᤔᤠᤴ ᤋᤣ᤹ᤖᤧᤀᤠᤱ ᤖᤠᤔᤥᤋ-ᤃᤡᤗᤠᤍᤀᤥ ᤐᤣᤃᤧ᤹॥ 2 ᤀᤠᤸᤗ ᤂᤧᤏᤧ᤹ ᤂᤧᤵᤔᤥ ᤁᤧᤃᤧᤳᤋᤡᤸᤗᤧ ᤏᤡᤶᤛᤡᤖᤧ ᤁᤢᤶᤔᤧᤴᤇᤠ᤹. ᤕᤜᤥᤛᤠᤐᤠᤋᤖᤧ ᤁᤢᤛ᤻ᤛᤠ ᤕᤣᤜᤢᤴ ᤁᤥ᤺ᤳᤋᤧ᤹॥ ᤂᤧᤏᤧ᤹ ᤂᤢᤏᤧ᤹ ᤘᤠ᤹ᤒᤠᤍᤧᤴᤏᤥ ᤐᤣᤃᤧ᤹. ᤂᤢᤏᤧ᤹ ᤁᤢᤈᤢᤶ ᤁᤢᤍᤣ᤺ᤱᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤀᤢ᤺ᤳᤋᤧ᤹ᤀᤠᤱ ᤛᤡᤃᤠᤱ ᤕᤠᤰᤑᤠᤱᤅᤥ ᤋᤣ᤹ᤖᤧ᤹॥ 3 ᤂᤧᤒᤩᤠᤱ ᤁᤴ ᤐᤷᤕᤠᤔᤥᤒᤠ ᤏᤡ᤺ᤱᤃᤣᤴ ᤂᤧᤸᤗᤧ ᤁᤢᤎᤧᤃᤣ᤺ᤰᤁᤥ ᤜᤢᤰᤂᤧ᤹ᤀᤠᤱ ᤀᤰᤋᤱᤒᤠ ᤀᤢᤘᤠ ᤆᤥᤃᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤐᤡᤏᤧᤖᤥ॥’ ᤂᤧᤒᤩᤠᤱ ᤗᤠᤶᤎᤣ᤺ᤳᤋᤡᤴ ᤜᤴᤍᤧ᤹ᤀᤠᤱ ᤂᤧᤳᤇᤡᤱᤅᤧ᤹. ᤐ᤺ᤴᤍ᤹ ᤐ᤺ᤴᤍ᤹ ᤔᤧᤛᤢᤛᤧᤴᤏᤧ᤹॥” 4 ᤁᤸᤗᤧᤆᤥᤃᤢᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤂᤧᤴ ᤌᤠᤱᤒᤧᤴᤏᤡᤴ ᤖᤠᤔᤥᤋ-ᤃᤡᤗᤠᤍ ᤐᤣ॥ 5 ᤀᤠᤸᤗ ᤂᤢᤏᤧ᤹ ᤂᤧᤵᤔᤥ ᤁᤧᤖᤧᤓᤧᤖᤧᤸᤗᤧ ᤂᤢᤏᤧ᤹ ᤌᤰᤛᤢᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤛᤥᤖᤡᤰ ᤔᤧᤈᤢᤵᤛᤧᤒᤠ ᤏᤢ ᤔᤧᤕᤢᤅᤧ ᤔᤧᤃᤖᤧᤒᤠ ᤋᤢᤔᤢᤛᤡ॥ ᤂᤢᤏᤧ᤹ ᤔᤧᤳᤋᤢᤛᤡ. “ᤛᤢᤜᤠᤱᤕᤢᤰᤐᤠᤀᤣ. ᤀᤠᤱᤃᤠ᤹ ᤂᤡᤏᤡ᤹ᤏᤢ ᤐᤠᤴ ᤐᤠ᤺ᤵᤔᤠ ᤌᤡᤰ ᤁᤳᤋᤢᤱ᤹॥” ᤕᤣᤜᤢ᤺ᤸᤗᤧ ᤛᤣ᤺ᤴᤍᤥᤛᤢ. “ᤀᤠᤏᤡᤃᤣ ᤗᤢᤶᤔᤥᤒᤠᤜᤠ᤹ᤀᤥ ᤜᤠ᤺ᤳᤏᤢᤃ᥅” ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠᤏᤢ. ᤛᤢᤜᤠᤱᤕᤢᤰᤐᤠᤀᤣ॥” 6 ᤕᤣᤜᤢᤴ ᤐᤥᤃᤧᤀᤠᤱ ᤜᤡᤶᤔᤥ ᤗᤠᤛᤧ॥ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤂᤢᤏᤧ᤹ ᤁᤢᤎᤧᤃᤣ᤺ᤰᤁᤥ ᤏᤡ᤺ᤱᤃᤣᤴ ᤜᤢᤰᤂᤢ ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤠᤱᤃᤠ᤹ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠ ᤀᤡᤛᤪᤠᤀᤡᤗᤀᤥ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤐᤡᤏᤧᤖᤥ॥ 7 ᤂᤧᤏᤧ᤹ ᤁᤧᤴᤍᤠᤱᤒᤠ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ ᤂᤠᤵᤐᤢᤌᤩ᤺ᤱ ᤁᤧᤔᤧᤰᤂᤢᤛᤡᤖ ᤐᤥᤱ᤹. ᤀᤡᤈᤣᤒᤣᤗᤖᤧ ᤛᤧᤖᤢᤛᤡᤒᤠ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹. ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤏᤢ᤺ᤰᤋᤢᤱ᤹॥ 8 ᤀᤠᤜᤠᤒᤖᤧ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ ᤔᤧᤔᤧᤰ॥ ᤀᤡᤛᤪᤠᤀᤡᤗᤀᤥ ᤂᤧᤸᤗᤧ ᤁᤢᤜᤡᤶᤛᤕᤱ ᤌᤰᤔᤠᤒᤠ ᤕᤧᤶᤒᤡᤳᤇᤠ. ᤕᤥᤰ ᤔᤣ᤺ᤶᤒᤠ ᤀᤡᤃᤪ ᤕᤥᤰ ᤀᤠᤳᤋᤡᤴᤇᤠᤱ ᤀᤠᤱᤃᤠ᤹ ᤔᤧᤰᤂᤢᤱᤛᤡᤱ᤹॥ 9 ᤀᤠᤱᤃᤠ᤹ ᤀᤠᤜᤠᤒᤖᤧ ᤁᤢᤜᤡᤶᤛᤱᤜᤠ᤹ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔ ᤏᤢ ᤀᤜᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤛᤠ᤺ᤸᤗᤧ ᤁᤢᤜᤡᤶᤛᤕᤱ ᤁᤢᤀᤡᤛᤡᤰ ᤆᤥᤃᤢᤱᤛᤡᤱ᤹॥ 10 ᤀᤡᤈᤣᤒᤣᤗᤧᤴ ᤕᤡᤈᤖᤣᤗᤒᤠ ᤗᤳᤇᤠ ᤋᤧᤴᤏᤥ ᤁᤥ᤺ᤳᤆᤥᤜᤠ᤹ᤖᤧ ᤜᤠᤒᤠᤰ ᤜᤠᤒᤠᤰ ᤔᤧᤒᤠᤰᤋᤢ᤹. ᤜᤧᤰᤁᤩᤠᤱ ᤂᤧᤴ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤸᤗᤢᤵᤋᤢᤴ᤹॥’” ᤂᤧᤴ ᤀᤣᤃᤠᤱ ᤂᤢᤏᤧ᤹ ᤗᤠᤶᤎᤣ᤺ᤳᤋᤧᤴ ᤜᤴᤍᤢᤀᤠᤱ ᤗᤥ᤺ᤰᤋᤧᤄᤧᤖᤧ॥ 11 ᤀᤠᤸᤗ ᤕᤣᤜᤢᤴ ᤕᤠᤶᤔᤥ ᤌᤰᤛᤢᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤀᤥ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤋᤩᤧ᤺ᤸᤗᤧ ᤂᤧᤱᤜᤠ᤹ᤀᤥᤒᤠ ᤗᤳᤇᤠᤖᤧ ᤂᤢᤏᤧ᤹ ᤛᤣ᤺ᤴᤗᤠᤵᤋᤢ. “ᤌᤣ ᤁᤧᤖᤧᤰ ᤏᤢᤒᤠᤀᤣ ᤘᤠ᤹ᤒᤡ᥅ ᤂᤧᤴ ᤁᤧᤏᤠᤱᤒᤠ ᤔᤏᤠᤴ ᤌᤣᤀᤠᤱ ᤂᤧᤏᤧ᤹ᤀᤥ ᤋᤩᤧᤒᤠᤖᤧᤳᤇ᥅” ᤕᤣᤜᤢ᤺ᤸᤗᤧ ᤏᤢᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤂᤧᤴ ᤔᤏᤠᤴ ᤁᤢᤛᤣ᤺ᤴ ᤁᤧᤏᤡᤛᤢᤶ᤹. ᤜᤧᤰᤁᤩᤠᤱ ᤂᤧᤸᤗᤧ ᤐᤠ᤺ᤳᤋᤢ᤹ ᤂᤧᤱᤃ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱᤅᤣ ᤘᤠ᤹॥” 12 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤴ ᤐᤠ᤺ᤴᤏᤡᤴ ᤛᤧᤰᤂᤠ ᤔᤣ᤺ᤴ. ᤁᤢᤍᤥ᤺ᤵᤔᤠ ᤐᤠᤴ ᤀᤠᤏᤡᤃᤣ ᤀᤠᤈᤧᤰᤋᤧ᤹॥” ᤕᤣᤜᤢ᤺ᤸᤗᤧ ᤔᤧᤳᤋᤢᤛᤡ. “ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱᤒᤠ ᤐᤠ᤺ᤴᤏᤡᤴ. ᤜᤠᤒᤠ ᤁᤴᤗᤥ—‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤂᤧᤏᤧ᤹ ᤀᤡᤛᤪᤠᤀᤡᤗᤀᤥ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤐᤡᤏᤧᤖᤥ॥’” 13 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤡᤔᤥ ᤂᤢᤴᤇᤡ᤹ ᤗᤠᤁᤠᤳᤐᤠ ᤆᤠᤱᤜᤠ᤹ ᤔᤧᤓᤧᤴᤍᤢᤀᤠᤱ ᤏᤠᤜᤠᤱᤛᤣ᤺ᤰᤁᤥᤒᤠ ᤗᤢᤱᤜᤠ᤹ᤀᤥ ᤂᤢᤏᤧ᤹ ᤗᤠᤱᤄᤣ᤺ᤰᤔᤠᤖᤧ ᤗᤠᤃᤡ ᤔᤧᤓᤧᤛᤢ ᤔᤧᤏᤧᤛ᤻ᤛᤢ॥ ᤜᤶᤓᤩᤠᤱ ᤂᤧᤱᤜᤠ᤹ᤖᤧ ᤌᤢᤳᤋᤢᤖᤡ᤺ᤵᤐᤠ ᤛᤠᤍᤠᤱᤅᤡᤴ ᤔᤧᤔᤢ᤺ᤳᤋᤢᤀᤠᤱ ᤔᤧᤀ᤺ᤰᤋᤧᤀᤠᤱ ᤔᤧᤒᤠ᤺ᤳᤋᤢ. “ᤕᤣᤜᤢᤴ ᤜᤠᤱᤗᤥ᥄” ᤀᤡᤛᤪᤠᤀᤡᤗᤒᤠ ᤕᤥᤖᤠᤔ ᤜᤠᤱᤅᤡᤴ ᤔᤧᤛᤧᤖᤢ 14 ᤁᤸᤗᤧᤆᤥᤃᤢᤸᤗᤧ ᤏᤡᤶᤛᤡᤖᤧ ᤁᤢᤶᤔᤧᤴᤇᤠ᤹. ᤕᤜᤥᤛᤠᤐᤠᤋᤖᤧ ᤁᤢᤛ᤻ᤛᤠ ᤕᤣᤜᤢ᤺ᤸᤗᤧ ᤕᤥᤖᤠᤔᤖᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤆᤥᤃᤢ॥ ᤀᤠᤸᤗ ᤕᤥᤖᤠᤔ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤖᤧ ᤁᤢᤍᤰᤗᤧᤱᤘᤠᤀᤥ ᤖᤠᤔᤥᤋ-ᤃᤡᤗᤠᤍᤧᤴ ᤔᤧᤛᤧ᤺ᤵᤋᤢᤖ ᤔᤧᤕᤠᤃᤧ. 15 ᤁᤖ ᤕᤥᤖᤠᤔ ᤜᤠᤱᤅᤡᤴᤃ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤌᤰᤋᤧᤸᤗᤧ ᤀᤖᤠᤔᤡᤜᤠ᤹ᤖᤧ ᤂᤢᤏᤧ᤹ ᤔᤧᤄᤠ᤺ᤴᤍᤢᤒᤠ ᤕᤠᤱᤄᤣ᤺ᤰᤁᤥᤗᤠᤶ ᤘᤣ᤺ᤵᤔᤠᤖᤧ ᤗᤠᤃᤡ ᤕᤡᤈᤖᤣᤗ ᤐᤣᤀᤠᤱ ᤘᤕᤧ॥ ᤕᤣᤜᤢ᤺ᤸᤗᤧ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤰᤋᤱᤒᤠᤀᤣ ᤏᤡᤱᤘᤠ᤹ ᤁᤧᤃᤳᤋᤢᤶᤏᤧᤓᤃᤪ. ᤕᤡᤈᤖᤣᤗᤀᤥ ᤁᤴ ᤀᤡᤱᤄᤱᤅᤡᤴ ᤁᤧᤵᤔᤠᤖᤧ ᤗᤠᤃᤡ ᤕᤧᤰᤕᤰᤁᤥᤗᤠᤶ ᤜᤠ᤺ᤳᤋᤠᤱ ᤂᤧᤳᤇᤡᤱᤔᤠ ᤔᤧᤄᤥᤏᤧᤴᤗᤖᤥ॥” 16 ᤂᤧᤒᤩᤠᤱ ᤂᤢᤏᤧ᤹ ᤁᤢᤀᤴᤗᤠᤎᤠᤴ ᤕᤢᤰᤋᤢᤀᤠᤱ ᤕᤡᤈᤖᤣᤗ ᤐᤣ. ᤌᤣᤀᤠᤱᤓᤧᤸᤗᤧ ᤕᤥᤖᤠᤔᤧᤴ ᤂᤧᤵᤔᤥ ᤏᤠ᤺ᤶᤛᤡᤱᤗ ᤘᤕᤧ. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤜᤠᤱ ᤀᤜᤈᤩᤠᤜᤴ ᤂᤢᤏᤧ᤹ ᤋᤢᤶᤔᤠᤖᤧ ᤗᤠᤃᤡ ᤂᤧᤵᤔᤥ ᤌᤠᤛᤡᤱ ᤕᤧᤀᤠᤱ ᤘᤕᤧ॥ 17 ᤀᤠᤸᤗ ᤕᤡᤈᤖᤣᤗᤒᤠ ᤆᤱᤜᤡᤶᤔᤥ ᤁᤧᤕᤧᤵᤐᤠᤃᤧᤃᤶᤒᤠ ᤀᤡᤰᤁᤧᤃᤥᤒᤧᤸᤗᤧ ᤕᤣᤜᤢ᤺ᤸᤗᤧ ᤁᤢᤎᤰᤛᤢᤒᤠᤜᤠ᤹ ᤔᤧᤕᤧᤖ ᤔᤧᤒᤳᤇᤧᤒᤠ ᤏᤡᤛᤢᤛᤡ. ᤂᤧᤒᤩᤠᤱ ᤂᤢᤏᤧ᤹ ᤀ᤺ᤰᤋᤧᤀᤠᤱ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤁᤢᤓᤠ ᤌᤰᤛᤢᤒᤠᤜᤠ᤹ ᤔᤧᤕᤢᤖ ᤔᤧᤒᤵᤐᤠ ᤏᤡᤛᤢᤱᤛᤡᤱᤗᤥ॥” ᤕᤥᤖᤠᤔᤖᤧ ᤀᤡᤱᤈᤠᤱ ᤐᤡᤖᤢᤀᤠᤱ ᤔᤧᤳᤋᤢ. “ᤀᤴᤃᤧᤕᤢᤰᤐᤠ ᤌᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤐᤠᤱᤄᤧᤍᤣᤛᤧ᤹ᤀᤠᤱ ᤛᤣ᤺ᤴᤍᤥᤛᤢᤛᤡᤖ ᤕᤠ᤺ᤴᤍᤧ᤹. ‘ᤌᤣ ᤀᤠᤍᤠᤱᤒᤠᤛᤡ ᤋᤱᤔᤠᤖᤧ ᤗᤠᤃᤡ ᤁᤧᤕᤧ᤹ᤀᤡᤒᤠᤒᤡ᥅’” 18 ᤂᤧᤴ ᤀᤴᤃᤧᤕᤢᤰᤐᤧᤴ ᤕᤣᤜᤢ᤺ᤸᤗᤧ ᤁᤢᤍᤢᤶᤛᤧ ᤐᤣᤀᤠᤱ ᤔᤧᤳᤋᤢ. “ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤌᤣ ᤀᤠᤍᤠᤱᤒᤠ ᤋᤱᤔᤠᤖᤧ ᤗᤠᤃᤡ ᤁᤧᤕᤧᤒᤠᤒᤡ᥅’” ᤕᤣᤜᤢ᤺ᤸᤗᤧ ᤏᤢᤃᤵ ᤐᤡᤖᤢ. “ᤋᤱᤔᤠᤖᤧ ᤗᤠᤃᤡᤔᤢᤀᤣ. ᤂᤧᤏᤧ᤹ ᤁᤧᤎᤣ ᤛᤰᤛᤰᤐᤣ᥅ ᤂᤧᤏᤧ᤹ ᤀᤠᤱᤃᤠ᤹ ᤀᤠᤀᤣᤃᤠᤱ ᤋᤡᤶᤍᤠᤱᤅᤧ᤹॥” ᤂᤧᤴ ᤀᤡᤰᤁᤧᤃᤥᤒᤧᤸᤗᤧ ᤜᤠᤱᤅᤡᤴ ᤔᤧᤳᤋᤢ. “ᤂᤧᤴ ᤀᤡᤱᤛᤠᤒᤧᤸᤗᤧ ᤂᤧᤱᤜᤠ᤹ ᤋᤢᤶᤔᤠᤃ ᤋᤢᤔᤢᤛᤡ. ᤁᤖ ᤂᤧᤴ ᤕᤠᤱᤏᤠ ᤔᤧᤏᤢ᤺ᤰᤂᤧᤴ ᤔᤧᤓᤧᤖᤧᤴᤗᤥ॥” 19 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤘᤣ᤹ ᤀᤴᤃᤧᤕᤢᤰᤐᤠ ᤌᤡᤰ ᤐᤠᤱᤄᤢᤍᤣᤛᤢ॥ ᤀᤠᤸᤗ ᤂᤢᤏᤧ᤹ ᤂᤧᤱᤜᤠ᤹ᤖᤧᤀᤥ ᤁᤧᤖᤧᤀᤠᤱ ᤔᤧᤳᤋᤢᤛᤡ. “ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤌᤣ ᤀᤠᤍᤠᤱᤒᤠᤛᤡ ᤋᤱᤔᤠᤖᤧ ᤗᤠᤃᤡ ᤁᤧᤕᤧ᤹ᤀᤡᤒᤠᤒᤡ᥅’” ᤕᤣᤜᤢ᤺ᤸᤗᤧ ᤏᤢᤃᤵ ᤐᤡᤖᤢ. “ᤋᤱᤔᤠᤖᤧ ᤗᤠᤃᤡᤔᤢᤀᤣ. ᤂᤧᤏᤧ᤹ ᤁᤧᤎᤣ ᤛᤰᤛᤰᤐᤣ᥅ ᤂᤧᤏᤧ᤹ ᤀᤠᤱᤃᤠ᤹ ᤀᤠᤀᤣᤃᤠᤱ ᤋᤡᤶᤍᤠᤱᤅᤧ᤹॥” 20 ᤂᤧᤴ ᤀᤡᤰᤁᤧᤃᤥᤒᤧᤸᤗᤧ ᤔᤧᤳᤋᤢᤛᤡ. “ᤂᤧᤴ ᤀᤡᤱᤛᤠᤒᤧᤸᤗᤧ ᤂᤧᤱᤜᤠ᤹ ᤋᤢᤶᤔᤠᤃ ᤋᤢᤔᤢᤛᤡ. ᤁᤖ ᤂᤧᤴ ᤕᤠᤱᤏᤠ ᤔᤧᤏᤢ᤺ᤰᤂᤧᤴ ᤔᤧᤓᤧᤖᤧᤴᤗᤥ॥ ᤂᤧᤴ ᤀᤴᤗᤠᤎᤠ ᤗᤥᤱᤔᤧᤱᤃ ᤏᤡᤶᤛᤡᤖᤧ ᤁᤢᤛ᤻ᤛᤠ ᤕᤣᤜᤢ᤺ᤸᤗᤧ ᤗᤥ᤺ᤰᤂᤢᤒᤠ ᤜᤧᤰᤁᤣ ᤗ᤹॥ ᤂᤧᤸᤗᤧ ᤁᤧᤏᤠᤱᤒᤠ ᤁᤢᤀᤡᤛᤡᤰ ᤗᤥ᤺ᤰᤂᤢ᤹॥” 21 ᤕᤥᤖᤠᤔᤖᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤀᤴᤗᤠᤎᤠᤴ ᤕᤠᤖᤡᤵ ᤆᤥᤃᤧᤶᤔᤧ᤹॥” ᤀᤠᤸᤗ ᤂᤧᤱᤜᤠ᤹ᤖᤧ ᤂᤧᤴ ᤕᤠᤖᤡᤵ ᤔᤧᤈᤥᤃᤢ. ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤥᤖᤠᤔ ᤏᤢ ᤕᤜᤢᤍᤠᤒᤠ ᤜᤠᤱ ᤀᤜᤈᤩᤠᤜᤴ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤀᤴᤗᤠᤎᤠᤜᤠ᤹ ᤕᤢᤰᤋᤢᤛᤡᤀᤠᤱ ᤕᤣᤜᤢ᤺ᤸᤗᤧ ᤁᤢᤍᤢᤶᤛᤧ ᤐᤣᤛᤧᤳᤇᤡ॥ ᤂᤧᤴ ᤏᤧᤵᤑᤢᤖᤧ ᤂᤢᤏᤧ᤹ ᤕᤡᤈᤖᤣᤗᤡ ᤏᤠᤒᤥᤋᤖᤧ ᤁᤢᤗᤠᤈᤣ᤹ ᤗᤰᤁᤥᤀᤣ ᤋᤢᤔᤧᤳᤇᤢ॥ 22 ᤀᤠᤸᤗ ᤕᤥᤖᤠᤔᤖᤧ ᤕᤣᤜᤢᤴ ᤏᤡᤛᤢᤀᤠᤱ ᤂᤢᤏᤧ᤹ ᤂᤧᤴ ᤛᤣ᤺ᤴᤗᤠᤵᤋᤢ. “ᤕᤣᤜᤢᤀᤣ. ᤌᤣ ᤂᤧᤏᤧ᤹ ᤋᤱᤔᤠᤖᤧ ᤗᤠᤃᤡ ᤁᤧᤕᤧᤒᤠᤒᤡ᥅” ᤕᤣᤜᤢ᤺ᤸᤗᤧ ᤏᤢᤃᤵ ᤐᤡᤖᤢ. “ᤁᤧᤶᤔᤠ ᤀᤡᤈᤒᤣᤗᤖᤧ ᤁᤧᤖᤧᤰ ᤁᤢᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤵᤔᤠ ᤏᤢ ᤁᤧᤖᤧᤰ ᤁᤢᤃᤡᤳᤆᤠᤰ ᤆᤥ᤺ᤰᤔᤠᤜᤠ᤹ ᤘᤠ᤹ᤀᤡᤸᤗᤧ ᤌᤣ᤺ᤸᤗᤧ ᤋᤱᤔᤠᤖᤧ ᤗᤠᤃᤡᤒᤣ᥅” 23 ᤕᤥᤖᤠᤔᤖᤧ ᤁᤢᤀᤴᤗᤠᤎᤠᤴ ᤜᤡᤛᤢᤀᤠᤱ ᤀᤜᤈᤩᤠᤜᤴ ᤀᤰᤂᤣ ᤔᤧᤳᤋᤢᤖ ᤂᤧᤳᤇᤡᤱ. “ᤀᤜᤈᤩᤠᤜᤀᤣ. ᤆᤧᤶᤓᤴ ᤐᤥ᤺ᤰᤂᤧᤖᤧᤳᤇ᥄” 24 ᤂᤧᤒᤩᤠᤱ ᤕᤣᤜᤢ᤺ᤸᤗᤧ ᤂᤢᤏᤧ᤹ ᤁᤢᤗᤡᤴ ᤂᤡᤱᤄᤡᤱ ᤗᤧ᤹ᤖᤢᤀᤠᤱ ᤕᤥᤖᤠᤔᤧᤸᤗᤧ ᤁᤢᤓᤰᤋᤠᤱᤜᤠ᤹ᤖᤧ ᤁᤢᤗᤢᤶᤔᤥ ᤀᤠᤒᤢ॥ ᤂᤧᤴ ᤋᤥ᤺ᤱᤅᤡᤸᤗᤧ ᤂᤢᤏᤧ᤹ ᤁᤢᤗᤢᤱᤔᤧᤴ ᤑᤩᤠᤰ ᤗᤛ᤻ᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤴᤗᤠᤎᤠᤀᤥᤀᤣ ᤜᤷᤈᤢ᤹ ᤆᤥ᤺ᤴᤍᤧ॥ 25 ᤂᤧᤒᤩᤠᤱ ᤕᤣᤜᤢ᤺ᤸᤗᤧ ᤀᤴᤗᤠᤎᤠᤒᤠ ᤛᤢᤜᤠᤱᤕᤢᤰᤐᤠ ᤒᤡᤍᤁᤠᤖᤧᤴ ᤔᤧᤳᤋᤢ. “ᤂᤧᤴ ᤐᤰᤂᤧ᤹ᤀᤠᤱ ᤕᤡᤈᤖᤣᤗᤡ ᤏᤠᤒᤥᤋᤖᤧ ᤁᤢᤗᤠᤈᤣ᤹ ᤗᤰᤁᤥ ᤗᤠᤵᤐᤢᤱᤍᤣᤛᤧ᤹॥ ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤂᤧᤸᤗᤧ ᤁᤢᤶᤒᤠ ᤀᤠᤜᤠᤒᤖᤧ ᤁᤢᤀᤣᤃᤠᤱ ᤛᤥᤛᤥᤖᤡᤰ ᤀᤴᤗᤠᤎᤠᤜᤠ᤹ᤀᤥ ᤀᤠᤒᤣᤛᤧᤳᤇᤡᤸᤗᤧ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤐᤠ᤺ᤳᤋᤢᤀᤠᤱ ᤘᤕᤧ. ᤂᤧᤴ ᤂᤧᤏᤧ᤹ ᤁᤧᤏᤡᤱᤘᤠ᤹ ᤕᤠᤰᤗᤠ᤹ᤒᤠ. 26 ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢ᤹. ᤀᤠᤱᤃᤠ᤹ ᤀᤠᤴᤇᤧᤴ ᤏᤠᤒᤥᤋᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤴ ᤏᤡᤛᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤧᤰᤂᤠᤀᤣ ᤂᤧᤏᤧ᤹ ᤀᤠᤶᤓᤠ ᤁᤴ ᤗᤠᤈᤣ᤹ ᤗᤰᤁᤥ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤏᤧ॥’ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱ ᤁᤢᤀᤡᤛᤡᤰ ᤂᤧᤴ ᤐᤰᤂᤧ᤹ᤀᤠᤱ ᤜᤠᤒᤠ ᤁᤴ ᤗᤠᤈᤣ᤹ ᤗᤰᤁᤥ ᤗᤠᤵᤑᤣᤛᤧ᤹॥” ᤕᤜᤢᤍᤠᤒᤠ ᤜᤠᤱ ᤀᤜᤈᤩᤠᤜᤴ ᤔᤧᤛᤩᤧᤖᤢ᤹ 27 ᤀᤠᤸᤗ ᤕᤜᤢᤍᤠᤒᤠ ᤜᤠᤱ ᤀᤜᤈᤩᤠᤜ᤺ᤸᤗᤧ ᤁᤴ ᤏᤡᤛᤢ. ᤂᤧᤒᤩᤠᤱ ᤂᤢᤏᤧ᤹ ᤒᤣᤌ-ᤜᤠᤃᤠᤏ ᤐᤣ᤺ᤰᤔᤠ ᤗᤠᤶ ᤐᤥ᤺ᤰᤂᤧᤀᤠᤱ ᤂᤧᤳᤇᤡᤱ॥ ᤕᤣᤜᤢ᤺ᤸᤗᤧ ᤂᤢᤏᤧ᤹ ᤏᤡᤛᤢᤀᤠᤱ ᤏᤠ᤺ᤳᤋᤢᤖ ᤀ᤺ᤰᤋᤧᤀᤠᤱ ᤔᤧᤳᤋᤢᤛᤡ. “ᤂᤧᤴᤏᤠᤱ ᤛᤧᤖᤧᤶᤔᤧ᤹᥄” ᤂᤧᤱᤜᤠ᤹ᤖᤧ ᤂᤢᤏᤧ᤹ ᤕᤡᤒᤗᤠᤔ ᤁᤢᤒᤣᤛᤠᤱ ᤃᤢᤖᤒᤠ ᤌᤠᤶᤔᤠᤱ ᤁᤧᤒᤣ᤺ᤰᤐᤠ ᤗᤠᤶᤔᤥ ᤂᤢᤏᤧ᤹ ᤀᤴᤗᤠᤎᤠᤀᤥᤀᤣ ᤔᤧᤄᤠ᤺ᤴᤍᤢ. ᤁᤖ ᤂᤢᤏᤧ᤹ ᤂᤧᤳᤇᤡᤱᤅᤠᤱ ᤔᤃᤡᤍ᤻ᤍᤥ ᤐᤣ. ᤜᤧᤰᤁᤩᤠᤱ ᤂᤧᤵᤔᤥᤀᤣ ᤛᤩᤧ॥ 28 ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤈᤣᤴ ᤀᤴᤗᤠᤎᤠᤀᤥᤗᤠᤶ ᤕᤖᤢᤛᤗᤧ᤺ᤶᤔᤥ ᤔᤧᤎᤠᤰᤋᤢᤀᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤂᤧᤸᤗᤧ ᤁᤢᤛᤢᤎᤧᤒᤠ ᤁᤢᤎᤠ᤺ᤰᤌᤧᤒᤠᤜᤠ᤹ᤏᤢ ᤂᤢᤏᤧ᤹ ᤁᤢᤀᤡᤐᤢᤱᤅᤥ ᤔᤧᤈᤡᤰᤂᤢ॥ 29 (ᤀᤠᤜᤠᤒᤖᤧ ᤁᤢᤛ᤻ᤛᤠ ᤕᤥᤖᤠᤔᤖᤧ ᤁᤢᤜᤠᤱᤕᤢᤰ ᤕᤧᤶ ᤌᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤀᤜᤈᤩᤠᤜᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤖᤥ॥) ᤀᤡᤈᤣᤒᤣᤗ ᤜᤠᤱᤔᤠᤴ ᤔᤧᤛᤧᤖᤢ 30 ᤂᤧᤒᤩᤠᤱ ᤕᤣᤜᤢᤴ ᤕᤡᤈᤖᤣᤗ ᤌᤠᤛᤡᤱ॥ ᤌᤣᤎᤣ ᤐᤥ᤺ᤰᤂᤧᤀᤠᤱ ᤘᤕᤧ ᤂᤧᤴ ᤀᤡᤈᤣᤒᤣᤗᤖᤧ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤁᤢᤔᤡᤰᤜᤠ᤹ᤀᤥ ᤔᤠᤰᤛᤢ᤺ᤴᤍᤠ ᤆᤠ᤺ᤴᤍᤢ. ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤁᤡᤴ ᤑᤕᤢᤀᤠᤱ ᤗᤳᤇᤠ ᤐᤣᤎᤠ᤺ᤵᤐᤥᤗᤠᤶ ᤗᤠ᤺ᤰᤁᤠᤳ ᤀᤥᤔᤕᤧ॥ 31 ᤀᤠᤸᤗ ᤕᤣᤜᤢᤴ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤛᤡᤃᤠᤱ ᤗᤠᤛᤧᤸᤗᤧ ᤀᤡᤈᤒᤣᤗᤖᤧ ᤛᤣ᤺ᤴᤍᤥᤛᤢ. “ᤀᤠᤵᤑᤣᤰ ᤁᤢᤴᤍᤠᤱᤒᤠ ᤁᤧᤛᤧᤵᤐᤠ ᤈᤡᤔᤪᤡᤀᤣ. ᤌᤣ ᤂᤧᤏᤧ᤹ ᤋᤱᤔᤠᤖᤧ ᤗᤠᤃᤡ ᤁᤧᤕᤧᤒᤠᤒᤡ᥅” 32 ᤕᤣᤜᤢᤴ ᤌᤠ᤺ᤱ ᤐᤣᤎᤠ᤺ᤵᤐᤥ ᤗᤧᤵᤔᤠᤱ ᤀᤥᤔᤢᤕᤧᤀᤠᤱ ᤀ᤺ᤰᤋᤧᤖ ᤐᤠ᤺ᤳᤋᤢ. “ᤀᤠᤱᤃᤠ᤹ ᤗᤧᤵᤔᤠᤱ ᤜᤠᤳ ᤘᤠ᤹ᤒᤣ᥅ ᤜᤠᤳ ᤘᤠ᤹ᤒᤣ᥅” ᤂᤧᤒᤩᤠᤱ ᤏᤧᤳᤇᤡ ᤛᤢᤶᤛᤡ ᤛᤡᤱᤃᤠᤖᤢᤜᤠ᤹ᤖᤧ ᤗᤠ᤺ᤰᤁᤠᤳ ᤂᤢᤏᤧ᤹ ᤗᤧᤵᤔᤠᤱ ᤀᤥᤔᤧᤔᤧᤳᤋᤢ॥ 33 ᤂᤢᤏᤧ᤹ ᤔᤧᤳᤋᤢᤛᤡ. “ᤂᤧᤴ ᤔᤧᤴᤇᤢᤔᤠᤴ ᤔᤢ ᤗᤠᤵᤑᤢᤛᤧᤶ ᤕᤢᤛᤧᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤴ ᤔᤢ ᤗᤠᤵᤔᤧᤓᤢᤛᤢ ᤔᤧᤕᤢᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤓᤠ ᤁᤢᤔᤠᤰᤂᤡ᤹ᤜᤠ᤹ ᤛᤧᤖᤧᤀᤠᤱ ᤗᤢᤱᤎᤠᤰᤁᤥ ᤏᤢ ᤂᤢᤏᤧ᤹ ᤆᤡᤖᤠᤰ ᤆᤡᤖᤠᤰ ᤁᤧᤗᤠ᤺ᤰᤐᤠ ᤀᤴᤜᤠ᤹ ᤐᤡᤳᤋᤢᤛᤡ॥ 34 ᤂᤧᤒᤩᤠᤱ ᤕᤣᤜᤢᤴ ᤜᤠᤱᤜᤡᤶᤔᤥ ᤗᤠᤛᤧᤀᤠᤱ ᤁᤢᤈᤠ ᤆ ᤌᤢᤅᤢ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤔᤠᤱᤍᤣ ᤛᤠᤱᤃᤪᤠ᤺ᤸᤗᤧ ᤋᤧᤳᤋᤢᤔᤠ ᤁᤴ ᤔᤧᤴᤇᤢᤔᤠᤴ ᤏᤢᤖᤡᤰ ᤐᤰᤂᤧᤶ ᤋᤣ᤹ᤖᤧᤶᤔᤧ᤹ᤀᤠᤱ ᤗᤢᤵᤋᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤆᤩᤠ ᤐᤥ᤺ᤰᤂᤧᤛᤠᤱ ᤁᤴ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥” 35 ᤁᤖ ᤀᤠᤸᤗ ᤂᤧᤱᤜᤠ᤹ ᤂᤢᤏᤧ᤹ ᤗᤢᤵᤔᤠᤖᤧ ᤗᤠᤃᤡ ᤕᤥ ᤔᤧᤒᤣ᤺ᤸᤗᤧ ᤂᤧᤸᤗᤧ ᤁᤢᤔᤡᤰᤂᤥᤰ. ᤁᤢᤗᤠᤱᤜᤠ᤹ ᤏᤢ ᤁᤢᤜᤢᤰᤜᤠ᤹ᤖᤰ ᤔᤧᤄᤥᤛᤢ ᤘᤣ᤹ ᤌᤣᤀᤠᤱ ᤔᤧᤱᤄᤥᤛᤢᤴ॥ 36 ᤂᤧᤱᤜᤠ᤹ ᤔᤧᤏᤢ᤺ᤰᤂᤧ ᤔᤧᤎᤠᤅᤧᤀᤠᤱ ᤕᤣᤜᤢᤴ ᤔᤧᤈᤧᤰᤋᤢ॥ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤋᤡᤛ᤻ᤒᤡ ᤀᤣᤗᤡᤕᤠᤗᤠᤶ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤀᤡᤱᤄᤱᤅᤡᤴ ᤜᤠᤒᤠ ᤁᤴ ᤘᤕᤧᤖᤥ. ᤕᤡᤈᤖᤣᤗᤒᤠ ᤂᤧᤴ ᤗᤠᤈᤣ᤹ ᤗᤰᤁᤥ ᤀᤡᤈᤣᤒᤣᤗᤖᤧ ᤁᤢᤏᤧᤰᤛᤠᤴ ᤂᤩᤠᤒᤠᤜᤠ᤹ᤖᤧ ᤔᤧᤒᤠᤰᤋᤢ᤹॥ 37 ᤀᤡᤈᤣᤒᤣᤗᤖᤧ ᤁᤢᤈᤣᤴ ᤕᤡᤈᤖᤣᤗᤒᤠ ᤜᤠᤒᤠ ᤂᤧᤴ ᤗᤠᤈᤣ᤹ ᤗᤰᤁᤥ ᤌᤰᤛᤠ ᤜᤡ ᤁᤢᤀᤡᤛᤡᤰ ᤏᤧᤈᤠᤖᤥ. ᤜᤧᤰᤁᤣᤗ᤹ᤖᤡᤰ ‘ᤁᤴ ᤀᤡᤈᤣᤒᤣᤗᤖᤧ ᤁᤢᤈᤣ’ ᤑᤠ᤹ᤀᤠᤱ ᤜᤠ᤺ᤳᤗᤧᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴᤗᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.