᥈ ᤜᤠᤱ 8 - LIFOTNTᤛᤢᤏᤶᤔᤡ ᤔᤧᤴᤇᤢᤔᤠᤴ ᤏᤢ᤺ᤰᤂᤧᤍᤩᤧ 1 ᤀᤠᤸᤗ ᤀᤠᤳᤋᤡᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤴ ᤀᤣᤗᤡᤛᤠ᤺ᤸᤗᤧ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤀᤠᤱ ᤘᤕᤧ. ᤂᤧᤴ ᤔᤧᤴᤇᤢᤔᤠᤴ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤡᤶᤛᤕᤱᤜᤠ᤹ᤏᤢ ᤛᤥᤖᤡᤰ ᤁᤵᤔᤥᤗᤠᤶ ᤐᤣᤃᤧᤄᤧᤖᤧ᤹. ᤜᤧᤰᤁᤩᤠᤱ ᤁᤢᤓᤠ ᤕᤧᤶ ᤀᤠᤳᤋᤡ ᤐᤥᤱ᤹ ᤜᤠᤒᤠ ᤂᤧᤵᤔᤥ ᤕᤢᤅᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤋᤱᤒᤣ ᤏᤢᤛᤡ ᤌᤠᤖᤡᤰ ᤛᤠᤰ ᤐᤥ᤺ᤰᤔᤠ ᤀᤡᤱᤈᤠᤱ ᤆᤥᤃᤢᤀᤠᤱ ᤘᤠ᤹॥” 2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤆᤥᤃᤢ॥ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ᤏᤢ ᤛᤥᤖᤡᤰ ᤐᤣᤄᤧᤖᤧ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤋᤱᤒᤣ ᤏᤢᤛᤡ ᤕᤢᤅᤧ॥ 3 ᤋᤱᤒᤣ ᤏᤢᤛᤡ ᤁᤢᤏᤢᤵᤔᤥ ᤂᤢᤏᤧ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤗᤠᤶ ᤏᤢ᤺ᤰᤂᤧ ᤌᤠᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶ ᤁᤢᤎᤠ᤺ᤱ ᤏᤢ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤕᤠᤶᤔᤥ ᤂᤥᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤛᤧ ᤂᤢᤏᤧ᤹ ᤜᤠᤱᤅᤧᤀᤥ ᤐᤣ॥ 4 ᤂᤧᤴ ᤕᤧᤶᤔᤥ ᤜᤠᤱᤅᤡᤴᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤁᤢᤛᤧᤘᤠᤖᤥᤒᤠ ᤃᤣᤜᤈᤡ᤺ᤴᤏᤢ ᤀᤰᤂᤣᤗ᤹ᤖᤡᤰ ᤋᤠ᤹ᤈᤧᤱᤏᤢ ᤕᤢᤅᤧ. “ᤀᤣᤗᤡᤛᤠ᤺ᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹॥” 5 ᤀᤠᤸᤗ ᤀᤣᤗᤡᤛᤠ᤺ᤸᤗᤧ ᤁᤧᤛᤡᤒᤠ ᤔᤏᤠᤴ ᤀᤠᤰᤂᤣᤗ᤹ᤖᤡᤰ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢ ᤗ᤹ᤖᤡᤰ ᤃᤣᤜᤈᤡ᤺ᤸᤗᤧ ᤜᤠᤱᤅᤡᤴ ᤆᤧᤰᤋᤢᤖ ᤕᤠᤃᤧᤸᤗᤧ. ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤴ ᤀᤣᤗᤡᤛᤠ᤺ᤸᤗᤧ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤆᤥᤃᤢ ᤐᤡᤖᤢᤀᤠᤱ ᤁᤧᤘᤠ᤹ᤔᤠ ᤔᤧᤴᤇᤢᤔᤠᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤜᤡᤶ ᤁᤢᤎᤠ᤺ᤱ ᤏᤢ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹ᤖᤧ ᤗᤠᤃᤡ ᤜᤠᤱᤅᤡᤴ ᤐᤣᤗᤡ ᤑᤠᤰᤛᤧ ᤋᤩᤧ॥ ᤜᤧᤰᤁᤩᤠᤱ ᤃᤣᤜᤈᤡ᤺ᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤠ ᤐᤕᤶ ᤜᤠᤱᤅᤣ. ‘ᤜᤠᤒᤠ ᤁᤴ ᤔᤧᤴᤇᤢᤔᤠᤴᤗᤥ. ᤜᤧᤰᤁᤩᤠᤱ ᤀᤣᤗᤡᤛᤠ᤺ᤸᤗᤧ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤴ ᤜᤠᤒᤠ ᤁᤴᤗᤥ॥’” 6 ᤜᤠᤱᤅᤡᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤍᤥᤛᤢ. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧᤀᤠᤱ ᤕᤠᤱᤏᤠ ᤆᤧᤰᤋᤢ॥ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤂᤧᤸᤗᤧ ᤁᤢᤍᤢ᤺ᤴᤍᤣᤴ ᤗᤳᤇᤠ ᤛᤢᤜᤠᤱᤕᤢᤰᤐᤧᤴ ᤜᤢᤰᤛᤢᤵᤋᤢᤀᤠᤱ ᤂᤧᤴ ᤔᤧᤳᤋᤢ. “ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤧᤖᤧᤰ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹. ᤗᤠᤈᤣᤴ ᤏᤢ ᤁᤢᤜᤡᤶᤔᤧᤴ ᤗᤧᤖᤢᤀᤠᤱ ᤐᤣᤒᤠ ᤕᤧᤶᤔᤠᤱᤎᤥ ᤀᤠᤸᤗᤥ ᤌᤠᤖᤡᤰᤐᤠ ᤗᤠᤈᤣ᤹ ᤛᤡᤱᤒᤢᤱᤜᤠ᤹ᤀᤥᤗᤠᤶ ᤁᤧᤒᤥ᤺ᤰᤐᤠ ᤐᤥᤃᤢᤃᤧᤴ ᤁᤢᤈᤠ᤺ᤸᤗᤧ ᤁᤢᤔᤧᤸᤗᤢᤱᤅᤠᤱ ᤁᤧᤖᤧᤰ ᤂᤧᤴ ᤏᤢ᤺ᤰᤋᤧ ᤐᤡᤖᤧ᤹ᤀᤥ॥” ᤜᤈᤠᤀᤣᤗᤖᤧ ᤒᤣᤏ-ᤜᤍᤍᤧᤴ ᤛᤧᤖᤢ 7 ᤀᤣᤗᤡᤛᤠᤴ ᤀᤖᤠᤔᤒᤠ ᤜᤠᤱᤐᤠᤱ ᤍᤔᤛ᤻ᤁᤛ ᤐᤣ. ᤂᤧᤴ ᤕᤧᤶᤔᤥ ᤜᤠᤱ ᤒᤣᤏ-ᤜᤍᤍᤧᤴ ᤋᤢᤃᤧᤀᤠᤱ ᤏᤧᤛ᤻ᤛᤧ॥ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤁᤵᤔᤥ ᤑᤧᤖᤧᤀᤠᤱ ᤘᤠ᤹” ᤑᤠ᤹ᤀᤠᤱ ᤜᤠᤱᤅᤡᤴ ᤔᤧᤔᤧᤳᤋᤢᤸᤗᤧ. 8 ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠ ᤜᤈᤠᤀᤣᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤜᤢᤰᤘᤠᤜᤠ᤹ ᤋᤣ᤹ᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤋᤢᤶᤛᤧ ᤐᤣᤃᤧ᤹॥ ᤂᤢᤏᤧ᤹ᤗᤠᤶ ᤕᤜᤘᤣ ᤍᤠᤱᤒᤧᤴ ᤛᤢᤈᤠ ᤏᤠ᤺ᤰᤋᤧ᤹ᤀᤠᤱ ᤛᤣ᤺ᤴᤍᤥᤛᤧ᤹. ‘ᤌᤣ ᤁᤴ ᤋᤢᤰᤔᤥᤗᤠᤶ ᤀᤠᤱᤃᤠ᤹ ᤜᤡᤱᤅᤠᤒᤡ᥅’” 9 ᤜᤈᤠᤀᤣᤗᤖᤧ ᤜᤢᤰᤘᤠ ᤁᤢᤀᤡᤛᤡᤰ ᤍᤔᤛ᤻ᤁᤛᤒᤠ ᤁᤧᤖᤧᤰ ᤐᤖᤡᤰᤐᤠ ᤏᤢᤒᤠ ᤏᤢᤒᤠ ᤐᤠ᤺ᤴᤜᤠ᤹ ᤗᤡᤒᤥᤱ ᤀᤢᤔᤣᤜᤠ᤹ ᤁᤢ᤺ᤳᤋᤢᤛᤡᤀᤠᤱ ᤂᤢᤏᤧ᤹ ᤀᤣᤗᤡᤛᤠᤀᤥ ᤐᤣ॥ ᤂᤢᤏᤧ᤹ ᤛᤡᤃᤠᤱ ᤗᤠᤛᤧᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤁᤢᤍᤃᤡ ᤕᤧᤶᤛᤡᤱᤅᤠᤱ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤛ᤻ᤛᤠ ᤀᤖᤠᤔᤒᤠ ᤜᤠᤱ ᤒᤣᤏ-ᤜᤍᤍᤖᤧ ᤁᤴ ᤐᤠ᤺ᤴᤏᤡᤴ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ᤹ᤀᤥ ᤐᤠᤱᤄᤠᤱᤅᤠᤱ ᤘᤠ᤹. ‘ᤌᤣ ᤁᤴ ᤋᤢᤰᤔᤥᤗᤠᤶ ᤀᤠᤱᤃᤠ᤹ ᤘᤣ᤺ᤳᤋᤠᤒᤡ᥅’” 10 ᤀᤣᤗᤡᤛᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤂᤧᤏᤧ᤹ ᤐᤣᤃᤧ᤹ᤀᤠᤱ ᤂᤧᤴ ᤔᤧᤳᤋᤧ᤹. ‘ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤘᤣ᤺ᤳ॥’ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤀᤥ᤺ᤴᤎᤠᤰᤋᤠᤱᤅᤠᤱ ᤘᤠ᤹. ᤛᤧᤰᤂᤠ᤺ᤸᤗᤧ ᤂᤢᤏᤧ᤹ ᤛᤡᤖᤥ॥” 11 ᤀᤣᤗᤡᤛᤠ᤺ᤸᤗᤧ ᤂᤢᤏᤧ᤹ ᤀᤍᤰᤋᤰ ᤗ᤹ᤖᤡᤰ ᤀᤥᤔᤧᤳᤋᤢ ᤑᤳᤇᤢ. ᤜᤧᤰᤁᤩᤠᤱ ᤜᤈᤠᤀᤣᤗᤧᤴ ᤛᤡᤖᤡᤱᤔᤔᤥ ᤌᤩᤧ॥ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤜᤠ᤺ᤵᤔᤠ ᤜᤣ᤺ᤰᤋᤧ॥ 12 ᤜᤈᤠᤀᤣᤗᤖᤧ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤠᤀᤣ. ᤀᤠᤍᤠᤱᤒᤠ ᤌᤣᤀᤠᤱ ᤁᤧᤜᤠ᤺ᤵᤐᤠᤒᤣ᥅” ᤀᤣᤗᤡᤛᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤵᤔᤠ ᤁᤧᤀᤡ᤺ᤳᤋᤢᤛᤡᤒᤠᤴ ᤀᤠᤱᤃᤠ᤹ ᤏᤡᤛᤢᤱ᤹॥ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤰᤜᤠ᤹ᤀᤥ ᤔᤡ ᤁᤧᤃᤣ᤺ᤳᤋᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠᤱᤒᤧᤴ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤁᤧᤛᤧᤖᤢᤛᤡ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤢᤈᤢᤰᤛᤠ ᤀᤅᤧ᤺ᤰᤘᤠ ᤛᤠᤜᤠ᤹ ᤂᤠᤶᤒᤠᤱᤅᤥ ᤁᤧᤎᤠᤵᤛᤢ ᤁᤧᤛᤧᤖᤢᤛᤡ᤹. ᤁᤢᤛ᤻ᤛᤠ ᤁᤧᤕᤠᤰᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤐᤥ᤺ᤰᤁᤡᤴ ᤁᤧᤈᤧᤖᤢ ᤁᤧᤒᤡᤖᤢᤛᤡ᤹॥” 13 ᤜᤈᤠᤀᤣᤗᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤔᤧᤴᤈᤥᤒᤠ ᤗᤳᤇᤠ ᤁᤥ᤺ᤳᤆᤥ᤺ᤸᤗᤧ ᤁᤶᤔᤩᤠᤰ ᤕᤶᤒᤠ ᤕᤠ᤺ᤶᤒᤰᤁᤡᤴ ᤀᤠᤰᤂᤣᤀᤠᤱ ᤆᤥ᤺ᤰᤔᤠ ᤛᤢᤰᤋᤢᤱᤒᤣ᥅” ᤀᤣᤗᤡᤛᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤀᤖᤠᤔᤒᤠ ᤜᤠᤱ ᤁᤧᤒᤥᤱ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤰᤋᤠᤱᤅᤠᤱ ᤘᤠ᤹॥” 14 ᤂᤧᤴ ᤀᤣᤃᤠᤱ ᤜᤈᤠᤀᤣᤗᤧᤴ ᤀᤣᤗᤡᤛᤠᤴᤏᤢ ᤛᤧᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤴᤍᤠᤱᤒᤥ ᤏᤢ᤺ᤰᤂᤧ ᤑᤧᤖᤧ॥ ᤀᤠᤸᤗ ᤒᤣᤏ-ᤜᤍᤍᤖᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤀᤣᤗᤡᤛᤠ᤺ᤸᤗᤧ ᤂᤧᤏᤧ᤹ ᤌᤣ ᤁᤧᤔᤧᤳᤋᤧᤒᤣ᥅” ᤜᤈᤠᤀᤣᤗᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤠ ᤛᤧᤰᤂᤠᤀᤣ ᤁᤧᤘᤣ᤺ᤳ ᤑᤠ᤹ᤀᤠᤱ ᤂᤢᤏᤧ᤹ ᤔᤧᤳᤋᤠᤱ॥” 15 ᤁᤖ ᤁᤢᤍᤠ᤺ᤴᤍᤡᤰᤔᤠ ᤂᤢᤏᤧ᤹ ᤗᤳᤇᤠ ᤁᤧᤎᤢᤱᤒᤠ ᤂᤠᤶᤍᤣ᤺ᤳ ᤌᤡᤰ ᤕᤠᤱᤛᤡᤱ ᤜᤧᤰᤁᤩᤠᤱ ᤆᤫᤠ᤺ᤳᤋᤥ ᤜᤢᤶᤛᤢᤀᤠᤱ ᤜᤠᤱᤅᤡᤸᤗᤧ ᤁᤢᤏᤠᤖᤠᤴ ᤐᤴᤇᤢᤒᤡᤖᤢ. ᤂᤧᤒᤩᤠᤱ ᤁᤶᤓᤗ᤹ᤖᤡᤰ ᤜᤠᤱᤅᤡᤴ ᤛᤩᤧ॥ ᤂᤧᤴ ᤀᤣᤃᤠᤱ ᤜᤈᤠᤀᤣᤗᤧᤴ ᤜᤠᤱ ᤐᤥ᤺ᤰᤂᤧᤖᤥ॥ ᤕᤜᤢᤍᤠᤒᤠ ᤜᤠᤱ ᤕᤜᤥᤖᤠᤔ ( ᥈ ᤛᤠᤵᤔᤢ ᥈᥇:᥇-᥈᥆ ) 16 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤁᤢᤛ᤻ᤛᤠ ᤕᤥᤖᤠᤔᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤅᤠᤛᤡᤃᤣᤰᤐᤠ ᤋᤱᤒᤣᤀᤥ. ᤀᤠᤸᤗ ᤕᤜᤥᤛᤠᤐᤠᤋᤧᤴ ᤕᤜᤢᤍᤠᤒᤠ ᤜᤠᤱ ᤘᤕᤧ. ᤂᤧᤒᤩᤠᤱ ᤕᤜᤥᤛᤠᤐᤠᤋᤖᤧ ᤁᤢᤛ᤻ᤛᤠ ᤕᤜᤥᤖᤠᤔᤧᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤜᤠᤱᤈᤢᤶ ᤆᤥ᤺ᤰᤔᤠ ᤜᤣ᤺ᤰᤋᤢ॥ 17 ᤀᤠᤸᤗ ᤕᤜᤥᤖᤠᤔᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤁᤧᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤕᤧᤳᤇᤡ ᤜᤠᤱᤕᤢᤰ ᤆᤥᤃᤢ॥ 18 ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤥ ᤗᤠᤱᤄᤣᤃᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤜᤠᤒᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤌᤡᤰ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤌᤣ᤺ᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤂᤢᤏᤧ᤹ ᤆᤥᤃᤢ॥ 19 ᤁᤖᤛᤠᤱ ᤁᤢᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤢᤍᤠᤴ ᤔᤧᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴ॥ ᤂᤢᤏᤧ᤹ ᤍᤠᤀᤢᤍᤧᤴ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱ ᤁᤧᤍᤡ᤺ᤵᤐᤠᤀᤠᤱ ᤁᤧᤕᤢᤱᤒᤠ ᤛᤣᤔᤡ ᤜᤠ᤺ᤶᤔᤠ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤕᤧ॥ 20 ᤕᤜᤥᤖᤠᤔᤖᤧ ᤁᤢᤕᤧᤶᤔᤥ ᤕᤜᤢᤍᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤣᤍᤥᤔᤧᤴ ᤐᤡᤑᤩᤢᤱᤒᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤃᤡ ᤗᤳᤇᤠ ᤜᤠᤱ ᤑᤥ᤺ᤰᤂᤢ॥ 21 ᤁᤸᤗᤧᤆᤥᤃᤢᤸᤗᤧ ᤕᤜᤥᤖᤠᤔᤖᤧ ᤁᤧᤖᤧᤰ ᤁᤢᤀᤴᤗᤠᤎᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤈᤠᤀᤡᤖ ᤐᤠᤱᤈᤢᤶᤔᤥ ᤐᤣ॥ ᤀᤣᤍᤥᤔᤡᤜᤠ᤹ᤖᤧ ᤂᤢᤏᤧ᤹ ᤏᤢ ᤂᤢᤏᤧ᤹ ᤁᤢᤀᤴᤗᤠᤎᤠᤜᤠ᤹ᤀᤥᤒᤠ ᤌᤰᤔᤥᤒᤠᤜᤠ᤹ ᤁᤡᤷᤃᤵ ᤔᤧᤃᤒᤢᤛᤡ. ᤁᤖ ᤂᤢᤏᤧ᤹ ᤐᤥᤃᤧᤀᤠᤱ ᤂᤧᤱᤜᤠ᤹ ᤑᤳᤋᤢᤛᤡ ᤜᤧᤰᤁᤩᤠᤱ ᤛᤧᤴᤍᤡᤰᤛᤠ ᤐᤡᤴᤍᤧᤄᤧᤖᤧ॥ ᤜᤧᤰᤁᤣᤛᤠᤱ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤔᤧᤄᤧᤳᤇᤡᤱᤅᤠᤱ ᤂᤢᤴᤇᤡ᤹ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣ॥ 22 ᤀᤣᤍᤥᤔᤧᤴ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤣ ᤕᤜᤢᤍᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤗᤡᤒ᤻ᤏᤠ᤺ᤴᤏᤠᤱ ᤜᤠᤒᤠ ᤂᤧᤴ ᤕᤧᤶᤔᤥᤀᤣ ᤐᤡᤑᤩᤢᤱᤒᤠ ᤐᤥ᤺ᤰᤂᤧ॥ 23 ᤕᤜᤥᤖᤠᤔᤖᤧ ᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤴᤏᤠᤱᤒᤡ᥅ 24 ᤂᤧᤒᤩᤠᤱ ᤕᤜᤥᤖᤠᤔᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤜᤈᤩᤠᤜᤴ ᤜᤠᤱ ᤐᤥ᤺ᤰᤂᤧᤖᤥ॥ ᤕᤜᤢᤍᤠᤒᤠ ᤜᤠᤱ ᤀᤜᤈᤩᤠᤜ ( ᥈ ᤛᤠᤵᤔᤢ ᥈᥈:᥇-᥌ ) 25 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤁᤢᤛ᤻ᤛᤠ ᤕᤥᤖᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤏᤡᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠᤒᤠ ᤜᤠᤱ ᤕᤜᤥᤖᤠᤔᤖᤧ ᤁᤢᤛ᤻ᤛᤠ ᤀᤜᤈᤩᤠᤜ᤺ᤸᤗᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥ 26 ᤀᤠᤸᤗ ᤀᤜᤈᤩᤠᤜᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤌᤡᤰ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤀᤋᤗᤩᤠᤜ ᤘᤕᤧ॥ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤥᤔᤪᤡᤖᤧ ᤗᤳᤇᤠ ᤁᤢᤶᤔᤧᤴᤇᤠ᤹ᤔᤠ ᤘᤕᤧ॥ 27 ᤀᤜᤈᤩᤠᤜ᤺ᤸᤗᤧ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤜᤠ᤹ ᤏᤠ᤺ᤳᤋᤢ. ᤜᤧᤰᤁᤩᤠᤱ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤂᤢᤏᤧ᤹ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤋᤧᤴᤎᤠᤶ ᤔᤣ᤺ᤰᤂᤡᤶᤔᤡᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤃᤠ᤹ᤀᤡᤴ ᤀᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤏᤢ ᤘᤕᤧ॥ 28 ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤀᤜᤈᤩᤠᤜᤴ ᤀᤠᤜᤠᤒᤖᤧ ᤁᤢᤛ᤻ᤛᤠ ᤕᤥᤖᤠᤔᤧᤴᤏᤢ ᤖᤠᤔᤥᤋ-ᤃᤡᤗᤠᤍᤀᤥ ᤐᤣ॥ ᤁᤖ ᤀᤖᤠᤔᤡᤜᤠ᤹ᤖᤧ ᤕᤥᤖᤠᤔᤧᤴ ᤔᤧᤄᤠ᤺ᤴᤍᤢ॥ 29 ᤁᤸᤗᤧᤆᤥᤃᤢᤸᤗᤧ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤧᤴᤏᤢ ᤌᤱ ᤆᤥ᤺ᤰᤛᤧ ᤐᤣ᤺ᤸᤗᤧ ᤖᤠᤔᤥᤋ-ᤃᤡᤗᤠᤍᤀᤥ ᤁᤠ᤺ᤴᤍᤧᤒᤠ ᤕᤠᤱᤄᤣ᤺ᤰᤁᤥᤗᤠᤶ ᤘᤣ᤺ᤵᤔᤠᤖᤧ ᤗᤠᤃᤡ ᤕᤥᤖᤠᤔ ᤜᤠᤱᤅᤡᤴ ᤕᤡᤈᤖᤣᤗ ᤏᤢ᤺ᤰᤂᤧ ᤑᤧᤖᤧ॥ ᤂᤧᤒᤩᤠᤱ ᤕᤜᤢᤍᤠᤒᤠ ᤜᤠᤱ ᤕᤜᤥᤖᤠᤔᤖᤧ ᤁᤢᤛ᤻ᤛᤠ ᤀᤜᤈᤩᤠᤜᤴ ᤕᤥᤖᤠᤔᤖᤧ ᤁᤢᤍᤢᤶᤛᤧ ᤕᤡᤈᤖᤣᤗ ᤐᤣ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤠ᤺ᤴᤍᤧᤀᤠᤱ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.