᥈ ᤜᤠᤱ 7 - LIFOTNT

¹ ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤋᤠ᤺ᤴᤍᤡᤰ ᤜᤠᤒᤠ ᤁᤴ ᤕᤧᤶᤔᤥ ᤛᤠᤔᤖᤡᤕᤠᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤁᤢᤀᤠ᤺ᤳ ᤌᤡᤰ ᤕᤢᤵᤐᤠᤖᤧ ᤁᤡᤗᤥᤃᤪᤠᤔ ᤛᤢᤶᤛᤡ ᤑᤣ᤹ᤍᤢᤶ ᤏᤢ ᤁᤢᤀᤠᤳ ᤌᤡᤰ ᤕᤢᤵᤐᤠᤖᤧ ᤁᤡᤗᤥᤃᤪᤠᤔ ᤋᤢᤰᤛᤡ ᤜ᤺ᤰᤛᤡ ᤔᤧᤀᤡᤅᤢ ᤔᤧᤛᤱᤄᤢ᤹॥”

² ᤜᤠᤱᤅᤡᤸᤗᤧ ᤁᤳᤋᤢᤒᤠ ᤛᤢᤜᤠᤱᤕᤢᤰᤐᤠ ᤛᤧᤘᤠᤖᤥᤒᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤗᤠᤶᤎᤣ᤺ᤳᤜᤠ᤹ ᤜᤴᤍᤢ ᤀᤠᤒᤡᤛᤠᤱ ᤀᤰᤋᤱᤒᤠ ᤐᤥᤱᤔᤠ ᤌᤣ ᤛᤢᤰᤁᤠᤱᤒᤣ᥅” ᤀᤣᤗᤡᤛᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤂᤧᤏᤧ᤹ ᤀᤠᤵᤑᤣᤰ ᤁᤧᤔᤡᤰᤁᤡᤸᤗᤧ ᤂᤧᤴ ᤁᤧᤏᤡᤛᤢ᤹. ᤁᤖ ᤂᤧᤏᤧ᤹ ᤂᤧᤵᤔᤥᤗᤠᤶ ᤌᤣᤀᤠᤱ ᤆᤠᤔᤠ ᤁᤧᤱᤄᤥᤛᤢᤴᤗᤥ॥”

ᤀᤖᤠᤔᤒᤠ ᤌᤰᤛᤢᤒᤠᤜᤠ᤹ ᤔᤧᤄᤧᤳᤇᤡᤱ

³ ᤀᤠᤸᤗ ᤂᤧᤴ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤀᤠᤗᤡ᤺ᤰᤗᤡ᤺ᤰᤐᤠ ᤜᤥᤖᤡᤰᤐᤠ ᤋᤢᤰᤔᤧᤸᤗᤧ ᤋᤖᤢᤛᤡᤒᤠ ᤔᤏᤠ ᤗᤡᤛᤡ ᤔᤧᤕᤢᤅᤧ॥ ᤂᤧᤱᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤏᤡ᤹ ᤌᤣᤀᤠᤱ ᤀᤠᤴᤇᤡᤏᤧᤴᤗ ᤌᤠᤖᤡᤰ ᤁᤵᤔᤥ ᤀᤠᤕᤢᤱᤒᤠᤒᤣ᥅

⁴ ‘ᤕᤧᤰᤕᤰᤁᤥ ᤀᤠᤏᤡ᤹ ᤐᤣᤃᤡ’ ᤀᤠᤒᤠ᤺ᤳᤋᤢᤶᤏᤧᤓᤃᤪ ᤂᤧᤵᤔᤥ ᤛᤠᤰ ᤐᤥᤃᤧᤀᤠᤱ ᤏᤧᤖᤥ ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤛᤡᤖᤥ॥ ᤜᤧᤰᤁᤩᤠᤱ ᤁᤵᤔᤥ ᤀᤠᤏᤡ᤹ ᤀᤠᤕᤢᤱᤛᤠᤱ ᤀᤠᤛᤡᤖᤥ॥ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤐᤣᤃᤡᤀᤠᤱ ᤜᤢᤰᤛᤢᤵᤐᤠᤛᤡ᤹॥ ᤂᤧᤱᤜᤠ᤹ᤖᤧ ᤀᤠᤏᤡ᤹ ᤀᤠᤶᤛᤧ᤺ᤵᤏᤧᤓᤃᤪ ᤀᤠᤏᤡ᤹ ᤀᤠᤜᤡᤱ᤹॥ ᤀᤠᤏᤡ᤹ ᤀᤠᤶᤛᤧᤳᤏᤧᤓᤃᤪ ᤀᤠᤏᤡ᤹ ᤀᤠᤛᤡᤖᤥ॥”

⁵ ᤂᤧᤒᤩᤠᤱ ᤕᤢ᤺ᤴᤇᤡᤰ ᤔᤠᤰᤆᤡᤘᤈᤡ ᤗ᤹ᤖᤧᤸᤗᤧ ᤂᤧᤱᤜᤠ᤹ ᤔᤧᤒᤥᤃᤧᤀᤠᤱ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤗᤧᤵᤔᤠᤱ ᤔᤧᤒᤣ॥ ᤀᤠᤸᤗ ᤂᤧᤱᤜᤠ᤹ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤧᤸᤗᤧ ᤁᤢᤕᤠᤀᤥ ᤔᤧᤃᤧᤖᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤵᤔᤥ ᤗᤳᤇᤠ ᤔᤏᤠᤀᤠᤱ ᤔᤧᤴᤏᤡᤛᤢᤴ॥

⁶ ᤌᤣᤀᤠᤱᤓᤧᤸᤗᤧ ᤀᤴᤗᤠᤎᤠᤜᤠ᤹. ᤀᤴᤜᤠ᤹ ᤏᤢ ᤕᤖᤡᤰ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠ ᤗᤠᤀᤡ᤺ᤰᤋᤧᤒᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤖᤠᤔᤡᤜᤠ᤹ᤖᤧ ᤔᤧᤄᤧᤵᤛᤢᤖ ᤕᤠ᤺ᤴᤍᤢᤛᤡᤀᤠᤱ ᤘᤕᤧ. ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤀᤰᤂᤣ ᤔᤧᤔᤧᤳᤇᤡᤱ. “ᤀᤥᤔᤧᤳᤋᤧᤶ ᤛᤠ᤹ᤖᤧᤶᤔᤧ. ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧᤃ ᤀᤠᤏᤡ᤹ ᤑᤵᤔᤠᤖᤧ ᤗᤠᤃᤡ ᤜᤡᤳᤋᤡ ᤏᤢ ᤔᤡᤛᤪ ᤗᤠᤈᤣ᤹ᤒᤠ ᤜᤠᤱᤜᤠ᤹ ᤕᤠ᤺ᤸᤗᤣᤰ ᤛᤠᤅᤢ ᤋᤠᤖᤢᤛᤡᤀᤠᤱ ᤘᤠ᤹॥”

⁷ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤢ᤺ᤴᤇᤡᤰ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹. ᤀᤴᤜᤠ᤹. ᤀᤍᤱᤜᤠ᤹ ᤏᤢ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤗᤧᤖᤢ ᤔᤧᤎᤀᤠᤱ ᤜᤡᤱᤔᤠᤖᤧ ᤗᤠᤃᤡ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ ᤔᤧᤘᤕᤧ॥ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤡᤴᤏᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤗᤧᤖᤢ ᤔᤧᤎᤀᤠᤱ ᤏᤧᤛ᤻ᤛᤧ॥

⁸ ᤂᤧᤴ ᤗᤥᤃᤣ᤹ ᤋᤢᤰᤔᤧᤸᤗᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤕᤠᤀᤥ ᤔᤧᤃᤧᤖᤧ ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤒᤠ ᤗᤳᤇᤠᤀᤥ ᤔᤧᤗᤠᤛᤧᤀᤠᤱ ᤁᤢᤈᤠ ᤔᤧᤈ ᤔᤧᤎᤢᤅᤢ. ᤜᤧᤰᤁᤩᤠᤱ ᤛᤠᤶᤔᤩᤠᤱ. ᤕᤢᤵᤐᤠ ᤏᤢ ᤆᤠᤱᤘᤠ᤺ᤴᤜᤠ᤹ ᤌᤡᤰᤏᤠᤜᤠᤱ ᤔᤧᤍᤣ᤹ᤖᤢᤀᤠᤱ ᤔᤧᤈᤡᤰᤂᤢ ᤔᤧᤕᤢᤰᤂᤢ॥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤕᤠᤶᤔᤥ ᤔᤧᤍᤩᤧᤀᤠᤱ ᤘᤣ᤹ ᤛᤠ᤺ᤱᤃᤠᤜᤡᤶᤔᤥ ᤔᤧᤗᤠᤛᤧ ᤜᤧᤰᤁᤩᤠᤱ ᤆᤡᤃᤰᤘᤠ ᤛᤠᤔᤠᤜᤠ᤹ ᤔᤧᤍᤣ᤹ᤖᤢᤀᤠᤱ ᤂᤧᤱᤜᤠ᤹ᤀᤠᤱ ᤔᤧᤈᤡᤰᤂᤢ ᤔᤧᤎ॥

⁹ ᤂᤧᤒᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤁᤴ ᤕᤠ᤺ᤶᤒᤰᤁᤡᤴ ᤏᤢᤒᤠ ᤔᤣ᤺ᤴ॥ ᤀᤠᤀᤡᤱᤃ ᤛᤢᤏᤠᤀᤡᤱ ᤕᤧᤴᤖᤧᤳᤇ. ᤜᤧᤰᤁᤩᤠᤱ ᤀᤠᤏᤡ᤹ᤃ ᤛᤫᤠ᤺ᤳ ᤀᤠᤕᤢᤱ ᤀᤠᤈᤠ॥ ᤋᤠ᤺ᤴᤍᤡᤰ ᤋᤠᤏᤠᤶ ᤌᤧᤶᤒᤠ ᤀᤠᤜᤠᤱᤄᤢᤶᤔᤠᤱ ᤀᤠᤕᤢᤱᤏᤧᤓᤃᤪ ᤂᤢᤶᤍᤡᤱ ᤀᤠᤄᤥᤛᤢᤶ᤹॥ ᤀᤠᤸᤗ ᤀᤠᤏᤡ᤹ ᤂᤡᤔᤥ ᤐᤣᤃᤡᤀᤠᤱ ᤜᤠᤱᤜᤡᤶᤔᤥ ᤁᤴ ᤀᤡᤱᤄᤱᤅᤡᤴ ᤔᤧᤳᤋᤢᤶᤛᤡᤶ᤹॥”

¹⁰ ᤂᤶᤓᤩᤠᤱ ᤂᤧᤱᤜᤠ᤹ ᤛᤠᤔᤖᤡᤕᤠ ᤔᤧᤒᤣᤀᤠᤱ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤁᤧᤕᤧᤵᤐᤠ ᤀᤡᤰᤁᤧᤃᤥᤒᤠᤜᤠ᤹ ᤔᤧᤀᤢ᤺ᤳᤋᤢᤛᤡᤀᤠᤱ ᤔᤧᤔᤧᤳᤋᤢᤛᤡ. “ᤀᤖᤠᤔᤡ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤀᤠᤏᤡᤃᤣ ᤐᤣᤃᤡᤃᤧ ᤜᤧᤰᤁᤩᤠᤱ ᤗᤳᤇᤠᤀᤠᤱ ᤔᤏᤠ ᤔᤧᤏᤡᤛᤢᤶᤒᤧᤴ॥ ᤛᤛᤵ ᤘᤕᤠᤰ ᤁᤧᤗ᤹ᤒᤠ ᤜᤠ᤺ᤳᤋᤠᤱ ᤜᤥᤵ—ᤀᤴᤜᤠ᤹ ᤏᤢ ᤀᤍᤱᤜᤠ᤹ ᤜᤠᤒᤠ ᤔᤧᤄᤣ᤺ᤰᤂᤢᤛᤡᤀᤠᤱ ᤔᤧᤕᤧᤵ. ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶᤜᤠ᤹ᤀᤠᤱ ᤀᤠᤶᤓᤠ ᤔᤧᤗᤧᤖᤢ ᤔᤧᤎᤀᤠᤱ ᤏᤧᤖᤥ॥”

¹¹ ᤂᤧᤒᤩᤠᤱ ᤗᤠᤶᤎᤣ᤺ᤳᤋᤥ ᤀᤡᤰᤁᤧᤃᤥᤒᤠᤜᤠ᤹ ᤔᤧᤀ᤺ᤰᤋᤧᤀᤠᤱ ᤁᤴ ᤀᤡᤱᤄᤱᤅᤡᤴ ᤔᤧᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤧᤴ ᤀᤡᤱᤄᤱᤅᤡᤴ ᤜᤠᤱᤜᤡᤶᤔᤥ ᤔᤧᤔᤧᤳᤋᤢᤛᤡᤖᤥ॥

ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤔᤥ ᤔᤧᤏᤠᤵᤋᤢᤛᤡ

¹² ᤜᤠᤱᤅᤡᤴ ᤛᤧᤴᤍᤡᤰᤛᤠ ᤐᤥᤃᤧᤀᤠᤱ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤳᤋᤢᤛᤡ. “ᤀᤖᤠᤔᤡᤜᤠ᤹ᤖᤧ ᤌᤣ ᤔᤧᤈᤥᤃᤢᤒᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ᤹॥ ᤀᤠᤏᤡ᤹ ᤛᤠᤰᤁᤧᤸᤗᤧ ᤀᤠᤛᤡᤖ ᤀᤠᤒᤳ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤏᤡᤛᤢ᤹॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤡᤴ ᤔᤧᤗᤧᤖᤢ ᤜᤧᤰᤁᤩᤠᤱ ᤁᤢᤕᤠ ᤁᤢᤕᤠᤀᤥᤒᤠ ᤀᤡᤰᤋᤠᤵᤐᤠᤜᤠ᤹ᤀᤥ ᤆᤡᤱᤛᤡᤱᤛᤧ ᤔᤧᤒᤣᤀᤠᤱ ᤔᤧᤘᤠ᤹. ‘ᤁᤴᤜᤠ᤹ ᤛᤧᤰᤂᤠᤛᤠᤱ ᤕᤧᤰᤕᤰᤗᤠᤶ ᤗᤠ᤺ᤰᤁᤠᤳ ᤔᤧᤗᤴ. ᤜᤧᤰᤁᤩᤠᤱ ᤀᤠᤏᤡ᤹ ᤂᤧᤱᤜᤠ᤹ ᤁᤢᤜᤡᤱᤘᤧᤳ ᤋᤧᤶᤛᤢᤶᤔᤡᤶᤔᤠᤱ ᤕᤧᤰᤕᤰᤁᤥ ᤀᤠᤏᤡ᤹ ᤗᤠᤛᤡᤖᤥ॥’”

¹³ ᤛᤢᤜᤠᤱᤕᤢᤰᤐᤠᤜᤠ᤹ᤀᤥᤒᤠ ᤌᤡᤰᤐᤠᤖᤧ ᤏᤢᤃᤵ ᤐᤡᤖᤢ. “ᤀᤠᤏᤡ᤹ ᤕᤧᤰᤕᤰᤁᤥ ᤁᤧᤕᤧᤵᤐᤠ ᤅᤠᤛᤡ ᤀᤴᤜᤠ᤹ ᤔᤧᤕᤠᤱᤛᤡᤱᤅᤠᤱ ᤁᤢᤓᤠ ᤔᤏᤠᤜᤠ᤹ ᤔᤧᤒᤣ᤺ᤰᤗ ᤕᤠ᤺ᤴᤍᤧᤛᤧ᤹ᤀᤥ॥ ᤁᤵᤔᤥ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤍᤢᤔᤢᤒᤠ ᤋᤢᤰᤂᤣ ᤜᤧᤰᤋᤱᤒᤠᤀᤣ ᤂᤧᤱᤜᤠ᤹ᤖᤧ ᤔᤧᤍᤢᤔᤢ᤹—ᤀᤥᤘᤠ ᤛᤧᤰᤂᤠᤀᤣ. ᤂᤧᤱᤜᤠ᤹ ᤁᤵᤔᤥ ᤁᤧᤛᤡᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤜᤧᤰᤋᤱᤒᤠᤀᤣ ᤔᤧᤒᤥᤱ᤹॥ ᤌᤣ ᤐᤥ᤺ᤰᤂᤧᤖᤧᤳᤇ ᤑᤠ᤹ᤀᤠᤱ ᤌᤥ᤺ᤶᤔᤠᤖᤧ ᤗᤠᤃᤡ ᤀᤠᤏᤡ᤹ ᤂᤧᤱᤜᤠ᤹ ᤐᤠᤱᤄᤢᤶᤛᤡᤶ᤹॥”

¹⁴ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤴᤗᤠᤎᤠ ᤏᤧᤳᤇᤡ ᤏᤢ ᤂᤧᤵᤔᤥᤒᤠ ᤀᤴᤜᤠ᤹ ᤔᤧᤛᤣᤃᤢᤛᤡ. ᤜᤧᤰᤁᤩᤠᤱ ᤀᤖᤠᤔᤡ ᤌᤰᤛᤢᤒᤠᤜᤠ᤹ ᤜᤧᤴ ᤔᤧᤗ᤹ᤖᤧᤖᤧᤳᤇ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥ᤺ᤰᤔᤠᤖᤧ ᤗᤠᤃᤡ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤐᤠᤱᤄᤢᤍᤣᤛᤢᤛᤡ॥ ᤂᤢᤏᤧ᤹ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤐᤣᤛᤧᤳᤇᤧᤀᤠᤱ ᤌᤣ ᤐᤥ᤺ᤰᤂᤧᤖᤧᤳᤇ ᤂᤧᤴ ᤌᤥ᤺ᤵᤛᤧᤳᤇᤧ᤹॥”

¹⁵ ᤂᤧᤴ ᤏᤧᤵᤑᤢ ᤕᤷᤍᤏ ᤘᤜ᤺ᤱ ᤌᤠᤖᤡᤰᤁᤣ ᤌᤥ᤺ᤵᤛᤧᤳᤇᤢᤖ ᤐᤣᤛᤡ. ᤜᤧᤰᤁᤩᤠᤱ ᤗᤠᤶ ᤁᤢᤗᤧ᤺ᤶ ᤀᤖᤠᤔᤡᤜᤠ᤹ᤖᤧ ᤜᤠᤖᤠᤜᤠᤖᤠ ᤔᤧᤄᤧᤳᤇᤡᤱᤅᤡᤸᤗᤧ ᤗᤠᤵᤔᤧᤍᤣᤛᤢ ᤔᤧᤎᤒᤠ ᤋᤣ᤺ᤵᤑᤢᤱᤜᤠ᤹ ᤏᤢ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤜᤠ᤹ ᤂᤥᤛᤧᤳᤇᤢ॥ ᤂᤧᤒᤩᤠᤱ ᤀᤡᤱᤛᤠᤒᤠᤜᤠ᤹ ᤋᤩᤧᤛᤡᤀᤠᤱ ᤁᤴ ᤀᤡᤱᤄᤱᤅᤡᤴ ᤜᤠᤱᤅᤡᤴ ᤔᤧᤳᤋᤧᤛᤢ॥

¹⁶ ᤂᤧᤒᤩᤠᤱ ᤛᤠᤔᤖᤡᤕᤠᤒᤠ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤀᤠᤱ ᤀᤖᤠᤔᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤔᤧᤏᤠᤵᤋᤢᤛᤡ॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤁᤢᤀᤠ᤺ᤳ ᤌᤡᤰ ᤕᤢᤵᤐᤠᤖᤧ ᤁᤡᤗᤥᤃᤪᤠᤔ ᤛᤢᤶᤛᤡ ᤑᤣ᤹ᤍᤢᤶ ᤏᤢ ᤁᤢᤀᤠ᤺ᤳ ᤌᤡᤰ ᤕᤢᤵᤐᤠᤖᤧ ᤁᤡᤗᤥᤃᤪᤠᤔ ᤋᤢᤰᤛᤡ ᤜ᤺ᤰᤛᤡ ᤔᤧᤀᤡᤅᤢ ᤔᤧᤛᤱᤄᤢ॥

¹⁷ ᤀᤠᤸᤗ ᤜᤠᤱᤅᤡᤸᤗᤧ ᤁᤳᤋᤢᤒᤠ ᤁᤢᤓᤠ᤹ᤒᤠᤱ ᤛᤢᤜᤠᤱᤕᤢᤰᤐᤧᤴ ᤕᤶᤒᤠ ᤗᤠᤶᤎᤣᤳ ᤁᤥᤔᤠ ᤗᤰᤐᤧᤴ ᤐᤡᤖᤢᤀᤠᤱ ᤘᤕᤧ॥ ᤂᤧᤴ ᤔᤏᤠᤴ ᤔᤏᤠᤜᤠ᤹ᤖᤧ ᤕᤶᤒᤠ ᤗᤠᤶᤎᤣ᤺ᤳᤋᤥ ᤔᤧᤍᤥ᤹ᤖᤢ ᤔᤧᤛᤧᤖᤢ॥ ᤜᤧᤰᤁᤩᤠᤱ ᤜᤠᤱᤅᤡᤴ ᤂᤢᤏᤧ᤹ ᤁᤢᤜᤡᤶᤔᤥ ᤁᤢᤍᤢᤶᤛᤧ ᤐᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤀᤠᤱ ᤘᤕᤧᤒᤠ ᤐᤠ᤺ᤴᤏᤡᤴ ᤁᤧᤖᤧ॥

¹⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤜᤠᤱᤅᤡᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ. “ᤋᤠ᤺ᤴᤍᤡᤰ ᤜᤠᤒᤠ ᤁᤴ ᤕᤧᤶᤔᤥ ᤛᤠᤔᤖᤡᤕᤠᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤁᤢᤀᤠᤳ ᤌᤡᤰ ᤕᤢᤵᤐᤠᤖᤧ ᤁᤡᤗᤥᤃᤪᤠᤔ ᤛᤢᤶᤛᤡ ᤑᤣ᤹ᤍᤢᤶ ᤏᤢ ᤁᤢᤀᤠᤳ ᤌᤡᤰ ᤕᤢᤵᤐᤠᤖᤧ ᤁᤡᤗᤥᤃᤪᤠᤔ ᤋᤢᤰᤛᤡ ᤜ᤺ᤰᤛᤡ ᤔᤧᤀᤡᤅᤢ ᤔᤧᤛᤱᤄᤢ᤹॥”

¹⁹ ᤂᤧᤴ ᤛᤢᤜᤠᤱᤕᤢᤰᤐᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ. “ᤀᤥᤔᤧᤳᤋᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤗᤠᤶᤎᤣ᤺ᤳᤜᤠ᤹ ᤜᤴᤍᤢ ᤀᤠᤒᤡᤛᤠᤱ ᤀᤰᤋᤱᤒᤠ ᤐᤥᤱᤔᤠ ᤌᤣ ᤛᤢᤰᤁᤠᤱᤒᤣ᥅” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤂᤧᤴ ᤛᤢᤜᤠᤱᤕᤢᤰᤐᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ. “ᤂᤧᤏᤧ᤹ ᤀᤠᤵᤑᤣᤰ ᤁᤧᤔᤡᤰᤁᤡᤸᤗᤧ ᤂᤧᤴ ᤁᤧᤏᤡᤛᤢ᤹. ᤁᤖ ᤂᤧᤏᤧ᤹ ᤂᤧᤵᤔᤥᤗᤠᤶ ᤌᤣᤀᤠᤱ ᤆᤠᤔᤠ ᤁᤧᤱᤄᤥᤛᤢᤴᤗᤥ॥”

²⁰ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤃᤡ ᤀᤠᤳᤋᤡᤀᤠᤱ ᤔᤧᤶᤒᤣ᤺ᤰᤁᤣ ᤜᤠᤒᤠ ᤜᤧᤰᤋᤱᤒᤠᤀᤣ ᤐᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤕᤶᤒᤠ ᤗᤠᤶᤎᤣ᤺ᤳᤋᤥ ᤔᤧᤍᤥ᤹ᤖᤢᤀᤠᤱ ᤂᤢᤏᤧ᤹ ᤛᤩᤧᤖᤥ॥