᥈ ᤜᤠᤱ 6 - LIFOTNTᤀᤣᤗᤡᤛᤠᤴᤏᤢ ᤋ᤺ᤴᤍᤣ᤹ 1 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤛᤢᤶᤜᤠ᤹ᤖᤧ ᤀᤣᤗᤡᤛᤠᤴ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹ᤀᤥ. ᤀᤠᤍᤠᤱᤒᤠᤏᤢ ᤋᤢᤶᤔᤠᤖᤧ ᤗᤠᤃᤡ ᤀᤠᤏᤡ᤹ ᤀᤠᤕᤢᤱᤒᤠ ᤁᤴ ᤋᤧᤴᤏᤡᤴ ᤀᤠᤏᤡ᤹ ᤗᤠᤃᤡ ᤛᤠ᤹ᤖᤡᤰ ᤆᤡᤜᤢ᤹ᤜᤢ᤹ᤒᤠ ᤆᤥᤰ॥ 2 ᤕᤷᤍᤏ ᤘᤜ᤺ᤱᤅᤥ ᤀᤠᤏᤡ᤹ ᤐᤣᤃᤡ. ᤂᤧᤵᤔᤥ ᤁᤧᤖᤧᤰᤗᤧ ᤛᤡᤱ ᤂᤥᤔᤠ ᤔᤧᤛᤢᤰᤋᤢ᤹. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤃᤡ ᤂᤧᤵᤔᤥ ᤕᤢᤱᤔᤠ ᤜᤡᤶ ᤆᤥᤃᤢᤶ॥” ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢᤛᤡ. “ᤗᤢ ᤐᤥᤱ᤹. ᤂᤡᤏᤡ᤹ ᤐᤣᤃᤧᤶᤔᤧ᤹॥” 3 ᤂᤧᤒᤩᤠᤱ ᤂᤧᤱᤜᤠ᤹ᤀᤥᤒᤠ ᤌᤡᤰᤐᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠ. ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ᤏᤢ ᤁᤧᤶᤓᤧᤴᤏᤧᤶᤒᤡ᥅” ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤑᤧᤴᤏᤠ॥” 4 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤛᤥᤖᤡᤰ ᤐᤣ॥ ᤂᤧᤱᤜᤠ᤹ ᤕᤷᤍᤏ ᤘᤜ᤺ᤱᤅᤥ ᤔᤧᤃᤧᤖᤧᤀᤠᤱ ᤛᤡᤱᤒᤢᤱᤜᤠ᤹ ᤋᤠᤱᤔᤠ ᤔᤧᤜᤣ᤺ᤰᤋᤢ॥ 5 ᤗᤳᤇᤠ ᤛᤡᤱᤒᤢᤱ ᤋᤠᤅᤢᤀᤠᤱ ᤐᤳᤇᤧᤖ ᤌᤡᤰᤐᤠ᤺ᤸᤗᤧ ᤁᤢᤍ᤺ᤴᤍᤣᤴ ᤁᤢᤗᤠᤀᤥᤗᤠᤶ ᤆᤢᤵᤑᤠᤰ ᤐᤡ᤺ᤰᤂᤧᤀᤠᤱ ᤆᤫᤠ᤺ᤳᤋᤥ ᤛᤢᤖᤢᤶ ᤗᤠᤛᤧ॥ ᤂᤢᤏᤧ᤹ ᤀ᤺ᤰᤋᤧᤀᤠᤱ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤁᤱᤃ ᤀᤠᤱᤃᤠ᤹ ᤏᤠ᤺ᤰᤋᤢᤱᤛᤡᤱᤅᤠᤱ ᤋᤠᤖᤢᤱᤒᤠ ᤋ᤺ᤴᤍᤣ᤹ ᤘᤕᤧᤖᤥ॥” 6 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤁᤢᤔᤏᤠ᤺ᤸᤗᤧ ᤛᤣ᤺ᤴᤍᤥᤛᤢ. “ᤂᤧᤴ ᤀᤠᤳᤋᤡ ᤔᤰᤌᤩᤧᤒᤣ᥅” ᤀᤠᤸᤗ ᤂᤧᤸᤗᤧ ᤂᤢᤏᤧ᤹ ᤁᤴ ᤔᤰᤌᤩᤧᤒᤠᤍᤧᤴᤏᤡᤴ ᤀᤥ᤺ᤴᤎᤠᤰᤋᤢ. ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤋᤰᤁᤠᤳ ᤌᤡᤰ ᤀᤠ᤺ᤳᤋᤢᤀᤠᤱ ᤂᤧᤵᤔᤥ ᤗᤠᤵᤑᤢᤛᤢ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤂᤧᤴ ᤋ᤺ᤴᤍᤣᤴ ᤐᤰᤂᤢ ᤌᤠᤰᤋᤢ॥ 7 ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤔᤧᤳᤋᤢ. “ᤗ᤺ᤳᤋᤧᤀᤠᤱ ᤋᤣ᤹ᤖᤧ᤹॥” ᤂᤶᤓᤩᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤂᤧᤴ ᤗ᤺ᤳᤋᤢᤍᤣ᤹ᤖᤢᤖᤥ॥ ᤀᤣᤗᤡᤛᤠ᤺ᤸᤗᤧ ᤀᤖᤠᤔᤡᤜᤠ᤹ ᤔᤡᤰᤔᤧᤴᤏᤡᤔᤏᤠᤒᤠ ᤆᤥᤃᤢᤛᤡᤀᤠᤱ ᤋᤧᤶᤛᤢᤛᤡ 8 ᤀᤠᤸᤗ ᤀᤖᤠᤔᤒᤠ ᤜᤠᤱᤅᤡᤴ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴᤏᤢ ᤌᤱ ᤆᤥᤃᤧᤖ ᤘᤕᤧ॥ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤏᤢ ᤛᤢᤈᤠᤐᤠᤴ ᤋᤱᤄᤢᤀᤠᤱ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤰᤋᤱᤒᤠ ᤋᤧᤴᤜᤠ᤹ ᤀᤠᤎᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤆᤥᤃᤢᤱ᤹॥” 9 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤀᤰᤂᤣ ᤔᤧᤳᤋᤢᤀᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤀᤡᤱᤄᤱ ᤜᤠᤰᤋᤢ. “ᤂᤧᤏᤧ᤹ ᤂᤧᤴ ᤋᤧᤴᤏᤥᤗᤠᤶ ᤐᤥᤱᤔᤠᤀᤠᤱ ᤐᤣ᤺ᤰᤔᤠᤖᤧ ᤗᤠᤃᤡ ᤛᤡᤱᤛᤡᤱ ᤗ᤹ᤖᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤖᤠᤔᤡᤜᤠ᤹ ᤂᤧᤵᤔᤥ ᤔᤧᤒᤣ᤺ᤰᤗ ᤔᤧᤒᤳ॥” 10 ᤁᤸᤗᤧᤆᤥᤃᤢᤸᤗᤧ ᤀᤠᤳᤋᤡᤴ ᤋᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤂᤢᤏᤧ᤹ ᤔᤡᤰᤛᤣᤴ ᤐᤡᤖᤢᤀᤠᤱ ᤘᤕᤧ. ᤂᤧᤵᤔᤥ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤛᤡᤀᤠᤱ ᤔᤏᤠᤜᤠ᤹ ᤛᤡᤱᤛᤡᤱ ᤔᤧᤗ᤹ᤖᤧ ᤜᤧᤰᤁᤩᤠᤱ ᤀᤣᤗᤡᤛᤠ᤺ᤸᤗᤧ ᤜᤠᤱᤅᤡᤴ ᤕᤧᤳᤗᤧᤱ ᤛᤡᤱᤛᤡᤱ ᤗ᤹ᤖᤧ᤹ ᤔᤧᤳᤋᤢ. ᤂᤧᤸᤗᤧᤆᤥᤃᤢᤸᤗᤧ ᤜᤧᤰᤋᤱᤒᤠᤍᤧᤴᤜᤠ᤹ᤀᤥ ᤂᤢᤏᤧ᤹ ᤛᤡᤱᤛᤡᤱ ᤔᤧᤳᤇᤡᤱᤅᤠᤱ ᤘᤕᤧ॥ 11 ᤁᤸᤗᤧᤆᤥᤃᤢᤸᤗᤧ ᤀᤠᤖᤠᤔᤒᤠ ᤜᤠᤱᤅᤡᤴ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧ॥ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ ᤆᤠ᤹ᤖᤧᤖ ᤛᤣ᤺ᤴᤍᤥᤛᤢᤛᤡ. “ᤌᤣ ᤂᤡᤏᤡ᤹ ᤀᤠᤱᤃᤠ᤹ ᤀᤠᤃᤧᤶᤔᤧᤳᤏᤧᤶᤒᤡ᥅ ᤂᤡᤏᤡ᤹ ᤗᤢᤶᤔᤥᤒᤠᤜᤠ᤹ᤀᤥᤗᤠᤶ ᤀᤠᤳᤋᤡᤴᤏᤡᤃ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤗᤧᤵᤔᤠᤱ ᤗᤠᤛᤧᤀᤠᤱ ᤘᤠ᤹᥅” 12 ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥᤒᤠ ᤌᤡᤰᤐᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠ ᤐᤕᤶ ᤜᤠᤱᤅᤣ. ᤀᤠᤏᤡᤃᤣ ᤗᤢᤶᤔᤥᤒᤠᤜᤠ᤹ᤀᤥ ᤜᤠ᤺ᤳᤋᤠᤱ ᤗᤠᤛᤧᤒᤠ ᤜᤥᤵ. ᤁᤖ ᤀᤠᤍᤠᤱᤒᤠᤖᤧ ᤁᤧᤀᤡᤶᤔᤠᤍᤧᤴ ᤕᤠᤰᤑᤠᤱᤅᤥ ᤁᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤡᤛᤪᤠᤀᤡᤗᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤛᤠ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤆᤧᤰᤋᤢ᤹॥” 13 ᤜᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢ. “ᤂᤧᤏᤧ᤹ ᤐᤣᤃᤧ᤹ᤀᤠᤱ ᤂᤧᤴ ᤀᤠᤳᤋᤡ ᤘᤠ᤹ ᤕᤥ᤺ᤰᤌᤰᤋᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤏᤠᤜᤠ᤹ ᤐᤠᤱᤄᤢᤱᤛᤡᤱᤅᤠᤱ ᤂᤧᤴ ᤋᤧᤶᤛᤢᤱ᤹॥” ᤜᤠᤱᤅᤡᤴ ᤀᤰᤋᤱᤒᤠ ᤀᤡᤱᤄᤱ ᤔᤧᤒᤡᤖᤢ. “ᤀᤣᤗᤡᤛᤠᤴ ᤍᤥᤋᤠᤏ ᤘᤠ᤹॥” 14 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤀᤴᤜᤠ᤹ ᤏᤢ ᤀᤴᤗᤠᤎᤠᤜᤠ᤹ ᤁᤧᤕᤢᤰᤐᤠ ᤔᤢᤰᤁᤧᤃᤢᤒᤠ ᤌᤰᤛᤢᤒᤠ ᤛᤢᤶᤜᤠ᤹ ᤂᤧᤵᤔᤥ ᤐᤠᤱᤄᤢᤛᤡ॥ ᤂᤧᤱᤜᤠ᤹ ᤛᤧᤴᤍᤡᤰ ᤔᤧᤒᤣᤀᤠᤱ ᤂᤧᤴ ᤕᤧᤰᤕᤰᤁᤡᤴ ᤁᤡᤷᤃᤵ ᤔᤧᤒᤃᤢ॥ 15 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤧᤘᤠᤖᤥᤒᤧᤴ ᤋᤠᤏᤠᤶ ᤀᤠᤴᤍᤣᤴ ᤐᤥᤃᤧᤀᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧᤸᤗᤧ ᤀᤴᤜᤠ᤹ ᤏᤢ ᤀᤴᤗᤠᤎᤠ ᤁᤧᤗᤥᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤕᤧᤰᤕᤰᤁᤡᤴ ᤁᤒᤪᤡᤱ ᤁᤡᤷᤃᤵ ᤔᤧᤃᤒᤢᤀᤠᤱ ᤏᤧᤛ᤻ᤛᤧ॥ ᤂᤧᤴ ᤛᤧᤘᤠᤖᤥᤒᤧᤴ ᤑᤧᤖᤧᤀᤠᤱ ᤂᤢᤏᤧ᤹ ᤁᤢᤴᤍᤠᤱᤒᤧᤴ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤀᤠᤸᤗ ᤀᤠᤏᤡ᤹ ᤌᤣ ᤀᤠᤈᤥᤃᤢᤶᤒᤠᤒᤣ᥅” 16 ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤏᤥᤃᤵ ᤐᤡᤖᤢ. “ᤔᤧᤃᤡᤛᤧᤴᤏᤧ᤹. ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠᤜᤠ᤹ᤏᤢ᤺ᤸᤗᤧ ᤀᤠᤏᤡ᤹ᤏᤢ ᤁᤧᤘᤠ᤹ᤒᤠᤜᤠ᤹ ᤕᤖᤡᤰ ᤔᤧᤘᤠ᤹॥” 17 ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤠᤀᤣ. ᤁᤸᤗᤧ ᤁᤢᤔᤡᤰᤁᤡᤴ ᤜᤴᤍᤧ ᤐᤡᤖᤧ᤹ᤀᤥ. ᤜᤧᤰᤁᤩᤠᤱ ᤁᤸᤗᤧ ᤏᤡᤔᤠ ᤛᤢᤰᤋᤢᤖᤖᤥ॥” ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤛᤧᤘᤠᤖᤥᤒᤧᤸᤗᤧ ᤁᤢᤔᤡᤰᤁᤡᤴ ᤜᤴᤍᤢ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤣᤗᤡᤛᤠ᤺ᤸᤗᤧ ᤁᤢᤃᤒᤪᤡᤱ ᤐᤡᤛᤠᤱᤒᤠ ᤁᤥ᤺ᤰᤔᤠᤜᤠ᤹. ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤀᤴᤜᤠ᤹ ᤏᤢ ᤀᤴᤗᤠᤎᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤒᤠ ᤏᤡᤛᤢ॥ 18 ᤀᤠᤸᤗ ᤏᤡᤱᤔᤡᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤔᤧᤎᤠᤛᤡᤱ ᤔᤧᤕᤧᤒᤠ ᤏᤡᤛᤢ. ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤐᤣᤗᤡ ᤑᤠᤰᤋᤢ. “ᤁᤴ ᤔᤏᤠᤜᤠ᤹ ᤔᤡᤰᤔᤧᤴᤏᤡᤔᤏᤠ ᤔᤡᤰᤑ᤺ᤶᤒᤠ ᤆᤥᤃᤧᤛᤧ᤹ᤀᤥ॥” ᤀᤣᤗᤡᤛᤠ᤺ᤸᤗᤧ ᤐᤣᤗᤡ ᤑᤠᤰᤋᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤔᤡᤰᤑ᤺ᤶᤒᤠ ᤆᤥᤃᤢᤛᤡ॥ 19 ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤗᤠᤶ ᤔᤣ᤺ᤴ॥ ᤁᤴ ᤕᤧᤰᤕᤰᤁᤠᤱ ᤔᤣ᤺ᤴ॥ ᤀᤠᤱᤃᤠ᤹ ᤀᤠᤀᤣᤃᤠᤱ ᤌᤠᤀᤠᤛᤡᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤔᤏᤠᤀᤥ ᤀᤠᤱᤃᤠ᤹ ᤂᤡᤏᤡ᤹ ᤛᤠᤏᤡᤱᤎᤠᤏᤡᤱ᤹॥” ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤛᤠᤔᤖᤡᤕᤠ ᤁᤧᤳᤋᤢᤛᤡ॥ 20 ᤂᤧᤱᤜᤠ᤹ ᤕᤧᤰᤕᤰᤁᤥ ᤔᤧᤗᤠᤛᤧ ᤔᤧᤈᤢᤖᤧᤀᤠᤱ ᤀᤣᤗᤡᤛᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤀᤣ. ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤡᤴ ᤜᤴᤍᤧ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠᤶᤔᤥ ᤏᤡᤔᤠ ᤔᤧᤛᤢᤰᤋᤢᤖᤖᤥ॥” ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤜᤠ᤹ ᤜᤴᤍᤢ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ ᤀᤥᤔᤧᤔᤕᤧᤸᤗᤧ ᤛᤠᤔᤖᤡᤕᤠᤀᤥ ᤔᤧᤘᤕᤧᤒᤠ ᤔᤧᤏᤡᤛᤢ॥ 21 ᤀᤠᤸᤗ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤏᤡᤛᤢᤛᤡᤀᤠᤱ ᤂᤢᤏᤧ᤹ ᤀᤣᤗᤡᤛᤠᤴ ᤛᤣ᤺ᤴᤍᤥᤛᤢ. “ᤐᤠᤏᤢᤍᤡᤱ ᤐᤠᤀᤣ. ᤌᤣ ᤀᤠᤱᤃᤠ᤹ ᤁᤴᤜᤠ᤹ ᤛᤧᤖᤢᤱᤛᤡᤱᤒᤡ᥅ ᤌᤣ ᤀᤠᤱᤃᤠ᤹ ᤁᤴᤜᤠ᤹ ᤛᤧᤖᤢᤱᤛᤡᤱᤒᤡ᥅” 22 ᤂᤢᤏᤧ᤹ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤂᤧᤱᤜᤠ᤹ ᤔᤧᤛᤧᤖᤧᤛᤧᤴᤏᤧ᤹॥ ᤌᤣ ᤀᤠᤍᤠᤱᤒᤠᤖᤧ ᤀᤠᤵᤑᤣᤰ ᤁᤧᤍᤠᤓᤣ ᤏᤢ ᤁᤧᤗᤡ᤺ᤸᤗᤧ ᤐᤢᤱᤗᤠᤎᤠᤒᤠ ᤁᤧᤈᤥᤃᤢᤛᤡᤒᤠ ᤔᤏᤠᤜᤠ᤹ ᤁᤧᤛᤧᤖᤢᤛᤡᤀᤠᤱ ᤘᤕᤧᤒᤡ᥅ ᤀᤠᤍᤠᤱᤒᤠᤖᤧ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤆᤠᤔᤠ ᤁᤢᤈᤠ ᤏᤢ ᤆᤫᤠ᤺ᤳ ᤕᤢᤰᤂᤧ ᤐᤡᤖᤧᤛᤧ᤹. ᤜᤧᤰᤁᤣᤗ᤹ᤖᤡᤰ ᤁᤴᤜᤠ᤹ᤖᤧ ᤔᤧᤈ ᤔᤧᤎᤢᤅᤢᤀᤠᤱ ᤂᤢᤴᤇᤡ᤹ ᤍᤠᤱᤒᤠᤀᤥ ᤔᤧᤒᤣ᤺ᤰᤗ॥” 23 ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤳᤇᤠ ᤕᤶᤒᤠ ᤛᤠᤓ᤺ᤱᤈᤠ ᤆᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈ ᤔᤧᤎᤢᤅᤢ ᤔᤧᤛᤢᤖᤢᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤐᤠᤱᤄᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤍᤠᤱᤒᤠᤀᤥ ᤔᤧᤏᤢ᤺ᤰᤂᤧ॥ ᤁᤶᤓᤗ᤹ᤖᤡᤰ ᤀᤖᤠᤔᤡ ᤔᤏᤠᤛᤢᤶᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤏᤠᤵᤔᤠᤛᤡ ᤑᤵᤔᤠᤛᤡ ᤔᤧᤗᤧᤖᤢᤖᤥ॥ ᤁᤒᤪᤡᤱ ᤁᤡᤷᤃᤵ ᤔᤧᤃᤒᤢᤒᤠ ᤛᤠᤔᤖᤡᤕᤠᤀᤥ ᤛᤠᤰᤘᤠᤴ ᤐᤥᤃᤧ 24 ᤂᤧᤸᤗᤧ ᤁᤢᤓᤠ ᤕᤧᤶ ᤀᤣᤃᤠᤱ ᤀᤖᤠᤔᤒᤠ ᤜᤠᤱ ᤒᤣᤏ-ᤜᤍᤍᤖᤧ ᤁᤧᤘᤠ᤹ ᤔᤧᤴᤘᤠ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤑᤢᤰᤂᤢᤛᤡ ᤜᤧᤰᤁᤩᤠᤱ ᤛᤠᤔᤖᤡᤕᤠ ᤗᤧᤵᤔᤠᤱ ᤋᤃᤡ ᤌᤠᤛᤡᤱᤅᤠᤱ ᤂᤧᤴ ᤁᤒᤪᤡᤱ ᤁᤡᤷᤃᤵ ᤁᤒᤢ॥ 25 ᤕᤧᤰᤕᤰᤁᤥ ᤛᤠ᤹ᤖᤡᤰ ᤕᤶᤒᤠ ᤛᤠᤰ ᤐᤥᤃᤧ॥ ᤀᤍᤱᤅᤡᤸᤗᤧ ᤗᤳᤇᤠ ᤁᤢᤎᤧᤃᤣ᤺ᤰᤁᤡᤴ ᤕᤧᤵᤐᤥᤱ ᤁᤢᤀᤠ᤺ᤳ ᤕᤢᤵᤐᤠ. ᤜᤧᤰᤁᤩᤠᤱ ᤛᤥ᤺ᤸᤗᤠᤰ ᤌᤡᤰ ᤐᤧᤷᤘᤠ ᤜᤡ᤺ᤴ ᤁᤢᤀᤠ᤺ᤳ ᤅᤠᤛᤡ ᤕᤢᤵᤐᤠ ᤁᤢᤔᤧᤴ ᤐᤥ᤺ᤰᤂᤧᤖ ᤌᤧᤶᤒᤠ ᤁᤡᤷᤃᤵ ᤁᤵᤔᤠ ᤕᤧᤶᤔᤡᤴ ᤁᤣ᤺ᤶᤒᤠ ᤐᤥ᤺ᤰᤂᤧ॥ 26 ᤀᤠᤸᤗ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤥ ᤗᤠᤱᤄᤣᤃᤧᤖ ᤐᤳᤇᤧᤸᤗᤧ ᤔᤧᤴᤇᤢᤔᤠᤎᤡᤰᤗᤧ ᤂᤢᤏᤧ᤹ ᤑᤧ᤺ᤰᤋᤢᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤐᤕᤶ ᤜᤠᤱᤅᤣ. ᤀᤠᤱᤃᤠ᤹ ᤁᤢᤓᤠ᤹ ᤐᤡᤖᤠᤱᤅᤧ᤹ᤀᤥ᥄” 27 ᤜᤠᤱᤅᤡᤸᤗᤧ ᤏᤢᤃᤵ ᤐᤡᤖᤢ. “ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤧᤏᤧ᤹ ᤁᤧᤶᤓᤠ᤹ᤏᤧᤴᤏᤡᤸᤗᤧ ᤀᤠᤱᤃᤠ᤹ ᤀᤠᤳᤋᤡᤗᤠᤶ ᤂᤧᤏᤧ᤹ ᤁᤢᤓᤠ᤹ ᤐᤡᤔᤠ ᤛᤢᤰᤏᤧᤒᤠᤒᤣ᥅ ᤆᤠᤎᤠᤶᤔᤠ ᤗᤰᤗᤢᤶᤔᤥ ᤗᤠᤶᤒᤠᤒᤡ ᤀᤡ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤗᤠᤶᤒᤠᤒᤡ᥅” 28 ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤌᤣ ᤁᤧᤛᤠᤰᤐᤠ ᤁᤧᤍᤢᤔᤢᤒᤣ᥅” ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤁᤴ ᤔᤧᤴᤇᤢᤔᤠ᤺ᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. ‘ᤀᤠᤀᤡᤴ ᤀᤠᤴᤇᤡ᤹ ᤆᤠᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤴ ᤐᤡᤖᤠᤱᤅᤧ᤹॥ ᤋᤠ᤺ᤴᤍᤡᤰ ᤆᤤᤲ ᤀᤠᤴᤇᤡ᤹ ᤀᤠᤱᤃᤠ᤹ ᤀᤠᤛ᤻ᤛᤠ ᤕᤧᤶᤒᤡᤳᤇᤠᤴ ᤆᤠᤛᤢ॥’ 29 ᤂᤧᤒᤩᤠᤱ ᤀᤠᤴᤇᤡᤃᤣ ᤀᤠᤱᤃᤠ᤹ ᤀᤠᤛ᤻ᤛᤠ ᤕᤧᤶᤒᤡᤳᤇᤠᤴ ᤌᤥ᤺ᤰᤋᤧᤛᤢᤃᤧᤀᤠᤱ ᤆᤧᤛᤢᤃᤧ॥ ᤁᤢᤍᤠ᤺ᤴᤍᤡᤰᤔᤠ ᤀᤠᤱᤃᤠ᤹ ᤂᤧᤴ ᤔᤧᤳᤋᤢᤱ. ‘ᤀᤠᤀᤡᤴ ᤆᤠᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤴ ᤋᤠᤖᤧ᤹.’ ᤁᤖ ᤂᤢᤏᤧ᤹ ᤂᤧᤴ ᤆᤡᤰᤂᤢᤍᤣᤛᤢ॥” 30 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤜᤠᤱᤅᤡᤸᤗᤧ ᤂᤧᤵᤛᤢᤀᤠᤱ. ᤂᤢᤏᤧ᤹ ᤁᤢᤈᤠᤱᤅᤡᤴ ᤌᤧ᤺ᤰᤂᤢ॥ ᤀᤠᤸᤗ ᤂᤢᤏᤧ᤹ ᤗᤢᤱᤎᤠᤰᤁᤥ ᤗᤠᤱᤄᤣᤃᤧᤀᤠᤱ ᤘᤕᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡᤛᤢ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤎᤰᤁᤥ ᤛᤡᤃᤠᤱ ᤗᤧᤵᤔᤠᤱ ᤛᤠᤃᤡ ᤋᤣᤳ ᤆᤠᤰᤂᤢᤒᤠ ᤔᤧᤏᤡᤛᤢ॥ 31 ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤀᤡᤴ ᤛᤠᤑᤠᤋᤖᤧ ᤁᤢᤛ᤻ᤛᤠ ᤀᤣᤗᤡᤛᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤔᤧᤶᤓᤢ᤹ᤀᤣ ᤁᤢᤓᤰᤋᤠᤱᤅᤥᤀᤣ ᤐᤳᤇᤧᤏᤧᤓᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤋᤠᤵᤑᤧ᤺ᤸᤗᤡᤰ ᤔᤣ᤺ᤴ. ᤁᤖ ᤀᤠᤱᤃᤠ᤹ ᤁᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤠᤖᤖᤥ᥄” 32 ᤀᤠᤸᤗ ᤀᤣᤗᤡᤛᤠᤴᤏᤢ ᤗᤠᤶᤗᤥᤒᤠᤜᤠ᤹ᤀᤠᤱ ᤁᤢᤜᤡᤶᤔᤥᤀᤣ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤔᤧᤕᤢᤅᤧ ᤔᤧᤃᤖᤧ॥ ᤜᤠᤱᤅᤡᤸᤗᤧ ᤀᤡᤱᤄᤱ ᤁᤧᤛᤠᤒᤠ ᤌᤡᤰ ᤋᤃᤡ ᤐᤠᤱᤄᤢᤍᤣᤛᤢ. ᤁᤖ ᤂᤧᤴ ᤀᤡᤱᤛᤠᤒᤧᤴ ᤁᤧᤵᤔᤠ ᤋᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤣᤗᤡᤛᤠ᤺ᤸᤗᤧ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤔᤏᤠ ᤁᤧᤛᤧᤵᤐᤧᤸᤗᤧ ᤀᤠᤱᤃᤠ᤹ ᤀᤠᤎ᤻ᤃᤣᤰᤁᤡᤴ ᤑᤢ᤹ᤔᤠᤖᤧ ᤗᤠᤃᤡ ᤁᤢᤓᤠ ᤐᤠᤱᤄᤢ ᤋᤠᤛᤢᤒᤠ ᤌᤣ ᤂᤡᤏᤡ᤹ ᤁᤧᤴᤏᤡᤛᤢᤶᤔᤡᤴᤒᤡ᥅ ᤀᤥᤔᤧᤳᤋᤧᤶᤔᤧ᤹. ᤂᤧᤴ ᤀᤡᤱᤛᤠᤒᤧᤴ ᤁᤧᤳᤋᤠ᤺ᤸᤗᤧ ᤗᤠᤶᤎᤣ᤺ᤳᤋᤡᤴ ᤛᤢᤒᤧᤶᤔᤧ᤹. ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤆᤡᤍᤰ ᤋᤰᤋᤧᤶ ᤑᤳᤇᤧᤶᤔᤧ᤹॥ ᤌᤣ ᤂᤧᤸᤗᤧ ᤁᤢᤴᤍᤠᤱᤒᤧᤸᤗᤧ ᤁᤢᤗᤠᤱᤒᤢᤰᤁᤡᤴ ᤂᤧᤸᤗᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤋᤠᤖ ᤐᤵᤐᤠ ᤔᤣ᤺ᤶᤒᤡ᥅” 33 ᤂᤢᤏᤧ᤹ ᤁᤶᤓᤗ᤹ᤖᤡᤰ ᤂᤧᤱᤜᤠ᤹ᤏᤢ ᤐᤠᤖᤧᤀᤠᤱ ᤐᤳᤇᤧᤖ ᤂᤧᤴ ᤀᤡᤱᤛᤠᤒᤧᤴ ᤂᤠ ᤗᤡᤃᤰ ᤁᤧᤖᤧᤍᤩᤧ॥ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤐᤠ᤺ᤳᤋᤢ. “ᤁᤴ ᤂᤠᤵᤐᤢᤌᤩ᤺ᤱ ᤔᤧᤰᤔᤠᤛᤡᤔᤧᤴ ᤕᤜᤘᤣ ᤍᤠᤱᤒᤠᤗᤠᤶ ᤐᤥ᤺ᤰᤂᤧᤒᤠᤒᤡ᥄ ᤀᤠᤸᤗ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤌᤣᤀᤠᤱ ᤜᤠᤱᤄᤢᤱᤅᤠᤱ ᤕᤢᤱᤅᤠᤒᤠᤒᤣ᥅” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.