᥈ ᤜᤠᤱ 5 - LIFOTNTᤏᤠᤔᤠᤏᤧᤴ ᤜᤥᤖᤡᤰᤐᤠ ᤋᤢᤰᤔᤠᤗᤠᤶ ᤘᤣ᤺ᤳ 1 ᤏᤠᤔᤠᤏᤧᤴ ᤀᤖᤠᤔᤒᤠ ᤜᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ᤀᤥᤒᤠ ᤌᤰᤔᤥᤒᤠ ᤘᤕᤧ॥ ᤂᤢᤏᤧ᤹ ᤁᤢᤴᤍᤠᤱᤒᤧᤸᤗᤧ ᤁᤢᤏᤡᤔᤥ ᤗᤳᤇᤠ ᤕᤶᤒᤠ ᤔᤏᤠ ᤏᤢ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤔᤏᤠ ᤘᤕᤧ. ᤂᤢᤏᤧ᤹ᤗᤠᤶᤒᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤀᤖᤠᤔᤧᤴ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢᤱᤀᤠᤱ ᤘᤕᤧ॥ ᤂᤢᤏᤧ᤹ ᤛᤠ᤹ᤖᤡᤰ ᤁᤧᤎᤢᤶᤒᤠ ᤌᤰᤗᤡᤜᤠᤱ ᤘᤕᤧ. ᤁᤖ ᤀᤠᤗᤡ᤺ᤰᤗᤡ᤺ᤰᤐᤠ ᤜᤥᤖᤡᤰᤐᤠ ᤋᤢᤰᤔᤧᤸᤗᤧᤀᤠᤱ ᤋᤖᤢᤀᤠᤱ ᤘᤕᤧ॥ 2 ᤌᤡᤰᤗᤧᤱ ᤀᤠᤖᤠᤔᤗᤠᤶ ᤜᤡᤶᤃᤧᤗᤡᤒᤠᤜᤠ᤹ ᤔᤧᤒᤣᤀᤠᤱ ᤀᤡᤛᤪᤠᤀᤡᤗᤗᤠᤶᤒᤠ ᤗᤳᤇᤠ ᤆᤢᤰᤔᤠ ᤔᤧᤴᤇ᤻ᤕᤠᤎᤡᤰ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤸᤗᤧ ᤏᤠᤔᤠᤏᤖᤧ ᤁᤢᤔᤣ᤺ᤳᤋᤧᤴ ᤕᤠ᤺ᤶᤒᤰ ᤆᤥᤃᤢ ᤐᤡᤖᤢᤀᤠᤱ ᤘᤕᤧ॥ 3 ᤂᤧᤸᤗᤧ ᤁᤢᤴᤍᤠᤱᤔᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤍᤠᤱᤒᤧᤸᤗᤧ ᤛᤠᤔᤖᤡᤕᤠ ᤁᤧᤕᤢᤱᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤋᤢᤔᤢᤒᤠ ᤜᤧᤰᤁᤣ᤺ᤸᤗᤧ. ᤂᤧᤸᤗᤧ ᤂᤢᤏᤧ᤹ ᤜᤥᤖᤡᤰᤐᤠ ᤋᤢᤰᤔᤠᤗᤠᤶ ᤘᤣ᤺ᤴᤍᤢᤒᤠ ᤘᤕᤧᤔᤧᤴ᥄” 4 ᤁᤸᤗᤧᤆᤥᤃᤢᤸᤗᤧ ᤏᤠᤔᤠᤏᤧᤴ ᤂᤢᤏᤧ᤹ ᤁᤢᤴᤍᤠᤱᤒᤠᤀᤥ ᤐᤣᤀᤠᤱ ᤀᤡᤛᤪᤠᤀᤡᤗᤗᤠᤶ ᤔᤧᤍᤧᤶᤛᤢ ᤔᤧᤓᤧᤳᤋᤢᤔᤠ ᤂᤧᤴ ᤆᤢᤰᤔᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤳᤋᤢ॥ 5 ᤀᤠᤖᤠᤔᤒᤠ ᤜᤠᤱᤅᤡᤸᤗᤧ ᤏᤢᤃᤵ ᤐᤡᤖᤢ. “ᤐᤥᤱ᤹. ᤂᤧᤏᤧ᤹ ᤐᤣᤃᤧ᤹॥ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤀᤠᤱᤃᤠ᤹ ᤗᤳᤇᤠ ᤛᤰᤀᤡᤱᤄᤱ ᤜᤠᤰᤋᤢᤱᤍᤧᤛᤢᤱ॥” ᤁᤸᤗᤧᤆᤥᤃᤢᤸᤗᤧ ᤏᤠᤔᤠᤏᤧᤸᤗᤧ ᥉᥆.᥆᥆᥆ ᤕᤢᤵᤐᤠ ᤁᤢᤀᤠᤳ ᤏᤢ ᥌.᥆᥆᥆ ᤛᤠᤶᤔᤩᤠᤱ ᤁᤢᤀᤠᤳ ᤜᤧᤰᤁᤩᤠᤱ ᤌᤡᤒᤥᤱ ᤁᤢᤃᤠᤵ ᤆᤠᤱᤜᤠ᤹ ᤂᤢᤏᤧ᤹ ᤕᤠᤱᤛᤡᤱᤅᤠᤱ ᤑᤧᤖᤧ॥ 6 ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱᤅᤧᤀᤥ ᤋᤣ᤹ᤖᤢᤒᤠ ᤛᤰᤀᤡᤱᤄᤱᤅᤡᤴ ᤀᤰᤋᤱᤒᤠ ᤆᤥᤃᤧᤖᤥ—“ᤁᤴ ᤛᤰᤀᤡᤱᤄᤱᤅᤡᤴᤏᤢ ᤛᤥᤛᤥᤖᤡᤰ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤏᤠᤔᤠᤏᤧᤴ ᤐᤠᤱᤄᤢᤱᤅᤠᤱ ᤘᤠ᤹॥ ᤀᤠᤍᤠᤱᤒᤠᤖᤧ ᤂᤧᤸᤗᤧ ᤜᤥᤖᤡᤰᤐᤠ ᤁᤢᤍᤢᤰᤔᤧᤴ ᤘᤣ᤺ᤴᤍᤧ ᤐᤡᤖᤧ᤹ᤀᤥ॥” 7 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤂᤧᤴ ᤛᤰᤀᤡᤱᤄᤱᤅᤡᤴ ᤏᤡᤖᤢᤏᤢᤔᤧ᤺ᤴᤏᤣ ᤂᤢᤏᤧ᤹ ᤁᤢᤈᤠᤱᤅᤡᤴ ᤌᤧ᤺ᤰᤂᤢᤀᤠᤱ ᤐᤠ᤺ᤳᤋᤢ. “ᤌᤣ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤀᤠᤒᤡ᥅ ᤛᤧᤵᤔᤠ ᤏᤢ ᤁᤢᤜᤡᤱᤘᤧᤳ ᤆᤥ᤺ᤰᤔᤠ ᤛᤢᤰᤋᤢᤱᤒᤡ᥅ ᤁᤴ ᤔᤏᤠ᤺ᤸᤗᤧ ᤌᤣᤀᤠᤱ ᤂᤧᤴ ᤜᤥᤖᤡᤰᤐᤠ ᤋᤢᤰᤔᤠᤗᤠᤶ ᤘᤣ᤺ᤶᤔᤠᤖᤧ ᤗᤠᤃᤡ ᤁᤢᤓᤠ ᤔᤏᤠᤴ ᤀᤠᤱᤃᤠ᤹ᤀᤥ ᤐᤠᤱᤄᤢᤒᤠᤒᤣ᥅ ᤀᤥᤔᤧᤳᤋᤧ ᤛᤠ᤹ᤖᤧᤋ. ᤂᤧᤴ ᤀᤠᤱᤃᤠ᤹ᤏᤢ ᤂᤧᤔᤠ᤹ ᤆᤥ᤺ᤰᤔᤠ ᤁᤥ᤺ᤳᤗ ᤘᤠ᤹᥄” 8 ᤀᤠᤸᤗ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤀᤠᤵᤑᤣᤰ ᤁᤢᤈᤠᤱᤅᤡᤴ ᤌᤧ᤺ᤰᤂᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤀᤣᤗᤡᤛᤠ᤺ᤸᤗᤧ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤁᤴ ᤀᤡᤱᤄᤱᤅᤡᤴ ᤜᤠᤱᤅᤡᤴ ᤜᤠᤰᤋᤢ. “ᤀᤠᤍᤠᤱᤒᤠᤖᤧ ᤌᤣᤀᤠᤱ ᤁᤧᤈᤠᤱᤅᤡᤴ ᤁᤧᤎᤧ᤺ᤰᤂᤢᤒᤠᤒᤣ᥅ ᤂᤧᤴ ᤔᤏᤠᤴ ᤀᤠᤱᤃᤠ᤹ᤀᤥ ᤑᤧᤴᤗ. ᤜᤧᤰᤁᤩᤠᤱ ᤂᤧᤸᤗᤧ ᤀᤡᤛᤪᤠᤀᤡᤗᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤌᤡᤰ ᤘᤠ᤹ᤖᤧᤳᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤛᤢ᤹॥” 9 ᤁᤸᤗᤧᤆᤥᤃᤢᤸᤗᤧ ᤏᤠᤔᤠᤏᤧᤴ ᤁᤢᤀᤴᤜᤠ᤹ ᤜᤧᤰᤁᤩᤠᤱ ᤁᤢᤀᤴᤗᤠᤎᤠᤜᤠ᤹ᤏᤢ ᤐᤣ. ᤜᤧᤰᤁᤩᤠᤱ ᤀᤣᤗᤡᤛᤠ᤺ᤸᤗᤧ ᤁᤢᤗᤠᤶᤎᤣ᤺ᤳᤋᤥ ᤕᤧᤶᤛᤡᤱ॥ 10 ᤀᤣᤗᤡᤛᤠ᤺ᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤵᤔᤠᤖᤧ ᤗᤠᤃᤡ ᤀᤡᤱᤛᤠᤒᤠᤎᤡᤰ ᤐᤠᤱᤄᤢ. “ᤂᤧᤏᤧ᤹ ᤀᤠᤵᤑᤣᤰ ᤐᤣᤃᤧ᤹ᤀᤠᤱ ᤕᤷᤍᤏ ᤘᤜ᤺ᤱᤅᤥ ᤏᤢᤛᤡᤗᤧᤱ ᤘᤖᤢ᤺ᤶᤛᤡᤱᤅᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤧᤰᤛᤠᤴ ᤁᤢᤀᤡᤛᤡ᤺ᤰᤛᤡ᤺ᤰ ᤐᤥᤱ᤹. ᤜᤧᤰᤁᤩᤠᤱ ᤂᤧᤏᤧ᤹ ᤛᤢᤳᤌᤥ ᤁᤧᤒᤥᤱ᤹॥” 11 ᤁᤖ ᤏᤠᤔᤠᤏᤧᤴ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤀᤰᤂᤣ ᤗ᤹ᤖᤧᤖ ᤐᤣᤄᤧᤖᤧ. “ᤂᤢᤏᤧ᤹ ᤗᤠ᤺ᤰᤁᤠᤳ ᤗ᤺ᤴᤏᤠᤱ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱ ᤀᤡᤱᤄᤢ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤢᤰᤔᤠ ᤁᤧᤒᤵᤐᤠ ᤛᤶᤎᤠᤱ ᤁᤢᤜᤢᤰᤁᤡᤴ ᤜᤡᤰᤂᤢᤀᤠᤱ ᤜᤥᤖᤡᤰᤐᤠ ᤋᤢᤰᤔᤧᤸᤗᤧ ᤋᤖᤠᤱᤒᤠ ᤀᤠᤍᤢᤰᤔᤠᤴ ᤘᤣ᤺ᤴᤍᤢ ᤐᤡᤀᤠᤒᤡ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤠᤱ ᤘᤕᤧ॥ 12 ᤌᤣ ᤀᤡᤛᤪᤠᤀᤡᤗᤒᤠ ᤘᤜ᤺ᤱᤜᤠ᤹ᤏᤢ᤺ᤸᤗᤧ ᤍᤔᤛ᤻ᤁᤛᤒᤠ ᤀᤒᤠᤏᤠ ᤏᤢ ᤑᤠᤖᤐᤖ ᤘᤜ᤺ᤱᤜᤠ᤹ ᤏᤢᤒᤠ ᤔᤧᤈᤥ᤺ᤰᤏᤧᤴᤏᤠᤱᤒᤡ᥅ ᤌᤣ ᤀᤠᤱᤃᤠ᤹ ᤂᤧᤱᤜᤠ᤹ᤀᤥᤀᤣ ᤘᤖᤢ᤺ᤶᤛᤡᤱᤔᤠᤀᤠᤱ ᤛᤢᤳᤌᤥ ᤐᤥᤱᤔᤠ ᤔᤧᤛᤢᤰᤁᤠᤴᤏᤠᤱᤒᤡ᥅” ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤏᤢ᤺ᤰᤂᤧᤀᤠᤱ ᤁᤢᤛᤡᤰ ᤐᤥ᤺ᤰᤔᤠ ᤀᤡᤛᤣ᤺ᤱ ᤐᤣᤄᤧᤖᤧ॥ 13 ᤁᤖ ᤏᤠᤔᤠᤏᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤂᤧᤏᤧ᤹ ᤁᤢᤓᤠ ᤕᤶᤒᤠ ᤕᤠ᤺ᤶᤒᤰ ᤆᤥᤃᤧ᤹ ᤁᤧᤔᤧᤳᤋᤧᤸᤗᤧ ᤌᤣ ᤂᤧᤏᤧ᤹ ᤁᤧᤴᤈᤥᤃᤢᤶᤒᤠ ᤔᤧᤘᤕᤧᤏᤧᤴᤏᤠᤱᤒᤡ᥅ ᤂᤢᤏᤧ᤹ ᤘᤖᤢ᤺ᤶᤛᤡᤱᤅᤧ᤹ᤀᤠᤱ ᤛᤢᤳᤌᤥ ᤐᤥ᤺ᤰᤂᤧ᤹ ᤗ᤹ᤖᤡᤰ ᤁᤧᤔᤧᤳᤋᤧᤒᤠᤀᤥ ᤂᤧᤏᤧ᤹ ᤀᤠᤸᤗᤛᤠᤱ ᤌᤣᤀᤠᤱ ᤁᤧᤴᤈᤥᤃᤢᤴᤒᤠᤒᤣ᥅” 14 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤕᤥ ᤌᤠᤛᤡᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤕᤷᤍᤏ ᤘᤜ᤺ᤱᤅᤥ ᤀᤠᤵᤑᤣᤰ ᤏᤢᤛᤡᤗᤧᤱ ᤆᤡᤜᤢᤶ ᤆᤡᤜᤢᤶ ᤜᤢᤶᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤧᤰᤛᤠᤴ ᤁᤢᤀᤡᤛᤡ᤺ᤰᤛᤡ᤺ᤰ ᤐᤥ᤺ᤰᤂᤧᤀᤠᤱ ᤏᤠᤗᤡᤃᤧᤴ ᤌᤠᤱᤒᤧᤴ ᤜᤧᤰᤁᤣ ᤛᤣᤛᤣᤒᤠ ᤐᤥ᤺ᤰᤂᤧ॥ 15 ᤂᤧᤒᤩᤠᤱ ᤏᤠᤔᤠᤏᤧᤴ ᤏᤢ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤥ ᤔᤧᤏᤢ᤺ᤰᤂᤧ ᤔᤧᤒᤣ॥ ᤂᤧᤱᤜᤠ᤹ ᤁᤧᤖᤧᤰ ᤂᤢᤏᤧ᤹ ᤁᤢᤍᤃᤡ ᤔᤧᤕᤧᤶᤛᤡᤱ ᤜᤧᤰᤁᤩᤠᤱ ᤏᤠᤔᤠᤏᤖᤧ ᤐᤠ᤺ᤳᤋᤢ. “ᤀᤡᤛᤪᤠᤀᤡᤗᤀᤥᤖᤰ ᤏᤡᤱᤘᤠ᤹ᤑᤢᤔᤠᤱ ᤘᤠ᤹ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠ᤺ᤳᤋᤠᤱ ᤏᤡᤱᤘᤠ᤹ᤑᤢᤔᤠᤱ ᤜᤥᤵ ᤑᤠ᤹ᤀᤠᤱ ᤀᤠᤸᤗ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ॥ ᤆᤡᤛᤠᤈᤡ ᤀᤠᤸᤗ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤗᤠᤶ ᤁᤢᤓᤠ ᤜᤢᤰᤘᤠ ᤋᤠ᤺ᤰᤋᤧ᤹ᤀᤥ॥” 16 ᤀᤣᤗᤡᤛᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤳᤋᤢᤱᤒᤠ. ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤔᤡᤱᤅᤥ ᤔᤠᤱᤜᤧᤰᤁᤠᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤌᤣᤀᤠᤱ ᤔᤧᤍᤠ᤺ᤰᤁᤠᤴ॥” ᤂᤧᤴ ᤋᤠ᤺ᤰᤔᤠᤖᤧ ᤗᤠᤃᤡ ᤏᤠᤔᤠᤏᤖᤧ ᤂᤢᤏᤧ᤹ ᤁᤧᤛᤠᤰᤐᤠ ᤆᤠ᤺ᤳᤋᤢ ᤁᤖᤛᤠᤱ ᤂᤢᤏᤧ᤹ ᤋᤠ᤺ᤰᤔᤠ ᤔᤧᤍᤧᤴᤍᤧᤴ॥ 17 ᤏᤠᤔᤠᤏᤖᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤴᤍᤠ᤺ᤰᤋᤢᤴᤏᤧᤓᤃᤪ. ᤁᤧᤛᤧᤘᤠᤖᤥᤒᤧᤴ ᤀᤴᤕᤥᤰ ᤏᤧᤳᤇᤡᤖᤧ ᤂᤢᤴᤇᤡ᤹ ᤁᤢᤁᤢᤒᤠ ᤂᤠᤶ ᤋᤣ᤹ᤔᤠ ᤑᤠ᤺ᤰᤋᤠᤱᤅᤧ᤹॥ ᤌᤣᤀᤠᤱᤓᤧᤸᤗᤧ ᤀᤠᤸᤗᤀᤠᤱᤎᤥ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤸᤗᤧ ᤕᤜᤘᤣ ᤍᤠᤱᤒᤧᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤔᤠᤱᤅᤥᤀᤠᤱ ᤔᤡᤎᤡᤱᤔᤏᤠᤒᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤜᤢᤰᤘᤠᤜᤠ᤹ ᤔᤧᤍᤥᤴᤍᤢᤴ᤹॥ 18 ᤁᤖ ᤁᤴ ᤗᤳᤇᤠ ᤐᤠ᤺ᤴᤏᤥᤖᤰ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤗᤧᤵᤔᤡ ᤐᤡᤀᤠᤖ—ᤀᤠᤸᤗ ᤀᤠᤱᤃᤠ᤹ ᤀᤠᤴᤍᤠᤱᤒᤧᤴ ᤖᤡᤶᤔᤥᤏ ᤔᤠᤱᤜᤡᤶᤔᤥ ᤛᤠᤒᤥ᤺ᤴ ᤜᤒᤳ ᤑᤴᤇᤡᤱᤔᤠᤀᤠᤱ ᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤜᤢᤰᤁᤥ ᤋᤰᤛᤡᤱᤅᤠᤱ ᤗᤠ᤺ᤳ ᤜᤧᤰᤁᤩᤠᤱ ᤂᤢᤏᤧ᤹ ᤔᤠᤱᤛᤧᤘᤠ ᤆᤥ᤺ᤰᤁᤡᤸᤗᤧ ᤀᤠᤱᤃᤠ᤹ᤀᤠᤱ ᤛᤠᤶᤒᤥᤴ ᤐᤳᤋᤠ. ᤁᤸᤗᤧ ᤗᤠᤃᤡ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤗᤧᤵᤔᤡ ᤐᤡᤀᤠᤖ॥” 19 ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤏᤡᤱᤘᤠ᤹ ᤜᤠᤱᤜᤠᤱ ᤗ᤹ᤖᤡᤰ ᤐᤣᤃᤧ᤹॥” ᤏᤠᤔᤠᤏᤧᤴ ᤁᤢᤗᤠᤶᤔᤥ ᤀᤠᤈᤧᤳ ᤏᤠᤏᤠᤰᤗᤰ ᤁᤧᤖᤧᤖ ᤐᤳᤇᤧᤸᤗᤧ. 20 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤀᤣᤗᤡᤛᤠ᤺ᤸᤗᤧ ᤁᤢᤛᤧᤘᤠᤖᤥᤒᤠ ᤃᤣᤜᤈᤡᤴ ᤁᤢᤏᤡᤱᤘᤠ᤹ᤀᤥ ᤀᤰᤂᤣ ᤗ᤹ᤖᤧ. “ᤀᤠᤱᤃᤠ᤹ ᤀᤠᤴᤍᤠᤱᤒᤧᤸᤗᤧᤃ ᤁᤴ ᤀᤠᤖᤠᤔᤡ ᤏᤠᤔᤠᤏᤧᤸᤗᤧ ᤑᤧᤳᤋᤢᤒᤠ ᤜᤢᤰᤘᤠᤜᤠ᤹ ᤔᤧᤴᤍᤠ᤺ᤰᤁᤣ ᤐᤏᤢᤏᤢᤖᤡᤰ ᤂᤧᤴ ᤐᤠᤱᤄᤢᤍᤣᤛᤢ॥ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤁᤠᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤗᤥ᤺ᤰᤁᤠ ᤐᤣ᤺ᤰᤁᤠᤀᤠᤱ ᤂᤢᤏᤧ᤹ ᤛᤡ᤹ᤖᤢᤱ ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤁᤢᤓᤠ ᤜᤢᤰᤘᤠᤜᤠ᤹ ᤋᤠ᤺ᤰᤋᤢᤱ᤹॥” 21 ᤁᤸᤗᤧᤆᤥᤃᤢᤸᤗᤧ ᤃᤣᤜᤈᤡᤴ ᤏᤠᤔᤠᤏᤖᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤜᤠᤖᤠᤜᤠᤖᤠ ᤗᤥ᤺ᤰᤋᤧᤖ ᤐᤣ॥ ᤀᤠᤸᤗ ᤏᤠᤔᤠᤏᤖᤧ ᤂᤧᤴ ᤂᤢᤏᤧ᤹ ᤗᤧᤵᤔᤠᤱ ᤗᤥ᤺ᤰᤋᤧ ᤑᤧᤖᤧᤖ ᤐᤳᤇᤧᤒᤠ ᤏᤡᤛᤢᤀᤠᤱ ᤂᤧᤴᤏᤢ ᤋᤢᤶᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤀᤴᤗᤠᤎᤠᤀᤥᤗᤠᤶ ᤌᤠᤛᤡᤱᤅᤠᤱ ᤂᤧᤴ ᤛᤣ᤺ᤴᤍᤥᤛᤢ. “ᤌᤣ ᤁᤧᤖᤧᤰ ᤏᤢᤒᤠᤀᤣ ᤘᤠ᤹ᤒᤡ᥅” 22 ᤃᤣᤜᤈᤡ᤺ᤸᤗᤧ ᤏᤢᤃᤵ ᤐᤡᤖᤢ. “ᤁᤧᤖᤧᤰ ᤏᤢᤒᤠᤀᤣ ᤘᤠ᤹॥ ᤀᤠᤱᤃᤠ᤹ ᤀᤠᤴᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤠᤱᤅᤠᤱ ᤐᤠᤱᤄᤠᤱ ᤑᤧᤴᤇᤠᤱᤅᤠᤱ ᤘᤠ᤹. ‘ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ᤀᤥᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤛᤢᤶᤜᤠ᤹ᤗᤠᤶ ᤏᤧᤵᤑᤢ ᤌᤠᤱᤒᤧᤴ ᤔᤏᤠ ᤀᤠᤸᤗᤥ ᤂᤠᤖᤰ ᤑᤧᤖᤧᤛᤡᤀᤠᤱ ᤘᤠ᤹ᤛᤡ॥ ᤆᤡᤛᤠᤈᤡ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᥉.᥆᥆᥆ ᤁᤢᤀᤠ᤺ᤳ ᤕᤢᤵᤐᤠ ᤏᤢ ᤁᤢᤃᤠᤵ ᤏᤧᤳᤇᤡ ᤆᤠᤱ ᤐᤡᤖᤧᤛᤧ᤹ᤀᤥ॥’” 23 ᤏᤠᤔᤠᤏᤖᤧ ᤔᤧᤳᤋᤢ. “ᤐᤥᤱ᤹. ᥌.᥆᥆᥆ ᤁᤢᤀᤠ᤺ᤳ ᤕᤢᤵᤐᤠᤀᤣ ᤋᤣ᤹ᤖᤧᤒᤠ॥ ᤂᤧᤱᤜᤠ᤹ ᤋᤣ᤹ᤔᤠᤖᤧ ᤗᤠᤃᤡ ᤂᤢᤏᤧ᤹ ᤃᤣᤜᤈᤡ᤺ᤴ ᤐᤣᤗᤡ ᤑᤠᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤕᤢᤵᤐᤠ ᤁᤢᤀᤠ᤺ᤳᤜᤠ᤹ ᤏᤢ ᤁᤢᤃᤠᤵ ᤏᤧᤳᤇᤡ ᤆᤠᤱᤜᤠ᤹ ᤁᤢᤛᤢᤱᤔᤠ ᤏᤧᤳᤇᤡ ᤛᤢᤰᤘᤠᤀᤥ ᤀᤡᤄᤣ᤺ᤰᤂᤢ ᤐᤡᤖᤢ॥ ᤂᤢᤏᤧ᤹ ᤏᤧᤵᤑᤢ ᤁᤢᤛᤧᤘᤠᤖᤥᤒᤠᤜᤠ᤹ ᤂᤧᤴ ᤁᤢᤛᤢᤱᤔᤠᤜᤠ᤹ ᤐᤡᤖᤢᤛᤡ. ᤂᤧᤒᤩᤠᤱ ᤂᤢᤴᤇᤡ᤹ ᤂᤧᤴ ᤁᤢᤛᤢᤱᤔᤠᤜᤠ᤹ ᤁᤢᤕᤧᤛᤢᤀᤠᤱ ᤃᤣᤜᤈᤡ᤺ᤸᤗᤧ ᤁᤢᤍᤃᤡ ᤁᤢᤍᤃᤡ ᤗᤠᤱᤄᤣᤃᤧᤛᤡ॥” 24 ᤀᤠᤸᤗ ᤃᤣᤜᤈᤡ᤺ᤴ ᤁᤥ᤺ᤰᤔᤠᤀᤥ ᤁᤧᤖᤧ. ᤂᤧᤒᤩᤠᤱ ᤂᤧᤴ ᤁᤢᤛᤢᤱᤔᤠᤜᤠ᤹ ᤂᤧᤴ ᤏᤧᤵᤑᤢ ᤛᤣᤘᤠᤖᤥᤒᤠᤜᤠ᤹ᤗᤠᤶ ᤕᤠᤱᤛᤡᤱᤅᤠᤱ ᤜᤡᤶᤔᤥ ᤕᤢᤰᤂᤢ॥ ᤂᤢᤏᤧ᤹ ᤂᤧᤴ ᤏᤧᤵᤑᤢ ᤐᤠᤱᤄᤢᤍᤣᤛᤢᤛᤡᤀᤠᤱ ᤂᤢᤴᤇᤡ᤹ ᤐᤣᤄᤧᤖᤧᤛᤡ॥ 25 ᤂᤶᤓᤩᤠᤱ ᤂᤢᤏᤧ᤹ ᤛᤡᤃᤠᤱ ᤗᤠᤛᤧᤀᤠᤱ ᤂᤢᤏᤧ᤹ ᤁᤢᤴᤍᤠᤱᤒᤠ ᤀᤣᤗᤡᤛᤠ᤺ᤸᤗᤧ ᤁᤢᤍᤃᤡ ᤕᤧᤶᤛᤡᤱ॥ ᤀᤣᤗᤡᤛᤠ᤺ᤸᤗᤧ ᤂᤢᤏᤧ᤹ ᤛᤣ᤺ᤴᤗᤠᤵᤋᤢ. “ᤃᤣᤜᤈᤡᤀᤣ. ᤂᤧᤏᤧ᤹ ᤀᤠᤳᤋᤡ ᤁᤧᤒᤣᤀᤠᤱ ᤁᤧᤘᤕᤧᤒᤣ᥅” ᤃᤣᤜᤈᤡ᤺ᤸᤗᤧ ᤏᤢᤃᤵ ᤐᤡᤖᤢ. “ᤀᤠᤍᤠᤱᤒᤠᤖᤧ ᤁᤧᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤛᤧᤘᤠᤖᤥᤒᤧᤴ ᤀᤠᤳᤋᤡᤀᤠᤱ ᤔᤧᤶᤒᤣ᤺ᤰᤁᤣ ᤘᤕᤠᤱᤗᤥ᥅” 26 ᤁᤖ ᤀᤣᤗᤡᤛᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤸᤗ ᤂᤧᤴ ᤔᤏᤠᤴ ᤁᤢᤀᤴᤗᤠᤎᤠᤀᤥᤗᤠᤶ ᤌᤠᤛᤡᤱᤅᤠᤱ ᤂᤧᤏᤧ᤹ ᤋᤢᤶᤔᤠᤖᤧ ᤗᤠᤃᤡ ᤏᤢ᤺ᤰᤂᤧᤸᤗᤧ ᤌᤣ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤧᤏᤧ᤹ᤏᤢ ᤔᤧᤘᤕᤧᤏᤧᤴᤏᤠᤱᤒᤡ᥅ ᤕᤠᤱᤛᤠ ᤀᤡᤃᤪ ᤋᤣ᤺ᤵᤑᤢᤱ. ᤁᤡᤃᤪ ᤆᤤᤋᤢᤏ ᤛᤡᤱᤒᤢᤱᤜᤠ᤹. ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹. ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹. ᤐᤡᤵᤔᤠ ᤐᤡᤳᤜᤠ᤹ ᤏᤢ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤋᤠ᤺ᤰᤔᤠᤛᤡᤀᤠᤱ ᤘᤠ᤹ᤔᤠ ᤁᤴ ᤕᤧᤶᤔᤠᤱᤒᤡ᥅ 27 ᤏᤠᤔᤠᤏᤖᤧ ᤀᤠᤗᤡ᤺ᤰᤗᤡ᤺ᤰᤐᤠ ᤜᤥᤖᤡᤰᤐᤠ ᤁᤢᤍᤢᤰᤔᤧᤴ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤎᤡᤱᤍᤠᤱ ᤛᤠᤕᤥᤒᤥᤖᤠᤜᤠ᤹ᤀᤥ ᤀᤠᤵᤑᤠᤸᤗᤧᤛᤠᤱ ᤂᤡᤶᤛᤡᤱᤅᤠᤱ ᤘᤠ᤹॥” ᤂᤧᤒᤩᤠᤱ ᤃᤣᤜᤈᤡ᤺ᤴ ᤂᤢᤏᤧ᤹ ᤁᤢᤍᤃᤡᤗᤠᤶ ᤐᤣᤄᤧᤖᤧ. ᤜᤧᤰᤁᤩᤠᤱ ᤏᤠ᤺ᤱ ᤜᤧᤰᤁᤣ ᤂᤧᤴ ᤑᤢᤳᤋᤪᤡ᤺ᤱᤕᤠᤖᤡᤰ ᤀᤠᤗᤡ᤺ᤰᤗᤡ᤺ᤰᤐᤠ ᤜᤥᤖᤡᤰᤐᤠ ᤋᤢᤰᤔᤧᤸᤗᤧ ᤋᤖᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.