᥈ ᤜᤠᤱ 4 - LIFOTNTᤔᤣᤔᤣᤍᤢᤔᤠᤸᤗᤧ ᤁᤢᤏᤡ᤺ᤱᤃᤣ᤹ 1 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥᤒᤠ ᤌᤡᤰᤐᤠᤖᤧ ᤁᤢᤔᤣ᤺ᤳᤋᤡᤸᤗᤧ ᤀᤣᤗᤡᤛᤠᤴ ᤑᤧ᤺ᤰᤋᤢᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤀᤠᤱᤃᤠ᤹ ᤀᤠᤕᤧᤶᤒᤠᤴ ᤔᤠᤛᤡᤱᤄᤧᤖᤧ॥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤁᤧᤏᤡᤛᤢᤀᤠᤱᤅᤣ ᤘᤠ᤹॥ ᤁᤖ ᤀᤠᤸᤗ ᤀᤠᤱᤃᤠ᤹ ᤏᤧᤵᤑᤢ ᤀᤠᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤋᤣ᤹ᤔᤠᤛᤡᤀᤠᤱ ᤕᤥᤃ᤻ᤒᤠ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤁᤢᤛᤡᤱᤏᤠᤳᤛᤠᤒᤧᤴ ᤋᤠᤖ ᤐᤳ॥” 2 ᤀᤣᤗᤡᤛᤠ᤺ᤸᤗᤧ ᤂᤧᤴ ᤔᤣᤔᤣᤍᤢᤔᤠᤴ ᤏᤥᤃᤵ ᤐᤡᤖᤢ. “ᤀᤠᤱᤃᤠ᤹ ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤑᤠ᤹ᤏᤧᤒᤣ᥅ ᤂᤧᤏᤧ᤹ ᤁᤧᤜᤡᤶᤔᤥ ᤌᤣ ᤁᤧᤃᤳᤋᤢᤒᤣ᥅ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹॥” ᤂᤧᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤣᤛᤧᤘᤠᤖᤥᤔᤧᤸᤗᤧ ᤁᤠ᤺ᤴᤍᤩᤠᤀᤥ ᤀᤠᤈᤧ᤺ᤳᤇᤡᤰ ᤏᤡ᤺ᤱᤃᤣᤈᤡᤖᤰ ᤁᤳᤋᤢᤱ᤹ ᤘᤣ᤹ ᤌᤣᤀᤠᤱ ᤔᤧᤃᤳᤋᤠᤴ᤹॥” 3 ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤐᤥᤃᤧᤀᤠᤱ ᤂᤧᤏᤧ᤹ ᤁᤧᤖᤧᤰ ᤁᤧᤜᤡᤶᤒᤣᤛᤠᤱᤒᤠᤜᤠ᤹ ᤁᤢᤈᤠ᤹ ᤔᤧᤴᤕᤠᤰᤔᤏᤠᤒᤠ ᤁᤠᤴᤍᤩᤠᤜᤠ᤹ ᤏᤠ᤺ᤰᤋᤧ ᤋᤠᤖᤧᤛᤧ᤹॥ ᤛᤢ᤺ᤸᤗᤡᤰᤗᤰ ᤔᤧᤏᤠ᤺ᤰᤋᤧᤛᤧᤴᤏᤧ᤹॥ 4 ᤂᤧᤴ ᤀᤣᤃᤠᤱ ᤜᤡᤶᤔᤥ ᤐᤣᤃᤧ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛ᤻ᤛᤠ ᤏᤧᤳᤇᤡᤜᤠ᤹ᤀᤠᤱ ᤛᤡᤃᤠᤱ ᤕᤢᤰᤂᤧᤛᤧᤀᤠᤱ ᤗᤠᤶᤎᤣ᤺ᤳᤋᤧᤴ ᤛᤢᤒᤧ᤹॥ ᤁᤠ᤺ᤴᤍᤩᤠᤀᤥᤒᤠ ᤏᤡ᤺ᤱᤃᤣᤴ ᤂᤧᤴ ᤁᤧᤖᤧᤰ ᤂᤵᤐᤩᤠᤜᤠ᤹ᤀᤥ ᤗᤡᤱᤄᤧ᤹. ᤜᤶᤓᤩᤠᤱ ᤁᤧᤍᤡᤶᤒᤠ ᤂᤵᤐᤩᤠᤜᤠ᤹ ᤗᤠ᤺ᤳᤗᤠ᤺ᤳ ᤕᤢᤰᤂᤧ᤹॥” 5 ᤂᤧᤴ ᤔᤧᤴᤇᤢᤔᤠᤴ ᤀᤣᤗᤡᤛᤠᤴ ᤗᤠᤶᤒᤠ ᤛᤧᤖᤧᤀᤠᤱ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤏᤧᤳᤇᤡᤜᤠ᤹ ᤛᤡᤃᤠᤱ ᤕᤢᤰᤂᤢᤛᤡᤀᤠᤱ ᤗᤠᤶᤎᤣ᤺ᤳᤋᤧᤴ ᤛᤢᤒᤢ॥ ᤁᤢᤛ᤻ᤛᤠᤜᤠ᤹ᤖᤧ ᤂᤵᤐᤩᤠᤜᤠ᤹ ᤑᤧᤳᤋᤧᤳᤇᤢ ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤂᤵᤐᤩᤠᤜᤠ᤹ ᤌᤡᤶᤛᤢᤖ ᤋᤣ᤹ᤖᤢ॥ 6 ᤀᤠᤸᤗ ᤂᤧᤱᤜᤠ᤹ ᤂᤰᤐᤧᤳ ᤋᤡᤶᤛᤧ ᤆᤢᤖᤧᤀᤠᤱ ᤂᤢᤏᤧ᤹ ᤗᤳᤇᤠ ᤁᤢᤛ᤻ᤛᤠᤎᤡᤰ ᤔᤧᤳᤋᤢ. “ᤘᤣ᤹ᤛᤔᤠ ᤁᤠ᤺ᤴᤍᤩᤠᤴ ᤑᤧᤳᤋᤧ᤹॥” ᤁᤖ ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤸᤗᤃ ᤗᤳᤇᤠᤀᤠᤱ ᤁᤠ᤺ᤴᤍᤩᤠ ᤜᤥᤵ॥ ᤂᤧᤒᤩᤠᤱ ᤏᤡ᤺ᤱᤃᤣ᤹ ᤗ᤺ᤶᤔᤠᤀᤠᤱ ᤏᤠ᤹ᤖᤧ॥” 7 ᤂᤧᤴ ᤔᤣᤔᤣᤍᤢᤔᤧᤴ ᤐᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤁᤴ ᤐᤠ᤺ᤴᤏᤡᤴ ᤔᤧᤳᤋᤢ. ᤜᤧᤰᤁᤩᤠᤱ ᤂᤧᤸᤗᤧ ᤐᤠ᤺ᤳᤋᤢ. “ᤐᤣᤃᤧ᤹ᤀᤠᤱ ᤂᤧᤴ ᤏᤡ᤺ᤱᤃᤣᤴ ᤛᤱᤄᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤡᤱᤏᤠᤳᤋᤡᤴ ᤜᤢᤅᤧ᤹॥ ᤁᤧᤏᤶᤒᤧᤸᤗᤧ ᤂᤧᤏᤧ᤹ ᤏᤢ ᤁᤧᤛ᤻ᤛᤠᤜᤠ᤹ᤖᤧ ᤗᤠᤃᤡ ᤜᤡᤶᤒᤪᤠᤱ ᤆᤥ᤺ᤰᤔᤠ ᤁᤧᤛᤢᤰᤋᤢᤖᤥ॥” ᤛᤢᤏᤶᤔᤡ᤺ᤸᤗᤧ ᤁᤢᤛ᤻ᤛᤠᤴ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱ 8 ᤌᤡᤰᤕᤠᤴ ᤀᤣᤗᤡᤛᤠᤴ ᤛᤢᤏᤣᤔ ᤐᤠᤱᤈᤢᤶᤔᤥ ᤐᤣ॥ ᤂᤧᤵᤔᤥ ᤕᤠᤱᤛᤠ ᤁᤢᤴᤎᤣᤛᤠᤔᤠ ᤔᤧᤴᤇᤢᤔᤠᤎᤡᤰ ᤘᤕᤧ. ᤀᤣᤗᤡᤛᤠᤴ ᤆᤠᤔᤠ ᤌᤢᤱᤔᤠ ᤐᤡᤔᤠᤖᤧ ᤗᤠᤃᤡ ᤂᤧᤴ ᤛᤠ᤹ᤖᤡᤰ ᤜᤠᤍᤡᤱ ᤌᤰᤋᤧ॥ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤣᤗᤡᤛᤠᤴ ᤀᤠᤓᤧᤸᤗᤧᤛᤠᤱ ᤂᤧᤵᤔᤥᤗᤠᤶ ᤐᤥ᤺ᤰᤂᤧᤀᤠᤱ ᤐᤣ᤺ᤸᤗᤧ ᤆᤠᤔᤠ ᤌᤢᤱᤔᤠᤖᤧᤗᤠᤃᤡ ᤂᤢᤏᤧ᤹ ᤂᤧᤵᤔᤥ ᤗ᤺ᤴᤍᤧ॥ 9 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤕᤧᤶᤒᤠᤴ ᤔᤧᤳᤋᤢ. “ᤀᤠᤓᤧᤸᤗᤧᤛᤠᤱ ᤁᤵᤔᤥ ᤀᤠᤏᤡ᤹ᤗᤠᤶ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤔᤏᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤏᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥ 10 ᤂᤠᤶᤒᤢᤀᤥ ᤂᤢᤏᤧ᤹ ᤁᤢᤗᤠᤃᤡ ᤀᤠᤏᤡ᤹ ᤗᤳᤇᤠ ᤆᤢᤰᤐᤠ ᤕᤠᤰᤑᤠᤱᤎᤡᤰ ᤆᤥᤃᤢᤶ ᤐᤡᤖᤢᤶ᤹. ᤜᤧᤰᤁᤩᤠᤱ ᤂᤧᤵᤔᤥ ᤂᤢᤏᤧ᤹ ᤁᤢᤗᤠᤃᤡ ᤗᤳᤇᤠ ᤏᤧᤳᤏᤠ. ᤗᤳᤇᤠ ᤆᤵᤋᤧᤴ. ᤗᤳᤇᤠ ᤀᤣ᤺ᤰᤏᤠ᤺ᤶᤓᤣ᤹ ᤏᤢ ᤛᤣᤔᤡ ᤌᤡᤰ ᤕᤢᤰᤂᤢᤶ ᤐᤡᤖᤢᤶ᤹॥ ᤂᤧᤒᤩᤠᤱ ᤂᤢᤏᤧ᤹ ᤁᤵᤔᤥ ᤀᤠᤏᤡ᤹ᤀᤥ ᤋᤠ᤺ᤸᤗᤧ ᤂᤧᤵᤔᤥᤀᤣ ᤕᤢᤱᤔᤠ ᤛᤢᤰ॥” 11 ᤌᤡᤰᤕᤧᤴ ᤀᤣᤗᤡᤛᤠᤴ ᤋᤩᤧᤀᤠᤱ ᤁᤦᤛᤡᤀᤥᤒᤠ ᤁᤢᤕᤠᤰᤑᤠᤱᤅᤥ ᤐᤣ ᤜᤧᤰᤁᤩᤠᤱ ᤏᤠ᤺ᤶᤛᤡᤱᤔᤠ ᤑᤠ᤹ᤀᤠᤱ ᤗᤧᤖᤠᤱ ᤁᤠᤰᤐᤧᤳ ᤏᤧᤛᤡᤱ॥ 12 ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤃᤣᤜᤈᤡ᤺ᤴ ᤔᤧᤳᤋᤢ. “ᤂᤧᤴ ᤛᤢᤏᤶᤔᤡ ᤔᤧᤴᤇᤢᤔᤠᤴ ᤀᤢ᤺ᤳᤋᤧ ᤋᤠᤖᤧ᤹॥” ᤂᤧᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤀᤢ᤺ᤳᤋᤢ ᤋᤠᤖᤢ. ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤁᤢᤍᤃᤡ ᤂᤧᤴ ᤕᤧᤶᤛᤡᤱ॥ 13 ᤀᤣᤗᤡᤛᤠ᤺ᤸᤗᤧ ᤁᤢᤛᤧᤘᤠᤖᤥᤒᤧᤴ ᤔᤧᤳᤋᤢ. “ᤂᤧᤴ ᤔᤧᤴᤇᤢᤔᤠᤴ ᤔᤧᤳᤋᤧ᤹. ‘ᤂᤧᤏᤧ᤹ ᤀᤠᤴᤇᤡᤃᤣ ᤗᤠᤃᤡ ᤁᤴ ᤁᤧᤖᤧᤰ ᤋᤢᤰᤂᤣᤜᤠ᤹ ᤁᤧᤈᤥᤃᤢᤀᤠᤱ ᤘᤠ᤹॥ ᤀᤠᤸᤗ ᤂᤧᤏᤧ᤹ ᤁᤧᤗᤠᤃᤡ ᤌᤣ ᤆᤥ᤺ᤰᤔᤠ ᤛᤢᤰᤛᤢᤃᤧᤒᤣ᥅ ᤌᤣ ᤂᤧᤏᤧ᤹ ᤗᤧᤵᤔᤠᤱ ᤜᤠᤱᤅᤡᤴᤏᤢ ᤀᤡᤃᤪ ᤌᤰᤔᤥᤒᤧᤴᤏᤢ ᤀᤠᤴᤇᤡᤃᤣ ᤁᤧᤒᤠᤴ ᤐᤠ᤺ᤵᤔᤠ ᤛᤢᤰᤛᤢᤃᤧᤒᤡ᥅’” ᤂᤧᤸᤗᤧ ᤏᤢᤃᤵ ᤐᤡᤖᤢᤛᤡ. “ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤀᤠᤜᤡᤶ ᤕᤢᤱ᤹॥” 14 ᤀᤣᤗᤡᤛᤠ᤺ᤸᤗᤧ ᤃᤣᤜᤈᤡᤴ ᤔᤧᤳᤋᤢ. “ᤂᤧᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤌᤣ ᤆᤥ᤺ᤰᤔᤠ ᤐᤡᤔᤠ ᤛᤢᤰᤋᤢᤱᤒᤣ᥅” ᤃᤣᤜᤈᤡ᤺ᤸᤗᤧ ᤔᤧᤳᤋᤢ. “ᤂᤧᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤜᤥᤵ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤧᤶᤒᤠ᤺ᤴ ᤁᤠᤵᤐᤥᤒᤠ ᤆᤥᤰ॥” 15 ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤂᤧᤴ ᤔᤧᤴᤇᤢᤔᤠᤴ ᤀᤢ᤺ᤳᤋᤧ᤹॥” ᤂᤶᤓᤩᤠᤱ ᤃᤣᤜᤈᤡ᤺ᤸᤗᤧ ᤂᤧᤴ ᤀᤢ᤺ᤳᤋᤢ ᤋᤠᤖᤢ. ᤜᤧᤰᤁᤩᤠᤱ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤂᤧᤴ ᤕᤧᤶᤛᤡᤱ॥ 16 ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤔᤧᤳᤋᤢ. “ᤜᤵᤔᤧᤴ. ᤜᤠᤒᤠ ᤁᤴ ᤕᤧᤶ ᤀᤧᤳᤏᤡᤶᤔᤠ ᤂᤧᤏᤧ᤹ ᤁᤧᤓᤰᤌᤢᤱᤔᤥ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤧᤃᤳᤋᤢ᤹॥” ᤂᤧᤸᤗᤧ ᤔᤧᤳᤋᤢ. “ᤔᤣ᤺ᤴᤏᤠ. ᤔᤣ᤺ᤴᤏᤠ. ᤀᤠᤍᤠᤱᤒᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤣ. ᤂᤧᤏᤧ᤹ ᤁᤧᤛᤧᤘᤠᤖᤥᤔᤠᤴ ᤀᤡᤱᤔᤧᤗᤧᤰᤋᤠᤱᤅᤡᤴᤏᤧ᤹ᤀᤥ॥” 17 ᤁᤖ ᤂᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧ ᤜᤧᤰᤁᤩᤠᤱ ᤁᤧᤍᤠᤒᤠ ᤋᤱᤒᤣ ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢᤒᤠ ᤕᤧᤶᤔᤥᤀᤣ ᤂᤧᤸᤗᤧ ᤕᤧᤶᤒᤡᤳᤇᤠ ᤛᤠᤎᤡᤰ ᤛᤠᤃᤳᤋᤢ॥ 18 ᤂᤧᤴ ᤀᤅᤧ᤺ᤰᤘᤠᤴ ᤆᤩᤶᤒᤠ ᤐᤥ᤺ᤰᤂᤧᤀᤠᤱ ᤌᤡᤰᤕᤠᤴ ᤂᤢᤏᤧ᤹ ᤁᤢᤶᤒᤠᤖᤧᤀᤥ ᤐᤣ. ᤂᤧᤸᤗᤧ ᤁᤢᤶᤒᤠ ᤆᤠᤛᤢᤶᤏᤢ ᤁᤧᤕᤠᤰᤐᤠᤜᤠ᤹ᤏᤢ ᤛᤥᤖᤡᤰ ᤘᤕᤧ॥ 19 ᤂᤢᤏᤧ᤹ ᤀ᤺ᤰᤋᤧᤀᤠᤱ ᤁᤢᤶᤒᤠ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤎ᤻ᤃᤣᤰᤁᤡᤴ ᤋᤢᤰᤁᤠ᥄ ᤀᤠᤱᤃᤠ᤹ ᤀᤠᤎ᤻ᤃᤣᤰᤁᤡᤴ ᤋᤢᤰᤁᤠ᥄” ᤂᤢᤏᤧ᤹ ᤁᤢᤶᤒᤠᤖᤧ ᤗᤳᤇᤠ ᤛᤧᤘᤠᤖᤥᤒᤠ ᤌᤡᤰ ᤔᤧᤳᤋᤢ. “ᤂᤧᤴ ᤂᤢᤏᤧ᤹ ᤁᤢᤶᤔᤠᤖᤧᤀᤥ ᤋᤣ᤹ᤖᤧᤀᤠᤱ ᤐᤣᤃᤧ᤹॥” 20 ᤂᤧᤴ ᤛᤧᤘᤠᤖᤥᤒᤧᤸᤗᤧ ᤆᤢᤰᤐᤧᤴ ᤑᤥ᤺ᤰᤂᤢᤀᤠᤱ ᤁᤢᤶᤔᤠᤖᤧᤀᤥ ᤛᤎᤀᤠᤱ ᤀᤣᤃᤠᤱ ᤂᤧᤴ ᤆᤢᤰᤐᤧᤴ ᤁᤢᤶᤔᤠᤖᤧ ᤁᤢᤓᤰᤋᤢᤱᤔᤥ ᤗᤧᤴᤈᤥ ᤌᤠᤖᤡᤰ ᤜᤠᤒᤠ ᤕᤢᤅᤧᤃᤖᤧ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤧᤴ ᤛᤩᤧ॥ 21 ᤂᤧᤴ ᤔᤧᤴᤇᤢᤔᤠᤴ ᤐᤣᤀᤠᤱ ᤌᤠ᤺ᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤁᤢᤕᤢᤰᤏᤠᤀᤥ ᤆᤢᤰᤐᤧᤴ ᤏᤧᤛ᤻ᤛᤢᤎ ᤜᤧᤰᤁᤩᤠᤱ ᤂᤢᤏᤧ᤹ ᤗᤠᤶᤎᤣ᤺ᤳᤋᤡᤴ ᤛᤢᤒᤢᤀᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣ॥ 22 ᤂᤧᤒᤩᤠᤱ ᤂᤢᤏᤧ᤹ ᤁᤢᤕᤧᤶᤒᤠ᤺ᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤆᤡᤛᤠᤈᤡ ᤀᤠᤱᤃᤠ᤹ ᤀᤠᤗᤠᤃᤡ ᤛᤧᤘᤠᤖᤥᤒᤠ ᤌᤡᤰ ᤏᤢ ᤀᤍᤱ ᤌᤡᤰ ᤐᤠᤱᤄᤧ ᤑᤧᤴᤇᤧᤛᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤢᤰᤛᤢᤰ ᤜᤠᤖᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤥ ᤐᤣ᤺ᤰᤁᤠᤀᤠᤱ ᤏᤢ᤺ᤱᤅᤠ ᤑᤧᤴᤏᤠ॥” 23 ᤁᤢᤕᤧᤶᤒᤠ᤺ᤸᤗᤧ ᤛᤣ᤺ᤴᤍᤥᤛᤢ. “ᤀᤠᤀᤡᤴ ᤂᤢᤏᤧ᤹ᤀᤥ ᤌᤣᤀᤠᤱ ᤐᤣ᤺ᤰᤔᤠ ᤐᤥ᤺ᤰᤂᤧᤒᤣ᥅ ᤀᤠᤀᤡᤴ ᤗᤠᤍᤢᤵᤐᤠᤱ ᤔᤣ᤺ᤴ ᤏᤠ᤺ᤶᤛᤡᤱᤔᤠ ᤕᤧᤴ ᤛᤒᤠᤌᤀᤠᤱ ᤔᤣ᤺ᤴ॥” ᤂᤢᤏᤧ᤹ ᤔᤧᤳᤋᤢ. “ᤆᤩᤠᤛᤠᤱ ᤏᤢ᤹᥄” 24 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤀᤍᤱᤅᤥ ᤁᤖᤣ᤺ᤸᤗᤡ ᤕᤢᤰᤏᤠᤜᤠ᤹ ᤂᤣ᤺ᤰᤂᤢᤀᤠᤱ ᤁᤢᤛᤧᤘᤠᤖᤥᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤔᤧᤔᤧᤳᤏᤧᤴᤗ ᤌᤠᤖᤡᤰ ᤏᤠ᤺ᤳᤋᤧ᤹ᤖ ᤋᤣ᤹ᤖᤧ᤹ ᤜᤧᤰᤁᤩᤠᤱ ᤔᤧᤛᤢᤛᤧᤴᤏᤧ᤹॥” 25 ᤁᤶᤓᤗ᤹ᤖᤡᤰ ᤂᤢᤏᤧ᤹ ᤐᤣᤀᤠᤱ ᤁᤷᤔᤣᤗ ᤁᤥ᤺ᤰᤔᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤥ ᤁᤧᤖᤧ॥ ᤂᤧᤴ ᤔᤠ᤺ᤱᤄᤠᤗᤠᤶ ᤑᤧᤖᤧᤖ ᤐᤳᤇᤧᤒᤠ ᤏᤡᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤁᤢᤛᤧᤘᤠᤖᤥᤒᤠ ᤃᤣᤜᤈᤡ᤺ᤴ ᤔᤧᤳᤋᤢ. “ᤀᤥᤔᤧᤳᤋᤧᤛᤠ᤹ᤖᤧ᤹᥄ ᤂᤠᤏᤠ ᤁᤧᤓᤧᤶᤔᤧᤱᤃ ᤛᤢᤏᤶᤔᤡ ᤔᤧᤴᤇᤢᤔᤠᤴᤗᤥ᥄ 26 ᤂᤧᤏᤧ᤹ ᤗᤥ᤺ᤰᤋᤧ᤹ᤖ ᤐᤣᤃᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤔᤧ᤹ᤀᤠᤱ ᤛᤣ᤺ᤴᤍᤥᤛᤧ᤹. ‘ᤌᤣ ᤂᤧᤏᤧ᤹ ᤁᤧᤏᤢ᤹ ᤁᤧᤍᤠᤒᤡ᥅ ᤁᤧᤕᤧᤶᤒᤠ᤺ᤴ ᤏᤢ᤹ᤒᤡ᥅ ᤁᤧᤛ᤻ᤛᤠᤴ ᤏᤢ᤹ᤀᤠᤱ ᤘᤠ᤹ᤒᤡ᥅’” ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤃᤣᤜᤈᤡ᤺ᤴ ᤔᤧᤳᤋᤢ. “ᤁᤧᤖᤧᤰ ᤏᤢᤒᤠᤀᤣ ᤘᤠ᤹ᤖᤥ॥” 27 ᤁᤖ ᤀᤠᤸᤗ ᤂᤢᤏᤧ᤹ ᤁᤥ᤺ᤰᤔᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤥ ᤁᤧᤖᤧᤸᤗᤧ ᤂᤢᤏᤧ᤹ ᤀᤣᤗᤡᤛᤠ᤺ᤸᤗᤧ ᤁᤢᤗᤠᤱᤅᤡᤴ ᤌᤠᤵ ᤋᤧᤵᤛᤢ॥ ᤂᤢᤏᤧ᤹ ᤛᤧᤶᤔᤠᤖᤧ ᤗᤠᤃᤡ ᤃᤣᤜᤈᤡ᤺ᤴ ᤁᤳᤏᤠᤏᤠᤰ ᤋᤃᤡ ᤑᤧᤖᤧ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤔᤧᤳᤋᤢ. “ᤂᤧᤴ ᤗᤧᤖᤧ᤹᥄ ᤂᤢᤏᤧ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤔᤢᤀᤠᤱ ᤘᤠ᤹. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ᤗᤠᤶ ᤔᤠ᤹ᤖᤢᤀᤠᤱ ᤀᤠᤱᤃᤠ᤹ ᤌᤣᤀᤠᤱ ᤔᤧᤳᤋᤠᤱᤒᤠ ᤜᤥᤵ॥” 28 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤌᤣ ᤀᤠᤱᤃᤠ᤹ ᤂᤧᤏᤧ᤹ ᤕᤧᤶᤒᤡᤳᤇᤠᤛᤠ ᤏᤠ᤺ᤰᤏᤧᤀᤠᤱ ᤘᤕᤧᤒᤡ᥅ ‘ᤀᤠᤱᤃᤠ᤹ ᤏᤡᤱᤛᤠᤱ ᤆᤥ᤺ᤰᤔᤠᤀᤠᤱ ᤏᤡᤱᤛᤠᤱᤐᤢᤰᤔᤥ ᤔᤧᤎᤠᤛᤠᤱᤅᤡᤴᤏᤧ᤹’ ᤑᤠ᤹ᤀᤠᤱ ᤔᤧᤳᤏᤧᤀᤠᤱ ᤔᤧᤘᤕᤧᤏᤧᤶᤒᤡ᥅” 29 ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤃᤣᤜᤈᤡ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤧᤵᤛᤢᤒᤠ ᤋᤣ᤺ᤳᤋᤡᤸᤗᤧ ᤁᤧᤃᤣᤱᤅᤥ ᤂᤣ᤺ᤰᤂᤧ᤹॥ ᤁᤴ ᤀᤠᤱᤃᤠ᤹ ᤀᤠᤍᤰᤁᤠ᤺ᤳᤋᤧᤴ ᤋᤣ᤹ᤖᤧᤀᤠᤱ ᤗᤥ᤺ᤰᤋᤧ ᤐᤣᤃᤧ᤹॥ ᤂᤧᤏᤧ᤹ ᤗᤠᤶᤔᤥ ᤁᤢᤓᤠ ᤁᤧᤍᤢᤔᤢᤛᤡᤏᤧᤓᤃᤪ ᤂᤧᤱᤜᤠ᤹ ᤛᤧᤘᤠ ᤔᤧᤔᤧᤳᤋᤧᤛᤧᤴᤏᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤘᤠ ᤁᤧᤶᤔᤧᤳᤏᤧᤓᤃᤪ ᤂᤧᤱᤜᤠ᤹ ᤐᤠ᤺ᤴᤔᤧᤛᤠ᤺ᤳᤋᤧᤛᤧᤴᤏᤧ᤹॥ ᤁᤴ ᤀᤠᤱᤃᤠ᤹ ᤀᤠᤍᤰᤁᤠ᤺ᤳᤋᤡᤴ ᤂᤧᤴ ᤆᤢᤰᤐᤧᤸᤗᤧ ᤁᤢᤏᤠᤀᤥ ᤏᤧᤛ᤻ᤛᤧ ᤐᤡᤖᤧ᤹॥” 30 ᤁᤖ ᤆᤢᤰᤐᤧᤸᤗᤧ ᤁᤢᤶᤔᤠᤖᤧ ᤀᤣᤗᤡᤛᤠᤴ ᤔᤧᤳᤋᤢ. “ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤏᤢ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤁᤠᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤂᤧᤏᤧ᤹ ᤔᤧᤗᤧᤳᤏᤧᤴ᤹॥” ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤐᤥᤃᤧᤀᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤀᤣᤃᤠᤱ ᤌᤠᤛᤡᤱ॥ 31 ᤃᤣᤜᤈᤡ᤺ᤴᤃ ᤂᤢᤴᤇᤡ᤹ ᤋᤃᤡ ᤐᤣᤀᤠᤱ ᤂᤠᤴ ᤋᤰᤁᤠ᤺ᤳᤋᤡᤴ ᤂᤧᤴ ᤆᤢᤰᤐᤧᤸᤗᤧ ᤁᤢᤏᤠᤀᤥ ᤏᤧᤛ᤻ᤛᤢ ᤐᤡᤖᤢ. ᤁᤖ ᤂᤧᤵᤔᤥ ᤌᤣᤀᤠᤱ ᤀᤡᤰᤗᤠ ᤀᤡᤃᤪ ᤔᤡᤰᤛᤣᤴ ᤔᤧᤒᤥ᤺ᤰᤂᤧᤴ॥ ᤁᤸᤗᤧᤆᤥᤃᤢᤸᤗᤧ ᤀᤣᤗᤡᤛᤠᤴ ᤋᤢᤶᤔᤠᤖᤧ ᤗᤠᤃᤡ ᤃᤣᤜᤈᤡ᤺ᤴ ᤏᤢ᤺ᤰᤂᤧᤀᤠᤱ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤂᤧᤴ ᤆᤢᤰᤐᤧᤱᤃ ᤔᤧᤒᤥᤃᤧᤴᤗᤥ॥” 32 ᤀᤠᤸᤗ ᤀᤣᤗᤡᤛᤠᤴ ᤜᤡᤶᤔᤥ ᤁᤧᤖᤧᤸᤗᤧ ᤂᤢᤏᤧ᤹ ᤁᤢᤕᤢᤰᤏᤠᤀᤥ ᤁᤢᤶᤔᤠᤖᤧ ᤏᤧᤛ᤻ᤛᤢᤒᤠ ᤂᤧᤴ ᤆᤢᤰᤐᤧᤴ ᤛᤩᤧᤀᤠᤱ ᤏᤧᤛ᤻ᤛᤧᤒᤠ ᤋᤢᤔᤢ॥ 33 ᤂᤢᤏᤧ᤹ ᤕᤠᤰᤑᤠᤱᤅᤥ ᤗᤠᤛᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤧᤳᤇᤡᤖᤰ ᤛᤡᤃᤠᤱ ᤗᤠᤛᤧᤛᤡᤀᤠᤱ ᤂᤢᤏᤧ᤹ ᤕᤠᤰᤑᤠᤱᤅᤥᤒᤠ ᤗᤠᤶᤎᤣ᤺ᤳᤋᤡᤴ ᤛᤢᤒᤢ ᤜᤧᤰᤁᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢ॥ 34 ᤂᤧᤴ ᤀᤣᤃᤠᤱ ᤏᤧᤳᤏᤠᤀᤥ ᤌᤠ᤺ᤱ ᤗᤠᤛᤧᤀᤠᤱ ᤂᤢᤏᤧ᤹ ᤁᤢᤶᤒᤪᤠ᤺ᤴ ᤂᤧᤴ ᤆᤢᤰᤐᤧᤸᤗᤧ ᤁᤢᤶᤒᤪᤠᤀᤥ. ᤂᤢᤏᤧ᤹ ᤁᤢᤔᤡᤰᤁᤡᤴ ᤂᤧᤸᤗᤧ ᤁᤢᤔᤡᤰᤁᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢᤰᤁᤡᤴ ᤂᤧᤸᤗᤧ ᤁᤢᤜᤢᤰᤁᤥ ᤏᤧᤛ᤻ᤛᤢᤀᤠᤱ ᤂᤢᤏᤧ᤹ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤛᤶᤎᤠᤱ ᤗᤧᤶᤒᤧᤳ ᤏᤧᤛᤡᤱ॥ ᤀᤠᤸᤗ ᤂᤢᤏᤧ᤹ ᤂᤧᤸᤗᤧ ᤁᤢᤛᤶᤎᤠᤱ ᤗᤧᤶᤒᤧᤳ ᤏᤧᤛᤡᤱᤅᤡᤸᤗᤧ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤎᤰᤁᤡᤴ ᤁᤥᤛᤧᤖ ᤐᤣ॥ 35 ᤂᤧᤒᤩᤠᤱ ᤀᤣᤗᤡᤛᤠᤴ ᤐᤥᤃᤧᤀᤠᤱ ᤕᤠᤰᤑᤠᤱᤅᤥ ᤏᤠ ᤏᤢ ᤁᤳᤏᤠ ᤗᤠᤱᤄᤣᤃᤧ. ᤜᤧᤰᤁᤩᤠᤱ ᤕᤠᤶᤔᤥ ᤌᤡᤰᤗᤧᤱ ᤏᤧᤳᤏᤠᤀᤥ ᤌᤠ᤺ᤱ ᤗᤠᤛᤧᤀᤠᤱ ᤂᤢᤏᤧ᤹ ᤂᤧᤸᤗᤧ ᤁᤢᤛᤶᤎᤠᤱ ᤗᤧᤶᤒᤧᤳ ᤏᤧᤛᤡᤱ॥ ᤂᤧᤒᤩᤠᤱ ᤂᤧᤴ ᤆᤢᤰᤐᤧᤴ ᤏᤢᤛᤡᤗᤧᤱ ᤌᤠᤖᤡᤰ ᤜᤧᤰᤇᤡ᤺ᤱᤒᤠ ᤋᤣᤛᤧᤀᤠᤱ ᤁᤢᤔᤡᤰᤁᤡᤴ ᤜᤴᤍᤢ॥ 36 ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤃᤣᤜᤈᤡ᤺ᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤂᤧᤴ ᤔᤧᤴᤇᤢᤔᤠᤴ ᤀᤢ᤺ᤳᤋᤧ᤹॥” ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠᤴ ᤀᤢ᤺ᤳᤋᤢ॥ ᤂᤧᤴ ᤔᤧᤴᤇᤢᤔᤠᤴ ᤋᤩᤧᤀᤠᤱ ᤀᤣᤃᤠᤱ ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤛ᤻ᤛᤠ ᤆᤢᤰᤐᤧᤴ ᤋᤣ᤹ᤖᤧ᤹ᤀᤠᤱ ᤐᤣᤃᤧ᤹॥” 37 ᤂᤢᤏᤧ᤹ ᤛᤡᤃᤠᤱ ᤗᤠᤛᤧᤀᤠᤱ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤑᤴᤇᤡᤱ ᤜᤧᤰᤁᤩᤠᤱ ᤀᤣᤗᤡᤛᤠᤴ ᤁᤢᤗᤠᤱᤅᤥ ᤆᤡᤄᤰ ᤛᤧᤘᤠ ᤔᤧᤳᤋᤢ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤆᤢᤰᤐᤧᤴ ᤕᤠᤱᤛᤡᤱᤅᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧᤖᤥ॥ ᤀᤣᤗᤡᤛᤠ᤺ᤸᤗᤧ ᤁᤢᤈᤠᤴ ᤆᤠᤔᤠ ᤁᤧᤏᤢ᤹ᤒᤠ ᤆᤥᤃᤢ 38 ᤀᤣᤗᤡᤛᤠᤴ ᤏᤢ᤺ᤰᤂᤧᤀᤠᤱ ᤃᤡᤗᤃᤠᤗ ᤐᤣ. ᤜᤧᤰᤁᤩᤠᤱ ᤂᤧᤴ ᤋᤧᤱᤃᤵᤐᤥ ᤛᤠᤰ ᤐᤥᤃᤧᤀᤠᤱ ᤏᤧᤛ᤻ᤛᤧ॥ ᤀᤠᤸᤗ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤛᤢᤶᤜᤠ᤹ᤖᤧ ᤂᤢᤏᤧ᤹ ᤔᤧᤍᤢᤔᤢᤖ ᤔᤧᤘᤕᤧᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤧᤴ ᤔᤧᤳᤋᤢ. “ᤔᤡᤀᤥ ᤕᤶᤒᤠ ᤂᤵᤐᤩᤠᤴ ᤕᤢᤰᤂᤧ᤹ᤀᤠᤱ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤠᤈᤧᤳ ᤜᤠ᤺ᤰᤘᤠᤈᤡ ᤂᤴᤇᤧ᤹॥” 39 ᤂᤧᤱᤜᤠ᤹ᤀᤥᤒᤠ ᤌᤡᤰᤐᤠᤃ ᤛᤡᤛᤡᤶᤓᤧᤏᤠ ᤁᤥ᤺ᤳᤇᤧ ᤀᤡᤰᤋᤠᤵᤜᤠ᤹ᤀᤥ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤋᤠᤶᤓᤢᤱ ᤀᤡᤘᤠ᤺ᤳᤜᤠ᤹ ᤂᤥᤛᤢᤀᤠᤱ ᤂᤧᤸᤗᤧ ᤁᤢᤈᤠ᤹ᤜᤠ᤹ ᤁᤢᤍᤣ᤺ᤵᤑᤧᤖᤠ ᤁᤢᤗᤧ᤺ᤶ ᤛᤢᤅᤢ ᤋᤠᤖᤢ॥ ᤂᤧᤴ ᤌᤣᤒᤣ ᤑᤠ᤹ᤀᤠᤱ ᤜᤠ᤺ᤳᤗᤧᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤂᤧᤴ ᤛᤡᤱᤛᤣ᤹ᤜᤠ᤹ ᤜᤧᤃᤢᤀᤠᤱ ᤂᤧᤴ ᤜᤠ᤺ᤰᤘᤠ ᤌᤥ᤺ᤰᤔᤠ ᤂᤵᤐᤩᤠᤀᤥ ᤁᤣ᤺ᤳᤋᤢ॥ 40 ᤔᤏᤠᤜᤠ᤹ᤖᤧ ᤔᤧᤈᤖ ᤑᤠ᤹ᤀᤠᤱ ᤂᤧᤴ ᤜᤠ᤺ᤰᤘᤠᤴ ᤔᤧᤎᤠᤒᤢ. ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤆᤠᤔᤠ ᤔᤧᤜᤣ᤺ᤰᤋᤢᤸᤗᤧ ᤂᤧᤱᤜᤠ᤹ ᤔᤧᤀ᤺ᤰᤋᤧᤀᤠᤱ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤣ. ᤂᤧᤴ ᤂᤵᤐᤩᤠᤀᤥᤃ ᤀᤠᤛᤡᤛᤡᤒᤠ ᤏᤡᤱᤅᤡᤴ ᤕᤠᤰᤗᤥ᥄” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤆᤠᤔᤠ ᤔᤧᤴᤇᤢᤰᤋᤢᤴ॥ 41 ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢᤛᤡ. “ᤁᤢᤓᤠ ᤑᤣ᤹ᤖᤢᤶᤈᤡ ᤋᤠᤖᤧᤶᤔᤧ᤹॥” ᤂᤢᤏᤧ᤹ ᤂᤧᤴ ᤂᤵᤐᤩᤠᤀᤥ ᤌᤧᤰᤋᤢᤀᤠᤱ ᤔᤧᤳᤋᤢᤛᤡ. “ᤀᤠᤸᤗ ᤁᤴᤜᤠ᤹ ᤆᤠᤔᤠ ᤐᤡᤖᤧᤶᤛᤡᤶᤔᤧ᤹॥” ᤁᤴ ᤕᤧᤶᤔᤥ ᤂᤧᤴ ᤂᤵᤐᤩᤠᤀᤥᤒᤠ ᤁᤢᤈᤠᤀᤥ ᤀᤠᤔᤔᤒᤠ ᤌᤣᤀᤠᤱ ᤜᤥ᤺ᤵᤋᤧ॥ ᤁᤡᤵ ᤌᤡᤰ ᤔᤏᤠᤜᤠ᤹ᤖᤧ ᤁᤢᤈᤠ ᤔᤧᤈ 42 ᤒᤠᤗ-ᤛᤗᤡᤛᤠᤒᤠ ᤁᤢᤓᤠ ᤔᤏᤠᤎᤡᤰᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤗᤠᤃᤡ ᤋᤃᤡ ᤁᤧᤍᤢᤶᤒᤠ ᤏᤡᤒᤥᤱ ᤜ᤺ᤰᤛᤡ ᤂᤖᤧ᤺ᤱ ᤏᤢ ᤁᤢᤓᤠ ᤂᤠᤖᤰ ᤁᤧᤍᤢᤶᤒᤠ ᤁᤢᤈᤠ ᤋᤠᤵᤔᤠᤜᤠ᤹ ᤋᤠᤖᤢᤀᤠᤱ ᤋᤩᤧ॥ ᤀᤣᤗᤡᤛᤠ᤺ᤸᤗᤧ ᤂᤧᤴ ᤔᤧᤳᤋᤢ. “ᤂᤧᤴ ᤁᤢᤈᤠᤴ ᤁᤴ ᤔᤏᤠᤜᤠ᤹ ᤆᤠᤔᤠ ᤐᤡᤖᤧᤛᤧ᤹॥” 43 ᤂᤢᤏᤧ᤹ ᤁᤢᤛᤧᤘᤠᤖᤥᤒᤧᤸᤗᤧ ᤔᤧᤳᤋᤢ. “ᤁᤡᤵ ᤌᤡᤰ ᤔᤏᤠᤜᤠ᤹ᤖᤧ ᤗᤠᤃᤡ ᤁᤔᤩᤠ᤺ᤰᤗᤧᤖᤰᤁ ᤀᤠᤱᤃᤠ᤹ ᤀᤠᤰᤂᤣᤀᤠᤱ ᤋᤧᤰᤋᤢᤱᤛᤡᤱᤒᤠᤒᤣ᥅” ᤁᤖ ᤀᤣᤗᤡᤛᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤔᤏᤠᤜᤠ᤹ ᤁᤴ ᤆᤠᤔᤠ ᤐᤡᤖᤧᤛᤧ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤂᤧᤱᤜᤠ᤹ᤖᤧ ᤔᤧᤈᤀᤠᤱ ᤁᤢᤓᤠ ᤏᤴᤗᤥ॥’” 44 ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤢᤰᤂᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤔᤧᤈᤀᤠᤱ ᤁᤢᤓᤠ ᤏᤖᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.