᥈ ᤜᤠᤱ 3 - LIFOTNTᤀᤡᤛᤪᤠᤀᤡᤗ ᤏᤢ ᤔᤥᤀᤠᤒᤧᤴ ᤌᤱ ᤌᤰᤋᤧᤛᤡ 1 ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤀᤠᤜᤠᤒᤖᤧ ᤁᤢᤛ᤻ᤛᤠ ᤕᤥᤖᤠᤔᤧᤴ ᤛᤠᤔᤖᤡᤕᤠᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 2 ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ. ᤁᤖ ᤂᤢᤏᤧ᤹ ᤁᤢᤶᤒᤠ ᤏᤢ ᤁᤢᤶᤔᤠᤖᤧ ᤆᤥᤃᤧᤛᤢᤒᤠ ᤁᤢᤀᤡᤛᤡ᤺ᤰᤁᤣᤃ ᤔᤣ᤺ᤴ॥ ᤂᤢᤏᤧ᤹ ᤁᤢᤶᤒᤠᤖᤧ ᤆᤥᤃᤢᤒᤠ ᤒᤠᤗ ᤔᤠᤱᤅᤡᤸᤗᤧᤴ ᤛᤣᤛᤣ ᤗᤢᤱᤅᤡᤴ ᤂᤢᤏᤧ᤹ ᤜᤠ᤹ᤕᤠᤰ ᤀᤠ᤺ᤰᤂᤢᤍᤣᤛᤢ॥ 3 ᤜᤧᤰᤁᤣᤛᤠᤱ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤀᤡᤛᤪᤠᤀᤡᤗᤧᤴ ᤆᤥ᤺ᤰᤔᤠ ᤐᤠᤱᤄᤢᤒᤠ ᤗᤠᤕᤥᤜᤠ᤹ ᤂᤢᤏᤧ᤹ ᤆᤥᤃᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤗᤠᤕᤥᤜᤠ᤹ᤗᤠᤶ ᤔᤧᤏᤢ᤺ᤰᤂᤧᤴ॥ 4 ᤔᤥᤀᤠᤒᤒᤠ ᤜᤠᤱ ᤔᤣᤛᤠ᤺ᤸᤗᤧ ᤔᤧᤸᤗᤢᤰᤜᤠ᤹ ᤜᤡᤱᤄᤢᤛᤡᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤗᤠᤅᤧᤴᤇᤡᤱ ᤌᤡᤰ ᤔᤧᤸᤗᤢᤰᤛᤠ᤺ᤳᤜᤠ᤹ ᤏᤢ ᤗᤠᤅᤧᤴᤇᤡᤱ ᤌᤡᤰ ᤌᤢ᤺ᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤡᤰᤁᤡᤴ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤐᤡᤔᤠ ᤁᤧᤒᤥᤱᤒᤠ ᤘᤕᤧ॥ 5 ᤁᤖ ᤀᤠᤜᤠᤒᤧᤴ ᤛᤩᤧᤀᤠᤱ ᤀᤣᤃᤠᤱ ᤔᤥᤀᤠᤒᤒᤠ ᤜᤠᤱᤅᤡᤴ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧ॥ 6 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤕᤧᤶᤔᤥ ᤕᤥᤖᤠᤔ ᤜᤠᤱᤅᤡᤴ ᤛᤠᤔᤖᤡᤕᤠᤗᤠᤶ ᤕᤧᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤑᤢᤰᤂᤢᤛᤡ॥ 7 ᤂᤢᤏᤧ᤹ ᤕᤜᤢᤍᤠᤒᤠ ᤕᤜᤥᤛᤠᤐᤠᤋ ᤜᤠᤱᤅᤡᤴᤏᤠᤱ ᤁᤴ ᤀᤡᤱᤄᤱᤅᤡᤴ ᤜᤠᤰᤋᤢ. “ᤔᤥᤀᤠᤒᤒᤠ ᤜᤠᤱᤅᤡᤴ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤔᤥᤀᤠᤒᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤌᤣ ᤂᤧᤏᤧ᤹ ᤀᤠᤱᤃᤠ᤹ᤏᤢ ᤁᤧᤒᤣ᤺ᤰᤐᤡ᥅” ᤕᤜᤥᤛᤠᤐᤠᤋᤖᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤂᤧᤏᤧ᤹ᤏᤢ ᤐᤣ᤺ᤰᤁᤠ॥ ᤀᤠᤱᤃᤠ᤹ ᤂᤧᤏᤧ᤹ᤀᤣ ᤜᤧᤰᤋᤱᤒᤠᤀᤠ. ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤧᤏᤧ᤹ ᤁᤧᤔᤏᤠ ᤜᤧᤰᤋᤱᤒᤠᤛᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤴᤜᤠ᤹ ᤂᤧᤏᤧ᤹ ᤁᤧᤀᤴᤜᤠ᤹ ᤜᤧᤰᤋᤱᤒᤠᤛᤡᤖᤥ॥” 8 ᤂᤧᤒᤩᤠᤱ ᤕᤜᤥᤛᤠᤐᤠᤋᤖᤧ ᤛᤣ᤺ᤴᤍᤥᤛᤢ. “ᤀᤠᤏᤡ᤹ ᤀᤠᤳᤋᤡ ᤐᤡᤛᤠᤱᤗᤠᤶ ᤑᤵᤔᤠᤛᤡᤒᤣ᥅” ᤕᤥᤖᤠᤔᤖᤧ ᤏᤢᤃᤵ ᤐᤡᤖᤢ. “ᤀᤣᤍᤥᤔᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥᤗᤠᤶ॥” 9 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤕᤜᤢᤍᤠᤒᤠ ᤜᤠᤱᤅᤡᤴᤏᤢ ᤜᤧᤰᤁᤩᤠᤱ ᤀᤣᤍᤥᤔᤒᤠ ᤜᤠᤱᤅᤡᤴᤏᤢ ᤛᤥᤖᤡᤰ ᤐᤣ॥ ᤂᤧᤱᤜᤠ᤹ ᤏᤢᤛᤡ ᤕᤧᤴ ᤌᤧᤶᤒᤠ ᤋᤠᤰᤔᤧᤃᤴᤍᤧᤖ ᤗᤠᤱᤔᤧᤄᤣᤃᤧᤀᤠᤱ ᤀᤣᤃᤠᤱ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤃᤡ ᤏᤢ ᤁᤰ ᤁᤧᤃᤢᤒᤠ ᤌᤰᤛᤠᤜᤠ᤹ᤖᤧ ᤗᤠᤃᤡ ᤆᤫᤠ᤺ᤳᤋᤡᤴ ᤔᤧᤃᤧ॥ 10 ᤂᤶᤓᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤐᤠ᤺ᤳᤋᤢ. “ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤛᤢᤶᤓᤢᤀᤣ ᤜᤠᤱᤜᤠ᤹ ᤔᤥᤀᤠᤒᤖᤧ ᤁᤢᤜᤢᤰᤁᤥ ᤌᤠᤔᤠᤖᤧ ᤗᤠᤃᤡᤖᤰ ᤀᤠᤓᤧᤳᤋᤧᤒᤠᤒᤡ᥅” 11 ᤁᤖ ᤕᤜᤥᤛᤠᤐᤠᤋᤖᤧ ᤛᤣ᤺ᤴᤗᤠᤵᤋᤢᤛᤡ. “ᤕᤜᤘᤣ ᤍᤠᤱᤒᤧᤴ ᤀᤠᤏᤡ᤹ ᤛᤣ᤺ᤴᤍᤥᤔᤠ ᤛᤢᤰᤔᤠᤖᤧ ᤗᤠᤃᤡ ᤌᤣ ᤁᤵᤔᤥ ᤂᤢᤏᤧ᤹ ᤁᤢᤓᤠ ᤗᤳᤇᤠ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤥ᤺ᤵᤐᤡ᥅” ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥᤒᤠ ᤗᤳᤇᤠ ᤌᤡᤰᤐᤠᤖᤧ ᤐᤠ᤺ᤳᤋᤢ. “ᤛᤠᤑᤠᤋᤖᤧ ᤁᤢᤛ᤻ᤛᤠ ᤀᤣᤗᤡᤛᤠᤴ ᤁᤵᤔᤥ ᤘᤠ᤹॥ ᤂᤢᤏᤧ᤹ ᤀᤣᤗᤡᤕᤠ᤺ᤸᤗᤧ ᤁᤢᤜᤢᤰᤁᤥ ᤆᤫᤠ᤺ᤳ ᤁᤧᤃᤣ᤺ᤵᤐᤠ ᤁᤢᤓᤠ᤹ᤒᤠᤱ ᤘᤕᤧ॥” 12 ᤕᤜᤥᤛᤠᤐᤠᤋᤖᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤈᤠ᤺ᤰᤁᤧᤴ ᤂᤧᤴᤏᤢ ᤘᤠ᤹॥” ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤏᤢ ᤕᤜᤥᤛᤠᤐᤠᤋᤧᤴ ᤜᤧᤰᤁᤩᤠᤱ ᤀᤣᤍᤥᤔᤒᤠ ᤜᤠᤱᤅᤡᤴ ᤀᤣᤗᤡᤛᤠᤀᤥ ᤔᤧᤒᤣ॥ 13 ᤀᤣᤗᤡᤛᤠ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤔᤧᤳᤋᤢ. “ᤀᤠᤏᤡ᤹ ᤗᤢᤶᤔᤥ ᤌᤣ ᤛᤰᤛᤰᤁᤠᤱᤒᤣ᥅ ᤀᤠᤍᤠᤱᤒᤠᤖᤧ ᤁᤧᤶᤒᤠᤖᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤀᤠᤍᤠᤱᤒᤠᤖᤧ ᤁᤧᤶᤔᤠᤖᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤐᤣᤃᤧᤶᤔᤧ᤹ᤒᤠ॥” ᤀᤡᤛᤪᤠᤀᤡᤗᤒᤠ ᤜᤠᤱ ᤕᤥᤖᤠᤔᤖᤧ ᤂᤢᤏᤧ᤹ ᤏᤢᤃᤵ ᤐᤡᤖᤢ. “ᤔᤣ᤺ᤴ. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤛᤢᤶᤓᤢᤀᤣ ᤜᤠᤱᤜᤠ᤹ ᤔᤥᤀᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤕᤠᤵᤔᤡ ᤌᤠᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤢ᤺ᤳᤋᤡᤃᤧᤒᤠᤖᤥ॥” 14 ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤳᤋᤢᤱᤒᤠ. ᤛᤧᤰᤂᤠᤀᤣ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤔᤠᤱᤜᤧᤰᤁᤠᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤕᤜᤢᤍᤠᤒᤠ ᤜᤠᤱ ᤕᤜᤥᤛᤠᤐᤠᤋᤧᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤴᤒᤠ ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤔᤡᤰᤛᤢᤰᤐᤠ ᤌᤡᤰᤗᤧᤀᤠᤱ ᤀᤥᤔᤧᤔᤧᤳᤏᤧᤶᤒᤠ ᤘᤕᤧ ᤀᤡᤃᤪ ᤏᤡᤏᤡ ᤂᤧᤶᤄᤧᤶᤔᤠᤱ ᤔᤧᤗᤠᤵᤏᤧᤶᤒᤠ ᤘᤕᤧ॥ 15 ᤁᤖ ᤀᤠᤸᤗ ᤀᤴᤔᤣ ᤁᤧᤔᤢᤱᤒᤠ ᤌᤡᤰ ᤀᤠᤱᤃᤠ᤹ ᤀᤠᤗᤠᤃᤡ ᤋᤠᤖᤧ᤹॥” ᤀᤠᤸᤗ ᤀᤴᤔᤣ ᤁᤧᤔᤢᤱᤒᤧᤸᤗᤧ ᤀᤴᤔᤣᤴ ᤔᤢᤰᤂᤢᤖ ᤐᤳᤇᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤀᤣᤗᤡᤛᤠᤀᤥ ᤌᤩᤧ. 16 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤴ ᤆᤫᤠ᤺ᤳ ᤁᤧᤜᤥᤵᤐᤠ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤐᤠᤰᤗᤢᤶ ᤐᤠᤰᤗᤢᤶ ᤗ᤹ᤖᤡᤰ ᤑᤠ᤺ᤴᤍᤧᤶᤔᤧ᤹॥ 17 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤡᤏᤡ᤹ ᤛᤢᤖᤡᤳ ᤁᤧᤈᤱᤅᤠᤱ ᤁᤧᤴᤏᤡᤛᤢᤶᤔᤡᤴ᤹ ᤘᤜᤡᤳ ᤘᤃᤣ᤺ᤰᤔᤠᤀᤠᤱ ᤁᤧᤴᤏᤡᤛᤢᤶᤔᤡᤴ᤹. ᤜᤧᤰᤁᤣᤛᤠᤱ ᤁᤴ ᤏᤧᤏᤧᤒᤠᤍᤧᤴᤏᤡᤴ ᤆᤫᤠ᤺ᤳᤋᤡᤸᤗᤧ ᤘᤧᤸᤗᤧᤰ ᤋᤡᤶ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤢ ᤂᤡᤏᤡ᤹ ᤐᤡᤵᤔᤠ ᤐᤡᤳᤜᤠ᤹ᤖᤧ ᤜᤧᤰᤁᤩᤠᤱ ᤘᤣ᤹ ᤌᤰᤛᤠᤜᤠ᤹ᤖᤧ ᤆᤫᤠ᤺ᤳ ᤁᤧᤎᤢᤅᤢᤶ᤹॥ 18 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤱᤃ ᤁᤢᤈᤥ᤺ᤰᤁᤧᤏᤢ᤹ᤒᤠ ᤐᤠ᤺ᤴᤗᤥ॥ ᤂᤢᤏᤧ᤹ ᤔᤥᤀᤠᤒᤡᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤛᤡ᤹॥ 19 ᤕᤰ ᤁᤧᤏᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ ᤏᤢ ᤁᤧᤖᤧᤰ ᤕᤶᤒᤠ ᤐᤠᤱᤈᤢᤶᤜᤠ᤹ ᤂᤡᤏᤡ᤹ ᤁᤧᤏᤠ᤺ᤶᤍᤢᤶᤛᤡᤶ᤹॥ ᤁᤧᤖᤧᤰ ᤏᤢᤒᤠ ᤛᤡᤱᤒᤢᤱᤜᤠ᤹ ᤂᤡᤏᤡ᤹ ᤁᤧᤍᤠᤅᤢᤶᤔᤠᤱ ᤁᤧᤛᤥ᤺ᤴᤍᤢᤶ᤹. ᤜᤧᤰᤁᤩᤠᤱ ᤁᤧᤖᤧᤰ ᤆᤫᤠ᤺ᤳ ᤘᤍᤢᤴᤍᤠᤰᤘᤠᤜᤠ᤹ ᤁᤧᤛᤠᤰᤋᤢᤶ᤹. ᤜᤧᤰᤁᤩᤠᤱ ᤏᤢᤒᤠ ᤀᤡᤰᤋᤠᤵᤜᤠ᤹ ᤗᤢᤱᤜᤠ᤹ᤖᤧ ᤁᤧᤎᤡᤶᤛᤢᤶᤔᤠᤱ ᤁᤧᤔᤧᤰᤂᤢᤶ᤹॥” 20 ᤁᤢᤍᤠ᤺ᤴᤍᤡᤰᤔᤠ ᤜᤵᤔᤧᤴ ᤋᤠᤏᤠᤶᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤧᤶᤔᤥ ᤜᤰᤆᤄᤳ ᤀᤧᤍᤥᤔ ᤗᤧᤵᤔᤠᤱᤗᤠᤶ ᤆᤫᤠ᤺ᤳ ᤁᤢᤱᤔᤠ ᤜᤣ᤺ᤰᤋᤧ᥄ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤁᤡᤴ ᤆᤫᤠ᤺ᤳᤋᤡᤸᤗᤧ ᤋᤡᤶᤛᤧ॥ 21 ᤜᤠᤒᤠ ᤁᤴ ᤗᤢᤶᤔᤥ ᤜᤠᤱᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤔᤧᤓᤧᤖᤧᤀᤠᤱ ᤔᤧᤘᤠ᤹ ᤑᤠ᤹ᤀᤠᤱ ᤁᤧᤖᤧᤰ ᤔᤥᤀᤠᤒᤡᤜᤠ᤹ᤖᤧ ᤔᤧᤄᤧᤵᤛᤢ॥ ᤁᤸᤗᤧᤆᤥᤃᤢᤸᤗᤧ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤕᤠᤱᤔᤠ ᤁᤧᤛᤢᤰᤐᤠ ᤁᤧᤖᤧᤰ ᤌᤠᤱᤒᤧᤴ ᤏᤢ ᤂᤍᤠᤰᤔᤡ ᤔᤏᤠᤜᤠ᤹ ᤔᤧᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡ᤺ᤴᤍᤥᤀᤥ ᤔᤧᤕᤢᤰᤂᤢᤛᤡ॥ 22 ᤀᤠᤸᤗ ᤂᤧᤱᤜᤠ᤹ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤀᤠᤴᤍᤣᤴ ᤔᤥᤒᤥᤃᤧᤸᤗᤧ ᤆᤫᤠ᤺ᤳᤋᤥ ᤏᤠᤶ ᤑᤡᤸᤗᤡᤱ ᤑᤡᤸᤗᤡᤱ ᤗ᤹ᤖᤧᤀᤠᤱ ᤏᤧᤛ᤻ᤛᤧ॥ ᤔᤥᤀᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤴ ᤆᤫᤠ᤺ᤳᤋᤡᤴ ᤔᤠᤰᤂᤡ᤹ ᤁᤢᤀᤡᤛᤡᤰ ᤔᤖᤠ᤺ᤰᤕᤠᤖᤧᤒᤠ ᤔᤧᤏᤡᤛᤢ॥ 23 ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤱᤃ ᤔᤠᤰᤂᤡ᤹ᤏᤡᤒᤠ᥄ ᤂᤧᤴ ᤜᤠᤱᤜᤠ᤹ ᤂᤧᤔᤠ᤹ ᤔᤧᤈᤥᤃᤧᤀᤠᤱ ᤂᤢᤴᤇᤡ᤹ ᤗᤢᤶᤔᤥ ᤔᤧᤛᤧᤳᤇᤡᤱᤒᤡᤗᤠ॥ ᤀᤠᤸᤗ ᤔᤥᤀᤠᤒᤡᤛᤣ. ᤂᤧᤱᤜᤠ᤹ ᤏᤠᤵᤔᤠᤛᤡᤖᤧ ᤗᤠᤃᤡ ᤐᤣᤃᤡ᥄” 24 ᤁᤖ ᤀᤠᤸᤗ ᤔᤥᤀᤠᤒᤡᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤔᤧᤍᤩᤧ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤒᤥᤃᤧᤀᤠᤱ ᤔᤥᤀᤠᤒᤡᤜᤠ᤹ ᤔᤧᤱᤄᤧᤳᤇᤡᤱᤅᤡᤸᤗ ᤌᤠᤖᤡᤰ ᤂᤧᤱᤜᤠ᤹ᤏᤢ ᤌᤱ ᤔᤧᤈᤥᤃᤧ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤳᤋᤢ ᤔᤧᤍᤣ᤹ᤖᤢᤛᤡᤖ ᤔᤧᤓᤳᤋᤢᤛᤡᤀᤠᤱ ᤔᤧᤛᤩᤧᤖᤢᤛᤡ॥ 25 ᤂᤧᤱᤜᤠ᤹ᤖᤧ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ. ᤜᤶᤓᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤧᤖᤧᤰ ᤏᤢ᤺ᤒ᤻ᤏᤢᤒᤠ ᤀᤡᤰᤋᤠᤵᤜᤠ᤹ᤀᤥ ᤗᤳᤇᤠ ᤗᤳᤇᤠ ᤗᤢᤱ ᤗᤠᤵᤔᤧᤓᤢᤛᤢ ᤔᤧᤕᤠᤰᤋᤢᤀᤠᤱ ᤗᤠᤈᤣᤴ ᤂᤰᤐᤧᤳ ᤗᤢᤱᤅᤣ ᤗᤢᤱᤅᤡᤸᤗᤧ ᤔᤧᤎᤡᤶᤛᤢ॥ ᤂᤧᤱᤜᤠ᤹ᤖᤧ ᤆᤫᤠ᤺ᤳ ᤘᤒᤢᤴᤍᤠᤰᤘᤠᤜᤠ᤹ ᤁᤧᤖᤧᤰ ᤔᤧᤜᤢ᤹ᤖᤢ. ᤜᤧᤰᤁᤩᤠᤱ ᤏᤢᤒᤠ ᤛᤡᤱᤒᤢᤱᤜᤠ᤹ ᤂᤰᤐᤧᤳ ᤔᤧᤀᤠ᤺ᤳᤋᤢᤀᤠᤱ ᤔᤧᤛᤥ᤺ᤴᤍᤢ॥ ᤂᤧᤱᤜᤠ᤹ᤖᤧ ᤁᤡᤖ-ᤜᤖᤣᤛᤣᤋᤧᤴᤗᤰ ᤂᤧᤵᤔᤥᤒᤠ ᤗᤢᤱᤜᤠ᤹ᤏᤢ ᤛᤥᤖᤡᤰ ᤜᤠᤒᤠ ᤂᤧᤵᤔᤥᤀᤣ ᤔᤧᤗᤧᤖᤢᤔᤧᤎ. ᤁᤖ ᤀᤷᤍᤥ᤺ᤸᤗᤧ ᤁᤠᤵᤋᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤧᤴᤏᤠᤱ ᤁᤒᤪᤡᤱ ᤔᤧᤃᤒᤢᤀᤠᤱ ᤔᤧᤓᤳᤋᤢ॥ 26 ᤀᤠᤸᤗ ᤔᤥᤀᤠᤒᤒᤠ ᤜᤠᤱᤅᤡᤸᤗᤧ ᤂᤢᤏᤧ᤹ ᤌᤱᤅᤥ ᤜᤠᤖᤡ ᤁᤧᤍᤠᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤢ. ᤂᤧᤒᤩᤠᤱ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤖᤧ ᤁᤠᤵᤋᤢᤛᤡᤒᤠ ᥍᥆᥆ ᤔᤏᤠᤜᤠ᤹ ᤀᤣᤍᤥᤔᤒᤠ ᤜᤠᤱᤅᤡᤴ ᤗᤧᤵᤔᤠᤱ ᤑᤡ᤺ᤴᤇᤡᤱᤔᤠ ᤐᤣ᤺ᤰᤔᤠᤖᤧ ᤗᤠᤃᤡ ᤋᤣ᤹ᤖᤢᤛᤡ. ᤁᤖ ᤂᤧᤱᤜᤠ᤹ᤖᤧ ᤁᤢᤗᤡᤱᤍᤥ ᤔᤧᤱᤃᤧᤳᤋᤢᤴ॥ 27 ᤂᤧᤒᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤜᤠᤱ ᤁᤧᤒᤥᤱᤒᤠ. ᤂᤢᤏᤧ᤹ ᤁᤢᤛ᤻ᤛᤠ ᤋᤢᤶᤒᤧᤴ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤥ ᤋᤣ᤹ᤖᤢᤀᤠᤱ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤀᤡᤛᤡ᤺ᤰ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤛᤠ᤹ᤖᤡᤰ ᤕᤶᤒᤠ ᤛᤡᤰᤐᤥ᤺ᤰᤔᤠᤴ ᤌᤩᤧ. ᤂᤧᤒᤩᤠᤱ ᤂᤧᤱᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤀᤠᤵᤑᤣᤰ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤒᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.