᥈ ᤜᤠᤱ 25 - LIFOTNTᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤔᤧᤃᤧ ( ᥈ ᤛᤠᤵᤔᤢ ᥉᥌:᥇᥉-᥈᥇ ; ᤕᤷᤔᤡ ᥋᥈:᥉-᥇᥇ ) 1 ᤁᤸᤗᤧᤆᤥᤃᤢᤸᤗᤧ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤑᤠᤱᤛᤡᤃᤣᤰᤐᤠ ᤋᤱᤒᤣ ᤌᤡᤒᤥᤱᤃᤣᤰᤐᤠ ᤗᤠ ᤌᤡᤒᤥᤱᤃᤣᤰᤐᤠ ᤕᤧᤴᤏᤥ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ᤏᤢ ᤛᤥᤖᤡᤰ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤃᤡ ᤌᤠᤛᤡᤱᤅᤠᤱ ᤑᤧᤖᤧ. ᤜᤧᤰᤁᤩᤠᤱ ᤂᤧᤴ ᤁᤡᤷᤃᤵ ᤁᤒᤢᤀᤠᤱ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤏᤢ ᤆᤴᤇᤡᤱᤔᤠ ᤂᤠᤶᤗᤢᤱᤜᤠ᤹ ᤑᤥ᤺ᤰᤂᤢ॥ 2 ᤛᤡᤍᤁᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤌᤠᤖᤡᤰ ᤕᤧᤰᤕᤰᤁᤡᤴ ᤁᤡᤷᤃᤵ ᤔᤧᤃᤒᤢ ᤔᤧᤏᤧᤛ᤻ᤛᤢ॥ 3 ᤗᤡᤛᤡᤃᤣᤰᤐᤠ ᤗᤠ ᤑᤠᤱᤛᤡᤃᤣᤰᤐᤠ ᤕᤧᤴᤏᤥ ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤛᤠᤰ ᤐᤥᤃᤧ. ᤔᤏᤠᤜᤠ᤹ᤖᤧ ᤌᤣᤀᤠᤱ ᤆᤠᤔᤠ ᤁᤢᤈᤠ ᤔᤧᤱᤃᤳᤋᤢᤴ॥ 4 ᤜᤠᤒᤠ ᤂᤧᤴ ᤕᤧᤶᤔᤥ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤧ ᤜᤧᤰᤁᤩᤠᤱ ᤒᤣᤒᤡᤗᤥᤏᤡᤜᤠ᤹ᤖᤧ ᤕᤧᤰᤕᤰᤁᤡᤴ ᤔᤧᤃᤒᤢᤀᤠᤱ ᤔᤧᤏᤧᤛ᤻ᤛᤧᤸᤗᤧᤛᤠ ᤕᤜᤢᤍᤠᤒᤠ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤜᤠᤱᤅᤡᤸᤗᤧ ᤁᤢᤓᤢᤱᤀᤡᤰ ᤐᤣᤛᤠᤱᤒᤠ ᤏᤠᤜᤠᤱ ᤁᤳᤏᤠᤜᤠᤱᤒᤠ ᤗᤢᤱᤎᤠᤰᤁᤡᤸᤗᤧ ᤁᤢᤗᤢᤶᤔᤥᤒᤠ ᤗᤠᤶᤎᤣ᤺ᤳᤋᤥᤗᤠᤶ ᤛᤧᤴᤍᤡᤰ ᤔᤧᤄᤧᤳᤇᤡᤱ ᤔᤧᤄᤧᤖᤧ॥ ᤂᤧᤱᤜᤠ᤹ ᤀᤖᤠᤒᤠ ᤏᤧᤏᤧᤒᤠᤍᤧᤴ ᤗᤧᤵᤔᤠᤱ ᤔᤧᤄᤧᤳᤇᤡᤱ ᤔᤧᤒᤣ॥ 5 ᤁᤖ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ᤖᤧ ᤛᤡᤍᤁᤡᤕᤠᤜ ᤜᤠᤱᤅᤡᤴ ᤔᤧᤏᤠ᤺ᤳᤋᤢ ᤔᤧᤍᤣ᤹ᤖᤢᤀᤠᤱ ᤂᤢᤏᤧ᤹ ᤕᤖᤡᤜᤥᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤛᤡ᤹ᤖᤢ॥ ᤂᤢᤏᤧ᤹ᤗᤠᤶ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤗᤠ᤺ᤳᤗᤠ᤺ᤳ ᤔᤧᤒᤥ᤺ᤰᤂᤧᤀᤠᤱ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤧ ᤔᤧᤄᤧᤖᤧ॥ 6 ᤜᤧᤰᤁᤩᤠᤱ ᤂᤧᤴ ᤔᤧᤍᤧᤶᤛᤢᤀᤠᤱ ᤂᤢᤏᤧ᤹ ᤖᤡᤒ᤻ᤗᤠ ᤒᤣᤒᤡᤗᤥᤏᤒᤠ ᤜᤠᤱᤅᤧᤀᤥ ᤔᤧᤍᤣ᤹ᤖᤢ. ᤂᤧᤵᤔᤥ ᤂᤢᤏᤧ᤹ ᤂᤢᤶᤍᤡᤱ ᤐᤡᤔᤠ ᤏᤡ᤺ᤴᤎᤥ ᤐᤥ᤺ᤰᤂᤧ॥ 7 ᤂᤧᤱᤜᤠ᤹ᤖᤧ ᤛᤡᤍᤁᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤂᤢᤏᤧ᤹ ᤁᤢᤔᤡᤰᤁᤡᤸᤗᤧ ᤏᤡᤛᤢᤖᤀᤣ ᤔᤧᤛᤧᤖᤢᤛᤡ॥ ᤂᤧᤱᤜᤠ᤹ᤖᤧ ᤛᤡᤍᤁᤡᤕᤠᤜ᤺ᤸᤗᤧ ᤁᤢᤔᤡᤰᤜᤠ᤹ ᤔᤧᤓᤧᤰᤂᤢ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤠᤛᤠ ᤌᤰᤁᤪᤱᤅᤡᤸᤗᤧ ᤀᤡᤔᤧᤄᤣ᤺ᤰᤂᤢᤀᤠᤱ ᤒᤣᤒᤡᤗᤥᤏ ᤔᤧᤍᤣ᤹ᤖᤢᤖᤥ॥ ᤔᤠᤱᤜᤡᤶᤔᤡᤴ ᤔᤧᤗᤢ᤺ᤴᤍᤢ ( ᤕᤷᤔᤡ ᥋᥈:᥇᥈-᥈᥉ ) 8 ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤑᤠᤱᤛᤡᤃᤣᤰᤐᤠ ᤋᤱᤒᤣ. ᤅᤠᤛᤡᤃᤣᤰᤐᤠ ᤗᤠ. ᤏᤢᤛᤡᤃᤣᤰᤐᤠ ᤕᤧᤴᤏᤥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠ ᤜᤠᤱ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤴ ᤕᤖᤢᤛᤗᤧᤔ ᤁᤧᤖᤧᤓᤧᤖᤧ॥ 9 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤜᤠᤱᤜᤡᤶᤔᤥ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤜᤡᤶᤜᤠ᤹ᤀᤥ ᤔᤡᤓᤠ᤺ᤳᤋᤪᤠ ᤁᤣ᤺ᤳᤋᤢ॥ ᤁᤧᤖᤧᤰ ᤕᤶᤒᤕᤶᤒᤠ ᤁᤧᤕᤧᤰᤐᤠ ᤜᤡᤶᤜᤠ᤹ ᤂᤢᤏᤧ᤹ ᤔᤡᤎᤡᤰᤂᤢᤍᤣᤛᤢ॥ 10 ᤕᤖᤢᤛᤗᤧᤔᤒᤠ ᤁᤠᤰ ᤐᤡᤛᤠᤱᤒᤠ ᤗᤢᤱᤎᤠᤰᤜᤠ᤹ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ᤖᤧ ᤔᤧᤗᤢ᤺ᤴᤍᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤁᤧᤖᤧᤰ ᤗᤠᤶᤗᤥᤔᤠᤛᤡ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤕᤧ॥ 11 ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤏᤢ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤘᤣ᤹ ᤔᤏᤠᤜᤠ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤠᤱᤅᤡᤴ ᤁᤧᤗᤧᤵᤐᤠᤀᤠᤱ ᤒᤣᤒᤡᤗᤥᤏᤡᤜᤠ᤹ᤀᤥ ᤁᤧᤒᤵᤐᤠᤜᤠ᤹ ᤗᤠᤈᤣ᤹ᤗᤠᤶ ᤗ᤺ᤳᤋᤢᤍᤣ᤹ᤖᤢᤛᤡ॥ 12 ᤁᤖ ᤂᤧᤴ ᤌᤰᤔᤥᤒᤧᤸᤗᤧ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤏᤢ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤁᤢᤓᤠ ᤛᤠ᤹ᤖᤡᤰ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ ᤂᤧᤵᤔᤥ ᤗᤧᤖᤢᤎᤛᤡ॥ 13 ᤒᤣᤒᤡᤗᤥᤏᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤧᤕᤢᤱᤒᤠ ᤁᤠᤛᤠ ᤛᤡᤳᤗᤠᤱᤜᤠ᤹. ᤁᤧᤗᤥ᤺ᤰᤐᤠ ᤁᤢᤕᤢᤰᤏᤠᤜᤠ᤹ ᤏᤢ ᤕᤶᤒᤠ ᤁᤠᤛᤠ ᤑᤛᤡᤴ ᤑᤸᤗᤠᤰ ᤑᤸᤗᤠᤰ ᤔᤧᤀᤧᤰᤂᤢ ᤜᤧᤰᤁᤩᤠᤱ ᤁᤢᤶᤈᤡᤰᤔᤠ ᤔᤧᤈᤥᤃᤢᤀᤠᤱ ᤁᤠᤛᤠᤜᤠ᤹ ᤒᤣᤒᤡᤗᤥᤏ ᤔᤧᤍᤣ᤹ᤖᤢ॥ 14 ᤂᤧᤱᤜᤠ᤹ᤖᤧ ᤂᤵᤐᤩᤠᤜᤠ᤹. ᤂᤵᤔᤠ᤺ᤳᤜᤠ᤹. ᤛᤣᤔᤡ᤺ᤸᤗᤧ ᤁᤢᤓᤡ᤺ᤵᤔᤠ ᤗᤠᤓᤡ᤺ᤳᤜᤠ᤹ ᤏᤢ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤜᤧᤰᤁᤩᤠᤱ ᤜᤠᤱᤜᤡᤶᤔᤥᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥ ᤕᤠᤱᤔᤏᤠᤒᤠ ᤁᤧᤖᤧᤰ ᤁᤠᤛᤠ ᤛᤠᤔᤠ ᤐᤢᤔᤠᤜᤠ᤹ ᤔᤧᤍᤣ᤹ᤖᤢᤀᤠᤱ ᤔᤧᤒᤣ॥ 15 ᤜᤠᤱ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤧᤸᤗᤧ ᤛᤠᤱᤋᤧᤖᤧ᤺ᤱᤜᤠ᤹ ᤏᤢ ᤛᤠᤔᤠᤰᤂᤡ᤹ ᤛᤠᤱᤔᤠ ᤇᤧ᤺ᤱᤃᤩᤠᤜᤠ᤹ ᤜᤧᤰᤁᤩᤠᤱ ᤛᤠᤶᤔᤩᤠᤱ ᤀᤡᤃᤪ ᤕᤢᤵᤐᤠᤗᤠᤶ ᤌᤰᤔᤏᤠᤒᤠ ᤁᤧᤖᤧᤰ ᤛᤠᤔᤠᤜᤠ᤹ ᤋᤣ᤹ᤖᤢ॥ 16 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤛᤥᤗᤥᤔᤏᤖᤧ ᤌᤃᤢ ᤆᤥᤃᤢᤒᤠ ᤏᤧᤳᤇᤡ ᤛᤡᤳᤗᤠᤱᤜᤠ᤹. ᤐᤕᤶ ᤕᤶᤒᤠ ᤑᤛᤡ᤺ᤏ ᤏᤢ ᤁᤧᤗᤥ᤺ᤰᤐᤠ ᤁᤢᤕᤢᤰᤏᤠᤜᤠ᤹ᤀᤥᤒᤠ ᤁᤠᤛᤠᤴ ᤌᤠᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤆᤥᤃᤧ॥ 17 ᤛᤡᤳᤗᤠᤱ ᤌᤰᤔᤠ ᤌᤡᤒᤥᤱᤅᤠᤱ ᤕᤧᤳᤇᤡ ᤜᤢᤰᤛᤡᤰ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤆᤥᤃᤧ॥ ᤗᤳᤇᤠ ᤛᤡᤳᤗᤠᤱᤅᤡᤸᤗᤧ ᤁᤢᤛᤶᤎᤠᤱᤒᤠ ᤁᤠᤛᤠ ᤔᤧ᤺ᤌᤧᤴ ᤜᤢᤰᤛᤡᤰ ᤛᤢᤶᤛᤡ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤆᤥᤃᤧ. ᤜᤧᤰᤁᤩᤠᤱ ᤁᤠᤛᤠᤒᤠ ᤆᤡ᤹ᤗᤡᤱᤃᤣ᤹ ᤏᤢ ᤑᤢ᤹ᤗᤧᤛᤣ᤹ ᤁᤢᤓᤢᤱ ᤗᤰᤔᤏᤠᤒᤠ ᤁᤒᤪᤡᤱ ᤋᤡᤶᤛᤧᤀᤠᤱ ᤐᤳᤇᤧ॥ ᤘᤣ᤹ ᤛᤡᤳᤗᤠᤱᤅᤡᤴ ᤂᤧᤵᤔᤥᤒᤠ ᤆᤡ᤹ᤗᤡᤱᤃᤣᤴᤏᤢ ᤛᤥᤛᤥᤖᤡᤰ ᤜᤠᤒᤠ ᤂᤧᤴ ᤐᤖᤡᤰᤐᤠᤀᤣ ᤆᤥᤃᤧᤖᤥ॥ ᤕᤜᤢᤍᤠᤒᤠ ᤔᤏᤠᤜᤠ᤹ ᤒᤣᤒᤡᤗᤥᤏ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ ( ᤕᤷᤔᤡ ᥋᥈:᥈᥊-᥈᥍ ) 18 ᤌᤰᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤧᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤛᤖᤠᤕᤠᤜᤴ ᤏᤢ ᤏᤡᤛᤡᤃᤣᤰᤐᤠ ᤋᤠᤰᤑᤠᤀᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤐᤏᤩᤠᤜ᤺ᤴ ᤜᤧᤰᤁᤩᤠᤱ ᤗᤠᤶᤎᤣᤳ ᤁᤧᤃᤥᤒᤠ ᤛᤢᤶᤛᤡᤀᤠᤱ ᤐᤢᤱᤗᤠᤎᤠᤒᤠ ᤆᤥᤃᤢᤍᤣ᤹ᤖᤢᤛᤡ॥ 19 ᤕᤧᤰᤕᤰᤁᤥ ᤀᤠᤸᤗᤛᤠᤱ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠᤜᤠ᤹ᤗᤠᤶ ᤂᤢᤏᤧ᤹ ᤌᤰᤗᤡᤜᤠᤱᤜᤠ᤹ᤖᤧ ᤂᤢᤴᤇᤡ ᤋᤢᤶ ᤛᤢᤜᤠᤱᤕᤢᤰᤐᤧᤴ ᤏᤢ ᤅᤠᤛᤡ ᤜᤠᤱ ᤛᤢᤈᤠᤛᤠᤒᤠᤜᤠ᤹ ᤋᤣ᤹ᤖᤢᤛᤡ॥ ᤂᤢᤏᤧ᤹ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤌᤰᤛᤢᤒᤠᤀᤥ ᤁᤧᤃᤣ᤺ᤵᤐᤠ ᤔᤠ ᤛᤢᤜᤠᤱᤕᤢᤰᤐᤠ ᤛᤢᤜᤠᤱᤔᤡᤒᤧᤴ ᤏᤢ ᤕᤧᤰᤕᤰᤁᤥ ᤕᤠᤱᤄᤢᤛᤡᤒᤠ ᤂᤧᤸᤗᤧ ᤋᤢᤰᤐᤥᤱ ᤁᤢᤔᤏᤠᤜᤠ᤹ᤀᤠᤱ ᤋᤣ᤹ᤖᤢᤛᤡ॥ 20 ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ ᤂᤧᤱᤜᤠ᤹ ᤖᤡᤒ᤻ᤗᤠ ᤒᤣᤒᤡᤗᤥᤏᤒᤠ ᤜᤠᤱᤅᤧᤀᤥ ᤂᤧᤱᤜᤠ᤹ ᤁᤧᤖᤧᤰ ᤋᤣ᤹ᤖᤢᤛᤡ॥ 21 ᤂᤧᤵᤔᤥ ᤜᤔᤠᤋ ᤗᤠᤈᤣ᤹ᤒᤠ ᤖᤡᤒ᤻ᤗᤠᤀᤥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤛᤧᤵᤔᤠ ᤐᤠᤱᤄᤢᤛᤡ॥ ᤁᤶᤓᤗ᤹ᤖᤡᤰ ᤕᤜᤢᤍᤠᤴ ᤀᤠᤵᤑᤣᤰ ᤁᤢᤗᤠᤈᤣ᤹ᤗᤠᤶ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤖᤥ॥ ᤕᤜᤢᤍᤠᤒᤠ ᤆᤢᤰᤛᤠ ᤜᤠᤱ ᤃᤍᤗᤩᤠᤜ ( ᤕᤷᤔᤡ ᥊᥆:᥍-᥏ . ᥊᥇:᥇-᥉ ) 22 ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤛᤠᤐᤠᤏᤖᤧ ᤁᤢᤶᤔᤧᤴᤇᤠ᤹. ᤀᤜᤡᤁᤠᤔᤖᤧ ᤁᤢᤛ᤻ᤛᤠ ᤃᤍᤗᤩᤠᤜᤴ ᤕᤜᤢᤍᤠᤀᤥ ᤗᤧᤖᤢᤎᤛᤡᤒᤠ ᤔᤏᤠᤜᤠ᤹ ᤛᤶᤎᤠᤱ ᤕᤢᤰᤋᤡᤱ ᤆᤥᤃᤢ॥ 23 ᤀᤠᤸᤗ ᤌᤰᤛᤢᤒᤠᤜᤠ᤹ᤀᤥᤒᤠ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤜᤠ᤹ᤖᤧ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤃᤍᤗᤩᤠᤜᤴ ᤆᤢᤰᤛᤠ ᤜᤠᤱ ᤕᤢᤰᤋᤡᤱ ᤆᤥᤃᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ. ᤂᤧᤒᤩᤠᤱ ᤂᤧᤱᤜᤠ᤹ᤀᤥ ᤏᤋᤏᤩᤠᤜᤖᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗ. ᤁᤠᤖᤣᤜᤖᤧ ᤁᤢᤛ᤻ᤛᤠ ᤕᤥᤜᤠᤏᤠᤏ. ᤏᤋᤥᤐᤠᤋᤡ ᤋᤴᤜᤢᤔᤣᤋᤖᤧ ᤁᤢᤛ᤻ᤛᤠ ᤛᤖᤠᤕᤠᤜᤴ ᤏᤢ ᤔᤠᤁᤠᤋᤡᤖᤧ ᤁᤢᤛ᤻ᤛᤠ ᤕᤠᤈᤏᤩᤠᤜᤴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤜᤠ᤹ ᤃᤍᤗᤩᤠᤜᤀᤥ ᤔᤡᤛ᤻ᤐᤠ ᤔᤧᤒᤣ॥ 24 ᤃᤍᤗᤩᤠᤜ᤺ᤸᤗᤧ ᤂᤧᤱᤜᤠ᤹ ᤏᤢ ᤂᤢᤴᤇᤡ᤹ ᤔᤏᤠᤜᤠ᤹ ᤔᤠᤱᤜᤧᤰᤛᤡᤱᤅᤠᤱ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤒᤣᤒᤡᤗᤥᤏᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤏᤢ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤡᤴᤏᤧ᤹॥ ᤗᤠᤈᤣ᤹ᤀᤥ ᤘᤕᤧᤶᤔᤧ᤹ ᤕᤢᤅᤠᤶᤔᤧ᤹ᤀᤠᤱ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤆᤥᤃᤧᤶᤔᤧ᤹. ᤂᤶᤓᤩᤠᤱ ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠ ᤐᤥᤱ᤹॥” 25 ᤁᤖ ᤏᤢᤛᤡᤃᤣᤰᤐᤠ ᤗᤠᤀᤥ ᤀᤣᤗᤡᤛᤢᤔᤠᤖᤧ ᤁᤢᤶᤔᤧᤴᤇᤠ᤹. ᤏᤋᤏᤩᤠᤜᤖᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗ. ᤂᤢᤏᤧ᤹ ᤜᤠᤱᤜᤡᤶᤛᤕᤱᤒᤠ ᤁᤠ᤹ᤀᤡ ᤘᤕᤧ. ᤂᤧᤸᤗᤧ ᤌᤡᤒᤥᤱ ᤔᤏᤠᤜᤠ᤹ ᤕᤠᤱᤛᤡᤱᤅᤠᤱ ᤋᤩᤧᤀᤠᤱ ᤃᤍᤗᤩᤠᤜᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤔᤡᤛ᤻ᤐᤠᤀᤥ ᤁᤧᤘᤠ᤹ᤒᤠ ᤕᤜᤢᤍᤠ ᤏᤢ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ ᤛᤩᤧᤖᤢᤛᤡ॥ 26 ᤁᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤒᤣᤒᤡᤗᤥᤏᤡᤜᤠ᤹ᤏᤢ ᤔᤧᤃᤡᤛᤧᤀᤠᤱ ᤆᤢᤰᤐᤠᤀᤠᤱᤎᤥ ᤕᤶᤒᤠ ᤌᤠᤖᤡᤰ. ᤌᤰᤛᤢᤒᤠ ᤛᤢᤜᤠᤱᤕᤢᤰᤐᤠᤀᤠᤱ ᤁᤧᤖᤧᤰ ᤔᤡᤛᤪ ᤗᤠᤈᤣ᤹ᤀᤥ ᤔᤧᤄᤧᤳᤇᤡᤱ ᤔᤧᤒᤣᤖᤥ॥ ᤐᤢᤱᤗᤠᤜᤡᤶᤔᤥᤗᤠᤶ ᤕᤜᤥᤕᤠᤁᤡᤏᤧᤴ ᤗ᤺ᤴᤍᤧ ( ᤕᤷᤔᤡ ᥋᥈:᥉᥇-᥉᥊ ) 27 ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤏᤧᤴ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤒᤠ ᤛᤢᤶᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤀᤣᤒᤡᤗ-ᤔᤖᤥᤍᤁᤧᤴ ᤒᤣᤒᤡᤗᤥᤏᤒᤠ ᤜᤠᤱ ᤐᤥ᤺ᤰᤂᤧ॥ ᤌᤡᤒᤥᤱᤅᤠᤱ ᤏᤡᤛᤡᤃᤣᤰᤐᤠ ᤗᤠ ᤏᤡᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤀᤣᤒᤡᤗ-ᤔᤖᤥᤍᤁᤧᤸᤗᤧ ᤕᤜᤥᤕᤠᤁᤡᤏᤧᤴ ᤐᤢᤱᤗᤠᤜᤡᤶᤔᤥᤗᤠᤶ ᤗᤧᤖᤢ॥ 28 ᤀᤣᤒᤡᤗ-ᤔᤖᤥᤍᤁᤧᤸᤗᤧ ᤂᤢᤏᤧ᤹ ᤏᤢᤖᤡᤰ ᤐᤠ᤺ᤴᤇᤠ᤺ᤳᤋᤢ. ᤜᤧᤰᤁᤩᤠᤱ ᤒᤣᤒᤡᤗᤥᤏᤀᤥ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤘᤣ᤹ ᤜᤠᤱᤜᤠ᤹ᤏᤢ᤺ᤸᤗᤧ ᤀᤠᤸᤗᤛᤠᤱ ᤌᤥᤎᤥᤰᤐᤠ ᤔᤡᤱᤛᤥ ᤀᤡᤱᤎᤠᤱᤒᤠ ᤕᤢᤰᤏᤠᤀᤥ ᤂᤢᤏᤧ᤹ ᤕᤢᤰᤂᤢ॥ 29 ᤁᤶᤓᤗ᤹ᤖᤡᤰ ᤕᤜᤥᤕᤠᤁᤡᤏᤧᤴ ᤐᤢᤱᤗᤠᤜᤡᤶᤔᤥ ᤆᤠᤰᤂᤢᤒᤠ ᤆᤠᤱᤜᤠ᤹ ᤗᤧᤰᤛᤡᤱ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤱᤜᤡᤱ ᤜᤠᤱᤅᤡᤸᤗᤧᤀᤣ ᤁᤢᤈᤠ ᤆᤠᤔᤠᤍᤧᤴᤏᤥ ᤕᤢᤅᤧᤀᤠᤱ ᤀᤠᤓᤧᤸᤗᤧᤛᤠᤱ ᤁᤢᤈᤠ ᤆᤖᤥ॥ 30 ᤂᤢᤏᤧ᤹ ᤁᤢᤗᤠᤃᤡ ᤜᤠᤱᤅᤡᤸᤗᤧ ᤆᤰᤔᤧᤸᤗ᤹ᤀᤣ ᤁᤢᤜᤡᤱᤜᤡᤱᤅᤣ ᤑᤠ᤹ᤕᤠᤱ ᤐᤡᤖᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.