᥈ ᤜᤠᤱ 24 - LIFOTNT

¹ ᤕᤜᤥᤕᤠᤁᤡᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤗᤠᤈᤣᤴ ᤌᤱᤅᤥ ᤑᤳᤋᤢ. ᤜᤧᤰᤁᤩᤠᤱ ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤕᤜᤥᤕᤠᤁᤡᤔ ᤜᤠᤱᤅᤡᤴ ᤂᤢᤏᤧ᤹ ᤁᤢᤕᤢᤰᤁᤥ ᤘᤕᤧ॥ ᤁᤖ ᤋᤱᤒᤣ ᤛᤢᤶᤛᤡ ᤀᤣᤃᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤏᤢ᤺ᤰᤋᤢᤀᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤆᤥᤃᤢ॥

² ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤒᤣᤒᤡᤗᤥᤏᤡ. ᤀᤖᤠᤔᤡ. ᤔᤥᤀᤠᤒᤡ ᤏᤢ ᤀᤶᤔᤥᤏᤡᤒᤠ ᤁᤧᤏᤠᤵᤐᤠ ᤁᤧᤜᤡᤵᤐᤠ ᤔᤏᤠᤛᤢᤶᤜᤠ᤹ ᤐᤠᤱᤄᤢᤛᤡ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤕᤜᤢᤍᤠᤴ ᤔᤧᤱᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤐᤠᤱᤄᤢ ᤋᤠᤛᤢᤛᤡ॥

³ ᤔᤏᤛ᤻ᤛᤣ᤺ᤸᤗᤧ ᤆᤥᤃᤢᤒᤠ ᤗᤠᤕᤥᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤖᤧ ᤆᤥᤃᤢᤸᤗᤧ ᤕᤜᤢᤍᤠᤒᤠ ᤔᤏᤠᤜᤠ᤹ ᤂᤢᤏᤧ᤹ ᤁᤢᤍᤃᤡᤗᤠᤶ ᤗ᤺ᤵᤔᤠᤍᤣᤔᤠᤛᤡ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤒᤠᤴ ᤁᤧᤵᤔᤠᤖᤧ ᤗᤠᤃᤡ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤁᤴ ᤐᤠ᤺ᤴᤜᤠ᤹ ᤁᤧᤖᤧᤰ ᤕᤜᤢᤍᤠᤀᤥ ᤐᤥ᤺ᤰᤂᤧᤍᤩᤧ॥

⁴ ᤜᤧᤰᤁᤩᤠᤱ ᤔᤏᤛ᤻ᤛᤣ᤺ᤸᤗᤧ ᤁᤢᤍᤥ᤺ᤵᤔᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ ᤛᤧᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤌᤡᤶᤛᤢᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤗᤧᤵᤔᤡ ᤐᤡᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴ॥

⁵ ᤕᤜᤥᤕᤠᤁᤡᤔ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤴᤏᤠᤱᤒᤡ᥅

⁶ ᤕᤜᤥᤕᤠᤁᤡᤔᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤕᤜᤥᤕᤠᤁᤡᤏᤧᤴ ᤜᤠᤱ ᤐᤥ᤺ᤰᤂᤧᤖᤥ॥

⁷ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤔᤡᤛᤪᤒᤠ ᤘᤜ᤺ᤱᤅᤠᤱ ᤁᤳᤏᤠ ᤕᤢᤑᤪᤣᤋᤡᤛ ᤘᤜ᤺ᤱ ᤌᤠᤖᤡᤰ ᤂᤧᤸᤗᤧ ᤁᤧᤖᤧᤰ ᤁᤢᤍᤧ᤺ᤱᤃᤵᤜᤠ᤹ ᤜᤢᤰᤁᤠᤵ ᤆᤥᤃᤢᤀᤠᤱ ᤏᤧᤛ᤻ᤛᤧᤒᤠᤸᤗᤧ ᤆᤥᤃᤢᤸᤗᤧ ᤔᤡᤛᤪ ᤗᤠᤈᤣ᤹ᤒᤠ ᤜᤠᤱᤅᤡᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣᤴ ᤗᤧᤖᤢᤀᤠᤱ ᤕᤠᤶᤔᤥ ᤔᤧᤏᤢ᤺ᤰᤂᤧᤴ ᤔᤧᤎᤠᤅᤧᤴᤗᤥ॥

ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤏ

⁸ ᤀᤠᤸᤗ ᤕᤜᤥᤕᤠᤁᤡᤏᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤌᤡᤒᤥᤱᤅᤠᤱ ᤕᤧᤳᤇᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤗᤠ ᤛᤢᤶᤛᤡ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤏᤜᤛᤛ᤻ᤋᤠ ᤘᤕᤧ॥ ᤂᤢᤏᤧ᤹ ᤀᤣᤸᤏᤠᤋᤠᤏᤖᤧ ᤁᤢᤛ᤻ᤛᤠ ᤕᤖᤢᤛᤗᤧᤔ ᤁᤧᤕᤢᤱᤔᤠ ᤘᤕᤧ॥

⁹ ᤕᤜᤥᤕᤠᤁᤡᤏᤖᤧ ᤂᤢᤏᤧ᤹ ᤁᤢᤶᤒᤠᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤢᤏᤧ᤹ ᤀᤠᤶᤓᤠ ᤂᤧᤴ ᤆᤥᤃᤢ॥

¹⁰ ᤂᤧᤴ ᤕᤧᤶᤔᤥ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤕᤖᤢᤛᤗᤧᤔ ᤗᤧᤵᤔᤠᤱ ᤋᤃᤡ ᤔᤧᤓᤧᤖᤧᤀᤠᤱ ᤂᤧᤴ ᤕᤧᤰᤕᤰᤁᤡᤴ ᤁᤡᤷᤃᤵ ᤔᤧᤃᤒᤢ.

¹¹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤕᤧᤰᤕᤰᤁᤡᤴ ᤁᤡᤷᤃᤵ ᤔᤧᤃᤒᤢᤖ ᤔᤧᤒᤳᤇᤧᤒᤠ ᤕᤧᤶᤔᤥ ᤏᤒᤢᤁᤍᤏᤣᤛᤖᤧᤴ ᤂᤢᤏᤧ᤹ ᤀᤠᤵᤑᤣᤰ ᤕᤧᤰᤕᤰᤁᤥ ᤁᤧᤖᤧᤓᤧᤖᤧ॥

¹² ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤏᤧᤴ. ᤂᤢᤏᤧ᤹ ᤁᤢᤶᤔᤠ. ᤁᤢᤛᤧᤘᤠᤖᤥᤒᤠᤜᤠ᤹ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤒᤣᤒᤡᤗᤥᤏᤒᤠ ᤜᤠᤱᤅᤧᤀᤥ ᤜᤢᤰᤔᤧᤛᤢᤵᤛᤡᤱ॥ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤕᤜᤥᤕᤠᤁᤡᤏᤧᤴ ᤐᤢᤱᤗᤠᤎᤠᤒᤠ ᤆᤥᤃᤢ॥

¹³ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤒᤠ ᤜᤧᤰᤁᤣᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤏᤢ ᤜᤠᤱᤜᤡᤶ ᤌᤠ᤺ᤱᤜᤠ᤹ᤀᤥᤒᤠ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤂᤢᤏᤧ᤹ ᤂᤧᤳᤋᤢ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤀᤡᤛᤪᤠᤀᤡᤗᤒᤠ ᤜᤠᤱ ᤛᤥᤗᤥᤔᤏᤖᤧ ᤌᤃᤢᤒᤠ ᤁᤧᤖᤧᤰ ᤛᤠᤶᤔᤩᤠᤱ ᤛᤠᤔᤠ ᤐᤢᤔᤠᤜᤠ᤹ ᤛᤢᤖᤢᤰ ᤛᤢ᤺ᤴᤍᤢᤀᤠᤱ ᤋᤣ᤹ᤖᤢ॥

¹⁴ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤌᤰᤗᤡᤜᤠᤱᤜᤠ᤹. ᤕᤢᤰᤛᤠᤒᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤆᤥᤒᤣᤃᤢᤜᤠ᤹ ᤏᤢ ᤆᤥᤛᤠᤶᤒᤠᤜᤠ᤹ ᤁᤧᤖᤧᤰ ᤌᤡᤒᤥᤱ ᤜᤧᤴᤇᤡᤱ ᤔᤏᤠᤜᤠ᤹ ᤋᤧᤶᤛᤢ ᤋᤣ᤹ᤖᤢᤛᤡ॥ ᤛᤠ᤹ᤖᤡᤰ ᤕᤠᤱᤃᤧᤛᤠ᤹ᤒᤠ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ᤖᤰ ᤗᤧᤖᤢᤎᤛᤡ॥

¹⁵ ᤏᤒᤢᤁᤍᤏᤣᤛᤖᤖᤧ ᤕᤜᤥᤕᤠᤁᤡᤏᤧᤴ ᤐᤢᤱᤗᤠᤎᤠᤒᤠ ᤆᤥᤃᤢᤀᤠᤱ ᤒᤣᤒᤡᤗᤥᤏ ᤋᤣ᤹ᤖᤢ॥ ᤂᤢᤏᤧ᤹ ᤕᤖᤢᤛᤗᤧᤔᤗᤠᤶ ᤜᤠᤱᤅᤡᤸᤗᤧ ᤁᤢᤶᤔᤠ. ᤁᤢᤔᤣ᤺ᤳᤜᤠ᤹. ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤗᤠᤈᤣ᤹ᤀᤥᤒᤠ ᤗᤠᤶᤗᤥᤒᤠ ᤁᤢᤎᤧᤃᤣᤰ ᤔᤏᤠᤜᤠ᤹ ᤕᤖᤢᤛᤗᤧᤔᤗᤠᤶ ᤒᤣᤒᤡᤗᤥᤏ ᤋᤣ᤹ᤖᤢᤛᤡ॥

¹⁶ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤏᤢᤛᤡ ᤜᤧᤴᤇᤡᤱ ᤁᤧᤎᤢᤶᤒᤠ ᤏᤢ ᤋᤧᤴᤎᤱ ᤆᤥ᤺ᤰᤔᤠᤖᤧ ᤗᤠᤃᤡ ᤛᤢᤶᤒᤥᤎᤠᤒᤠᤛᤠ ᤌᤰᤗᤡᤱᤜᤠᤱᤜᤠ᤹ ᤜᤧᤰᤁᤩᤠᤱ ᤜᤧᤴᤇᤡᤱ ᤌᤡᤰ ᤆᤥᤒᤣᤃᤢᤜᤠ᤹ ᤏᤢ ᤆᤥᤛᤠᤶᤒᤠᤜᤠ᤹ᤀᤠᤱ ᤒᤣᤒᤡᤗᤥᤏ ᤋᤧᤶᤛᤢ ᤋᤣ᤹ᤖᤢᤛᤡ॥

¹⁷ ᤂᤢᤏᤧ᤹ ᤕᤜᤥᤕᤠᤁᤡᤏᤖᤧ ᤁᤢᤶᤓᤅᤠ ᤔᤳᤋᤏᤩᤠᤜᤴ ᤂᤢᤏᤧ᤹ ᤁᤢᤗᤧᤰᤘᤠᤀᤥ ᤜᤠᤱ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱ ᤗᤧᤰᤂᤢᤀᤠᤱ ᤛᤡᤍᤁᤡᤕᤠᤜ ᤔᤡᤱ ᤘᤠ᤺ᤳᤋᤢᤖᤥ॥

ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ

¹⁸ ᤀᤠᤸᤗ ᤛᤡᤍᤁᤡᤕᤠᤜ᤺ᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤜᤔᤢᤋᤗ ᤘᤕᤧ. ᤂᤢᤏᤧ᤹ ᤕᤷᤔᤡᤕᤠ᤺ᤸᤗᤧ ᤁᤢᤛ᤻ᤛᤠ ᤗᤡᤒ᤻ᤏᤠ ᤁᤧᤕᤢᤱᤔᤠ ᤘᤕᤧ॥

¹⁹ ᤕᤜᤥᤕᤠᤁᤡᤔᤧᤸᤗᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤠᤀᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤔᤧᤈᤥᤃᤧᤴ ᤛᤡᤍᤁᤡᤕᤠᤜ᤺ᤸᤗᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥

²⁰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤆᤥᤃᤢᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤖᤢᤛᤗᤧᤶᤔᤥ ᤏᤢ ᤕᤜᤢᤍᤠᤀᤥ ᤐᤥ᤺ᤰᤂᤧᤍᤩᤧ॥ ᤁᤢᤏᤢᤵᤔᤥ ᤂᤧᤱᤜᤠ᤹ ᤂᤢᤏᤧ᤹ ᤁᤢᤍᤃᤡᤗᤠᤶ ᤗ᤺ᤳᤋᤢᤍᤣᤛᤢᤛᤡᤖᤥ॥ ᤂᤧᤒᤩᤠᤱ ᤛᤡᤍᤁᤡᤕᤠᤜ᤺ᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧᤖᤥ॥