᥈ ᤜᤠᤱ 23 - LIFOTNT

ᤕᤥᤛᤡᤕᤠᤜ᤺ᤸᤗᤧ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤧᤴ ᤂᤧᤳᤋᤢ

¹ ᤂᤧᤴ ᤀᤣᤃᤠᤱ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤀᤢ᤺ᤵᤔᤠ ᤋᤠ᤺ᤵᤔᤠ ᤐᤠᤱᤄᤢᤛᤡ॥

² ᤕᤜᤢᤍᤠᤒᤠ ᤔᤏᤠᤜᤠ᤹. ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤆᤢᤰᤐᤠ ᤕᤶᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ ᤛᤥᤖᤡᤰ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤌᤥ᤺ᤰᤛᤡᤱ ᤐᤣ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤄᤥᤛᤢᤒᤠ ᤔᤠᤱᤜᤢᤵ ᤛᤠᤵᤐᤴᤏᤥᤒᤠ ᤁᤧᤖᤧᤰ ᤐᤠ᤺ᤴᤈᤠ᤺ᤰᤜᤠ᤹ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤖ ᤏᤡᤖᤢ ᤐᤡᤖᤢᤛᤡ॥

³ ᤂᤧᤒᤩᤠᤱ ᤜᤠᤱᤅᤡᤴ ᤛᤡᤳᤗᤠᤱᤅᤡᤸᤗᤧ ᤁᤢᤒᤣᤛᤠᤱ ᤕᤧᤒᤧᤀᤠᤱ ᤔᤠᤱᤜᤢᤵᤐᤡᤴ ᤕᤜᤘᤣ ᤍᤠᤱᤒᤧᤴᤏᤢ ᤕᤠᤶᤔᤥ ᤁᤢᤛᤱ ᤆᤥᤃᤢ—ᤕᤜᤘᤣ ᤍᤠᤱᤒᤧᤴ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤏᤢ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹. ᤁᤢᤎᤡᤶᤜᤠ᤹ ᤜᤧᤰᤁᤩᤠᤱ ᤁᤢᤀᤡᤱᤍᤳᤜᤠ᤹ ᤂᤢᤏᤧ᤹ ᤁᤧᤖᤧᤰ ᤁᤢᤛᤡᤰᤗᤢᤱᤔᤠ᤹ ᤏᤢ ᤁᤧᤖᤧᤰ ᤁᤢᤕᤠᤶᤛᤠᤶᤔᤡᤸᤗᤧ ᤏᤠ᤺ᤵᤔᤠ ᤋᤡᤶᤔᤠᤖᤧ ᤗᤠᤃᤡ. ᤜᤧᤰᤁᤩᤠᤱ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤔᤠᤱᤜᤢᤵᤐᤥᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤁᤧᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤕᤠᤶᤔᤥ ᤏᤡ᤺ᤴᤎᤥ ᤆᤥᤃᤢ॥ ᤂᤧᤴ ᤀᤣᤃᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤴ ᤔᤠᤱᤜᤢᤵᤐᤡᤴ ᤁᤢᤀᤡᤛᤡᤰ ᤘᤠ᤹ᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤔᤠᤱᤜᤢᤵ ᤔᤧᤈᤥᤃᤢ॥

⁴ ᤂᤧᤴ ᤀᤣᤃᤠᤱ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜ. ᤂᤧᤸᤗᤧ ᤁᤢᤀᤣᤃᤠᤱ ᤋᤠᤰᤑᤠ ᤛᤡᤃᤠᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤗᤠᤶ ᤒᤠᤗ ᤔᤠᤱᤅᤡᤴ ᤏᤢ ᤀᤛᤣᤖᤠ ᤔᤠᤱᤅᤡᤴ ᤜᤧᤰᤁᤩᤠᤱ ᤋᤠᤱᤛᤠᤱᤒᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ᤖᤧ ᤗᤠᤃᤡ ᤔᤧᤈᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤔᤠᤍᤣᤔᤠ ᤐᤠᤱᤄᤢᤛᤡ॥ ᤂᤢᤏᤧ᤹ ᤁᤴᤜᤠ᤹ ᤁᤧᤖᤧᤰ ᤕᤖᤢᤛᤗᤧᤔ ᤗᤠ᤺ᤰᤁᤠᤳ ᤁᤡᤍᤪᤥᤏ ᤏᤧᤏᤧᤒᤠᤍᤧᤴᤏᤥ ᤔᤡᤎᤡᤰᤂᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂᤠᤵᤐᤢ᤺ᤴᤃ ᤒᤣᤌᤣᤗ ᤋᤣ᤹ᤖᤢᤀᤠᤱ ᤐᤣ॥

⁵ ᤕᤜᤢᤍᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤏᤢ ᤕᤖᤢᤛᤗᤧᤔ ᤁᤢᤕᤠ ᤁᤢᤕᤠᤀᤥᤒᤠ ᤆᤴᤈᤶᤒᤠᤍᤧᤴᤜᤠ᤹ᤀᤥ ᤛᤢᤰᤐᤠ ᤁᤧᤜᤠ᤺ᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤕᤢᤰᤋᤡᤱ ᤔᤧᤈᤥᤃᤢᤛᤡᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤒᤠᤗ ᤔᤠᤱ. ᤏᤠᤶ ᤏᤢ ᤗᤠᤒᤠ. ᤜᤧᤰᤁᤩᤠᤱ ᤔᤧᤴᤇ᤻ᤕᤠᤒᤢᤖᤢᤰᤔᤠᤜᤠ᤹ ᤏᤢ ᤂᤣ᤺ᤶᤛᤡᤰᤐᤠ ᤁᤧᤖᤧᤰ ᤋᤖ᤺ᤱᤍᤡᤱ ᤋᤠᤱᤛᤠᤱᤒᤠᤸᤗᤧ ᤗᤠᤃᤡ ᤛᤢᤰᤐᤠ ᤔᤧᤜᤠ᤺ᤴᤍᤢ॥ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤗ᤺ᤳᤋᤢᤍᤣᤛᤢᤛᤡ॥

⁶ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤗᤠᤶ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤅᤡᤴ ᤗ᤺ᤳᤋᤢᤀᤠᤱ ᤕᤖᤢᤛᤗᤧᤔ ᤗᤠ᤺ᤰᤁᤠᤳ ᤁᤡᤍᤪᤥᤏ ᤏᤧᤏᤧᤒᤠᤍᤧᤴᤏᤥ ᤋᤣ᤹ᤖᤢᤀᤠᤱ ᤔᤡᤎᤡᤰᤂᤢᤍᤣᤛᤢ. ᤜᤧᤰᤁᤩᤠᤱ ᤁᤢᤶᤈᤡᤰᤔᤠ ᤆᤥᤃᤢ॥ ᤂᤶᤓᤩᤠᤱ ᤂᤧᤴ ᤂᤢᤏᤧ᤹ ᤔᤧᤴᤈᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤜᤠ᤹ᤀᤥ ᤛᤧᤛᤢᤍᤣᤛᤢ॥

⁷ ᤂᤢᤏᤧ᤹ ᤁᤧᤳᤏᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤱᤔᤠ ᤜᤡᤶᤜᤠ᤹ ᤕᤛᤢ ᤐᤡᤖᤢᤛᤡ. ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤛᤡᤃᤠᤱ ᤕᤢᤅᤧ ᤜᤧᤰᤁᤩᤠᤱ ᤂᤧᤵᤔᤥ ᤔᤧᤴᤇᤢᤔᤠᤜᤠ᤹ᤖᤧ ᤀᤛᤣᤖᤠ ᤔᤠᤱᤅᤡᤴ ᤂᤢ᤺ᤰᤔᤠᤖᤧ ᤗᤠᤃᤡ ᤂᤡᤜᤠ᤹ ᤔᤧᤓᤕᤢ॥

⁸ ᤕᤥᤛᤡᤕᤠᤜ᤺ᤸᤗᤧ ᤕᤜᤢᤍᤠᤒᤠ ᤐᤠᤱᤈᤢᤶᤜᤠ᤹ᤀᤥᤗᤠᤶ ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤗ᤺ᤳᤋᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤢᤰᤐᤠ ᤜᤠ᤺ᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤒᤠ ᤃᤣᤒᤠᤗᤠᤶ ᤒᤣᤷᤛᤣᤒᤠ ᤌᤠᤖᤡᤰᤐᤠ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤜᤠ᤹ᤀᤥ ᤁᤧᤕᤢᤱᤒᤠ ᤔᤠᤱᤎᤠ᤺ᤴᤜᤠ᤹ ᤂᤢᤏᤧ᤹ ᤀᤠᤛᤢᤳᤌᤥ ᤆᤥᤃᤢ ᤐᤡᤖᤢᤛᤡ॥ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤑᤧᤴᤇᤠᤱ ᤗᤧᤵᤔᤠᤱ ᤕᤧᤰᤕᤰᤁᤥᤒᤠ ᤜᤠᤱᤕᤢᤰᤐᤠ ᤕᤜᤥᤛᤢ᤺ᤸᤗᤧ ᤁᤢᤗᤠᤶᤎᤣᤳ ᤋᤃᤠᤱᤒᤠ ᤔᤠᤱᤕᤢᤰᤏᤠᤜᤠ᤹ ᤂᤢᤏᤧ᤹ ᤕᤴᤇᤢ ᤐᤡᤖᤢᤛᤡ॥

⁹ ᤁᤴ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤜᤠ᤹ᤀᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤠᤱᤛᤧᤘᤠ ᤔᤧᤴᤈᤥᤃᤢᤴ. ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤋᤣ᤺ᤱᤈᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤏᤢ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤔᤧᤈ॥

¹⁰ ᤔᤥᤗᤥᤂ ᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ ᤛᤠᤜᤠ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤴᤈᤥᤃᤢᤛᤡᤴᤗ ᤑᤠ᤹ᤀᤠᤱ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤒᤣᤏ-ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴᤏᤥ ᤁᤧᤏᤧᤒᤠ ᤋᤥᤐᤣᤋ ᤔᤠᤱᤎᤠᤏᤧᤴ ᤀᤠᤛᤢᤳᤌᤥ ᤆᤥᤃᤢ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤗᤠᤶᤎᤣᤳᤋᤥ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤏᤠᤶᤔᤡᤴ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤔᤧᤕᤧᤵᤛᤢᤛᤡᤒᤠ ᤏᤠᤘᤠᤀᤡᤳᤗᤠ ᤀᤴᤜᤠ᤹ ᤂᤢᤏᤧ᤹ ᤂᤧᤳᤋᤢᤍᤣᤛᤢᤛᤡ॥ ᤂᤧᤱᤜᤠ᤹ ᤏᤠᤋᤠᤏ-ᤔᤣᤗᤣᤁ ᤔᤡᤱ ᤁᤧᤘᤠ᤺ᤵᤐᤠ ᤛᤢᤜᤠᤱᤕᤢᤰᤐᤠ ᤌᤡᤰᤗᤧ ᤁᤢᤕᤠᤰᤑᤠᤱ ᤏᤡ᤺ᤳᤋᤠᤱᤒᤠ ᤗᤰᤂᤢᤶᤔᤥ ᤔᤧᤕᤧᤒᤧ॥ ᤂᤧᤒᤩᤠᤱ ᤏᤠᤶᤔᤡᤸᤗᤧ ᤗᤠᤃᤡ ᤔᤧᤍᤥᤴᤍᤢᤛᤡᤒᤠ ᤀᤴᤗᤠᤎᤠᤜᤠ᤹ ᤕᤥᤛᤡᤕᤠᤜ᤺ᤸᤗᤧ ᤔᤡᤎᤡᤰᤂᤢᤍᤣᤛᤢᤛᤡ॥

¹² ᤀᤠᤜᤠᤈᤖᤧ ᤌᤠ᤺ᤱᤛᤔᤠ ᤁᤢᤕᤠᤰᤑᤠᤱᤅᤥᤒᤠ ᤏᤡ᤺ᤳᤋᤠᤱᤒᤠ ᤁᤢᤃᤦᤛᤡᤀᤥ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤔᤧᤕᤧᤵᤛᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤏᤧᤵᤔᤠᤱ ᤗᤰᤂᤢᤶᤔᤥ ᤔᤏᤛ᤻ᤛᤣ᤺ᤸᤗᤧ ᤆᤥᤃᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤕᤥᤛᤡᤕᤠᤜ᤺ᤸᤗᤧ ᤕᤴᤇᤢᤍᤣᤛᤢ॥ ᤂᤢᤏᤧ᤹ ᤂᤧᤱᤜᤠ᤹ ᤂᤧᤵᤔᤥᤗᤠᤶ ᤀᤡ᤺ᤰᤂᤢᤀᤠᤱ ᤗᤢᤱ ᤔᤢᤈᤡᤰᤜᤠ᤹ ᤁᤡᤍᤪᤥᤏ ᤏᤧᤏᤧᤒᤠᤍᤧᤴᤏᤥ ᤗᤠᤵᤑᤢᤛᤢ॥

¹³ ᤕᤖᤢᤛᤗᤧᤔ ᤏᤠᤱᤃᤧᤴ ᤗᤧᤵᤔᤠᤱ ᤆᤡ᤺ᤴᤈᤡ᤺ᤴ ᤁᤧᤄᤢᤒᤠ ᤔᤧᤈᤥᤃᤢᤒᤠ ᤁᤥ᤺ᤰᤔᤠᤸᤗᤧ ᤗᤠᤱᤃᤧᤳ ᤐᤡᤛᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤛᤥᤗᤥᤔᤏᤖᤧ ᤛᤡᤍᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤔᤠᤱᤔᤠ ᤀᤛ᤻ᤋᤥᤖᤣᤋ. ᤔᤥᤀᤠᤒᤒᤠ ᤛᤡᤰᤁᤧᤗᤧ᤺ᤱᤒᤠ ᤔᤠᤱ ᤁᤔᤥᤛᤧᤴ ᤏᤢ ᤀᤶᤔᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤔᤠᤱ ᤔᤥᤗᤥᤂᤖᤧ ᤁᤢᤗᤠᤃᤡ ᤔᤠᤱᤎᤠ᤺ᤴᤜᤠ᤹ ᤆᤥᤃᤢᤀᤠᤱ ᤏᤧᤛ᤻ᤛᤧ. ᤂᤧᤴ ᤔᤠᤱᤎᤠ᤺ᤴᤜᤠ᤹ᤀᤠᤱ ᤕᤥᤛᤡᤕᤠᤜ᤺ᤸᤗᤧ ᤀᤠᤛᤢᤳᤌᤥ ᤆᤥᤃᤢ॥

¹⁴ ᤂᤢᤏᤧ᤹ ᤔᤧᤍᤥᤴᤍᤢᤒᤠ ᤗᤢᤱᤜᤠ᤹ ᤁᤢᤶᤈᤡᤰᤔᤠ ᤐᤥ᤺ᤰᤂᤧᤖ ᤕ᤺ᤵᤛᤢᤍᤣᤛᤢ. ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤜᤠ᤹ ᤆᤩᤧᤵᤋᤢᤀᤠᤱ ᤂᤧᤴ ᤋᤧᤴᤜᤠ᤹ᤀᤥ ᤁᤧᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤳᤜᤠ᤹ᤖᤧ ᤌᤡᤶᤛᤢ॥

¹⁵ ᤀᤡᤛᤪᤠᤀᤡᤗᤧᤴ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤆᤥᤃᤢᤒᤠ ᤒᤣᤌᤣᤗᤀᤥ ᤁᤧᤏᤧᤒᤠ ᤁᤣ᤺ᤶᤒᤠᤍᤧᤴᤏᤡᤴ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴᤏᤠᤱ ᤂᤢᤏᤧ᤹ ᤗᤢ᤺ᤴᤍᤢᤍᤣᤛᤢ॥ ᤂᤢᤏᤧ᤹ ᤂᤧᤴ ᤁᤣ᤺ᤶᤒᤠᤍᤧᤴᤏᤡᤴ ᤔᤡᤎᤡᤰᤂᤢᤍᤣᤛᤢ ᤜᤧᤰᤁᤩᤠᤱ ᤂᤧᤴ ᤂᤠᤵᤐᤢᤌᤩ᤺ᤱ ᤁᤢᤶᤈᤡᤰᤔᤠ ᤆᤥᤃᤢ. ᤂᤶᤓᤩᤠᤱ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤅᤡᤴᤏᤠᤱ ᤔᤡᤎᤡᤰᤂᤢᤍᤣᤛᤢ॥

¹⁶ ᤂᤧᤴ ᤀᤣᤃᤠᤱ ᤕᤥᤛᤡᤕᤠᤜᤴ ᤏᤠ ᤏᤢ ᤁᤳᤏᤠ ᤀᤥᤔᤕᤧᤸᤗᤧ ᤀᤠᤸᤗ ᤂᤢᤏᤧ᤹ ᤁᤥ᤺ᤰᤔᤠᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤀᤡᤐᤢᤱᤜᤠ᤹ ᤏᤡᤛᤢ. ᤂᤧᤒᤩᤠᤱ ᤂᤧᤴ ᤀᤡᤐᤢᤱᤜᤠ᤹ᤀᤥᤗᤠᤶ ᤕᤧᤵᤐᤠᤜᤠ᤹ ᤗ᤺ᤵᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤀᤠᤛᤢᤳᤌᤥ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤴ ᤕᤧᤵᤐᤠ ᤗᤢᤱᤛᤡᤜᤠ᤹ ᤜᤠᤒᤠ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤍᤣᤛᤢ॥ ᤁᤴ ᤐᤠ᤺ᤴᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤐᤠ᤺ᤳᤋᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡᤰ ᤕᤥᤛᤡᤕᤠᤜ᤺ᤸᤗᤧ ᤁᤴ ᤕᤠ᤺ᤶᤒᤰᤜᤠ᤹ ᤆᤥᤃᤢ॥

¹⁷ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤢᤛᤡ. “ᤀᤠᤱᤃᤠ᤹ ᤏᤡᤛᤢᤱᤒᤠ ᤁᤴ ᤏᤡᤱᤘᤠ᤹ᤛᤥᤰ ᤀᤡ᤺ᤳᤋᤧᤴ ᤌᤧᤔᤠᤒᤣ᥅” ᤂᤧᤴ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ᤺ᤸᤗᤧ ᤁᤢᤀᤡᤐᤢᤱ ᤔᤡᤰᤛᤣ᤺ᤴᤗᤥ. ᤂᤢᤏᤧ᤹ ᤕᤜᤢᤍᤠᤗᤠᤶ ᤑᤧᤖᤧᤀᤠᤱ ᤒᤣᤌᤣᤗᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤍᤠᤱᤒᤠᤖᤧ ᤁᤧᤈᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤀᤠᤱ ᤘᤕᤧ॥”

¹⁸ ᤂᤢᤏᤧ᤹ ᤔᤧᤳᤋᤢᤛᤡ. “ᤜᤧᤰᤁᤣᤏᤧᤓᤃᤪ ᤂᤧᤴ ᤗᤧᤖᤧᤶ ᤏᤧᤛ᤻ᤛᤧᤶᤔᤧ᤹॥ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤸᤗᤧ ᤁᤢᤕᤧᤳᤋᤡᤴ ᤔᤧᤛᤢᤛᤧᤶᤔᤡᤴᤏᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤸᤗᤧᤴ ᤏᤢ ᤛᤠᤔᤖᤡᤕᤠᤗᤠᤶ ᤁᤧᤓᤧᤶᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤜᤠᤒᤠ ᤔᤧᤗᤧᤖᤢᤔᤧᤎ॥

¹⁹ ᤂᤧᤴᤏᤢ᤺ᤸᤗᤧ ᤘᤣ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤛᤠᤔᤖᤡᤕᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤔᤧᤈᤥᤃᤢᤒᤠ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤜᤠ᤹ᤀᤥᤒᤠ ᤁᤧᤖᤧᤰ ᤔᤠᤱᤎᤠ᤺ᤴᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴ ᤐᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤕᤥᤛᤡᤕᤠᤜ᤺ᤸᤗᤧ ᤒᤣᤌᤣᤗᤀᤥ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤂᤧᤴ ᤂᤧᤳᤋᤢᤍᤣᤛᤢᤀᤠᤱ ᤀᤠᤛᤢᤳᤌᤥ ᤆᤥᤃᤢ॥

²⁰ ᤂᤧᤵᤔᤥᤒᤠ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤜᤠ᤹ᤀᤥᤒᤠ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤕᤥᤛᤡᤕᤠᤜ᤺ᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤛᤶᤎᤠᤱ ᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ᤀᤥ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤔᤡᤎᤡᤰᤂᤢ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤕᤖᤢᤛᤗᤧᤔ ᤏᤢ᤺ᤰᤂᤧ ᤑᤧᤖᤧᤖᤥ॥

ᤕᤥᤛᤡᤕᤠᤜ᤺ᤸᤗᤧ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤋᤥᤛᤢ

²¹ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢᤛᤡ. “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤥ᤺ᤰᤕᤢᤶᤓᤥ ᤋᤱᤏᤠᤶᤔᤥᤒᤠ ᤁᤴ ᤔᤠᤱᤜᤢᤵ ᤛᤠᤵᤐᤴᤏᤥ ᤛᤠᤵᤋᤧᤒᤠ ᤁᤢᤀᤡᤛᤡᤰ ᤋᤥᤛᤧᤶᤔᤧ᤹॥”

²² ᤀᤡᤛᤪᤠᤀᤡᤗᤡᤜᤠ᤹ ᤗᤠᤶᤃᤧᤗᤥᤒᤠ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤴᤜᤠ᤹ᤀᤠᤱ ᤁᤳᤌᤥ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤔᤥ ᤀᤰᤋᤱᤒᤠ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤀᤠᤓᤧᤸᤗᤧᤀᤠᤱ ᤔᤧᤴᤍᤥᤀᤣ ᤘᤕᤧ॥

²³ ᤁᤖ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤴ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤡᤴ ᤔᤧᤍᤥᤛᤢᤖᤥ॥

ᤕᤥᤛᤡᤕᤠᤜ᤺ᤸᤗᤧ ᤋᤥ᤺ᤴᤍᤢᤒᤠ ᤘᤣ᤹ ᤕᤠ᤺ᤶᤒᤰᤜᤠ᤹

²⁴ ᤁᤴᤏᤢ᤺ᤸᤗᤧ ᤘᤣ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜ᤺ᤸᤗᤧ ᤂᤥᤛᤢᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤴᤏᤥ ᤛᤠᤵᤋᤧᤒᤠ ᤐᤠ᤺ᤴᤜᤠ᤹ ᤁᤧᤵᤔᤠᤖᤧ ᤗᤠᤃᤡ ᤕᤥᤛᤡᤕᤠᤜ᤺ᤸᤗᤧ ᤁᤧᤖᤧᤰ ᤂᤠᤃᤧᤀᤡᤰᤐᤠᤜᤠ᤹. ᤜᤧᤰᤁᤩᤠᤱ ᤑᤧᤴᤛᤠᤶ ᤔᤢᤖᤠ ᤁᤧᤔᤧᤵᤐᤠᤜᤠ᤹. ᤁᤧᤖᤧᤰ ᤜᤡᤶᤛᤠᤶᤔᤠᤱᤜᤠ᤹ ᤏᤢ ᤏᤠᤘᤠᤀᤡᤳᤗᤠᤜᤠ᤹. ᤂᤧᤒᤩᤠᤱ ᤕᤜᤢᤍᤠᤀᤥ ᤏᤢ ᤕᤖᤢᤛᤗᤧ᤺ᤶᤔᤥ ᤏᤡᤃᤧᤍᤧᤵᤐᤠ ᤁᤧᤖᤧᤰ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ ᤌᤩ᤺ᤱ ᤔᤧᤰᤂᤢ॥

²⁵ ᤀᤠᤵᤑᤣᤰ ᤁᤧᤖᤧᤰ ᤏᤡᤱᤘᤠ᤹. ᤕᤠᤶᤛᤠᤶ ᤏᤢ ᤌᤢᤶᤔᤡᤸᤗᤧ ᤔᤥᤛᤠ᤺ᤸᤗᤧ ᤁᤧᤖᤧᤰ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤀᤠᤱ ᤕᤜᤘᤣ ᤍᤠᤱᤒᤠ ᤗᤧᤵᤔᤠᤱ ᤜᤧᤰᤁᤣᤗ᤹ᤖᤡᤰ ᤁᤧᤏᤢ᤺ᤱᤒᤠ ᤀᤠᤳᤋᤡᤴ ᤜᤠᤱᤅᤡᤴᤏᤠᤱ ᤕᤥᤛᤡᤕᤠᤜᤴ ᤁᤢᤀᤡᤛᤡᤰ ᤋᤃᤡ ᤀᤡᤃᤪ ᤀᤣᤃᤠᤱ ᤀᤠᤓᤧᤸᤗᤧᤀᤠᤱ ᤔᤧᤶᤒᤥᤱᤅᤣ ᤘᤠ᤹॥

²⁶ ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤧᤴ ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥ᤺ᤰᤔᤥᤗᤠᤶ ᤔᤧᤏᤢ᤺ᤰᤂᤧᤴ. ᤔᤏᤛ᤻ᤛᤣ᤺ᤸᤗᤧ ᤁᤢᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤕᤜᤢᤍᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤢᤏᤧ᤹ ᤆᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤘᤕᤧ॥

²⁷ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤐᤠ᤺ᤳᤋᤢ—“ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤀᤡᤛᤪᤠᤀᤡᤗᤧᤴ ᤗ᤺ᤳᤋᤢᤱᤍᤧᤛᤢᤱᤅᤠᤱ ᤘᤕᤧ. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤢᤍᤠ᤺ᤴᤏᤠᤱ ᤀᤠᤱᤃᤠ᤹ ᤀᤠᤍᤃᤡᤗᤠᤶ ᤗ᤺ᤳᤋᤢᤱᤍᤣᤛᤢᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤣᤃᤢᤱᤒᤠ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤏᤢ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤂᤧᤵᤔᤥ ᤘᤠ᤹ ᤑᤠ᤹ᤀᤠᤱ ᤐᤠ᤺ᤳᤋᤢᤱᤅᤠᤱ ᤘᤕᤧᤒᤠ ᤂᤧᤴ ᤔᤠᤱᤜᤡᤶᤔᤡᤴ ᤀᤠᤱᤃᤠ᤹ ᤏᤠ᤹ᤖᤢᤱᤗᤥ॥”

ᤕᤥᤛᤡᤕᤠᤜ᤺ᤸᤗᤧ ᤁᤢᤜᤠᤱᤕᤢᤰᤁᤡᤴ ᤏᤢᤵ

²⁸ ᤕᤥᤛᤡᤕᤠᤜ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤴᤏᤠᤱᤒᤡ᥅

²⁹ ᤀᤠᤸᤗ ᤕᤥᤛᤡᤕᤠᤜᤴ ᤜᤠᤱ ᤘᤕᤧᤸᤗᤧ ᤔᤡᤛᤪᤒᤠ ᤜᤠᤱ ᤑᤠᤖᤥ ᤏᤣᤁᤥᤸᤗᤧ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤑᤠ᤹ᤔᤠᤖᤧ ᤗᤠᤃᤡ ᤂᤢᤏᤧ᤹ ᤕᤢᤑᤪᤣᤋᤡᤛ ᤘᤜ᤺ᤱᤅᤥ ᤗᤧᤵᤔᤠᤱ ᤌᤥ᤺ᤰᤛᤡᤱ ᤌᤠᤅᤧ॥ ᤕᤥᤛᤡᤕᤠᤜ ᤜᤠᤱᤅᤡᤴ ᤂᤧᤴᤏᤢ ᤌᤱ ᤆᤥ᤺ᤰᤛᤧ ᤋᤃᤡ ᤌᤠᤛᤡᤱ. ᤁᤖ ᤏᤣᤁᤥᤸᤗᤧ ᤌᤱ ᤌᤰᤋᤧᤀᤠᤱ ᤂᤢᤏᤧ᤹ ᤔᤃᤡᤍ᤻ᤍᤥᤀᤥ ᤛᤩᤧᤖᤢ॥

³⁰ ᤕᤥᤛᤡᤕᤠᤜ᤺ᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤈᤣᤴ ᤀᤴᤗᤠᤎᤠᤀᤥ ᤔᤧᤃᤣ᤺ᤳᤋᤢᤀᤠᤱ ᤕᤖᤢᤛᤗᤧᤔ ᤔᤧᤕᤢᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤀᤡᤐᤢᤱᤅᤥ ᤔᤧᤈᤡᤰᤂᤢ॥ ᤂᤧᤴ ᤀᤣᤃᤠᤱ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤜᤥᤀᤠᤜᤠᤈᤧᤴ ᤔᤧᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤗᤧᤰᤘᤠᤀᤥ ᤜᤠᤱ ᤔᤠᤱᤌᤥ᤺ᤰᤔᤠ ᤔᤧᤈᤥᤃᤢᤖᤥ॥

ᤕᤜᤢᤍᤠᤒᤠ ᤜᤠᤱ ᤕᤜᤥᤀᤠᤜᤠᤈ

³¹ ᤀᤠᤸᤗ ᤕᤜᤥᤀᤠᤜᤠᤈᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤛᤢᤶᤛᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤗᤠ ᤛᤢᤶᤛᤡ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤜᤔᤢᤋᤗ ᤘᤕᤧ. ᤂᤢᤏᤧ᤹ ᤕᤷᤔᤡᤕᤠ᤺ᤸᤗᤧ ᤁᤢᤛ᤻ᤛᤠ ᤗᤡᤒ᤻ᤏᤠ ᤁᤧᤕᤢᤱᤔᤠ ᤘᤕᤧ॥

³² ᤕᤜᤥᤀᤠᤜᤠᤈᤧᤸᤗᤧ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥

³³ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤜᤠᤱᤕᤢᤰ ᤔᤧᤈᤥᤃᤢᤴᤗ ᤑᤠ᤹ᤀᤠᤱ ᤑᤠᤖᤥ ᤏᤣᤁᤥᤸᤗᤧ ᤂᤢᤏᤧ᤹ ᤌᤰᤁᤪᤱᤅᤡᤸᤗᤧ ᤀᤡᤄᤣ᤺ᤰᤂᤢᤀᤠᤱ ᤜᤔᤠᤋ ᤗᤠᤈᤣ᤹ ᤖᤡᤒ᤻ᤗᤠᤀᤥ ᤕᤢᤰᤂᤢ. ᤜᤧᤰᤁᤩᤠᤱ ᤕᤜᤢᤍᤠ ᤗᤠᤈᤣᤴ ᥉.᥊᥆᥆ ᤁᤡᤗᤥᤃᤪᤠᤔ ᤕᤢᤵᤐᤠ ᤏᤢ ᤛᤢᤶᤒᤥᤱᤅᤠᤱ ᤗᤡᤛᤡ ᤁᤡᤗᤥᤃᤪᤠᤔ ᤛᤠᤶᤔᤩᤠᤱ ᤀᤣ᤺ᤱ ᤜᤢᤱᤔᤠ ᤐᤠᤱᤄᤢ॥

³⁴ ᤑᤠᤖᤥ ᤏᤣᤁᤥᤸᤗᤧ ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤀᤣᤗᤩᤠᤁᤡᤔᤧᤴ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤗᤧᤰᤘᤠ ᤜᤠᤱ ᤆᤥᤃᤢ. ᤜᤧᤰᤁᤩᤠᤱ ᤀᤣᤗᤩᤠᤁᤡᤔᤗᤠᤶ ᤕᤜᤥᤕᤠᤁᤡᤔ ᤔᤡᤱ ᤘᤠ᤺ᤳᤋᤢ॥ ᤁᤖ ᤂᤢᤏᤧ᤹ ᤕᤜᤥᤀᤠᤜᤠᤈᤧᤴ ᤔᤡᤛᤪ ᤗᤠᤈᤣ᤹ᤀᤥ ᤋᤣ᤹ᤖᤢᤀᤠᤱ ᤕᤢᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤒᤠ ᤂᤧᤵᤔᤥᤀᤣ ᤛᤩᤧ॥

³⁵ ᤑᤠᤖᤥᤸᤗᤧ ᤏᤠ᤺ᤰᤋᤢᤒᤠ ᤛᤠᤶᤔᤩᤠᤱ ᤏᤢ ᤕᤢᤵᤐᤠᤜᤠ᤹ ᤜᤢᤱᤔᤠᤖᤧ ᤗᤠᤃᤡ ᤕᤜᤥᤕᤠᤁᤡᤔᤧᤸᤗᤧ ᤗᤠᤈᤣ᤹ᤀᤥ ᤀᤣ᤺ᤱ ᤑᤥ᤺ᤰᤂᤢ॥ ᤜᤢᤱᤔᤠ ᤐᤠᤱᤄᤢᤛᤡᤒᤠ ᤀᤣ᤺ᤱ ᤁᤢᤀᤡᤛᤡᤰ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤱᤔᤠ ᤔᤧᤛᤢᤰᤋᤢᤒᤠ ᤕᤠᤖᤡᤰ ᤛᤠᤶᤔᤩᤠᤱ ᤏᤢ ᤕᤢᤵᤐᤠᤜᤠ᤹ ᤂᤢᤏᤧ᤹ ᤑᤥ᤺ᤰᤂᤢᤛᤡᤖᤥ॥

ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔ

³⁶ ᤀᤠᤸᤗ ᤕᤜᤥᤕᤠᤁᤡᤔᤧᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤈᤒᤡᤍᤠ ᤘᤕᤧ. ᤂᤢᤏᤧ᤹ ᤐᤍᤠᤕᤠᤜᤖᤧ ᤁᤢᤛ᤻ᤛᤠ ᤖᤢᤔᤠ ᤁᤧᤕᤢᤱᤔᤠ ᤘᤕᤧ॥

³⁷ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢᤖᤥ॥