᥈ ᤜᤠᤱ 22 - LIFOTNT

ᤕᤜᤢᤍᤠᤒᤠ ᤜᤠᤱ ᤕᤥᤛᤡᤕᤠᤜ

¹ ᤀᤠᤸᤗ ᤕᤥᤛᤡᤕᤠᤜᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤋᤱᤒᤣ ᤕᤧᤳᤇᤡ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤛᤢᤶᤒᤥᤱᤅᤠᤱ ᤌᤡᤰ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤕᤍᤡᤋᤠ ᤘᤕᤧ॥ ᤂᤧᤴ ᤀᤍᤠᤕᤠᤜᤖᤧ ᤁᤢᤛ᤻ᤛᤠ ᤒᤥᤛ᤻ᤁᤋ ᤁᤧᤕᤢᤱᤔᤠ ᤘᤕᤧ॥

² ᤕᤥᤛᤡᤕᤠᤜ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤂᤢᤏᤧ᤹ ᤜᤠᤒᤠ ᤂᤧᤴ ᤆᤥᤃᤢ॥ ᤂᤢᤏᤧ᤹ ᤆᤢᤵᤛᤠᤱ ᤑᤧᤴᤇᤠᤱ ᤔᤧᤸᤗ᤹ᤀᤣ ᤂᤢᤏᤧ᤹ ᤁᤢᤛᤢᤎᤧᤒᤠ ᤍᤠᤀᤢᤍᤖᤧᤀᤣ ᤁᤧᤖᤧᤰ ᤁᤢᤕᤧᤵᤗᤧᤰᤜᤠ᤹ ᤏᤠ᤺ᤳᤋᤢ ᤋᤡᤶᤍᤢᤖᤥ॥

ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤴᤏᤡᤴ ᤔᤧᤄᤥᤛᤢ

³ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤔᤛᤢᤸᤗᤠᤔᤖᤧ ᤁᤢᤶᤔᤧᤴᤇᤠ᤹. ᤀᤛᤗᤩᤠᤜᤖᤧ ᤁᤢᤛ᤻ᤛᤠ ᤛᤢᤜᤠᤱᤔᤡᤒᤠ ᤛᤠᤐᤠᤏᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤐᤠᤱᤄᤢ॥

⁴ ᤂᤢᤏᤧ᤹ ᤂᤧᤴ ᤔᤧᤳᤋᤢ. “ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜᤀᤥ ᤐᤣᤃᤧ᤹. ᤜᤧᤰᤁᤩᤠᤱ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ᤖᤧ ᤔᤏᤠᤜᤠ᤹ᤗᤠᤶ ᤔᤧᤍᤠ᤺ᤰᤋᤢᤒᤠ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢᤒᤠ ᤕᤠᤱᤛᤠᤜᤠ᤹ ᤕᤠᤖᤡᤵ ᤆᤥᤃᤧ᤹ ᤕᤢᤰᤂᤧ᤹ ᤑᤠ᤹ᤀᤠᤱ ᤂᤧᤴ ᤔᤧᤳᤋᤧ᤹॥

⁵ ᤔᤠᤱᤜᤡᤶᤔᤥᤒᤠ ᤕᤠ᤺ᤶᤒᤰ ᤀᤥᤃᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤂᤧᤴ ᤐᤡᤖᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤆᤠ᤺ᤱᤘᤠ ᤁᤧᤔᤧᤵᤐᤠ ᤔᤏᤠᤜᤠ᤹ ᤔᤧᤒᤡᤖᤢᤛᤡᤖᤖᤥ॥

⁶ ᤛᤡᤱ ᤁᤧᤃᤠᤶᤒᤠ. ᤗᤢᤱ ᤁᤧᤛᤧᤵᤐᤠ ᤏᤢ ᤁᤧᤈᤥ᤺ᤰᤐᤠᤜᤠ᤹ ᤔᤧᤒᤡᤖᤢᤛᤡᤖ॥ ᤔᤠᤱᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤛᤡᤱᤗᤢᤱ ᤏᤢ ᤂᤰᤔᤏᤠᤒᤠ ᤗᤢᤱᤜᤠ᤹ ᤂᤧᤱᤜᤠ᤹ᤖᤧ ᤔᤧᤀᤡᤅᤢᤖ॥

⁷ ᤂᤧᤱᤜᤠ᤹ ᤔᤧᤒᤡᤖᤢᤛᤡᤒᤠ ᤕᤠᤱᤅᤡᤴ ᤂᤧᤱᤜᤠ᤹ᤖᤧ ᤔᤧᤱᤃᤥ᤺ᤳᤋᤢᤴᤗ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤏᤡᤖᤡᤰᤁᤠᤱ ᤕᤠ᤺ᤶᤒᤰ ᤔᤧᤈᤥ᤺ᤰᤗ ᤔᤧᤕᤠᤰ॥”

⁸ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜ᤺ᤸᤗᤧ ᤛᤢᤜᤠᤱᤔᤡᤒᤠ ᤛᤠᤐᤠᤏᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤴᤏᤡᤴ ᤂᤥᤛᤢᤱᤅᤠᤱ ᤘᤠ᤹॥” ᤂᤧᤴ ᤂᤢᤏᤧ᤹ ᤛᤠᤐᤠᤏᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤛᤠᤵᤐᤴᤏᤡᤴ ᤏᤡᤖᤢ॥

⁹ ᤂᤧᤒᤩᤠᤱ ᤛᤢᤜᤠᤱᤔᤡᤒᤠ ᤛᤠᤐᤠᤏᤧᤴ ᤜᤠᤱᤅᤧᤀᤥ ᤐᤣᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤛᤢᤜᤠᤱᤔᤡᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤧᤕᤢᤱᤒᤠ ᤕᤠᤱᤅᤡᤴ ᤔᤧᤍᤣ᤹ᤖᤢᤀᤠᤱ ᤔᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤕᤠ᤺ᤶᤒᤰ ᤀᤥᤃᤧᤔᤧᤵᤐᤠᤜᤠ᤹ ᤔᤧᤒᤡᤖᤢᤛᤡᤀᤠᤱ ᤘᤠ᤹॥”

¹⁰ ᤂᤧᤴ ᤀᤣᤃᤠᤱ ᤛᤢᤜᤠᤱᤔᤡᤒᤠ ᤛᤠᤐᤠᤏᤧᤸᤗᤧ ᤜᤠᤱᤅᤡᤴ ᤁᤴ ᤐᤠ᤺ᤴᤏᤡᤴ ᤔᤧᤳᤋᤢ. “ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤈᤁᤡᤕᤠ᤺ᤸᤗᤧ ᤀᤠᤱᤃᤠ᤹ ᤗᤳᤇᤠ ᤛᤠᤵᤐᤴ ᤐᤡᤖᤠᤱᤅᤠᤱ ᤘᤠ᤹॥” ᤜᤧᤰᤁᤩᤠᤱ ᤛᤠᤐᤠᤏᤧᤸᤗᤧ ᤂᤧᤴ ᤛᤠᤵᤐᤴᤏᤡᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤏᤡᤖᤢ ᤐᤡᤖᤢ॥

¹¹ ᤀᤠᤸᤗ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤏᤡᤴ ᤜᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤂᤢᤏᤧ᤹ ᤁᤢᤍᤣ᤺ᤳᤋᤡᤴ ᤌᤧ᤺ᤰᤂᤢ॥

¹² ᤂᤢᤏᤧ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜ. ᤛᤠᤐᤠᤏᤖᤧ ᤁᤢᤛ᤻ᤛᤠ ᤀᤜᤡᤁᤠᤔ. ᤔᤡᤁᤠᤕᤠᤖᤧ ᤁᤢᤛ᤻ᤛᤠ ᤀᤰᤒᤥᤖ. ᤛᤢᤜᤠᤱᤔᤡᤒᤠ ᤛᤠᤐᤠᤏ ᤏᤢ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤀᤛᤠᤕᤠᤜᤴ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢᤛᤡ—

¹³ “ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤃᤡ. ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤢ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤴ ᤂᤥᤔᤏᤠᤒᤠ ᤛᤠᤵᤐᤴᤏᤥ ᤌᤣ ᤛᤠᤵᤋᤧᤀᤠᤱ ᤐᤳ ᤑᤠ᤹ᤀᤠᤱ ᤐᤣᤃᤧᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤍᤥᤛᤧᤶᤔᤧ᤹॥ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤁᤴ ᤛᤠᤵᤐᤴᤏᤥᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤒᤠ ᤜᤥᤵ॥ ᤀᤠᤏᤡ᤹ ᤕᤠ᤺ᤶᤒᤣᤀᤥ ᤂᤧᤵᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤥᤵ॥”

¹⁴ ᤁᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜ. ᤀᤜᤡᤁᤠᤔ. ᤀᤰᤒᤥᤖ. ᤛᤠᤐᤠᤏ ᤏᤢ ᤀᤛᤠᤕᤠᤜᤴ ᤜᤢᤸᤍᤠ ᤔᤡᤱ ᤁᤧᤘᤠ᤺ᤵᤔᤠ ᤔᤧᤴᤇᤢᤔᤠᤎᤡᤰᤁᤥ ᤐᤠ᤺ᤴᤛᤣ᤺ᤴᤍᤥᤛᤧ ᤔᤧᤒᤣ॥ ᤂᤧᤴ ᤔᤧᤴᤇᤢᤔᤠᤴ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤛᤱ ᤁᤢᤗᤰᤁᤥ ᤁᤧᤕᤢᤱᤔᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤠ ᤘᤕᤧ॥ (ᤋᤡᤰᤓᤠ᤺ᤸᤗᤧ ᤁᤢᤛ᤻ᤛᤠ ᤏᤢ ᤜᤖᤜᤛᤖᤧ ᤁᤢᤶᤔᤧᤴᤇᤠ᤹ ᤛᤸᤗᤢᤔᤧᤴ ᤜᤢᤸᤍᤠ᤺ᤸᤗᤧ ᤁᤢᤕᤧᤶᤒᤠ ᤘᤕᤧ ᤜᤧᤰᤁᤩᤠᤱ ᤛᤸᤗᤢᤔᤖᤧ ᤔᤠᤱᤜᤡᤶᤔᤥᤒᤠ ᤋᤣᤳᤆᤠᤱᤜᤠ᤹ ᤀᤥᤔᤧᤵᤔᤠ ᤆᤥ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢ॥) ᤂᤧᤱᤜᤠ᤹ᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤢᤸᤍᤠ᤺ᤴ ᤔᤧᤈᤧᤰᤋᤢ॥

¹⁵ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤒᤠ ᤁᤴ ᤐᤠ᤺ᤳᤋᤢ᤹—ᤂᤡᤏᤡ᤹ ᤀᤠᤱᤃᤠ᤹ᤀᤥ ᤁᤧᤒᤠᤱᤒᤠ ᤔᤏᤠᤴ ᤔᤧᤳᤋᤧᤶᤔᤧ᤹.

¹⁶ ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤕᤜᤢᤍᤠᤒᤠ ᤜᤠᤱᤅᤡᤸᤗᤧ ᤏᤡᤖᤢᤒᤠ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤀᤡᤛᤡᤰ ᤀᤠᤱᤃᤠ᤹ ᤁᤴ ᤋᤧᤴᤏᤥ ᤏᤢ ᤁᤸᤗᤧ ᤁᤢᤔᤏᤠᤜᤠ᤹ᤀᤥ ᤔᤧᤰᤔᤠᤛᤡᤔᤧᤴ ᤋᤠᤖᤢᤱ᤹॥

¹⁷ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤏᤠ᤹ᤖᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤘᤣ᤹ ᤔᤱᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤘᤠ᤹. ᤂᤧᤒᤩᤠᤱ ᤀᤠᤵᤑᤣᤰ ᤜᤢᤰᤁᤡᤸᤗᤧ ᤔᤧᤈᤥᤃᤢᤛᤡᤒᤠ ᤁᤧᤖᤧᤰ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤢᤀᤠᤱ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤁᤴ ᤋᤧᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤀᤠᤕᤠᤰ ᤗᤧ᤹ᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤛᤡᤰ ᤐᤥ᤺ᤰᤔᤧᤴ ᤔᤧᤈᤡ᤺ᤰᤋᤢᤴ᤹॥’

¹⁸ ᤕᤜᤘᤣ ᤍᤠᤱᤒᤧᤴ ᤐᤠ᤺ᤴᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤁᤧᤒᤠᤱᤒᤠ ᤕᤜᤢᤍᤠᤒᤠ ᤜᤠᤱᤅᤡᤴ ᤀᤠᤶᤓᤠ ᤁᤴ ᤐᤠ᤺ᤴᤏᤡᤴ ᤔᤧᤳᤋᤧᤶᤔᤧ᤹. ‘ᤀᤠᤍᤠᤱᤒᤠᤖᤧ ᤁᤧᤄᤧᤵᤛᤢᤒᤠ ᤀᤡᤱᤄᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤒᤠ ᤁᤴ ᤐᤠ᤺ᤳᤋᤢ᤹—

¹⁹ ᤂᤧᤏᤧ᤹ ᤀᤠᤵᤑᤣᤰ ᤁᤧᤏ᤺ᤶᤛᤡᤱᤅᤠᤱ ᤗᤠᤕᤥᤗᤠᤶ ᤁᤧᤜᤡ᤺ᤴᤍᤧᤒᤠᤸᤗᤧ. ᤜᤧᤰᤁᤩᤠᤱ ᤁᤴ ᤗᤠᤈᤣᤴ ᤏᤢ ᤁᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤂᤧᤱᤜᤠ᤹ ᤔᤠᤱᤍᤣ ᤛᤠᤰᤔᤢᤖᤠ ᤔᤧᤎᤠ᤹᤺ ᤜᤧᤰᤁᤩᤠᤱ ᤂᤠᤵᤐᤢᤌᤩ᤺ᤱ ᤔᤧᤒᤥᤱ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤧᤄᤧᤵᤛᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤏᤧ᤹ ᤁᤧᤍᤩᤧᤒᤠᤸᤗᤧ. ᤂᤧᤒᤩᤠᤱ ᤂᤧᤏᤧ᤹ ᤁᤧᤈᤠᤱᤅᤡᤴ ᤁᤧᤎᤧ᤺ᤰᤂᤢᤀᤠᤱ ᤀᤠᤱᤃᤠ᤹ ᤀᤠᤍᤃᤡ ᤔᤧᤖᤡᤱ ᤁᤧᤎᤰᤋᤧᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤒᤣᤗᤡᤴ ᤂᤧᤵᤛᤢᤱᤅᤠᤱ ᤘᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹॥

²⁰ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤑᤢᤱᤏᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤏᤡᤱᤘᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤁᤧᤶᤈᤡᤱ᤹॥ ᤁᤴ ᤋᤧᤴᤏᤥ ᤀᤠᤱᤃᤠ᤹ ᤋᤠᤖᤢᤱᤒᤠ ᤁᤧᤖᤧᤰ ᤔᤧᤰᤔᤠ ᤛᤡᤔᤠᤜᤠ᤹ ᤂᤧᤏᤧ᤹ ᤁᤧᤔᤡᤰᤁᤡᤸᤗᤧ ᤏᤡᤔᤠ ᤁᤧᤱᤄᤥᤛᤢᤴ᤹॥’” ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤜᤠᤱ ᤕᤥᤛᤡᤕᤠᤜᤀᤥ ᤁᤴ ᤀᤡᤱᤄᤱᤅᤡᤴ ᤔᤧᤃᤧᤳᤋᤢᤖᤥ॥