᥈ ᤜᤠᤱ 21 - LIFOTNTᤕᤜᤢᤍᤠᤒᤠ ᤜᤠᤱ ᤔᤏᤛ᤻ᤛᤣ ( ᥈ ᤛᤠᤵᤔᤢ ᥉᥉:᥇-᥈᥆ ) 1 ᤀᤠᤸᤗ ᤔᤏᤛ᤻ᤛᤣᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤌᤡᤒᤥᤱᤅᤠᤱ ᤋᤱᤒᤣ ᤏᤧᤳᤇᤡ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤅᤠᤒᤥᤱᤅᤠᤱ ᤋᤱᤒᤣ ᤅᤠᤛᤡ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤜᤣᤵᤛᤡᤒᤠ ᤘᤕᤧ॥ 2 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤏᤠ᤺ᤳᤋᤢᤍᤣᤛᤢᤛᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤧᤗᤧ᤺ᤱᤒᤠ ᤕᤧᤵᤗᤧᤰᤜᤠ᤹ ᤂᤢᤏᤧ᤹ ᤏᤠ᤺ᤳᤋᤢ ᤋᤡᤶᤍᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤢᤏᤧ᤹ ᤜᤠᤒᤠ ᤂᤧᤴ ᤆᤥᤃᤢ॥ 3 ᤂᤢᤏᤧ᤹ ᤁᤢᤶᤒᤠ ᤜᤡᤈᤁᤡᤕᤠ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤒᤠ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤏᤥᤒᤠ ᤔᤠᤱᤎᤠ᤺ᤱᤜᤠ᤹ ᤂᤢᤏᤧ᤹ ᤕᤠᤶᤔᤥ ᤆᤥᤃᤢ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤀᤠᤜᤠᤒᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤒᤠᤗ ᤔᤠᤱᤅᤡᤸᤗᤧ ᤁᤢᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢ. ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱ ᤛᤡᤳᤗᤠᤱ ᤌᤡᤰᤁᤠᤱ ᤆᤥᤃᤢ॥ ᤂᤢᤏᤧ᤹ ᤛᤠᤒᤴ ᤜᤒᤳ ᤑᤴᤇᤡᤱᤅᤠᤱ ᤋᤠᤱᤛᤠᤱᤒᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤛᤧᤘᤠ ᤔᤧᤳᤋᤢᤛᤡ॥ 4 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢ. ᤂᤧᤴ ᤔᤠᤱᤜᤡᤶᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤕᤧ. “ᤕᤖᤢᤛᤗᤧ᤺ᤶᤔᤥᤀᤣ ᤀᤠᤱᤃᤠ᤹ ᤀᤠᤔᤡᤱ ᤕᤢᤰᤂᤢᤱᤗᤥ॥” 5 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤏᤧᤵᤔᤠᤱ ᤗᤰᤂᤢᤶᤔᤥ ᤂᤢᤏᤧ᤹ ᤋᤠᤱᤛᤠᤱᤒᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢ॥ 6 ᤂᤢᤏᤧ᤹ ᤀᤠᤵᤑᤣᤰ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤴ ᤔᤡᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤆᤥᤃᤢ. ᤔᤡᤰᤗᤧ᤺ᤱᤔᤠ ᤁᤡᤳᤆᤠᤰ ᤆᤥᤃᤢ. ᤜᤧᤰᤁᤩᤠᤱ ᤌᤢᤶᤔᤩᤠ ᤀᤡᤛᤢᤀᤠᤱ ᤛᤠᤶᤔᤠᤱ ᤆᤩᤠᤱᤜᤠ᤹ ᤏᤢ ᤛᤡᤛᤠᤶᤜᤠ᤹ ᤔᤢᤖᤠ ᤔᤧᤳᤋᤢᤛᤡ॥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤆᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤆᤥᤃᤢ ᤜᤧᤰᤁᤩᤠᤱ ᤛᤠ᤹ᤖᤡᤰ ᤁᤢᤛᤡᤰ ᤑᤥ᤺ᤰᤂᤢ॥ 7 ᤂᤢᤏᤧ᤹ ᤗᤰᤋᤢ ᤂᤥ᤺ᤴᤍᤢᤀᤠᤱ ᤆᤥᤃᤢᤒᤠ ᤀᤛᤣᤖᤠ ᤔᤠᤱ ᤏᤠᤘᤠᤀᤡᤳᤗᤠᤴ ᤂᤢᤏᤧ᤹ ᤂᤧᤴ ᤔᤠᤱᤜᤡᤶᤔᤥ ᤕᤢᤰᤂᤢ. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴ ᤏᤢ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤘᤕᤧ. “ᤁᤴ ᤔᤠᤱᤜᤡᤶᤔᤥ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤀᤥᤗᤠᤶ ᤛᤣᤃᤢᤱᤒᤠ ᤕᤖᤢᤛᤗᤧ᤺ᤶᤔᤥ ᤛᤍᤠᤍᤡᤱ ᤀᤠᤱᤃᤠ᤹ ᤀᤠᤔᤡᤱ ᤕᤢᤰᤂᤢᤱ᤹॥ 8 ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰ ᤔᤧᤗ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤐᤡᤖᤢᤛᤡᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤂᤰᤐᤧᤳ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤏᤧᤓᤃᤪ. ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤗᤠᤈᤣ᤹ᤀᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤕᤠᤶᤔᤥ ᤏᤠ ᤏᤢ ᤁᤳᤏᤠ ᤋᤠᤰᤁᤶᤔᤠᤀᤠᤱ ᤘᤠ᤹ᤔᤠ ᤐᤥᤱᤗ ᤔᤧᤈᤥᤃᤢᤱᤅᤡᤴ᤹॥” 9 ᤁᤖ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤧᤶᤄᤧᤶᤔᤣ ᤔᤧᤸᤗᤠᤵᤋᤢᤴ॥ ᤔᤏᤛ᤻ᤛᤣ᤺ᤸᤗᤧ ᤂᤧᤱᤜᤠ᤹ ᤗᤧᤰᤛᤢᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤂᤠᤵᤐᤢᤌᤩ᤺ᤱ ᤔᤧᤰᤂᤢᤛᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤂᤧᤱᤜᤠ᤹ᤖᤧ ᤔᤧᤈᤥᤃᤢ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤀᤰᤂᤣ ᤐᤠ᤺ᤳᤋᤢ— 11 “ᤕᤜᤢᤍᤠᤒᤠ ᤜᤠᤱ ᤔᤏᤛ᤻ᤛᤣ᤺ᤸᤗᤧ ᤁᤴ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤘᤠ᤹॥ ᤂᤧᤸᤗᤧ ᤂᤢᤏᤧ᤹ᤏᤢ᤺ᤸᤗᤧ ᤋᤃᤡ ᤋᤃᤡᤒᤠ ᤀᤣᤔᤥᤖᤡᤜᤠ᤹ᤏᤢ᤺ᤸᤗᤧ ᤕᤖᤡᤰ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤠᤘᤠᤀᤡᤳᤗᤠᤜᤠ᤹ᤗᤠᤶ ᤕᤜᤢᤍᤠᤴ ᤗᤠᤕᤥ ᤆᤥ᤺ᤰᤔᤠ ᤐᤠᤱᤄᤢᤀᤠᤱ ᤘᤠ᤹॥ 12 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤥ ᤏᤢ ᤕᤜᤢᤍᤠᤀᤥ ᤀᤰᤋᤱᤒᤠ ᤔᤧᤰᤔᤠᤛᤡᤔᤧᤴ ᤋᤠᤖᤢᤱ᤹. ᤜᤧᤰᤁᤣᤗ᤹ᤖᤡᤰ ᤁᤧᤄᤧᤶᤒᤠ ᤁᤧᤖᤧᤰᤗᤧ ᤏᤧᤰᤂᤥᤴ ᤗᤥ᤺ᤰᤂᤢᤀᤠᤱ ᤑᤡᤱ᤹॥ 13 ᤀᤠᤱᤃᤠ᤹ ᤛᤠᤔᤖᤡᤕᤠᤴ ᤂᤢᤶᤍᤡᤱ ᤐᤡᤖᤢᤱᤅᤡᤸᤗᤧ ᤕᤠᤅᤢᤱᤒᤠ ᤘᤍᤪᤠᤴ ᤏᤢ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤅᤡᤴ ᤂᤢᤶᤍᤡᤱ ᤐᤡᤖᤢᤱᤅᤡᤸᤗᤧ ᤕᤠᤅᤢᤱᤒᤠ ᤂᤡᤍᤥᤖᤠ᤺ᤸᤗᤧ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤡᤴ ᤂᤢᤶᤍᤡᤱ ᤐᤡᤖᤢᤱ᤹॥ ᤀᤠᤰᤂᤣᤗ᤹ᤖᤡᤰ ᤔᤏᤠ᤺ᤸᤗᤧ ᤁᤢᤈᤧᤳᤌᤩᤠᤴ ᤀᤡ᤺ᤰᤂᤢᤀᤠᤱ ᤛᤠᤒᤴ ᤑᤳᤇᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤡᤴ ᤘᤖᤧᤱᤗᤧᤱ ᤀᤡ᤺ᤰᤂᤢᤱ᤹॥ 14 ᤀᤠᤱᤃᤠ᤹ ᤀᤠᤗᤰᤂᤥᤔᤥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤏᤠᤜᤠ᤹ ᤏᤠ᤹ᤖᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠᤛᤢᤱᤛᤡᤱ᤹॥ ᤂᤢᤴᤇᤡ᤹ ᤁᤧᤖᤧᤰ ᤏᤡᤱᤔᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠᤵᤋᤢᤛᤡ᤹ ᤜᤧᤰᤁᤩᤠᤱ ᤛᤠᤰᤁᤧᤸᤗᤧᤰ ᤂᤢᤴᤇᤡ᤹ ᤔᤧᤃᤳᤋᤢᤒᤠ ᤐᤠ᤺ᤴᤜᤠ᤹ ᤔᤧᤍᤣ᤹ᤖᤢ ᤔᤧᤒᤡᤖᤢᤛᤡ᤹. 15 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤀᤠᤶᤓᤠ ᤂᤧᤴᤏᤣ ᤔᤧᤈᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤔᤧᤎᤠᤅᤧᤒᤠ ᤕᤧᤴᤏᤠᤱᤎᤥ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤢᤀᤠᤱ ᤘᤠ᤹॥” 16 ᤁᤴᤏᤢ᤺ᤸᤗᤧ ᤘᤣ᤹ ᤕᤖᤢᤛᤗᤧ᤺ᤶᤔᤡᤴ ᤌᤡᤰ ᤁᤢᤛᤢᤰᤐᤥᤗᤠᤶ ᤘᤣ᤹ᤛᤔᤠ ᤁᤢᤛᤢᤰᤐᤥ ᤌᤠᤖᤡᤰ ᤔᤠᤰᤂᤡᤸᤗᤧ ᤋᤡᤶᤛᤧᤀᤠᤱ ᤏᤧᤛ᤻ᤛᤧᤖ ᤌᤠᤖᤡᤰ ᤔᤏᤛ᤻ᤛᤣ᤺ᤸᤗᤧ ᤕᤖᤡᤰ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ ᤛᤧᤛᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤕᤜᤢᤍᤠᤴ ᤗᤠᤕᤥ ᤆᤥ᤺ᤰᤔᤠ ᤐᤠᤱᤄᤢᤀᤠᤱ ᤘᤕᤧ. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤰ. ᤜᤠᤒᤠ ᤂᤧᤴᤏᤣ ᤔᤧᤈᤥᤃᤢ॥ 17 ᤔᤏᤛ᤻ᤛᤣ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹. ᤂᤢᤏᤧ᤹ ᤆᤥᤃᤢᤒᤠ ᤗᤠᤕᤥᤜᤠ᤹ᤀᤠᤱ ᤛᤥᤛᤥᤖᤡᤰ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ 18 ᤔᤏᤛ᤻ᤛᤣᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤑᤣᤰ ᤀᤢᤈ᤻ᤈᤠ ᤁᤢᤓᤢᤱᤀᤡᤰᤁᤥ ᤔᤧᤈᤡᤰᤂᤢ॥ ᤂᤧᤒᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤠᤔᤥᤏᤧᤴ ᤜᤠᤱ ᤐᤥ᤺ᤰᤂᤧᤖᤥ॥ ᤕᤜᤢᤍᤠᤒᤠ ᤜᤠᤱ ᤀᤠᤔᤥᤏ 19 ᤀᤠᤸᤗ ᤀᤠᤔᤥᤏᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤏᤧᤳᤇᤡ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤔᤛᤢᤸᤗᤣᤔᤣᤋ ᤘᤕᤧ. ᤂᤢᤏᤧ᤹ ᤜᤠᤖᤢᤛᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤕᤥᤳᤒᤠ ᤁᤧᤕᤢᤱᤔᤠ ᤘᤕᤧ॥ 20 ᤀᤠᤔᤥᤏᤧᤸᤗᤧ ᤂᤢᤏᤧ᤹ ᤁᤢᤶᤒᤠ ᤔᤏᤛ᤻ᤛᤣ᤺ᤸᤗᤧ ᤆᤥᤃᤢᤒᤠ ᤜᤧᤰᤁᤣᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥ 21 ᤂᤢᤏᤧ᤹ ᤁᤢᤶᤒᤠᤖᤧ ᤁᤧᤖᤧᤰ ᤁᤢᤕᤧᤵᤗᤧᤰᤜᤠ᤹ᤀᤥ ᤗᤠᤱᤄᤣᤃᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠᤖᤧ ᤛᤧᤘᤠ ᤔᤧᤳᤋᤢᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ ᤋᤃᤡ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤔᤠᤱᤛᤧᤘᤠ ᤆᤥᤃᤧ॥ 22 ᤂᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤶᤒᤠ ᤁᤢᤴᤎᤧᤒᤠᤛᤡᤖᤧ ᤂᤢᤴᤇᤡ᤹ ᤔᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤠ᤹ᤖᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤔᤥ ᤂᤢᤏᤧ᤹ ᤗᤠᤱᤔᤧᤄᤣᤃᤧᤴ॥ 23 ᤀᤠᤔᤥᤏᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤈᤥᤃᤢ. ᤜᤧᤰᤁᤩᤠᤱ ᤜᤠᤱᤅᤡᤴ ᤂᤢᤏᤧ᤹ᤀᤣ ᤁᤢᤜᤠᤱᤜᤡᤶᤔᤥ ᤔᤧᤛᤧᤖᤢ॥ 24 ᤂᤧᤒᤩᤠᤱ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤀᤠᤔᤥᤏ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤥᤛᤡᤕᤠᤜᤴ ᤂᤢᤏᤧ᤹ ᤁᤢᤗᤧᤰᤘᤠᤀᤥ ᤜᤠᤱ ᤔᤧᤈᤥᤃᤢ॥ 25 ᤀᤠᤔᤥᤏᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ 26 ᤀᤢᤈ᤻ᤈᤠᤒᤠ ᤁᤢᤓᤢᤱᤀᤡᤰᤁᤥ ᤁᤧᤏᤧᤒᤠ ᤀᤠᤵᤑᤣᤰ ᤁᤢᤀᤡᤐᤢᤱᤅᤥ ᤂᤢᤏᤧ᤹ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤕᤥᤛᤡᤕᤠᤜᤴ ᤜᤠᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.