᥈ ᤜᤠᤱ 20 - LIFOTNT

ᤜᤡᤈᤁᤡᤕᤠ ᤜᤠᤱᤅᤡᤴ ᤋᤢᤰᤔᤠᤗᤠᤶ ᤘᤣ᤺ᤳᤋᤧ

¹ ᤂᤧᤴ ᤕᤧᤶᤔᤥ ᤜᤡᤈᤁᤡᤕᤠ ᤜᤠᤱᤅᤡᤴ ᤋᤢᤃᤧᤀᤠᤱ ᤛᤡᤔᤠ ᤆᤥᤃᤧᤀᤠᤱ ᤏᤧᤛ᤻ᤛᤧ॥ ᤀᤠᤔᤥᤈᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠᤴ ᤂᤢᤏᤧ᤹ᤀᤥ ᤋᤩᤧᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤁᤴ ᤐᤠ᤺ᤳᤋᤢ᤹—ᤂᤧᤏᤧ᤹ ᤁᤧᤜᤡᤶ ᤁᤧᤎᤠ᤺ᤱᤜᤠ᤹ ᤏᤢᤖᤡᤰ ᤋᤱᤄᤧ᤹ ᤆᤥᤃᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛᤡᤖᤥ. ᤂᤧᤏᤧ᤹ ᤁᤧᤴᤘᤣ᤺ᤳᤏᤧᤴ॥”

² ᤂᤧᤒᤩᤠᤱ ᤜᤡᤈᤁᤡᤕᤠᤴ ᤗᤢᤱᤎᤠᤰ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢ.

³ “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤀᤠᤰᤋᤱᤒᤠ ᤏᤛᤠᤴ ᤏᤢ ᤁᤧᤖᤧᤰ ᤛᤡᤰᤗᤢᤱᤔᤠᤖᤧ ᤔᤠᤱᤛᤧᤘᤠ ᤆᤥ᤺ᤰᤏᤢ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰ ᤂᤧᤴ ᤆᤥᤃᤢᤱᤗ ᤘᤠ᤹ᤀᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤥ॥” ᤂᤶᤓᤩᤠᤱ ᤜᤡᤈᤁᤡᤕᤠᤴ ᤀᤢ᤺ᤰᤁᤠᤱ ᤀᤢ᤺ᤰ ᤜᤠᤒᤧ॥

⁴ ᤕᤛᤤᤕᤠᤴ ᤁᤢᤗᤢᤶᤔᤥᤒᤠ ᤗᤰᤂᤢᤶᤔᤥᤗᤠᤶ ᤗᤠ᤺ᤰᤁᤠᤳ ᤗ᤺ᤶᤔᤠ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤂᤢᤏᤧ᤹ᤀᤥ ᤁᤧᤖᤧᤖᤥ—

⁵ “ᤂᤧᤏᤧ᤹ ᤏᤢ᤺ᤰᤂᤧ ᤐᤣᤃᤧ᤹ᤀᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤜᤡᤈᤁᤡᤕᤠᤴ ᤔᤧᤳᤋᤧ᤹. ‘ᤂᤧᤏᤧ᤹ ᤁᤧᤛᤢᤎᤧᤒᤠ ᤍᤠᤀᤢᤍᤖᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤂᤧᤏᤧ᤹ ᤁᤧᤒᤣᤗᤡᤴ ᤂᤧᤵᤛᤢᤱ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤡᤰᤘᤠᤴ ᤏᤡᤛᤢᤱ॥ ᤀᤠᤱᤃᤠ᤹ ᤂᤧᤏᤧ᤹ ᤘᤣ᤺ᤴᤏᤧᤀᤠᤱ ᤀᤠᤀᤡᤴᤒᤠ ᤛᤢᤶᤕᤠᤴᤗᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤧᤒᤣ᤺ᤰᤗᤥ॥

⁶ ᤀᤠᤱᤃᤠ᤹ ᤀᤠᤸᤗᤛᤠᤱ ᤌᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤂᤧᤏᤧ᤹ ᤁᤧᤎᤠ᤺ᤰ ᤑᤥᤛᤢᤱ ᤐᤡᤏᤧᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤏᤠᤱᤏᤧᤀᤠᤱ ᤁᤴ ᤕᤧᤰᤕᤰᤁᤡᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤋᤢᤱ᤹॥ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤃᤡ ᤏᤢ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤗᤠᤃᤡ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤛᤧ᤺ᤵᤋᤢᤱ᤹॥’”

⁷ ᤂᤧᤒᤩᤠᤱ ᤕᤛᤤᤕᤠ᤺ᤸᤗᤧ ᤔᤧᤳᤋᤢᤛᤡ. “ᤐ᤺ᤳᤇᤣᤸᤗᤧ ᤁᤢᤈᤠ᤹ᤀᤡᤴ ᤀᤡᤏᤠᤏᤠᤒᤠ ᤆᤥᤃᤧᤶᤔᤧ᤹ᤀᤠᤱ ᤜᤢ᤺ᤳᤋᤧᤶᤔᤧ᤹॥” ᤂᤧᤱᤜᤠ᤹ᤖᤧ ᤜᤧᤰᤁᤣᤀᤣ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤴ ᤁᤢᤜᤥ᤹ᤀᤥ ᤔᤧᤜᤢ᤺ᤳᤋᤢ ᤔᤧᤒᤡᤖᤢᤀᤠᤱ ᤂᤢᤏᤧ᤹ ᤘᤣ᤺ᤳᤋᤧ॥

⁸ ᤜᤡᤈᤁᤡᤕᤠ᤺ᤸᤗᤧ ᤕᤛᤤᤕᤠᤴ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥᤛᤢᤀᤠᤱ ᤘᤕᤧ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤘᤣ᤺ᤴᤏᤠ ᤜᤧᤰᤁᤩᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤐᤣ᤺ᤰᤁᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤌᤧᤔᤠ ᤔᤡᤰᤛᤣᤴ ᤐᤡᤀᤠᤒᤣ᥅”

⁹ ᤕᤛᤤᤕᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤠ᤹ ᤂᤧᤴ ᤁᤧᤳ. ᤀᤠᤍᤠᤱᤒᤠᤖᤧ ᤁᤧᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤣᤴ ᤜᤠᤒᤠ ᤁᤴ ᤐᤥᤱ᤹॥ ᤏᤠᤶᤀᤡ᤺ᤰᤂᤱᤅᤡᤴ ᤌᤡᤒᤥᤱ ᤗᤠᤱᤃᤠᤱ ᤋᤃᤡ ᤐᤣ᤺ᤰᤗᤒᤡ. ᤀᤡ ᤌᤡᤒᤥᤱ ᤗᤠᤱᤃᤠᤱ ᤀᤣᤃᤠᤱ ᤏᤢ᤺ᤱᤗᤒᤡ᥅”

¹⁰ ᤜᤡᤈᤁᤡᤕᤠ᤺ᤸᤗᤧ ᤔᤧᤳᤋᤢ. “ᤏᤠᤶᤀᤡ᤺ᤰᤂᤱᤅᤡᤴ ᤌᤡᤒᤥᤱ ᤗᤠᤱᤃᤠᤱ ᤋᤃᤡ ᤐᤣ᤺ᤰᤔᤠᤃ ᤀᤢᤛᤢᤖᤢ ᤆᤥᤰ॥ ᤐᤖᤢᤔᤠᤸᤗᤧ ᤂᤧᤴ ᤌᤡᤒᤥᤱ ᤗᤠᤱᤃᤠᤱ ᤀᤣᤃᤠᤱ ᤏᤢ᤺ᤱᤗ॥”

¹¹ ᤂᤧᤒᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤜᤠᤈ ᤜᤠᤱᤅᤡᤸᤗᤧ ᤑᤳᤇᤢᤒᤠ ᤁᤢᤏᤠᤜᤠᤱᤛᤣ᤺ᤰᤁᤥᤒᤠ ᤏᤠᤶᤀᤡ᤺ᤰᤂᤱᤅᤡᤴ ᤌᤡᤒᤥᤱ ᤗᤠᤱᤃᤠᤱ ᤀᤣᤃᤠᤱ ᤏᤢ᤺ᤰᤂᤧᤖ ᤕᤠ᤺ᤴᤍᤢᤖᤥ॥

ᤒᤣᤒᤡᤗᤥᤏᤗᤠᤶ ᤀᤡᤱᤄᤱ ᤁᤧᤓᤧᤵᤐᤠ ᤔᤏᤠᤜᤠ᤹

¹² ᤜᤠᤒᤠ ᤂᤧᤴ ᤕᤧᤶᤔᤥ ᤒᤣᤒᤡᤗᤥᤏᤒᤠ ᤜᤠᤱ ᤒᤗᤍᤠᤏᤖᤧ ᤁᤢᤛ᤻ᤛᤠ ᤔᤖᤥᤍᤁ-ᤒᤗᤍᤠᤏᤖᤧ ᤜᤡᤈᤁᤡᤕᤠᤀᤥ ᤛᤠᤵᤐᤣ᤺ᤳᤋᤠᤜᤠ᤹ ᤏᤢ ᤗᤳᤇᤠ ᤜᤢᤰᤘᤠ ᤜᤠᤅᤢ ᤑᤧᤴᤇᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤜᤡᤈᤁᤡᤕᤠᤴ ᤋᤢᤰᤁᤠᤱ ᤏᤧ ᤁᤧᤗ᤹ᤒᤠ ᤀᤡᤱᤄᤱ ᤂᤧᤵᤛᤢᤀᤠᤱ ᤘᤕᤧ॥

¹³ ᤜᤡᤈᤁᤡᤕᤠ᤺ᤸᤗᤧ ᤀᤡᤱᤄᤱ ᤁᤧᤓᤧᤵᤐᤠᤜᤠ᤹ ᤗᤠᤱᤍᤠ᤺ᤰ ᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤎᤠ᤺ᤱᤜᤠ᤹ᤀᤥ ᤁᤧᤕᤢᤱᤒᤠ ᤁᤧᤖᤧᤰ—ᤛᤠᤶᤔᤩᤠᤱ. ᤕᤢᤵᤐᤠ. ᤔᤠᤖᤢᤰ. ᤁᤢᤏᤠᤶᤃᤧᤏᤢ᤹ᤒᤠ ᤏᤡ᤺ᤱᤃᤣ᤹—ᤂᤢᤏᤧ᤹ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹ ᤏᤧᤔᤠᤍᤧᤴ ᤜᤡᤶᤜᤠ᤹ ᤏᤢ ᤁᤢᤎᤠ᤺ᤱᤅᤥ ᤁᤧᤏᤧᤒᤠ ᤁᤠᤰ ᤛᤠᤔᤠᤜᤠ᤹ ᤀᤥ᤺ᤴᤎᤠᤰᤋᤢᤛᤡ॥ ᤜᤡᤈᤁᤡᤕᤠ᤺ᤸᤗᤧ ᤁᤢᤜᤠᤱᤜᤡᤶᤔᤥ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤜᤠᤱᤈᤢᤶᤔᤥ ᤂᤢᤏᤧ᤹ ᤂᤧᤱᤜᤠ᤹ ᤀᤥ᤺ᤴᤔᤧᤎᤠᤰᤋᤢᤛᤡᤴᤒᤠ ᤛᤠᤔᤠ ᤌᤣᤀᤠᤱ ᤔᤧᤕᤠ᤺ᤰᤋᤧᤴ॥

¹⁴ ᤂᤧᤒᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠᤴ ᤜᤠᤱ ᤜᤡᤈᤁᤡᤕᤠᤀᤥ ᤋᤩᤧᤀᤠᤱ ᤛᤣ᤺ᤴᤍᤥᤛᤢ. “ᤂᤧᤴ ᤔᤏᤠᤜᤠ᤹ᤖᤧ ᤌᤣ ᤔᤧᤒᤠ᤺ᤳᤋᤢ᥅ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤳᤋᤡᤗᤠᤶ ᤔᤧᤍᤩᤧᤒᤠᤖᤧᤳᤇ᥅” ᤜᤡᤈᤁᤡᤕᤠ᤺ᤸᤗᤧ ᤔᤧᤳᤋᤢ. “ᤂᤧᤱᤜᤠ᤹ ᤔᤠ᤺ᤱᤄᤠᤒᤠ ᤗᤠᤈᤣ᤹ ᤒᤣᤒᤡᤗᤥᤏᤗᤠᤶ ᤔᤧᤓᤧᤖᤧᤒᤠᤖᤥ॥”

¹⁵ ᤂᤧᤒᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤛᤣ᤺ᤴᤗᤠᤵᤋᤢ. “ᤂᤧᤱᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤜᤠᤱᤜᤡᤶᤔᤥ ᤌᤣᤎᤣᤜᤠ᤹ ᤔᤧᤏᤡᤛᤢᤃ᥅” ᤜᤡᤈᤁᤡᤕᤠ᤺ᤸᤗᤧ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤜᤠᤱᤜᤡᤶᤔᤥᤒᤠ ᤁᤧᤖᤧᤰ ᤛᤠᤔᤠᤜᤠ᤹ ᤔᤧᤏᤡᤛᤢ॥ ᤀᤠᤱᤃᤠ᤹ ᤀᤠᤎᤠ᤺ᤱᤅᤥ ᤁᤧᤕᤢᤱᤒᤠ ᤁᤧᤏᤧᤒᤠ ᤁᤧᤖᤧᤰ ᤛᤠᤔᤠ ᤐᤢᤔᤠᤜᤠ᤹ᤀᤥ ᤂᤧᤱᤜᤠ᤹ ᤀᤥ᤺ᤴᤔᤧᤎᤠᤰᤋᤢᤱᤛᤡᤱᤅᤡᤴᤒᤠ ᤌᤧᤔᤠᤀᤠᤱ ᤜᤥᤵ॥”

¹⁶ ᤂᤧᤒᤩᤠᤱ ᤕᤛᤤᤕᤠ᤺ᤸᤗᤧ ᤜᤡᤈᤁᤡᤕᤠᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧ᤹—

¹⁷ ᤀᤠᤸᤗ ᤂᤧᤏᤧ᤹ ᤁᤧᤜᤡᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤛᤠᤔᤠᤜᤠ᤹. ᤜᤧᤰᤁᤩᤠᤱ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤂᤧᤏᤧ᤹ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ᤖᤧ ᤔᤧᤗᤢᤵᤛᤢᤒᤠ ᤐᤠ᤺ᤴᤜᤠ᤹ ᤂᤰᤐᤧᤳ ᤒᤣᤒᤡᤗᤥᤏᤀᤥ ᤋᤣ᤹ᤔᤠ ᤕᤧᤶᤔᤡᤴ ᤛᤧᤰᤂᤠᤀᤣ ᤋᤠᤖᤥ॥ ᤗᤳᤇᤠ ᤛᤠᤔᤠᤀᤠᤱ ᤔᤧᤸᤗᤧᤖᤢᤴ ᤔᤧᤴᤎᤏᤧᤴ. ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹⁸ ᤂᤧᤏᤧ᤹ᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠ. ᤂᤧᤏᤧ᤹ ᤁᤧᤕᤧᤳ ᤏᤢ ᤁᤧᤏᤧᤰᤛᤠ. ᤂᤧᤏᤧ᤹ ᤁᤢᤓᤠ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ᤹॥ ᤜᤧᤰᤁᤩᤠᤱ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤠᤱᤜᤡᤶᤔᤥ ᤂᤧᤱᤜᤠ᤹ ᤕᤠ᤺ᤶᤒᤰ ᤆᤥ᤺ᤰᤛᤧ ᤛᤡᤱᤃᤠᤖᤢ ᤔᤧᤈᤥᤃᤢᤛᤡ᤹॥”

¹⁹ ᤜᤡᤈᤁᤡᤕᤠ᤺ᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤒᤠ᤺ᤳᤋᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤏᤢᤒᤠᤀᤣ ᤆᤥᤰ॥” ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤰᤋᤱᤒᤠ ᤏᤡᤱᤘᤠ᤹ ᤀᤡ᤺ᤳᤋᤢ. “ᤀᤠᤱᤃᤠ᤹ ᤀᤠᤜᤡᤱᤜᤡᤱᤃ ᤛᤏᤠᤖᤢᤱ ᤐᤥᤱ᤹ ᤜᤧᤰᤁᤩᤠᤱ ᤋᤠᤵᤌᤣᤰ ᤕᤠᤶᤎᤣᤰ ᤘᤠ᤹ᤀᤠᤖᤥ॥”

ᤜᤡᤈᤁᤡᤕᤠ᤺ᤸᤗᤧ ᤁᤢᤏᤢᤵᤔᤠ ᤁᤢᤜᤠᤱᤕᤢᤰ

²⁰ ᤜᤡᤈᤁᤡᤕᤠ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹. ᤂᤢᤏᤧ᤹ ᤆᤥᤃᤢᤒᤠ ᤔᤢᤰᤛᤠᤶᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤂᤢᤏᤧ᤹ ᤀᤠᤰᤂᤣᤗ᤹ᤖᤡᤰ ᤘᤖᤰ ᤌᤧᤅᤢ ᤜᤧᤰᤁᤩᤠᤱ ᤜᤱᤃᤠᤖᤡᤱᤒᤠ ᤋᤕᤢᤀᤠᤱ ᤕᤧᤰᤕᤰᤁᤥ ᤆᤫᤠ᤺ᤳ ᤌᤠᤰᤋᤢ ᤁᤧᤗ᤹ᤒᤠ ᤐᤠ᤺ᤴᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅

²¹ ᤜᤡᤈᤁᤡᤕᤠᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤔᤏᤛ᤻ᤛᤣᤴ ᤜᤠᤱ ᤐᤥ᤺ᤰᤂᤧᤖᤥ॥