᥈ ᤜᤠᤱ 2 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤀᤣᤗᤡᤕᤠᤴ ᤛᤠᤱᤃᤪᤠᤶᤐᤣᤍᤠᤱ ᤋᤣ᤹ᤖᤢ 1 ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱᤗᤠᤶ ᤀᤣᤗᤡᤕᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤑᤥᤱᤔᤠ ᤋᤣ᤹ᤔᤠ ᤆᤥᤃᤢᤀᤠᤱ ᤘᤕᤧᤸᤗᤧ. ᤀᤣᤗᤡᤕᤠᤴ ᤏᤢ ᤀᤣᤗᤡᤛᤠᤴ ᤃᤡᤗᤃᤠᤗᤧᤴ ᤗᤧᤖᤢᤛᤡᤀᤠᤱ ᤗᤠᤶᤔᤥ ᤗᤠᤱᤄᤣᤃᤧᤛᤡᤖ ᤐᤳᤇᤧᤛᤡ॥ 2 ᤂᤧᤒᤩᤠᤱ ᤀᤣᤗᤡᤕᤠ᤺ᤸᤗᤧ ᤀᤣᤗᤡᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤶᤓᤠ ᤁᤵᤔᤥ ᤕᤢᤅᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤒᤣᤌᤣᤗ ᤐᤠᤱᤄᤠᤱᤅᤠᤱ ᤘᤠ᤹॥” ᤁᤖ ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤏᤢ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤁᤠᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤂᤧᤏᤧ᤹ ᤔᤧᤗᤧᤳᤏᤧᤴ᤹॥” ᤜᤧᤰᤁᤩᤠᤱ ᤂᤢᤴᤇᤡ᤹ ᤒᤣᤌᤣᤗᤀᤥ ᤌᤠᤏᤧᤛᤡ ᤕᤧᤛᤡ॥ 3 ᤒᤣᤌᤣᤗᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤢᤶᤜᤠ᤹ ᤀᤣᤗᤡᤛᤠᤀᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤀᤡᤴ ᤂᤧᤏᤧ᤹ ᤁᤧᤛᤡᤰᤛᤠᤶᤒᤧᤴ ᤂᤧᤏᤧ᤹ᤗᤠᤶ ᤋᤣ᤹ᤖᤢ ᤑᤠ᤹ᤀᤠᤱ ᤌᤣ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢᤀᤠᤱ ᤘᤠ᤹ᤒᤡ᥅” ᤀᤣᤗᤡᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤥᤘᤠ. ᤏᤡᤱᤘᤠ᤹ ᤂᤥᤛᤢᤱᤅᤠᤱ ᤘᤠ᤹॥ ᤁᤖ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹॥” 4 ᤂᤧᤒᤩᤠᤱ ᤀᤣᤗᤡᤕᤠ᤺ᤸᤗᤧ ᤀᤣᤗᤡᤛᤠᤴ ᤔᤧᤳᤋᤢ. “ᤀᤣᤗᤡᤛᤠᤀᤣ. ᤂᤧᤏᤧ᤹ ᤜᤠᤒᤠ ᤁᤵᤔᤥ ᤕᤢᤅᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤕᤖᤡᤜᤥ ᤐᤠᤱᤄᤠᤱᤅᤠᤱ ᤘᤠ᤹॥” ᤜᤧᤰᤁᤩᤠᤱ ᤂᤢᤏᤧ᤹ ᤏᤥᤃᤵ ᤐᤡᤖᤢ. “ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤏᤢ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤂᤧᤏᤧ᤹ ᤔᤧᤗᤧᤳᤏᤧᤴ᤹॥” ᤜᤧᤰᤁᤩᤠᤱ ᤂᤢᤴᤇᤡ᤹ ᤕᤖᤡᤜᤥ ᤐᤣᤛᤡ॥ 5 ᤕᤖᤡᤜᤥᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤢᤶᤜᤠ᤹ ᤀᤣᤗᤡᤛᤠᤀᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤀᤡᤴ ᤂᤧᤏᤧ᤹ ᤁᤧᤛᤡᤰᤛᤠᤶᤒᤧᤴ ᤂᤧᤏᤧ᤹ᤗᤠᤶ ᤋᤣ᤹ᤖᤢ ᤑᤠ᤹ᤀᤠᤱ ᤌᤣ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢᤀᤠᤱ ᤘᤠ᤹ᤒᤡ᥅” ᤀᤣᤗᤡᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤥᤘᤠ. ᤏᤡᤱᤘᤠ᤹ ᤂᤥᤛᤢᤱᤅᤠᤱ ᤘᤠ᤹॥ ᤁᤖ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹॥” 6 ᤂᤧᤒᤩᤠᤱ ᤀᤣᤗᤡᤕᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤀᤠᤶᤓᤠ ᤁᤵᤔᤥ ᤕᤢᤅᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤕᤷᤍᤏ ᤘᤜ᤺ᤱᤅᤥ ᤐᤠᤱᤄᤠᤱᤅᤠᤱ ᤘᤠ᤹॥” ᤜᤧᤰᤁᤩᤠᤱ ᤂᤢᤏᤧ᤹ ᤏᤥᤃᤵ ᤐᤡᤖᤢ. “ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤏᤢ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤂᤧᤏᤧ᤹ ᤔᤧᤗᤧᤳᤏᤧᤴ᤹॥” ᤁᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤏᤧᤵᤔᤠᤱ ᤋᤃᤠᤱ ᤌᤠᤏᤧᤛᤡ॥ 7 ᤅᤠᤒᤥᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤍᤡᤶᤍᤢ ᤔᤧᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤀᤣᤗᤡᤕᤠᤴ ᤏᤢ ᤀᤣᤗᤡᤛᤠᤴ ᤕᤧᤒᤧᤛᤡᤒᤠᤍᤧᤴ ᤗᤧᤵᤔᤠᤱ ᤀᤥᤔᤧᤔᤕᤧᤖ ᤔᤠᤱᤓᤠ ᤔᤠ᤺ᤱᤄᤠ ᤔᤧᤕᤧᤶᤛᤡᤱ॥ 8 ᤀᤣᤗᤡᤕᤠ᤺ᤸᤗᤧ ᤂᤢᤏᤧ᤹ ᤜᤧᤵᤛᤢᤒᤠ ᤋᤣ᤺ᤳᤋᤡᤴ ᤑᤧᤴᤍᤢ. ᤜᤧᤰᤁᤩᤠᤱ ᤂᤧᤴ ᤁᤡᤳᤋᤢᤀᤠᤱ ᤕᤷᤍᤏᤒᤠ ᤆᤫᤠ᤺ᤳᤋᤡᤴ ᤂᤧᤸᤗᤧ ᤜᤡᤵᤋᤢ॥ ᤆᤫᤠ᤺ᤳᤋᤡᤴ ᤆᤢᤰᤘᤠ ᤏᤢ ᤑᤧᤱᤘᤠ ᤁᤢᤗᤰ ᤏᤧᤳᤇᤡᤀᤥ ᤛᤧᤴᤇᤡᤱ. ᤂᤶᤓᤩᤠᤱ ᤂᤢᤴᤇᤡ᤹ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤥ ᤗᤠᤱᤄᤣᤃᤧᤛᤡᤀᤠᤱ ᤏᤠᤎᤠ᤺ᤶᤒᤡ ᤐᤣᤛᤡ॥ 9 ᤘᤜ᤺ᤱᤅᤡᤴ ᤁᤠ᤺ᤰᤋᤧ ᤛᤢᤖᤧᤛᤢᤀᤠᤱ ᤀᤣᤗᤡᤕᤠ᤺ᤸᤗᤧ ᤀᤣᤗᤡᤛᤠᤴ ᤔᤧᤳᤋᤢ. “ᤂᤧᤏᤧ᤹ᤗᤠᤶ ᤀᤠᤱᤃᤠ᤹ ᤑᤥᤱᤔᤠ ᤋᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤁᤧᤗᤠᤃᤡ ᤀᤠᤱᤃᤠ᤹ ᤌᤣ ᤆᤥᤃᤢᤱ ᤐᤡᤏᤧᤒᤣ᥅” ᤀᤣᤗᤡᤛᤠ᤺ᤸᤗᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤕᤠᤶᤛᤠᤶᤔᤡᤴ ᤁᤢᤗᤰ ᤏᤧᤳᤇᤡ ᤕᤠᤖᤡᤰ ᤂᤥᤔᤠ ᤕᤢᤰ ᤐᤡᤖᤠᤱᤅᤧ᤹॥” 10 ᤀᤣᤗᤡᤕᤠ᤺ᤸᤗᤧ ᤔᤧᤳᤋᤢ. “ᤂᤧᤏᤧ᤹ᤃ ᤛᤠ᤹ᤖᤡᤰ ᤁᤧᤛᤠᤰᤐᤠ ᤐᤠ᤺ᤴᤏᤡᤴᤏᤧ ᤁᤧᤏᤠ᤺ᤰᤋᤢᤒᤠ॥ ᤜᤧᤰᤁᤣᤛᤠᤱ ᤂᤧᤏᤧ᤹ᤗᤠᤶ ᤀᤠᤱᤃᤠ᤹ ᤔᤧᤓᤥᤱᤅᤠ ᤔᤧᤍᤣ᤹ᤀᤠᤒᤠ ᤁᤧᤏᤡᤛᤢᤏᤧᤓᤃᤪ ᤁᤧᤏᤠ᤺ᤰᤋᤢᤒᤠᤴ ᤁᤧᤄᤥᤛᤢ᤹—ᤔᤣ᤺ᤴᤏᤧᤓᤃᤪ ᤁᤧᤱᤄᤥᤛᤢᤴ᤹॥” 11 ᤀᤠᤸᤗ ᤂᤢᤴᤇᤡ᤹ ᤋᤠ᤹ᤈᤧᤰᤂᤧᤛᤡᤖ ᤋᤃᤠᤱ ᤗᤠᤱᤄᤣᤃᤧ ᤐᤣᤛᤧᤳᤇᤡᤖ ᤐᤳᤇᤧᤛᤡᤸᤗᤧ. ᤆᤄᤵ ᤌᤡᤰᤗᤧᤱᤗᤧ ᤗᤳᤇᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤀᤴᤗᤠᤎᤠ ᤌᤡᤰ ᤏᤢ ᤀᤴᤜᤠ᤹ ᤏᤡᤔᤧᤎᤠᤒᤧ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤣ᤹ᤀᤣ ᤔᤧᤛᤧᤴᤍᤢᤛᤡᤀᤠᤱ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱᤅᤥ ᤀᤣᤗᤡᤕᤠᤴ ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤔᤧᤍᤣ᤹ᤖᤢ॥ 12 ᤀᤣᤗᤡᤛᤠ᤺ᤸᤗᤧ ᤁᤴ ᤏᤡᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤀ᤺ᤰᤋᤧᤀᤠᤱ ᤔᤧᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤦ᥄ ᤐᤠᤏᤢᤍᤡᤱ ᤀᤠᤶᤒᤦ᥄ ᤀᤡᤛᤪᤠᤀᤡᤗᤒᤠ ᤀᤴᤗᤠᤎᤠᤜᤠ᤹ ᤏᤢ ᤀᤴᤃᤧᤕᤢᤰᤐᤠᤛᤣ᥄” ᤜᤧᤰᤁᤩᤠᤱ ᤀᤣᤗᤡᤛᤠ᤺ᤸᤗᤧ ᤀᤣᤗᤡᤕᤠᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤏᤡᤛᤢᤴ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤔᤧᤖᤡᤱ ᤌᤰᤋᤧᤖ ᤁᤢᤍᤣ᤺ᤳᤋᤡᤴ ᤋᤧᤶᤛᤢᤀᤠᤱ ᤁᤢᤄᤧᤸᤗᤧᤰ ᤏᤧᤳᤇᤡ ᤐᤥ᤺ᤰᤂᤧᤖ ᤋᤧᤖᤧᤰ ᤌᤧ᤺ᤰᤂᤢ॥ 13 ᤀᤣᤗᤡᤕᤠ᤺ᤸᤗᤧ ᤜᤧᤵᤛᤢᤒᤠ ᤔᤰᤁᤧᤎᤠᤒᤠ ᤁᤢᤍᤣ᤺ᤳᤋᤡᤴ ᤀᤣᤗᤡᤛᤠ᤺ᤸᤗᤧ ᤂᤛ᤻ᤛᤢ ᤜᤧᤰᤁᤩᤠᤱ ᤏᤢ᤺ᤰᤂᤧᤀᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤕᤧᤶᤛᤡᤱ॥ 14 ᤂᤧᤒᤩᤠᤱ ᤂᤧᤵᤔᤥ ᤂᤢᤏᤧ᤹ ᤀᤣᤗᤡᤕᤠ᤺ᤸᤗᤧ ᤜᤧᤵᤛᤢᤒᤠ ᤔᤰᤁᤧᤎᤠᤒᤠ ᤋᤣ᤺ᤳᤋᤡᤸᤗᤧ ᤆᤫᤠ᤺ᤳᤋᤡᤴ ᤜᤡᤵᤋᤢ॥ ᤂᤢᤏᤧ᤹ ᤐᤠ᤺ᤴᤛᤣ᤺ᤴᤍᤥ ᤆᤥᤃᤢ. “ᤕᤜᤘᤣ ᤍᤠᤱᤒᤠ ᤀᤣᤗᤡᤕᤠ᤺ᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤸᤗ ᤀᤠᤳᤋᤡ ᤘᤠ᤹ᤒᤣ᥅” ᤀᤠᤸᤗ ᤂᤢᤏᤧ᤹ ᤆᤫᤠ᤺ᤳᤋᤡᤴ ᤜᤡᤵᤋᤢᤸᤗᤧ. ᤂᤧᤴ ᤆᤢᤵᤛᤠᤱ ᤏᤢ ᤑᤧᤴᤇᤠᤱ ᤗᤧᤵᤔᤠᤱ ᤁᤢᤗᤰ ᤏᤧᤳᤇᤡᤀᤥ ᤛᤧᤴᤇᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤳᤏᤠᤜᤠᤱᤍᤠᤱ ᤁᤠ᤺ᤰᤋᤢᤀᤠᤱ ᤑᤧᤖᤧ॥ 15 ᤂᤧᤴ ᤏᤡᤃᤧᤎᤠ᤺ᤵᤐᤠ ᤐᤠ᤺ᤴᤏᤡᤴ ᤀᤥᤃᤧᤔᤧᤵᤐᤠᤀᤠᤱ ᤁᤧᤕᤧᤵᤐᤠ ᤕᤖᤡᤜᤥᤗᤠᤶ ᤁᤧᤕᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤢᤶᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤣᤗᤡᤕᤠ᤺ᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤣᤗᤡᤛᤠᤀᤥ ᤌᤩᤧᤖᤳᤇ॥” ᤂᤧᤒᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤍᤢᤶᤛᤧ ᤔᤧᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱ॥ 16 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤏᤡᤃᤣ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ᤏᤢ ᤅᤠᤒᤥᤱ ᤁᤧᤎᤢᤶᤒᤠ ᤔᤏᤠᤜᤠ᤹ ᤔᤧᤘᤠ᤹॥ ᤂᤧᤱᤜᤠ᤹ ᤐᤣ᤺ᤰᤔᤠᤀᤠᤱ ᤂᤧᤏᤧ᤹ ᤁᤧᤛᤡᤰᤛᤠᤶᤒᤧᤴ ᤁᤥ᤺ᤵᤔᤠ ᤑᤠ᤺ᤰᤋᤧᤛᤧ᤹ᤀᤥ॥ ᤐᤥᤱᤔᤠ ᤛᤢᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤂᤢᤏᤧ᤹ ᤑᤥ᤺ᤰᤂᤢ ᤋᤣ᤹ᤖᤢᤀᤠᤱ ᤁᤢᤓᤠ ᤁᤥ᤺ᤰᤔᤠᤀᤥ ᤀᤡᤃᤪ ᤏᤧᤏᤧᤒᤠᤍᤧᤴᤏᤥ ᤕᤢᤰᤂᤢᤀᤠᤱ ᤕᤢᤱᤒᤡᤗᤠ॥” ᤀᤣᤗᤡᤛᤠ᤺ᤸᤗᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤆᤡ᤺ᤳ. ᤂᤧᤱᤜᤠ᤹ ᤔᤧᤒᤠᤱᤄᤠᤶᤛᤡᤶᤔᤡᤴᤏᤧ᤹॥” 17 ᤁᤖ ᤂᤧᤱᤜᤠ᤹ ᤂᤢᤏᤧ᤹ ᤁᤢᤏᤠᤎᤠᤎᤠ ᤗ᤹ᤖᤧᤖ ᤌᤠᤖᤡᤰ ᤜᤠᤍᤡᤱ ᤔᤧᤎᤰᤋᤧᤀᤠᤱ ᤔᤧᤒᤳᤇᤧ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤔᤧᤳᤋᤢᤛᤡ. “ᤂᤧᤱᤜᤠ᤹ ᤐᤠᤱᤄᤧᤶᤍᤣᤛᤧᤶᤛᤡᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤅᤠᤒᤥᤱ ᤔᤏᤠᤜᤠ᤹ ᤔᤧᤒᤠᤱᤄᤢ ᤔᤧᤍᤣᤛᤢᤛᤡ॥ ᤂᤧᤱᤜᤠ᤹ᤖᤧ ᤛᤢᤶᤕᤠᤴ ᤌᤠᤖᤡᤰ ᤀᤣᤗᤡᤕᤠᤴ ᤔᤧᤃᤥ᤺ᤳᤋᤢᤛᤠᤱ ᤂᤥᤔᤠ ᤔᤧᤴᤇᤢᤰᤋᤢᤴ॥ 18 ᤀᤠᤸᤗ ᤀᤣᤗᤡᤛᤠᤴ ᤕᤖᤡᤜᤥ ᤘᤕᤧᤖᤀᤣ ᤂᤧᤱᤜᤠ᤹ ᤂᤢᤏᤧ᤹ᤀᤥ ᤔᤧᤏᤢ᤺ᤰᤂᤧ ᤔᤧᤍᤩᤧ. ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤣ ᤀᤠᤱᤃᤠ᤹ ᤂᤡᤏᤡ᤹ ᤔᤧᤒᤣᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤔᤧᤳᤏᤡᤱᤅᤠᤱ ᤔᤧᤘᤧᤏᤧᤶᤒᤡ᥅” ᤀᤣᤗᤡᤛᤠ᤺ᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤁᤢᤕᤠ᤺ᤶᤒᤰᤜᤠ᤹ 19 ᤂᤧᤴ ᤕᤖᤡᤜᤥ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤀᤣᤗᤡᤛᤠᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤥᤔᤧᤳᤋᤧ᤹ᤀᤥ. ᤁᤴ ᤐᤠᤱᤈᤢᤶᤔᤡᤴ ᤏᤢᤖᤡᤰᤁᤠᤱ ᤆᤢᤰᤋᤧᤀᤠᤱ ᤏᤧᤖᤥ. ᤁᤖ ᤁᤵᤔᤥᤒᤠ ᤆᤫᤠ᤺ᤳᤋᤡᤴ ᤋᤠᤵᤑᤧ᤺ᤶᤒᤠ ᤆᤥᤰ. ᤜᤧᤰᤁᤩᤠᤱ ᤌᤣᤀᤠᤱ ᤔᤧᤗᤡᤱᤏᤧᤴ᤹॥” 20 ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢᤛᤡ. “ᤗᤳᤇᤠ ᤁᤢᤛᤱ ᤂᤥᤷᤕᤠᤎᤡᤰ ᤀᤠᤒᤡᤖᤧᤶᤔᤧ᤹. ᤜᤧᤰᤁᤩᤠᤱ ᤂᤧᤵᤔᤥ ᤕᤢᤶᤔᤡᤴ ᤌᤧᤰᤋᤧᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤢᤶ ᤔᤧᤕᤠᤰᤋᤢᤒᤠ ᤂᤧᤴ ᤂᤥᤷᤕᤠᤴ ᤔᤧᤍᤠᤖᤢ॥ 21 ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤆᤫᤠ᤺ᤳ ᤐᤢᤴᤍᤠᤰᤘᤠᤀᤥ ᤐᤣᤀᤠᤱ ᤂᤧᤵᤔᤥ ᤂᤧᤴ ᤕᤢᤶᤔᤡᤴ ᤛᤧᤛᤢᤀᤠᤱ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤠᤱᤃᤠ᤹ ᤁᤴ ᤛᤣᤛᤣᤒᤠ ᤆᤥᤃᤢᤱᤅᤠᤱ ᤏᤧᤖᤥ॥ ᤂᤧᤸᤗᤧ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤛᤡᤔᤧᤴ ᤔᤧᤍᤠᤖᤢᤴ᤹. ᤜᤧᤰᤁᤩᤠᤱ ᤌᤣᤀᤠᤱ ᤔᤧᤸᤗᤡᤱᤔᤏᤠᤒᤠᤀᤠᤱ ᤔᤧᤈᤥᤃᤢᤴ᤹॥’” 22 ᤀᤣᤗᤡᤛᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤣ ᤂᤧᤴ ᤆᤫᤠ᤺ᤳᤋᤡᤴ ᤛᤣᤛᤣᤒᤠ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤜᤡᤴᤈᤠ᤹ᤜᤠ᤹ᤖᤧ ᤀᤣᤗᤡᤛᤠᤴ ᤔᤧᤃᤣ᤹ᤖᤢ 23 ᤂᤧᤵᤔᤥᤗᤠᤶ ᤀᤣᤗᤡᤛᤠᤴ ᤌᤥ ᤌᤥ᤺ᤰᤛᤡᤱᤅᤠᤱ ᤒᤣᤌᤣᤗ ᤐᤣ॥ ᤀᤠᤸᤗ ᤂᤢᤏᤧ᤹ ᤗᤠᤶᤔᤥ ᤐᤣᤖ ᤐᤳᤇᤧᤸᤗᤧ ᤕᤧᤰᤕᤰᤁᤥᤗᤠᤶ ᤆᤢᤈᤢᤰᤛᤠ ᤜᤡᤴᤈᤠ᤹ᤜᤠ᤹ ᤔᤧᤓᤧᤖᤧᤀᤠᤱ ᤀᤰᤂᤣ ᤔᤧᤗ᤹ᤖᤧᤖ ᤂᤢᤏᤧ᤹ ᤁᤧ᤹ᤔᤠ ᤔᤧᤜᤣ᤺ᤰᤋᤢ. “ᤁᤢᤎᤧᤃᤣᤰ ᤗᤡᤃᤥ᤹ᤒᤣ. ᤂᤧᤏᤧ᤹ ᤌᤠ᤺ᤱ ᤐᤣᤃᤧ᤹. ᤁᤢᤎᤧᤃᤣᤰ ᤏᤖᤡ ᤁᤧᤜᤥ᤺ᤵᤐᤣ. ᤂᤧᤏᤧ᤹ ᤌᤠ᤺ᤱ ᤐᤣᤃᤧ᤹᥄” 24 ᤂᤢᤏᤧ᤹ ᤜᤡᤛᤡᤱᤅᤠᤱ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤢᤛᤡ॥ ᤂᤧᤒᤩᤠᤱ ᤋᤠᤶᤓᤢᤱᤅᤥᤗᤠᤶ ᤔᤠ᤹᤺ᤕᤢ ᤏᤧᤳᤇᤡ ᤗ᤺ᤴᤍᤧᤛᤡᤀᤠᤱ ᤂᤧᤱᤜᤠ᤹ᤀᤥᤒᤠ ᤗᤡᤒᤥᤱᤅᤠᤱ ᤏᤧᤳᤇᤡ ᤜᤡᤴᤈᤠ᤹ᤜᤠ᤹ ᤋᤧᤖᤧᤰ ᤋᤧᤖᤧᤰ ᤌᤧ᤺ᤰᤂᤧᤳᤇᤢᤛᤡ॥ 25 ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤢᤏᤧ᤹ ᤁᤷᤔᤣᤗ ᤁᤥ᤺ᤰᤔᤠᤀᤥ ᤌᤥ᤺ᤰᤛᤡᤱᤅᤠᤱ ᤐᤣ. ᤂᤧᤒᤩᤠᤱ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤛᤠᤔᤖᤡᤕᤠ ᤏᤢ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.