᥈ ᤜᤠᤱ 19 - LIFOTNTᤜᤠᤱᤅᤡᤸᤗᤧ ᤕᤛᤤᤕᤠᤴ ᤛᤢᤈᤠ ᤏᤠ᤺ᤰᤋᤢ ( ᤕᤛᤤ ᥉᥍:᥇-᥍ ) 1 ᤀᤠᤸᤗ ᤜᤡᤈᤁᤡᤕᤠ ᤜᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤁᤢᤈᤠᤱᤅᤡᤴ ᤌᤧ᤺ᤰᤂᤢᤀᤠᤱ ᤛᤠᤃᤡ ᤋᤣᤳ ᤆᤠᤰᤛᤡᤱ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤠᤛᤧ॥ 2 ᤂᤢᤏᤧ᤹ ᤜᤠᤱᤜᤡᤶᤔᤥᤒᤠ ᤕᤢᤰᤛᤠᤒᤠ. ᤀᤣᤗᤩᤠᤁᤡᤔ. ᤛᤢᤜᤠᤱᤔᤡᤒᤠ ᤛᤣᤒ᤻ᤏᤠᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤧᤖᤧᤰ ᤛᤠᤃᤡ ᤋᤣᤳ ᤔᤧᤈᤠᤰᤂᤢᤀᤠᤱ ᤀᤠᤔᤥᤈᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠᤀᤥ ᤐᤠᤱᤄᤢᤍᤣᤛᤢᤛᤡ॥ 3 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤜᤡᤈᤁᤡᤕᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢ—ᤀᤅᤧ᤺ᤰᤘᤠᤴ ᤛᤠᤘᤠ᤺ᤴᤇᤡᤱᤔᤠ ᤆᤥ᤺ᤰᤁᤡᤸᤗᤧ ᤂᤢᤏᤧ᤹ ᤛᤠᤘᤠ᤺ᤶᤔᤠᤖᤧ ᤗᤠᤃᤡ ᤌᤢᤶ ᤜᤥ᤺ᤵᤐᤠ ᤁᤢᤀᤡᤛᤡᤰ ᤀᤠᤀᤡᤴᤒᤠ ᤕᤧᤴᤏᤡᤴ ᤋᤢᤰᤂᤣ ᤗᤠᤰᤂᤣ. ᤂᤢᤶᤍᤡᤱ ᤏᤢ ᤆᤠ᤺ᤳᤌᤡ ᤐᤣ᤺ᤰᤔᤠ ᤕᤧᤴ ᤐᤥ᤺ᤰᤂᤧᤀᤠᤱ ᤘᤠ᤹॥ 4 ᤐᤥᤱᤔᤠ ᤛᤢᤰ ᤂᤧᤴ ᤂᤠᤶᤒᤠᤱᤅᤥ ᤌᤱ ᤁᤧᤈᤥ᤺ᤰᤐᤠ ᤌᤰᤔᤥᤒᤧᤸᤗᤧ ᤁᤧᤖᤧᤰ ᤁᤢᤒᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤛᤢᤖ. ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠᤖᤧ ᤗᤠᤃᤡ ᤂᤧᤴ ᤂᤢᤏᤧ᤹ ᤁᤢᤴᤍᤠᤱᤒᤠ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤐᤠᤱᤄᤢ ᤑᤧᤴᤇᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤂᤧᤴ ᤑᤧ᤺ᤰᤋᤢᤖ॥ ᤁᤸᤗᤧᤆᤥᤃᤢᤸᤗᤧ ᤁᤧᤜᤡᤱᤒᤠᤜᤠ᤹ᤖᤧ ᤗᤠᤃᤡ ᤀᤠᤸᤗᤛᤠᤱ ᤐᤣᤗᤡᤃᤧᤴ ᤋᤢᤘᤠ ᤋᤥ᤺ᤴᤍᤧ᤹॥” 5 ᤀᤠᤸᤗ ᤜᤡᤈᤁᤡᤕᤠ᤺ᤸᤗᤧ ᤐᤠᤱᤄᤢᤛᤡᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤕᤛᤤᤕᤠᤀᤥ ᤔᤧᤍᤩᤧ. 6 ᤂᤧᤒᤩᤠᤱ ᤕᤛᤤᤕᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤍᤠᤱᤒᤧᤴ ᤔᤧᤳᤋᤧᤶᤔᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ—ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤀᤠᤱᤃᤠ᤹ ᤔᤠᤱᤆᤧ᤹ᤕᤠ ᤔᤧᤔᤧᤳᤋᤠᤱᤒᤠ ᤂᤧᤏᤧ᤹ ᤁᤧᤄᤧᤵᤛᤢᤒᤠ ᤐᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹॥ 7 ᤂᤧᤵᤛᤧ᤹᥄ ᤀᤠᤸᤗ ᤂᤢᤏᤧ᤹ ᤗᤳᤇᤠ ᤀᤡᤱᤄᤱ ᤌᤡᤰ ᤂᤧᤵᤛᤢᤸᤗᤧ. ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤏᤢ᤺ᤱᤔᤠᤀᤠᤱ ᤐᤣ᤺ᤰᤔᤠ ᤁᤧᤒᤥᤱᤒᤠ ᤕᤠᤶᤛᤠᤶᤎᤡᤰ ᤀᤠᤱᤃᤠ᤹ ᤂᤢᤏᤧ᤹ᤀᤥ ᤁᤣ᤺ᤳᤋᤢᤱ ᤐᤡᤖᤢᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢ ᤔᤧᤛᤧᤖᤢᤖ ᤕᤠ᤺ᤴᤍᤢᤱᤛᤡᤱᤗᤥ॥’” ᤀᤛ᤻ᤛᤢᤖᤡᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤡᤴ ᤌᤰᤔᤠ ᤔᤧᤛᤠ᤺ᤳᤋᤢ ( ᤕᤛᤤ ᥉᥍:᥎-᥈᥆ ) 8 ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤗᤠᤁᤡᤛ ᤐᤠᤱᤈᤢᤶᤔᤡᤴ ᤗᤧᤖᤢᤀᤠᤱ ᤐᤣ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤌᤱᤅᤥᤒᤠ ᤌᤰᤔᤥᤒᤧᤸᤗᤧ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤏᤢ᤺ᤰᤂᤧᤒᤣ. ᤜᤧᤰᤁᤩᤠᤱ ᤜᤠᤱᤅᤡᤴ ᤗᤡᤒ᤻ᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤏᤢ ᤕᤠᤃᤧᤒᤠ ᤂᤢᤏᤧ᤹ ᤋᤢᤔᤢ॥ 9 ᤀᤠᤸᤗ ᤁᤢᤛᤒᤠ ᤜᤠᤱ ᤋᤡᤷᤜᤠᤁᤠᤜᤴ ᤂᤢᤏᤧ᤹ᤏᤢ ᤋᤧᤴᤎᤱ ᤆᤥ᤺ᤰᤛᤧ ᤑᤧᤴᤗ ᤐᤳ ᤑᤠ᤹ᤀᤠᤱ ᤛᤏᤜᤣᤖᤡᤒᤖᤧ ᤀᤡᤱᤄᤱ ᤂᤧᤵᤛᤢ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤕᤠᤶᤔᤥ ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠᤀᤥ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤛᤡᤖᤥ— 10 “ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠᤴ ᤔᤧᤳᤋᤧᤶᤔᤧ᤹. ‘ᤕᤖᤢᤛᤗᤧ᤺ᤶᤔᤡᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤔᤧᤎᤠᤏᤧᤴ’ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤄᤧ᤺ᤶᤛᤡᤱᤒᤠ ᤔᤠᤱᤅᤡᤸᤗᤧ ᤂᤧᤏᤧ᤹ ᤀᤡᤱᤗᤧᤰᤁᤥ ᤁᤧᤴᤎᤠᤏᤧᤴᤗ॥ 11 ᤀᤛ᤻ᤛᤢᤖᤒᤠ ᤜᤠᤱᤜᤠ᤹ᤖᤧ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤌᤣ ᤔᤧᤔᤧᤳᤋᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤴ ᤗᤠᤈᤣ᤹ᤜᤠ᤹ ᤀᤠᤰᤂᤣᤗ᤹ᤖᤡᤰ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤛᤡᤀᤠᤱ ᤏᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤄᤧᤵᤛᤢᤀᤠᤱᤅᤣ ᤘᤠ᤹॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤍᤠᤱᤒᤡ᥅ 12 ᤌᤣ ᤀᤠᤱᤃᤠ᤹ ᤀᤠᤶᤒᤠ ᤀᤠᤴᤎᤧᤒᤠᤛᤡᤖᤧ ᤔᤧᤔᤧᤰᤂᤢᤛᤡᤒᤠ ᤃᤥᤈᤠᤏ. ᤜᤠᤖᤠᤏ. ᤖᤣᤛᤣᤐ ᤛᤢᤘᤠᤱᤜᤠ᤹ ᤋᤣᤗ-ᤀᤛ᤻ᤛᤠᤖᤀᤥ ᤁᤧᤕᤢᤱᤒᤠ ᤀᤍᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤖᤧ ᤂᤧᤱᤜᤠ᤹ ᤔᤧᤛᤧ᤺ᤵᤋᤢᤛᤡᤒᤡ᥅ 13 ᤜᤔᤠᤋᤒᤠ ᤜᤠᤱ. ᤀᤷᤐᤠᤍᤒᤠ ᤜᤠᤱ ᤜᤧᤰᤁᤩᤠᤱ ᤛᤐᤷᤒᤣᤔ ᤕᤧᤰᤕᤰᤁᤥᤒᤠ ᤜᤠᤱ. ᤜᤣᤏᤠᤒᤠ ᤏᤢ ᤀᤡᤒ᤻ᤒᤠᤒᤠ ᤜᤠᤱᤜᤠ᤹ ᤀᤠᤳᤋᤡ ᤔᤧᤒᤣ᥅” ᤜᤡᤈᤁᤡᤕᤠ᤺ᤸᤗᤧ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ 14 ᤜᤡᤈᤁᤡᤕᤠ᤺ᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤀᤡᤱᤛᤠᤒᤠᤜᤠ᤹ᤗᤠᤶ ᤋᤠ᤺ᤰᤋᤢᤀᤠᤱ ᤏᤡᤖᤢ॥ ᤂᤧᤒᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤌᤥ᤺ᤰᤛᤡᤱᤒᤣ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤑᤠ᤺ᤰᤂᤢᤀᤠᤱ ᤏᤧᤛ᤻ᤛᤢ॥ 15 ᤜᤧᤰᤁᤩᤠᤱ ᤜᤡᤈᤁᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤁᤴ ᤐᤣᤗᤡᤴ ᤋᤥ᤺ᤴᤍᤢ—“ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤈᤢᤶᤜᤠ᤹ᤀᤥ ᤀᤠᤍᤠᤱᤒᤠᤖᤰ ᤏᤡᤱᤘᤠ᤹ᤑᤢᤔᤠᤱ ᤁᤧᤘᤠ᤹॥ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤧᤏᤧ᤹ᤀᤣ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥᤃᤢᤒᤠᤖᤥ॥ 16 ᤕᤜᤘᤣ ᤍᤠᤱᤒᤠᤀᤣ. ᤁᤧᤏᤧᤰᤂᤥ᤹ᤒᤠᤴ ᤕᤠᤱᤕᤠᤱ ᤔᤧᤳᤋᤧ᤹ᤀᤠᤱ ᤂᤧᤵᤛᤧ᤹ᤀᤥ. ᤁᤧᤔᤡᤰᤁᤡᤴ ᤜᤴᤍᤧ᤹ᤀᤠᤱ ᤀᤥᤔᤧᤳᤋᤧ᤹ᤀᤥ॥ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠᤖᤧ ᤗᤠᤃᤡ ᤛᤏᤜᤣᤖᤡᤒᤖᤧ ᤐᤠ᤺ᤳᤋᤢ ᤑᤧᤴᤇᤢᤒᤠ ᤐᤠ᤺ᤴᤜᤠ᤹ ᤂᤧᤵᤛᤧ᤹ᤀᤥ॥ 17 “ᤕᤜᤘᤣ ᤍᤠᤱᤒᤠᤀᤣ. ᤀᤛ᤻ᤛᤢᤖᤒᤠ ᤜᤠᤱᤜᤠ᤹ᤖᤧ ᤁᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤀᤠᤱ ᤏᤧ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤖᤥ॥ 18 ᤂᤧᤱᤜᤠ᤹ᤖᤧ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤛᤠᤶᤔᤠᤱᤜᤠ᤹ ᤔᤡᤀᤥ ᤗᤠᤶᤔᤧᤓᤣᤛᤢᤛᤡᤀᤠᤱ ᤘᤠ᤹ ᤜᤴᤏᤠᤱ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤛᤡᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤛᤡ ᤔᤣ᤺ᤴ. ᤁᤖ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤸᤗᤧ ᤔᤧᤈᤥᤃᤢᤛᤡᤒᤠ ᤛᤡᤱ ᤏᤢ ᤗᤢᤱᤛᤡᤖᤰᤗᤥ॥ 19 ᤀᤠᤸᤗ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤸᤗᤧ ᤁᤢᤜᤢᤰᤁᤥᤗᤠᤶ ᤀᤠᤏᤡᤃᤣ ᤀᤠᤛᤧ᤺ᤵᤋᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ᤖᤰ ᤏᤡᤱᤘᤠ᤹ᤑᤢᤔᤠᤱᤏᤧ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥” ᤕᤛᤤᤕᤠᤖᤧ ᤐᤠ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ( ᤕᤛᤤ ᥉᥍:᥈᥇-᥉᥎ ) 20 ᤂᤧᤒᤩᤠᤱ ᤀᤠᤔᤥᤈᤖᤧ ᤁᤢᤛ᤻ᤛᤠ ᤕᤛᤤᤕᤠ᤺ᤸᤗᤧ ᤜᤡᤈᤁᤡᤕᤠᤀᤥ ᤗᤳᤇᤠ ᤀᤡᤱᤄᤱ ᤜᤠᤅᤢ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤁᤧᤍᤥ᤺ᤴᤍᤢᤒᤠ ᤐᤣᤗᤡᤴ ᤀᤠᤱᤃᤠ᤹ ᤂᤧᤵᤛᤢᤱ॥ 21 ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤈᤠ᤺ᤰᤁᤡᤴ ᤜᤠᤒᤠ ᤁᤴᤗᤥ— “‘ᤛᤡᤕᤥᤏᤖᤧ ᤁᤢᤛ᤻ᤛᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠ᤺ᤸᤗᤧ ᤂᤧᤏᤧ᤹ ᤆᤧᤰᤕᤠ ᤀᤡᤱᤍᤥ ᤁᤧᤔᤧᤳᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤗᤥ॥ ᤂᤧᤏᤧ᤹ ᤁᤧᤄᤧᤳᤇᤡᤱᤅᤠᤱ ᤁᤧᤒᤣ᤺ᤰᤁᤡᤸᤗᤧ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤂᤢᤏᤧ᤹ ᤁᤢᤎᤧᤃᤣ᤺ᤰᤁᤡᤴ ᤋᤄᤢᤶᤋᤄᤢᤶ ᤔᤧᤳᤋᤢᤖᤥ॥ 22 “‘ᤂᤧᤏᤧ᤹ ᤀᤠᤳᤋᤡᤴ ᤁᤢᤏᤠᤔᤧᤴᤇᤠ᤹ ᤏᤢ ᤔᤠᤱᤆᤧ᤹ᤕᤠ ᤁᤧᤔᤧᤳᤋᤢᤒᤣ᥅ ᤜᤠ᤺ᤳᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤏᤧ᤹ ᤁᤧᤀ᤺ᤰᤋᤧᤒᤣ. ᤜᤧᤰᤁᤩᤠᤱ ᤀᤠᤱᤍᤡᤱ ᤁᤧᤗ᤹ᤖᤧᤀᤠᤱ ᤀᤥᤃᤧᤔᤕᤧᤒᤣ᥅ ᤌᤣ ᤀᤡᤛᤪᤠᤀᤡᤗᤖᤧ ᤁᤢᤛᤣᤛᤣᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤣ᤺ᤶᤒᤡ᥅ 23 ᤂᤧᤏᤧ᤹ ᤁᤧᤀᤡᤱᤛᤠᤒᤠᤜᤠ᤹ᤗᤠᤶ ᤂᤧᤏᤧ᤹ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤜᤠ᤹ ᤁᤧᤗᤢᤵᤛᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢᤖᤥ. “ᤕᤖᤡᤰ ᤀᤠᤀᤴᤗᤠᤎᤠᤜᤠ᤹ᤗᤠᤶ ᤁᤥ᤺ᤰᤔᤠᤜᤠ᤹ᤖᤧ ᤁᤢᤛᤶᤜᤠ᤹ᤖᤧ ᤗᤧᤒᤏᤠᤏᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤣ᤺ᤶᤒᤠ ᤌᤧᤃᤢ ᤔᤠᤱᤘᤠᤜᤠ᤹ᤖᤧ ᤁᤢᤛᤶᤜᤠ᤹ ᤀᤠᤱᤃᤠ᤹ ᤗᤡᤅᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤂᤧᤵᤔᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤣ᤺ᤶᤒᤠ ᤛᤠᤶᤔᤠᤱᤛᤡᤱᤜᤠ᤹ ᤂᤧᤵᤔᤥᤒᤠ ᤁᤠᤰᤏᤢ᤺ᤸᤗᤧ ᤏᤢᤒᤠ ᤀᤠ᤺ᤱᤛᤡᤱᤜᤠ᤹ ᤛᤥ᤺ᤴᤍᤢᤱᤗᤥ॥ ᤀᤠᤱᤃᤠ᤹ ᤂᤧᤸᤗᤧ ᤏᤠᤛᤔᤠ ᤁᤢᤕᤠᤀᤥ. ᤂᤧᤵᤔᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤋᤠᤶᤓᤢᤱᤜᤠ᤹ᤀᤥ ᤁᤧᤖᤠᤱᤗᤥ॥ 24 ᤀᤠᤱᤃᤠ᤹ ᤘᤣ᤹ ᤗᤠᤈᤣ᤹ᤒᤠ ᤋᤧᤴᤜᤠ᤹ᤀᤥ ᤘᤒᤠᤰ ᤋᤕᤢᤱᤅᤠᤱ ᤏᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤵᤔᤥ ᤆᤫᤠ᤺ᤳ ᤌᤢᤅᤢᤱᤅᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤀᤠᤗᤠᤱᤅᤥᤒᤠ ᤗᤠᤱᤍᤠᤵᤐᤣᤸᤗᤧ ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤹ᤒᤠ ᤘᤜ᤺ᤱᤜᤠ᤹ ᤜᤣᤛᤢᤱᤗᤥ॥” 25 “‘ᤌᤣ ᤂᤡᤏᤡ᤹ ᤔᤧᤱᤄᤧᤶᤔᤣ ᤁᤧᤘᤕᤡᤒᤡ᥅ ᤀᤢᤴᤇᤥ᤺ᤴᤏᤣ ᤀᤠᤱᤃᤠ᤹ ᤂᤧᤴ ᤕᤢᤰᤋᤡᤱ ᤆᤥᤃᤢᤱᤗᤥ॥ ᤀᤢᤏᤠᤜᤢᤖᤡᤒᤠ ᤕᤧᤴᤏᤥᤀᤣ ᤀᤠᤱᤃᤠ᤹ ᤂᤧᤴ ᤏᤡᤱᤛᤣᤰ ᤆᤥᤃᤢᤱᤗᤥ ᤀᤠᤸᤗ ᤀᤠᤱᤃᤠ᤹ ᤁᤴ ᤁᤢᤗᤡᤱᤍᤥ ᤁᤧᤳᤋᤢᤱᤅᤠᤱ ᤘᤠ᤹ᤖᤥ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤕᤰ ᤁᤧᤏᤧᤒᤠ ᤕᤧᤰᤕᤰᤜᤠ᤹ ᤗᤢᤱᤜᤠ᤹ ᤗᤢ᤺ᤵᤐᤧᤳ ᤁᤧᤗᤢᤶᤛᤡᤱᤒᤠᤍᤧᤴ ᤁᤧᤈᤥᤃᤢᤀᤠᤱ ᤏᤧᤖᤥ॥ 26 ᤂᤧᤴ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤰᤁᤡᤴ ᤕᤢᤔᤧᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤡᤱᤛᤠᤶᤔᤥ ᤔᤧᤎᤩᤧᤀᤠᤱ ᤂᤢᤴᤇᤡ᤹ ᤏᤠᤖᤠ ᤛᤡᤖᤣ᤺ᤵ ᤗ᤹ᤖᤥ॥ ᤂᤧᤱᤜᤠ᤹ ᤀᤡᤰᤋᤠᤵᤐᤥᤒᤠ ᤕᤠ᤺ᤴᤛᤢᤱᤜᤠ᤹ ᤁᤢᤀᤡᤛᤡᤰ. ᤗᤡᤱᤄᤠᤶᤒᤢᤀᤥᤒᤠ ᤁᤢᤏ᤺ᤴᤍᤪᤢᤰ ᤛᤖᤣ᤺ᤰᤕᤠ᤺ᤵᤐᤠ ᤁᤢᤈ᤺ᤰ ᤜᤧᤰᤁᤣ ᤔᤧᤗ᤹ᤖᤥ. ᤗᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤁᤧᤜᤣᤒᤠ ᤁᤧᤒᤣ᤺ᤰᤐᤠ ᤕᤠᤴ ᤜᤧᤰᤁᤣ ᤔᤧᤗ᤹ᤖᤥ॥ 27 “‘ᤂᤧᤏᤧ᤹ ᤀᤠᤳᤋᤡ ᤁᤧᤕᤢᤱ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤓᤧᤸᤗᤧ ᤁᤧᤍᤠ ᤁᤧᤒᤣ᤺ᤰ ᤂᤧᤴ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹ᤖᤥ. ᤂᤧᤒᤩᤠᤱ ᤀᤠᤱᤃᤠ᤹ᤏᤢ ᤂᤧᤏᤧ᤹ ᤁᤧᤕᤠ᤺ᤰᤗᤧ᤹ᤖᤧᤀᤠᤱ ᤘᤠ᤹ᤒᤠᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤠ᤹ᤖᤥ॥ 28 ᤂᤧᤏᤧ᤹ ᤁᤧᤜᤧᤴᤇᤡᤱᤔᤧᤴ ᤀᤠᤴᤓᤠᤰᤁᤥ ᤁᤧᤖᤧᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤴᤒᤥᤀᤥ ᤂᤣ᤺ᤱᤅᤡᤸᤗᤧ ᤘᤣ᤹ᤏᤧᤖᤥ ᤂᤧᤏᤧ᤹ ᤁᤧᤶᤒᤪᤠᤀᤥ ᤁᤖᤧᤗᤡᤴ ᤑᤳᤇᤢᤱᤗᤥ. ᤂᤧᤒᤩᤠᤱ ᤂᤧᤏᤧ᤹ ᤁᤧᤍᤩᤧᤒᤠ ᤗᤠᤶᤔᤥ ᤗᤠᤶᤒᤠᤀᤣ ᤀᤠᤱᤃᤠ᤹ ᤁᤧᤏᤢ᤺ᤱ ᤁᤧᤒᤣ᤺ᤰᤗ ᤕᤠ᤺ᤴᤏᤧᤖᤥ॥’” 29 ᤜᤡᤈᤁᤡᤕᤠᤀᤣ. ᤂᤧᤏᤧ᤹ ᤁᤧᤗᤠᤃᤡ ᤔᤡᤰᤛᤣ᤺ᤴᤃ ᤁᤴ ᤐᤥᤱᤗᤥ— “ᤀᤠᤀᤡᤴᤗᤠᤶᤒᤠ ᤂᤡᤏᤡ᤹ ᤀᤠᤵᤑᤣᤰ ᤁᤧᤗᤡᤱᤒᤠ ᤆᤠ᤺ᤴ ᤁᤧᤈᤠᤶᤗᤥ. ᤀᤠᤳᤏᤡᤶᤔᤠ ᤋᤱᤒᤣᤀᤥ ᤜᤠᤒᤠ ᤂᤧᤴᤗᤠᤶ ᤁᤧᤗᤡᤱᤒᤧᤴ ᤁᤧᤈᤠᤶᤗᤥ॥ ᤁᤖ ᤀᤠᤳᤇᤡᤶᤔᤠ ᤋᤱᤒᤣᤀᤥᤃ ᤂᤡᤏᤡ᤹ ᤜᤣ᤹ᤖᤧᤶᤔᤧ᤹ᤀᤠᤱ ᤛᤢᤵᤛᤧᤶᤔᤧ᤹ᤀᤥ. ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤗᤣ᤺ᤳᤋᤧᤶᤔᤧ᤹ᤀᤠᤱ ᤁᤢᤈᤠ᤹ᤜᤠ᤹ ᤆᤧᤶᤔᤧ᤹ᤀᤥ॥ 30 ᤛᤡᤱᤒᤢᤱᤅᤡᤴ ᤁᤢᤛᤠ᤺ᤵ ᤗᤣ᤺ᤳᤇᤡᤱᤅᤠᤱ ᤁᤢᤈᤠ᤹ ᤌᤥ᤺ᤰᤐᤠ ᤜᤧᤰᤁᤣ ᤕᤜᤢᤍᤠᤖᤧ ᤁᤢᤜᤡᤶᤛᤕᤱᤗᤠᤶ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤕᤠᤶᤔᤥ ᤔᤧᤒᤥᤴ ᤔᤧᤎᤧ᤹ᤖᤥ॥ 31 ᤌᤣᤀᤠᤱᤓᤧᤸᤗᤧ ᤕᤖᤢᤗᤧᤔᤗᤠᤶ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤢᤗᤰ ᤌᤡᤰ. ᤜᤧᤰᤁᤩᤠᤱ ᤛᤡᤕᤥᤏ ᤁᤥ᤺ᤰᤔᤠᤗᤠᤶ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤗᤳᤇᤠ ᤔᤏᤠᤛᤢᤶᤜᤠ᤹ ᤔᤧᤗᤴ ᤔᤧᤍᤠᤖᤥ॥ 32 ᤁᤸᤗᤧᤆᤥᤃᤢᤸᤗᤧ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤂᤢᤏᤧ᤹ ᤁᤴ ᤕᤧᤰᤕᤰᤁᤥ ᤔᤧᤗᤠ᤺ᤳᤏᤧᤴᤗᤥ. ᤀᤡᤃᤪ ᤂᤧᤸᤗᤧ ᤋᤥᤱ ᤌᤡᤰᤁᤠᤱ ᤁᤵᤔᤥ ᤔᤧᤀᤠᤒᤢᤴᤗᤥ॥ ᤂᤢᤏᤧ᤹ ᤂᤥ᤺ᤴ ᤕᤠᤱᤛᤡᤱᤅᤠᤱ ᤁᤸᤗᤧ ᤁᤢᤍᤃᤡ ᤔᤧᤍᤠᤏᤧᤴᤗᤥ. ᤀᤡᤃᤪ ᤁᤸᤗᤧ ᤁᤴ ᤁᤒᤪᤡᤱ ᤁᤡᤷᤃᤵ ᤁᤵᤔᤠᤖᤧ ᤗᤠᤃᤡ ᤂᤠᤶᤔᤡᤴ ᤀᤢ᤺ᤰᤆᤶᤈᤶᤒᤠ ᤌᤥ᤺ᤰᤛᤡᤱᤍᤧᤴ ᤔᤧᤈᤥᤃᤢᤴᤗᤥ॥ 33 ᤀᤠᤳᤋᤡ ᤗᤠᤶᤒᤠ ᤂᤧᤴ ᤑᤧᤖᤧ ᤜᤠᤒᤠ ᤂᤧᤴ ᤗᤠᤶᤔᤣ ᤐᤥᤱᤅᤠᤱ ᤏᤢ᤺ᤱᤒᤣ᤺ᤰᤗᤥ. ᤁᤴ ᤕᤧᤰᤕᤰᤁᤥ ᤂᤢᤏᤧ᤹ ᤔᤧᤗᤠ᤺ᤳᤏᤧᤴᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤁᤴ ᤀᤢᤘᤠ ᤆᤥᤃᤢᤖᤥ॥ 34 ᤀᤠᤱᤃᤠ᤹ ᤀᤠᤗᤠᤃᤡ ᤏᤢ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤗᤠᤃᤡ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤏᤠᤅᤢᤱ᤹ ᤜᤧᤰᤁᤩᤠᤱ ᤛᤧ᤺ᤵᤋᤢᤱᤗᤥ॥” 35 ᤂᤧᤴ ᤛᤧᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤗ᤺ᤴᤍᤧ ᤋᤩᤧ. ᤜᤧᤰᤁᤩᤠᤱ ᤂᤧᤸᤗᤧ ᤀᤛ᤻ᤛᤢᤖᤖᤧ ᤁᤢᤎᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤗᤠᤅᤧᤴᤇᤡᤱ ᤌᤡᤰ ᤏᤢ ᤕᤧᤵᤐᤥᤱᤅᤠᤱ ᤅᤠᤛᤡ ᤜᤧᤴᤇᤡᤱ ᤔᤏᤠᤜᤠ᤹ ᤛᤧᤖᤢᤛᤡ॥ ᤀᤠᤸᤗ ᤋᤠᤏᤠᤶ ᤔᤏᤠᤜᤠ᤹ ᤔᤧᤒᤥᤃᤧᤸᤗᤧ ᤂᤧᤵᤔᤥ ᤁᤧᤖᤧᤰ ᤐᤡᤛᤠᤱ ᤆᤣᤜᤠ᤹ᤖᤰ ᤔᤧᤏᤧᤛ᤻ᤛᤧ॥ 36 ᤁᤸᤗᤧᤆᤥᤃᤢᤸᤗᤧ ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤖᤧ ᤁᤢᤎᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤜᤠ᤹ ᤕᤅᤢᤀᤠᤱ ᤏᤢ᤺ᤰᤂᤧᤒᤣ॥ ᤂᤢᤏᤧ᤹ ᤏᤡᤏᤘᤣ ᤏᤢ᤺ᤰᤂᤧ ᤐᤣᤀᤠᤱ ᤕᤢᤱᤔᤠ ᤜᤣ᤺ᤰᤋᤧ॥ 37 ᤀᤠᤸᤗ ᤌᤡᤰᤕᤠᤴ ᤂᤢᤏᤧ᤹ ᤁᤢᤔᤠᤱ ᤏᤡᤛᤪᤥᤁᤖᤧ ᤁᤢᤔᤠᤱᤜᤡᤶᤔᤥ ᤛᤧᤘᤠ ᤆᤥ᤺ᤰᤏᤢ ᤕᤠᤃᤧᤸᤗᤧ ᤁᤢᤛ᤻ᤛᤠ ᤀᤍᤪᤶᤔᤗᤣᤁ ᤏᤢ ᤛᤖᤣᤛᤣᤖᤧᤸᤗᤧ ᤂᤢᤏᤧ᤹ ᤋᤠᤓᤣ᤺ᤸᤗᤧ ᤛᤧᤖᤧᤳᤇᤢ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤖᤠᤖᤠᤋ ᤗᤠᤈᤣ᤹ᤀᤥ ᤂᤧᤳᤏᤧᤛᤡᤀᤠᤱ ᤐᤣᤛᤧᤳᤇᤡ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤣᤛᤖᤜᤍᤥᤏᤧᤴ ᤜᤠᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.