᥈ ᤜᤠᤱ 18 - LIFOTNTᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠ ( ᥈ ᤛᤠᤵᤔᤢ ᥈᥏:᥇-᥈ . ᥉᥇:᥇ ) 1 ᤀᤡᤛᤪᤠᤀᤡᤗᤒᤠ ᤜᤠᤱ ᤀᤣᤗᤠᤜᤖᤧ ᤁᤢᤛ᤻ᤛᤠ ᤜᤥᤛᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠᤒᤠ ᤜᤠᤱ ᤀᤠᤜᤠᤈᤖᤧ ᤁᤢᤛ᤻ᤛᤠ ᤜᤡᤈᤁᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥ 2 ᤀᤠᤸᤗ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧᤸᤗᤧ ᤂᤧᤴ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤏᤡᤒᤥᤱᤅᤠᤱ ᤑᤠᤱᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤀᤒᤡᤕᤠ ᤘᤕᤧ ᤂᤢᤏᤧ᤹ ᤈᤁᤖᤡᤕᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 3 ᤁᤢᤴᤎᤧᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤜᤡᤈᤁᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤜᤠᤒᤠ ᤂᤧᤴ ᤆᤥᤃᤢ॥ 4 ᤂᤢᤏᤧ᤹ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤏᤥᤒᤠ ᤔᤠᤱᤎᤠ᤺ᤴᤜᤠ᤹ ᤀᤡ᤺ᤰᤛᤢᤍᤣᤛᤢ. ᤔᤠᤱᤗᤢᤱᤜᤠ᤹ ᤌᤢᤵᤛᤢᤍᤣᤛᤢ. ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤜᤠ᤹ ᤛᤥ᤺ᤴᤍᤢᤍᤣᤛᤢ॥ ᤔᤥᤛᤠ᤺ᤸᤗᤧ ᤆᤥᤃᤢᤒᤠ ᤁᤠᤛᤠ ᤀᤛᤣ᤺ᤰᤁᤡᤴ ᤁᤢᤶᤈᤡᤰᤔᤠ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤵᤔᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤂᤧᤴ ᤏᤜᤢᤛ᤻ᤋᤠᤏ ᤔᤧᤔᤧᤳᤋᤢ॥ 5 ᤜᤡᤈᤁᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤘᤠ᤹ ᤕᤢᤰᤂᤢ॥ ᤕᤜᤢᤍᤠᤒᤠ ᤁᤧᤖᤧᤰ ᤜᤠᤱᤜᤠ᤹ᤀᤥ ᤂᤢᤏᤧ᤹ᤏᤢ᤺ᤸᤗᤧ ᤋᤃᤡ ᤀᤡᤃᤪ ᤂᤢᤏᤧ᤹ ᤁᤢᤀᤣᤃᤠᤱ ᤁᤧᤍᤠᤒᤠ ᤜᤠᤱᤜᤠ᤹ ᤀᤠᤳᤋᤡᤴᤏᤠᤱ ᤂᤢᤏᤧ᤹ ᤜᤧᤰᤋᤱᤒᤠ ᤔᤧᤒᤥ᤺ᤰᤂᤧᤴ॥ 6 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤆᤡᤄᤧ᤺ᤵ ᤁᤧᤄᤧ᤺ᤶᤛᤡᤱᤒᤠ ᤁᤢᤛᤧᤘᤠᤖᤥᤒᤠ ᤐᤥ᤺ᤰᤂᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤋᤡᤶᤔᤠ ᤏᤠ᤺ᤵᤔᤠ ᤔᤧᤗᤧᤖᤢᤴ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤀᤡᤱᤈᤠᤱᤜᤠ᤹ ᤂᤢᤏᤧ᤹ ᤀᤡ᤺ᤳᤋᤢ ᤏᤠ᤺ᤳᤋᤢ॥ 7 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ᤏᤢ ᤘᤕᤧ॥ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤂᤢᤏᤧ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤸᤗᤧ ᤁᤢᤕᤠ᤺ᤶᤒᤰ ᤔᤧᤈᤥᤃᤢᤴ॥ 8 ᤂᤢᤏᤧ᤹ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤴᤍᤢᤛᤡ॥ ᤂᤧᤱᤜᤠ᤹ ᤔᤧᤕᤢᤅᤧᤒᤠᤍᤧᤴ ᤃᤠᤈᤠ ᤌᤠᤖᤡᤰ ᤏᤢ ᤂᤧᤵᤔᤥ ᤁᤒᤪᤡᤱᤒᤠ ᤗᤠᤈᤣ᤹ᤜᤠ᤹ᤀᤥ ᤜᤧᤰᤁᤩᤠᤱ ᤆᤢᤈᤢᤰᤛᤠ ᤐᤠᤱᤓᤣ᤹ᤀᤠᤱᤎᤥ ᤕᤶᤒᤕᤶᤒᤠ ᤕᤧᤰᤕᤰ ᤌᤧᤶᤒᤠ ᤂᤢᤏᤧ᤹ ᤌᤱ ᤏᤠ᤺ᤴᤍᤢᤛᤡ॥ 9 ᤜᤡᤈᤁᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤋᤱᤒᤣᤀᤥ. ᤀᤡᤛᤪᤠᤀᤡᤗᤒᤠ ᤜᤠᤱ ᤀᤣᤗᤠᤜᤖᤧ ᤁᤢᤛ᤻ᤛᤠ ᤜᤥᤛᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤢᤛᤡᤃᤣᤰᤐᤠ ᤋᤱᤒᤣ ᤁᤧᤖᤧᤀᤠᤱ ᤘᤕᤧ. ᤀᤛ᤻ᤛᤢᤖᤒᤠ ᤜᤠᤱ ᤛᤗᤔᤏᤣᤛᤣᤖᤖᤧ ᤛᤠᤔᤖᤡᤕᤠᤴ ᤌᤱᤅᤥ ᤑᤳᤋᤢᤀᤠᤱ ᤂᤧᤴ ᤁᤒᤪᤡᤱ ᤁᤡᤷᤃᤵ ᤁᤒᤢ॥ 10 ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤁᤒᤪᤡᤱ ᤁᤡᤷᤃᤵ ᤔᤧᤃᤒᤢᤀᤠᤱ ᤀᤛ᤻ᤛᤢᤖᤡᤜᤠ᤹ᤖᤧ ᤂᤧᤴ ᤜᤢᤰᤁᤠᤵ ᤔᤧᤈᤥᤃᤢ॥ ᤁᤶᤓᤗ᤹ᤖᤡᤰ ᤜᤡᤈᤁᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤋᤢᤰᤛᤡᤃᤣᤰᤐᤠ ᤋᤱᤒᤣᤀᤥ. ᤀᤡᤛᤪᤠᤀᤡᤗᤒᤠ ᤜᤠᤱ ᤜᤥᤛᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤋᤱᤒᤣ ᤑᤠᤱᤛᤡ ᤁᤧᤖᤧᤀᤠᤱ ᤘᤕᤧᤸᤗᤧ ᤛᤠᤔᤖᤡᤕᤠᤴ ᤜᤢᤰᤁᤠᤵ ᤔᤧᤈᤥᤃᤢ॥ 11 ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤛ᤻ᤛᤢᤖ ᤗᤠᤈᤣ᤹ᤀᤥ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤜᤗᤜ. ᤜᤠᤒᤥᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤃᤥᤈᤠᤏ ᤏᤢ ᤔᤠᤍᤡᤜᤠ᤹ᤖᤧ ᤂᤢᤴᤇᤡ᤹ ᤐᤠᤱᤈᤢᤶᤜᤠ᤹ᤀᤥ ᤂᤧᤱᤜᤠ᤹ ᤕᤢᤰᤂᤢᤛᤡ॥ 12 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤔᤧᤴᤀᤡ᤺ᤳᤋᤣ ᤔᤧᤴᤏᤠ᤺ᤳᤋᤣ ᤔᤧᤘᤕᤧ. ᤁᤖ ᤂᤢᤏᤧ᤹ ᤁᤢᤔᤠᤱᤜᤢᤵᤐᤡᤴ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤐᤡᤖᤢᤛᤡᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤂᤧᤱᤜᤠ᤹ᤖᤧ ᤔᤧᤓᤣ᤺ᤴᤍᤢᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤀᤡᤱᤈᤠᤱᤜᤠ᤹ ᤏᤡᤏᤡ ᤂᤧᤶᤄᤧᤶ ᤔᤧᤸᤗᤠᤵᤋᤢᤴ. ᤂᤧᤱᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤏᤠᤱ॥ ᤁᤸᤗᤧᤆᤥᤃᤢᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ ᤕᤖᤢᤛᤗᤧ᤺ᤶᤔᤡᤴ ᤀᤛ᤻ᤛᤢᤖᤡᤜᤠ᤹ᤏᤢ ᤁᤡᤛᤧ ( ᥈ ᤛᤠᤵᤔᤢ ᥉᥈:᥇-᥇᥏ ; ᤕᤛᤤ ᥉᥌:᥇-᥈᥈ ) 13 ᤜᤡᤈᤁᤡᤕᤠ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤋᤱᤒᤣᤀᤥ ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤖᤧ ᤕᤜᤢᤍᤠᤀᤥ ᤕᤰ ᤁᤧᤏᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ ᤌᤱᤅᤥ ᤑᤳᤋᤢᤀᤠᤱ ᤂᤧᤱᤜᤠ᤹ ᤜᤢᤰᤁᤠᤵ ᤆᤥᤃᤢ॥ 14 ᤁᤸᤗᤧᤆᤥᤃᤢᤸᤗᤧ ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠ᤺ᤸᤗᤧ ᤗᤠᤁᤡᤛ ᤁᤧᤘᤠ᤹ᤒᤠ ᤀᤛ᤻ᤛᤢᤖᤒᤠ ᤜᤠᤱᤅᤧᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤀᤡᤱᤄᤱ ᤜᤠᤰᤋᤢ—“ᤀᤠᤱᤃᤠ᤹ ᤕᤠ᤺ᤶᤒᤰ ᤑᤣ᤺ᤴᤍᤢᤱ॥ ᤀᤠᤱᤃᤠ᤹ ᤀᤠᤗᤠᤈᤣ᤹ᤀᤥᤗᤠᤶ ᤏᤢ᤺ᤰᤂᤧ ᤐᤣᤃᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤗᤠᤶ ᤂᤧᤏᤧ᤹ ᤌᤣ ᤁᤧᤏᤠ᤺ᤰᤋᤢ᤹. ᤀᤠᤱᤃᤠ᤹ ᤂᤧᤴ ᤐᤠ᤺ᤴᤜᤠ᤹ ᤜᤢᤅᤢᤱᤗᤥ॥” ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠᤴ ᤌᤡᤒᤥᤱ ᤜᤧᤴᤇᤡᤱ ᤁᤡᤗᤥᤃᤪᤠᤔ ᤕᤢᤵᤐᤠ ᤏᤢ ᤜᤧᤴᤇᤡᤱ ᤌᤡᤰ ᤁᤡᤗᤥᤃᤪᤠᤔ ᤛᤠᤶᤔᤩᤠᤱ ᤛᤠᤶᤒᤠᤴ ᤁᤢ᤺ᤳᤋᤢ॥ 15 ᤁᤸᤗᤧᤆᤥᤃᤢᤸᤗᤧ ᤜᤡᤈᤁᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤜᤠᤱᤜᤡᤶᤔᤥ ᤂᤥᤛᤢᤒᤠ ᤁᤧᤖᤧᤰ ᤕᤢᤵᤐᤠᤜᤠ᤹ ᤂᤢᤏᤧ᤹ ᤐᤡᤖᤢ॥ 16 ᤂᤧᤴ ᤕᤧᤶᤔᤥ ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤢᤏᤧ᤹ ᤀᤠᤵᤑᤣᤰ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢᤀᤠᤱ ᤁᤧᤕᤧᤵᤐᤠ ᤗᤠᤶᤎᤣ᤺ᤳᤜᤠ᤹ ᤏᤢ ᤗᤠᤶᤎᤣ᤺ᤳᤋᤥᤒᤠ ᤛᤡᤳᤗᤠᤱᤜᤠ᤹ᤗᤠᤶ ᤛᤠᤶᤔᤩᤠᤱᤜᤠ᤹ ᤗ᤺ᤳᤋᤢᤀᤠᤱ ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤧᤴ ᤐᤡᤖᤢ॥ 17 ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤁᤢᤎᤰᤔᤥᤒᤧᤴ. ᤂᤢᤏᤧ᤹ ᤋᤢᤶ ᤁᤢᤛᤢᤜᤠᤱᤕᤢᤰᤐᤧᤴ ᤏᤢ ᤂᤠᤶᤒᤠᤱᤅᤥ ᤌᤱ ᤁᤧᤎᤰᤐᤠ ᤁᤢᤎᤰᤔᤥᤒᤧᤴ ᤕᤖᤡᤰ ᤌᤰᤛᤢᤒᤠᤜᤠ᤹ᤏᤢ ᤛᤥᤖᤡᤰ ᤗᤠᤁᤡᤛᤗᤠᤶ ᤕᤖᤢᤛᤗᤧᤔ ᤜᤡᤈᤁᤡᤕᤠ ᤜᤠᤱᤅᤧᤀᤥ ᤐᤠᤱᤄᤢᤛᤡ॥ ᤂᤧᤱᤜᤠ᤹ ᤔᤧᤎᤥ᤺ᤰᤛᤡᤱᤅᤠᤱ ᤕᤖᤢᤛᤗᤧ᤺ᤶᤔᤥ ᤔᤧᤓᤧᤖᤧ. ᤂᤶᤓᤩᤠᤱ ᤆᤠᤱ ᤘᤠᤃᤧᤜᤵᤐᤧᤸᤗᤧ ᤁᤢᤀᤡᤰᤋᤠᤵᤐᤥ ᤐᤣ᤺ᤰᤔᤠ ᤌᤥᤛᤔᤠ ᤘᤖᤰᤁᤥᤒᤠ ᤘᤠᤗᤠᤶᤔᤡᤸᤗᤧ ᤁᤢᤕᤠᤀᤥ ᤔᤧᤕᤧᤶᤛᤡᤱ॥ 18 ᤂᤧᤱᤜᤠ᤹ᤖᤧ ᤜᤡᤈᤁᤡᤕᤠ ᤜᤠᤱᤅᤡᤴ ᤔᤧᤀᤢ᤺ᤳᤋᤢ. ᤜᤧᤰᤁᤩᤠᤱ ᤜᤠᤱᤜᤡᤶ ᤀᤥᤃᤧᤔᤧᤵᤐᤠ ᤜᤡᤸᤁᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤀᤣᤗᤩᤠᤁᤡᤔᤧᤴ. ᤛᤢᤜᤠᤱᤔᤡᤒᤠ ᤛᤣᤒ᤻ᤏᤠᤴ ᤏᤢ ᤂᤠᤖᤠᤳ ᤁᤧᤕᤢᤱᤒᤠ ᤀᤠᤛᤠᤐᤖᤧ ᤁᤢᤛ᤻ᤛᤠ ᤕᤥᤀᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤔᤧᤒᤣᤖᤥ॥ ᤛᤏᤜᤣᤖᤡᤒᤖᤧ ᤕᤖᤢᤛᤗᤧ᤺ᤶᤔᤡᤴ ᤕᤱᤔᤠᤛᤧᤖᤢ 19 ᤂᤠᤶᤒᤠᤱᤅᤥ ᤌᤱᤃᤧᤈᤥ᤺ᤰᤐᤠ ᤌᤰᤔᤥᤒᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤡᤈᤁᤡᤕᤠᤴ ᤔᤧᤳᤋᤧᤶᤔᤧ᤹— ‘ᤀᤛ᤻ᤛᤢᤖᤒᤠ ᤐᤕᤶ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ. ᤂᤡᤏᤡ᤹ ᤜᤠ᤺ᤳᤗᤧᤀᤥ ᤁᤧᤄᤧ᤺ᤶᤔᤠᤛᤡᤖ ᤁᤧᤘᤕᤡᤒᤣ᥅ 20 ᤂᤧᤏᤧ᤹ᤏᤢ ᤌᤱ ᤆᤥ᤺ᤰᤔᤠ ᤁᤧᤗᤧᤒᤠ ᤜᤧᤰᤁᤩᤠᤱ ᤁᤧᤎᤢᤶᤒᤠ ᤌᤰᤛᤢᤒᤠᤜᤠ᤹ ᤔᤧᤘᤠ᤹ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤡ᥅ ᤁᤖ ᤂᤧᤏᤧ᤹ᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤠ᤺ᤴᤗᤰ ᤁᤧᤒᤠ᤺ᤳᤋᤢ᤹॥ ᤂᤧᤏᤧ᤹ ᤜᤠ᤺ᤳᤗᤧᤀᤥ ᤁᤧᤄᤧ᤺ᤶᤛᤡᤱᤅᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤁᤧᤒᤥ᤺ᤰᤂᤧᤒᤣ᥅ 21 ᤀᤠᤸᤗ ᤀᤥᤔᤧᤳᤋᤧ᤹. ᤂᤧᤏᤧ᤹ ᤔᤡᤛᤪᤀᤥ ᤁᤧᤄᤧ᤺ᤶᤛᤡᤱᤗ ᤁᤧᤘᤠ᤹॥ ᤂᤧᤱᤃ ᤗᤳᤇᤠ ᤁᤧᤀᤧᤰᤐᤠ ᤔᤡᤰᤗᤠ ᤋᤰᤁᤠᤳ ᤜᤧᤰᤋᤱᤒᤠ ᤆᤥᤰ. ᤁᤢᤓᤠ ᤔᤏᤠᤜᤠ᤹ ᤂᤧᤵᤔᤥ ᤔᤧᤍᤰᤛᤡᤱᤏᤧᤓᤃᤪ ᤂᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤗᤰᤋᤢᤀᤠᤱ ᤔᤧᤃᤠᤴ॥ ᤂᤧᤵᤔᤥ ᤁᤧᤄᤧ᤺ᤶᤛᤡᤱᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤗᤠᤃᤡ ᤔᤡᤛᤪ ᤗᤠᤈᤣ᤹ᤒᤠ ᤑᤠᤖᤥ ᤜᤠᤱᤅᤡᤴ ᤜᤠᤒᤠ ᤜᤧᤰᤋᤱᤒᤠᤀᤣ ᤆᤥᤰ॥ 22 ᤁᤖ ᤂᤡᤏᤡ᤹ ᤀᤠᤏᤡᤃᤧᤃ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤧ᤺ᤶᤔᤠᤛᤡᤃᤧ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤏᤧᤓᤃᤪ. ᤜᤡᤈᤁᤡᤕᤠ᤺ᤸᤗᤧ ᤀᤡ᤺ᤰᤛᤢᤍᤣᤛᤢᤒᤠ ᤁᤣ᤺ᤶᤒ ᤁᤣ᤺ᤶᤒᤠ ᤔᤠᤱᤎᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧᤴ ᤔᤣ᤺ᤴᤏᤠᤱᤒᤡ᥅ ᤜᤧᤰᤁᤩᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧᤔᤒᤠ ᤔᤏᤠᤜᤠ᤹ ᤕᤖᤢᤛᤗᤧ᤺ᤶᤔᤥ ᤁᤧᤏᤧᤒᤠ ᤁᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤡᤏᤡ᤹ ᤛᤠᤶᤒᤥᤴ ᤜᤒᤳᤋᤠᤱ ᤔᤠᤱᤛᤧᤘᤠ ᤆᤥ᤺ᤰᤔᤠ ᤐᤥᤱ᤹ ᤑᤠ᤹ᤀᤠᤱ ᤔᤧᤳᤋᤢᤛᤡᤀᤠᤱ ᤔᤧᤘᤕᤧᤏᤧᤶᤒᤡ᥅ 23 “‘ᤀᤠᤸᤗ ᤀᤛ᤻ᤛᤢᤖᤒᤠ ᤜᤠᤱ ᤀᤠᤱᤃᤠ᤹ ᤀᤠᤴᤍᤠᤱᤒᤧᤴᤏᤢ ᤜᤠᤍᤡᤱ ᤌᤰᤋᤧ᤹॥ ᤀᤴᤃᤧᤕᤢᤰᤐᤠᤜᤠ᤹ ᤂᤥᤔᤠ ᤁᤧᤛᤢᤰᤋᤢᤛᤡᤏᤧᤓᤃᤪ ᤀᤠᤱᤃᤠ᤹ ᤀᤠᤍᤠᤱᤒᤠ ᤜᤧᤴᤇᤡᤱ ᤏᤧᤳᤇᤡ ᤀᤴᤜᤠ᤹ ᤐᤡᤏᤧ॥ 24 ᤀᤠᤱᤃᤠ᤹ ᤀᤠᤴᤍᤠᤱᤒᤧᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤁᤢᤛᤢᤜᤠᤱᤕᤢᤰᤐᤠ ᤌᤡᤰ ᤀᤠᤍᤠᤱᤒᤠᤖᤧ ᤀᤠᤰᤂᤣᤀᤠᤱ ᤂᤧᤵᤔᤠ ᤁᤧᤛᤢᤰᤋᤢᤒᤣ᥅ ᤜᤧᤰᤁᤣᤛᤠᤱ ᤀᤠᤍᤠᤱᤒᤠᤖᤧ ᤀᤴᤗᤠᤎᤠᤜᤠ᤹ ᤏᤢ ᤀᤴᤃᤧᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤠᤍᤠᤱᤒᤠ ᤔᤡᤛᤪ ᤗᤠᤈᤣ᤹ᤀᤥ ᤁᤧᤄᤧ᤺ᤶᤛᤡᤱ᤹॥ 25 ᤀᤠᤸᤗᤛᤠᤱ ᤕᤖᤡᤰ ᤐᤠ᤺ᤴ. ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤔᤣ᤺ᤴᤏᤣ ᤌᤱᤅᤥ ᤑᤵᤔᤠ ᤏᤢ ᤁᤴ ᤗᤠᤈᤣᤴ ᤔᤧᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤑᤧᤖᤠᤱᤒᤠᤒᤡ᥅ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤅᤠᤱ ᤘᤠ᤹. ᤁᤴ ᤗᤠᤈᤣᤴ ᤌᤱᤅᤥ ᤑᤳᤋᤧ᤹ᤀᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤧ᤹॥’” 26 ᤂᤧᤒᤩᤠᤱ ᤜᤡᤸᤁᤡᤕᤠᤜᤖᤧ ᤁᤢᤛ᤻ᤛᤠ ᤀᤣᤗᤩᤠᤁᤡᤔ. ᤛᤣᤒ᤻ᤏᤠ ᤏᤢ ᤕᤥᤀᤠᤛᤡᤖᤧ ᤂᤧᤴ ᤂᤠᤶᤒᤠᤱᤅᤥ ᤌᤱ ᤁᤧᤈᤥ᤺ᤰᤐᤠ ᤌᤰᤔᤥᤒᤧᤴ ᤔᤧᤔᤧᤳᤋᤢ. “ᤆᤡᤛᤠᤈᤡ ᤀᤠᤍᤠᤱᤒᤠ ᤁᤧᤛᤧᤘᤠᤖᤥᤒᤠᤜᤠ᤹ᤏᤢ ᤀᤠᤖᤔᤣᤀᤡᤁ ᤐᤠ᤺ᤴᤍᤠᤱᤅᤥ ᤐᤠᤖᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤐᤠ᤺ᤴᤍᤠᤱᤅᤡᤴ ᤀᤠᤏᤡᤃᤣ ᤁᤢᤛᤡᤱ ᤏᤡ᤺ᤳᤋᤢᤶᤒᤧ॥ ᤗᤢᤱᤎᤠᤰᤁᤥ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤕᤠᤖᤡᤰ ᤜᤡᤒᤪᤢ ᤐᤠ᤺ᤴᤍᤠᤱᤅᤥ ᤔᤧᤒᤠᤖᤧᤴᤏᤧ᤹॥” 27 ᤁᤖ ᤌᤰᤔᤥᤒᤧᤸᤗᤧ ᤂᤧᤱᤜᤠ᤹ ᤏᤢᤃᤵ ᤐᤡᤖᤢᤛᤡ. “ᤌᤣ ᤀᤠᤱᤃᤠ᤹ ᤀᤠᤴᤍᤠᤱᤒᤠᤸᤗᤧ ᤂᤧᤏᤡ᤹ ᤏᤢ ᤂᤧᤏᤡ᤹ ᤍᤠᤱᤒᤠᤸᤗᤥᤖᤰ ᤁᤴ ᤐᤠ᤺ᤴᤏᤡᤴ ᤐᤠ᤺ᤵᤔᤠᤖᤧ ᤗᤠᤃᤡ ᤐᤠᤱᤄᤠᤱᤒᤠᤒᤡ᥅ ᤌᤣ ᤂᤢᤏᤧ᤹ ᤗᤢᤱᤎᤠᤰᤁᤥ ᤁᤧᤕᤧᤵᤐᤠ ᤔᤏᤠᤜᤠ᤹ᤀᤥᤀᤠᤱ ᤐᤠᤱᤄᤠᤱᤒᤠ ᤔᤣ᤺ᤶᤒᤡ᥅ ᤂᤡᤏᤡ᤹ ᤁᤢᤛᤡᤰᤁᤣ ᤂᤧᤱᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤜᤡ ᤛᤣ᤹ᤔᤠ᤺ᤳᤜᤠ᤹ ᤆᤠᤔᤠ ᤁᤧᤒᤥᤱᤒᤠ ᤘᤠ᤹॥” 28 ᤂᤧᤒᤩᤠᤱ ᤂᤧᤴ ᤌᤰᤔᤥᤒᤧᤴ ᤕᤧᤶᤛᤡᤱᤅᤠᤱ ᤜᤡᤒᤪᤢ ᤐᤠ᤺ᤴᤍᤠᤱᤅᤥ ᤀ᤺ᤰᤋᤧᤀᤠᤱ ᤐᤠ᤺ᤳᤋᤢ. “ᤀᤛ᤻ᤛᤢᤖᤒᤠ ᤐᤕᤶ ᤕᤶᤒᤠ ᤜᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹॥ 29 ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ. ᤜᤡᤈᤁᤡᤕᤠ ᤜᤠᤱᤅᤡᤸᤗᤧ ᤂᤡᤏᤡ᤹ ᤀᤡᤱᤗᤧᤰᤁᤥ ᤁᤧᤴᤎᤠᤛᤡᤴᤗ॥ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤂᤢᤏᤧ᤹ ᤂᤡᤏᤡ᤹ ᤛᤧ᤺ᤵᤔᤠ ᤁᤧᤴᤇᤢᤰᤋᤡᤴ॥ 30 ‘ᤕᤜᤘᤣ ᤍᤠᤱᤒᤧᤸᤗᤧ ᤛᤧᤰᤂᤠᤛᤠᤱ ᤀᤠᤏᤡ᤹ ᤋᤠᤱᤀᤠᤛᤧ᤺ᤵ. ᤜᤧᤰᤁᤩᤠᤱ ᤁᤴ ᤕᤧᤰᤕᤰᤁᤡᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤔᤧᤎᤠᤛᤢᤴ᤹’ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤀᤥ ᤂᤧ᤺ᤶᤛᤡᤱᤔᤠᤖᤧ ᤗᤠᤃᤡ ᤜᤡᤈᤁᤡᤕᤠ᤺ᤸᤗᤧ ᤂᤡᤏᤡ᤹ ᤆᤰᤔᤧᤸᤗ᤹ᤀᤣ ᤁᤧᤸᤗᤧᤔᤡᤴᤗ॥ 31 “ᤜᤡᤈᤁᤡᤕᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹॥ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ᤏᤢ ᤏᤠᤍᤱ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤗ᤺ᤴᤍᤧᤶᤔᤧ᤹ᤀᤠᤱ ᤀᤠᤱᤃᤠ᤹ᤀᤥ ᤋᤩᤧᤶᤔᤧ᤹॥ ᤜᤠᤱᤅᤡᤸᤗᤧ ᤂᤡᤏᤡ᤹ ᤀᤠᤵᤑᤣᤰ ᤂᤡᤏᤡ᤹ ᤗᤠᤈᤣ᤹ ᤜᤧᤰᤋᤱᤒᤠ ᤘᤣ᤹ ᤗᤠᤈᤣ᤹ ᤌᤡᤰᤁᤥ ᤁᤧᤴᤕᤢᤰᤂᤡᤴᤗ ᤌᤠᤖᤡᤰ. 32 ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤵᤑᤣᤰ ᤀᤠᤵᤑᤣᤰ ᤆᤧᤸᤗᤧᤰᤛᤣᤸᤗᤧ ᤁᤢᤈᤠ᤹ᤜᤠ᤹ ᤏᤢ ᤐ᤺ᤳᤇᤣᤸᤗᤧ ᤁᤢᤈᤠ᤹ᤜᤠ᤹ ᤁᤧᤈᤠᤶ᤹॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤵᤑᤣᤰ ᤘᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤁᤧᤎᤢᤅᤢᤶ᤹॥ ᤂᤢᤏᤧ᤹ ᤁᤧᤕᤢᤰᤂᤡᤒᤠ ᤗᤠᤈᤣ᤹ᤀᤥ ᤆᤧᤸᤗᤧᤰᤛᤣ᤹ ᤌᤡ ᤁᤧᤗ᤺ᤶᤒᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤏᤢ ᤂᤖᤧ᤺ᤱ ᤗᤧ᤺ᤱᤔᤠ ᤐᤥᤃᤢᤃᤧᤴ ᤁᤢᤈᤠ ᤁᤧᤎᤥ᤺ᤰᤐᤠ ᤀᤡᤰᤋᤠᤵ ᤐᤥᤱ᤹॥ ᤂᤧᤴ ᤆᤤᤋᤢᤏ ᤛᤡᤱᤒᤢᤱᤜᤠ᤹ ᤁᤧᤕᤢᤱᤒᤠ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ ᤐᤥᤱ᤹॥ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤏᤧᤓᤃᤪ ᤂᤡᤏᤡ᤹ ᤁᤧᤜᤡᤅᤡ᤹ ᤁᤖ ᤁᤧᤴᤇ᤻ᤕᤧ᤹ᤀᤡᤴ॥ “ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤛᤧ᤺ᤵᤋᤡ᤹ ᤗ᤹ᤖᤡᤰ ᤜᤡᤈᤁᤡᤕᤠ᤺ᤸᤗᤧ ᤂᤡᤏᤡ᤹ ᤀᤡᤱᤗᤧᤰᤁᤥ ᤁᤧᤴᤎᤠᤛᤡᤴᤗᤖᤥ॥ 33 ᤀᤠᤳᤋᤡᤴ ᤘᤣ᤹ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤖᤧ ᤂᤢᤏᤧ᤹ ᤁᤢᤗᤠᤈᤣᤴ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥᤗᤠᤶ ᤛᤧ᤺ᤵᤔᤠ ᤛᤢᤰᤋᤢᤀᤠᤱ ᤘᤠ᤹ᤒᤣ᥅ 34 ᤜᤔᤠᤋ ᤏᤢ ᤀᤷᤐᤠᤍᤒᤠ ᤔᤠᤱᤜᤠ᤹ ᤀᤠᤳᤋᤡ ᤔᤧᤒᤣᤒᤣ᥅ ᤛᤐᤷᤒᤣᤔ. ᤜᤣᤏᤠ ᤏᤢ ᤀᤡᤒ᤻ᤒᤠᤒᤠ ᤔᤠᤱᤜᤠ᤹ ᤀᤠᤳᤋᤡ ᤔᤧᤒᤣᤃ᥅ ᤌᤣ ᤂᤧᤱᤜᤠ᤹ᤖᤧ ᤛᤠᤔᤖᤡᤕᤠᤴ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤋᤠᤱᤔᤠ ᤔᤧᤛᤢᤰᤋᤢᤒᤡ᥅ 35 ᤌᤣ ᤁᤴ ᤗᤠᤈᤣ᤹ᤜᤠ᤹ᤀᤥᤒᤠ ᤁᤧᤖᤧᤰ ᤔᤠᤱᤜᤠ᤹ᤀᤥ ᤁᤢᤓᤠᤖᤧ ᤂᤢᤴᤇᤡ᤹ ᤗᤠᤈᤣᤴ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤛᤧ᤺ᤵᤔᤠ ᤔᤧᤛᤢᤰᤋᤢᤀᤠᤱ ᤘᤠ᤹ᤒᤡ᥅ ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤀᤠᤓᤣᤗ᤹ᤖᤡᤰ ᤋᤠᤱᤔᤠ ᤛᤢᤰᤋᤢᤀᤠᤱᤒᤣ᥅” 36 ᤁᤖ ᤔᤏᤠᤜᤠ᤹ ᤛᤫᤠ᤺ᤳ ᤔᤧᤶᤒᤠ᤺ᤳᤋᤣ ᤔᤧᤕᤢᤅᤧ ᤜᤧᤰᤁᤩᤠᤱ ᤌᤧᤔᤠᤀᤠᤱ ᤏᤥᤃᤵ ᤔᤧᤶᤒᤠ᤺ᤳᤋᤢᤴ. ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤀᤰᤋᤱᤒᤠ ᤀᤡᤱᤈᤠᤱ ᤐᤖᤢᤛᤡᤀᤠᤱ ᤘᤕᤧ. “ᤂᤢᤏᤧ᤹ ᤌᤣᤀᤠᤱ ᤏᤢᤃᤵ ᤔᤧᤒᤡᤖᤧᤶᤔᤡᤴᤏᤧ᤹॥” 37 ᤂᤧᤒᤩᤠᤱ ᤜᤠᤱᤜᤡᤶᤔᤥᤒᤠ ᤗᤰᤐᤧᤴᤛᤠᤒᤠ ᤜᤡᤸᤁᤡᤕᤠᤜᤖᤧ ᤁᤢᤛ᤻ᤛᤠ ᤀᤣᤗᤩᤠᤁᤡᤔ. ᤛᤢᤜᤠᤱᤔᤡᤒᤠ ᤛᤣᤒ᤻ᤏᤠ ᤏᤢ ᤀᤠᤛᤠᤐᤖᤧ ᤁᤢᤛ᤻ᤛᤠ ᤛᤠᤵᤗᤠ ᤁᤧᤛᤠᤵᤐᤠ ᤕᤥᤀᤠ᤺ᤸᤗᤧ ᤂᤢᤴᤇᤡ᤹ ᤆᤠᤱᤜᤠ᤹ ᤔᤧᤎᤧ᤺ᤰᤂᤢ. ᤜᤧᤰᤁᤩᤠᤱ ᤜᤡᤈᤁᤡᤕᤠᤜ ᤜᤠᤱᤅᤧᤀᤥ ᤔᤧᤒᤣᤀᤠᤱ ᤂᤠᤶᤒᤠᤱᤅᤥ ᤌᤱ ᤁᤧᤈᤥ᤺ᤰᤐᤠ ᤌᤰᤔᤥᤒᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤈᤧᤰᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.