᥈ ᤜᤠᤱ 17 - LIFOTNTᤀᤡᤛᤪᤠᤀᤡᤗᤒᤠ ᤜᤠᤱ ᤜᤥᤛᤡᤕᤠ 1 ᤕᤜᤢᤍᤠᤒᤠ ᤜᤠᤱ ᤀᤠᤜᤠᤈᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤏᤡᤛᤡᤃᤣᤰᤐᤠ ᤋᤱᤒᤣᤀᤥ ᤀᤣᤗᤠᤜᤖᤧ ᤁᤢᤛ᤻ᤛᤠ ᤜᤥᤛᤡᤕᤠᤴ ᤛᤠᤔᤖᤡᤕᤠᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤋᤱᤒᤣ ᤑᤠᤱᤛᤡ ᤜᤠᤱᤕᤢᤰ ᤆᤥᤃᤢ॥ 2 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤀᤠᤶᤓᤠ ᤂᤧᤴᤏᤣ ᤆᤥᤃᤢ. ᤁᤖ ᤂᤢᤏᤧ᤹ᤏᤢ᤺ᤸᤗᤧ ᤋᤃᤡᤒᤠ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤋᤱᤒᤠᤀᤣᤃ ᤔᤣ᤺ᤴ॥ 3 ᤜᤥᤛᤡᤕᤠᤴ ᤌᤱᤅᤥ ᤑᤵᤔᤠᤖᤧ ᤗᤠᤃᤡ ᤀᤛ᤻ᤛᤢᤖᤒᤠ ᤜᤠᤱ ᤛᤗᤔᤏᤣᤛᤣᤖᤧᤴ ᤑᤧᤖᤧ॥ ᤂᤢᤏᤧ᤹ ᤁᤢᤕᤢᤰᤁᤥ ᤘᤕᤧᤀᤠᤱ ᤜᤥᤛᤡᤕᤠ᤺ᤸᤗᤧ ᤀᤣ᤺ᤱᤕᤠᤱ ᤜᤢᤅᤢᤖ ᤘᤕᤧ॥ 4 ᤁᤖ ᤀᤛ᤻ᤛᤢᤖᤒᤠ ᤜᤠᤱ ᤛᤗᤔᤏᤣᤛᤣᤖᤖᤧ ᤜᤥᤛᤡᤕᤠ᤺ᤸᤗᤧ ᤀᤡᤱᤗᤧᤰᤋᤢᤒᤠ ᤏᤡᤛᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤡᤛᤪ ᤗᤠᤈᤣ᤹ᤒᤠ ᤛᤥ ᤜᤠᤱᤅᤧᤀᤥ ᤜᤠᤱᤗᤠᤀᤡᤱᤒᤠᤜᤠ᤹ ᤐᤠᤱᤄᤢᤛᤡᤀᤠᤱ ᤘᤕᤧ ᤜᤧᤰᤁᤩᤠᤱ ᤋᤱᤒᤣ ᤌᤰᤔᤠ ᤜᤢᤱᤔᤠ ᤁᤧᤒᤥᤱᤒᤠ ᤀᤣ᤺ᤱ ᤕᤠᤱᤅᤡᤴ ᤜᤢᤱᤔᤠ ᤏᤠ᤹ᤖᤧᤀᤠᤱ ᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤛᤗᤔᤏᤣᤛᤣᤖᤖᤧ ᤂᤢᤏᤧ᤹ ᤋᤧᤶᤛᤢᤀᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤖᤥ॥ ᤛᤠᤔᤖᤡᤕᤠᤴ ᤆᤥ᤺ᤴᤍᤧ 5 ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤗᤠᤈᤣᤴ ᤁᤧᤖᤧᤰ ᤑᤳᤋᤢ. ᤜᤧᤰᤁᤩᤠᤱ ᤛᤠᤔᤖᤡᤕᤠᤴ ᤌᤱᤅᤥ ᤑᤳᤋᤢᤀᤠᤱ ᤂᤧᤴ ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤁᤡᤷᤃᤵ ᤁᤒᤢ ᤏᤧᤛ᤻ᤛᤢ॥ 6 ᤜᤥᤛᤡᤕᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤑᤠᤱᤛᤡᤃᤣᤰᤐᤠ ᤋᤱᤒᤣᤀᤥ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤛᤠᤔᤖᤡᤕᤠᤴ ᤜᤢᤰᤁᤠᤵ ᤆᤥᤃᤢ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤋᤧᤶᤛᤢᤛᤡᤀᤠᤱ ᤀᤛ᤻ᤛᤢᤖᤀᤥ ᤋᤣ᤹ᤖᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ ᤜᤗᤜᤀᤥ. ᤜᤠᤒᤥᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤃᤥᤈᤠᤏᤀᤥ ᤏᤢ ᤔᤠᤍᤡᤜᤠ᤹ᤖᤧ ᤂᤢᤴᤇᤡ᤹ ᤐᤠᤱᤈᤢᤶᤜᤠ᤹ᤀᤥ ᤕᤢᤰᤂᤢᤛᤡ॥ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ 7 ᤔᤡᤛᤪ ᤗᤠᤈᤣ᤹ᤒᤠ ᤜᤠᤱ ᤑᤠᤖᤥᤸᤗᤧ ᤁᤢᤔᤢᤰᤁᤥᤗᤠᤶ ᤔᤡᤛᤪ ᤗᤠᤈᤣ᤹ᤗᤠᤶ ᤁᤧᤗ᤺ᤵᤐᤠ ᤁᤧᤎᤠᤰᤐᤠ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤀᤠᤱ ᤘᤕᤧ. ᤁᤸᤗᤧᤆᤥᤃᤢᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡ॥ 8 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤗ᤺ᤳᤋᤢᤍᤣᤛᤢᤛᤡᤒᤠ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤔᤧᤏᤠ᤺ᤳᤋᤢ ᤔᤧᤍᤡᤶᤍᤢᤒᤠ ᤕᤧᤵᤗᤧᤰᤁᤥᤀᤠᤱ ᤂᤢᤴᤇᤡ᤹ ᤗᤠᤱᤔᤧᤄᤣᤃᤧ॥ 9 ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤔᤧᤈᤥᤃᤧᤴ ᤂᤧᤴ ᤛᤫᤠ᤺ᤳᤋᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ. ᤆᤢᤈᤢᤰᤛᤠ ᤏᤢ ᤕᤶᤒᤕᤶᤒᤠ ᤐᤠᤱᤓᤣ᤹ᤜᤠ᤹ᤀᤥ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠᤍᤧᤴᤜᤠ᤹ ᤔᤧᤈᤥᤃᤢ॥ 10 ᤁᤣ᤺ᤶᤒᤠ ᤁᤥ᤺ᤰᤔᤠ ᤌᤰᤔᤠ ᤏᤢ ᤜᤢᤶᤒᤧᤵᤐᤠ ᤛᤡᤱᤒᤢᤱ ᤛᤡᤃᤠᤱ ᤌᤰᤔᤠ ᤂᤧᤱᤜᤠ᤹ᤖᤧ ᤗᤢᤱᤜᤠ᤹ ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤜᤠ᤹ ᤔᤧᤜᤠᤰᤋᤢ॥ 11 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤛᤢᤘᤠᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣᤀᤣ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴ ᤌᤰᤔᤠ ᤂᤧᤱᤜᤠ᤹ᤖᤧ ᤛᤢᤰᤐᤠ ᤔᤧᤜᤠ᤺ᤴᤍᤢ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢ. ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤂᤧᤱᤜᤠ᤹ ᤂᤢᤏᤧ᤹ᤗᤠᤶ ᤗ᤺ᤳᤋᤢᤍᤣᤛᤢᤛᤡ॥ 12 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤘᤕᤧ. “ᤂᤡᤏᤡ᤹ ᤀᤰᤋᤱᤒᤠ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ” ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤏᤠᤘᤠᤀᤡᤳᤗᤠᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡ॥ 13 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤧᤖᤧᤰ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤁᤢᤛᤢᤑᤥ ᤁᤧᤏᤡᤒᤠᤜᤠ᤹ᤗᤠᤶ ᤀᤡᤛᤪᤠᤀᤡᤗᤧᤴ ᤜᤧᤰᤁᤩᤠᤱ ᤕᤜᤢᤍᤠᤴ ᤛᤠᤶᤍᤡᤱ ᤐᤡᤖᤢᤛᤡ—“ᤂᤡᤴᤇᤡ᤹ ᤋᤠᤵᤑᤧ᤺ᤶᤒᤠ ᤕᤧᤵᤗᤧᤰᤜᤠ᤹ ᤗᤧᤖᤧᤛᤧ᤹॥ ᤀᤠᤱᤃᤠ᤹ ᤂᤧᤴᤇᤡ᤹ ᤐᤠᤎᤧᤒᤠᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤱᤛᤡᤱᤅᤠᤱ ᤘᤕᤧᤒᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤂᤡᤏᤡ᤹ ᤐᤡᤏᤡᤱᤅᤠᤱ ᤘᤕᤧᤒᤠ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤢ ᤀᤠᤀᤡᤱᤓ᤺ᤴᤜᤠ᤹ ᤁᤧᤖᤧᤰ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤢᤀᤡᤛᤡᤰ ᤀᤡ᤺ᤳᤋᤧᤛᤧ᤹ ᤏᤠ᤺ᤳᤋᤧᤛᤧ᤹॥” 14 ᤁᤖ ᤂᤧᤱᤜᤠ᤹ ᤐᤠᤴ ᤂᤧᤶᤔᤠ ᤔᤧᤴᤍᤧᤴᤍᤧᤴ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠᤛᤠ᤹ᤔᤠ ᤔᤧᤴᤍᤧᤶᤔᤏᤠᤒᤠ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ ᤜᤠᤍᤡᤱ ᤁᤧᤎᤰᤐᤠ ᤔᤧᤒᤥ᤺ᤰᤂᤧ॥ 15 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤀᤡᤱᤓ᤺ᤴᤜᤠ᤹ ᤏᤢ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤐᤡᤖᤢᤛᤡᤒᤠ ᤛᤠᤶᤍᤡᤱᤅᤡᤴ ᤂᤧᤶᤔᤠ ᤔᤧᤴᤍᤧᤴᤍᤧᤴ. ᤂᤧᤱᤜᤠ᤹ ᤜᤏᤧ ᤌᤣᤏᤠᤎᤣᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤧᤍᤡᤶᤍᤢᤛᤡ. ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤵᤑᤣᤰᤁᤠᤱ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤔᤧᤒᤥ᤺ᤰᤂᤧ॥ “ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤔᤧᤈᤥᤃᤧᤶᤔᤡᤴᤏᤧ᤹” ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢᤛᤡᤀᤠᤱ ᤘᤕᤧᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤒᤪᤡᤱ ᤗᤧᤵᤔᤠᤱ ᤁᤧᤕᤢᤱᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤐᤠ᤺ᤴᤜᤠ᤹ ᤔᤧᤜᤢ᤹ᤛᤡᤱ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤆᤥ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤶᤒᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤈᤥᤃᤢ॥ 16 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤔᤧᤗᤧᤖᤢ ᤔᤧᤍᤣᤛᤢ. ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤃᤡ ᤔᤧᤕᤥᤴᤍᤢᤀᤠᤱ ᤔᤧᤈᤥᤃᤢᤒᤠ ᤏᤧᤳᤇᤡ ᤐᤡᤳᤛᤠᤳᤜᤠ᤹ ᤏᤢ ᤀᤛᤣᤖᤠ ᤔᤠᤱᤅᤡᤸᤗᤧᤴ ᤛᤡᤳᤗᤠᤱ ᤌᤡᤰ ᤔᤧᤈᤥᤃᤢ॥ ᤂᤧᤱᤜᤠ᤹ ᤋᤠᤱᤛᤠᤱᤒᤥᤒᤠ ᤁᤧᤖᤧᤰ ᤂᤣ᤺ᤶᤛᤡᤰᤐᤠᤜᤠ᤹ ᤋᤃᤡ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱ. ᤜᤧᤰᤁᤩᤠᤱ ᤒᤠᤗᤧᤴ ᤔᤠᤱᤛᤧᤘᤠ ᤔᤧᤔᤧᤳᤋᤢ॥ 17 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤛᤠᤜᤠ᤹ ᤔᤡᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤈᤥᤃᤢᤛᤡ॥ ᤂᤧᤱᤜᤠ᤹ᤖᤧ ᤌᤢᤶᤔᤩᤠ ᤔᤧᤀᤡᤛᤢ. ᤜᤧᤰᤁᤩᤠᤱ ᤁᤡᤳᤆᤠᤰ ᤔᤧᤈᤥᤃᤢ. ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤀᤠᤵᤑᤣᤰ ᤔᤧᤛᤱᤛᤡᤱᤅᤠᤱ ᤂᤢᤏᤧ᤹ ᤁᤢᤛᤡᤰ ᤔᤧᤓᤥ᤺ᤰᤂᤢ॥ 18 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤠ᤹ᤖᤡᤰ ᤁᤢᤕᤠ᤺ᤰᤗᤧ᤹ᤖᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤍᤃᤡᤗᤠᤶ ᤗ᤺ᤳᤋᤢᤍᤣᤛᤢᤛᤡ॥ ᤕᤜᤢᤍᤠᤒᤠ ᤌᤠ᤺ᤰᤜᤠ᤹ᤖᤰ ᤔᤧᤍᤠᤅᤧ. 19 ᤜᤧᤰᤁᤩᤠᤱ ᤕᤜᤢᤍᤠᤒᤠᤜᤠ᤹ᤀᤠᤱ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ॥ ᤀᤡᤛᤪᤠᤀᤡᤗᤖᤧ ᤏᤠ᤺ᤳᤋᤢ ᤋᤡᤶᤍᤢᤒᤠ ᤗᤠᤶᤔᤥ ᤂᤧᤱᤜᤠ᤹ ᤗᤠᤱᤔᤧᤄᤣᤃᤧ॥ 20 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤠ᤹ᤖᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ ᤋᤢᤰᤂᤣ ᤗᤠᤰᤂᤣ ᤆᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡᤗᤠᤶ ᤂᤧᤱᤜᤠ᤹ ᤗᤠᤵᤔᤧᤍᤣᤛᤢᤛᤡᤴᤗ ᤌᤠᤖᤡᤰ ᤁᤧᤏᤠᤵᤐᤠ ᤁᤧᤜᤡᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡ॥ 21 ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤅᤥᤗᤠᤶ ᤗᤠ᤺ᤳᤗᤠ᤺ᤳ ᤆᤥᤃᤢ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤴ ᤜᤠᤱ ᤔᤧᤈᤥᤃᤢ॥ ᤕᤠᤖᤥᤒᤠᤔᤧᤸᤗᤧ ᤀᤡᤛᤪᤠᤀᤡᤗᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤔᤥ ᤗᤠᤱᤄᤣ᤺ᤰᤔᤠᤗᤠᤶ ᤏᤢ᤺ᤰᤋᤢᤀᤠᤱ ᤗᤳᤇᤠ ᤕᤶᤒᤠ ᤗᤠᤕᤥ ᤆᤥ᤺ᤰᤔᤠ ᤐᤠᤱᤄᤢ॥ 22 ᤕᤠᤖᤥᤒᤠᤔᤖᤧ ᤁᤧᤖᤧᤰ ᤁᤢᤗᤠᤕᤥᤜᤠ᤹ᤀᤥ ᤀᤡᤛᤪᤠᤀᤡᤗᤡᤜᤠ᤹ ᤆᤰᤔᤧᤸᤗ᤹ᤀᤣ ᤔᤧᤒᤳᤇᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤥ᤺ᤰᤔᤠ ᤔᤧᤸᤗᤧᤖᤢᤴ॥ 23 ᤐᤡᤵᤔᤡᤖᤡ ᤁᤢᤛᤥ᤺ᤴᤍᤡᤀᤥ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤛᤠᤶᤍᤡᤱ ᤐᤡᤖᤢᤛᤡᤀᤠᤱ ᤘᤕᤧ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ ᤂᤢᤏᤧ᤹ ᤁᤢᤍᤃᤡᤗᤠᤶ ᤗᤠ᤺ᤳᤗᤠ᤺ᤳ ᤆᤥᤃᤢᤛᤡ॥ ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤍᤧᤶᤛᤢᤛᤡᤀᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤈᤣ᤹ ᤀᤡᤛᤪᤠᤀᤡᤗᤗᤠᤶ ᤀᤛ᤻ᤛᤢᤖ ᤔᤧᤍᤣ᤹ᤖᤢᤛᤡ॥ ᤂᤧᤱᤜᤠ᤹ ᤀᤠᤀᤡᤴ ᤌᤠᤖᤡᤰ ᤂᤧᤵᤔᤥᤀᤣ ᤔᤧᤘᤠ᤹ᤖᤥ॥ ᤀᤛ᤻ᤛᤢᤖᤡᤜᤠ᤹ ᤀᤡᤛᤪᤠᤀᤡᤗᤀᤥ ᤔᤧᤕᤢᤱ 24 ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤒᤣᤒᤡᤗᤥᤏ. ᤁᤢᤋᤠ. ᤀᤘᤫᤠ. ᤜᤔᤠᤋ ᤏᤢ ᤛᤐᤷᤒᤣᤔᤗᤠᤶ ᤔᤏᤠᤜᤠ᤹ ᤑᤧᤳᤋᤢᤛᤡᤀᤠᤱ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤘᤠᤀᤥ ᤛᤠᤔᤖᤡᤕᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤕᤢᤰᤂᤢᤛᤡ॥ ᤂᤧᤱᤜᤠ᤹ᤖᤧ ᤛᤠᤔᤖᤡᤕᤠᤴ ᤔᤧᤕᤢᤰᤋᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥᤒᤠ ᤐᤠᤱᤈᤢᤶᤜᤠ᤹ᤀᤥ ᤔᤧᤕᤢᤱᤛᤡᤱ॥ 25 ᤀᤠᤸᤗ ᤂᤧᤱᤜᤠ᤹ ᤋᤃᤡ ᤔᤧᤕᤢᤅᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤂᤢᤴᤇᤡ᤹ ᤔᤠᤱᤛᤧᤘᤠ ᤔᤧᤶᤔᤧᤳᤋᤢᤴ॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤖᤡᤱᤒᤠᤜᤠ᤹ ᤐᤠᤱᤄᤢ ᤋᤠᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤓᤠ ᤔᤏᤠᤜᤠ᤹ ᤔᤧᤛᤧᤖᤢᤛᤡ॥ 26 ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤀᤰᤋᤱᤒᤠ ᤀᤡᤱᤄᤱ ᤔᤧᤜᤠᤰᤋᤢ—“ᤀᤠᤍᤠᤱᤒᤠᤖᤧ ᤗᤠᤈᤣ᤹ᤗᤠᤶ ᤁᤧᤗ᤺ᤳᤋᤢ ᤁᤧᤍᤣ᤹ᤖᤢᤛᤡᤀᤠᤱ ᤁᤧᤒᤠᤱᤄᤢ ᤁᤧᤍᤣᤛᤢᤛᤡᤒᤠ ᤛᤠᤔᤖᤡᤕᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧᤃ ᤂᤧᤴ ᤗᤠᤈᤣ᤹ᤀᤥᤒᤠ ᤔᤠᤱᤅᤡᤴ ᤆᤠᤜᤠ ᤁᤧᤈᤥ᤺ᤰᤐᤠ ᤕᤠ᤺ᤶᤒᤰᤁᤡᤴ ᤔᤧᤸᤗᤧᤛᤢᤴ॥ ᤂᤧᤱᤜᤠ᤹ᤖᤧ ᤁᤴ ᤔᤧᤸᤗᤧᤛᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤖᤡᤱᤒᤠᤜᤠ᤹ ᤐᤠᤱᤄᤢ ᤋᤠᤛᤢᤛᤡᤀᤠᤱ ᤂᤧᤴ ᤔᤏᤠᤜᤠ᤹ ᤔᤧᤛᤧᤖᤢᤛᤡᤖ ᤔᤧᤕᤠᤰ॥” 27 ᤂᤧᤒᤩᤠᤱ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢᤛᤡ—“ᤛᤠᤔᤖᤡᤕᤠᤗᤠᤶ ᤋᤧᤶᤔᤏᤠ ᤑᤧᤵᤔᤏᤠᤒᤠ ᤁᤢᤓᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤌᤡᤰ ᤂᤧᤵᤔᤥ ᤕᤢᤱᤔᤠᤖᤧ ᤗᤠᤃᤡ ᤔᤧᤒᤠᤱᤄᤢ ᤔᤧᤍᤠᤛᤢᤖ. ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤜᤠ᤹ ᤂᤧᤴ ᤗᤠᤈᤣ᤹ᤀᤥᤒᤠ ᤔᤠᤱᤅᤡᤸᤗᤧ ᤁᤢᤎᤡᤶᤜᤠ᤹ ᤜᤢ᤹ᤖᤢᤛᤡᤖ॥” 28 ᤁᤸᤗᤧᤆᤥᤃᤢᤸᤗᤧ ᤛᤠᤔᤖᤡᤕᤠᤗᤠᤶ ᤔᤧᤗ᤺ᤳᤋᤢᤛᤡᤀᤠᤱ ᤘᤣ᤹ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤛᤡᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤌᤡᤰ ᤑᤧᤖᤧᤀᤠᤱ ᤒᤣᤌᤣᤗᤀᤥ ᤕᤢᤱᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤀᤠᤰᤂᤣᤗ᤹ᤖᤡᤰ ᤔᤠᤱᤛᤧᤘᤠ ᤔᤧᤵᤔᤠ ᤐᤥᤱ᤹ ᤑᤠ᤹ᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤜᤢ᤹ᤖᤢᤛᤡ॥ 29 ᤜᤧᤰᤁᤣᤛᤠᤱ ᤛᤢᤘᤠᤱ ᤌᤰᤔᤠᤒᤠ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤔᤧᤕᤢᤅᤧᤒᤠ ᤐᤠᤱᤈᤢᤶᤜᤠ᤹ᤀᤥ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤔᤠᤱᤜᤠ᤹ ᤔᤧᤈᤥᤃᤢᤛᤡ. ᤜᤧᤰᤁᤩᤠᤱ ᤛᤠᤔᤖᤡᤕᤠᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤜᤠ᤹ᤀᤥᤒᤠ ᤔᤠᤱᤎᤠ᤺ᤴᤜᤠ᤹ᤀᤥ ᤂᤢᤴᤇᤡ᤹ ᤔᤠᤱᤜᤠ᤹ ᤔᤧᤕᤢᤰᤂᤢᤛᤡ॥ 30 ᤒᤣᤒᤡᤗᤥᤏᤗᤠᤶ ᤁᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤛᤢᤰᤁᤥᤋ-ᤒᤏᤥᤋᤧᤴ ᤔᤧᤈᤥᤃᤢ. ᤁᤢᤋᤠᤒᤠ ᤔᤏᤠᤜᤠ᤹ᤖᤧ ᤏᤣᤷᤃᤗ ᤏᤢ ᤜᤔᤠᤋᤒᤠ ᤔᤏᤠᤜᤠ᤹ᤖᤧ ᤀᤛᤡᤔᤠᤴ ᤔᤧᤈᤥᤃᤢ. 31 ᤀᤘᤫᤡᤜᤠ᤹ᤖᤧ ᤏᤣᤓᤈ ᤏᤢ ᤋᤷᤋᤠᤰᤁᤧᤴ ᤔᤧᤈᤥᤃᤢ. ᤜᤧᤰᤁᤩᤠᤱ ᤛᤐᤷᤒᤣᤔᤡᤜᤠ᤹ᤖᤧ ᤂᤢᤴᤇᤡ᤹ ᤔᤠᤱ ᤀᤍᤪᤶᤔᤗᤣᤁ ᤏᤢ ᤀᤏᤶᤔᤗᤣᤁᤖᤧ ᤗᤠᤃᤡ ᤂᤢᤴᤇᤡ᤹ ᤀᤠᤵᤑᤣᤰ ᤛᤠᤜᤠ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤔᤡᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤈᤥᤃᤢᤛᤡ॥ 32 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠᤃ ᤔᤧᤔᤧᤳᤋᤢ. ᤜᤧᤰᤁᤣᤛᤠᤱ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤜᤠ᤹ᤀᤥ ᤁᤧᤏᤧᤒᤠ ᤔᤠᤱᤎᤠ᤺ᤴᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤒᤠᤅᤣ ᤂᤢᤴᤇᤡ᤹ ᤛᤢᤘᤠᤱᤗᤠᤶᤔᤠᤱ ᤂᤢᤴᤇᤡ᤹ ᤔᤏᤠᤜᤠ᤹ ᤕᤢᤰᤋᤡᤱ ᤔᤧᤈᤥᤃᤢᤛᤡ॥ 33 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠᤃ ᤔᤧᤔᤧᤳᤋᤢ. ᤁᤖ ᤂᤢᤴᤇᤡ᤹ ᤀᤠᤳᤋᤡᤴ ᤛᤢᤘᤠᤱᤜᤠ᤹ᤗᤠᤶ ᤔᤧᤓᤧᤳᤋᤢᤛᤡᤀᤠᤱ ᤔᤧᤘᤕᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤰᤌᤡᤶ ᤁᤢᤀᤡᤛᤡᤰ ᤔᤧᤘᤕᤧᤀᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡ॥ 34 ᤂᤧᤱᤜᤠ᤹ᤖᤧ ᤋᤃᤡ ᤋᤃᤡᤒᤠ ᤛᤠᤰᤌᤡᤶᤜᤠ᤹ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤣ ᤔᤧᤏᤠ᤺ᤳᤋᤢ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤶᤔᤧᤳᤋᤢᤴ᤹. ᤂᤢᤏᤧ᤹ ᤕᤠᤁᤢᤒᤧᤴ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤐᤡᤖᤢᤛᤡᤒᤠ ᤁᤢᤀᤡᤱᤓᤴ ᤏᤢ ᤁᤢᤎᤡᤶᤜᤠ᤹ᤀᤠᤱ ᤔᤧᤴᤏᤠ᤺ᤳᤋᤢᤴ ᤔᤧᤴᤍᤡᤶᤍᤢᤴ᤹. ᤂᤧᤱᤜᤠ᤹ᤀᤣ ᤂᤢᤏᤧ᤹ ᤀᤡᤛᤪᤠᤀᤡᤗ ᤔᤡᤱ ᤘᤠ᤺ᤳᤋᤢᤛᤡᤀᤠᤱ ᤘᤕᤧ॥ 35 ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢᤛᤡᤀᤠᤱ ᤘᤕᤧ—“ᤘᤣ᤹ ᤀᤠᤳᤋᤡᤴ ᤔᤠᤱᤜᤠ᤹ᤀᤠᤱ ᤂᤡᤏᤡ᤹ ᤔᤠᤱᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹. ᤀᤡᤃᤪ ᤂᤧᤱᤜᤠ᤹ ᤋᤃᤡ ᤂᤡᤏᤡ᤹ ᤛᤠᤒᤴ ᤜᤒᤳ ᤔᤧᤓᤴᤏᤠᤛᤡᤶᤔᤧᤴᤏᤧ᤹. ᤁᤡᤃᤪ ᤂᤧᤱᤜᤠ᤹ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹. ᤀᤡᤃᤪ ᤂᤧᤱᤜᤠ᤹ᤀᤥ ᤛᤡᤍᤢᤱᤈᤓᤠ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥ 36 ᤁᤖ ᤕᤶᤒᤠ ᤔᤢᤰᤛᤠᤶ ᤏᤢ ᤛᤴᤇᤢᤒᤠ ᤁᤢᤜᤢᤰᤗᤠᤶ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤧᤴᤗᤰ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹॥ ᤂᤢᤏᤧ᤹ ᤁᤢᤍᤃᤡᤖᤰ ᤂᤡᤏᤡ᤹ ᤛᤠᤒᤴ ᤜᤵᤐᤧᤳ ᤐᤳᤇᤧᤶᤔᤧ᤹. ᤂᤢᤏᤧ᤹ᤀᤥᤖᤰ ᤂᤡᤏᤡ᤹ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ 37 ᤂᤡᤏᤡ᤹ ᤗᤠᤃᤡ ᤂᤢᤏᤧ᤹ ᤛᤠᤵᤋᤢᤒᤠ ᤀᤡᤱᤓ᤺ᤴᤜᤠ᤹. ᤛᤠᤰᤌᤡᤶᤜᤠ᤹. ᤛᤠᤶᤕᤥᤌᤡᤶᤜᤠ᤹ ᤏᤢ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤆᤰᤔᤧᤸᤗ᤹ᤀᤣ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ ᤘᤣ᤹ ᤔᤠᤱᤜᤠ᤹ ᤂᤡᤏᤡ᤹ ᤔᤠᤱᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹॥ 38 ᤀᤠᤱᤃᤠ᤹ ᤂᤡᤏᤡ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤘᤣ᤹ ᤔᤠᤱᤜᤠ᤹ ᤂᤡᤏᤡ᤹ ᤔᤠᤱᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹॥ 39 ᤐᤖᤢᤔᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹॥ ᤂᤢᤏᤧ᤹ᤀᤣ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤂᤡᤏᤡ᤹ ᤁᤧᤛᤧ᤺ᤵᤋᤡ᤹॥” 40 ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤂᤧᤶᤔᤠ ᤔᤧᤴᤍᤧᤴᤍᤧᤴ. ᤜᤧᤰᤁᤩᤠᤱ ᤂᤢᤴᤇᤡ᤹ ᤋᤃᤡᤒᤠ ᤕᤧᤵᤗᤧᤰᤜᤠ᤹ ᤆᤰᤔᤧᤸᤗ᤹ᤀᤣ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤔᤧᤒᤳᤇᤧ॥ 41 ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤀᤠᤱ ᤛᤧᤘᤠ ᤔᤧᤔᤧᤳᤋᤢᤛᤡ॥ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤀᤣᤜᤠ᤹ ᤏᤢ ᤔᤧᤴᤇᤠ᤹ᤜᤠ᤹ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤗᤧᤰᤜᤠ᤹ᤀᤥ ᤗᤠᤱᤔᤧᤄᤣ᤺ᤰᤗ ᤔᤧᤘᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.