᥈ ᤜᤠᤱ 16 - LIFOTNT

ᤕᤜᤢᤍᤠᤒᤠ ᤜᤠᤱ ᤀᤠᤜᤠᤈ

¹ ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶ ᤌᤡᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤕᤥᤋᤠᤔᤖᤧ ᤁᤢᤛ᤻ᤛᤠ ᤀᤠᤜᤠᤈᤖᤧ ᤕᤜᤢᤍᤠᤀᤥ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥

² ᤀᤠᤸᤗ ᤀᤠᤜᤠᤈᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱ ᤋᤱᤒᤣ ᤁᤧᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤴᤎᤧᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤂᤧᤴ ᤔᤧᤈᤥᤃᤢᤴ॥

³ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤔᤧᤏᤠ᤺ᤳᤋᤢᤒᤠ ᤗᤠᤶᤔᤥ ᤂᤢᤏᤧ᤹ ᤗᤠᤱᤄᤣᤃᤧ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤗ᤺ᤳᤋᤢᤍᤣᤛᤢᤛᤡᤀᤠᤱ ᤔᤧᤘᤕᤧᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤧᤗᤧ᤺ᤱᤒᤠ ᤕᤧᤵᤗᤧᤰᤜᤠ᤹ᤀᤥ ᤗᤠᤱᤄᤣᤃᤧᤀᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤛ᤻ᤛᤠᤴᤏᤠᤱ ᤔᤡᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥

⁴ ᤂᤢᤏᤧ᤹ ᤁᤣ᤺ᤶᤒ ᤁᤣ᤺ᤶᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥ ᤏᤢ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤜᤧᤰᤁᤩᤠᤱ ᤁᤧᤖᤧᤰ ᤜᤢᤶᤒᤧᤵᤐᤠ ᤛᤡᤱᤒᤢᤱ ᤛᤡᤃᤠᤱ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢᤀᤠᤱ ᤛᤢᤰᤐᤠ ᤜᤠ᤺ᤴᤍᤢ॥

⁵ ᤂᤧᤒᤩᤠᤱ ᤀᤖᤠᤔᤒᤠ ᤜᤠᤱ ᤖᤛᤡᤏ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱ ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤸᤗᤧ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥᤃᤧᤛᤢᤀᤠᤱ ᤁᤡᤷᤃᤵ ᤁᤒᤧᤛᤢ. ᤁᤖ ᤀᤠᤜᤠᤈᤧᤴ ᤂᤢᤴᤇᤡ᤹ ᤏᤠ᤺ᤶᤔᤠ ᤔᤧᤛᤢᤰᤋᤧᤛᤢᤴ॥

⁶ ᤂᤧᤴ ᤕᤧᤶᤔᤥ ᤀᤠᤖᤠᤔᤒᤠ ᤜᤠᤱ ᤖᤛᤡᤏᤖᤧ ᤕᤜᤢᤍᤠᤒᤠ ᤔᤏᤠᤜᤠ᤹ ᤏᤠ᤺ᤳᤋᤢᤍᤣᤛᤢᤛᤡᤀᤠᤱ ᤀᤣᤗᤠᤋᤧᤴ ᤀᤠᤖᤠᤔᤖᤧ ᤁᤢᤗᤠᤃᤡ ᤕᤠᤶᤔᤥ ᤜᤢᤰᤁᤠᤵ ᤆᤥᤃᤢ॥ ᤂᤧᤒᤩᤠᤱ ᤀᤣᤍᤥᤔᤡᤜᤠ᤹ ᤀᤣᤗᤠᤋᤀᤥ ᤔᤧᤗᤠᤛᤧ. ᤜᤧᤰᤁᤩᤠᤱ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤂᤧᤵᤔᤥ ᤔᤧᤕᤢᤱ॥

⁷ ᤀᤠᤜᤠᤈᤖᤧ ᤀᤛ᤻ᤛᤢᤖᤒᤠ ᤜᤠᤱ ᤋᤡᤃ᤻ᤗᤋ-ᤐᤡᤗᤣᤛᤣᤖᤀᤥ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡ. “ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤏᤢ ᤀᤠᤍᤠᤱᤒᤠᤖᤧ ᤁᤧᤕᤢᤰᤁᤥᤒᤠ ᤁᤧᤛᤧᤘᤠᤖᤥᤒᤠᤀᤠᤖᤥ॥ ᤀᤠᤱᤃᤠ᤹ ᤌᤱᤅᤥ ᤁᤧᤓᤵᤐᤠ ᤀᤖᤠᤔᤒᤠ ᤜᤠᤱᤅᤡᤴ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴᤗᤠᤶ ᤀᤠᤍᤠᤱᤒᤠ ᤑᤧᤖᤧ᤹ᤀᤠᤱ ᤛᤧ᤺ᤵᤋᤠᤱᤅᤧ᤹ᤀᤥ॥”

⁸ ᤂᤶᤓᤩᤠᤱ ᤀᤠᤜᤠᤈᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤜᤠᤱᤜᤡᤶᤔᤥᤒᤠ ᤌᤠ᤺ᤱᤜᤠ᤹ᤀᤥ ᤂᤥᤛᤢᤒᤠ ᤛᤠᤶᤔᤩᤠᤱ ᤕᤢᤵᤐᤠᤜᤠ᤹ ᤕᤠᤱᤛᤡᤱᤅᤠᤱ ᤜᤢᤰᤘᤠ ᤁᤢᤀᤡᤛᤡᤰ ᤀᤛ᤻ᤛᤢᤖᤒᤠ ᤜᤠᤱᤅᤧ᤹ᤀᤥ ᤜᤠᤅᤢᤍᤣᤛᤢ॥

⁹ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤂᤧᤵᤛᤢ. ᤜᤧᤰᤁᤩᤠᤱ ᤍᤔᤛ᤻ᤁᤛᤧᤴ ᤌᤱᤅᤥ ᤑᤳᤋᤢᤀᤠᤱ ᤂᤢᤏᤧ᤹ ᤂᤧᤴ ᤜᤢᤰᤁᤠᤵ ᤆᤥᤃᤢ॥ ᤂᤢᤏᤧ᤹ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤗ᤺ᤳᤋᤢᤛᤡᤀᤠᤱ ᤁᤡᤖᤀᤥ ᤋᤧᤶᤛᤢᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤖᤛᤡᤏᤧᤴ ᤛᤧᤖᤢ॥

¹⁰ ᤂᤧᤒᤩᤠᤱ ᤀᤠᤜᤠᤈ ᤜᤠᤱᤅᤡᤴ ᤀᤛ᤻ᤛᤢᤖᤒᤠ ᤜᤠᤱ ᤋᤡᤃ᤻ᤗᤋ-ᤐᤡᤗᤣᤛᤣᤖᤧᤴᤏᤢ ᤋᤢᤶᤛᤧ ᤍᤔᤛ᤻ᤁᤛ ᤐᤣ॥ ᤂᤢᤏᤧ᤹ ᤍᤔᤛ᤻ᤁᤛᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤏᤡᤛᤢ. ᤜᤧᤰᤁᤩᤠᤱ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤧᤖᤧᤰ ᤁᤢᤈᤥ᤺ᤱᤀᤡᤳᤋᤧᤴ ᤏᤢ ᤆᤠᤜᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤢᤖᤡᤕᤠᤜᤀᤥ ᤜᤠᤅᤢᤍᤣᤛᤢ॥

¹¹ ᤁᤸᤗᤧᤆᤥᤃᤢᤸᤗᤧ ᤀᤠᤜᤠᤈ ᤜᤠᤱᤅᤡᤸᤗᤧ ᤍᤔᤛ᤻ᤁᤛᤗᤠᤶ ᤜᤠᤅᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤧᤖᤧᤰ ᤁᤢᤈᤥᤱ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤢᤖᤡᤕᤠᤜ᤺ᤸᤗᤧ ᤜᤠᤱᤅᤡᤴ ᤏᤢ᤺ᤱᤔᤠ ᤑᤧᤶᤔᤠᤏᤢ᤺ᤸᤗᤧ ᤋᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢᤛᤢᤖᤢ॥

¹² ᤀᤠᤸᤗ ᤜᤠᤱᤅᤡᤴ ᤍᤔᤛ᤻ᤁᤛᤗᤠᤶ ᤏᤢ᤺ᤰᤂᤧ ᤑᤧᤖᤧᤸᤗᤧ ᤂᤢᤏᤧ᤹ ᤂᤧᤴ ᤏᤡᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤣᤛᤠᤱ ᤐᤣᤀᤠᤱ ᤂᤧᤵᤔᤥ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ॥

¹³ ᤂᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤴ ᤜᤢᤰᤂᤢᤀᤠᤱ ᤋᤱᤈᤢᤶ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤛᤶᤎᤠᤱ ᤛᤠᤰᤂᤢ॥

¹⁴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤕᤢᤱᤒᤠ ᤁᤠᤛᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤂᤧᤴ ᤁᤢᤛᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤏᤢ ᤔᤠᤱᤜᤡᤶᤔᤧᤸᤗᤧ ᤁᤢᤗᤢᤶᤔᤥ ᤕᤢᤅᤧ ᤜᤧᤰᤁᤩᤠᤱ ᤀᤠᤜᤠᤈᤖᤧ ᤂᤧᤴ ᤁᤠᤛᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤁᤢᤛᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤌᤥᤜᤠᤱ ᤗᤧᤵᤔᤠᤱ ᤕᤢᤰᤂᤢ॥

¹⁵ ᤂᤧᤴ ᤀᤣᤃᤠᤱ ᤀᤠᤜᤠᤈ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤢᤖᤡᤕᤠᤜ᤺ᤴ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢ—“ᤁᤴ ᤕᤶᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤠᤏᤠᤶ ᤋᤥ᤺ᤶᤔᤠ ᤁᤧᤒᤥᤱᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤕᤢ᤺ᤴᤎᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤐᤥᤃᤢᤃᤧᤴ ᤛᤡᤍᤢᤱᤈᤓᤠ᤺ᤴ. ᤜᤠᤱᤅᤡᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤁᤢᤛᤡᤍᤢᤱᤈᤓᤠ ᤏᤢ ᤂᤢᤏᤧ᤹ ᤐᤥᤃᤢᤃᤧᤴ ᤁᤢᤈᤠ ᤁᤢᤛᤡᤍᤢᤱᤈᤓᤠ᤺ᤴ. ᤜᤧᤰᤁᤩᤠᤱ ᤗᤠᤈᤣ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤂᤢᤴᤇᤡ᤹ ᤛᤡᤍᤢᤱᤈᤓᤠ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤂᤶᤓᤩᤠᤱ ᤆᤧᤸᤗᤧᤰᤛᤣ᤹ ᤌᤡ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤧ᤹॥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤔᤠᤰᤂᤡ᤹ᤜᤠ᤹ ᤛᤠᤰᤂᤧ᤹॥ ᤁᤖ ᤁᤠᤛᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤀᤠᤱᤃᤠ᤹ ᤌᤢᤶᤕᤠ ᤀᤡᤔᤠᤖᤧ ᤗᤠᤃᤡ ᤀᤥᤃᤵ ᤆᤥᤃᤢᤱ᤹॥”

¹⁶ ᤀᤠᤜᤠᤈ ᤜᤠᤱᤅᤡᤸᤗᤧ ᤔᤢᤖᤠᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤢᤖᤡᤕᤠᤜ᤺ᤸᤗᤧ ᤆᤥᤃᤢ॥

¹⁷ ᤀᤠᤜᤠᤈ ᤜᤠᤱᤅᤡᤸᤗᤧ ᤆᤶᤔᤏᤠ ᤀᤢ᤺ᤱᤔᤏᤠᤒᤠ ᤗᤠᤎᤠᤜᤠ᤹ᤀᤥᤗᤠᤶ ᤂᤧᤸᤗᤧ ᤁᤢᤃᤒᤪᤡᤱ ᤁᤧᤒᤵᤐᤠ ᤁᤢᤕᤠᤶᤗᤧᤱᤒᤠᤜᤠ᤹ ᤏᤢ ᤇᤧ᤺ᤱᤃᤩᤠᤜᤠ᤹ ᤂᤧᤳᤋᤢᤍᤣᤛᤢ॥ ᤂᤢᤏᤧ᤹ ᤐᤕᤶ ᤕᤶᤒᤠ ᤑᤛᤡᤴ ᤁᤧᤍᤰᤐᤠᤀᤠᤱ ᤁᤧᤕᤧᤵᤐᤠ ᤁᤠᤛᤠ ᤛᤧᤃᤶᤒᤠᤜᤠ᤹ ᤛᤶᤎᤠᤱᤗᤠᤶ ᤗ᤺ᤳᤋᤢᤀᤠᤱ ᤗᤢᤱ ᤁᤢᤕᤢᤰᤏᤠᤀᤥ ᤕᤢᤰᤂᤢ॥

¹⁸ ᤂᤢᤏᤧ᤹ ᤛᤒᤠᤌᤀᤥ ᤀᤥᤃᤵ ᤆᤥ᤺ᤰᤔᤏᤠᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤈᤥᤃᤢᤀᤠᤱ ᤘᤕᤧᤒᤠ ᤏᤠᤶᤎᤣ᤺ᤰᤔᤧᤴ ᤋᤣ᤹ᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠᤔᤠ ᤐᤡᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤗᤠ᤺ᤰᤁᤠᤳ ᤁᤧᤕᤧᤵᤐᤠ ᤜᤠᤱ ᤗᤠᤶᤎᤣ᤺ᤳᤋᤡᤴ ᤂᤢᤏᤧ᤹ ᤂᤧᤳᤋᤢᤍᤣᤛᤢ॥

¹⁹ ᤀᤠᤜᤠᤈᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤴᤏᤠᤱᤒᤡ᥅

²⁰ ᤀᤠᤜᤠᤈᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤂᤧᤱᤜᤠ᤹ᤏᤢ ᤛᤥᤖᤡᤰ ᤂᤢᤏᤧ᤹ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤜᤡᤈᤁᤡᤕᤠᤴ ᤜᤠᤱ ᤐᤥ᤺ᤰᤂᤧᤖᤥ॥