᥈ ᤜᤠᤱ 15 - LIFOTNTᤕᤜᤢᤍᤠᤒᤠ ᤜᤠᤱ ᤀᤈᤷᤕᤠᤜ ( ᥈ ᤛᤠᤵᤔᤢ ᥈᥌:᥇-᥈᥉ ) 1 ᤀᤡᤛᤪᤠᤀᤡᤗᤒᤠ ᤜᤠᤱ ᤕᤠᤖᤥᤒᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜᤖᤧ ᤁᤢᤛ᤻ᤛᤠ ᤀᤈᤷᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥ 2 ᤀᤠᤸᤗ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧᤸᤗᤧ ᤂᤧᤴ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤅᤠᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤕᤁᤥᤗᤩᤠᤜ ᤘᤕᤧ॥ ᤂᤧᤴ ᤕᤖᤢᤛᤗᤧᤔ ᤁᤧᤕᤢᤱᤔᤠ ᤘᤕᤧ॥ 3 ᤂᤢᤏᤧ᤹ ᤁᤢᤶᤒᤠ ᤀᤔᤛᤩᤠᤜᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤌᤣ᤺ᤴ ᤏᤢᤒᤠ ᤆᤥᤃᤧ ᤀᤠᤶᤓᤠ ᤂᤧᤴᤏᤣ ᤆᤥᤃᤢ॥ 4 ᤜᤧᤰᤁᤣᤛᤠᤱ ᤁᤣ᤺ᤶᤒ ᤁᤣ᤺ᤶᤒᤠ ᤆᤴᤈᤶᤒᤠᤍᤧᤴᤜᤠ᤹ ᤔᤧᤄᤧᤳᤋᤢᤴ ᤔᤧᤍᤣᤛᤢᤴ॥ ᤔᤏᤠᤜᤠ᤹ᤖᤧ ᤀᤠᤸᤗᤛᤠᤱ ᤂᤧᤵᤔᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤢ ᤛᤢᤰᤐᤠ ᤜᤠ᤺ᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤅᤡᤴ ᤛᤡᤔᤠᤗᤡᤱᤍᤥ ᤁᤧᤖᤧᤖ ᤕᤠᤖᤡᤰ ᤀᤠᤗᤡ᤺ᤰᤗᤡ᤺ᤰᤐᤠ ᤜᤥᤖᤡᤰᤐᤠ ᤋᤢᤰᤔᤧᤸᤗᤧ ᤁᤢᤜᤡᤱᤜᤡᤱ ᤌᤠᤖᤡᤰ ᤋᤖᤢᤖ ᤕᤠ᤺ᤴᤍᤢ. ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶ ᤗᤠ᤺ᤳᤗᤠ᤺ᤳ ᤀᤣ᤺ᤰ ᤕᤢᤅᤧᤃᤖᤧ॥ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤕᤥᤋᤠᤔᤧᤸᤗᤧᤀᤣ ᤜᤠᤱᤜᤡᤶᤔᤡᤴ ᤀᤥᤔᤧᤵᤔᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤕᤧ ᤜᤧᤰᤁᤩᤠᤱ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤛᤶᤎᤠᤱ ᤕᤢᤰ ᤆᤥᤃᤢ॥ 6 ᤀᤈᤷᤕᤠᤜᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤰᤍᤥ᤺ᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤴᤏᤠᤱᤒᤡ᥅ 7 ᤀᤈᤷᤕᤠᤜᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤕᤥᤋᤠᤔᤧᤴ ᤜᤠᤱ ᤐᤥ᤺ᤰᤂᤧᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤈᤁᤖᤡᤕᤠ 8 ᤕᤜᤢᤍᤠᤒᤠ ᤜᤠᤱ ᤀᤈᤷᤕᤠᤜᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤕᤠᤖᤥᤒᤠᤔᤖᤧ ᤁᤢᤛ᤻ᤛᤠ ᤈᤁᤖᤡᤕᤠᤴ ᤛᤠᤔᤖᤡᤕᤠᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤗᤠ ᤋᤢᤰᤛᤡ ᤜᤠᤱᤕᤢᤰ ᤆᤥᤃᤢ॥ 9 ᤂᤢᤏᤧ᤹ ᤁᤢᤶᤒᤠ ᤁᤢᤴᤎᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥ ᤀᤡᤛᤪᤠᤀᤡᤗᤧᤴ ᤆᤥᤰ ᤐᤠᤱᤄᤢᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤗᤠᤕᤥᤜᤠ᤹ᤗᤠᤶ ᤂᤢᤏᤧ᤹ ᤔᤧᤏᤢ᤺ᤰᤂᤧᤴ॥ 10 ᤕᤠᤒᤣᤛᤖᤧ ᤁᤢᤛ᤻ᤛᤠ ᤛᤸᤗᤢᤔᤖᤧ ᤈᤁᤖᤡᤕᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤆᤥᤃᤢ॥ ᤛᤸᤗᤢᤔᤖᤧ ᤂᤧᤴ ᤔᤏᤠᤜᤠ᤹ᤖᤧᤀᤣ ᤂᤢᤴᤇᤡ᤹ ᤋᤃᤡ ᤛᤠᤵᤑ ᤑᤳᤋᤢᤀᤠᤱ ᤛᤧᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤣᤃᤠᤱ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧ॥ 11 ᤈᤁᤖᤡᤕᤠ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥ 12 ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤕᤣᤜᤢᤴ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧ—“ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤗᤡᤛᤡᤃᤣᤰᤐᤠ ᤌᤠ᤺ᤰ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤔᤧᤕᤢᤱᤗᤥ॥” ᤀᤡᤛᤪᤠᤀᤡᤗᤒᤠ ᤜᤠᤱ ᤛᤸᤗᤢᤔ 13 ᤕᤜᤢᤍᤠᤒᤠ ᤜᤠᤱ ᤀᤈᤷᤕᤠᤜ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶ ᤛᤢᤶᤒᤥᤱᤅᤠᤱ ᤑᤠᤱᤛᤡ ᤋᤱᤒᤣᤀᤥ ᤕᤠᤒᤣᤛᤖᤧ ᤁᤢᤛ᤻ᤛᤠ ᤛᤸᤗᤢᤔᤧᤴ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤔᤖᤡᤕᤠᤀᤥ ᤗᤠᤎᤡᤰ ᤜᤠᤱᤕᤢᤰ ᤆᤥᤃᤢ॥ 14 ᤂᤧᤴ ᤀᤣᤃᤠᤱ ᤃᤍᤡᤖᤧ ᤁᤢᤛ᤻ᤛᤠ ᤔᤏᤜᤣᤔᤧᤴ ᤋᤡᤷᤛᤠᤗᤠᤶ ᤛᤠᤔᤖᤡᤕᤠᤀᤥ ᤌᤥ ᤌᤥ᤺ᤰᤛᤡᤱ॥ ᤂᤧᤸᤗᤧ ᤛᤠᤔᤖᤡᤕᤠᤀᤥ ᤕᤠᤒᤣᤛᤖᤧ ᤁᤢᤛ᤻ᤛᤠ ᤛᤸᤗᤢᤔᤧᤴ ᤑᤳᤋᤢ. ᤜᤧᤰᤁᤩᤠᤱ ᤂᤧᤴ ᤛᤧᤖᤢᤀᤠᤱ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧ॥ 15 ᤛᤸᤗᤢᤔᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤆᤧᤶᤓ᤺ᤴᤜᤠ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥ 16 ᤀᤠᤶᤓᤠ ᤂᤧᤴ ᤕᤧᤶᤔᤥ ᤔᤏᤜᤣᤔᤖᤧ ᤋᤡᤷᤛᤠᤗᤠᤶ ᤜᤣ᤺ᤰᤋᤢᤀᤠᤱ ᤋᤡᤑᤛᤠ ᤏᤢ ᤂᤧᤸᤗᤧ ᤁᤢᤕᤠᤁᤢᤕᤠᤒᤠ ᤁᤧᤖᤧᤰ ᤌᤱᤅᤥ ᤑᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤗᤠᤃᤡ ᤗᤠᤶᤎᤣ᤺ᤳᤜᤠ᤹ ᤜᤶᤔᤠ ᤔᤧᤴᤍᤧᤴᤍᤧᤴ॥ ᤂᤢᤏᤧ᤹ ᤋᤡᤑᤛᤠᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤩᤧᤖᤢᤛᤡ. ᤜᤧᤰᤁᤩᤠᤱ ᤁᤢᤛ᤻ᤛᤠ ᤁᤧᤕᤠᤰᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤐᤥ᤺ᤰᤁᤡᤴ ᤆᤡᤖᤢ ᤐᤡᤖᤢᤛᤡᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤔᤏᤜᤣᤔ 17 ᤕᤜᤢᤍᤠᤒᤠ ᤜᤠᤱ ᤀᤈᤷᤕᤠᤜᤖᤧ ᤁᤢᤜᤠᤱᤕᤢᤰ ᤕᤧᤶ ᤛᤢᤶᤒᤥᤱᤅᤠᤱ ᤑᤠᤱᤛᤡ ᤋᤱᤒᤣᤀᤥ ᤃᤍᤡᤖᤧ ᤁᤢᤛ᤻ᤛᤠ ᤔᤏᤜᤣᤔᤧᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤔᤖᤡᤕᤠᤀᤥ ᤋᤱᤒᤣ ᤌᤡᤒᤥᤱ ᤜᤠᤱᤕᤢᤰ ᤆᤥᤃᤢ॥ 18 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥ ᤀᤡᤛᤪᤠᤀᤡᤗᤧᤴ ᤆᤥᤰ ᤐᤠᤱᤄᤢᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤗᤠᤕᤥᤜᤠ᤹ᤗᤠᤶ ᤁᤢᤜᤠᤱᤕᤢᤰ ᤕᤧᤶ ᤂᤠᤖᤠᤰ ᤂᤢᤏᤧ᤹ ᤔᤧᤏᤢ᤺ᤰᤂᤧᤴ॥ 19 ᤂᤧᤒᤩᤠᤱ ᤀᤛ᤻ᤛᤢᤖᤒᤠ ᤜᤠᤱ ᤐᤢᤗᤖᤧ ᤗᤠᤈᤣᤴ ᤌᤱᤅᤥ ᤑᤳᤋᤢ. ᤜᤧᤰᤁᤩᤠᤱ ᤜᤠᤱᤈᤢᤶᤔᤥ ᤂᤢᤏᤧ᤹ ᤁᤢᤜᤠᤱᤕᤢᤰᤁᤡᤴ ᤁᤧᤎᤢᤶᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤔᤏᤜᤣᤔᤖᤧ ᤐᤢᤗᤧᤴ ᤛᤢᤶᤒᤥᤱᤅᤠᤱ ᤗᤡᤛᤡ ᤜᤧᤴᤇᤡᤱ ᤁᤡᤗᤥᤃᤪᤠᤔ ᤕᤢᤵᤐᤠ ᤐᤡᤖᤢ॥ 20 ᤔᤏᤜᤣᤔᤖᤧ ᤀᤡᤛᤪᤠᤀᤡᤗᤗᤠᤶ ᤁᤴ ᤕᤠᤱᤜᤠ᤹ ᤛᤠᤰᤁᤧᤸᤗᤧᤰ ᤗ᤺ᤵᤔᤠ ᤐᤠᤱᤄᤢᤛᤡ॥ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤜᤠ᤹ᤖᤧ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤅᤠᤒᤥᤱ ᤛᤣᤁᤣᤗ ᤕᤢᤵᤐᤠ ᤐᤡᤔᤠ ᤁᤧᤒᤥᤱᤒᤠ ᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤏᤢ᤺ᤰᤂᤧᤀᤠᤱ ᤂᤧᤴ ᤗᤠᤈᤣ᤹ᤀᤥ ᤔᤧᤕᤢᤅᤧᤴ॥ 21 ᤔᤏᤜᤣᤔᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤴᤏᤠᤱᤒᤡ᥅ 22 ᤔᤏᤜᤣᤔᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤁᤢᤛ᤻ᤛᤠ ᤐᤁᤜᤡᤕᤠᤴ ᤂᤢᤏᤧ᤹ ᤁᤢᤀᤣᤃᤠᤱ ᤜᤠᤱ ᤐᤥ᤺ᤰᤂᤧᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤁᤜᤡᤕᤠ 23 ᤕᤜᤢᤍᤠᤒᤠ ᤜᤠᤱ ᤀᤈᤷᤕᤠᤜ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶ ᤅᤠᤒᤥᤱᤃᤣᤰᤐᤠ ᤋᤱᤒᤣᤀᤥ ᤔᤏᤜᤣᤔᤖᤧ ᤁᤢᤛ᤻ᤛᤠ ᤐᤁᤜᤡᤕᤠᤴ ᤛᤠᤔᤖᤡᤕᤠᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤋᤱᤒᤣ ᤏᤧᤳᤇᤡ ᤜᤠᤱᤕᤢᤰ ᤆᤥᤃᤢ॥ 24 ᤐᤁᤜᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥ ᤀᤡᤛᤪᤠᤀᤡᤗᤧᤴ ᤆᤥᤰ ᤐᤠᤱᤄᤢᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤗᤠᤕᤥᤜᤠ᤹ᤗᤠᤶ ᤂᤢᤏᤧ᤹ ᤔᤧᤏᤢ᤺ᤰᤂᤧᤴ॥ 25 ᤂᤢᤏᤧ᤹ ᤋᤢᤶ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥᤒᤠ ᤌᤡᤰᤐᤠ. ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤸᤗᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤆᤥᤃᤢ॥ ᤃᤡᤗᤠᤍᤒᤠ ᤅᤠᤒᤥᤱ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤛᤥᤖᤡᤰ ᤋᤣ᤹ᤖᤢᤛᤡ ᤜᤧᤰᤁᤩᤠᤱ ᤛᤠᤔᤖᤡᤕᤠᤒᤠ ᤜᤠᤱᤜᤡᤶ ᤕᤰᤁᤥ ᤗᤠᤛᤧᤀᤠᤱ ᤐᤣᤁᤜ᤺ᤸᤗᤧ ᤐᤁᤜᤡᤕᤠᤴ ᤏᤢ ᤀᤷᤃᤥᤒᤧᤴ ᤜᤧᤰᤁᤩᤠᤱ ᤀᤖᤡᤜᤕᤠ᤺ᤴᤏᤠᤱ ᤛᤧᤖᤢᤛᤡ॥ ᤁᤶᤓᤗ᤹ᤖᤡᤰ ᤐᤣᤁᤜ᤺ᤸᤗᤧ ᤐᤁᤜᤡᤕᤠᤴ ᤛᤧᤖᤢᤀᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧ॥ 26 ᤐᤁᤜᤡᤕᤠ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳᤗᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤣᤁᤜ 27 ᤕᤜᤢᤍᤠᤒᤠ ᤜᤠᤱ ᤀᤈᤷᤕᤠᤜᤖᤧ ᤁᤢᤜᤠᤱᤕᤢᤰ ᤕᤧᤶ ᤅᤠᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤴ ᤛᤠᤔᤖᤡᤕᤠᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤒᤥᤱ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 28 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤀᤠᤶᤓᤠ ᤂᤧᤴᤏᤣ ᤆᤥᤃᤢ॥ ᤀᤡᤛᤪᤠᤀᤡᤗᤧᤴ ᤆᤥᤰ ᤐᤠᤱᤄᤢᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤗᤠᤕᤥᤜᤠ᤹ᤗᤠᤶ ᤂᤢᤏᤧ᤹ ᤔᤧᤏᤢ᤺ᤰᤂᤧᤴ॥ 29 ᤀᤡᤛᤪᤠᤀᤡᤗᤒᤠ ᤜᤠᤱ ᤐᤣᤁᤜ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥ ᤀᤛ᤻ᤛᤢᤖᤒᤠ ᤜᤠᤱ ᤋᤡᤃ᤻ᤗᤋ-ᤐᤡᤗᤣᤛᤧᤴ ᤑᤧᤖᤧᤀᤠᤱ ᤀᤡᤕᤥᤏ. ᤜᤠᤒᤡᤗ-ᤒᤣᤌ-ᤔᤠᤁᤠ. ᤕᤠᤏᤥᤜ. ᤁᤣᤍᤣᤛ ᤏᤢ ᤜᤠᤛᤥᤖᤧᤴ ᤜᤢᤰᤁᤠᤵ ᤆᤥᤃᤢ॥ ᤂᤢᤏᤧ᤹ ᤃᤡᤗᤠᤍ ᤏᤢ ᤃᤠᤗᤡᤗ ᤏᤵᤋᤠᤗᤡᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤠᤱ ᤜᤢᤰᤁᤠᤵ ᤆᤥᤃᤢ. ᤜᤧᤰᤁᤩᤠᤱ ᤔᤏᤠᤜᤠ᤹ ᤀᤛ᤻ᤛᤢᤖ ᤗᤠᤈᤣ᤹ᤀᤥ ᤋᤧᤶᤛᤢᤍᤣ᤹ᤖᤢᤛᤡ॥ 30 ᤂᤧᤒᤩᤠᤱ ᤀᤣᤗᤠᤜᤖᤧ ᤁᤢᤛ᤻ᤛᤠ ᤜᤥᤛᤡᤕᤠᤜ᤺ᤸᤗᤧ ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤆᤥᤃᤢ॥ ᤜᤥᤛᤡᤕᤠᤜ᤺ᤸᤗᤧ ᤋᤠᤵᤑᤧ᤺ᤶᤒᤠ ᤐᤠᤴ ᤀᤡᤛᤢᤀᤠᤱ ᤂᤧᤴ ᤛᤧᤖᤢ. ᤜᤧᤰᤁᤩᤠᤱ ᤀᤈᤷᤕᤠᤜᤖᤧ ᤁᤢᤛ᤻ᤛᤠ ᤕᤥᤋᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱᤃᤣᤰᤐᤠ ᤋᤱᤒᤣᤀᤥ ᤂᤧᤸᤗᤧ ᤁᤢᤀᤣᤃᤠᤱ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧ॥ 31 ᤐᤣᤁᤜᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤂᤰᤐᤧᤳ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ ᤕᤜᤢᤍᤠᤒᤠ ᤜᤠᤱ ᤕᤥᤋᤠᤔ ( ᥈ ᤛᤠᤵᤔᤢ ᥈᥍:᥇-᥏ ) 32 ᤀᤡᤛᤪᤠᤀᤡᤗᤒᤠ ᤜᤠᤱ ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠᤒᤠ ᤜᤠᤱ ᤀᤈᤷᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤥᤋᤠᤔᤖᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥ 33 ᤀᤠᤸᤗ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤕᤖᤢᤛᤠ ᤘᤕᤧ ᤂᤧᤴ ᤛᤠᤍᤥᤁᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 34 ᤂᤢᤏᤧ᤹ ᤁᤢᤶᤒᤠ ᤀᤈᤷᤕᤠᤜ᤺ᤸᤗᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤕᤥᤋᤠᤔᤖᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥ 35 ᤜᤧᤰᤁᤣᤛᤠᤱ ᤁᤥ᤺ᤰᤔᤠᤒᤠ ᤔᤠᤱᤎᤠ᤺ᤴᤜᤠ᤹ ᤔᤧᤄᤧᤳᤋᤢᤴ ᤔᤧᤍᤣᤛᤢᤴ॥ ᤔᤏᤠᤜᤠ᤹ᤖᤧ ᤂᤧᤵᤔᤥ ᤀᤠᤸᤗᤛᤠᤱ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤢ ᤛᤢᤰᤐᤠ ᤜᤠ᤺ᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤔᤧᤘᤕᤧ॥ ᤂᤢᤏᤧ᤹ᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤌᤥᤛᤔᤠ ᤗᤠᤶᤎᤣ᤺ᤳᤋᤡᤴ ᤆᤥᤃᤢ॥ 36 ᤕᤥᤋᤠᤔᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤱᤏᤠᤱᤒᤡ᥅ 37 (ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤖᤠᤔᤒᤠ ᤜᤠᤱ ᤖᤛᤡᤏ ᤏᤢ ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤴ ᤕᤜᤢᤍᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤥᤱᤔᤠ ᤜᤣ᤺ᤰᤋᤢᤛᤡ॥) 38 ᤕᤥᤋᤠᤔᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤴᤎᤧᤒᤠ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤛᤥᤖᤡᤰ ᤔᤧᤈᤡᤰᤂᤢ॥ ᤂᤶᤓᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤠᤜᤠᤈᤧᤴ ᤜᤠᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.