᥈ ᤜᤠᤱ 14 - LIFOTNTᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜ ( ᥈ ᤛᤠᤵᤔᤢ ᥈᥋:᥇-᥈᥊ ) 1 ᤀᤡᤛᤪᤠᤀᤡᤗᤒᤠ ᤜᤠᤱ ᤕᤜᤥᤀᤠᤜᤠᤈᤖᤧ ᤁᤢᤛ᤻ᤛᤠ ᤕᤣᤜᤥᤀᤠᤛᤖᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠᤒᤠ ᤜᤠᤱ ᤕᤥᤀᤠᤛᤖᤧ ᤁᤢᤛ᤻ᤛᤠ ᤀᤔᤛᤩᤠᤜᤖᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥ 2 ᤀᤠᤸᤗ ᤂᤢᤏᤧ᤹ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤏᤡᤒᤥᤱᤅᤠᤱ ᤑᤠᤱᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤕᤜᤥᤀᤍᤡᤏ ᤘᤕᤧ॥ ᤂᤢᤏᤧ᤹ ᤕᤖᤢᤛᤗᤧᤔ ᤁᤧᤕᤢᤱᤔᤠ ᤘᤕᤧ॥ 3 ᤀᤔᤛᤩᤠᤜᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ. ᤁᤖ ᤂᤢᤏᤧ᤹ ᤁᤛᤢᤎᤧᤒᤠ ᤁᤢᤍᤠᤰᤌᤧᤒᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤜᤧᤰᤁᤣᤃ ᤏᤢᤒᤠ ᤔᤧᤈᤥᤃᤢᤴ॥ ᤁᤧᤖᤧᤰ ᤐᤠ᤺ᤴᤏᤥ ᤂᤢᤏᤧ᤹ ᤁᤢᤶᤒᤠ ᤕᤥᤀᤠᤛᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤆᤥᤃᤢ॥ 4 ᤜᤧᤰᤁᤣᤛᤠᤱ ᤆᤴᤈᤶᤒᤠ ᤋᤧᤴᤜᤠ᤹ᤀᤥᤒᤠ ᤔᤠᤱᤎᤠ᤺ᤴᤜᤠ᤹ ᤂᤢᤏᤧ᤹ ᤔᤧᤄᤧᤳᤋᤢᤴ ᤔᤧᤍᤣᤛᤢᤴ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤵᤔᤥ ᤆᤰᤔᤧᤸᤗ᤹ᤀᤣ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ ᤛᤢᤰᤐᤠᤀᤠᤱ ᤔᤧᤜᤠ᤺ᤴᤍᤢ॥ 5 ᤂᤢᤏᤧ᤹ ᤁᤢᤜᤢᤰᤁᤥ ᤜᤠᤱᤈᤢᤶᤔᤡᤴ ᤕᤥᤎᤥ ᤔᤧᤸᤗ᤹ᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤶᤒᤠ ᤜᤠᤱᤅᤡᤴ ᤁᤧᤛᤧᤵᤐᤠ ᤂᤧᤴ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤂᤢᤏᤧ᤹ ᤛᤧᤖᤢᤛᤡ॥ 6 ᤜᤧᤰᤁᤣᤛᤠᤱ ᤔᤥᤛᤠ᤺ᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤢᤀᤡᤛᤡᤰ ᤀᤰᤂᤣ ᤁᤧᤗ᤹ᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤂᤢᤏᤧ᤹ ᤔᤏᤠ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠᤛᤠᤜᤠ᤹ ᤔᤧᤛᤧᤖᤢᤛᤡᤴ—“ᤐᤠᤜᤠ᤹ ᤂᤢᤴᤇᤡ᤹ ᤛᤠᤜᤠ᤹ᤖᤧ ᤗᤠᤃᤡ ᤜᤧᤰᤁᤩᤠᤱ ᤛᤠᤜᤠ᤹ ᤂᤢᤴᤇᤡ᤹ ᤐᤠᤜᤠ᤹ᤖᤧ ᤗᤠᤃᤡ ᤔᤧᤛᤧᤖᤧᤶᤛᤡᤶᤔᤡᤴᤏᤧ᤹॥ ᤔᤏᤠᤀᤣ ᤌᤰᤔᤠ ᤀᤠᤵᤑᤣᤰ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠ ᤔᤧᤛᤡᤖ॥” 7 ᤕᤢᤶ ᤏᤧᤏᤧᤒᤠᤍᤧᤴᤏᤥ ᤌᤡᤒᤥᤱ ᤜᤧᤴᤇᤡᤱ ᤀᤣᤍᤥᤔᤡᤜᤠ᤹ ᤁᤧᤏᤠ᤺ᤶᤒᤠ ᤏᤢ ᤌᤱᤅᤥ ᤛᤣᤗᤠ᤺ᤴ ᤜᤢᤰᤁᤠᤵ ᤁᤧᤈᤥ᤺ᤰᤐᤠᤀᤠᤱ ᤂᤧᤸᤗᤧ ᤁᤢᤔᤡᤱ ᤕᤥᤰᤋᤣᤗ ᤁᤧᤘᤠ᤺ᤵᤐᤠ ᤂᤢᤏᤧ᤹ᤀᤣ ᤘᤕᤧ॥ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤀᤠᤀᤡᤴ ᤌᤠᤖᤡᤰᤛᤠᤱ ᤜᤠᤒᤠ ᤂᤧᤴᤗᤥ॥ 8 ᤂᤧᤴ ᤀᤣᤃᤠᤱ ᤀᤔᤛᤩᤠᤜ᤺ᤸᤗᤧ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤛᤡᤀᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤢᤖᤧ ᤁᤢᤶᤔᤧᤴᤇᤠ᤹. ᤕᤜᤥᤀᤠᤜᤠᤈᤖᤧ ᤁᤢᤛ᤻ᤛᤠ ᤕᤣᤜᤥᤀᤠᤛᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤌᤱ ᤌᤰᤔᤠ ᤛᤠ᤺ᤳᤋᤢ. “ᤑᤧᤖᤧ᤹. ᤀᤠᤱᤃᤠ᤹ᤏᤢ ᤏᤠᤍᤢᤶᤍᤢᤶᤒᤠ ᤌᤱ ᤌᤰᤋᤧ᤹॥” 9 ᤁᤖ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛᤖᤧ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜᤴ ᤀᤰᤋᤱᤒᤠ ᤏᤥᤃᤵ ᤜᤠᤰᤋᤢ. “ᤗᤧᤒᤏᤠᤏᤒᤠ ᤛᤣᤷᤍᤠ᤺ᤰᤔᤠ ᤌᤡᤰᤗᤧ ᤗᤧᤒᤏᤠᤏᤒᤠᤀᤣ ᤛᤠᤶᤔᤠᤱᤛᤡᤱ ᤌᤡᤰ ᤀᤰᤂᤣ ᤔᤧᤳᤋᤢᤀᤠᤱ ᤀᤡᤱᤄᤱ ᤜᤠᤰᤋᤢ. ‘ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠᤴ ᤀᤠᤱᤃᤠ᤹ ᤀᤠᤛ᤻ᤛᤠ ᤕᤧᤶᤒᤡᤳᤇᤠ᤺ᤴᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤧ᤹॥’ ᤂᤧᤒᤩᤠᤱ ᤗᤧᤒᤏᤠᤏᤒᤠ ᤋᤠᤶᤓᤢᤱ ᤌᤰᤛᤠ ᤌᤡᤰ ᤂᤧᤴ ᤗᤠᤶ ᤐᤥ᤺ᤰᤂᤧᤀᤠᤱ ᤕᤧ. ᤜᤧᤰᤁᤩᤠᤱ ᤂᤧᤴ ᤛᤣᤷᤍᤠ᤺ᤰᤔᤧᤴ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤖᤢ॥ 10 “ᤂᤧᤏᤧ᤹ ᤁᤢᤈᤧᤰᤐᤠᤀᤣ ᤀᤣᤍᤥᤔᤧᤴ ᤁᤧᤏᤠ᤺ᤴᤍᤢ. ᤜᤧᤰᤁᤩᤠᤱ ᤀᤠᤸᤗᤥ ᤂᤧᤏᤧ᤹ ᤕᤶᤒᤠ ᤁᤧᤜᤧᤴᤇᤡᤱᤅᤠᤱ ᤁᤧᤘᤠ᤹॥ ᤂᤧᤏᤧ᤹ ᤌᤱ ᤁᤧᤏᤠ᤺ᤴᤍᤢᤒᤠᤀᤥ ᤁᤧᤏᤡᤱᤘᤠ᤹ ᤋᤠᤛᤧ᤹. ᤜᤧᤰᤁᤩᤠᤱ ᤀᤠᤵᤑᤣᤰ ᤁᤧᤜᤡᤶᤔᤥ ᤕᤢᤅᤧ᤹᥄ ᤂᤧᤏᤧ᤹ ᤀᤠᤵᤑᤣᤰ ᤏᤢ ᤕᤜᤢᤍᤠ᤺ᤴᤏᤠᤱ ᤔᤧᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤌᤣᤀᤠᤱ ᤕᤠ᤺ᤶᤒᤰ ᤁᤧᤓᤣ᤺ᤴᤍᤢᤒᤠᤒᤣ᥅” 11 ᤜᤧᤰᤁᤣᤛᤠᤱ ᤀᤔᤛᤩᤠᤜ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤶᤄᤧᤶ ᤔᤧᤗᤠᤵᤋᤢᤴ॥ ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛᤖᤧ ᤌᤱᤅᤥ ᤑᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜᤴ ᤕᤜᤢᤍᤠᤒᤠ ᤒᤣᤌ-ᤛᤣᤔᤣᤛᤀᤥ ᤌᤱ ᤌᤰᤋᤧᤛᤡ॥ 12 ᤀᤡᤛᤪᤠᤀᤡᤗᤖᤧ ᤕᤜᤢᤍᤠᤴ ᤜᤠᤖᤡᤈᤠ᤺ᤳᤋᤢ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤄᤧᤳᤇᤡᤱ॥ 13 ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛᤖᤧ ᤀᤜᤈᤩᤠᤜᤖᤧ ᤁᤢᤶᤔᤧᤴᤇᤠ᤹. ᤕᤥᤀᤠᤛᤖᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜᤴ ᤒᤣᤌ-ᤛᤣᤔᤣᤛᤀᤥ ᤋᤧᤶᤛᤢ॥ ᤂᤧᤴ ᤀᤣᤃᤠᤱ ᤕᤣᤜᤥᤀᤠᤛᤧᤴ ᤕᤖᤢᤛᤗᤧᤔ ᤐᤣ. ᤜᤧᤰᤁᤩᤠᤱ ᤀᤣᤑᤪᤠᤀᤡᤔᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤁᤢᤛᤢᤰᤐᤥᤒᤠ ᤗᤠᤶᤎᤣ᤺ᤳᤋᤥ ᤌᤠᤖᤡᤰ ᤜᤵᤔᤧᤴ ᤁᤡᤵ ᤏᤧᤳᤇᤡ ᤔᤡᤋᤖ ᤁᤣ᤺ᤶᤒᤠ ᤕᤧᤰᤕᤰᤁᤥᤒᤠ ᤁᤢᤗᤰ ᤌᤡᤰ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤢᤍᤣᤛᤢ॥ 14 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤜᤠᤱᤜᤡᤶᤔᤥᤒᤠ ᤌᤠ᤺ᤱᤜᤠ᤹ᤀᤥ ᤂᤥᤛᤢᤒᤠ ᤁᤧᤖᤧᤰ ᤛᤠᤶᤔᤩᤠᤱ ᤕᤢᤵᤐᤠ ᤏᤢ ᤁᤠᤰ ᤛᤠᤔᤠᤜᤠ᤹ ᤋᤣ᤹ᤖᤢᤀᤠᤱ ᤐᤣ॥ ᤂᤢᤏᤧ᤹ ᤔᤧᤍᤧᤶᤛᤢ ᤔᤧᤕᤢᤰᤂᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤋᤣ᤹ᤖᤢᤛᤡᤀᤠᤱ ᤛᤠᤔᤖᤡᤕᤠ ᤏᤢ᤺ᤰᤂᤧ॥ 15 ᤕᤜᤥᤀᤠᤜᤠᤈᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥ ᤐᤥ᤺ᤰᤂᤧᤒᤠ ᤘᤣ᤹ ᤜᤡᤴᤍᤥᤰᤜᤠ᤹. ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹. ᤂᤢᤏᤧ᤹ ᤆᤥᤃᤢᤒᤠ ᤔᤢᤰᤛᤠᤶᤒᤠ ᤕᤠ᤺ᤶᤒᤰᤜᤠ᤹. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤀᤔᤛᤩᤠᤜᤖᤧ ᤁᤢᤍᤰᤗᤧᤱᤘᤠ ᤆᤥᤃᤢᤒᤠ ᤌᤱᤅᤡᤴ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤶᤒᤡ᥅ 16 ᤕᤣᤜᤥᤀᤠᤛᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤏᤢ ᤛᤥᤖᤡᤰ ᤛᤠᤔᤖᤡᤕᤠᤀᤥ ᤔᤧᤗᤢᤵᤋᤢ॥ ᤂᤶᤓᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤴ ᤜᤠᤱ ᤐᤥ᤺ᤰᤂᤧᤖᤥ॥ ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜᤴ ᤔᤠᤛᤡᤱ ( ᥈ ᤛᤠᤵᤔᤢ ᥈᥋:᥈᥋-᥈᥎ ) 17 ᤀᤡᤛᤪᤠᤀᤡᤗᤒᤠ ᤜᤠᤱ ᤕᤜᤥᤀᤠᤜᤠᤈᤖᤧ ᤁᤢᤛ᤻ᤛᤠ ᤕᤣᤜᤥᤀᤠᤛᤧᤴ ᤔᤠᤛᤡᤱᤅᤠᤱ ᤀᤣᤃᤠᤱ ᤕᤜᤢᤍᤠᤒᤠ ᤜᤠᤱ ᤕᤥᤀᤠᤛᤖᤧ ᤁᤢᤛ᤻ᤛᤠ ᤀᤔᤛᤩᤠᤜᤴ ᤌᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤜᤡᤅᤧ॥ 18 ᤀᤔᤛᤩᤠᤜᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤶᤒᤡ᥅ 19 ᤀᤔᤛᤩᤠᤜᤖᤧ ᤁᤢᤍᤰᤗᤧᤱᤘᤠᤀᤥ ᤕᤖᤢᤛᤗᤧ᤺ᤶᤔᤥ ᤗᤳᤇᤠ ᤆᤧᤶᤓᤴ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤗᤠᤁᤡᤛ ᤂᤧᤳᤇᤡᤱᤅᤠᤱ ᤐᤣ॥ ᤁᤖ ᤁᤢᤏᤡᤱᤔᤡᤜᤠ᤹ᤖᤧ ᤂᤢᤏᤧ᤹ ᤁᤢᤀᤣᤃᤠᤱ ᤔᤏᤠᤜᤠ᤹ ᤔᤧᤒᤠᤱᤄᤢᤛᤡ ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤒᤠ ᤂᤧᤵᤔᤥ ᤔᤧᤛᤧᤖᤢ॥ 20 ᤂᤢᤏᤧ᤹ ᤁᤢᤈᤣᤴ ᤀᤴᤏᤡᤴ ᤔᤧᤃᤢ᤺ᤳᤋᤢ ᤔᤧᤓᤧᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤍᤠᤀᤢᤍᤖᤧ ᤁᤢᤕᤧᤰᤕᤰ ᤕᤖᤢᤛᤗᤧ᤺ᤶᤔᤥ ᤔᤧᤈᤡᤰᤂᤢ॥ 21 ᤂᤧᤒᤩᤠᤱ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤁᤧᤃᤧᤵᤐᤠ ᤀᤈᤷᤕᤠᤜᤴ ᤔᤧᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤶᤒᤠ ᤀᤔᤛᤩᤠᤜᤖᤧ ᤁᤢᤗᤧᤰᤘᤠᤀᤥ ᤜᤠᤱ ᤔᤧᤈᤥᤃᤢ॥ 22 ᤀᤔᤛᤩᤠᤜᤴ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣᤀᤠᤱ ᤀᤣᤃᤠᤱ ᤁᤢᤛ᤻ᤛᤠ ᤀᤈᤷᤕᤠᤜ᤺ᤸᤗᤧᤀᤣ ᤀᤣᤗᤠᤋ ᤕᤧᤰᤕᤰᤁᤡᤴ ᤕᤠᤶᤔᤥ ᤆᤥᤃᤢ ᤜᤧᤰᤁᤩᤠᤱ ᤕᤜᤢᤍᤠᤴ ᤏᤢ᤺ᤰᤋᤢ ᤐᤡᤖᤢᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤠᤖᤥᤒᤠᤔ 23 ᤕᤜᤢᤍᤠᤒᤠ ᤜᤠᤱ ᤕᤥᤀᤠᤛᤖᤧ ᤁᤢᤛ᤻ᤛᤠ ᤀᤔᤛᤩᤠᤜᤴ ᤜᤠᤱ ᤐᤥ᤺ᤰᤂᤧᤒᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤋᤱᤒᤣᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤴ ᤛᤠᤔᤖᤡᤕᤠᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤗᤡᤒᤥᤱᤅᤠᤱ ᤋᤱᤒᤣ ᤌᤡᤰ ᤜᤠᤱᤕᤢᤰ ᤆᤥᤃᤢ॥ 24 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤌᤣ᤺ᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤆᤥᤰ ᤐᤠᤱᤄᤢᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤗᤠᤕᤥᤜᤠ᤹ᤗᤠᤶ ᤔᤧᤏᤢ᤺ᤰᤂᤧᤴ॥ 25 ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤃᤠᤋ-ᤜᤣᤐᤣᤖᤒᤠ ᤀᤔᤡᤳᤋᤤᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤥᤏᤠᤗᤠᤶ ᤐᤠ᤺ᤳᤋᤢᤒᤠ ᤐᤠ᤺ᤴᤈᤠ᤺ᤰ ᤀᤡᤛᤡ᤺ᤰ ᤗᤧᤒᤥᤜᤔᤠᤋᤀᤠᤱ ᤁ᤹ᤕᤥ ᤀᤖᤠᤒᤠᤒᤠ ᤘᤖ᤺ᤱᤅᤥ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤀᤡ᤺ᤴᤍᤥᤴ ᤕᤠᤶᤔᤥ ᤔᤧᤶᤔᤢᤴᤏᤣ ᤏᤧᤛ᤻ᤛᤧᤖ ᤁᤧᤈᤥ᤺ᤰᤐᤠ ᤂᤢᤏᤧ᤹ᤀᤣ ᤘᤕᤧ॥ 26 ᤁᤢᤓᤠ ᤆᤥ᤺ᤰᤕᤢᤶᤓᤥᤒᤠ ᤀᤡᤃᤪ ᤕᤥᤃ᤻ᤒᤠ ᤀᤠᤳᤋᤡᤴ. ᤀᤡᤛᤪᤠᤀᤡᤗᤡᤜᤠ᤹ᤖᤧᤛᤠᤱ ᤛᤠ᤹ᤖᤡᤰ ᤋᤢᤰᤂᤣ ᤔᤧᤍᤢᤔᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤛᤢᤀᤠᤱ ᤘᤕᤧ॥ ᤂᤧᤱᤜᤠ᤹ ᤁᤧᤓᤠ᤹ᤒᤠ ᤜᤠ᤺ᤳᤋᤠᤱ ᤜᤥ᤺ᤵᤋᤧ॥ 27 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤀᤡᤛᤪᤠᤀᤡᤗᤖᤧ ᤁᤢᤔᤡᤱ ᤔᤠᤛᤢᤱ ᤐᤡᤖᤢᤱ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤜᤥ᤺ᤵᤋᤧᤒᤠᤸᤗᤧ ᤆᤥᤃᤢᤸᤗᤧ. ᤂᤢᤏᤧ᤹ ᤕᤣᤜᤥᤀᤠᤛᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤜᤢᤰᤁᤥᤗᤠᤶ ᤂᤧᤱᤜᤠ᤹ ᤛᤧ᤺ᤵᤋᤢᤛᤡ॥ 28 ᤕᤠᤖᤥᤒᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤔᤢᤰᤛᤠᤶᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤌᤱ ᤌᤰᤋᤧᤒᤠᤗᤠᤶ ᤂᤥᤛᤢᤒᤠ ᤐᤠ᤺ᤴᤜᤠ᤹. ᤂᤶᤓᤩᤠᤱ ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ ᤕᤜᤢᤍᤠ᤺ᤸᤗᤧ ᤁᤢᤗᤰᤁᤥ ᤏᤧᤛ᤻ᤛᤧᤒᤠ ᤍᤔᤛ᤻ᤁᤛ ᤏᤢ ᤜᤔᤠᤋᤧᤴ ᤕᤠᤶᤔᤥ ᤏᤢ᤺ᤰᤋᤢᤒᤠ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤵᤏᤧᤶᤒᤡ᥅ 29 ᤕᤠᤖᤥᤒᤠᤔᤧᤴ ᤂᤢᤏᤧ᤹ ᤁᤛᤢᤎᤧᤒᤠ ᤁᤢᤍᤠᤰᤌᤧᤒᤠ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤈᤁᤖᤡᤕᤠᤴ ᤜᤠᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.