᥈ ᤜᤠᤱ 13 - LIFOTNTᤀᤡᤛᤪᤠᤀᤡᤗᤒᤠ ᤜᤠᤱ ᤕᤜᤥᤀᤠᤜᤠᤈ 1 ᤕᤜᤢᤍᤠᤒᤠ ᤜᤠᤱ ᤀᤜᤈᤩᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤛᤖᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢᤒᤠ ᤏᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤕᤣᤜᤢᤖᤧ ᤁᤢᤛ᤻ᤛᤠ ᤕᤜᤥᤀᤠᤜᤠᤈᤧᤴ ᤛᤠᤔᤖᤡᤕᤠᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤧᤸᤗᤧ ᤌᤡᤒᤥᤱᤅᤠᤱ ᤏᤢᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 2 ᤀᤡᤛᤪᤠᤀᤡᤗᤧᤴ ᤆᤥ᤺ᤰᤔᤠ ᤐᤠᤱᤄᤢᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤗᤠᤕᤥᤜᤠ᤹ᤀᤥ ᤂᤢᤏᤧ᤹ ᤗᤠᤱᤄᤣᤃᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤗᤠᤶᤒᤠ ᤂᤢᤏᤧ᤹ ᤔᤧᤏᤢ᤺ᤰᤂᤧᤴ॥ 3 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤀᤡᤛᤪᤠᤀᤡᤗᤀᤥ ᤌᤩᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤡᤰ ᤕᤧᤶ ᤌᤠᤖᤡᤰ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤒᤣᤏ-ᤜᤍᤍᤖᤧ ᤂᤢᤴᤇᤡ᤹ ᤕᤢᤰᤁᤥ ᤌᤠᤛᤢᤛᤡ॥ 4 ᤂᤧᤒᤩᤠᤱ ᤕᤜᤥᤀᤠᤜᤠᤈᤖᤧ ᤕᤜᤘᤣ ᤍᤠᤱᤒᤠᤗᤠᤶ ᤏᤢᤖᤡᤰ ᤔᤧᤳᤇᤡᤱᤔᤠ ᤁᤥ᤺ᤳᤋᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤁᤢᤒᤣᤗᤡᤴ ᤂᤧᤵᤛᤢ. ᤌᤣᤀᤠᤱᤓᤧᤸᤗᤧ ᤀᤖᤠᤔᤒᤠ ᤜᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤛᤡᤀᤠᤱ ᤘᤕᤧᤒᤠ ᤂᤢᤏᤧ᤹ ᤏᤡᤛᤢ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ ᤗᤳᤇᤠ ᤛᤧᤴᤗᤵᤍᤠᤱᤒᤠ ᤌᤡᤰ ᤕᤢᤰᤋᤡᤱ ᤆᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤖᤠᤔᤒᤠ ᤔᤢᤰᤛᤠᤶᤗᤠᤶ ᤛᤧᤴᤗᤵ ᤔᤧᤄᤥᤛᤧ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤕᤠᤶᤔᤥ ᤀᤠᤵᤑᤣᤰ ᤂᤢᤴᤇᤡ᤹ ᤜᤡᤶᤜᤠ᤹ᤀᤥ ᤋᤃᤡ ᤔᤧᤕᤢᤅᤧᤒᤠ ᤁᤢᤀᤡᤛᤡ᤺ᤰᤁᤣ ᤕᤢᤱᤔᤠ ᤘᤠ᤹ᤔᤠ ᤔᤧᤜᤣ᤺ᤰᤋᤧ॥ 6 ᤁᤖ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤧᤴ ᤆᤥ᤺ᤰᤔᤠ ᤔᤧᤒᤠᤱᤄᤢᤒᤠ ᤕᤠᤖᤥᤒᤠᤔᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤔᤧᤸᤗᤧᤖᤢᤴ. ᤁᤖ ᤂᤧᤱᤜᤠ᤹ ᤜᤠᤒᤠ ᤂᤧᤵᤔᤥᤀᤣ ᤆᤰᤔᤧᤸᤗ᤹ᤀᤣ ᤔᤧᤒᤳᤇᤧ॥ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤅᤡᤴᤏᤠᤱ ᤛᤠᤔᤖᤡᤕᤠᤀᤥᤀᤣ ᤀᤠᤶᤓᤠ ᤕᤢᤅᤧ॥ 7 ᤕᤜᤥᤀᤠᤜᤠᤈᤖᤧ ᤁᤢᤗᤠᤃᤡ ᤅᤠᤒᤥᤱ ᤀᤴᤃᤧᤕᤢᤰᤐᤠᤜᤠ᤹. ᤌᤡᤒᤥᤱ ᤀᤴᤗᤠᤎᤠᤜᤠ᤹ ᤏᤢ ᤌᤡᤒᤥᤱ ᤜᤧᤴᤇᤡᤱ ᤂᤠᤶᤒᤠᤱᤅᤥ ᤗᤠᤱᤃᤧᤄᤣ᤺ᤰᤐᤠ ᤌᤰᤛᤢᤒᤠᤜᤠ᤹ᤖᤰ ᤔᤧᤍᤠᤅᤧ ᤔᤧᤕᤠ᤺ᤰᤋᤧ ᤘᤣ᤹ ᤀᤠᤳᤋᤡᤴ ᤌᤰᤛᤢᤒᤠᤜᤠ᤹ᤀᤠᤱ ᤔᤧᤴᤍᤠᤅᤧᤴ. ᤌᤣᤀᤠᤱᤓᤧᤸᤗᤧ ᤀᤖᤠᤔᤒᤠ ᤜᤠᤱᤅᤡᤸᤗᤧ ᤘᤣ᤹ ᤁᤧᤖᤧᤰ ᤔᤧᤰᤂᤢᤛᤡᤀᤠᤱ ᤆᤠᤎᤠᤶᤔᤠᤍᤧᤴᤏᤥᤒᤠ ᤂᤠᤶᤜᤡ᤺ᤰ ᤁᤢᤀᤡᤛᤡᤰ ᤆᤥᤃᤢᤛᤡᤀᤠᤱ ᤘᤕᤧ॥ 8 ᤕᤜᤥᤀᤠᤜᤠᤈᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤏᤢ ᤆᤥᤃᤢᤒᤠ ᤔᤢᤰᤛᤠᤶᤒᤠ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤥᤒᤠ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ 9 ᤂᤧᤒᤩᤠᤱ ᤕᤜᤥᤀᤠᤜᤠᤈᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣᤀᤠᤱ ᤂᤢᤏᤧ᤹ ᤛᤠᤔᤖᤡᤕᤠᤀᤥ ᤔᤧᤈᤡᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤣᤜᤥᤀᤠᤛᤧᤴ ᤜᤠᤱ ᤐᤥ᤺ᤰᤂᤧᤖᤥ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛ 10 ᤕᤜᤢᤍᤠ ᤜᤠᤱ ᤕᤥᤀᤠᤛᤖᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢᤒᤠ ᤛᤢᤶᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤥᤀᤠᤜᤠᤈᤖᤧ ᤁᤢᤛ᤻ᤛᤠ ᤕᤣᤜᤥᤀᤠᤛᤧᤴ ᤛᤠᤔᤖᤡᤕᤠᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧ. ᤂᤧᤒᤩᤠᤱ ᤂᤢᤏᤧ᤹ ᤌᤡᤒᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 11 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤆᤥ᤺ᤰᤔᤠ ᤐᤠᤱᤄᤢᤒᤠ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤀᤠᤳᤋᤡᤴ ᤁᤢᤗᤠᤕᤥᤜᤠ᤹ᤀᤠᤱ ᤂᤢᤏᤧ᤹ ᤔᤧᤗᤧᤖᤢᤴ॥ ᤂᤢᤏᤧ᤹ ᤂᤧᤵᤔᤥᤀᤣ ᤆᤰᤔᤧᤸᤗ᤹ᤀᤣ ᤐᤳᤇᤧ॥ 12 ᤕᤣᤜᤥᤀᤠᤛᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹. ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤔᤢᤰᤛᤠᤶᤒᤠ ᤕᤠ᤺ᤶᤒᤰᤜᤠ᤹. ᤕᤜᤢᤍᤠᤒᤠ ᤜᤠᤱ ᤀᤔᤛᤩᤠᤜ᤺ᤴᤏᤢ ᤌᤱ ᤌᤰᤋᤧᤛᤡᤒᤠᤜᤠ᤹ᤀᤠᤱ ᤛᤥᤛᤥᤖᤡᤰ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤥᤒᤠ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ 13 ᤕᤣᤜᤥᤀᤠᤛᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤕᤠᤖᤥᤒᤠᤔᤧᤴ ᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱ॥ ᤕᤣᤜᤥᤀᤠᤛᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤏᤢ ᤛᤠᤔᤖᤡᤕᤠᤀᤥ ᤔᤧᤈᤡᤰᤂᤢᤖᤥ॥ ᤀᤣᤗᤡᤛᤠᤴ ᤔᤠᤛᤡᤱᤒᤠ ᤏᤢ ᤁᤢᤏᤢᤵᤔᤠ ᤔᤠᤱᤏᤡᤱᤘᤠ᤹ᤐᤠᤴ 14 ᤀᤠᤸᤗ ᤀᤣᤗᤡᤛᤠᤴ ᤗᤳᤇᤠ ᤋᤢᤰᤔᤠᤗᤠᤶ ᤋᤢᤃᤧᤖ ᤘᤕᤧ ᤂᤧᤴ ᤋᤢᤰᤔᤠᤗᤠᤶ ᤂᤢᤏᤧ᤹ ᤋᤠ᤺ᤴᤍᤡ ᤔᤠᤛᤡᤱ॥ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤥᤀᤠᤛᤧᤴ ᤂᤢᤏᤧ᤹ ᤁᤢᤍᤢᤶᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤜᤠᤒᤧᤀᤠᤱ ᤔᤧᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤦ᥄ ᤐᤠᤏᤢᤍᤡᤱ ᤀᤠᤶᤒᤦ᥄ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤀᤴᤗᤠᤎᤠᤜᤠ᤹ ᤏᤢ ᤀᤴᤃᤧᤕᤢᤰᤐᤠᤜᤠ᤹ ᤏᤡᤛᤢᤱᤛᤡᤱ᥄” 15 ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤗᤳᤇᤠ ᤗᤡ ᤏᤢ ᤁᤢᤓᤠ ᤋᤥ᤺ᤱᤜᤠ᤹ ᤕᤠᤱᤛᤡᤱᤅᤧ᤹॥” ᤜᤧᤰᤁᤩᤠᤱ ᤕᤣᤜᤥᤀᤠᤛᤖᤧ ᤜᤧᤰᤁᤣᤀᤣ ᤆᤥᤃᤢ॥ 16 ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤔᤧᤳᤋᤢ. “ᤗᤡᤴ ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥ ᤕᤠᤱᤛᤡᤱᤅᤧ᤹ᤀᤥ॥” ᤂᤧᤸᤗᤧ ᤜᤧᤰᤁᤣ ᤆᤥᤃᤢᤀᤠᤱ ᤀᤣᤃᤠᤱ ᤀᤣᤗᤡᤛᤠ᤺ᤸᤗᤧ ᤂᤢᤏᤧ᤹ ᤁᤢᤜᤢᤰᤜᤠ᤹ ᤜᤠᤱᤅᤡᤸᤗᤧ ᤁᤢᤜᤢᤰᤜᤠ᤹ ᤛᤶᤎᤠᤱ ᤏᤧᤛ᤻ᤛᤢ॥ 17 ᤂᤧᤒᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤏᤠᤱᤃᤧᤴ ᤐᤡᤛᤠᤱᤒᤠ ᤐᤣᤎᤠ᤺ᤵᤐᤡᤴ ᤜᤴᤍᤧ᤹॥” ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤧᤴ ᤜᤴᤍᤢ॥ ᤀᤣᤗᤡᤛᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤋᤥ᤺ᤱᤅᤡᤴ ᤀᤠᤒᤧᤍᤣᤛᤧ᤹॥” ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤌᤱ ᤁᤧᤏᤠ᤺ᤶᤒᤠ ᤁᤢᤍᤥ᤺ᤱ. ᤀᤖᤠᤔᤡᤜᤠ᤹ ᤌᤱ ᤏᤠ᤺ᤴᤍᤢᤛᤡᤒᤠ ᤁᤢᤍᤥ᤺ᤱ᥄ ᤀᤠᤍᤠᤱᤒᤠᤖᤧ ᤀᤐᤣᤁᤀᤥ ᤀᤖᤠᤔᤡᤜᤠ᤹ ᤘᤖᤧᤱᤗᤧᤱ ᤁᤧᤔᤧᤰᤂᤢᤛᤡ᤹॥” 18 ᤂᤧᤒᤩᤠᤱ ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤋᤥ᤺ᤱᤜᤠ᤹ ᤕᤠᤱᤛᤡᤱᤅᤧ᤹॥” ᤂᤧᤒᤩᤠᤱ ᤜᤠᤱᤅᤡᤴ ᤂᤧᤱᤜᤠ᤹ ᤕᤠᤱᤛᤡᤱ॥ ᤀᤣᤗᤡᤛᤠ᤺ᤸᤗᤧ ᤔᤧᤳᤋᤢ. “ᤂᤠᤶᤒᤠᤱᤅᤡᤴ ᤜᤡᤵᤋᤧ᤹॥” ᤂᤢᤏᤧ᤹ ᤛᤢᤶᤗᤧᤱ ᤌᤠᤖᤡᤰ ᤜᤡᤵᤋᤢ॥ 19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤂᤧᤴᤏᤢ ᤁᤢᤛᤡᤰ ᤐᤥᤃᤧᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤂᤠᤶᤒᤠᤱᤅᤥ ᤅᤠᤛᤡ ᤋᤢᤰᤛᤡ ᤌᤠᤖᤡᤰ ᤜᤡᤵᤔᤠ ᤁᤧᤒᤥᤱᤒᤠ ᤘᤕᤧ॥ ᤂᤧᤒᤩᤠᤱᤏᤧ ᤀᤠᤍᤠᤱᤒᤠᤖᤧ ᤀᤖᤠᤔᤧᤴ ᤁᤧᤏᤠ᤺ᤴᤍᤢᤒᤠ ᤘᤕᤧ ᤜᤧᤰᤁᤩᤠᤱ ᤂᤧᤴ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤁᤧᤔᤧᤰᤂᤢᤒᤠ ᤘᤕᤧ॥ ᤁᤖ ᤀᤠᤸᤗ ᤀᤠᤍᤠᤱᤒᤠᤖᤧ ᤀᤖᤠᤔᤧᤴ ᤛᤢᤶᤗᤧᤱ ᤌᤠᤖᤡᤰᤗᤰ ᤁᤧᤏᤠ᤺ᤴᤍᤢ᤹॥” 20 ᤂᤧᤴ ᤀᤣᤃᤠᤱ ᤀᤣᤗᤡᤛᤠᤴ ᤔᤠᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤗᤢᤵᤋᤢ॥ ᤋᤱᤒᤣ ᤌᤰᤔᤠ ᤁᤧᤏᤠᤵᤐᤠ ᤁᤧᤜᤡᤵᤐᤠ ᤔᤥᤀᤠᤒᤡᤜᤠ᤹ ᤜᤠᤱᤘᤠᤔᤠ ᤕᤧᤶᤔᤥ ᤗᤠᤈᤣ᤹ᤀᤥ ᤔᤧᤗᤠᤛᤧᤖ ᤔᤧᤘᤕᤧ॥ 21 ᤌᤡᤰᤗᤧᤱ ᤁᤢᤓᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤳᤇᤠ ᤆᤣᤎᤡᤰ ᤔᤧᤗᤢᤵᤋᤢᤖ ᤔᤧᤕᤠᤃᤧᤸᤗᤧ ᤌᤡᤰᤗᤧᤱᤗᤧ ᤂᤧᤱᤜᤠ᤹ᤖᤧ ᤁᤢᤗᤢᤵ ᤌᤡᤰ ᤁᤧᤏᤠᤵᤐᤠ ᤁᤧᤜᤡᤵᤐᤠ ᤔᤏᤠᤜᤠ᤹ ᤔᤧᤏᤡᤛᤢᤛᤡ॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤆᤣ᤺ᤴ ᤀᤣᤗᤡᤛᤠ᤺ᤸᤗᤧ ᤁᤢᤀᤡᤐᤢᤱᤅᤥ ᤜᤠᤒᤠ ᤗᤠᤵᤔᤧᤍᤣᤛᤢ ᤔᤧᤎᤀᤠᤱ ᤔᤧᤄᤧᤳᤇᤡᤱ ᤔᤧᤒᤣ॥ ᤀᤠᤸᤗ ᤂᤧᤴ ᤆᤣ᤺ᤸᤗᤧ ᤀᤣᤗᤡᤛᤠ᤺ᤸᤗᤧ ᤁᤢᤕᤧᤳᤜᤠ᤹ ᤛᤢᤛᤢᤸᤗᤧ ᤂᤧᤴ ᤔᤏᤠᤴ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤁᤢᤗᤠᤱᤜᤠ᤹ᤖᤧ ᤋᤰᤋᤢᤀᤠᤱ ᤕᤧᤶᤛᤡᤱᤗᤥ॥ ᤀᤡᤛᤪᤠᤀᤡᤗ ᤏᤢ ᤀᤖᤠᤔᤡᤜᤠ᤹ ᤗᤢᤶᤔᤥ ᤋᤧᤴᤎᤱ 22 ᤕᤜᤥᤀᤠᤜᤠᤈᤖᤧ ᤁᤢᤜᤠᤱᤕᤢᤰ ᤂᤠᤖᤠᤰᤁᤣ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤖᤧ ᤀᤡᤛᤪᤠᤀᤡᤗᤧᤴ ᤀᤣ᤺ᤵᤋᤢ ᤕᤢᤰᤋᤢ॥ 23 ᤁᤖ ᤀᤒᤪᤠᤜᤠᤔ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤏᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵᤐᤡᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤂᤢᤏᤧ᤹ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤗ᤹ᤖᤧ॥ ᤂᤢᤏᤧ᤹ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡ ᤁᤶᤒᤪᤠᤱ ᤔᤧᤳᤋᤢᤛᤡ॥ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤣ ᤂᤢᤏᤧ᤹ ᤂᤧᤱᤜᤠ᤹ ᤔᤧᤱᤔᤠᤛᤡ ᤀᤡᤃᤪ ᤂᤧᤱᤜᤠ᤹ ᤂᤢᤏᤧ᤹ ᤁᤢᤍᤃᤡᤗᤠᤶ ᤗ᤺ᤵᤔᤠᤍᤣᤔᤠᤛᤡ ᤏᤡᤱᤘᤠ᤹ ᤔᤧᤴᤈᤥ᤺ᤰᤁᤣ ᤁᤳᤋᤢᤛᤡ᤹॥ 24 ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤧᤴ ᤔᤠᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤒᤣᤏ-ᤜᤍᤍᤧᤴ ᤜᤠᤱ ᤐᤥ᤺ᤰᤂᤧ॥ 25 ᤂᤧᤒᤩᤠᤱ ᤕᤜᤥᤀᤠᤜᤠᤈᤖᤧ ᤁᤢᤛ᤻ᤛᤠ ᤕᤣᤜᤥᤀᤠᤛᤖᤧ ᤂᤢᤏᤧ᤹ ᤁᤢᤶᤒᤠ ᤕᤜᤥᤀᤠᤜᤠᤈᤗᤠᤶ ᤜᤈᤠᤀᤣᤗᤖᤧ ᤁᤢᤛ᤻ᤛᤠ ᤒᤣᤏ-ᤜᤍᤍᤖᤧ ᤌᤱ ᤆᤥᤃᤧᤀᤠᤱ ᤜᤢᤰᤁᤠᤵ ᤆᤥᤃᤢᤒᤠ ᤕᤧᤰᤕᤰᤜᤠ᤹ ᤕᤣᤜᤥᤀᤠᤛᤖᤧ ᤕᤠᤶᤔᤥ ᤏᤢ᤺ᤰᤋᤢᤍᤠᤖᤢ॥ ᤕᤣᤜᤥᤀᤠᤛᤖᤧ ᤒᤣᤏ-ᤜᤍᤍᤧᤴ ᤛᤢᤶᤗᤧᤱ ᤏᤠ᤺ᤴᤍᤢ. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤒᤠ ᤕᤧᤰᤕᤰᤜᤠ᤹ ᤕᤠᤶᤔᤥ ᤏᤢ᤺ᤰᤋᤢᤍᤠᤖᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.