᥈ ᤜᤠᤱ 12 - LIFOTNT

ᤕᤜᤢᤍᤠᤒᤠ ᤜᤠᤱ ᤕᤥᤀᤠᤛ

¹ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤣᤜᤢ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤕᤥᤀᤠᤛᤧᤴ ᤜᤠᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤛᤡᤒᤩᤠ ᤘᤕᤧ॥ ᤂᤧᤴ ᤒᤣᤷᤛᤣᤒᤠ ᤁᤧᤕᤢᤱᤔᤠ ᤘᤕᤧ॥

² ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤂᤢᤏᤧ᤹ ᤜᤢ᤹ᤖᤢᤒᤠ ᤋᤱᤒᤣᤜᤠ᤹ᤀᤥ ᤂᤠᤖᤠᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤂᤢᤏᤧ᤹ ᤆᤥᤃᤢ॥

³ ᤜᤧᤰᤁᤣᤛᤠᤱ ᤆᤴᤈᤶᤒᤠ ᤍᤧᤴᤜᤠ᤹ᤀᤥᤒᤠ ᤔᤠᤱᤎᤠ᤺ᤴᤜᤠ᤹ ᤂᤢᤏᤧ᤹ ᤔᤧᤄᤧᤳᤋᤢᤴ ᤔᤧᤍᤣᤛᤢᤴ॥ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ᤀᤥ ᤆᤰᤔᤧᤸᤗ᤹ᤀᤣ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢ ᤜᤧᤰᤁᤩᤠᤱ ᤛᤢᤰᤐᤠ ᤔᤧᤜᤠ᤺ᤴᤍᤢ॥

⁴ ᤕᤥᤀᤠᤛᤖᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤛᤣᤛᤣ ᤜᤢᤰᤘᤠ ᤁᤢᤀᤡᤛᤡᤰ ᤕᤠᤶᤏᤠ᤺ᤳᤏᤡ᤺ᤳᤋᤥ ᤔᤧᤓᤢᤰᤂᤢᤒᤠ ᤕᤠᤱᤜᤠ᤹. ᤀᤠᤵᤑᤣᤰ ᤗᤠᤃᤡ ᤔᤠᤱᤜᤧᤰ ᤔᤧᤈᤥᤃᤢᤒᤠ ᤕᤠᤱᤜᤠ᤹ ᤏᤢ ᤀᤠᤵᤑᤣᤰ ᤏᤡᤱᤘᤠ᤹ᤗᤠᤶ ᤔᤠᤱᤜᤡᤶᤔᤥ ᤔᤧᤍᤠᤖᤢᤒᤠ ᤕᤠᤱᤜᤠ᤹ ᤑᤢᤰᤂᤧᤶᤔᤧ᤹॥

⁵ ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤁᤢᤓᤠ ᤗᤳᤇᤠ ᤕᤠᤱᤛᤢᤶᤒᤠᤗᤠᤶ ᤕᤠᤱᤅᤡᤴ ᤔᤧᤍᤠ᤺ᤰᤋᤢᤖ. ᤜᤧᤰᤁᤩᤠᤱ ᤔᤠᤱᤜᤡᤶᤔᤥ ᤌᤧᤔᤠ ᤜᤠᤴᤋᤡ ᤁᤧᤒᤥᤱᤒᤧᤴᤇᤠᤱ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤂᤧᤴ ᤕᤠᤱᤅᤡᤴ ᤀᤥᤃᤵ ᤔᤧᤈᤥᤃᤢᤖᤖᤥ॥”

⁶ ᤁᤖ ᤕᤥᤀᤠᤛᤧᤴ ᤜᤠᤱ ᤐᤥ᤺ᤰᤂᤧᤒᤠ ᤏᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤋᤱᤒᤣ ᤌᤠᤖᤡᤰᤛᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤠᤱᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤶᤔᤧᤳᤋᤣ ᤔᤧᤘᤕᤧ॥

⁷ ᤁᤸᤗᤧᤆᤥᤃᤢᤸᤗᤧ ᤕᤥᤀᤠᤛ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠᤴ ᤏᤢ ᤘᤣ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤔᤠᤱᤜᤡᤶᤔᤥ ᤁᤧᤎᤢᤵᤐᤠ ᤁᤧᤗᤢ᤺ᤶᤒᤠᤍᤧᤴᤜᤠ᤹ ᤆᤠ᤺ᤱᤘᤠ᤹ ᤔᤧᤶᤔᤧᤳᤋᤣ ᤁᤧᤘᤕᤡᤒᤠ᥅ ᤀᤠᤸᤗᤀᤠᤱᤎᤥ ᤂᤡᤏᤡ᤹ ᤕᤠᤱᤛᤢᤶᤒᤠᤜᤠ᤹ᤗᤠᤶ ᤕᤠᤱ ᤔᤧᤍᤠ᤺ᤰᤋᤧᤶᤔᤡᤴᤏᤧ᤹. ᤁᤖ ᤔᤠᤱᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤂᤧᤴ ᤕᤠᤱᤅᤡᤴ ᤜᤢᤰᤛᤢᤵᤋᤧᤶᤛᤡᤶᤔᤧ᤹॥”

⁸ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤔᤏᤠᤜᤠ᤹ ᤕᤠᤱ ᤔᤧᤶᤓᤥ᤺ᤱᤔᤠᤛᤡ ᤏᤢ ᤔᤠᤱᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤀᤠᤵᤑᤣᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤰᤐᤧᤴᤏᤡᤴ ᤔᤧᤴᤍᤠ᤺ᤰᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤍᤧᤴᤍᤧ॥

⁹ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤛᤴᤍᤥᤰ ᤌᤡᤰ ᤋᤠᤖᤢᤀᤠᤱ ᤂᤧᤸᤗᤧ ᤁᤢᤛᤢ᤺ᤵᤔᤥ ᤁᤢᤜᤱ ᤆᤥᤃᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤠ᤺ᤵᤔᤠᤍᤧᤴᤏᤥᤒᤠ ᤆᤢᤰᤘᤠ ᤗᤧᤵᤔᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤕᤢᤰᤂᤢ॥ ᤗᤠ᤺ᤵᤔᤠᤍᤧᤴ ᤁᤶᤒᤪᤠᤱ ᤁᤧᤔᤧᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢᤒᤠ ᤁᤧᤖᤧᤰ ᤕᤠᤱᤜᤠ᤹ ᤜᤠᤒᤠ ᤂᤧᤵᤔᤥ ᤔᤧᤃᤣ᤺ᤳᤋᤢ॥

¹⁰ ᤀᤠᤸᤗ ᤂᤧᤱᤜᤠ᤹ᤖᤧ ᤂᤧᤴ ᤛᤴᤍᤥᤰᤁᤡᤴ ᤕᤖᤡᤰ ᤕᤠᤱᤅᤡᤸᤗᤧ ᤋᤡᤶᤛᤧᤒᤠ ᤔᤧᤏᤡᤛᤢᤸᤗᤧ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤔᤡᤒᤠᤴ ᤏᤢ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤋᤩᤧᤛᤡ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤶᤓᤗ᤹ᤖᤡᤰ ᤔᤧᤍᤠᤖᤢᤒᤠ ᤕᤠᤱᤅᤡᤴ ᤏᤡᤖᤧᤳᤇᤢᤀᤠᤱ ᤛᤢᤰᤘᤠᤜᤠ᤹ᤀᤥ ᤕᤠᤰᤋᤧᤇᤢ॥

¹¹ ᤂᤧᤱᤜᤠ᤹ᤖᤧ ᤕᤠᤱᤜᤠ᤹ ᤔᤧᤏᤡᤖᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤥᤔᤧᤵᤔᤠᤖᤧ ᤗᤠᤃᤡ ᤔᤢᤖᤠᤔᤧᤔᤧᤳᤋᤢᤛᤡᤒᤠ ᤔᤏᤠᤜᤠ᤹ ᤂᤧᤴ ᤕᤠᤱᤅᤡᤴ ᤔᤧᤒᤡᤖᤢᤛᤡ॥ ᤀᤠᤶᤓᤠ ᤂᤧᤵᤔᤥᤗᤠᤶ ᤂᤧᤱᤜᤠ᤹ᤖᤧ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤒᤡᤖᤢᤛᤡ. ᤀᤡᤃᤪ ᤛᤡᤱᤃᤧᤃᤠᤶᤒᤠ.

¹² ᤗᤢᤱᤃᤧᤛᤧᤵᤐᤠᤜᤠ᤹ ᤏᤢ ᤗᤢᤱ ᤁᤧᤜᤧᤵᤐᤠᤜᤠ᤹ ᤔᤧᤒᤡᤖᤢᤛᤡ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤗᤢᤱᤛᤡᤱ ᤏᤢ ᤔᤧᤄᤰᤋᤢ ᤔᤧᤜᤧᤖᤢᤀᤠᤱ ᤔᤧᤍᤱᤄᤢᤒᤠ ᤗᤢᤱᤜᤠ᤹ ᤂᤧᤱᤜᤠ᤹ᤖᤧ ᤔᤧᤀᤡᤅᤢ. ᤜᤧᤰᤁᤩᤠᤱ ᤔᤠᤱᤜᤡᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠᤖᤧ ᤗᤠᤃᤡ ᤘᤣ᤹ ᤁᤧᤖᤧᤰ ᤕᤠᤱᤛᤠᤜᤠ᤹ ᤐᤣᤰ ᤕᤠᤱᤜᤠ᤹ ᤔᤧᤜᤢᤅᤢ॥

¹³ ᤂᤧᤱᤜᤠ᤹ᤖᤧ ᤕᤢᤵᤐᤠ ᤂᤥᤷᤕᤠᤜᤠ᤹. ᤛᤣᤔᤡ ᤜᤠ᤺ᤶᤔᤠ ᤗᤠᤓᤡ᤺ᤳᤜᤠ᤹. ᤛᤠᤔᤠᤰᤂᤡ᤹ ᤛᤠᤱᤔᤠ ᤇᤧ᤺ᤱᤃᤩᤠᤜᤠ᤹ ᤏᤢ ᤌᤢᤳᤋᤢᤖᤡ᤺ᤵᤐᤠ ᤛᤠᤍᤠᤱᤜᤠ᤹ ᤀᤡᤃᤪ ᤁᤢᤓᤠ ᤛᤠᤶᤔᤩᤠᤱ ᤕᤢᤵᤐᤠ ᤛᤠᤔᤠᤐᤢᤔᤠᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢᤒᤠ ᤕᤠᤱᤜᤠ᤹ ᤀᤥᤃᤵ ᤔᤧᤴᤈᤥᤃᤢᤴ॥

¹⁴ ᤌᤣᤀᤠᤱᤓᤧᤸᤗᤧ ᤂᤧᤴ ᤕᤠᤱᤅᤡᤴ ᤔᤠᤱᤜᤡᤶ ᤆᤠ᤺ᤱᤘᤠ ᤔᤧᤵᤔᤠᤖᤧ ᤗᤠᤃᤡ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤔᤧᤒᤡᤖᤢᤛᤡ॥

¹⁵ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤕᤠ᤺ᤶᤒᤰ ᤀᤥᤃᤧᤔᤧᤵᤐᤠᤜᤠ᤹ ᤔᤧᤒᤡᤖᤢᤛᤡᤒᤠ ᤕᤠᤱᤛᤠᤜᤠ᤹ᤖᤧ ᤂᤠᤏᤡ᤺ᤳ ᤂᤧᤱᤜᤠ᤹ᤖᤧ ᤔᤧᤴᤕᤢᤰᤂᤢᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤁᤢᤍᤥ᤺ᤵᤔᤠ ᤏᤡᤖᤡᤰᤁᤠᤱ ᤕᤠ᤺ᤶᤒᤰ ᤔᤧᤈᤥᤃᤢ॥

¹⁶ ᤀᤠᤵᤋᤡᤰᤁᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤏᤢ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤜᤢᤰᤘᤠᤜᤠ᤹ᤖᤧ ᤕᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤴᤍᤠᤖᤢᤴ॥ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤴᤏᤣ ᤐᤥ᤺ᤰᤂᤧᤖᤥ॥

ᤕᤥᤀᤠᤛᤖᤧ ᤁᤢᤏᤢᤵᤔᤠ ᤁᤢᤜᤠᤱᤕᤢᤰ

¹⁷ ᤂᤧᤴ ᤀᤣᤃᤠᤱ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤧᤴ ᤌᤥ ᤌᤥ᤺ᤰᤛᤡᤱ ᤐᤣ ᤜᤧᤰᤁᤩᤠᤱ ᤃᤠᤋ ᤕᤧᤰᤕᤰᤁᤡᤴ ᤌᤱᤅᤥ ᤑᤳᤋᤢᤀᤠᤱ ᤜᤢᤰᤁᤠᤵ ᤆᤥᤃᤢ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤡᤴ ᤑᤵᤔᤠᤖᤧ ᤗᤠᤃᤡ ᤕᤠᤱᤏᤠ ᤏᤢ᤺ᤰᤂᤧ॥

¹⁸ ᤁᤖ ᤕᤜᤢᤍᤠᤒᤠ ᤜᤠᤱ ᤕᤥᤀᤠᤛᤖᤧ ᤁᤢᤶᤒᤠ ᤀᤜᤈᤩᤠᤜ. ᤁᤢᤴᤎᤧᤒᤠ ᤕᤥᤖᤠᤔ ᤏᤢ ᤁᤢᤴᤎᤧᤒᤠ ᤕᤜᤥᤛᤠᤐᤠᤋᤛᤡᤖᤧ ᤔᤧᤍᤥᤴᤍᤢᤒᤠ ᤁᤧᤖᤧᤰ ᤛᤣᤛᤣ ᤆᤡᤃᤰᤘᤠ ᤛᤠᤔᤠᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤑᤣᤰ ᤋᤥ᤺ᤴᤍᤢᤒᤠ ᤔᤡᤰᤋᤥ᤺ᤰᤜᤠ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤜᤧᤰᤁᤩᤠᤱ ᤜᤠᤱᤜᤡᤶᤔᤥᤒᤠ ᤌᤠ᤺ᤱᤜᤠ᤹ᤀᤥ ᤔᤧᤄᤥᤛᤢᤒᤠ ᤁᤧᤖᤧᤰ ᤛᤠᤶᤔᤩᤠᤱᤜᤠ᤹ ᤕᤥᤀᤠᤛᤖᤧ ᤕᤠᤱᤛᤡᤱᤅᤠᤱ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤧᤴ ᤜᤠᤰᤋᤢᤍᤣᤛᤢ॥ ᤂᤧᤴ ᤀᤣᤃᤠᤱ ᤜᤈᤠᤀᤣᤗᤧᤴ ᤕᤖᤢᤛᤗᤧᤔᤗᤠᤶ ᤏᤢ᤺ᤰᤂᤧ॥

¹⁹ ᤕᤥᤀᤠᤛᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤌᤣ ᤂᤧᤴ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤥᤒᤠ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅

²⁰ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤸᤗᤠᤒᤠ ᤛᤱᤔᤠᤱ ᤐᤣ᤺ᤰᤔᤠ ᤗᤠᤶᤔᤥ ᤁᤧᤏᤧᤒᤠ ᤒᤣᤌ-ᤔᤡᤸᤗᤥᤒᤠ ᤜᤡᤶᤔᤥ ᤔᤧᤛᤧᤖᤢ॥

²¹ ᤕᤥᤀᤠᤛᤧᤴ ᤁᤧᤛᤧᤵᤐᤠ ᤛᤢᤜᤠᤱᤕᤢᤰᤐᤠᤜᤠ᤹ ᤛᤡᤶᤔᤋᤖᤧ ᤁᤢᤛ᤻ᤛᤠ ᤕᤥᤈᤠᤒᤠᤍᤧᤴ ᤏᤢ ᤛᤥᤔᤣᤖᤖᤧ ᤁᤢᤛ᤻ᤛᤠ ᤕᤜᤥᤈᤠᤒᤠᤍᤧᤴ ᤘᤕᤧᤛᤡ॥ ᤂᤢᤏᤧ᤹ ᤛᤩᤧᤀᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤂᤢᤏᤧ᤹ ᤁᤢᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤀᤔᤛᤩᤠᤜᤴ ᤜᤠᤱ ᤐᤥ᤺ᤰᤂᤧᤖᤥ॥