᥈ ᤜᤠᤱ 11 - LIFOTNT

ᤕᤜᤢᤍᤠᤒᤠ ᤜᤠᤱᤔᤠ ᤀᤋᤗᤩᤠᤜ

¹ ᤀᤠᤸᤗ ᤀᤜᤈᤩᤠᤜᤖᤧ ᤁᤢᤶᤔᤠ ᤀᤋᤗᤩᤠᤜ ᤜᤠᤱᤔᤧᤸᤗᤧ ᤁᤢᤛ᤻ᤛᤠᤴ ᤔᤧᤛᤧᤖᤢᤒᤠ ᤏᤡᤛᤢᤀᤠᤱ ᤜᤠᤱᤜᤡᤶᤛᤕᤱᤒᤠᤜᤠ᤹ ᤁᤧᤖᤧᤰ ᤔᤧᤱᤔᤠᤛᤡᤖᤧ ᤗᤠᤃᤡ ᤔᤢᤴᤇᤡᤱ॥

² ᤁᤖ ᤕᤜᤥᤖᤠᤔ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ. ᤀᤜᤈᤩᤠᤜᤖᤧ ᤁᤢᤴᤛᤠ᤹ ᤔᤧᤴᤇᤢᤔᤠ ᤕᤜᤥᤛᤣᤒᤠ᤺ᤸᤗᤧ ᤀᤜᤈᤩᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤛᤧᤴ ᤛᤧᤵᤔᤠ ᤔᤧᤈᤥᤃᤢᤛᤡᤒᤠ ᤜᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤛᤫᤠ᤺ᤳ ᤂᤧᤳᤋᤢᤀᤠᤱ ᤋᤣ᤹ᤖᤢ॥ ᤂᤢᤏᤧ᤹ ᤂᤧᤴ ᤏᤢ ᤂᤧᤴ ᤏᤢᤃᤧᤎᤢᤰᤔᤧᤴ ᤀᤋᤗᤩᤠᤜ ᤜᤠᤱᤔᤧᤴ ᤗᤠᤶᤒᤠ ᤆᤡᤱᤔᤠᤛᤡᤖᤧ ᤗᤠᤃᤡ ᤗᤳᤇᤠ ᤀᤡᤵᤏᤠᤍᤧᤴ ᤕᤠᤰᤑᤠᤱᤅᤥ ᤆᤡᤰᤂᤢ ᤕᤢᤰᤂᤢᤛᤡ. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤂᤧᤴ ᤆᤠᤜᤡ᤺ᤴ ᤔᤧᤴᤇᤧᤖᤢᤴ॥

³ ᤀᤋᤗᤩᤠᤜ ᤜᤠᤱᤔᤧᤸᤗᤧ ᤗᤠᤈᤣ᤹ᤀᤥ ᤜᤠᤱᤕᤢᤰ ᤆᤥᤃᤢᤸᤗᤧ ᤁᤶᤓᤗ᤹ᤖᤡᤰ ᤕᤥᤀᤠᤛᤧᤴ ᤂᤢᤏᤧ᤹ ᤏᤢᤃᤧᤎᤢᤰᤔᤧᤴᤏᤢ ᤛᤥᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤋᤱᤒᤣ ᤋᤢᤰᤛᤡ ᤌᤠᤖᤡᤰ ᤆᤡᤱᤛᤡᤱᤅᤠᤱ ᤕᤢᤅᤧᤖᤥ॥

ᤀᤋᤗᤩᤠᤜ ᤜᤠᤱᤔᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ

⁴ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤥᤕᤠᤍᤠᤖᤧ ᤁᤡᤵ ᤌᤡᤰ. ᤁᤡᤵ ᤌᤡᤰ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤌᤰᤐᤣᤒᤠᤜᤠ᤹. ᤁᤖᤡᤜᤠ᤹. ᤏᤢ ᤀᤡᤰᤁᤧᤃᤥᤒᤠᤜᤠ᤹ ᤀᤢ᤺ᤵᤔᤠᤛᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤋᤠ᤺ᤵᤔᤠᤛᤡᤖᤧ ᤗᤠᤃᤡ ᤔᤏᤠᤜᤠ᤹ ᤐᤠᤱᤄᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤗᤳᤇᤠ ᤔᤠᤱᤜᤧᤰ ᤆᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤠᤱᤜᤧᤰᤛᤡᤱᤔᤠ ᤐᤠᤱᤄᤢᤛᤡ॥ ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤴ ᤀᤥ᤺ᤴᤎᤠᤰᤋᤢᤛᤡ॥

⁵ ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ. “ᤂᤡᤏᤡ᤹ ᤀᤰᤂᤣ ᤁᤧᤈᤥᤃᤢᤶᤗ ᤐᤥᤱ᤹—ᤂᤡᤏᤡ᤹ ᤁᤢᤗᤢᤵ ᤛᤢᤶᤛᤡ ᤛᤒᤠᤌ ᤕᤠ᤺ᤶᤒᤰ ᤆᤥ᤺ᤰᤛᤧ ᤁᤧᤒᤣᤃᤡ᤹—ᤂᤡᤏᤡ᤹ ᤗᤢᤶᤔᤥᤗᤠᤶ ᤁᤢᤗᤰ ᤌᤡᤰᤗᤧᤃ ᤜᤠᤱᤜᤡᤶᤔᤡᤴ ᤁᤶᤒᤪᤠᤱ ᤁᤧᤔᤧᤳᤋᤢᤶᤗ ᤐᤥᤱ᤹.

⁶ ᤁᤢᤗᤰ ᤌᤡᤰ ᤕᤶᤒᤠ ᤗᤠᤶᤎᤣ᤺ᤳᤋᤥ ᤁᤧᤕᤧᤒᤡᤖ ᤐᤥᤱ᤹. ᤜᤧᤰᤁᤩᤠᤱ ᤜᤠᤱᤜᤡᤶᤔᤧᤴ ᤁᤧᤗᤧᤰᤛᤡᤱᤒᤠᤖ ᤁᤶᤒᤪᤠᤱ ᤁᤧᤔᤧᤵᤐᤠ ᤁᤢᤗᤰ ᤌᤡᤰ ᤁᤶᤒᤪᤠᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤐᤡᤛᤠᤱᤒᤠ ᤗᤠᤶᤎᤣ᤺ᤳᤋᤥ ᤕᤧᤒᤧᤶᤔᤧ᤹—

⁷ ᤜᤧᤰᤁᤩᤠᤱ ᤂᤡᤏᤡ᤹ ᤁᤢᤗᤢᤵ ᤏᤧᤳᤇᤡᤀᤥ ᤁᤧᤘᤠ᤹ᤒᤠᤜᤠ᤹ᤖᤧ ᤔᤧᤴᤇᤠᤰᤔᤏᤠᤒᤠ ᤛᤒᤠᤌᤀᤥ ᤔᤢᤖᤠ ᤁᤧᤶᤔᤧᤳᤋᤡᤒᤠ ᤕᤠ᤺ᤶᤒᤰᤁᤥᤗᤠᤶ ᤏᤠ᤺ᤶᤛᤡᤱᤔᤠ ᤁᤧᤄᤥᤛᤢᤶ᤹. ᤂᤡᤏᤡ᤹ ᤁᤧᤖᤧᤰᤗᤧ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤔᤠᤱᤜᤡᤶᤔᤡᤴ ᤁᤶᤒᤪᤠᤱ ᤔᤧᤳᤋᤧᤶᤔᤧ᤹॥

⁸ ᤂᤡᤏᤡ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤜᤠ᤹ ᤜᤢᤰᤁᤥ ᤁᤠᤵᤐᤠᤛᤡᤶᤔᤧ᤹ᤀᤠᤱ ᤜᤠᤱᤅᤡᤸᤗᤧ ᤁᤢᤃᤒᤪᤡᤱ ᤐᤡᤛᤠᤱ ᤀᤡᤖᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹॥ ᤂᤡᤏᤡ᤹ ᤐᤣᤛᤠᤱ ᤁᤧᤍᤠᤒᤠ ᤀᤠᤳᤋᤡᤴᤇᤠᤱ ᤛᤧᤖᤧᤶᤔᤧ᤹॥ ᤜᤠᤱᤅᤡᤴ ᤀᤠᤳᤋᤡ ᤐᤣ᤺ᤰᤛᤠᤱ ᤂᤡᤏᤡ᤹ ᤂᤢᤏᤧ᤹ ᤁᤢᤒᤣᤛᤠᤱ ᤁᤧᤘᤕᤡᤖ ᤐᤥᤱ᤹॥”

⁹ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤜᤧᤰᤁᤣᤀᤣ ᤁᤡᤵ ᤌᤡᤰ ᤁᤡᤵ ᤌᤡᤰ ᤔᤏᤠᤛᤢᤶᤔᤥᤒᤠ ᤌᤰᤔᤥᤒᤠᤜᤠ᤹ᤖᤧ ᤔᤧᤈᤥᤃᤢ॥ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤔᤏᤠᤜᤠ᤹ ᤔᤧᤔᤧᤳᤇᤡᤱ—ᤛᤒᤠᤌᤒᤠ ᤕᤠ᤺ᤶᤒᤰᤁᤥ ᤔᤢᤖᤠ ᤔᤧᤔᤧᤳᤋᤢᤛᤡᤒᤠᤜᤠ᤹ ᤏᤢ ᤕᤠ᤺ᤶᤒᤰ ᤁᤧᤛᤢ᤺ᤵᤐᤠᤀᤠᤱ ᤏᤠ᤺ᤶᤛᤡᤱᤔᤠ ᤁᤧᤄᤥᤒᤠ ᤏᤧᤵᤔᤠᤱᤒᤠ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠᤀᤥ ᤔᤧᤍᤩᤧ॥

¹⁰ ᤂᤧᤒᤩᤠᤱ ᤂᤢᤏᤧ᤹ ᤌᤰᤔᤥᤒᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤧᤕᤧᤵᤐᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤗᤠ᤺ᤰᤜᤠ᤹ ᤏᤢ ᤁᤢᤄᤥᤜᤠ᤹ ᤔᤧᤒᤡᤖᤢᤛᤡ॥

¹¹ ᤂᤧᤴ ᤌᤰᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤜᤠ᤹ ᤜᤢᤰᤁᤥ ᤔᤧᤕᤠᤱᤛᤡᤱᤅᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤏᤢ ᤔᤠᤱᤜᤡᤶ ᤏᤡ᤺ᤳᤋᤠᤱ ᤔᤠᤱᤜᤡᤶᤔᤥᤒᤠ ᤗᤠᤱᤃᤧᤳ ᤐᤡᤛᤠᤱᤗᤠᤶ ᤌᤠᤱᤃᤧᤳ ᤐᤡᤛᤠᤱ ᤌᤠᤖᤡᤰᤁᤣ ᤜᤠᤱᤅᤡᤴ ᤔᤧᤃᤒᤢᤀᤠᤱ ᤔᤧᤕᤧᤒᤧ॥

¹² ᤂᤧᤒᤩᤠᤱ ᤕᤜᤥᤕᤠᤍᤠ᤺ᤸᤗᤧ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤴ ᤗᤠ᤺ᤰᤁᤠᤳ ᤗ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤧᤃᤣ᤺ᤰᤁᤥ ᤋᤡᤆ ᤂᤢ᤺ᤰᤋᤢ॥ ᤕᤜᤥᤕᤠᤍᤠ᤺ᤸᤗᤧ ᤔᤠᤱᤜᤢᤵᤐᤥᤗᤠᤶ ᤗᤡᤱᤔᤏᤠᤒᤠ ᤗᤳᤇᤠ ᤛᤰ ᤌᤡᤰ ᤂᤢᤏᤧ᤹ᤀᤥ ᤋᤥ᤺ᤴᤍᤢ. ᤜᤧᤰᤁᤩᤠᤱ ᤜᤠᤱ ᤐᤥ᤺ᤰᤂᤧᤒᤠ ᤀᤢᤘᤠ ᤆᤥᤃᤢ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤀᤠᤱ ᤔᤏᤠᤜᤠ᤹ᤖᤧ ᤜᤡᤵᤗᤠ ᤔᤧᤜᤡᤵᤋᤢ. ᤂᤧᤒᤩᤠᤱ ᤀᤰᤂᤣ ᤔᤧᤗ᤹ᤖᤧᤀᤠᤱ ᤔᤧᤀ᤺ᤰᤋᤧ. “ᤜᤠᤱᤅᤡᤸᤗᤧ ᤁᤢᤎᤠ᤺ᤰ ᤆᤠ᤹ᤖᤖᤥ॥”

ᤀᤋᤗᤩᤠᤜ ᤜᤠᤱᤔᤧᤴ ᤛᤩᤧ

¹³ ᤀᤠᤸᤗ ᤀᤋᤗᤩᤠᤜ ᤜᤠᤱᤔᤧᤸᤗᤧ ᤌᤰᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ ᤏᤢ ᤔᤏᤠᤜᤠ᤹ ᤔᤧᤀ᤺ᤰᤋᤧᤒᤠ ᤀᤡᤰᤗᤠᤴ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤀᤥ ᤐᤣ॥

¹⁴ ᤜᤧᤰᤁᤩᤠᤱ ᤂᤢᤏᤧ᤹ ᤀᤥᤔᤕᤧᤸᤗᤧ ᤌᤡᤶ ᤁᤢᤀᤡᤛᤡᤰ ᤜᤠᤱᤅᤡᤴ ᤛᤡᤳᤗᤠᤱᤅᤡᤸᤗᤧ ᤁᤢᤒᤣᤛᤠᤱ ᤕᤧᤒᤧᤒᤠ ᤏᤡᤛᤢ॥ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤌᤢᤳᤋᤢᤖᤡ᤺ᤵᤐᤠ ᤛᤠᤍᤠᤱ ᤁᤧᤔᤢ᤺ᤵᤐᤠᤜᤠ᤹ ᤜᤠᤱᤅᤡᤸᤗᤧ ᤁᤢᤒᤣᤛᤠᤱ ᤔᤧᤕᤧᤒᤧ. ᤜᤧᤰᤁᤩᤠᤱ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤌᤢᤳᤋᤢᤖᤡ᤺ᤵᤐᤠ ᤛᤠᤍᤠᤱ ᤔᤢ᤺ᤳᤏᤢ ᤔᤧᤛ᤺ᤳᤋᤧᤖ ᤔᤧᤕᤠᤃᤧ॥ ᤂᤧᤒᤩᤠᤱ ᤀᤋᤗᤩᤠᤜ ᤜᤠᤱᤔᤧᤸᤗᤧ ᤁᤢᤈᤠᤱᤜᤠ᤹ ᤌᤧ᤺ᤰᤂᤢ. ᤜᤧᤰᤁᤩᤠᤱ ᤀ᤺ᤰᤋᤧᤀᤠᤱ ᤐᤠ᤺ᤳᤋᤢ. “ᤜᤠᤱᤒᤡᤑᤩᤢᤱ ᤐᤥ᤺ᤰᤂᤧ᥄ ᤜᤠᤱᤒᤡᤑᤩᤢᤱ ᤐᤥ᤺ᤰᤂᤧᤖᤥ᥄”

¹⁵ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤁᤡᤵ ᤌᤡᤰ ᤁᤡᤵ ᤌᤡᤰ ᤗᤢᤵᤐᤥᤒᤠ ᤌᤰᤔᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ. “ᤂᤧᤴ ᤜᤠᤱᤔᤧᤴ ᤔᤠᤱᤜᤡᤶ ᤗᤠ᤺ᤰᤁᤠᤳ ᤗ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤣᤃᤠᤱ ᤁᤧᤒᤵᤐᤠᤜᤠ᤹ ᤁᤧᤖᤧᤰ ᤋᤠᤓᤣ᤺ᤸᤗᤧ ᤆᤩᤧᤵᤋᤧᤶ ᤛᤧᤖᤧᤶᤛᤡᤶᤔᤧ᤹॥” ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤕᤧ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤧᤴ ᤔᤧᤛᤧᤖᤧᤶᤔᤡᤴᤏᤧ᤹॥”

¹⁶ ᤁᤸᤗᤧᤆᤥᤃᤢᤸᤗᤧ ᤜᤠᤱᤜᤡᤶᤔᤥ ᤀᤴᤜᤠ᤹ ᤗᤠ᤺ᤵᤔᤠᤍᤧᤴᤏᤥ ᤁᤧᤖᤧᤸᤗᤧ ᤂᤢᤏᤧ᤹ ᤔᤧᤍᤧᤶᤛᤢ. ᤜᤧᤰᤁᤩᤠᤱ ᤀᤠᤶᤓᤠ ᤂᤧᤵᤔᤥᤀᤣ ᤂᤧᤴ ᤔᤧᤛᤧᤖᤢᤖᤥ॥

ᤕᤜᤥᤕᤠᤍᤠ᤺ᤸᤗᤧ ᤋᤥ᤺ᤴᤍᤢᤒᤠ ᤕᤠ᤺ᤶᤒᤰᤜᤠ᤹

¹⁷ ᤂᤧᤴ ᤀᤣᤃᤠᤱ ᤕᤜᤥᤕᤠᤍᤠ᤺ᤸᤗᤧ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠ ᤔᤧᤒᤥᤱᤗ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠ. ᤜᤠᤱ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤠᤱᤜᤢᤵ ᤆᤥᤃᤢ॥ ᤂᤢᤏᤧ᤹ ᤜᤠᤱᤅᤡᤴ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤀᤠᤱ ᤔᤠᤱᤜᤢᤵ ᤆᤥᤃᤢ॥

¹⁸ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤒᤠᤗ ᤔᤠᤱᤜᤡᤶᤔᤥ ᤔᤧᤒᤣᤀᤠᤱ ᤂᤧᤴ ᤔᤧᤗᤢ᤺ᤴᤍᤢ ᤔᤧᤍᤣᤛᤢ॥ ᤂᤧᤱᤜᤠ᤹ᤖᤧ ᤂᤧᤵᤔᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤏᤢ ᤏᤠᤘᤠᤀᤡᤳᤗᤠᤜᤠ᤹ ᤁᤢᤶᤈᤡᤰᤔᤠ ᤔᤧᤈᤥᤃᤢ. ᤜᤧᤰᤁᤩᤠᤱ ᤒᤠᤗᤖᤧ ᤁᤢᤕᤰᤕᤠᤒᤠ ᤔᤳᤋᤠᤏᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤋᤃᤡ ᤔᤧᤛᤧᤖᤢ॥ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤕᤠᤍᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ॥

¹⁹ ᤂᤧᤸᤗᤧ ᤂᤢᤏᤧ᤹ᤏᤢ ᤛᤥᤖᤡᤰ ᤁᤡᤵ ᤌᤡᤰ ᤁᤡᤵ ᤌᤡᤰ ᤗᤢᤵᤐᤥᤒᤠ ᤌᤰᤔᤥᤒᤠᤜᤠ᤹. ᤁᤖᤡᤜᤠ᤹. ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤏᤢ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤋᤠᤖᤢᤛᤡᤀᤠᤱ ᤜᤠᤱᤅᤡᤴ ᤀᤡᤰᤁᤥᤔᤠ ᤗᤠᤶᤎᤣ᤺ᤳᤋᤥᤗᤠᤶ ᤗᤠᤱᤄᤣ᤺ᤰᤂᤢᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤗᤠᤶ ᤜᤠᤱᤜᤡᤶᤔᤥ ᤋᤠᤖᤢ॥ ᤂᤧᤒᤩᤠᤱ ᤜᤠᤱᤅᤡᤴ ᤜᤠᤱᤜᤡᤶᤔᤥᤒᤠ ᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱ.

²⁰ ᤜᤧᤰᤁᤩᤠᤱ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤕᤧᤰᤕᤰᤁᤥ ᤆᤡᤈᤡ ᤕᤧᤶᤕᤧᤶ ᤛᤏᤠᤖᤢᤱ ᤐᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤀᤋᤗᤩᤠᤜ ᤜᤠᤱᤔᤧᤴ ᤜᤠᤱᤜᤡᤶᤔᤥ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤀᤠᤱ ᤘᤕᤧ॥

²¹ ᤀᤠᤸᤗ ᤕᤥᤀᤠᤛᤧᤴ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤋᤱᤒᤣ ᤏᤢᤛᤡ ᤁᤧᤖᤧᤀᤠᤱ ᤘᤕᤧᤖᤥ॥