᥈ ᤜᤠᤱ 10 - LIFOTNTᤀᤠᤜᤠᤒᤖᤧ ᤁᤢᤛ᤻ᤛᤠᤜᤠ᤹ ᤔᤧᤛᤧᤖᤢᤛᤡ 1 ᤀᤠᤸᤗ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤅᤥ ᤏᤢᤒᤥᤱ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤛᤠᤔᤖᤡᤕᤠᤒᤠ ᤕᤧᤰᤕᤰᤁᤥ ᤔᤧᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤕᤣᤜᤢ᤺ᤸᤗᤧ ᤀᤰᤋᤱᤒᤠ ᤛᤰᤀᤡᤱᤄᤱ ᤛᤠᤵᤐᤣ᤺ᤳᤋᤠᤜᤠ᤹ ᤛᤠᤵᤋᤢᤀᤠᤱ ᤛᤠᤔᤖᤡᤕᤠ ᤕᤧᤰᤕᤰᤁᤥ ᤛᤢᤜᤠᤱᤕᤢᤰᤐᤠᤜᤠ᤹. ᤗᤠᤶᤗᤥᤒᤠᤜᤠ᤹ ᤏᤢ ᤀᤠᤜᤠᤒᤖᤧ ᤁᤢᤛ᤻ᤛᤠ ᤁᤢᤀᤣᤜᤠ᤹ ᤁᤧᤜᤡᤱᤒᤠ ᤁᤧᤃᤢᤶᤒᤠᤜᤠ᤹ ᤜᤠᤰᤋᤢᤛᤡ॥ ᤂᤢᤏᤧ᤹ ᤐᤠ᤺ᤳᤋᤢ. 2 “ᤁᤴ ᤛᤰᤀᤡᤱᤄᤱᤅᤡᤴ ᤁᤧᤄᤥᤛᤢᤶᤏᤢᤔᤧ᤺ᤴᤏᤣ ᤂᤡᤏᤡ᤹ ᤍᤠᤱᤒᤧᤸᤗᤧ ᤁᤢᤛ᤻ᤛᤠᤜᤠ᤹ ᤂᤡᤏᤡ᤹ᤏᤢ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤂᤡᤏᤡ᤹ ᤀᤴᤗᤠᤎᤠᤜᤠ᤹ ᤏᤢ ᤀᤴᤜᤠ᤹ ᤜᤧᤰᤁᤩᤠᤱ ᤕᤰ ᤁᤧᤏᤧᤒᤠ ᤕᤧᤰᤕᤰ ᤏᤢ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤜᤠ᤹ᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ. 3 ᤂᤡᤏᤡ᤹ ᤍᤠᤱᤒᤧᤸᤗᤧ ᤁᤢᤛ᤻ᤛᤠᤜᤠ᤹ᤀᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤏᤢ ᤁᤧᤖᤧᤰᤏᤢ᤺ᤸᤗᤧ ᤛᤢᤶᤒᤥᤎᤠᤛᤠᤒᤠ ᤌᤡᤰ ᤛᤣᤃᤧᤶᤔᤧᤶᤔᤧ᤹ᤀᤠᤱ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤜᤠᤱᤕᤢᤰᤏᤠᤀᤥ ᤕᤢᤰᤂᤧᤶᤔᤧ᤹॥ ᤂᤧᤴ ᤀᤣᤃᤠᤱ ᤂᤡᤏᤡ᤹ ᤍᤠᤱᤒᤧᤸᤗᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤋᤧᤴᤎᤱ ᤆᤥᤃᤧᤶᤔᤧ᤹॥” 4 ᤁᤖ ᤂᤧᤱᤜᤠ᤹ ᤔᤧᤃᤡᤛᤧ ᤔᤧᤕᤰᤂᤧᤀᤠᤱ ᤔᤧᤒᤠ᤺ᤳᤋᤢ. “ᤜᤠᤱ ᤏᤧᤳᤇᤡᤖᤧᤛᤠ ᤂᤢᤏᤧ᤹ ᤔᤧᤍᤥᤃᤢᤛᤡᤴᤓᤧᤸᤗᤧ. ᤀᤠᤏᤡᤃᤣ ᤀᤠᤰᤂᤣᤀᤠᤱ ᤋᤰᤔᤠ ᤛᤢᤰᤋᤢᤶᤒᤧᤒᤣ᥅” 5 ᤁᤸᤗᤧᤆᤥᤃᤢᤸᤗᤧ ᤜᤠᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤕᤧᤰᤕᤰᤁᤥᤒᤠ ᤐᤕᤶ ᤕᤢᤰᤛᤠᤒᤠᤜᤠ᤹. ᤗᤠᤶᤗᤥᤒᤠᤜᤠ᤹ ᤏᤢ ᤁᤧᤜᤡᤱᤒᤠ ᤁᤧᤃᤢᤶᤒᤠᤜᤠ᤹ᤖᤧ ᤕᤣᤜᤢᤀᤥ ᤁᤴ ᤀᤡᤱᤄᤱᤅᤡᤴ ᤔᤧᤜᤠᤅᤢ ᤔᤧᤍᤣᤛᤢ—“ᤀᤠᤏᤡᤃᤣ ᤀᤠᤍᤠᤱᤒᤠᤖᤧ ᤁᤧᤛᤣᤘᤠᤖᤥᤒᤠᤍᤡᤃᤧ॥ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤆᤩᤠ ᤀᤠᤃ᤻ᤔᤧᤳ ᤂᤧᤴ ᤀᤠᤏᤡᤃᤣ ᤆᤥᤃᤢᤶᤒᤧ॥ ᤀᤠᤏᤡᤃᤣ ᤜᤠ᤺ᤳᤋᤠᤱ ᤜᤠᤱ ᤔᤧᤈᤥᤃᤢᤶᤒᤧᤴ॥ ᤀᤠᤍᤠᤱᤒᤠᤖᤧ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤁᤧᤀᤡ᤺ᤳᤋᤢ ᤜᤠᤒᤠ ᤂᤧᤴᤏᤣ ᤆᤥᤃᤧ᤹ᤀᤥ॥” 6 ᤂᤧᤒᤩᤠᤱ ᤕᤣᤜᤢ᤺ᤸᤗᤧ ᤀᤰᤋᤱᤒᤠ ᤛᤠᤵᤋᤢᤀᤠᤱ ᤏᤡᤛᤡᤃᤣᤰᤐᤠ ᤛᤰᤀᤡᤱᤄᤱ ᤜᤠᤰᤋᤢᤛᤡ. “ᤂᤡᤏᤡ᤹ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤘᤕᤡᤏᤧᤓᤃᤪ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ. ᤂᤡᤏᤡ᤹ ᤍᤠᤱᤒᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤕᤢᤖᤧᤶᤔᤧ᤹ᤀᤠᤱ ᤜᤠᤒᤠ ᤁᤴ ᤕᤧᤶᤔᤥ ᤋᤠ᤺ᤴᤍᤡᤰ ᤕᤡᤈᤖᤣᤗ ᤕᤧᤶᤔᤧ᤹॥ ᤂᤧᤴ ᤕᤧᤶᤔᤥ ᤂᤡᤏᤡ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤏᤢᤒᤥᤱ ᤜᤠᤱᤛᤠᤜᤠ᤹ ᤆᤠᤜᤡ᤺ᤴ ᤕᤧᤰᤕᤰᤁᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤔᤧᤜᤡᤱᤛᤢ ᤔᤧᤃᤢᤶᤛᤢᤛᤡᤀᤠᤱ ᤔᤧᤘᤕᤧ॥” 7 ᤀᤠᤸᤗ ᤂᤧᤴ ᤛᤰᤀᤡᤱᤄᤱᤅᤡᤴ ᤂᤢᤴᤇᤡ᤹ᤀᤥ ᤁᤧᤖᤧ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤏᤢᤒᤥᤱ ᤜᤠᤱᤛᤠᤜᤠ᤹ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤛᤧᤖᤢᤛᤡ॥ ᤂᤧᤱᤜᤠ᤹ᤖᤧ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤛᤠᤵᤗᤡᤱᤃᤣᤜᤠ᤹ᤀᤥ ᤔᤧᤕᤠᤰᤋᤢᤀᤠᤱ ᤕᤡᤈᤖᤣᤗᤀᤥ ᤕᤣᤜᤢᤴ ᤔᤧᤜᤠᤰᤋᤢ॥ 8 ᤀᤠᤸᤗ ᤀᤡᤱᤛᤠᤒᤧᤴ ᤁᤧᤖᤧᤀᤠᤱ ᤂᤧᤸᤗᤧ ᤕᤣᤜᤢᤴ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤜᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤔᤧᤕᤢᤖᤢᤀᤠᤱ ᤘᤠ᤹ᤖᤥ॥” ᤂᤧᤒᤩᤠᤱ ᤕᤣᤜᤢ᤺ᤸᤗᤧ ᤀᤡᤱᤈᤠᤱ ᤐᤡᤖᤢᤛᤡ. “ᤂᤧᤱᤜᤠ᤹ ᤁᤢᤗᤢᤵ ᤏᤧᤳᤇᤡ ᤛᤧᤳᤋᤧᤶᤛᤡᤶᤔᤧ᤹ᤀᤠᤱ ᤋᤠᤏᤠᤶ ᤌᤠᤖᤡᤰ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤍᤃᤡ ᤏᤧᤛ᤻ᤛᤧᤶᤛᤡᤶᤔᤧ᤹॥” 9 ᤁᤢᤍᤠ᤺ᤰᤍᤡᤰᤔᤠ ᤋᤠᤏᤠᤶ ᤕᤣᤜᤢᤴ ᤗᤠ᤺ᤰᤁᤠᤳ ᤐᤣ॥ ᤂᤧᤵᤔᤥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤧᤶᤛᤡᤱᤅᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤵᤋᤡᤰ ᤌᤣᤀᤠᤱ ᤜᤥᤵ॥ ᤀᤠᤱᤃᤠ᤹ ᤀᤠᤴᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤧᤵᤐᤧᤱᤃ ᤀᤠᤱᤃᤠ᤹ᤀᤣᤖᤥ॥ ᤁᤖ ᤁᤴᤜᤠ᤹ ᤁᤧᤖᤧᤰ ᤜᤠ᤺ᤳᤗᤧ ᤛᤧᤖᤢᤛᤡᤒᤣ᥅ 10 ᤁᤸᤗᤧᤆᤥᤃᤢᤸᤗᤧ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤗᤳᤇᤠᤀᤠᤱ ᤜᤏᤧᤒᤠ ᤔᤧᤒᤥᤱᤏᤧᤴ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤳᤋᤧᤶ ᤕᤢᤰᤂᤧᤶᤔᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤀᤣᤗᤡᤕᤠᤴ ᤗᤠᤶᤒᤠ ᤐᤠ᤺ᤳᤋᤢᤒᤠ ᤀᤡᤱᤄᤱᤅᤡᤴ ᤁᤧᤖᤧᤒᤠᤖᤥ॥” 11 ᤂᤧᤒᤩᤠᤱ ᤕᤡᤈᤖᤣᤗᤀᤥ ᤁᤧᤘᤠ᤹ᤒᤠ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤅᤥᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤶᤒᤠ ᤔᤏᤠᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤶᤒᤠ ᤆᤢᤶᤍᤣᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤗᤳᤇᤠᤀᤠᤱ ᤔᤧᤸᤗᤧᤳᤇᤡᤱᤅᤣ ᤕᤣᤜᤢ᤺ᤸᤗᤧ ᤂᤰᤐᤧᤳ ᤛᤧᤖᤢᤛᤡᤖᤥ॥ ᤀᤜᤈᤩᤠᤜ ᤜᤠᤱᤅᤡᤸᤗᤧ ᤁᤢᤃᤠ᤹ᤀᤡᤜᤠ᤹ ᤔᤧᤛᤧᤖᤢᤛᤡ 12 ᤂᤧᤴ ᤀᤣᤃᤠᤱ ᤕᤣᤜᤢᤴ ᤐᤣᤀᤠᤱ ᤛᤠᤔᤖᤡᤕᤠ ᤗᤧᤵᤔᤠᤱ ᤌᤠᤛᤡᤱ॥ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤒᤣᤌ-ᤀᤣᤁᤣᤍᤀᤥ. 13 ᤕᤜᤢᤍᤠᤒᤠ ᤜᤠᤱ ᤀᤜᤈᤩᤠᤜᤖᤧ ᤁᤢᤓᤠ ᤁᤢᤃᤠ᤹ᤀᤡᤜᤠ᤹ ᤂᤢᤏᤧ᤹ ᤋᤢᤔᤢᤛᤡᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠ᤺ᤳᤏᤡᤱᤒᤣ᥅” ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤀᤜᤈᤩᤠᤜᤖᤧ ᤏᤡ᤺ᤳᤋᤠᤱᤒᤠ ᤁᤢᤃᤠ᤹ᤀᤡᤍᤡᤃᤧ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤜᤡᤶᤛᤕᤱᤜᤠ᤹ ᤏᤢ ᤐᤕᤶ ᤜᤠᤱᤔᤧᤸᤗᤧ ᤁᤢᤜᤡᤶᤛᤕᤱᤜᤠ᤹ ᤛᤧᤘᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤀᤠᤏᤡᤃᤣ ᤕᤧ᤹ᤀᤡᤃᤧᤒᤠᤖᤥ॥” 14 ᤕᤣᤜᤢ᤺ᤸᤗᤧ ᤁᤢᤔᤏᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ. “ᤂᤧᤱᤜᤠ᤹ ᤁᤢᤜᤡᤱᤘᤧᤳ ᤋᤧᤶᤛᤧᤶᤛᤡᤶᤔᤧ᤹᥄” ᤂᤧᤒᤩᤠᤱ ᤂᤢᤴᤇᤡ᤹ ᤂᤧᤱᤜᤠ᤹ ᤁᤢᤜᤡᤱᤘᤧᤳ ᤔᤧᤍᤧᤶᤛᤢᤛᤡᤀᤠᤱ ᤗᤡᤒᤥᤱᤅᤠᤱ ᤏᤧᤳᤇᤡ ᤕᤧᤶᤒᤡᤳᤇᤠᤜᤠ᤹ ᤒᤣᤌ-ᤀᤣᤁᤣᤍᤒᤠ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤘᤒᤠᤰᤁᤥ ᤔᤧᤛᤧᤖᤢᤛᤡ॥ ᤂᤢᤏᤧ᤹ ᤗᤳᤇᤠᤀᤠᤱ ᤁᤢᤜᤡᤱᤘᤧᤳ ᤔᤧᤗᤧᤖᤢᤛᤡᤴᤗᤥ॥ ᤀᤠᤜᤠᤒᤖᤧ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤢᤃᤠ᤹ᤀᤡᤜᤠ᤹ ᤔᤧᤛᤧᤖᤢᤛᤡ 15 ᤕᤣᤜᤢ᤺ᤸᤗᤧ ᤂᤧᤴ ᤋᤧᤴᤏᤡᤴ ᤗᤧᤖᤢᤀᤠᤱ ᤀᤣᤃᤠᤱ. ᤖᤣᤁᤠᤒᤖᤧ ᤁᤢᤛ᤻ᤛᤠ ᤕᤜᤥᤏᤠᤍᤠᤒᤧᤴ ᤂᤢᤏᤧ᤹ ᤋᤢᤶᤔᤠᤖᤧ ᤗᤠᤃᤡ ᤑᤧᤖᤧᤖ ᤐᤳᤇᤧᤒᤠ ᤂᤢᤏᤧ᤹ ᤋᤢᤔᤢ॥ ᤕᤣᤜᤢ᤺ᤸᤗᤧ ᤂᤧᤴ ᤛᤧᤘᤠ ᤔᤧᤳᤋᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤗᤧᤵᤔᤠᤱ ᤘᤠ᤹ᤀᤠᤒᤠ ᤁᤢᤀᤡᤛᤡᤰ ᤌᤣ ᤂᤧᤏᤧ᤹ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤘᤠ᤹ᤒᤡ᥅” ᤕᤜᤥᤏᤠᤍᤠᤒᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤗᤧᤵᤔᤠᤱ ᤘᤠ᤹ᤀᤠ॥” ᤕᤣᤜᤢ᤺ᤸᤗᤧ ᤔᤧᤳᤋᤢ. “ᤜᤧᤰᤁᤣᤏᤧᤓᤃᤪ. ᤂᤧᤏᤧ᤹ ᤁᤧᤜᤢᤰᤁᤡᤴ ᤛᤴᤇᤧ ᤐᤡᤖᤠᤱᤅᤧ᤹॥” ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢ ᤐᤡᤖᤢ. ᤜᤧᤰᤁᤩᤠᤱ ᤕᤣᤜᤢ᤺ᤸᤗᤧ ᤂᤢᤏᤧ᤹ ᤋᤧᤶᤛᤢᤀᤠᤱ ᤁᤢᤀᤴᤗᤠᤎᤠᤀᤥ ᤕᤢᤰᤂᤢ॥ 16 ᤕᤣᤜᤢ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ᤏᤢ ᤛᤥᤖᤡᤰ ᤐᤡᤳᤇᤡ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤀᤠᤛᤡᤰᤛᤶᤔᤧᤴ ᤀᤥᤔᤧᤳᤋᤧ᤹॥” ᤂᤧᤒᤩᤠᤱ ᤂᤧᤴ ᤂᤢᤏᤧ᤹ᤏᤢ ᤛᤥᤖᤡᤰ ᤁᤢᤀᤴᤗᤠᤎᤠᤀᤥ ᤋᤣ᤹ᤖᤢᤀᤠᤱ ᤐᤣ॥ 17 ᤀᤠᤸᤗ ᤕᤣᤜᤢᤴ ᤛᤠᤔᤖᤡᤕᤠ ᤁᤧᤖᤧᤓᤧᤖᤧ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤣᤗᤡᤕᤠᤴ ᤔᤧᤳᤋᤢᤒᤠ ᤀᤡᤱᤄᤱ ᤁᤢᤀᤡᤛᤡᤰ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤅᤥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤌᤩ᤺ᤱ ᤔᤧᤰᤂᤢᤛᤡᤖᤥ॥ ᤒᤠᤗ ᤔᤠᤱᤅᤡᤴ ᤛᤧᤘᤠ ᤁᤧᤔᤧᤵᤐᤠᤜᤠ᤹ ᤔᤧᤛᤧᤖᤢᤛᤡ 18 ᤂᤧᤒᤩᤠᤱ ᤕᤣᤜᤢ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤑᤢᤰᤂᤢᤛᤡᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤜᤠᤒᤖᤧᤃ ᤆᤒᤧ᤺ᤳᤇᤡᤰᤗᤰ ᤒᤠᤗ ᤔᤠᤱᤅᤡᤴ ᤛᤧᤘᤠ ᤔᤧᤳᤋᤢ॥ ᤁᤖ ᤕᤣᤜᤢ᤺ᤸᤗᤧ ᤀᤠᤸᤗᤛᤠᤱ ᤛᤠ᤹ᤖᤡᤰ ᤕᤖᤡᤰ ᤂᤧᤴ ᤛᤧᤘᤠ ᤔᤧᤳᤋᤢ᤹॥ 19 ᤀᤠᤸᤗ ᤒᤠᤗᤖᤧ ᤁᤧᤖᤧᤰ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤂᤧᤸᤗᤧ ᤁᤧᤖᤧᤰ ᤁᤢᤛᤧᤘᤠᤖᤥᤒᤜᤠ᤹ ᤏᤢ ᤁᤧᤖᤧᤰ ᤁᤢᤕᤰᤕᤠᤒᤠᤜᤠ᤹ ᤀᤢ᤺ᤳᤋᤧᤶᤛᤡᤶᤔᤧ᤹॥ ᤗᤳᤇᤠᤀᤠᤱ ᤔᤧᤕᤠ᤺ᤰᤏᤧᤸᤗ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤒᤠᤗᤖᤧ ᤁᤢᤗᤠᤃᤡ ᤗᤳᤇᤠ ᤛᤠ᤹ᤖᤡᤰ ᤕᤶᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱ᤹॥ ᤁᤢᤓᤠ ᤗᤧᤖᤧ ᤕᤠ᤺ᤰᤋᤧᤏᤧᤓᤃᤪ ᤂᤧᤴ ᤔᤧᤜᤡᤱᤏᤧᤴ॥” ᤁᤖ ᤒᤠᤗᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤕᤣᤜᤢ᤺ᤸᤗᤧ ᤀᤡᤱᤗᤧᤰ ᤕᤠ᤺ᤶᤒᤰ ᤆᤥᤃᤢᤖ ᤘᤕᤧ॥ 20 ᤕᤣᤜᤢ᤺ᤸᤗᤧ ᤔᤧᤳᤋᤢᤛᤡ. “ᤒᤠᤗᤖᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥᤀᤥ ᤗᤳᤇᤠ ᤕᤶᤒᤠ ᤆᤢᤶᤗᤢᤱ ᤀᤢ᤺ᤳᤋᤧᤶᤛᤡᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤀᤢᤘᤠ ᤔᤧᤈᤥᤃᤢ॥ 21 ᤂᤧᤒᤩᤠᤱ ᤂᤢᤏᤧ᤹ ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤀᤡᤱᤄᤱ ᤜᤠᤰᤋᤢᤛᤡ. ᤜᤧᤰᤁᤩᤠᤱ ᤒᤠᤗᤧᤴ ᤛᤧᤘᤠ ᤁᤧᤔᤧᤵᤐᤠᤜᤠ᤹ ᤁᤧᤖᤧᤰ ᤔᤧᤍᤩᤧ॥ ᤗᤳᤇᤠᤀᤠᤱ ᤔᤧᤘᤕᤧᤴ ᤔᤧᤕᤠ᤺ᤰᤋᤧᤴ॥ ᤌᤡᤰ ᤁᤢᤛᤢᤰᤐᤥ ᤏᤢ ᤘᤣ᤹ᤛᤔᤠ ᤁᤢᤛᤢᤰᤐᤥ ᤌᤠᤖᤡᤰ ᤔᤧᤍᤡᤶᤛᤧᤴᤗ ᤌᤠᤖᤡᤰ ᤂᤧᤱᤜᤠ᤹ ᤒᤠᤗ ᤔᤠᤱᤜᤡᤶᤔᤥ ᤛᤎᤧᤰ ᤛᤎᤧᤰ ᤔᤧᤈᤢᤵᤛᤧ॥ 22 ᤂᤧᤒᤩᤠᤱ ᤕᤣᤜᤢ᤺ᤸᤗᤧ ᤆᤠᤱᤘᤠᤴ ᤏᤧᤔᤠᤍᤧᤴ ᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤧᤴ ᤔᤧᤳᤋᤢ. “ᤒᤠᤗᤖᤧ ᤁᤧᤖᤧᤰ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤈᤠᤰᤂᤢᤒᤠ ᤂᤢᤴᤇᤡ᤹ ᤆᤠᤱᤜᤠ᤹ ᤑᤧᤳᤋᤧ᤹॥ ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤠᤱᤜᤠ᤹ ᤗ᤺ᤳᤋᤢ॥” 23 ᤂᤧᤒᤩᤠᤱ ᤕᤣᤜᤢᤴ ᤏᤢ ᤖᤣᤁᤠᤒᤖᤧ ᤁᤢᤛ᤻ᤛᤠ ᤕᤜᤥᤏᤠᤍᤠᤒᤧᤴ ᤒᤠᤗ ᤔᤠᤱᤜᤡᤶᤔᤥ ᤗᤠᤛᤧᤳᤇᤡ॥ ᤕᤣᤜᤢ᤺ᤸᤗᤧ ᤒᤠᤗᤧᤴ ᤛᤧᤘᤠ ᤁᤧᤔᤧᤵᤐᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤏᤢ ᤛᤥᤖᤡᤰ ᤁᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤳᤋᤡᤴ ᤁᤢᤛᤧᤘᤠᤖᤥᤒᤠᤜᤠ᤹ᤀᤠᤱ ᤔᤧᤴᤘᤠ᤹ᤏᤧᤴᤗ—ᤒᤠᤗᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤰ ᤔᤧᤘᤠ᤹ᤖ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤖᤧᤰ ᤐᤡᤛᤠᤱ ᤀᤥᤔᤧᤳᤋᤧᤶᤔᤧ᤹ᤀᤠᤱ ᤏᤡ᤺ᤴᤎᤥ ᤆᤥᤃᤧᤶᤔᤧ᤹॥” 24 ᤂᤧᤒᤩᤠᤱ ᤂᤧᤱᤜᤠ᤹ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤇᤧ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤇᤧ ᤛᤡᤃᤠᤱ ᤔᤧᤒᤣ॥ ᤀᤠᤸᤗ ᤕᤣᤜᤢ᤺ᤸᤗᤧ ᤗᤠ᤺ᤰᤁᤠᤳ ᤔᤧᤕᤧᤵᤛᤢᤛᤡᤒᤠ ᤕᤧᤵᤐᤥᤱ ᤔᤏᤠᤜᤠ᤹ ᤀᤰᤋᤱᤒᤠ ᤛᤠᤶᤍᤡᤱ ᤐᤡᤖᤢᤛᤡᤀᤠᤱ ᤔᤢᤖᤠ ᤔᤧᤳᤋᤢᤛᤡᤀᤠᤱ ᤘᤕᤧ. “ᤀᤠᤱᤃᤠ᤹ ᤂᤡᤏᤡ᤹ ᤜᤢᤰᤁᤥ ᤗᤰᤐᤧᤴ ᤐᤡᤏᤡᤱᤒᤠ ᤁᤴ ᤔᤏᤠᤜᤠ᤹ᤀᤥᤒᤠ ᤁᤢᤓᤠ ᤗᤳᤇᤠ ᤔᤏᤠᤖᤰᤛᤠᤱ ᤀᤠᤳᤋᤡᤸᤗᤧ ᤂᤧᤳᤇᤡᤱᤔᤠ ᤑᤠ᤺ᤰᤋᤢ᤹. ᤂᤧᤸᤗᤧ ᤁᤢᤜᤡᤱᤔᤧᤸᤗᤧ ᤁᤢᤗᤧᤰᤘᤠ ᤂᤧᤴ ᤂᤧᤳᤇᤡᤱᤔᤠ ᤁᤧᤓᤠ᤺ᤰᤐᤧᤴ ᤛᤡᤖᤥ॥” 25 ᤕᤣᤜᤢ᤺ᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢ ᤛᤢᤖᤢᤏᤢᤔᤧ᤺ᤴᤏᤣ ᤂᤢᤏᤧ᤹ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤏᤢ ᤛᤢᤜᤠᤱᤛᤢᤰᤐᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ. “ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤛᤧᤖᤧᤶᤛᤡᤶᤔᤧ᤹. ᤗᤳᤇᤠᤀᤠᤱ ᤂᤧᤳᤇᤡᤱᤔᤠ ᤔᤧᤓᤠ᤺ᤰᤋᤧᤶᤛᤡᤶᤔᤡᤴᤏᤧ᤹॥” ᤁᤸᤗᤧᤆᤥᤃᤢᤸᤗᤧ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤆᤣᤜᤠ᤹ ᤗᤠ᤺ᤰᤁᤠᤳ ᤗᤠᤵᤔᤧᤍᤣᤛᤢᤛᤡ. ᤂᤧᤒᤩᤠᤱ ᤔᤠᤱᤜᤡᤶᤔᤥᤒᤠ ᤛᤡᤃᤠᤱᤒᤠ ᤔᤠᤱᤎᤠ᤺ᤴᤏᤥ ᤔᤧᤗᤠᤛᤧ॥ 26 ᤂᤧᤱᤜᤠ᤹ᤖᤧ ᤒᤠᤗ ᤔᤠᤱᤜᤡᤶᤔᤥ ᤁᤧᤕᤧᤵᤐᤠ ᤛᤡᤳᤗᤠᤱᤅᤡᤴ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤀᤠᤱ ᤂᤧᤴ ᤔᤡᤔᤧᤎᤡᤰᤂᤢ ᤔᤧᤍᤣᤛᤢ॥ 27 ᤂᤧᤱᤜᤠ᤹ᤖᤧ ᤒᤠᤗ ᤔᤠᤱ ᤛᤡᤳᤗᤠᤱᤅᤡᤴ ᤔᤧᤗᤢ᤺ᤴᤍᤢ ᤜᤧᤰᤁᤩᤠᤱ ᤔᤠᤱᤜᤡᤶᤔᤡᤴ ᤜᤳᤇᤧ ᤜᤳᤇᤧ ᤔᤧᤛᤧᤛᤢ॥ ᤜᤧᤰᤁᤩᤠᤱ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤜᤡᤎᤠ᤺ᤶᤒᤢ ᤔᤧᤈᤥᤃᤢ᤹॥ 28 ᤁᤶᤓᤗ᤹ᤖᤡᤰ ᤕᤣᤜᤢ᤺ᤸᤗᤧ ᤀᤡᤛᤪᤠᤀᤡᤗᤀᤥ ᤒᤠᤗ ᤛᤧᤘᤠ ᤔᤧᤵᤔᤠᤴ ᤏᤢᤵᤛᤢ॥ 29 ᤜᤧᤰᤁᤣᤛᤠᤱ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔ ᤜᤠᤱᤅᤡᤸᤗᤧ ᤒᤣᤌᤣᤗ ᤏᤢ ᤍᤠᤏᤒᤠ ᤛᤠᤶᤔᤩᤠᤱ ᤐᤡᤳᤛᤠᤳᤜᤠ᤹ ᤀᤡᤛᤪᤠᤀᤡᤗᤧᤴ ᤛᤧᤘᤠ ᤔᤧᤵᤔᤠ ᤐᤠᤱᤄᤢᤒᤠ ᤗᤠᤕᤥᤜᤠ᤹ ᤂᤢᤏᤧ᤹ ᤔᤧᤗᤧᤖᤢᤴ॥ 30 ᤕᤜᤘᤣ ᤍᤠᤱᤒᤧᤸᤗᤧ ᤕᤣᤜᤢᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤁᤧᤗᤠ᤹ᤒᤠ ᤆᤥᤃᤧ. ᤂᤧᤴ ᤂᤧᤏᤧ᤹ ᤁᤧᤃᤧᤳᤋᤢ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤏᤧ᤹ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤅᤥ ᤁᤧᤈᤥᤃᤢ॥ ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤗᤡᤛᤡᤃᤣᤰᤐᤠ ᤌᤠ᤺ᤰ ᤌᤧᤶᤒᤠ ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤔᤧᤕᤢᤱ᤹॥” 31 ᤜᤶᤓᤛᤠᤱ ᤕᤣᤜᤢᤴ ᤁᤧᤖᤧᤰ ᤁᤢᤏᤡᤱᤘᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤡᤱᤛᤡᤱ ᤕᤧᤰᤕᤧᤰ ᤔᤧᤗ᤹ᤖᤧᤴ॥ ᤀᤡᤛᤪᤠᤀᤡᤗᤧᤴ ᤆᤥ᤺ᤰᤔᤠ ᤐᤠᤱᤄᤢᤒᤠ ᤕᤠᤖᤥᤒᤠᤔᤖᤧ ᤁᤢᤗᤠᤕᤥᤜᤠ᤹ᤗᤠᤶ ᤂᤢᤏᤧ᤹ ᤔᤧᤏᤢ᤺ᤰᤂᤧᤴᤗᤥ॥ ᤕᤣᤜᤢᤴ ᤔᤠᤛᤡᤱ 32 ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤖᤧ ᤁᤢᤗᤠᤶᤋᤡ ᤁᤢᤓᤧᤖᤧᤜᤠ᤹ ᤆᤢᤰᤛᤠ ᤆᤥ᤺ᤰᤔᤠ ᤜᤣ᤺ᤰᤋᤢ॥ 33 ᤕᤷᤍᤏ ᤘᤜ᤺ᤱᤅᤥᤏᤢ ᤏᤠᤱᤃᤧᤴ ᤐᤡᤛᤠᤱ ᤃᤡᤗᤠᤍᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ (ᤃᤠᤍ. ᤖᤢᤒᤣᤏ. ᤏᤢ ᤔᤏᤛ᤻ᤛᤣᤒᤠ ᤗᤠᤈᤣ᤹) ᤀᤷᤏᤥᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤀᤖᤥᤀᤣᤖᤗᤠᤶ ᤃᤡᤗᤠᤍ ᤐᤥ᤺ᤰᤂᤧᤖ ᤒᤠᤛᤠᤏ ᤌᤠᤖᤡᤰ ᤀᤖᤠᤔᤒᤠ ᤜᤠᤱ ᤜᤈᤠᤀᤣᤗᤖᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤧᤱᤃᤵᤜᤠ᤹ ᤕᤢᤰᤋᤢᤍᤣ᤹ᤖᤢᤀᤠᤱ ᤏᤧᤛ᤻ᤛᤧ॥ 34 ᤕᤣᤜᤢ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤏᤢ ᤂᤢᤏᤧ᤹ ᤜᤢᤰᤁᤠᤵ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤌᤣ ᤂᤧᤴ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ 35 ᤕᤣᤜᤢᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤔᤖᤡᤕᤠᤀᤥ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤜᤥᤀᤠᤜᤠᤈᤧᤴ ᤜᤠᤱ ᤐᤥ᤺ᤰᤂᤧ॥ 36 ᤕᤣᤜᤢᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧᤀᤠᤱ ᤛᤠᤔᤖᤡᤕᤠᤀᤥ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤡᤴ ᤏᤡᤒᤥᤱᤅᤠᤱ ᤕᤧᤳᤇᤡ ᤋᤱᤒᤣ ᤌᤠᤖᤡᤰ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.