᥈ ᤕᤢᤜᤢᤴᤏᤠ 1 - LIFOTNT

ᤋᤢᤶᤔᤩᤠᤱᤜᤠᤱᤔᤠᤴ ᤕᤢᤜᤢᤴᤏᤠᤗᤠᤶ ᤛᤧᤘᤠ

¹ ᤀᤡᤱᤃᤠ᤹ ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥᤒᤠᤸᤗᤧ ᤛᤣ᤺ᤰᤔᤏᤠᤔᤠ ᤋᤢᤶᤔᤩᤠᤱᤜᤠᤱᤔᤠ ᤏᤢ ᤁᤢᤛ᤻ᤛᤠᤜᤠ᤹ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤡ᤺ᤶᤈᤡ ᤔᤧᤳᤏᤡᤱᤗᤥ. ᤜᤧᤰᤁᤩᤠᤱ ᤛᤧᤰᤂᤠᤴ ᤁᤢᤛᤡᤱ ᤁᤧᤏᤡ᤺ᤵᤐᤠ ᤁᤧᤖᤧᤰᤗᤧᤀᤠᤱ ᤔᤡ᤺ᤶᤈᤡ ᤁᤧᤶᤔᤧᤳᤋᤡ᤹ᤖᤥ॥

² ᤌᤣᤀᤠᤱᤓᤧᤸᤗᤧ ᤛᤧᤰᤂᤠ᤺ᤱᤃ ᤀᤠᤏᤡ᤹ᤀᤥ ᤘᤠ᤹. ᤜᤧᤰᤁᤩᤠᤱ ᤛᤍᤠᤍᤡᤱ ᤀᤠᤏᤡ᤹ᤏᤢᤀᤣ ᤘᤠ᤹ᤖᤥ॥

³ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤒᤢᤃᤧᤴ ᤁᤢᤛ᤻ᤛᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤁᤧᤍᤠᤒᤠ ᤗᤢᤱᤃᤢᤶ. ᤗᤢᤱᤔᤠ᤹ ᤋᤢᤰᤔᤠᤴ ᤏᤢ ᤛᤏᤠᤖᤢᤱᤅᤡᤴ ᤀᤠᤏᤡ᤹ ᤛᤧᤰᤂᤠ ᤏᤢ ᤔᤡ᤺ᤶᤈᤡᤀᤥ ᤁᤧᤘᤠ᤹ᤒᤠᤜᤠ᤹ᤏᤢ ᤘᤠ᤹ᤖᤖᤥ॥

ᤂᤪᤡᤛ᤻ᤋᤖᤧ ᤁᤢᤀᤡᤱᤈᤠᤱᤅᤥ ᤗᤠᤱᤄᤣ᤺ᤰᤔᤠ

⁴ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤀᤠᤒᤡᤖᤧᤒᤠ ᤁᤢᤀᤡᤛᤡᤰ ᤁᤢᤓᤠ ᤁᤧᤛ᤻ᤛᤠᤜᤠ᤹ ᤛᤧᤰᤂᤠᤀᤥ ᤗᤠᤱᤔᤧᤄᤣ᤺ᤰᤗ ᤔᤧᤘᤠ᤹ᤒᤠ ᤏᤡᤱᤘᤠ᤹ ᤂᤥᤛᤢᤱᤅᤠᤱ ᤀᤡᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤛᤔᤧᤀᤠᤱ ᤘᤠ᤹ᤀᤠᤖᤥ॥

⁵ ᤜᤧᤰᤁᤩᤠᤱ ᤀᤠᤸᤗ. ᤀᤠᤔᤡ᤺ᤶ ᤋᤢᤶᤔᤩᤠᤱᤜᤠᤱᤔᤠᤀᤣ. ᤀᤠᤏᤡ᤹ ᤁᤠᤰ ᤗᤢᤱᤔᤠ᤹ ᤋᤢᤰᤁᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤐᤣᤗᤡ ᤑᤠᤰᤏᤧ᤹ᤖᤥ॥ ᤁᤴ ᤁᤢᤛᤱ ᤀᤡᤱᤈᤠᤱᤃ ᤛᤠᤵᤏᤡᤱᤒᤠ ᤔᤣ᤺ᤴᤗᤥ. ᤁᤖ ᤁᤱᤃ ᤋᤃᤡᤀᤠᤱᤎᤥᤀᤣ ᤀᤠᤏᤡ᤹ᤏᤢ ᤘᤕᤧᤖᤥ॥

⁶ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ ᤑᤠ᤹ᤀᤡᤴ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤐᤥᤱᤔᤠᤖᤥ॥ ᤋᤃᤡᤀᤠᤱᤎᤥ ᤂᤡᤏᤡ᤹ ᤁᤠᤰᤗᤧ ᤁᤧᤄᤧᤵᤛᤢᤶᤒᤠ ᤀᤡᤱᤈᤠᤱᤅᤡᤴ ᤒᤠ ᤁᤴᤗᤥ—ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥᤱᤗᤥ॥

⁷ ᤕᤖᤡᤰ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤛᤧ᤺ᤖᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧᤃ ᤕᤧᤛᤢ ᤂᤪᤡᤛ᤻ᤋᤧᤴ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤐᤥ᤺ᤰᤂᤧᤀᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤋᤩᤧᤒᤠ ᤑᤠ᤹ᤀᤠᤱ ᤏᤛᤠᤴ ᤔᤧᤴᤈᤥᤃᤢᤴᤗᤥ॥ ᤀᤰᤋᤱᤒᤠ ᤔᤏᤠ᤺ᤱᤃ ᤀᤡᤱᤗᤧᤰᤐᤠ ᤏᤢ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤒᤠᤖᤥ॥

⁸ ᤂᤧᤸᤗᤧᤆᤥᤃᤢᤸᤗᤧ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤡᤏᤡ᤹ ᤁᤠᤰ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤸᤗᤧᤴ ᤂᤥᤔᤠ ᤁᤧᤒᤥᤱᤒᤠ ᤂᤡᤏᤡ᤹ ᤜᤠᤱᤛᤧᤶᤔᤡᤴ ᤁᤧᤔᤠᤒᤠ ᤔᤣ᤺ᤴ. ᤁᤖ ᤁᤧᤄᤥᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥

⁹ ᤂᤪᤡᤛ᤻ᤋᤖᤧ ᤁᤢᤏᤡᤛᤠᤶᤒᤢᤱᤅᤥᤗᤠᤶ ᤔᤠ᤺ᤱᤄᤠ ᤁᤧᤘᤠ᤹ᤒᤠ ᤔᤏᤠ᤺ᤴᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤘᤠ᤹ᤏᤧᤴᤗᤥ॥ ᤁᤖ ᤂᤢᤏᤧ᤹ ᤁᤢᤏᤡᤛᤠᤶᤒᤢᤱᤅᤡᤴᤏᤢ ᤔᤧᤸᤗᤧᤳᤋᤣ ᤁᤧᤘᤠ᤹ᤒᤠᤴᤏᤢ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤩᤠᤱ ᤀᤠᤒᤢᤍᤡᤱ ᤁᤢᤛ᤻ᤛᤠᤴ ᤏᤧᤵᤔᤠᤱ ᤘᤠ᤹ᤛᤡᤖᤥ॥

¹⁰ ᤂᤪᤡᤛ᤻ᤋᤖᤧ ᤛᤧᤰᤂᤠᤒᤠ ᤁᤢᤏᤡᤛᤠᤶᤒᤢᤱᤅᤡᤴ ᤔᤧᤴᤍᤠ᤺ᤵᤔᤏᤠᤒᤠ ᤔᤏᤠᤴ ᤂᤧᤏᤧ᤹ ᤁᤧᤜᤡᤶᤔᤥ ᤋᤠᤏᤧ ᤑᤠ᤹ᤃᤪ ᤂᤧᤴ ᤁᤧᤜᤡᤶᤔᤥ ᤗᤠ᤺ᤵᤔᤠ ᤔᤧᤒᤠᤱᤄᤧᤴᤏᤧ᤹ ᤜᤧᤰᤁᤩᤠᤱ ᤗᤠᤱᤅᤠᤱ ᤔᤧᤍᤠ᤺ᤰᤋᤧᤴᤏᤧ᤹ᤀᤥ॥

¹¹ ᤀᤠᤳᤋᤡᤸᤗᤧ ᤂᤧᤴ ᤔᤏᤠᤴ ᤗᤠᤱᤍᤠ᤺ᤰᤋᤢ᤹. ᤂᤧᤱᤃ ᤂᤧᤸᤗᤧ ᤋᤠᤵᤑᤧ᤺ᤶᤒᤠ ᤁᤢᤕᤠ᤺ᤶᤒᤰᤜᤠ᤹ᤀᤥ ᤆᤢᤶ ᤁᤧᤔᤧᤵᤐᤠ ᤁᤢᤀᤡᤛᤡᤰ ᤐᤥᤱᤗᤥ॥

ᤁᤢᤏᤢᤵᤔᤠ ᤛᤧᤘᤠ

¹² ᤀᤡᤱᤃᤠ᤹ ᤕᤖᤡᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤛᤠᤵᤔᤠ ᤁᤳᤋᤢᤱᤛᤠᤱ. ᤁᤴ ᤐᤠ᤺ᤴᤜᤠ᤹ ᤛᤰᤀᤡᤱᤄᤱᤅᤥᤗᤠᤶ ᤔᤣ᤺ᤴ. ᤁᤖ ᤂᤡᤏᤡ᤹ ᤋᤢᤶᤏᤡᤱᤅᤠᤱᤅᤣ ᤋᤠ᤹ᤈᤧᤱᤔᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤛᤥᤛᤥᤖᤡᤰ ᤛᤠ᤹ᤖᤡᤰ ᤀᤠᤛ᤺ᤳᤗᤥ॥

¹³ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤔᤠ ᤁᤧᤴᤛᤠ᤹ᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤧᤏᤧ᤹ ᤛᤧᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥